පක්ෂ නායක තේරීම්වලට ජනතාව අනුගත විය යුතුද?

ප්‍රතිචාරයක් ලබාදෙන්න

2022/06/22 – ලංකාදීප

ඡන්දදායකයන් හා මහජන නියෝජිතයන් අතර පරතරය තවත් වටයකින් දුරස් වී තිබේ. අරගලය ඇරඹෙන මොහොත වන විට මැති ඇමැතිවරු ඇතුළු මහජන නියෝජිතයන් කෙරෙහි වෛරයක් සමාජය තුළ තිබුණි. ආර්ථික දුෂ්කරතා දරුණු විය. අතෘප්තියට පත් ජනී ජනයා විරෝධතා අවුලවන ලද අතර අවසානයේ උද්ගත වූ  ව්‍යසනයෙහි තරම ඉතාමත් බිහිසුණු එකක් විය.

ප‍්‍රශ්න විසදාගත හැකි ක‍්‍රමයක් ප‍්‍රජාතන්ත‍්‍රවාදී රාමුව තුළ තිබේ. බහුතරයේ කැමැත්ත ප‍්‍රජාතන්ත‍්‍රවාදයේ මූලික ගුණාංගයකි. අරගලය තුළ සිටින කණ්ඩායම ප‍්‍රජාතන්ත‍්‍රවාදයේ හරය නොදන්නා පිරිසක් නොවේ. ඔවුන් නගන හඩ පැහැදිලිය. දීර්ඝ කාලයක් තිස්සේ කැකෑරෙමින් තිබුණ ප‍්‍රශ්න වලට සාධාරණ විසදුම් නොලැබුණි. අවශ්‍යම කරන මොහොතේ තීරණ ගැනීමට පසුබට වූහ. නිතර සදහන් කරන පරිදි රටට ලැබුනේ පැලැස්තර විසදුම්ය. දැවෙන ගැටළු යටපත් කරන මහජන නියෝජිතයෝ ඒවා විසදන බව මහත් විශ්වාසයකින් කියමින් දේශණා පවත්වති. පාර්ලිමේන්තුවේ කතා කරන්නේ ජනතා අවශ්‍යතා නොවේ. අවසානයේ දී, මෙම සුපුරුදු දේශණා වලින් ජනතාව සැනසිය නොහැකි තැනට පැමිණ ඇත. එදිනෙදා ජීවත්වන පිලිවෙලක් නිර්මාණය කිරීම වහාම අවශ්‍යය. සුරක්ෂිත අනාගතයක් ගොඩනගන බවට විශ්වාසයක් ඇති කළ යුතුය. පවතින වාතාවරණය පෙන්වන පරිදි කිසිම දේශපාලනඥයෙකු හෝ දේශපාලන පක්ෂයක් ගැන විශ්වාසයක් රහිත සෑහෙන පිරිසක් අප අතර සිටී.

පැවැත්ම ගැන විශ්වාසයක් රහිතව ගමනක් නැත. තමන් නියෝජනය කරන පුද්ගලයා සමග හොද සංවාදයක් ප‍්‍රජාතන්ත‍්‍රවාදයට අවශ්‍යය. නියෝජිතයාට වෛර කරන, දේපොල ගිණි තබන, ඒවා වැනසෙන විට ඔල්වරසන් දෙන ක‍්‍රමයකින් අපට පැවැත්මක් නැත. ඡන්දය ගන්නට බඩු බෙදන, පාක්ෂිකයන්ට පමණක් සේවය කරන ගෝත‍්‍රික ක‍්‍රමයක සිට මහජන නියෝජිතයාට වෛර කරන තැන දක්වා පැමිණ ඇති ගමන ගැන ප‍්‍රශ්න කළ යුතු කාලය උදා වී තිබේ. මෙතැනින් ඔබ්බට රටට ඇති පාලන ක‍්‍රමය කුමක්ද? නියෝජිත ප‍්‍රජාතන්ත‍්‍රවාදී පාලනය ප‍්‍රතික්ෂේප කරන ස්ථාවරයකට පසු සමාජය ඉල්ලන්නේ කුමක්ද?

අපට පෙනෙන පරිදි, සෘජු පාලන ක‍්‍රමයක් අවශ්‍ය බවට මතයක් තිබේ. විධායකය හා ව්‍යවස්ථාදායකය අතර තිබිය යුතු බලය සම්බන්ධ දීර්ඝ විවාදයක් ඇත. තද තීරණ ගන්නා පාලනයෙකු ගැන ද අදහසක් පවතී. බලය බෙදන ක‍්‍රමවේදයක් කෙරෙහි ද දීර්ඝ කාලයක් තිස්සේ නොවිසදුණු අවධානයක් තිබේ. මේවා අතරින් සුදුසුම ක‍්‍රමය තෝරා ගැනීම සදහා තවත් පරම්පරාවක් වන්දි ගෙවිය යුතු නැත.

රටට අවශ්‍ය මෙතැන් සිට ඉදිරියට යන ක‍්‍රමවේදයකි. ජනතා විශ්වාසය දිනාගත හැකි දේශපාලන පක්ෂ උවමනා කර තිබේ. මහජන නියෝජිතයන් ගරුත්වය දිනාගත යුතුය. ජනතාවට ඇත්ත කියන, රට ගොඩනගන්නට කැපවන නියෝජිත ප‍්‍රජාතන්ත‍්‍රවාදී ක‍්‍රමයක් අවශ්‍යය. පටු අදහස් මතු කර රට බෙදන, රට විකුණන හා විජාතික කුමන්ත‍්‍රණ වැනි මත ඇවිලවීමෙන් රටට සිදුවී ඇති හානිය තක්සේරු කළ යුතු අතර මේවා අතහැර අලූත් රටක්, අලූත් ආර්ථිකයක් සදහා අවශ්‍ය ආර්ථික ජවය සහ ආයෝජන ලබාගැනීමට වෙහෙස විය යුතුව ඇත.

මැතිවරණ කොමිසම දක්වන පරිදි අලූත් දේශපාලන පක්ෂ ගණනාවක් ලියා පදිංචියට ඉදිරිපත්ව සිටී. පවතින පක්ෂවලට අමතරව ඡුන්දවලට සූදානම් වන බව පෙනෙන මෙම පක්ෂ සිය දැක්ම, ප‍්‍රතිපත්ති හා කැපවීම ගැන ඉදිරිපත් කරන අලූත්ම මතවාදය කුමක්ද? ප‍්‍රාදේශීය මටට්මින් ජනතාව ඒකරාශී කරගත හැකි, ප‍්‍රලාප දේශපාලනය බැහැර කරන ක‍්‍රමවේදයකින් හැර රටට අනාගතයක් නැත. මනාප ක‍්‍රමය සහ දිස්ත‍්‍රික් කොට්ඨාශ ක‍්‍රමය තුළ විශාල සම්පත් නාස්තියක් සහ දූෂණයක් සිදුවේ. දේශපාලන පක්ෂ වලින් නම්කරන පක්ෂ නායකයන් තෝරන නියෝජිතයන්ට ඡන්දය දෙන ක‍්‍රම වහාම වෙනස් කළ යුතුය. ජනතා නැගිටීම තුළ ඇති වූ සංසිද්ධි සාකච්ඡා කරන දේශපාලන පක්ෂ  සහ දේශපාලනඥයන් පාපෝච්ඡාරණය කළ යුතු අතර ඡන්දදායකයන්ගෙන් දුරස්ථවීම ගැන කණගාටු විය යුතුව ඇත. ප‍්‍රජාතන්ත‍්‍රවාදය ආරක්ෂා කරගැනීම වැදගත්ය. මහජනතාව හමුවට ගොස් ඡන්දය ඉල්ලන්නේ කෙසේදැයි හිතන්නට අවශ්‍යය. ජනතාවට සමීපවන වැඩපිලිවෙලක් ගැන දේශපාලනඥයන් හා පක්ෂ තීරණයක් ගත යුතුව තිබේ.

ධර්මයත් සමාජයත් සුරකින කථිකාවතක්

ප්‍රතිචාරයක් ලබාදෙන්න

2020/06/15 – ලංකාදීප

පොසොන් පුර පසලොස්වක දිනය ඊයේ ට යෙදී තිබුණි. මිහිදු මහ රහතන් වහන්සේ ලංකාවට වැඩම කිරීම, පොසොන් පොහොය දිනයෙක සිදුවිය. දඩ කෙළියෙහි නිරතව සිටි දේවානම් පියතිස්ස රජු සමග මිහිදු රහතන් වහන්සේ පවත්වන ලද සංවාදය ඉතා ප‍්‍රකටය. දහම අවබෝධ කරගන්නට තරම් ප‍්‍රඥාවන්ත සමාජයක් ද යන්න සනාථ කරගැනීම සදහා එය පවත්වා තිබේ. එවැනි සංවාදයක් අද නැවතත් අවශ්‍යය. ජන සමාජය දැනුමෙන් පොහොසත්ය. තාක්ෂණ අවබෝධය තිබේ. ප‍්‍රඥාවන්තභාවය ගැන ප‍්‍රශ්නයක් ඇත. අදහස් සහ මතවාද ඒවායේ වෙනස්කම් පුළුල්ව දකින්නට තරම් සමර්ථභාවයක් අපට නැත.

