සංවර්ධනයෙන් ඉහළයි එහෙත් විනයෙන් බිංදුවයි

ප්‍රතිචාරයක් ලබාදෙන්න

LOGO

 

2019/07/17 – ලංකාදීප

දැවැන්ත ප‍්‍රයත්නයකින් සංවර්ධනය කරා ගමන් කරමින් සිටින රටකි. නමුත් කාන්තාවකට තනිව මහ මග ගමන් කරන්නට පුලූවන්කමත් නැත. සාමය, සෞභාග්‍යය හා යස ඉසුරින් පිරි සිරිමත් රටක් බව ප‍්‍රකාශ වන නමුත් පැවැත්ම ඉතා කණගාටුදායකය.

ශ‍්‍රී ලංකාව ගමන් කරමින් සිටින ප‍්‍රපාතය ගැන පුලූල් සමාජ සාකච්ඡාවක් අවශ්‍ය වී තිබේ. විශාල ගොඩනැගිලි හා හොඳ මංමාවත් රටක දියුණුව මනින මිනුම් දණ්ඩ නොවේ. පාවෙන මාලිගා වැනි වාහන වලින් ඇති කරන මනරංජනීයත්වය පලක් නැත. විනය ඉතාම වැදගත්ය. පිරිමින්ගේ උසුළු විසුළු වලින් ගැලවී කාන්තාවකට නිදහසේ ගමන් කරන්නට ඉඩ නැති රටක් බිහිවී තිබීම කණගාටුදායක තත්ත්වයකි. කාන්තාවෝ කෙළි බඩු නොවෙති. ආදරයට හා ගෞරවයට පාත‍්‍ර විය යුතුය. 2015 වසරේ දී එක්සත් ජාතීන්ගේ ජනගහන අරමුදල කරන ලද පර්යේෂණයකට අනුව මෙරට කාන්තාවන් දහදෙනෙකුගෙන් නම දෙනෙකුම පොදු ප‍්‍රවාහන සේවාවල දී ලිංගික අඩන්තේට්ටම් වලට ගොදුරුවන බව පෙන්වා දී තිබේ. එහි ප‍්‍රතිඵලයක් වශයෙන් කාන්තාවෝ රැකියාවක් කරන අදහස අත්හැර දමා ඇත. වාර්තා පෙන්වන පරිදි කාන්තා ශ‍්‍රම බලකාය පහත වැටී ඇති අතර අඩුම තරම්න් වසර 2020 වන විට කාන්තා ශ‍්‍රම බලකාය සියයට හතලිහක් දක්වා නංවනු අරමුණ ඇතිව විශේෂ වැඩ පිලිවෙලක් ද ආණ්ඩුව ක‍්‍රියාවට නගා ඇත. නමුත් එයින් පලක් වී ඇත්දැයි සැක සහිතය.

මෙරට ඇතැම් පිරිමින් ගේ අප‍්‍රිය ජනක හැසිරීම රටට බලවත් නිගාවක් වී තිබේ. නීතිය හා විධි විධාන අනුව කාන්තාවන්ට කරන හිරිහැර දඩුවම් ලැබිය යුතු වරදකි. අතවර වලට ගොදුරුවෙන කාන්තාවෝ ලජ්ජාව නිසා නීතිය ඉදිරියට නොගොස් නිහඩව එය දරාගන්නා බව තේරුම් ගත යුතු අතර එය කිසිසේත් යහපත් තත්ත්වයක් නොවේ. පොදු සමාජයේ දී පිරිමින්ගේ අයුතු හැසිරීම නිසා කාන්තාවන්ට සිදුවන හිරිහැර නොසලකා සිටීම විශාල වරදකි. අවිනීත සිද්ධි සිදුවන බව පිලිගැනීමට මැලිවන අධිපතිවාදී මානසිකත්වයක පැවැතීම එයටත් වඩා දරුණු පිරිහීමක ප‍්‍රතිඵලයක් බව සඳහන් කළ යුතුය.

කාන්තාවන්ට, දරු දැරියන්ට සිදුවන හිරිහැර ගැන මෙම තීරුවෙන් මෙයට කලින් පෙන්වා දී තිබේ. දැරියන් සමග පාසලට ගොස් පාසල අවට ගැවසෙන දස දහස් සංඛ්‍යාත අම්මාවරු හෝ සෑම යුවතියක සමගම අතිරේක පන්තියට යන මවුවරු එසේ ක‍්‍රියා කරන්නේ ඇයි දැයි පෙන්වා දුන් බව මතක් කළ යුතුය. තමන් අත්විඳි අමිහිරි සිදුවීම් වලට තම දියණියෝ  මුහුණ දිය යුතු නැති බව දියණියන් සමග ගැවසෙන සෑම මවකම නිහඩව කියන පණිඩුවයකි. මෙම ඇත්ත තේරුම් ගැනීම අප සියළු දෙනා සතු බලවත් වගකීමක් බව සඳහන් කිරීම අවශ්‍යය.

නිවසෙන් බැහැරව සිටින අවස්ථාවක පොදු ප‍්‍රවාහනයේ දී, කාර්යාලයේ දී හෝ මහ මග දී රැකවරණයට පත් විය යුතු කාන්තාව, යුවතිය හෝ දියණිය මානසික රෝගී පුරුෂයන්ගේ ගොදුරු බවට පත්වීම නීතියෙන් පාලනය කළ හැකි දෙයක් නොවේ. ආගම, සාරධර්ම හා යහපත් ගුණාංග පිරිහීමේ ප‍්‍රතිඵලයකි. අලූත් සමාජයක් හදන්නට යෝජනා කරන පාලකයෝ මෙකී ස්වභාවය ගැන සොයා බැලිය යුතුය. සියළු ආගමික නායකයෝ සිය දේශනාවල හරය තේරුම් නොගත් සමාජයක් බිහිවීම ගැන හිතා බලන්නට අවශ්‍යය. සමාජ නායකයෝ සහ ආයතන ප‍්‍රධානීහු කාන්තාවට නිසි ගෞරවය අත්පත් කර දෙන වැඩ පිලිවෙල ආරම්භ කළ යුතුය. විවිධ ප‍්‍රශ්න ගැන සොයා බලා නිර්දේශ ඉදිරිපත් කරන පාර්ලිමේන්තු තේරීම් කාරකක සභා පත් කර තිබේ. කාන්තාවන්ට සිදුවන ලිංගික අතවර ගැන සොයා බලා විසªම් යෝජනා කරන පාර්ලිමේන්තු තේරීම් කාරක සභාවක් පත් කිරීම සුදුසුය. රටේ ව්‍යවස්ථාදායකය මෙකී ගැටළුව අතට ගැනීම යහපත්ය.

