කෘෂි අංශයෙන් ආර්ථිකයට දායකත්වය විමසුම් ඇසින්

ප්‍රතිචාරයක් ලබාදෙන්න

2021/11/17 – ලංකාදීප

මිල පාලන රෙගුලාසි ඉවත් කිරීමට රජය තීරණය කර තිබේ. වෙළෙඳ පොළට ගැලපෙන තීරණයකි.මෙතෙක් භාණ්ඩ වර්ග දහ හතකට උපරිම සිල්ලර මිල නියම කර තිබුණි. අලුත් නියෝගය අනුව පාලන මිල තවදුරටත් වලංගු නැත. ආහාර ද්‍රව්‍ය විකිණිය හැකි මිලක් ගැසට් කරන ලද නමුත් පාරිභෝගිකයන්ට එම මිලට ලැබුණෙ නැති බවද පෙන්වා දිය යුතුය. පාරිභෝගිකයෝ ආණ්ඩුවටත් වෙළඳුන්ට දොස් තැබූහ. එය සාධාරණ නැත. ඉල්ලුම පාලනය කිරීම සඳහා මිල නියම කරන්නට ආණ්ඩුවට සිදු වූ නමුත් වෙළෙන්දන් මිල තීරණය කළේ ලැබෙන සැපයුම අනුවය. භාණ්ඩ හිඟ වන විට මිල ඉහළ නැගීම සාමාන්‍යයෙන් සිදු වෙයි.

 සඳහන් කළ යුතු වැදගත් කරුණක් ඇත. පාරිභෝගිකයන්ට වාසි සැලසෙන ක්‍රමයක් උදෙසා තරගකාරීත්වය අවශ්‍යය. රාජ්‍ය හා පෞද්ගලික අංශය අතර පමණක් නොව පෞද්ගලික අංශයේ සේවා හා ව්‍යාපාර අතර ද දියුණු තරගයක් තිබිය යුතුය. එක හා සමාන භාණ්ඩ හෝ සේවා සැපයුම්කරුවන් ගණනාවක් සිටින අවස්ථාවක තමන්ට කැමති දේ තෝරා ගැනීමට නිදහසක් ලැබේ. වෙළෙඳ පොළට යන පාරිභෝගිකයෝ මිල තත්ත්වය ඇතුළු ගුණාංග කෙරෙහි සැලකිලිමත් වෙති. විශ්වාසදායක තැන කෙරෙහි අවධානය යොමු වෙයි මිල පාලනයේදී මෙම ඇතුළාන්තය මග හැරේ. වෙළෙන්ඳා දෙන දෙයක් ආණ්ඩුවේ මිලට ගැනීම හැර අනෙක් විසඳුමක් නැත. හොඳම දේ පාරිභෝගිකයාට රිසි පරිදි මිලදී ගැනීමට අවශ්‍ය පහසුව සකස් කිරීම යහපත් කළමනාකරණයක් සහිත ආණ්ඩුවක ක්‍රමයයි.

කොවිඩ් සමග ගැටළු ගණනාවක් හට ගැනිණ. වශ්‍ය භාණ්ඩ හා සේවා සැපයීමක් නොතිබීම එහි එක පැත්තකි. සාමාන්‍ය ජනතාවගේ ආදායම සීමාසහිත විය. වෙළඳපොලට සපයන දේශීය වන අතර එහි මිල වැඩිවීම අතමිට හිඟ ජනතාවට තදින් දැනෙන කාරණයකි. එම ආවරණය දිගටම පවත්වාගෙන යා යුතු නැත. වෙළෙඳපොළ සක්‍රීය කර ආර්ථික දියුණුව සල සඳහා බලගැන්විය යුතුය. මිල පාලනය ඉවත් කර තරඟ ඇති කිරීම එහි ප්‍රාථමික පියවරක් වනු ඇත . 