දහම තුළ ගැබ්ව ඇති කරුණු ක‍්‍රියාවට නැංවීම අවශ්‍යය. මධ්‍යස්ථබව, නොඇලී නොගැලී සිටීම කොපමණ වැදගත්ද? සංඝ සමාජයේ ඇතැම් භික්ෂුන් වහන්සේලා ගේ හැසිරීම උගන්වන පාඩමක් තිබේ. බුද්ධ දේශණාවෙහි එය සදහන්ව ඇත. සියල්ල වෙනස්වන සුළුය. ස්ථිර දෙයක් නැත. බුදු දහම පවා කාලානුරූපව වෙනස් වන බව ගෞතම බුදු රජාණන් වහන්සේ දේශනා කර ඇත. සියළු ආසාවන් අත් හැර නිර්වාණය සොයා යන ගමනට එකතු වූ  සමහර භික්ෂුන් වහන්සේ ලා ගිහියන් ද ඉක්මවා ප‍්‍රකෝපකාරීව හැසිරෙති. ප‍්‍රචණ්ඩය. වෛරීව කටයුතු කරති. මෑත කාලයේ සිදුවූ අරගලයේ දී ද එවැනි සිද්ධි දැකගත හැකිවිය. පසුගිය අවුරුදු දහයක දොලහක කාලය තුළ සමාජයේ සිදුවූ පිරිහීම සාසනයට ද බලපා තිබේ. සාසන කතිකාවතක් සංවිධානය කොට නිසි ක‍්‍රියාමාර්ග ගත යුතු බව මධ්‍යස්ථ මතධාරී නායක හිමිපාණන් වහන්සේලා ප‍්‍රකාශ කරති. තරුණ භික්ෂුන් වහන්සේලා ගේ පැවැත්ම අරභයා වැදගත් තීරණ වලට එළැඹිය යුතු බව දක්වන ලද අවස්ථා ගණනාවකි. එහෙත් එවැනි පියවර පහසු නැත. ශාසනයත්, භික්ෂුන් වහන්සේලාගේ හැසිරීම සම්බන්ධ ක‍්‍රියාකලාපයත් සංකීර්ණ අවධියකට පැමිණ තිබේ.

සංඝ සමාජය හා ගිහි පිරිස් අතර දුරස්ථබවක් තිබුණ අතර දැන් එකී පරතය ඉතාම අඩුය. බුද්ධ වංශයක් ගැන බුදු රජාණන් වහන්සේ දේශනා කර ඇත. ශුද්ධෝදන රජු අමතන බුදුන් වහන්සේ ඔබ ශාක්‍ය වංශයේ වන අතර තමන් බුද්ධ වංශයෙහි බව සදහන් කළහ. වර්තමානයෙහි මෙම පරතරය අවම තැනකට පත්ව ඇති බව පෙනෙන අතර එමගින් පත් වන අනතුර බෞද්ධයන් වශයෙන් අප හදුනාගත යුතුව තිබේ.

භික්ෂු අධ්‍යාපනය කාලානුරුපව ප‍්‍රතිසංවිධානය මනා පියවරක් වනු ඇත. තරුණ භික්ෂුන් වහන්සේලා පිරිවෙණකට සීමා කර පාලි, සංස්කෘත ඉගෙනගෙන සමාජ ප‍්‍රශ්නවලින් ඈත් කළ යුතු බවක් එයින් අදහස් නොකෙරේ. දැනුම, අවබෝධය හා ප‍්‍රඥාව සම්පාදනය කරන භික්ෂු විශ්ව විද්‍යාල ක‍්‍රමයක් ඇති කළ යුතුය. දැනට ඇති විෂය මාලා සංශෝධනය කර කාලීන සංකීර්ණ පර්යේෂණ අධ්‍යයනය කළ හැකි තැන් භික්ෂු අධ්‍යාපනය සදහා පිහිටුවීම සුදුසුය.

තරුණ භික්ෂුන් දේශපාලනය, ඉතිහාසය, තොරතුරු තාක්ෂණය හා ජාත්‍යන්තර ප‍්‍රවණතා ඉගෙනගැනීම ගැටළුවක් නොවේ. ගිහියන් සමග එකට අධ්‍යාපනය ලැබ සාමාන්‍ය සමාජයේ ප‍්‍රශ්නවලින් කැකෑරෙන හිත් ඇතිව පාරට බැසීම සුදුසු නැත. ආවේගයෙන් ගැටෙන අවස්ථා අනුචිතය. කදුළු ගෑස්, බැටන් ප‍්‍රහාර මැද ඇද වැටෙන චීවරය ජන සමාජයට ඇති කරන පීඩනය බලවත්ය. එය හුදෙක් සුළු සිද්ධි ලෙස තැකීම වරදකි. රට ජාතිය ගලවාගැනීම සදහා ජාතියේ මුර දේවතාවුන් වශයෙන් නැගී සිටීමක් ලෙස අර්ථ දැක්වීම අනුචිතය. රෝහිණී ගංගාවේ ජලය බෙදා ගැනීම සදහා ශාක්‍ය සහ කෝලිය දෙපාර්ශවය ගැටෙන අවස්ථාවේ රාජ්‍ය වෙනුවෙන් පෙනී නොසිටි බුදු රජාණන් වහන්සේ දෙපැත්ත සමගි කරන ලද බව දැක්වේ. රටට අවශ්‍ය එවැනි මග පෙන්වීමකි.

ශ‍්‍රී ලංකාව පැමිණ ඇති විනාශකාරී මාර්ගය සහ දේශපාලනයෙහි අගතිගාමී රාමුව ගැන සමාජයට ප‍්‍රශ්න තිබේ. ස්වකීය දායකයන් අත් විදින ගැහැට දකින තරුණ භික්ෂූන් වහන්සේලා චීවරය පසෙක තබා තීරණ ගැනීම වැලැක්විය නොහැක. ප‍්‍රශ්න දෙස මතුපිටින් බැලීම වෙනුවට සමාජය සුවපත් කරන දාර්ශණික මාර්ගයක් වෙත අවතීර්ණ විය යුතුය. එවැනි මගපෙන්වීමක් සදහා තරුණ භික්ෂූන් වහන්සේලා පුහුණු කළ යුතුය. හොද ඉගෙන ගැනීමේ පරිසරයක්, වෙනම අධ්‍යාපන ධාරාවක් සැපයීම අප සියළු දෙනාගේ වගකීමකි. එය ධර්මයත් ජන සමාජයත් ආරක්ෂා කරනු ඇත.

ශ්‍රී ලංකාවට පෙන්වන්න බැරි පෞද්ගලීකකරණය සිපගන්නා තලේඛාන්වරු

ප්‍රතිචාරයක් ලබාදෙන්න

2022/06/08 – ලංකාදීප

කාබුල් නගරයට කිලෝ මීටර් එකසිය තිහක් දුරින් පිහිටි ලෝක ප‍්‍රකට බාමියන් බුදු පිලිම වනසන ලද තලෙයිබාන්වරු ඇෆ්ගනිස්ථානයේ කාබුල් නගරය නැවතත් ලෝක අවධානය දිනා ගන්නට සමත් වී ඇත. කාබුල් ජාත්‍යන්තර ගුවන් තොටුපොල මෙහෙයුම් පෞද්ගලීකරණය කරන්නට තීරණය කර තිබේ.

තලෙයිබාන් පිලිම විනාශ කරන්නට බලපෑ හේතු අතර ඇෆ්ගනිස්ථානයේ දරිද්‍රතාවය ද එකකි. ජනී ජනයා ආහාර හිගයෙන් පීඩා විදින අතරවාරයේ ලෝක ප‍්‍රජාව බුදු පිලිම නඩත්තු කර ප‍්‍රතිසංස්කරණයට විශාල ආධාර ප‍්‍රමාණයක් යෙදවූ අතර එය නොඉවසන ලද තලෙයිබාන් ත‍්‍රස්තවාදීහු එය විනාශ කිරීමට ප‍්‍රහාරයක් එල්ල කළහ. එම සිද්ධියෙන් දශක දෙකකට පසු තලෙයිබාන්වරු ඇෆ්ගනිස්ථානයේ පාලනය අත්පත් කරගෙන සිටී. ඇමරිකානු හා නේටෝ හමුදා සමග වසර විස්සක යුද්ධයක් කළ ඇෆ්ගනිස්ථාන තලෙයිබාන්වරු අවසාන විදෙස් හමුදා සේනාංකය ද ඉවත් කරන තෙක් බලා සිටි අතර දැන් ආර්ථිකය නංවන සැලසුම් ඉදිරිපත් කරයි. කාබුල් ඇතුළු ගුවන් තොටුපොල තුනක මෙහෙයුම් එක්සත් අරාබි එමීර් රාජ්‍යයට අයත් සමාගමකට පැවැරීම සදහා ගිවිසුම් අත්සන් කර ඇත. එකී ගිවිසුම අනුව පර්යන්තයෙහි සම්පූර්ණ මෙහෙයුම්  එමීර් රාජ්‍යයේ සමාගමට හිමිවේ. ලෝකයේ ප‍්‍රකට ගුවන් සේවා ඇෆ්ගනිස්ථානයට කැදවන අතර ලෝකයේ සියළුම රටවල් සමග සම්බන්ධතා අරඹන්නට සූදානම් බව මෙහි දී ඉගි කරයි. ආයෝජන සහ සංචාරක අවස්ථා සදහා අවකාශයක් ඇති බව ඇෆ්ගන් අලූත් පාලනය ප‍්‍රකාශ කර ඇත.

දරුණු ත‍්‍රස්තවාදී අරගලයකට ගොදුරු වී සිටි ශී‍්‍ර ලංකාව දශක තුනකට පසු එයින් නිදහස් වූ අතර අද වන විට දරුණු සමාජ ආර්ථික පරිහානියකට මුහුණපා සිටී. ත‍්‍රස්තවාදය පරාජය කළ ශ‍්‍රී ලංකාව සාමයේ අභියෝගවල තරම නිසි ලෙස වටහා ගෙන නැත. සමාජය අවුල් වූ අතර බෙදී, ගැටුම් ඇති කරගෙන අන්තවාදයක් කරා ගමන් කළේය. මෙහි ලා බලපාන්නේ වගකීමක් රහිත අපගේ හැසිරීම බව ඉතාම පැහැදිලිය. ඇෆ්ගනිස්ථානයටත් වඩා නරක සමාජයක් බවට ජාත්‍යන්තරය ඉදිරියේ දිග හැරෙමින් තිබේ. මිත්‍යාවෙහි ගැලෙන, එයින් ක්‍රෝධය හා වෛරයට පාර හදා ගන්නා අප සියළුම දෙනා මෙම තීරණාත්මක අවස්ථාවේ දී අන්ධයන්, බිහිරන් සහ ගොළුවන් සේ සිටීම අනුචිතය.