Advertisements

සැකය වෛරය වෙනුවට සුහදත්වය මෛත්‍රීය ගොඩනගමු

ප්‍රතිචාරයක් ලබාදෙන්න

LOGO

2019/07/10 – ලංකාදීප

සිරිමත් පැවැත්මක තිබුණ රට අසෝබන තැනකට තල්ලූවෙමින් තිබේ. බෙදීම් ඉතාම නරක අන්දමට සමාජය හසුරුවන්නට සූදානම් බව නිරීක්ෂණය කළ හැකිය. අප සියළු දෙනා දකින්නේ අවලස්සන තාරා පැටවුන්ය. ජාතිය, ආගම අනුව කොන් කිරීම සහ සමච්චල් කර පැත්තකට කිරීම ඉතා පහසුවෙන් සිදුවෙයි. අවලස්සන තාරාවා අවසානයේ දී අඟ පසඟ වැඩුණ පසු හංසයෙකු සේ ඉගිල යන්නට බැරි නැත.

මෑත කාලය තුළ මෙරට සිදුවූ සිද්ධි අපේක්ෂිත ඒවා නොවේ. මරාගෙන මැරෙන පාස්කු ඉරිදා ප‍්‍රහාරය ජන සමාජය තැතිගන්වා ඇත. අන්තවාදී කණ්ඩායම් වල සාහසික ක‍්‍රියා අනුමත කළ නොහැක. නමුත් එක අන්තවාදයට උත්තරය තවත් අන්තවාදයක් බෝ කිරීම නොවේ. අන්තවාදයක් ඇති කරමින් සිටින බව පැහැදිලි අතර දැනුවත්ව හෝ නොදැනුවත්වම රට තුළ බේධකාරී තත්ත්වය පාලනය කරගත නොහැකි තරමට දරුණු වී තිබේ. ජනකොටස් අතර පරතරය පුලූල් වී ඇත. පරම්පරාවකට දෙකකට කලින් එකට, එක වාසයකට නතු වී සිටි ශ‍්‍රී ලංකාවේ පුරවැසියෝ සැකයෙන් වෛරයෙන් ජීවත්වන පාර්ශව බවට පත්වෙමින් සිටින බව නිරීක්ෂණය කළ හැකිය. වෙනස්කම් සහිත නමුත් එකම රටක එක පුරවැසියන්යැයි ප‍්‍රකාශ කරන්නට මැලිකමක් දක්වන තරමට එය දුරදිග ගොස් ඇති බව පැහැදිලිව පෙනෙන අතර එය කිසිසේත් අභිමානයට හේතුවක් නොවේ.

එකතු කළ යුතු පැති ව්‍යාකූල කරන සිදුවීම් ගැන අප සියළු දෙනා ගැඹුරු අවධානයක් යොමු කළ යුතුය. ඇතැම් දේශපාලන නායකයන් ඉතා පටු ආකාරයට ක‍්‍රියාකරමින් සිටිති. ආගමික පැතිවලින් පවා එය සිදුවෙයි. අසත්‍ය හා මිත්‍යා කරුණු දේශනා කරන අතර ඒවායෙන් ඇතිකරන මතවාදය බරපතලය. දේශපාලකයන්ගේ දේශන හා ආගමික දේශනා වලින් ඇති කරන පීඩනය යුක්ති ගරුක සමාජයට කිසිසේත් ඔරොත්තු නොදෙන තත්ත්වයකි. දේශපාලනඥයන් ගේ හැසිරීම බලය ආරක්ෂා කරගැනීම හෝ බලය ලබා ගැනීම බව පැහැදිලිය. නමුත් සමාජයට සත්‍ය පෙන්වා දී දර්ශනයකට යොමු කළ යුතු ඇතැම් ආගමික නායකයෝ අරමුණු කරන්නේ කුමක්දැයි පැහැදිලි නැත. මුදු ගුණය ඇතිකර නැවත පෑරුණ සිත් සනහන්නට ඇතැම් වැදගත් දේශපාලනඥයන් හා ආගමික නායකයෝ වෑයම් කරන නමුත් ඒවා බලවත්ව නැගෙන්නේ නැත. ජන මාධ්‍ය පවා එයට එක්තරා අන්දමකට වගකිව යුතුය. ජනමාධ්‍ය අභිබවා නැගී ඇති නූතන සමාජ මාධ්‍ය ප‍්‍රවාහය යහපත් හෙටක් තනන වගකීම තවත් සංකීර්ණ ස්වභාවයකට පත් කර තිබේ.

පවතින තත්ත්වය අනුව ඉදිරි කාලයේ දී මෙකී පැවැත්ම තවත් නරක විය හැකිය. ඉතා තියුණු තරගකාරී මැතිවරණ ගණනාවක් පැවැත්වෙනු ඇති අතර ඒවායේ දී දේශපාලන පක්ෂ අතර මතුවන ගැටුම අන්තවාදී ආකෝෂ පරිභව බහුල පරිසරයක් තනනු නිසැකය. අවසානයේ දී දියුණු, පොහොසත් සමාජයක් අපේක්ෂා කළ හැකිද?