ලබන වසර සදහා ඉදිරිපත් කරන ලද අය වැය යෝජනා අවධානයට ලක් වන කාල වකවානුවකි. කෘෂි අංශය ගැන කරුණු ඇතුලත්ය. ශ‍්‍රම බලකායෙන් සියයට අසූවක් කෘෂි අංශයෙහි බව දක්වයි. කෘෂි අංශය, දළ දේශීය නිෂ්පාදිතයට දක්වන දායකත්වය සියයට දහයකටත් අඩු බව මතක් කළ යුතුය. විශාල ශ‍්‍රම බලකායක් යෙදවෙන නමුත් එයින් අත්පත්කරගත හැකි ආර්ථික වාසිය ගැන සොයා බැලීම සුදුසුය.

පාරිභෝගිකයන් ගේ පැත්තෙන් අවධානය යොමු කළ යුතු කාලයකි. නිෂ්පාදන, සේවා හෝ කාර්මික අංශවල නිරත වන බවට වෙන්කළ හැකි නමුත් සියළුම දෙනා පාරිභෝගිකයෝය. එලවලූ වගා කරන ගොවියා නිෂ්පාදකයෙකු වශයෙන් ආරක්ෂා කරගත යුතු නමුත් වෙළ`ද පොලට පැමිණි පසු ඔහු ද අනෙක් පිරිස සමග පවතින මිල විපර්යාසයෙහි ගොදුරකි.

ඉන්දියාවේ සිල්ලර මිල අනුව ලොකු ලූනු කිලෝ එකක් රුපියල් දහයකි. ශ‍්‍රී ලංකාවේ මුදලින්  සලකනවිට රුපියල් විසි හයකට ආසන්නය. තොග මිල තවත් අඩු බව සැකයක් නැත. ඉන්දියාව හා ශ‍්‍රී ලංකාව අතර වෙළද ගිවිසුමක් තිබේ. දෙරට අතර භාණ්ඩ ප‍්‍රවාහනයට විශාල පිරිවැයක් නැත. අස්වනු හිග කාලයේ ලංකාවේ ලොකු ලූනු කිලෝවක මිල රුපියල් තුන්සියය ඉක්මවයි. මාතලේ, දඹුල්ල, ගලේවෙල, ලග්ගල ඇතුළු ප‍්‍රදේශවල මහා පරිමානයෙන් ලොකු ලූනු වගා කෙරේ. උතුරු නැගෙනහිර පලාත්වල ද සුළු ගොවියෝ සිටිති. ලොකු ලූනු අස්වැන්න ලැබෙන කාලයේ දී පවා ඉන්දියාවේ මිලට අපට ලැබෙන්නේ නැත. පාරිභෝගිකයන් විදින අවාසිය බරපතලය. පවතින සම්ප‍්‍රදායික රාමුව වෙනස් කළහොත් ජීවන වියදම සම්බන්ධ අලූත් අත්දැකීමකට යා හැකිය. මෙහි සදහන් කළේ එක පාරිභෝජන ද්‍රව්‍යයක් ගැන පමණකි. අනෙක් කෘෂි නිෂ්පාදන වල ද අභ්‍යන්තරයෙහි වෙනස මේ හා සමානය.

ලොකු ලූනු වගාවට අවශ්‍ය බීජ වලින් වැඩි කොටසක් ආනයනය කෙරේ. පොහොර පිටතින් ගෙන්වයි. ගොවියන්ට සහනාධාර ක‍්‍රම වෙනුවෙන් රජය වැයකරන ධනය ද සුළු පටු නැත. ඉඩම හා ශ‍්‍රමය පමණක් මෙරටින්ය. වගා බිම් සෑහෙන කොටසකට ඔප්පු නැත. වගා කරන්නේ අද ගොවීහුය. අස්වැන්න විකිණීමෙන් පසු ණය ගෙවීම හැර ආදායමක් ගොවියන්ට නැති බව ඉතාම පැහැදිලි කරුණකි. ව්‍යුහාත්මක වෙනස්කම් ඇති කිරීම කෙරෙහි ප‍්‍රතිපත්ති සම්පාදකයෝ අවධානය යොමු කළ යුතුය.