ජාත්‍යන්තර ප‍්‍රජාව මෙතෙක් ඇෆ්ගන් පාලනය පිලිගෙන නැත. මානව හිමිකම් ප‍්‍රශ්න හා ත‍්‍රස්තවාදය යන කරුණු සම්බන්ධයෙන් චෝදනා එල්ල කරමින් සිටී. සවුදි අරාබිය සමග නිල සම්බන්ධයක් නැති බව ප‍්‍රකාශ කරන ඇෆ්ගන් පාලකයෝ මෙය හුදෙක් ව්‍යාපාරික අවස්ථාවක් බව නිවේදනය කර ඇත. ප‍්‍රජාතන්ත‍්‍රවාදී සමාජ ක‍්‍රමයකට ඇතුළුවන ත‍්‍රස්තවාදී කණ්ඩායමක් පුද්ගලීකරණයෙහි වටිනාකම හදුනාගෙන ඇති නමුත් ප‍්‍රජාතන්ත‍්‍රවා දී ගුණාංග සම්බන්ධ ආසියානු කලාපයේ දීර්ඝ ඉතිහාසයක් ඇති ශ‍්‍රී ලංකාව පුද්ගලීක ආයෝජන ගැන කල්පනා කරන්නේ ත‍්‍රස්තවාදී විලාශයකින්ය. ඉතාම නරක අවසානයක් කරා ගමන් කරන බව පැහැදිලිව පෙනී සිටින අවස්ථාවක පවා ආර්ථික ප‍්‍රතිසංස්කරණයකට සූදානම් නැත.

කටුනායක, හම්බන්තොට සහ රත්මලාන ගුවන් තොටුපොල පුද්ගලීකරණය කළ හැක. ශ‍්‍ර‍්‍රී ලංකන් ගුවන් සේවය විදේශ ආයෝජකයෙකුට පැවැරීම හොද ආයෝජනයකි. එයින් ලැබෙන ධනය සමාජයේ යහපතට වැය කළ හැකිය. ගුවන් තොටුපොල හා ගුවන් සේවය නඩත්තු කරන වියදම අඩුවනු ඇති අතර අතිරේක බදු ආදායමක් රටට ලැබේ. මෙම ආයෝජන හුදෙකලා සිද්ධි වශයෙන් සැලකි යුතු නැත. එවැනි විවෘත කිරීමකින් පසු ආයෝජන අවස්ථා ගැන විශ්වාසයක් ජාත්‍යන්තර ප‍්‍රජාවට ලැබේ. ක්ෂේත‍්‍රයෙහි වෙනස්කම් සිදුවන අතර නවතම තාක්ෂණය සහිත අලූත් ව්‍යාපෘති එකතුවෙනු ඇත. රටක් දියුණු කරන්නට එවැනි ප‍්‍රතිපත්ති ඉතාම වැදගත්ය. ජාත්‍යන්තර ගුවන් සේවා ආයතන සමග එකතුවන පසු සංචාරක කර්මාන්තය දියුණුවනු ඇත. සංචාරක කර්මාන්තය ඉක්මනින් විනිමය උපයා ගත හැකි අංශයකි.

ලෝකයේ අනෙක් රටවල් එනම්, ඇමරිකාව, බි‍්‍රතාන්‍ය, ජපානය හෝ සිංගප්පූරුව අනුගමනය කරන ලද ක‍්‍රම ගැන මෙතෙක් අවධානයෙන් සිටි ශ‍්‍රී ලංකාවට ඇෆ්ගනිස්ථානයෙන් පාඩම් ඉගෙන ගන්නට සිදුවීම කණගාටුවට කරුණකි. අවාසනාව එය නොවේ. ඇෆ්ගනිස්ථානයේ තලෙයිබාන් සටන්කාමීන් වෙනස් වන නමුත් ශ‍්‍රීලංකාවේ ඇතැම් පිරිසකගේ අන්තවාදී අදහස් වෙනස් කළ නොහැක.

පාරවල් හරස්කර අවනීතිය රජකරවීම

ප්‍රතිචාරයක් ලබාදෙන්න

2022/05/25 – ලංකාදීප

ඇසට ඇසක් නැත්නම් දතට දතක් යන න්‍යායක් ම්ලේච්ඡ ගෝත‍්‍රිකයන් අතර තිබුණි. වනචාරී සංස්කෘතික ලක්ෂණ පසුකරන ජන සමාජ නවීන විද්‍යාත්මක යුගයකට පැමිණ සිටී. සමාජ විනයක් තිබේ. ආගමානුකූල ප‍්‍රතිපත්ති මිනිසුන් සංයමට පත් කර ඇත.

සමාජයක දියුණුව ගොඩනැගිලි යාන වාහන පමණක් නොවේ. මනුෂ්‍යත්වය ද වැදගත්ය. සන්සුන්භාවය, ඉවසිලිවන්තබව රහිතව ඉදිරි ගමනක් නැත. පසුගිය දිනවල සිදුවූ තවමත් අවසානයක් දකින්නට නැති ගැටුම් අපට උගන්වන්නේ මොනවාද? උසස්යැයි කියාගන්නා නමුත් අප ඉල්ලන්නේ දතට දතක්ය. ඇසට ඇසක්ය.

අපගේ සමාජය හැදෙන්නට උත්සාහ කරන්නේ නැත. සාකච්ඡවෙන් ප‍්‍රශ්න විසදාගන්නට වෑයම් කරන්නේ නැත. එය පුදුමාකාර තත්ත්වයකි. කැරළි, කෝලාහල සහ ජුලි කලබල ගැන අපගේ කම්පනය අමතක නොකළ යුතුය. පැරණි මතකයෙන් වේදනාව විදින සමාජයක් නැවතත් ප‍්‍රචණ්ඩත්වය තෝරාගත්තේ ඇයි?  මහ මග මරා දැමුණු, පිලිස්සී ගිය මිනිස් ජීවිත කිසිසේත් පහසුවෙන් අමතක කළ නොහැක. එසේ තිබිය දී පුද්ගලයන්ට පහර දී මරා දමන තරමට අමනුස්ස භාවයක් ඇති කරන්නේ කෙසේද? මහජන නියෝජිතයන්, අහිංසක මිනිසුන් පහර දී මරා දමන තරමට සාහසික වූ රටක තත්ත්වය සාධාරණීකරනය කළ නොහැක. අධිකරණයෙන් නියම කරන මරණ දඩුවම බලගැන්විය යුතු නැති බව විශ්වාස කරන පසුබිමක මෙවැනි සිද්ධි අනුමත කරන්නට පුලූවන්කමක් නැත.

නොබෝදා ඇති වූ මෙම සිද්ධි ඉකුත් ජාතිවාදී අරගලය තුළ රටට කරන ලද විනාශයට වඩා මහා ඛේදවාචකයකි. ජාතිවාදය පසෙක තබමු. ජාතිවාදය ඉක්මවා ගිය අන්තවාදී දේශපාලන ගැටුමකි. නිවාස ගිණිතබන ඒවායේ වටිනා දේ කොල්ලකන දර්ශන මකා දැමිය නොහැකිය. අසල්වැසියාගේ නිවෙස අද ගිණිබත්වන විට බලා සිටි අපගේ නිවස හෙට ගිණි තබන්නට බැරි නැත. බෙදීම්වලින් වෛරයට ඇතුළු වූ සමාජයක එය සිදුවිය හැක.‘ එකම රටක ජීවත්වන ක‍්‍රමය ගැන වෙනස් අදහස් දරන පුද්ගලයන් විනාශ කරන්නට වෑයම් කිරීම තුළ ඇති මනුස්සභාවය කුමක්ද? එක පැත්තකට පමණක් වරද පැටවිය නොහැක. දෙතුන් පිරිසක් මෙහි වගකීම භාරගත යුතුය. අවේග මතුකරන ලද සියළු දෙනා මෙහි කොටස්කරුවෝය.

අරගලය තුළ ඇති වූයේ කුමක්ද? නීතිය නොසලකා ක‍්‍රියා කළේය. නීතිය හා විධිවිධාන බිදවැටීම බරපතල තත්ත්වයකි. අපගේ සාරධර්ම බැහැර කරන්නේ කෙසේද? වැඩිහිටියන් සහ පරමාදර්ශී චරිතවලින් පදනම් වූ සමාජයක ස්වභාවය ගැන අපට සෑහීමකට පත්විය හැකිද? ජාත්‍යන්තරය ඉදිරියේ උසස් මිනිසුන් ලෙස මානව අයිතිවාසිකම් ගැන කතා කරන අපට අපගේ අසල්වැසියාගේ මතය ඉවසන්නට නොහැකිවිය. එය විශාල වරදකි.

මැරවරයන්ට මහ පාර අයිතිකරගන්නා තෙක් ආරක්ෂක අංශ පසුබැසීම ද වරදක් බව පෙනේ. මාර්ග හරස්කරමින් වාහන නතර කරමින් හිංසනය ඉහවහා යන තෙක් ආරක්ෂක අංශ  නීතිය පසෙකට වන විට අවනීතිය රජ කෙරේ. ආහාරයක් බුදින සතෙකුට හිරිහැර නොකරන, පණ බේරාගන්නට පැන යන භයානක සර්පයෙකුට පවා ආරක්ෂාව සපයන තරමට උතුම් ගති ලක්ෂණ තිබුණ සමාජයක් මෙපමණ පිරිහීම ගැන අප සියළු දෙනා වගකීම භාරගත යුතුව තිබේ.