පටු අවිද්‍යාවාදීන් පරාජය කරනු සඳහා සියළු මානුෂික බලවේග එකතු විය යුතුව තිබේ. යුක්තිය වෙනුවෙන් පෙනී සිටින්නට අවශ්‍යය. නැවත බිංදුවෙන් ආරම්භ කරනු සඳහා වැඩ පිලිවෙලක් සැකසීම වැදගත්ය. බිදවැටීම්, පරාජයවීම් හා ඛේදවාචක වලින් බහුල අතීතය සහමුලින්ම අමතක කර අලූතින් සියළු දේ ආරම්භ කරන්නට පියවර ගැනීම සුදුසුය. රට ගොඩනගන නායකයෝ වෙනුවට අතීතය අමතක කර බිංදුවෙන් නැවත ගමන ආරම්භ කරන්නට තරම් ශක්තියක් ඇති නායකයෝ අප සොයා ගත යුතුව තිබේ.

 

 

 

 

 

නස්රුදීන්ගේ එල්ලා මැරීම

ප්‍රතිචාරයක් ලබාදෙන්න

LOGO

2019/07/03 – ලංකාදීප

නස්රුදීන් ගේ උපහාසාත්මක කතා ලෝක ප‍්‍රකටය. දහ තුන්වැනි සියවසේ දී ඔහු ජීවත් වූ ප‍්‍රදේශය දැන් තුර්කිය ට අයත්ය. එකල එහි විසූ පාලකයා නගරයට අනවශ්‍ය මිනිසුන් පැමිණීම වලකනු සඳහා නගර ද්වාරයේ එල්ලූම් ගසක් ස්ථාපිත කළේය. මිනිසුන් සත්‍යගරුක විය යුතු බව කියා සිටි හෙතෙම නගරයට ඇතුළුවන අයගෙන් ප‍්‍රශ්න අසා ඔහු හෝ ඇය අසත්‍ය ප‍්‍රකාශ කරන බව ඒත්තු ගියහොත් එල්ලා මරා දමන සේ නියෝග කළේය. ජනතාව දෙන උත්තරය කුමක් නමුත් එල්ලා මරා දැමීමට හේවායෝ නැඹුරු වූහ. එය මහා ව්‍යසනයකි. අධිරාජ්‍යයාට කරුණු කී නමුත් පලක් වූයේ නැත. අන්තිමේ දී පාලකයා කරන අපරාධය නතර කරන්නට නස්රුදීන් ඉදිරිපත් විය. ඔහු නගරයට ඇතුල්වන දොරටුව ඉදිරියේ පෙනී සිටි අතර හේවායෝ නගරයට එන්නේ ඇයි දැයි ප‍්‍රශ්න කළ විට ‘‘ එල්ලිලා මැරෙන්නට ’‘ යැයි උත්තර දුන්නේය. ඒක බොරුවක් හේවායෝ එක හෙලා කියා සිටියේය. ‘‘එහෙනම් එල්ලාපල්ලා’’ නස්රුදීන් කියා ඇත. එහෙම කළොත් නස්රුදීන්ගේ උත්තරය ඇත්තක් බවට පත්වෙයි. පාලකයා එල්ලූම් ගස ඉවත් කරන ලද බව කියැවේ. මෙම කතාව නස්රුදීන් ගේ දක්ෂතාව දක්වයි. පාලකයන්ගේ තීරණ වල අභ්‍යන්තරය පෙන්වයි.

මරණ දඩුවම ක‍්‍රියාත්මක කිරීමට ජනාධිපතිවරයා තීරණය කර තිබේ. මත් ද්‍රව්‍ය ජාවාරම් වල සිට මිනිස් ජාවාරම් දක්වා පාලනය කරගත නොහැකි තරමට අපරාධ ඉහවහා ගොස් තිබේ. අපරාධ අවම කරනු සඳහා නීතිය උපරිමයෙන් කි‍්‍රයාත්මක කළ යුතු බව අවධානයට ගෙන ඇති බව පෙනේ. මෙම තීරණය ගැන මෙරට පොදු ජනතාව තුළ මිශ‍්‍ර අදහස් ඇති බව නිරීක්ෂණය කළ හැකිය. මහ පොළව නුහුලන අපරාධ වලට මරණ දඩුවම දිය යුතු බව ජනතාව එක හෙලා කියන නමුත් එල්ලා මරන්නේ හැබෑ අපරාධකාරයන්ද? පොදු ජනතාව පාලකයන්ගෙන් ඉල්ලන්නේ යුක්තිය හා සාධාරණත්වයයි. අපරාධකාරයෙකු එල්ලා මැරීම ජනතා අභිලාශ සාක්ෂාත් කිරීමක්ද? රටට යුක්තිය ඉටු වී ඇතැයි සතුටු විය හැකිද?

මරණ දඩුවම ගැන අන්තර් ජාතිකව විශාල විවාද තිබේ. ඇමරිකාවේ ප‍්‍රාන්ත සෑහෙන ප‍්‍රමාණයක මරණ දඩුවම කි‍්‍රයාත්මක වෙයි. ප‍්‍රජාතන්ත‍්‍රවාදය ඉහළින්ම බලපවත්වන ඇමරිකානු නීතිය අනුව මනුෂයාගේ ජීවිත අයිතිය පැහැර ගැනීමට ප‍්‍රතිපාදන සලසා ඇත. අනෙක් පැත්තෙන් චීනය ද මරණ දඩුවම ක‍්‍රියාත්මක කරයි. චීනයේ කොමියුනිස්ට් පාලනය ප‍්‍රජාතන්ත‍්‍රවාදී පාලන මුහුණුවරක එකක් නොවේ. එය චීන ක‍්‍රමයයි. සෑහෙන ආර්ථික දියුණුවක් සහිත සිංගප්පූරුව ද කලාතුරකින් අපරාධකරුවෝ මරා දමති. එහෙත් යුරෝපා රටවල් මරණ දඩුවමට එකඟ නැත. මරණ දඩුවම ක‍්‍රියාවට නැගීම උසස් මනුෂ්‍ය ගුණාංග වලට හානියක් බව කල්පනා කරති. ඝාතනය කිරීම වරදක් කරන ලද කෙනෙකුට එය තේරුම් ගෙන නිවැරදි වෙන්නට ඉඩක් දෙන්නේ නැති දරුණු තීරණයක් බව යුරෝපා ප‍්‍රජාවගේ අදහසයයි.