ලොකු ලූනු වෙනුවට වෙනත් දෙයක් වගා කළ හැකිය. අපනයනයෙන් වැඩි ආදායමක් ලබා ගත හැකි බෝග ප‍්‍රබේධ තිබේ. කෘෂි ව්‍යාප්ති අංශ මේවා ගැන අධ්‍යයනය කර රජයට නිර්දේශ ඉදිරිපත් කරන්නට අවශ්‍යය. ලොකු ලූනු වගා කරන ගොවියන් ගේ ඉරණම වෙනස් කරන තීරණ අවශ්‍යය. එය පාරිභෝගිකයන් ගේ ද ඉරණම වෙනස් කිරීමකි. මුලින් ගැටළු ඇතිවෙයි. විරෝධතා එල්ල වෙනු ඇත. ඒවා සනුමනය කළ හැක. ලූනු ගොවියන් තෝරාගෙන ඔවුන්ට කෙලින්ම ආධාර සැපයිය යුතුය. ආනයනික ලොකු ලූනු වලට විශේෂ බද්දක් පනවා එයින් ලැබෙන ආදායම අනෙක් වගාවකින් ස්ථාවර වන තෙක් ගොවි ජනතාවට ගෙවිය හැකිය. අවුරුදු දෙක තුනකින් අලූත් යමක් සිදුවෙයි. පාරිභෝගිකයන්ට අඩු මිලට ලොකු ලූනු මිල දී ගත හැකිවනු ඇත. වෙළද පොල මිල ස්ථාවරව තබාගැනීම සදහා, විදේශීය සැපයුම්කරුවන් සමග ඉදිරි මිල දී ගැනීමේ ගිවිසුම් අත්සන් කරන්නට හැකියාව ඇත.

ගොවි ජනතාව ඉකුත් පරම්පරා ගණනක, මහ පොලව සමග හැපී, ගැටී එයින්ම පෝෂණය වී ඇත. අලූත් පරපුර මෙහි විෂම පැත්ත ගැන අවබෝධයක් සහිතය. දරුවෝ ගොවිපොලට එහා ඇති අවස්ථා දකිති. නගරයට හො නගරයෙන් පැන වෙනත් රටකට යන්නට සූදානම්ය. වෙළද පොල සදහා ගොවිතැනෙහි නිරත වන පිරිස ක‍්‍රමයෙන් අඩුවෙමින් පවතී. ඵලදායීත්වයක් නැති අකාර්යක්ෂම ක‍්‍රමවලින් ගැලවෙන සූදානම වැදගත්ය. වෙනස් ක්ෂේත‍්‍ර තෝරා විධිමත් අධ්‍යයනයක් කළ හැකිය. අර්බුදකාරී පැතිවලින් ගැලවීමට පර්යේෂණ කළ යුතුය. මෙරට කෘෂිකර්මය හා ගොවිතැන ගැන විශ්ව විද්‍යාල මට්ටමින් වැදගත් සොයාගැනීම් කර තිබේ. ඒවා ප‍්‍රායෝගිකව භාවිතයට නොගැනීම අඩුවකි. මෙහි ලා සදහන් කළේ එක වගාවක් ගැන පමණකි. ආසන්න රටක අත්දැකීමක් වන අතර අනෙක් අංශ ගැන ද පරීක්ෂාකාරීව සොයා බැලීමෙන් පාරිභෝගික උන්නතිය ඇති කළ හැකිවනු ඇත.