අප සියළු දෙනාටම ආර්ථික ගැටළු ඇත. ජීවත්වීම ප‍්‍රශ්නයකි. මේවා විසදාගත යුතු ප‍්‍රජාතන්ත‍්‍රවාදී ක‍්‍රමවේදයකට අනුවය. බහුතරයකගේ කැමැත්ත අනුව තෝරාගත් මහජන නියෝජිතයන්ට ප‍්‍රශ්න විසදන, රට දියුණු කරන වගකීම භාර දී ඇත. ක‍්‍රමය අසාර්ථක බව පිලිගත හැක. උස් පහත්කම් සිදුවේ. ඒවා නිවැරදි කරගන්නට අනුගමනය කළ යුතු ක‍්‍රියාමාර්ග තිබේ.

සදාචාරවත් සමාජයක් ඉලක්කය විය යුතුය. වෛරය හෝ ක්‍රෝධය ගැටළු නිරාකරණය කරගන්නා මාර්ගයක් නොවේ. ආවේගයෙන් හැසිරීම ඇතිකරන්නේ පශ්චාත්තාපයකි. අදහන ආගම, වැඩිහිටියන්ගේ අවවාද අනුශාසනා නොතැකීම සුදුසු නැත. අවසානයේ දී අපගේ සැනසීම ඇති කරන්නේ හෘද සාක්ෂිය බව මතක තබාගත යුතුය.  

දර්ශනයක් නැත්නම් අරගලය නිරර්ථකයි

ප්‍රතිචාරයක් ලබාදෙන්න

2022/05/18 – ලංකාදීප

නිසි විසදුමක් නොලැබුණ අංශ සම්බන්ධයෙන් අරගලයක් අපට ඇත. ආර්ථිකය, සමාජය හා සංස්කෘතික ව්‍යුහය සංකීර්ණ මුහුණුවරක පවතී. ප‍්‍රජාතන්ත‍්‍රවාදී ආකෘතියකට අනුව ක‍්‍රමය වෙනස් කරන උත්සාහයක් තිබුණි. එයින් අපේක්ෂා සාක්ෂාත් වී නැත. මෑත කාලය තුළ ඇති වූ අරගල ජනතාව නගන මතය පිළිබිඹු කරයි. තමන් පත් කරගත් ආණ්ඩුවකින්, මහජන නියෝජිතයෙකුගෙන් අස්වැසිල්ලක් නොලැබෙන අතරතුර ඔවුහු අලූත් ආණ්ඩුවක් සදහා ඡන්දය පාවිච්චි කළහ. අවසානයේ නොනවතින විරෝධතාවයකය.

යුක්තිය හා සාධාරණ අවස්ථා ජනතාව ඉල්ලා සිටී. පාක්ෂිකයන්ට සලකන, අනුගාමිකයන් පමණක් යැපෙන ආණ්ඩුවලින් සිදුවන අසාධාරණකම් ප‍්‍රතික්ෂේප කරති. වරින් වර පැන නැගී ඇවිළුන, උද්ඝෝෂණ මෑත කාලයේ සුලබ අවස්ථා බවට පත්ව තිබුණි. තීරණාත්මක මොහොතකට පසු මහා කැළඹීමක් ඇති කර තිබේ. එයින් ඇති කරන ලද විනාශය වෙනම කාරණයකි. මහජන කැළඹීම්, අරගල සහ ප‍්‍රකෝපකාරී සිදුවීම අවසානයේ දී අප සියළුම දෙනාට ඉගෙනගත යුතු පාඩමක් ඇත. ප‍්‍රජාතන්ත‍්‍රවාදී පාලක ක‍්‍රමය මෙතෙක් පැමිණි ගමන ගැන හරි වැරදි ගැන සාකච්ඡාවක්, සංවාදයක් සිදුවිය යුතුය. දේශපාලනඥයන් පමණක් නොව සමාජ මතාධාරීන්, සිවිල් සමාජ නායකයන්, විද්වතුන් එහි විවිධ පැති කෙරෙහි සියුම් ගවේශණයක් කළ යුතුව ඇත. සාර්ථකත්වය හෝ අසාර්ථකත්වයට හේතු වූ අංශ වෙන් කරගත යුතුව තිබේ.

දූෂිත, අකාර්යක්ෂම හා යුක්ති සහගත බවක් නැති බව පෙනෙන, ව්‍යුහය විනාශ කිරීම පමණක් අරගල කළ යුතු නොවේ. අලූත් යමක් නිෂ්පාදනය කළ යුතුය. කැළැඹිලි තිබිය යුතුය. කැළඹීම තුළින් මතු කරගත යුතු යමක් තිබේ.

ලෝකය වෙනස් වෙන්නේ කැළඹිලිවලින්ය. ගල් යුගයේ සිට තාක්ෂණික යුගය දක්වා එන අතරමග දැවැන්ත වෙනස්කම් නිර්මාණය කරගෙන ඇත. ගින්දර, රෝදය සොයාගත්තේ කැපවීමකින්ය. සාමාන්‍ය මිනිසුන් අත ගසන්නට බිය තැන් ස්පර්ශ කරන ලද නිර්මාණශීලීහු ඒවා මනුෂ්‍ය වර්ගයාගේ පැවැත්මට හරවා ගෙන ඇත. පරිවර්තනීය අදහස් අනුව ක‍්‍රියා නොකළේ නම් ලෝකය ගෝලාකාර බව තවමත් විශ්වාස කරන්නේ නැත. අහසින් ගමන් කරන්නට නොසිතයි. සාගරය හෝ අභ්‍යවකාශය තරණය කරන්නට හිතන්නේ නැත. ක්ෂණයකින් ලෝකය පුරා දත්ත විසුරුවා හරින සන්නිවේදනයක් පිලිබදව කිසිසේත් අවධානය යොමු නොකෙරේ. පරාජය කළ නොහැකි විප්ලවීය අදහස් වෙනුවෙන් ජීවිතය කැප කළ පරාර්ථකාමීහු අද අප ජීවත්වන විද්‍යාත්මක හා තාක්ෂණිය ජන සමාජය බිහිකර ඇත.

හැකියාව, දක්ෂතාව අනුව ස්ථානයක් හිිමිවන සමාජ ක‍්‍රමයක් රටට අවශ්‍ය කර තිබේ. අප සිටින්නේ එවැනි උවමනාවන් ගැන හිතන තැනකද? ඉගෙනගැනීමට අතිවිශාල ධනයක් වැය කරන්නට සිදුවන, සහ බලය හා ධනය ඇති පිරිසට පමණක් අවස්ථා හිමි අධ්‍යාපන ක‍්‍රමයක් නිදහස් එකක් සේ සලකන්නට අප පුරුදු වී ඇත. ආණ්ඩුව රැකියා සපයන තැනක් බව විශ්වාස කරයි. අසීමිත රැකියා අවස්ථා ප‍්‍රමාණයක් සපයන රජය, වැටුප් ගෙවන්නේ ජනතාවගෙන්ම අය කරන බදුවලින් බව තකන්නේ නැත. ජාතික සම්පත් ආරක්ෂා කරගැනීම යැයි මිත්‍යාවක ගිලී සිටී. රට බෙදන, රට විකුණන බව කියන මතවාදයක් මනසට ඇතුළු කරන දේශපාලනඥයෝ එයින් යැපෙන තැනට පත්ව ඇති බව අපට දැනෙන්නේ නැත. කාර්යක්ෂමතාව හෝ ඵලදායීතාව ගැන නොසලකා සිටී. රජයේ ආයතනයකින් අවශ්‍යතාවයක් ඉටු කරගැනීමට විශාල පරිශ‍්‍රමයක් දැරිය යුතු අතර තාක්ෂණයට පැවැරිය හැකි ක‍්‍රම පවා වෙනස් කරන්නට කිසිම උත්සාහයක් නොගැනේ. මේවා ගැන අලූතින් කල්පනා නොකරන්නේ ඇයි?

තරුණන්ගේ අරගලය සාධාරණය. එහෙත් එයට දර්ශනයක් තිබිය යුතුය. විනාශ කිරීමෙන් පසු ඇති කරන සමාජ ක‍්‍රමය කුමක්ද යන්න ගැන කතිකාවක් අවශ්‍යය. නිලධාරීවාදය තුරන් කරන, නිෂ්පාදනයට ඉඩ දෙන, ව්‍යවසායකත්වය නංවන තීරණ සදහා ඇති යෝජනා කවරේද? මුල්‍ය ක‍්‍රමය වෙනස් කරන්නේ කෙසේද? අඩුම තරමින් ප‍්‍රවාහන, සෞඛ්‍ය, අධ්‍යාපන ක‍්‍රමය අලූතින් හදන පියවරක් ගැන යෝජනා තිබිය යුතුය. අද පලවා හරින දේශපාලනඥයන් වෙනුවට හෙට එන අලූත් කණ්ඩායම ද අනුගමනය කරන්නේ පැරණි පිලිවෙලම නම් අරගලයෙන් පලක් නැත. මේවා ගැන සාකච්ඡා කරන්නට පරිනත නායකත්ව අවශ්‍යය.ඉක්මනින් තීරණ ගත යුතු අතර ක‍්‍රම අත්හදා බලන්නට කාලයක් නැත. අසාර, අතාත්වික සහ අදූරදර්ශී පොදු සතුරා පලවා හැරීම සදහා ක‍්‍රමෝපාය සකස් කළ යුතුය. පුද්ගලයන් පලවා හැරීමෙන් පසු නැවතත් පත් කරන පිලිවෙල ජන සමාජයට වැඩදායක ද යන්න කල්පනා කළ යුතු අරගලය තුළ බව සදහන් කිරීම අවශ්‍යය.