මරණ දඩුවම ක‍්‍රියාවට නැංවිය යුතු බවට රට තුළ සෑහෙන කාලයක් තිස්සේ ආන්දෝලනයක් තිබුණි. නීතිය අනුව අධිකරණයෙන් දෙන තීරණය ජනාධිපතිවරයාගේ අත්සනින් ක‍්‍රියාත්මක කළ යුතුය. එල්ලා මරන්නට නියම වූ සෑහෙන පිරිසක් බන්ධනාගාරයේ අදුරු සිරමැදිරිවල ජීවත්වෙති. මෑත කාලය තුළ කිසිම ජනාධිපතිවරයෙකු මරණ දඩුවම් ලිපි ගොනු වලට අත්සන් තබා නැත. එම ප‍්‍රතිපත්තිය බැහැරව නීතිය අකුරටම ක‍්‍රියාවට නැගීමට ජනාධිපතිවරයා තද අධිශ්ඨානයක සිටින බව පැහැදිලිය. මත් ද්‍රව්‍ය සම්බන්ධයෙන් ඇති බරපතල විනාශය තුරන් කිරීම අරමුණ වී තිබේ.

මෙරට බලපවත්වන නීතියට අනුව මත් ද්‍රව්‍ය ජාවාරම මරණ දඩුවම නියම කරන වරදකි. දීර්ඝ නඩු විභාගයකට පසු දඩුවම නියමවන්නේ ජාවාරමක මැද පැටැලී ඇති එක පුද්ගලයෙකුටය. හැබෑ ජාවාරම්කරු නිරුපද්‍රිතය. සමහරවිට ලෝක ප‍්‍රකට මහා චරිතයකි. එල්ලූම්ගහට යන මනුෂ්‍යයාට මෙම යතාර්ථය ලෝකය හමුවේ කියා දෙන්නට පුලූවන්කමක් තිබේද? ඉදිරියේ දී පැවැත්වෙන මැතිවරණයක දී එයට සමාන්තර  පත‍්‍රිකාවකින් ජනතා ජනමතය විමසා බහුතර අනුමැතියෙන් තීරණයක් ගැනීම සුදුසුය.

 

 

දඩයමට එරෙහිව මාධ්‍ය එකතුව

ප්‍රතිචාරයක් ලබාදෙන්න

2019/06/26 – ලංකාදීපLOGO

රුසියාවේ ප‍්‍රධාන පුවත් පත් තුනක් එකම දවසේ එකම ප‍්‍රධාන සිරස්තලය සහිතව පසුගිය දා නිකුත් විය. එයින් නතර නොවූ අතර ඒකාබද්ධ කතුවැකියක් පළ කළේය. එම විශේෂ සිද්ධිය රුසියානු භාෂාව නොදන්නා ලෝක වාසින් ගේ අවධානයට ලක් කරන්නට බටහිර මාධ්‍ය සමත් විය. මෙම වාර්තාකරණයට බලපෑ හේතුව රුසියාවේ ප‍්‍රකට ගවේශනාත්මක මාධ්‍යවේදියෙකු පොලිස් අත්අඩංගුවට ගැනීමයි. එකී වාර්තාකරණය ජාත්‍යන්තර ප‍්‍රජාවගේ අවධානය වහාම දිනා ගත් බව සදහන් කළ යුතුය. වාර්තාකරු අත්අඩංගුවට ගත්තේ ඇයි? එයට හේතු වූ පසුබිම කුමක්ද? අප දැනගත යුතු කාරණය එයයි.

ග්ලව්නොව් නමැති මාධ්‍යවේදියෙකු මෙලෙස මොස්කව් පොලිසියේ අත්අඩංගුවට පත් විය. හෙතෙම වරදක් කරන නැති අහිංසකයෙකු වන නමුත් රුසියන් ආණ්ඩුවේ වැරදි බරපලතල ලෙස විවේචනය කළ අයෙකි. පසුගිය කාලය තුළ එරට පුවත් පත් වල පළ කරන තොරතුරු සම්බන්ධයෙන් රුසියන් පාලනය සෑහෙන උදහසකින් පසුවිය. මාධ්‍ය වාරණය කරන උත්සාහයක නිරත වූ බව ද සඳහන්ය. මෙම සිද්ධියට ලක් වූ මාධ්‍යවේදියා දුෂණ හා ඒවාට වගකිව යුතු ඉහළ නිලධාරීන් ගැන බරපතල අනාවරණ ගණනාවක් කළේය. මොස්කව් පාලනය සලිත කරන්නට ඒවා සමත්විය. ග්ලව්නොව් නිහඩ කරනු සඳහා මත්ද්‍රව්‍ය භාවිතය ගැන චෝදනා එල්ල කළේය. එය නිරපරාදේ එල්ල කරන ලද බව පසුව කරන ලද පරීක්ෂණ වල දී තහවුරු විය.  මාධ්‍යවේදියා මත් ද්‍රව්‍ය භාවිතා කරන අයෙකු බව එරට අභ්‍යන්තර කටයුතු අමාත්‍යංශ වෙබ් අඩවිය පුවත් පළ කර තිබුණ අතර පරික්ෂණ හා මාධ්‍ය ගෙනගිය අරගලය හමුවේ එම තොරුතුරු පවා පසුව මකා දමන්නට එම අමාත්‍යංශය පියවර ගෙන තිබුණි.