පළමුවත් දෙවැනුවත් තාක්ෂණය පාසලට

ප්‍රතිචාරයක් ලබාදෙන්න

2021.11.03 – ලංකාදීප


දීර්ඝ නිවාඩුවකට පසු දරුවන් පාසලට කැඳවන තීරණයක් ඇත. කොවිඩ් වසංගතයේ බලපෑම මත අවස්ථා ගණනක්, සංචරණ සීමා යටතේ පැවැතිණි. අධ්‍යාපන කටයුතුවලට තියුණු බලපෑමක් එල්ලවිය. අන්තර් ජාල පහසුකම් යටතේ ක්‍රමානුකූලව කරගෙන යන බලවත් වෑයමක් තිබුණ නමුත් එහිදී ද මතු වූ සංකීර්ණ ගැටළු ගණනාවකි. වෘත්තීය ප්‍රශ්න, ආකල්ප ගැටළු වෙනම සාකච්ඡා කළ යුතුය. පාසල නැවත විවෘත කිරීමෙන් පසු, කලුලෑල්ලේ ආකෘතියෙන් ඔබ්බට ගමන් කිරීම ගැන ප්‍රතිපත්ති විවාදයක් අවශ්‍යය.


ජංගම දුරකථන හා අන්තර් ජාල භාවිතා කිරීම දරුවන්ට තහනම් වී තිබුණි. කොවිඩ් වංසගතය සමග ගුරුන් හා දෙගුරුන්ට ක්‍රමානුකූලව එයින් බැහැරවෙන්නට සිදුවිය. වාර්තාවෙන කරුණු අනුව පෙර පාසල පවා ‘ඔන්ලයින්’ ක්‍රමයටය. යුගයට අනුව පරිවර්තනයවීම අගය කළ යුතුය. විදේශ රටවල පවා අධ්‍යාපන කටයුතු තාක්ෂණයට නැඹුරු වී ඇත වකවානුවකි. දුරස්ථව ඉගෙනීම සාමාන්‍ය දෙයක් බවට පත්ව තිබේ. උතුර දකුණ බේද රහිතව අධ්‍යාපනය ලබාදිය හැකි ක්‍රමයකි.
පාසල් නැවත ආරම්භ කළ පසු පවා දෙමුහුන් ක්‍රමයකට අධ්‍යාපන පහසුකම් සකස් කිරීම උචිතය. පොත් මුද්‍රණය, බර පාසල් බෑග්, සහ වාහන තදබදය හේතුවෙන් කාලය නාස්ති කරන පාසල් වෑන් සංස්කෘතිය වෙනස් කරන්නේ කෙසේ ද යන්න මධ්‍යස්ථව අධ්‍යයනය කළ හැකිය. පෙල පොත් අන්තර් ජාලයට එකතු කිරීම හා සාමාන්‍ය පරීක්ෂණ අන්තර් ජාලයෙන් කළ හැකිය. සටහන් පොත් පමණක් දරුවන්ට සෑහේ. අවශ්‍ය විෂය කරුණු ලියා ගත හැකිය.

පාසලට එන දින ගණන වෙනස් කිරීමෙන් අධ්‍යයනයේ කොටසක් නිවසේ සිට කරගෙන යන හැකියාව තිබේ. ප්‍රායෝගික හැදෑරීම් සඳහා පාසලට පැමිණිය හැක. එවැනි පියවර තුළින් සෞඛ්‍ය ආරක්ෂාව පමණක් නොව දරුවන්ගේ මානසික තත්ත්වය ද උසස් කෙරේ. සෘජු අධීක්ෂණය හා නිසි මගපෙන්වීම සම්බන්ධයෙන් ගුරුවර්න්ටත්, දෙමාපියන්ටත් විශාල වගකීමක් පැවරෙන බව ද මෙහි ලා සඳහන් කරන්නට අවශ්‍යය. ගුරු පුහුණු ක්‍රම වහාම වෙනස් කළ යුතු අතර දුරස්ථ අධ්‍යයනය ගැන සැසි පවත්වා අලුත් පසුබිමක් සකස් කළ යුතුව තිබේ.