අලුත් ආරම්භයකට දැන්වත් පියනගමු

ප්‍රතිචාරයක් ලබාදෙන්න

2022/ 05/ 11 – ලංකාදීප

දැවැන්ත ආර්ථික අර්බුදයකට මුහුණ පා සිටින ශ්‍රී ලංකාව නැවත වතාවක් ඛේදවාචකයක් අභියසය. නැවත වතාවක් යනුවෙන් සඳහන් කරන්නට සිදුවූයේ ඇයි? ශ්‍රී ලංකාද්වීපය පුරා රත් පැහැති කැකෑරෙන රැධිරය ගලා ගිය අවස්ථා ගණනාවකි. බිහිසුණු අන්ධකාර රාත්‍රීන් විශාල ප්‍රමාණයක් අප පසු කරගෙන පැමිණ ඇත. ජාති, ආගම්, දේශපාලනික වශයෙන් බෙදී, ගැටී විනාශයට පත් වූ කාල වකවානු අමතක කළ යුතු නැත. ජයග්‍රහණය කරා ගෙන යා යුතු අරගලය වෛරයෙකින් තොර සන්සුන්ව ගෙන යා යුතු තීරණාත්මක මොහොතකට පැමිණ සිටී. බුදු තෙමඟුල සමරන වෙසක් සමයේ දී බුද්ධ දේශනාව එහි ගැබ්ව ඇති උතුම් දර්ශනය අනුව ක්‍රියාකිරීමට අදිටන් කරගත යුතුය.

එදිනෙදා ජීවත්වීම සඳහා මහත් පරිශ්‍රමයක යෙදෙන,  මග තොට නිතර මුණ ගැසෙන, හොඳින් දන්නා හඳුනන ජනී ජනයා ගැටුමකට තල්ලු වූයේ කෙසේද?

පැන නැගී ඇති ගැටළුවේ ස්වභාවය මුල මැද අග හඳුනාගත යුතුව තිබේ. ආර්ථික කඩාවැටීම සමග මැදි ආදායම් මටට්මක සිටි සියළුම දෙනා දුප්පතුන් වී ඇත. දුප්පත් ජනතාව අන්ත දිළිඳු භාවයට පත්ව සිටී. අඛණ්ඩ විදුලිය සැපයුමක් කරගන්නට අසමත්, ඛනිජ තෙල් හා ගෑස් හිඟයෙන් පීඩා විඳි ජනතාව වහාම තමන් ගේ අවශ්‍යතා ඉල්ලා සිටියේය. අත්‍යවශ්‍ය ආහාර ද්‍රව්‍ය මිල ඉහළ යන විට ඒවා දරාගත හැකි මිලකට සපයන සේ බලකරමින් සිටියහ. එදිනෙදා පරිපාලනය නිසි පරිදි කරගෙන යා යුතු අතර අවශ්‍යතා ඉටු කළ හැකි පිරිසකට බලය පවරන ලෙස ජනතාව උද්ඝෝෂණය කරමින් සිටි බව ද සඳහන් කළ යුතුය. සම්ප්‍රදායික බැමි බිඳ ජනී ජනයා අවුලුවන්නට සමාජ මාධ්‍ය සමත් වූ අතර ඡන්දයෙන් පත් වූ ජනතා නියෝජිතයන් ප්‍රතික්ෂේප කිරීම අරගලය තුළ තිබුණ ප්‍රධාන ලක්ෂණයකි.

මෙතැන් සිට අලුත් ආරම්භයක් අවශ්‍යය. ජනතා පරමාධිපත්‍ය සහ ප්‍රජාතන්ත්‍රවාදී අයිතිවාසිකම් ආරක්ෂා කරගැනීම වැදගත්ය. අයිතීන් ලබාගැනීමේ සටන තුළ කිසිසේත් අපේක්ෂා නොකරන අන්තයක් කරා තල්ලුවීමට ඉඩ තිබේ. ලෝකයේ සිදුවූ ජනතාවාදී අරගල අවසානයේ දී ඉතිරි කරන ලද සාක්ෂි වටහා ගැනීම සුදුසුය.

යුක්තිය හා සාධාරණත්වය සඳහා තිබුණ අවස්ථා අමතක කිරීම ශ්‍රී ලංකාව වරද්දා ගත් තැන්ය. 1983 ජාතීන් අතර වෛරය අවසන් වූයේ විනාශයකින්ය. 1987 ඉන්දියානු විරෝධය කරන ලද හානිය බරපතලය. දකුණේ අරගලයට පසු තරුණ අසහනයට හේතු සොයන ජනාධිපති කොමිසමක් පත් කළේය. උතුරු නැගෙනහිර ත්‍රස්තවාදය තුරන් කිරීමෙන් පසු උගත් පාඩම් හා ප්‍රතිසංධාන කොමිසමක් පත් කර කරුණු විශ්ලේෂණය කළේය. මේවායෙන් ඉගෙන ගත් බවක් තිබේද? දැන් පවතින නැගිටීම ගැන කරුණු අලුතින් සොයා බැලිය යුතුද? සම්ප්‍රදායික දේශපාලනඥයන් හා නිලධාරීන් අතරින් කොටසක් ජනතාවගෙන් නැගෙන හඬ තේරුම් ගත්තේ නැත. ක්‍රමය වෙනස්කරන උත්සාහයකට අවතීර්ණවීම උවමනාවෙන්ම මග හැරියහ. එහි කෙළවර අද උද්ගතව ඇති අවිනිශ්චිත භාවය බිහි කර තිබේ.

ප්‍රජාතන්ත්‍රවාදය හැර වෙනත් සුදුසු පාලන ක්‍රමයක් දැනට ලෝකයේ නැත. විවෘත ආර්ථික ක්‍රමය තුළ සාධාරණ අවස්ථා සහිත සමාජයක් බිහි කරගත හැකි බව ඔප්පු වී තිබේ. ප්‍රජාතන්ත්‍රවාදය නැවත ස්ථාපිත කිරීම සඳහා ව්‍යවස්ථානුකූල පියවරක් අනුගමනය කළ යුතුය. ව්‍යවස්ථාව තුළ ඇති දුබලතා සාකච්ඡා කර විසඳා ගැනීම සුදුසුය.

අලුත් ව්‍යවස්ථාවක් ගැන පාර්ලිමේන්තුව තුළ කරන ලද සාකච්ඡාව සම්බන්ධයෙන් ද විශ්වාසය ගිලිහී ගොස් තිබේ. බලයට එන පාලකයන් තමන්ට ගැලපෙන, තමන්ගේ බලය සුරක්ෂිතවන ආකෘතියකට හදන ව්‍යවස්ථාවක් වෙනුවට ජනතාව අතරින් ඉදිරිපත්වන අලුත් අදහස් සැලකිල්ලට ගතයුතුය. ඡන්ද ක්‍රියාවලියේ වියදම අඩු කරන හා දූෂණ සීමා කරන එකක් බවට හැරවීම අවශ්‍යය. සමානුපාතික වැනි සංකීර්ණ ක්‍රමයෙකින් බැහැර සෘජු මහජන නියෝජිත ක්‍රියාවලියක් එම ව්‍යවස්ථාවට යෝජනා කිරීමත් සුදුසුය. මේවා වසර ගණනක් තිස්සේ එක දිගට සාකච්ඡා කළ කරුණු වලින් සමහරක් බව මතක් කිරීම අවශ්‍යය.

ඉක්මන් වෙනස්කම් සමාජයට අවශ්‍ය කර ඇත. ආවේග වෙනුවට ප්‍රඥාවන්ත භාවය අවශ්‍යම කරන මොහොතකි. මෑත කාලය තුළ අත් විඳින ලද කටුක තත්ත්වයන්ට ගොදුරු වූ ජනතාව තව දුරටත් ඉවසන්නට, කැප කිරීම් කරන්නට සූදානම් නැත. හදිසියේ කළ යුතු ප්‍රතිසංස්කරණ තුළින් රාජ්‍ය ස්ථාපිත කරන අතර විශ්වාසනීය ප්‍රතිපත්ති සංවාදයකින් තිරසාර සැලැස්මක් සම්පාදනය කරගැනීම අප සියළු දෙනාගේ වගකීමකි. සන්සුන්, අවෛරී අරගලයක් සඳහා එක්සත්වීම අද පැවැරී ඇති කාර්ය භාරය බව මෙහි දී සඳහන් කළ යුතුය.

උඩටම උස්සා බිමටම දමනු ලැබීමේ අභාග්‍ය

ප්‍රතිචාරයක් ලබාදෙන්න

2022/05/04 – ලංකාදීප

මැජික් විසදුම් අපේක්ෂාව යළි පොට වරද්දා ගැනීමක් 

ජන බලය විස්මිතය. දිනා ගැනීම හා සමානව ආපසු උදුරා ගැනීමට ද ලක්වේ. ඉතාම ස්වල්ප කාලයකට කලින් මහත් හරසරින් පිළිගෙන ඉහළටම ඔසවා තබන ලද දේශපාලන නායකයෝ අද ප‍්‍රතික්ෂේප වී සිටිති. ඉක්මනින් බැදෙන අතර එපා වෙන්නට ද එපමණ කාලයක් ගත වෙන්නේ නැත. මෑත කාලීන සමාජ සහ සංස්කෘතික වටපිටාව අනුව උස් පහත්වීම් පිළිගත යුතුය. පිළිගැනීම හා එපාවීමට සූදානමින් ක‍්‍රියා කිරීම අවශ්‍ය කෙරේ. 2015 මහ මැතිවරණයෙන් බලයට පත් ආණ්ඩුව එපා වෙන්නට වැඩි කාලයක් ගත වූයේ නැත. ප‍්‍රධාන පක්ෂ දෙක අතර එකමුතුවකින් රට අලූත් යුගයකට ඇතුළු කරනු ඇතැයි ජනතාව එදා බලාපොරොත්තු සහගතව සිටියහ.