ඇත්ත වශයෙන්ම මෙම මාධ්‍යවේදියා පාලකයන්ට හිසරදයක් වූ අතර මොයනම් ක‍්‍රමයකින් හෝ වරදක පටලවා පැත්තකට කරන්නට වෑයම් කරන ලද බව පැහැදිලිය. සිද්ධිය ගැන ආන්දෝලනය බලවත් වන විට චෝදනා අත්හැර ඔහු රුඳවුම්භාරයෙන් නිදහස් කරන්නට පාලකයෝ පියවර ගත්හ. එය කුඩා අත්වැරදීමක් යැයි පොලිස් ප‍්‍රකාශකයා මාධ්‍යවලට කියා සිටියේය. ‘‘වැරදීම් සිදුවිය හැකියි. වැදගත්වන්නේ වරදක් සිදුවූ පසු එය නිවැරදි කිරීමට ගන්නා ක‍්‍රියා මාර්ගයයි’’ යනුවෙන් මොස්කව් බලධාරීහු කියා සිටි අතර එය කිසිසේත් පහසුවෙන් හිස නොනමන රුසියානු පාලකයන් කළ ඉතා විරල ප‍්‍රකාශයක් සේ සැලකේ. සත්‍ය අනාවරණය කිරීමට එරෙහිව එල්ල වන මර්දනය පරාජය කරන්නට ප‍්‍රධාන පුවත් පත් තුනක් එකතු වූ අතර එය නූතන මාධ්‍ය භාවිතාවේ වැදගත් සනිටුහනක් තබා තිබේ.

ලෝකයේ කොතැනක දී පවා පාලකයෝ එක පැත්තකය. ඔවුන්ගේ වැරදි හෙළි කිරීමට ඉඩ නොදේ. විරෝධය දක්වන්නෝ නොහදුනන ඉලක්ක වලට ගොදුරු වෙති. එකතුවී, එකමුතුව ක‍්‍රියා කළහොත් මර්දනයට එරෙහි ශක්තිමත් බලවේගයක් වනු ඇත.

ශ‍්‍රී ලංකාව බෙදීම් බහුල රටකි. එකමුතුව නැත. වෘත්තීය සංවිධාන පොදු අරමුණකින් එකතු නොවේ. දැන උගත් බුද්ධිමතුන් එක අරමුණකින් එකට එකතු කිරීම පහසු නැත. දේශපාලනඥයන්, ජාතික නායයකයන් එකට එකතු කරන්නට ගත් වෑයම් අසාර්ථක වී තිබේ. මාධ්‍ය අතර පමණක් නොව මාධ්‍යවේදීහු අතර ද සිද්ධියක දී එකට එකතු වන ස්වභාවයක් නැත. ජනමාධ්‍ය එල්ල වන බලපෑම් ගැන මෑත කාලයේ නොයෙක් තොරතුරු වාර්තා විය. හුදෙකලා සටන් හැර සංවිධානාත්මකව පියවර ගන්නට සූදානම් බවක් නොපෙනේ. විද්‍යුත් හා මුද්‍රිත මාධ්‍ය වශයෙන් පවා බෙදීම් තිබේ. එය බරපතල දුබලතාවයකි. ප‍්‍රජාතන්ත‍්‍රවාදී රටක ජනතා බලය ඉතාම වැදගත්ය. ජනතා සංවිධාන එකතුවුවහොත් අසීමිත ශක්තියක් ගොඩනැගිය හැකිය. මර්දනය හමුවේ ගත හැකි පියවර පටු බෙදීම් පැත්තකින් තබා එකට එකතුවීම පමණකි.

රාජ්‍යයක් නොකළයුතු කරුණු 3ක් ගැන වියට්නාමයෙන් පාඩමක්

ප්‍රතිචාරයක් ලබාදෙන්න

LOGO

2019/06/12 – ලංකාදීප

වියට්නාමය ලෝකයේ බලවත් ජාතීන්ගෙන් සෑහෙන බැට කෑ රාජ්‍යයකි. ප‍්‍රංශය, ජපානය හා ඇමරිකාව යනාදී වශයෙන් රටවල් වියට්නාමය යටත් කරගෙන සිටියේය. ස්වකීය අධිරාජ්‍යවාදී ඒකාධිපති පාලනය පෙරලා නිදහස් රටක් ගොඩනගා ගන්නට වියට්නාමය සූදානම් වන විට මෙකී රටවල් වියට්නාමය යටත් කරගන්නට ප‍්‍රයත්න දැරීය. අසල්වැසි චීනය සමග පවා අඛණ්ඩව වියවුල් සහගත තත්ත්ව වල පැටලී සිටියහ. කිසිම රටකට යටත් වෙන්නට සූදානම් නොවූ වියට්නාම් ජාතිකයෝ අති මහත් ධෛර්යයෙන් යුතුව සටන් කළ බව ඉතිහාසයේ සටහන්ව තිබේ. ඇමරිකානු හමුදාවලට එරෙහිව වසර විස්සක් සටන් කර ඇත. ඉතා උපායශීලී, යටිබිම්ගත සටන් වල නියැලි පරාජයවීමට සූදානම් නොවූ වියට්නාම් ජාතිකයන්ගේ ආත්ම ශක්තිය පුදුම සහගත බව ජගත් විචාරක මතයයි.

අතීත සිද්ධි අමතක කර නැවත අභිමානයෙන් නැගී සිටින වියට්නාමය මෑත දශක කිහිපය තුළ ජාත්‍යන්තර සම්බන්ධතා සම්බන්ධයෙන් විශේෂ අවධානයකින් ක්‍රියා කර තිබේ. හොඳ මිතුරන් හදුනාගන්නට පමණක් නොව මිතුරු වෙසින් එන ආක‍්‍රමණිකයන් වෙන් කර දකින්නට ද සමත් වී ඇත. ලෝකයේ රටවල් 168 ක් සමග රාජ්‍යතාන්ත‍්‍රික සම්බන්ධතා ගොඩනගා ගැනීමට වියට්නාමයට හැකි වී තිබේ.  ජාතීන් අතර සබඳතා ඇතිකරගැනීමේ දී  නොකරන හෝ නොකළ යුතු දේ තුනක් ප‍්‍රසිද්ධ කර ඇත. නොකරන කරුණු තුනක් යනුවෙන් එය දක්වා තිබේ. එකක් කිසිසේත් ආරක්ෂක සහයෝගීතා ඇතිකරගන්නේ නැති බවය. කිසිම රටක් සමග ආරක්ෂාව සම්බන්ධ ගිවිසුම් හෝ අවබෝධතා අත්සන් කරන්නේ නැත. දෙවැන්න වෙනත් රටකට විරුද්ධව තවත් රටක් සමග සම්බන්ධතා ඇතිකර නොගන්නා බවයි. තවත් රටකට විරුද්ධව වෙනත් ලෝකයේ කිසිම රටක් සමග එකතු වී බලවේගයක් නොවෙන බව ශපථ කිරීම එහි අරමුණ වී තිබේ. අනෙක, එනම් තුන් වැනි පොරොන්දුව විදේශ හමුදා සේනාංක වලට වියට්නාමය තුළ කදවුරු බදින්නට ඉඩ නොදෙන බවය. මෙම කරුණු තුන වියට්නාමයේ ජාතික විදේශ ප‍්‍රඥප්තියේ ප‍්‍රධාන ගිවිසුමක් වී ඇත.

