2019 /12/25 – ලංකාදීප
ගැලවුම්කාරයාණෝ පහල වූ නත්තල් දිනය උදා වී තිබේ. ප‍්‍රධාන දේවමෙහෙය ඊයේ රාත‍්‍රියේ පැවැත්විණ. බෙත්ලෙහෙම් නගරයේ දී ජේසු බිළිදා උපන් අවස්ථාව කිතුනුවෝ මහත් භක්තියෙන් සමරති. ගැලවීමේ පණිවුඩය යේසුස් ක‍්‍රිස්තුස් වහන්සේ ලෝකයට ගෙන ආහ. ජනී ජනයා පාපය ඇතුළු සියළු දෙයින් ගලවා ගැනීම උන්වහන්සේ ගේ අභිප‍්‍රාය විය. සාමය උදාකරන අතර සමාජ සමානාත්මතාව ඇතිකර පේ‍්‍රමය පැතිරවීමට යුහුසුළු විය.
ත‍්‍රිපිටකය, තිරුක්කුරල්, බයිබලය හෝ කුරානය වෙනස් දෙයක් උගන්වා නැත. සාමය සහ සමාදානයට මග පෙන්වා දී තිබේ. සාමය ඇතිකරන්නේ වෛරයෙන් නොවේ. සියළු මනුෂ්‍යයෝ ආගමික දර්ශනය අවබෝධ කරගත යුතුය. නත්තල් සීනු හඩ පමණක් නොව පන්සලේ ඝන්ඨාර නාදය ද කියා දෙන්නේ මනුෂ්‍යත්වයේ අගයයි. අලූතින් දැයක් තන්නට නම් ආර්ථික, සමාජ පමණක් නොව ආගමික දර්ශනය ද මුහු කළ යුතුය. සමාජ විනය ඇති කර අලූත් යුගයක් ඇති කරන උවමනාව වත්මන් පාලනයට තිබෙන බව පෙනේ. රට එකතුකර එක්සත් කරන ප‍්‍රයත්නයක පසුවෙයි. 2020 උදා වෙන්නේ නැවුම් බලාපොරොත්තු සහිතවය. අපේක්ෂා සාක්ෂාත් කරන කාල යුගයක් නිර්මාණය කරගැනීම අප සියළුම දෙනාගේ පුලූල් වගකීමකි.
අර්බුද නිරාකරණය කරන රාජ්‍ය පාලනයක දී යුක්තිය සහ සාධාරණත්වය ක‍්‍රියාවෙන් සහතික කළ යුතුය. වෛරය තුරන් කිරීම අරභයා පැහැදිලි තහවුරුකිරීමක් අවශ්‍යය. ධර්මයෙහි හැසිරෙන තැනැත්තා ධර්මයෙන් ආරක්ෂා කරයි. ජනවරම ලැබුණ පදනම අනුව ආණ්ඩුව කි‍්‍රයාකළ යුතු රාමුවක් තිබේ.
මෙරට දේශපාලන ඉතිහාසය සිද්ධි හා කැලැල් වලින් බහුලය. පලිගැනීම අවිචාරවත් සේ භාවිතා කර තිබේ. ප‍්‍රතිවාදියා මර්දනය කර ජන සමාජයක් එකතු කරන්නට පුලූවන්කමක් නැත. දේශපාලන පලිගැනීම් අතීතය දෙස බලන විට 1977 වසර සන්ධිස්ථානයකි. එයට කලින් නොතිබුණා නොවේ. නිලධාරීන්ගෙන්, පාක්ෂිකයන් පලිගැනීමට ලක් වූ එකල එය අහිංසක සිද්ධි ලෙස සටහන් විය. ක‍්‍රමයෙන් බෝ වී හැදී වැඞී වර්ධනය වූ පලිගැනීම අද විෂම චක‍්‍රයකි. ඇමැතිවරු බලන්නේ ඉදිරිය දෙස නොව කලින් කරන ලද වැරදි ගැනය. නිලධාරීහු තනතුරුවලට එන්නේ අනාගතයේ දිනක පලිගැනීමට ලක්වන බව මතකයේ තබාගනිමින්ය. ආණ්ඩුවක් බලයට පත්කරන පාක්ෂිකයෝ කල්පනා කරන්නේ අනෙක් පාක්ෂිකයා අභිබවා තමන්ට ලැබෙන අවස්ථා ගැනය. මේවා ජනතාව එකතුකරන, රට එක්සේසත් කරන කාරණා නොවේ.
ස්වාධීන පොලිස්, ස්වාධීන අධිකරණ බව ප‍්‍රකාශ කරන අතරවාරයේ විනිවිද පෙනෙන ප‍්‍රජාතන්ත‍්‍රවාදයක් යැයි සළු පිළි පළදවන ලද නමුත් පැවැති ආණ්ඩුව ප‍්‍රතිවාදීන් මර්දනයට ගෙන ගිය පිලිවෙල ආදර්ශයට ගත යුතු නැත. බලය යනු යුක්තිය යැයි තීරණය කිරීම වරදකි. විශේෂ අධිකරණ පිහිටුවා, ව්‍යවස්ථා වෙනස් කර නැවතත් බලයට එන්නට ඉඩනොදෙන පියවර අනුගමනය කළේය. ඔවුහු කළ දේ රැගෙන ගොස් තිබේ. යහපාලනය යමපාලනයකින් අවසන් වූ බව දේශපාලන වේදිකාවේ කියැවෙයි.
පසුගිය ආණ්ඩුවේ නියෝග හෙයින් පොලිසිය දේශපාලන තීන්දු අනුව ක‍්‍රියා කර ඇති බව ඔප්පු වී තිබේ. එයින් නීතිය ගැන සැකය බලවත් විය. අධිකරණය හෑල්ලූ වී තිබේ. එය කෙරෙහි තිබුණ විශ්වාසය පලූදු වී ඇත. යුක්තිය සහ සාධාරණත්වය තහවුරු කර පැරණි වැරදි නිවැරදි කරනු වැදගත්ය. එයට අවශ්‍ය නෛතික බලගැන්වීම සුදුසුය. පාපයෙහි ගැලී සිටි තැනැත්තෝ එයින්ම පිරිහීමට ඉඩහරිනු හැර දේශපාලන බලය ප‍්‍රයෝජනයට ගෙන දඩයම් කරන බව දැනෙන්නට ඉඩ හැරීම සුදුසු නැත. නීතිය, යුක්තිය කෙරෙහි ඇති විශ්වාසනීයත්වය පලූදු කරන පලිගැනීම් රටට අනවශ්‍යය. මෙතැනින් සිද්ධි අහවර කළහොත් සමාජ ක‍්‍රමය අලූතින් බිහිවෙයි. කරන ලද වරද සමාජය හමුවේ පාපෝච්චාරණය කර ජනතාවගෙන් සමාව ඉල්ලා සිටින ක‍්‍රමයක් යෝජනා කළ හැකිය. දේශපාලනඥයෙකු නම් සමාව ගෙන දේශපාලනයෙන් ඉවත්විය යුතුය. සමාව යනු සියල්ල අමතක කිරීම නොවේ. දකුණු අප‍්‍රිකාවේ සත්‍ය කොමිසම ආදර්ශයකි.
Milinda Prashna 