පාර්ලිමේන්තුව තුළ හා පාර්ලිමේන්තුවෙන් එපිට ඇති වූ අර්බුද නියමිත කාලයට කලින් මැතිවරණයක් කැදවීය. හවුල් ආණ්ඩු ජනතාවට එපා වූ අතර 2020 වසරේ අගෝස්තු මාසයේ පවත්වන ලද පාර්ලිමේන්තු මැතිවරණයෙන් දැනට බලයේ සිටින ආණ්ඩුව තෝරා ගෙන තිබේ. එම මැතිවරණ ප‍්‍රතිඵල අනුව ලක්ෂ ගණනින් වැඩිම මනාප ලබා පාර්ලිමේන්තුවට පත් වූ ඇතැම් ජනතා නියෝජිතයෝ අද විශාල අප‍්‍රසාදයකය. මහ ඉහළින් කැදවාගෙන පැමිණි තමන්ගේ මහජන නියෝජිතයා එපා වී හූ කියා පන්නා දමන තැනට පත්වීම පුදුම සහගතය. ජනතා විරෝධයට හේතුව කුමක්ද? ආර්ථිකය බිද වැටී ඇත. ජීවන වියදම දරා ගත නොහැකි තැනට පත්ව තිබේ. විදුලිය, ගෑස්, ඉන්ධන හිගය විශාල ප‍්‍රශ්නයකි. ආර්ථික ගැටළු විසදාගත හැක. ඇතැම් මහජන නියෝජිතයන් ප‍්‍රශ්න වලට මුහුණ දිය නොහැකිව පසු බැසීම තවත් පුදුමයකි.  ඡන්දයෙන් පත් කරගත් නමුත් ජනතාවට ඉක්මනින් එපාවීමත්, පීඩනය එල්ලවන විට මැති ඇමැතිවරු ආණ්ඩුව අත්හැරීමට යුහුසුළුවීමත් අවධානයට ගත යුතු කරුණු අතර තිබේ.

ප‍්‍රජාතන්ත‍්‍රවාදය මුහුණ පා ඇති ඉරණම මෙම පැති දෙක මැනැවින් අපට විග‍්‍රහ කරයි. ඊළගට බලයට එන්නට සූදානම් වන දේශපාලනඥයන් මෙම සංකීර්ණ ව්‍යුහය වටහා ගත යුතුය. ‘බින්න කසාදය’ ගැන අපගේ ජන සාහිත්‍ය උපමා කොට දක්වා ඇත. හුලූ අත්තක් හා තල් අත්තක් සූදානම් කොට තබා ගෙන මනාලියගේ නිවසේ බින්න කසාදයට කැමැති විය යුතුය. මදි පුංචිකම දරාගත නොහැකිවන විට  ඕනෑම රාත‍්‍රියක, ධාරානිපාත වැස්සක දී පවා මගට බහින්නට සිදුවේ. ශ‍්‍රී ලංකාවේ ආණ්ඩුකරණය බින්න කසාදයක් විය යුතු නැත. තාවකාලික වාසි පදනම් කරගෙන බලයට එන්නට සූදානම්වන දේශපාලන පක්ෂ අද පවතින මතිමතාන්තර වලින් පාඩමක් ඉගෙන ගත යුතුය.  විරෝධතා අවුලූවා, හූ කියා පන්නා දමන දේශපාලනයකින් රටක් ආණ්ඩු කළ නොහැක. ආණ්ඩු පත් කරන්නටත්, ඉවත්කරන්නටත් ක‍්‍රමයක් තිබේ. ව්‍යවස්ථාවක් සම්මත කරගෙන ඇත. ව්‍යවස්ථාව නොගැලපෙන බව බහුතරයකගේ තීන්දු කරන අවස්ථාවක අලූත් ව්‍යවස්ථාවක් සම්මත කරගත හැකිය. අද පවතින ප‍්‍රශ්න ව්‍යවස්ථාවකින් මතු වූ ඒවා නොවේ. ආදායම හා වියදම අතර ගැටුමකි. ආනයන හා අපනයන අතර නොගැලපීමකි.  රාජ්‍ය ආදායම දරුණු ලෙස පිරිහී ගොස් තිබේ. ආදායම ලැබෙන මාර්ග අවහිර වී ඇත. ආදායම උත්පාදනය කරගත හැකි කර්මාන්ත හා ව්‍යාපාරික අවස්ථා බෙලහීන වී තිබේ. සාමාන්‍ය ජනතාව මෙම පීඩනයෙන් පෙලෙන අතර ආර්ථිකයේ ප‍්‍රතිසංස්කරණයක් කර එය නගා සිටුවීම මහජන නියෝජිතයන්ගේ වගකීමකි. අපට නොපෙනෙන නමුත් බලය බෙදාහැරීම සම්බන්ධයෙන් ද නොවිසදුන ප‍්‍රශ්න ඇත. මෙම සංකීර්ණ ව්‍යුහය ආණ්ඩුව වෙත පටවා ගැලවෙන විපක්ෂ දේශපාලන පක්ෂ වලට හෙට මුහුණ දෙන්නට සිදුවන අභියෝගය අදට වඩා බරපතල බව මෙහි දී මතක් කළ යුතුය. 

පාරට බැස කෑ ගසන තරුණ පෙල ඇතුළු පොදු ජනතාවට ප‍්‍රශ්ණ ඇත. ඒවා නිරාකරණය කරගැනීමට ක‍්‍රමයක් තිබේ. මෙවැනි අර්බුද මතුවූ අවස්ථාවල ආණ්ඩු පෙරලා නායකයන් පලවා හැරීම මෑත කාලය තුළ නොයෙක් රටවල සිදුවී ඇත. අලූත් නායකත්ව සොයාගැනීම ආර්ථික හා සමාජ ප‍්‍රශ්නවලට නිසි විසදුමක් ලබාගැනීමේ දී ප‍්‍රයෝජනවත්ය. වෙනත් පැත්තකින් උත්තර සොයන පිලිවෙලක් විය හැකිය. අලූතින් එන නායකත්වයක් ගැන පවා විශ්වාසයක්, එකගතාවයක් හා කැපවීමක් අපට තිබිය යුතුය. මාස හයෙන්, අවුරුද්දෙන් රටක් දියුණු කරන මැජික් විසදුම් අපේක්ෂා කිරීම නැවතත් මග වරද්දා ගැනීමකට අත වැනීමකි.   

ආහාර ඉල්ලන මිනිසුන්ට ව්‍යවස්ථා සම්පාදනය

ප්‍රතිචාරයක් ලබාදෙන්න

2022/04/27 ලංකාදීප

ජනී ජනයා ගේ අගරලය එදිනෙදා ජීවත්වීම සදහාය. ඔවුහු ආව්ගයෙන් සිටින අතර ජීවන වියදම ගැන දුක්වෙති. මහජන නියෝජිතයෝ පාර්ලිමේන්තුවේ දී අලූත් ව්‍යවස්ථාවක් ගැන තර්ක කරමින් සිටිති. ප‍්‍රංශ විප්ලවයේ සිදුවූයේ කුමක්ද? සාගින්දරෙන් පෙලූණු දුප්පත් මිනිසුන් පාන් ඉල්ලා සිටි අතර මාරි ඇන්ටොනොයිට් රැුජන පාන් බැරිනම් කේක් කාපල්ලායැයි ප‍්‍රකාශ කර ඇති බව කියැවේ. ඉතිහාසයේ පමණක් නොව අදටත් පාන් සහ කේක් වල වෙනස නොදන්නා පාලකයෝ වෙති.

ශ‍්‍රී ලංකාව දරුණු ආර්ථික අර්බුදයකය. මහජනතාව ආණ්ඩුවට විරුද්ධව පාරට බැස තිබේ. දේශපාලනය එපා වී ඇත. ක‍්‍රමය වෙනස් කරන සේ බල කරමින් සිටිති. දුක් විදින ජනතාවට පක්ෂ පාට බේධයක් නැත. එදා වේල සදහා යමක් උපයන්නට වැර දරන දස ලක්ෂ සංඛ්‍යාත පිරිස මුහුණ දී ඇති අපහසුතාවක තරම තේරුම්ගත යුතුය. පාර්ලිමේන්තු ප‍්‍රජාතන්ත‍්‍රවාදය නඩත්තු කිරීම සදහා වන්දි ගෙවන අපි ඉල්ලන්නේ විසදුම්ය.

ව්‍යවස්ථා වෙනස් කිරීම ජනතාව මුහුණ දී ඇති අර්බුදයට උත්තරයක් ද? 1994 වසරේ සිට විධායක ජනාධිපති තනතුර ආහෝසි කරන පොරොන්දුවක් තිබේ. බලය අත් හරින බවට වේදිකාවේ දී පොරොන්දු දෙන දේශපාලකයෝ බලයට පත් වූ පසු පොරොන්දු මග හරිති. තනතුර ආරක්ෂා කරගෙන පැවැත්ම හදා ගනිති. දශක තුනක පමණ කාලයක් තිස්සේ ව්‍යවස්ථා ගැන කතාකරමින් නාස්ති කළ කාලය ආර්ථිකය නගා සිටුවන වැඩ පිලිවෙලක් සදහා භාවිතා කළේ නම් අද ශ‍්‍රී ලංකාව ඉතා සංවර්ධිත තැනකි. එදා ගහක් පැල කළේ නම් අද එහි අස්වැන්න ලබන කාලයයි. අනුවණකම්වල කෙළවරක් නැති අපට අදටත් නිසි මාර්ගය සොයා ගත නොහැකි වී තිබේ. රට ගොඩනගන හරවත් සංවාදයකට ඇතුළුවිය නොහැකි වී ඇත. නොනවතින විරෝධතාවයක් ගාලූ මුවදොර ප‍්‍රදේශයේ පවත්වාගෙන යන අතරතුර රැස් වූ පාර්ලිමේන්තුවට පැති ගණනාවකින් අලූත් ව්‍යවස්ථා සංශෝධන සෑහෙන ප‍්‍රමාණයක්  ඉදිරිපත් කොට තිබේ. රජයෙන් විපක්ෂ කණ්ඩායම්වලින් පමණක් නොව සිවිල් සංවිධාන පවා යෝජනා ඉදිරිපත් කර ඇත. මෙම යෝජනා සාකච්ඡා කර විවාද කළ හැක. පාර්ශව ගණනාවක කරන සංවාද අවසානයේ තීරණයක් රහිතව කෙළවර වනු ඇති බව නිසැකය.