වියට්නාමයේ අධිශ්ඨානය ඉතා ප‍්‍රායෝගිකය. ලෝකයේ එකිනෙකට වෙනස් තත්ත්ව හමුවේ පවා නොඇලී, නොගැලී සිටින්නට සමත්ය. අපට ඉගෙනගත හැකි පාඩම කුමක්ද? ලංකා රාජ්‍ය, අවුරුදු හාරසියයක් දළ වශයෙන් පරම්පරා පහක් පරාධීනව සිටියේය. අපරාජිතව, අභීතව නැගී සිටින්නට තැත් දරන ලද හැම අවස්ථාවකම පාවාදෙන්නෝ සිටියහ. තාන්න, මාන්න වලට ලොබ බැ`ද කරන ලද කුමන්ත‍්‍රණ අධිරාජ්‍යවාදීන්ගේ කටයුතු පහසු කළේය. නිදහස ලබා ගැනීමෙන් පසු ගත වූ දශක හත තුළ පරණ වැරදි හදා ගත්තේ නැත. වර්තමානයේ පවා බෙදීම්, ගැටීම් බහුලය. එක ආණ්ඩුවක් කරන දේ අනෙක් පාර්ශවයට සුදුසු නැත. වෙනත් මතයක් ඉවසන්නට හෝ හරි දේ හදුනාගන්නට අසමත්ය. මේවා ගැන නොසිතන්නේ නොසිතන්නේ ඇයි?

හැමදාමත් විදේශ කුමන්ත‍්‍රණ ගැන ගෝසා කරයි. ගිවිසුම් ගැන නොසන්සුන් වෙයි. බටහිරට පමණක් නොව අපරදිග රටවලට ද භූමිය පවරා දෙන බවට චෝදනා නැගේ. ජාත්‍යන්තර ගිවිසුම් හරහා රට තුළ හමුදා කඳවුරු හැදෙන අතර එය විශාල පාවාදීම් බව ප‍්‍රකාශ වෙයි. විදේශ සම්බන්ධතා ඇතිකරගැනීමේ දී නොකළ යුතු කරුණු ගැන එකඟතාවයක් ඇති කරගත නොහැකි මන්ද? එවැනි ප‍්‍රතිපත්ති ස්ථිර හා නොබිඳීය හැකි ඒවා සේ සලකා ක‍්‍රියා කරන්නට අපොහොසත් මන්ද?

දේශපාලනඥයන් මෙම ප‍්‍රශ්න ගැන අලූතින් හිතන්නට අවශ්‍යය. පක්ෂ දේශපාලනයේ දී පටු චෝදනා හෝ අසත්‍ය ප්‍රලාප දෙඞීම සුදුසු නැත. රටට ගැලපෙන පොදු ප‍්‍රතිපත්තියක් හදා සෑම මිතුරු රාජ්‍යයක් වෙතම සමාන අවස්ථා පිරිනැමීම අද යුගයේ පවතින බලවත් වගකීමකි.

 

 

 

දේශපාලන නාරාවළෙන් ගොඩගන්න සම්මුතියකට ඒන්න බැරි ඇයි?

ප්‍රතිචාරයක් ලබාදෙන්න

LOGO

2019/06/05 – ලංකාදීප

මුහුණ සමග අමනාප වන අප නාසයෙන් පලිගැනීමට දක්ෂයෝ වෙති. පැරණි උපහැරණ එයට සාක්ෂි දරයි. වර්තමානයේ ස්වභාවය ද එය, නැවත නැවතත් සනාථ කරන බව පෙනේ. ‘‘දෙසිය විසි පස් දෙනාම එකයි’’ යන මතය ගොඩනැගෙන්නේ එහි ප‍්‍රතිඵලයක් වශයෙනි. දෙසිය විසි පහ යනුවෙන් දක්වන කණ්ඩායම පාර්ලිමේන්තුවට පත්ව සිටින මහජන නියෝජිතයන් බව සැලකිය යුතුය. නියමාර්ථයෙන් ප‍්‍රශ්න කළහොත් දේශපාලන නායකයෝ සියළුම දෙනා හොරු ද? නොඑසේනම් වංචාකාරයෝ ද? රටට කිසිම වැඩක් කරන්නේ නැති කොටසක්ද?

අවංක අධ්‍යයනයක යෙදුනහොත් මැති ඇමැතිවරු පවතින සමාජයේ හරස් කඩකි. ජනතාව හමුවට ගොස් විශාල කැමැත්තක් දිනාගෙන සෑහෙන ඡන්ද ගණනක් ලබා ගෙන පාර්ලිමේන්තුවට තේරී පත්වීම පහසු කාර්යයක් නොවේ. පොදුවේ බලන විට දේශපාලනඥයෝ  සියළුම ආකාරයෙන් පිරිසිදු නැත.  නමුත් මෙම සෑම පුද්ගලයෙකුම මහජන නියෝජිතයෙකි. ජනතා නායකයෙකි. වංක, වංචනික, තීරණයක් ගත නොහැකි, බලලෝභී හෝ මහජන මුදල් කාබාසිනියා කරන්නේ නම් ඒවා නිවැරදි කරගන්නට ජනතාවට වගකීමක් තිබේ. මැතිවරණයක දී බහුතර ඡන්දයෙන් තීන්දුවක් ගත යුතුය.  පුද්ගලයන් දුෂිත හා පලකට නැති තැනට පත් වන හේතුව ද විමර්ෂණය කිරීම ඉතාමත් වැදගත්ය.