ආහාර හිගය, බලශක්ති ප‍්‍රශ්න, බෙහෙත් හේත්, අධ්‍යාපනය හෝ මුල්‍ය පද්ධතියේ  අවහිරතා නිසා මිනිසුන් මුහුණ පා සිටින ඉරණම ව්‍යවස්ථාවකින් විසදිය හැකිද? මහජන නියෝජිතයෝ වගකීමක් ඇතිව කටයුතු කළ යුතුය. ජනාධිපති හෝ අගමැති පුටුවේ ඊළගට වාඩිවෙන්නේ කවුද හෝ බලතල ගැන මෙම මොහොතේ සාකච්ඡා කළ යුතු දෙයක් නොවේ. දුප්පත් ජනතාව අසරණ වී සිටින අවස්ථාවක පුරුදු පරිදි ව්‍යවස්ථා ප‍්‍රශ්න හුවා දක්වා කල්මැරීම කිසිසේත් අනුමත කළ නොහැක. එකමුතුව හා සම්මුතිය නොතකා තීරණ ගැනීමේ විපාක අද අප අභිමුවෙහි ඇත. ප‍්‍රශ්න ගැන නොසලකා ක‍්‍රියා කරන දේශපාලන ක‍්‍රමය විශාල ගැටළු ඇති කරගෙන ඇති අතර එය විශාල වරදකි.

මැදි ආදායම් සමාජය සංකීර්ණ අවශ්‍යතා සහිතය. ජනතා අවශ්‍යතා විවිධාකාරය.  එදිනෙදා පැවැත්ම අවහිර කරන තීරණ කිසිසේත් නොගැලපෙන අතර පැරණි පෝලිම් ක‍්‍රමයකට නැවතත් හැරවීම නොගැලපෙන බව වටහා ගත යුතුය. ප‍්‍රශ්න වලට මුහුණ දෙන්නේ නැති පාලකයන්ද, පැලැස්තර විසදුම් යෝජනා කරන ලද නිලධාරීහු ද අද පවතින තත්ත්වයට වගකිව යුතුය. ආර්ථිකයේ හදිසි අවස්ථාව කළමණාකරනය කරගෙන, පාලනය කරගත හැකිව තිබිය දී එය දේශපාලන අර්බුදයක් දක්වා කැදවීම අභාග්‍යයකි. දේශපාලනඥයන් හා නිලධාරීන් සමාජය ගැන අවබෝධයෙන් තීරණ ගත යුතුව ඇති අතර ඒවා ප‍්‍රායෝගික විය යුතුය. ප‍්‍රජාතන්ත‍්‍රවාදය බව දක්වන මහජන නියෝජිතයෝ ව්‍යවස්ථා ගැන කතා පැත්තකට දමා මහජනතාවගේ මුලික උවමනාවන් සම්පූර්ණ කිරීමට වහා පෙළ ගැසිය යුතුය.

අද පාර්ලිමේන්තුවේ සිටින දෙසිය විසි පස්දෙනා මෙරට පැවැත්ම තීරණය කරනු ඇත. ත‍්‍රස්තවාදය මැඩ පවත්වන නීති පැනැවිය හැකි නමුත් මහජන ගංගාව හරස් කරන්නට ව්‍යවස්ථාවලට හැකියාවක් නැත. ආණ්ඩු මාරු කිරීම හෝ පුද්ගලයන් වෙනස් කිරීමෙන් ආර්ථිකය හැදෙන්නේ නැත. දැන් පවතින ව්‍යසනයෙන් ගැලවෙන්නට හදිසි හා වදගත් තීරණ ගත යුතුය. ව්‍යවස්ථා හදන්නට කලින් මහජන නියෝජිතයන් සියළුදෙනා එකතු වී ආර්ථිකය ගොඩනගන නිවැරදි තීරණ ගැනීම මුළු මහත් ජාතියට කරන විශාල සේවයක් බව දැක්විය යුතුය.

භාග්‍යවන්ත මාසයේ නෙලා ඇති අස්වැන්න

ප්‍රතිචාරයක් ලබාදෙන්න

2022/04/11 – ලංකාදීප

අප‍්‍රියෙල් මාසය භාග්‍යවන්ත කාලයකි. ජෝතිෂ්‍යයට අනුව සූර්යයා මීන රාශියෙන් මේෂ රාශියට සංක‍්‍රමණය වෙන්නේ බක් මාසයේ දී ය. සුර්යයා ගේ ගමන පෙරදැරි කරගෙන උත්සව පැවැත්වීම අපගේ සංස්කෘතියෙහි කොටසකි.

බක්මාසයේ උදාව සමග උත්සව සිරිය ඇති වෙයි. ගහ කොළ මල් වලින් පිරේ. කොහා ගේ කූජනය අවුරුදු කාලය බව ළමා ලපැටියන්ට අගවයි. අස්වනු නෙලා රැස්කරගන්නා අතර කෙත්වතු සාර වී ධන ධාන්‍යයෙන් පොහොසත වෙයි. සශ‍්‍රීකත්වය, බක් මාසයේ සතුට තවත් නංවයි. දූදරුවන්, ඥාතීන් සහ අසල්වැසියන්  සමග පී‍්‍රිතිවීම අලූත් අවුරුද්දේ ප‍්‍රධාන අංගයකි. ආහාර හා රස කැවිලි විශේෂයෙන් සූදානම් කෙරේ. නැකැත් චාරිත‍්‍ර අනුව මුළු රටම එකවර පැරණි සිරිතට අනුව වැඩ කටයුතු අරඹයි. හෙට උදෑසන අට පසු වී විනාඩි හතලිස් එකයි තත්පර දහ හතට අලූත් අවුරුද්ද උදාවන බව නැකැත් කමිටුව දක්වා ඇත.

උදා වෙන අලූත් අවුරුද්ද, එතෙක් මෙතෙක් ඉතිහාසයේ නොවූ මොහොතක් බවට හැරවෙමින් පවතී. පසුගිය වසර දෙක තුළ සිත් සේ අවුරුදු නොතිබුණි. කොවිඞ් වසංගත තත්ත්වය බුර බුරා ඇවිලෙන කාලයක මොන අවුරුදු ද යන්න සිතට නැගී තිබුණ ප‍්‍රශ්නයකි. රෝග බිය සෑහෙන ප‍්‍රමාණයකින් අඩු වී තිබේ. ජන ජීවිතය සාමාන්‍ය තත්ත්වයට පත්ව ඇත. කෙසේ නමුත් භාග්‍යවන්තභාවය අපේක්ෂා කරන අපගේ සිත් අවිනිශ්චිතය. අප සියළු දෙනාටම වෙනස් ආකාරයේ අත්දැකීමකය. වපුරන ලද දෙය අස්වැන්න වශයෙන් අපට ලැබී ඇත. රටක්, සමාජයක් වශයෙන් අප ගේ තීන්දු තීරණ වල ප‍්‍රතිඵල අප ඉදිරියෙහි තිබේ. එකිනෙකා වෙත ඇගිල්ල දිගු කළ හැක. විවේචන, දොස් පරොස් අපමණය. කෑ ගසා, නගන විලාපය කොපමණ ශක්තිමත් නමුත් අතීතය නැවත වතාවක් අපට ගැලපෙන පරිදි නිර්මාණය වෙන්නේ නැත. අපට කළ හැකි එක දෙයක් තිබේ. අප සියළුම දෙනා එකතු වී අනාගතය අලූතින් සකස් කරගත යුතුය.

දේශපාලනඥයන් වශයෙන් ගත් වැරදි තීරණ අප අභිමුවෙහි ඇත. විද්වතුන්, ආර්ථික විශේෂඥයන් ගේ අතපසුවීම් හෝ හිතාමතාම අනුගමනය කරන ලද පිලිවෙල අසාර්ථකත්වයට හේතුවක් බව පෙනේ. සමාජ නායකයන් ස්වකීය වගකීම නිසි පරිදි ඉටු කර නැත. ආගමික නායකයන්, රට තුළ ප‍්‍රතිශ්ඨාපනයක් අරමුණු කරගෙන අනුගමනය කරන ලද පිලිවෙල නරකට ප‍්‍රතිඵල ඇති කර දී තිබේ. සමාජය ඥාණනය කරන්නට ජන මාධ්‍ය සමත්ව තිබේද? සමාජ මාධ්‍ය ඇති කරන ලද ව්‍යාකූලත්වය විශාල කැළැඹීමකට හේතු වී ඇති බව නොරහසකි. කැඩපත හමුවට පැමිණිය යුතු අසල්වැසියා නොවේ. ප‍්‍රශ්න කළ යුතු ඉදිරියෙන් සිටින්නාගෙන් ද නොවන බව අවධාරණය කළ යුතුය. අප සියළුම දෙනා අඩු වැඩි වශයෙන් කොටස්කරුවෝය.