ඡන්දය දී බලයට පත් කරන දේශපාලනඥයාගෙන් දරුවාට හොද පාසලක් ලබා ගැනීමේ සිට තමන්ට සංස්ථාවක සභාපතිකමක් ගැනීම දක්වා පුලූල් පරාසයක වැඩ කොටසක් බලාපොරොත්තු වන බව දැක්විය යුතුය. මේවා කරන්නට පුලූවන්කමක් නැත. දේශපාලන පක්ෂ ගෝත‍්‍රික වී තිබේ. පක්ෂයේ අනුගාමිකයෝ පක්ෂය බලයට පත් වන තෙක් බලා සිටිති. තමන්ට වැඩක් කරගන්නටය. මරාගෙන මැරෙන දේශපාලන ක‍්‍රමයක් නිර්මාණය වන පසුබිම එයයි. නොබෝදා අවසන් වූ ඉන්දීය මහමැතිවරණය එක උදාහරණයකි. පත් වූ මන්ත‍්‍රීවරුන් 539 ක ගෙන් 233 කට එනම් සියයට පනහකට පමණ අපරාධ චෝදනා තිබේ. වැරදිකරුවන් නායකයන් වශයෙන් තෝරා ගැනීමේ ප්‍රවනතාව පසුගිය මැතිවරණයට වඩා ඉහළ බව ඉන්දීය මාධ්‍ය පෙන්වා දෙයි. චන්ඩියෙක් පත් කරගෙන තමන්ගේ වැඩ කරගන්නට හැකි වන එනම්, පාක්ෂිකයන්ට සලකන දේශපාලනය සඳහා ක‍්‍රමය හැදෙන්නේ කොහොම ද? එයත් සලකා බැලිය යුතුව තිබේ. රට ගොඩනගන, රටට දර්ශනයක් හදන ජන නායකයෝ බලයට පත් කරන ක‍්‍රමය ඉතාම විකෘති තත්ත්වයට පත්ව තිබේ.

ශ්‍රීලංකාවේ ඡන්ද ක‍්‍රමය අනුව අපේක්ෂකයා විශාල වියදමක් කළ යුතුය. දිස්ති‍්‍රක්කයක ප‍්‍රචාරක කටයුතු හා සංවිධානය කිරීම වෙනුවෙන් වැය කළ යුතු ධනය සුළු පටු නොවේ. මේවාට මුදල් ලැබෙන්නේ කොතැනින්ද? දේශපාලකයෝ වියදම් කරන මුදල් උපයන්නේ නීත්‍යානුකූලව නොවේ. එය ප‍්‍රකට රහසකි.  ඕනෑම ක‍්‍රමයකින් හම්බකරන මුදල් යොදවා,  ඕනෑම නීතියක් අභිබවා සියළුම බලවේග වලට අභියෝග කර පාර්ලිමේන්තුවට යන පාර හදාගන්නා පුද්ගලයා මහජන නියෝජිතයාය. පලාත් පාලන ආයතනයේ සභිකයා ගේ සිට පලාත් සභාව, මහජන මන්තී‍්‍රවරු ඇතුළු රටේ ඉහළම තනතුර දරන පුද්ගලයා ද තෝරා ගැනෙන්නේ මෙම අතිශය කණගාටුදායක ක‍්‍රමය අනුවය. ක‍්‍රමය වෙනස් කරන්නට ජනතාව සූදානම් නැත. ජනතාව පත් කරන පාලකයෝ ක‍්‍රමය වෙනස් කර යුක්තිගරුක ව්‍යුහයක් හදන්නට එකතු වෙන්නේ නැත. ධෛර්යයක් හෝ ආත්ම ශක්තියක් නැතිකම බලවත් දුර්වලකමකි. එවැනි පසුබිමක් තිබිය දී දෙසිය විසි පස් දෙනාම එකයි යනුවෙන් කියා සම්පූර්ණයෙන් පැත්තකට කර දැමීම සාධාරණ නැත.

බලය ඉල්ලන සෑම මහජන නියෝජිතයෙකුටම මෙම ක‍්‍රමය වෙනස් කරන්නට අවශ්‍යය. මෑත කාලයේ සෑම ඡන්ද ව්‍යාපාරයකම ප‍්‍රධාන පරමාර්ථයක් අතර සමානුපාතික මැතිවරණ ක‍්‍රමය හා මැතිවරණ වලට කරන වියදම වෙනස් කළ යුතු බව අවධාරණය වී තිබේ. නමුත් බලයට පත් වූ වහා එය තමන්ට කරගන්නට බැරි බව සනාථ වන අතර ඉතාම හොඳ අරමුණු සහිතව ඡන්දයට එන ජනතා නියෝජිතයෝ පවා මෙම ක‍්‍රමයේ ගොදුරක් බවට පත් වෙති. කොතැනකින් හේ යමක් කඩා ගෙන තමන්ගේ පාක්ෂිකයන්ට සලකා ඊළ`ග වතාවේ ද ඡුන්දයෙන් දිනන ක‍්‍රමය ගැන කල්පනා කරනු හැරන්නට රට ගොඩනගන්නට මැති ඇමැතිවරුන්ට අවකාශයක් නැත. මෙම පසුබිම හªනාගෙන සම්පූර්ණ සංශෝධනයකට අවස්ථාව සකස් කරගන්නේ නැත්තේ ඇයි? අප සියළු දෙනාම මේ ගැන හිතන්නට, කතා කරන්නට අවශ්‍යය.