මම දකින ආකාරයට ජන සමාජය නෙලා ගෙන ඇති අස්වැන්න ආර්ථික ප‍්‍රශ්නයකි. ඔබ දකින්නේ එය දේශපාලන කණ්ඩායමක බලය පිලිබද එකක් බව මම දකිමි. ව්‍යවස්ථාව හෝ ජාත්‍යන්තර කුමන්ත‍්‍රණ ලෙස දකින තවත් කොටසක් ද අප අතර සිටී. අධ්‍යාපන ක‍්‍රමයෙහි වරද, ඉතිහාසය අමතක කිරීම වැනි කාරණා ද පවතින සංකීර්ණ ගැටළුවට තවත් හේතු වශයෙන් දකින බව නිසැකය. සංස්කෘතික ප‍්‍රශ්නයක්, සමාජයේ පවතින බෙදීම් වශයෙන් අර්ථ දක්වන්නට ද හැකිය. යුද්ධය හා අප සියළු දෙනා පීඩාවට පත් කළ ත‍්‍රස්තවාදය බව ද තවත් පැත්තකින් කරුණු ගොනු කළ හැක. සමාජ විශ්වාසය බිද වැටීම, බුද්ධිමතුන් රට හැර යෑම යනාදී  වශයෙන් දහසකුත් එකක් කරුණු අප ඉදිරියේ එකතු වී ඇත. මේවා එකක් හෝ විශාල ප‍්‍රමාණයක් එකතු වී අද පවතින වියැවුල ඇති කර තිබේ.

විකෘතියතින් ප‍්‍රකෘතිය ඇති නොවේ. සියල්ල වැනසීම නිසි මාර්ගය විය නොහැක. විසදුම සොයා ගත යුතු අප සියළු දෙනා ගේ එකමුතුවකින්ය. වෙනස් වෙනස්ව හිතන අප එය ප‍්‍රජාතන්ත‍්‍රවාදී රාමුවක් තුළ එකට සාකච්ඡා කර, එකට ගණන් බලා කරන පිලිවෙල හැර විකල්පයක් නැත. කැපවීම ඉතා වැදගත්ය. අප සියළු දෙනාම පියවරක් ආපසු ගත යුතුය. අභාග්‍ය ඉදිරියේ තව තවත් වාද කරමින්, සේනා මෙහෙයවීම සුදුුසු නැත. බලය ලබාගත යුතු පක්ෂය හෝ පුද්ගලයා වැදගත් නැත. බලය ලැබිය යුතු මහජනතාවටය. ජනතාවගේ පරමාධිපත්‍ය ආරක්ෂා කරන ප‍්‍රතිපත්ති කෙරෙහි සාවධාන වුවහොත් පමණක් ලබන අවුරුද්දේ අපට භාග්‍යවන්ත මාසය උදාවනු ඇත. එවැනි සටනක් සදහා සැලැස්මක් සකස් කරගැනීමට අලූත් අවුරුද්ද හොද ආරම්භයකි.   

ජනතා විශ්වාසය රැකගන්න බැරි වුණොත් බිහිසුණු ප්‍රථිපල

ප්‍රතිචාරයක් ලබාදෙන්න

2022/04/06 – ලංකාදීප

දරුණු ආර්ථික අර්බුදයකින් පීඩාවිදිමින් සිටි ජනතාව පාරට බැසීම එක්තරා හැරවූම් ලක්ෂයකි. පාලන ක්‍රමයට විරුද්ධව නැගෙන බලවේගය මැද පන්තියේ නැගී සිටීමකි. අවස්ථා අහිමිවීම පිලිබදව ඛෙදවාචකයේ පැතිකඩකි. ජනතාව වෙත බරපටවන ක්‍රමය උසුලන්න සමාජය සූදානම් නැත. පරිවර්තනයක් අවශ්‍යය. ක‍්‍රමය ගැන විශ්වාසය ඉතාම වැදගත්ය. නායකත්ව ගැන විශ්වාසය ඉහළින්ම තිබිය යුතුය. විශ්වාසය පලූදු වූ සමාජයක අවසානය බිහිසුණුය.

ශ‍්‍රී ලංකාව ලෝකයේ වාසනාවන්තම රටවල් අතරින් එකකි. අවාසනාවකට අප අතර එකගතාවය නැත. විශ්වාසය පලූදු වී තිබේ. සමාජ නායකත්ව, ආදර්ශවත් චරිත, පරමාදර්ශී හැසිරීම නොසලකා හැර ඇත. ආගම, සංස්කෘතිය හෝ පරපුරෙන්න පරපුරට දායාද කරන සිරිත් විරිත් අමතක කර තිබේ. මෙම පසුබිමට හේතුව වටහා ගත යුතුව ඇත. අවස්ථාවාදී දේශපාලන සටන් අපගේ විශිෂ්ඨ අනන්‍යතා පලූදු කර ඇත. පැලැන්ති, ගෝති‍්‍රික වශයෙන් සමාජය බෙදා වෙන්කර නාස්ති කර තිබේ. පරෙස්සමෙන් අධ්‍යනය කළහොත් ජාතිය, ආගම හෝ කුලය අභිබවා ගිය විශාල දෙදරීමකි. මෙම වියැවුල තුළ එකතුවීමක් නැත. බලාපොරොත්තු   විය නොහැක. ඉතාම බරපතල වසංගත තත්ත්වයක්, ඉවසාගත නොහැකි තරමට පීඩා අත් කරගෙන ආර්ථික අර්බුදයක් කෙළවර කරගැනීමට එකතු නොවීම මෙහි බරපතලකම මැනැවින් දක්වයි.

මුලින් ද සදහන් කළ  පරිදි විශ්වාසය බිද වැටීම රටට ඇති බලවත්ම ගැටළුවකි. ආගමික නායකයෝ, ජාතික නායකයෝ සහ දේශපාලන නායකයෝ කෙරෙහි ඇති විශ්වාසය හා ගෞරවය ගැන හිතන්න. එක පැත්තකින් ඔවුහු ඒවා අහිමි කරගෙන සිටී. අනෙක් පැත්තෙන් සිනි ගෞරව පිරිනමා විශ්වාසය ඇති කරගන්නට සමාජයේ බහුතරයක් දෙනා සූදානම් නැත. මෙම අන්ත දෙක අපගේ පිරිහීම දක්වයි. විශ්වාසය බලහත්කාරයෙන් නිර්මාණය කළ නොහැක. ඉතාම දක්ෂ පිටපත් රචකයන්ට හෝ නිර්මාණවේදීන්ට විශ්වාසයක් තිබෙන බව චිත‍්‍රණය කර පෙන්වන ව්‍යාජෝක්තියක් ඇති කරන්නට බැරිකමක් නැත. එහෙත් එය තාවකාලිකය. ආලෝකයට නිරාවරණයවන විට ඇතුලාන්තය හෙළිදරව් වෙයි.

රටට අවශ්‍ය අවංක භාවයකි. අවංකව කි‍්‍රයා කිරීමෙන් තහවුරු කරගත් විශ්වාසයක් ඇති වෙයි. සැක දුරු කෙරෙන විනිවිද පෙනෙන චරිතවලට සමාජයේ ගෞරවය දිනාගත හැකිය.

ඉතිහාසයේ නොතිබුණ තරම් ප‍්‍රබල ආර්ථික පීඩනයක් ඉදිරියේ ජනතාව ප‍්‍රකෝපවීම අපේක්ෂා කළ යුතුය. ප‍්‍රජාතන්ත‍්‍රවාදී සමාජයක ජනතාව තුළ නැගෙන පීඩනය පිට කළ හැකි යාන්ත‍්‍රණ ඇත. ජනතාවගේ කැමැත්ත, තීරණ විමසා බලන පිලිවෙලක් තිබේ. මැතිවරණ හා සමාජ සමීක්ෂණ ඒ අතර ප‍්‍රධානය. මහජනතාව අතරට ගොස් ඔවුන් සමග කරන සාකච්ඡාවකින්, සංවාදයකින් පීඩනය ලිහිල්වෙයි. බලාපොරොත්තු ඇති කෙරේ. විශ්වාසය දියුණුවෙයි. ජනතාවගෙන් ඈත්වන ආගමික, සමාජ නායකයෝ සහ විශේෂයෙන් මහජන නියෝජිතයෝ අද පවතින අභාග්‍ය සම්පන්න අවස්ථාව දක්වා රට තල්ලූ කර ඇත. මෙතැනින් ගැලවීම ද අප සියළු දෙනාගේ ප‍්‍රයත්නයකි. ලෝකයේ අනෙක් රටකින්, අනෙක් නායකයෙකුගෙන් හෝ ප‍්‍රාතිහාර්යයකින් අලූත් දෙයක් අපේක්ෂා කළ නොහැක.

අන්තවාදී බලවේග, ඒවා පිටුපස සිටින මෙහෙයවන පිරිස් ඇති කරන ව්‍යාකූල තත්ත්වය ගැන ද සදහන් කිරීම වටී. මෑත කාලය තුළ රටක සිටිය යුතු වටිනාම හා ධෛර්යය සම්පන්නම තරුණ ජීවිත අපට අහිමි කළේ ගැටුම් හා අරගල බව මතක් කළ යුතුය. අරගල කළ යුතු ක‍්‍රමය වෙනස් කරන්නටය. පුද්ගලයන් පලවා හැරීමෙන් ක‍්‍රමය වෙනස් වෙන්නේ නැත. පුද්ගලයන් පලවා හැර අලූත් නායකයන් මහ ඉහලින් ඔසවා තබන අප සියළුම දෙනා නායකයන්ගෙන් මැජික් විසදුම් අපේක්ෂා කරන අතර මැජික් පෙන්වන ක‍්‍රමය එකම බව දැනෙන්නට වැඩි කල්යන්නේ නැත.

සිස්ටම් ජේන්ජ් එකක් සදහා ප‍්‍රයත්නයක් රටට උවමනා කර තිබේ. ජනතාවට සේවය කරන, ජනතා අවශ්‍යතා වහා සාක්ෂාත් කරන ක‍්‍රමය අලූතින් හදන්නට අවශ්‍යය. නිලධාරීවාදය, ආකාර්යක්ෂමතාව සහ යල් පැනගිය නීති ජනතාව අවුලූවන මතුපිටට නොපෙනෙන දරුණු බලවේග වන අතර අලූත් වෙනසක් ඇති කරන්නට ඉඩ නොදෙන, විහ්වාසය පලූදුකරන තැන් බව වටහා ගැනීම ද වැදගත්ය.

Older Entries