නඩු යන්නෝ වැනසෙන්නෝ

ප්‍රතිචාරයක් ලබාදෙන්න

LOGO

2019/05/29 – ලංකාදීප

නඩු යන්නෝ වැනසෙන්නෝ යනුවෙන් ජන ව්‍යවහාරයක් තිබේ. නඩුවක පැටලීම ව්‍යසනයක් යැයි එකල තහවුරු වන්නට ඇත. අදට ද විවාදාත්මකය. අධිකරණය අරභයා එක්තරා භීතියක් තිබේ. එය අනව්‍යශ්‍යය. ගෞරවයක් තිබිය යුතුය. එය වෙනත් කාරණයකි. හැම දෙයකටම සීමාවක් තිබේ. අද වන විට අධිකරණයේ නඩු පවරන ස්වභාවය රට තුළ සුලබය. අධිකරණයෙන් තීරණය කළ යුතු දෙයටත් නැති දෙයටත් නඩු පැවැරීමට නැඹුරු වී තිබේ.  අධිකරණයෙන් තීරණ ගැනීමට හුරුවීම සුදුසු ද යන්න සාකච්ඡුා කළ යුතුය.

ප‍්‍රජාතන්ත‍්‍රවාදී පාලන ක‍්‍රමය තුළ විධායකය, ව්‍යවස්ථාදායකය හා අධිකරණය යන අංශ තුනක් තිබේ. මෙම ව්‍යුහ අතර සමබර පැවැත්ම ජන සම්මතවාදය තහවුරු කරයි. ව්‍යවස්ථාදායකය, එනම් මහජන නියෝජිතයෝ එකතුවන පාර්ලිමේන්තුව නීති හදයි. අධිකරණය එම නීති ක‍්‍රියාත්මක කරයි. නීති හදන ආයතනයේ විශ්වාසය පලූදු වී තිබේ. මහජන නියෝජිතයන් කෙරෙහි ජනතාව සැක පහල කරයි. ජනතා ඡුන්දයෙන් බලයට පත් වන දේශපාලනඥයන්ගේ හැසිරීම හා ප‍්‍රතිපත්ති ගැන ජනතාව තුළ පිලිකුල වර්ධනය වී තිබේ. පාර්ලිමේන්තුවේ කටයුතු ගැන ඇති පිරිහීම පදනම් කරගෙන අධිකරණය වෙත අතිරේක බරක් පැටවී ඇත. හැම දෙයකටම අධිකරණයෙන් තීන්දුව අපේක්ෂා කරයි.

ව්‍යවස්ථාව ගැන, විධායකය හෝ මහජන නියෝජිතයන්ගේ තීරණ ගැන අධිකරණයට යන්නට යුහුසුළුවීම වර්තමානයේ දැකිය හැකි සුලබ තත්ත්වයකි. පාර්ලිමේන්තුව හා ඇමැතිවරුන් යටතේ ඇති අමාත්‍යංශ හා දෙපාර්තමේන්තු වල තීරණ ගැනීම පවා අධිකරණයෙන් අහන තැනට පත්ව තිබේ. නීතිපතිවරයා ගෙන් හෝ ශේෂ්ඨාධිකරණයේ මතය එනම් නීතිය පැහැදිලි කරගැනීම සාධාරණ විය හැකිය. අධිකරණයේ නඩු පවරා එම නඩු තීන්දුවක් අනුව ඉදිරි ක‍්‍රියාමාර්ග ගැනීමට හුරුවීම බරපතල ගැටළු සහගත බව ස`දහන් කළ යුතුය.

අධිකරණයේ තීරණ ගැනීම පනවා ඇති වගන්ති අනුව සිදුවෙයි. නීති හදන ව්‍යවස්ථාදායකයේ හෝ ජනතාව පත්කරන විධායකයේ තීරණ ගැන අධිකරණයෙන් තීන්දුවක් ඉල්ලා සිටීම බැලූ බැල්මට ඉතා ගැටළු සහගතය. ව්‍යවස්ථාදායකයට හෝ විධායකයට වඩා අධිකරණය ඉහළ යැයි මතයක් ඇති වෙයි. එම ආයතන වල බලතල අභිබවා යන ආකාරයේ ආරෝපිත බලයක් ගොඩනැගෙන්නට ඉඩ තිබේ. ප‍්‍රායෝගිකව සලකා බලන විට රටට හෝ ජනතාවට සිදුවන යහපතක් තිබේදැයි ප‍්‍රශ්න කරන්නට අවශ්‍යය.

අපරාධ හෝ සිවිල් නඩු අති විශාල ප‍්‍රමාණයක් අධිකරණ වල තිබේ. මේවා විසඳීමට ගතවන කාලය ගැන සාමාන්‍ය ජනතාවට ප‍්‍රශ්න ඇත. ව්‍යවස්ථාදායකයට හෝ විධායකයට ඇති බලතල අනුව ගන්නා තීරණ වලට එරෙහිව අධිකරණයේ නඩු පැවැරීමෙන් සිදුවන අනර්ථය ගැන සමාජ නායකයෝ පුලූල් අවධානයට ගැනීම වැදගත්ය. යම් අසාධාරණයක් හමුවේ යුක්තිය ඉල්ලා සිටීම ගැන එකඟ විය හැකිය. නමුත් සෑම කාරණයකටම අධිකරණයෙන් විසªමක් පැතීම ප‍්‍රජාතන්ත‍්‍රවාදය නොවේ.

ජනතාවගේ පරමාධිපත්‍ය තහවුරු කරන බල කණු තුන එනම් ව්‍යස්ථාදායකය, විධායකය හා අධිකරණය යන තැන් වලින් ඉටුකරන වගකීම හා ජනතාව අපේක්ෂා කරන යුතුකම ගැන අවබෝධයක් රටට අවශ්‍යය. මෙකී ආයතන වල සමබරතාවය බිඳ එකකට වඩා අනෙකකට බලය ආරෝපනයට ගන්නා උපක‍්‍රම වලින් සිදුවන හානිය බරපතල බව තේරුම් ගැනීම අවශ්‍යය. මේවායේ ප‍්‍රධානීහු උද්ගතවිය හැකි අනතුර ගැන අවධානය යොමු කළ යුතුය. විශ්වාසය තහවුරු කරන යුක්තිගරුක ආයතන වශයෙන් පවත්වාගෙන යන්නට ප‍්‍රයත්න දැරිය යුතුය.

 

 

 

 

Older Entries