තාක්ෂණය හේතු කොටගෙන සමාජ බෙදුම් රේඛාවක් නිර්මාණය නොකිරීමට වගබලාගැනීම ඉතාම වැදගත් කාරණයකි. ඇති නැති පරතරය හැදෙන්නේ අන්තර් ජාලය භාවිතා කරන්නට ඇති පහසුව සමග බව ජාත්‍යන්තරයේ අද පවතින පිලිගැනීමයි. ‘කොළඹට කිරි – ගමට කැකිරි’ යන ප්‍රකට ව්‍යවහාරය එන්නේ පාසලේ ගොඩනැගිලි, විද්‍යාගාර හා පිහිණුම් තටාක වැනි පොදු පහසුකම් පරතරය සමගය. එවැනි දේ වෙනුවෙන් අසීමිත ධනයක් වැය කරන්නට සිදුවූ අතර දෙමාපියන් සහ පුද්ගලික අංශය එහි දී එකතු වී ක්‍රියා කළ ආකාරයක ද සිහිපත් කරන්නට අවශ්‍යය.


අන්තර් ජාලයෙන් අධ්‍යාපනය ලබන්නට නිසි යටිතල පහසුකම් සම්පාදනය කිරීම රජයේ වගකීමකි. දැනට ජාලගත පහසුකම් රට පුරා එක හා සමානව නැත. දුෂ්කර ප්‍රදේශවල අන්තර් ජාල පහසුකම් වෙනුවෙන් විඳින හිරිහැරය වගකිවයුතු අංශ නොදන්නවා නොවේ. නගරයෙන් එපිට දරුවන්ගේ අවශ්‍යතා කෙරෙහි වැඩි අවධානයක් අවශ්‍යය.අන්තර් ජාල ඉගෙනගැනීමක දී හොඳම පාසලේ දේශනවලට ශ්‍රී ලංකාවේ එහා කෙළවරක සිටින දරුවෙකුට පවා ප්‍රවේශ විය හැකිවනු ඇත. එය ඉතාම වටිනා අවස්ථාවකි. පාසල් පන්ති කාමර රටට විවෘත වුවහොත් දැනට විසඳාගත නොහැකිව ඇති ටියුෂන් තරඟයට ද උත්තරයක් වෙන්නට බැරි නැත. අවශ්‍ය තිරණ ගැනීම වැදගත්ය. සන්නිවේදන පහසුකම් සපයන ආයතන දිරිමත් කර දුෂ්කර ප්‍රදේශවලට ජාලගත පහසුකම් සැපයීමේ දී රජයෙන් මුදල් ගෙවන ක්‍රමයක් ඇති කළ හැක. පුරුදු රාමුවෙන් එපිට දෙමුහුන් එනම් පාසල හා අන්තර් ජාලය එකට එකතු කරන අධ්‍යාපනයක් සඳහා සැලසුම් සකස් කළ යුතු අතර එයට අධ්‍යාපන බලධාරීහු පමණක් නොව දෙමාපියන් ද ක්‍රියාකාරීව සම්බන්ධ විය යුතුය.

ජනතාව බලවත් කෙරෙන ව්‍යවස්ථාවක අවශ්‍යතාව

ප්‍රතිචාරයක් ලබාදෙන්න

2021/10/27 – ලංකාදීප

ව්‍යවස්ථාව ගැන කතා නැවත වාරයක් ආරම්භ කර තිබේ. නිදහසට පසු ගත වූ ඉතිහාසය ව්‍යවස්ථා ගැන ආන්දෝලන වලින් බහුලය. බලයට පත්වන ආණ්ඩු ව්‍යවස්ථා නිර්මාණය කරති. ඒවායේ සාර්ථක හෝ අසාර්ථක භාවය වෙනම සාකච්ඡා කළ යුතුය. පොදු ජනතාවට ලැබි ඇති අවස්ථාව කුමක්ද?

යුක්තිගරුක පාලන ක‍්‍රමයක් සහතික කිරීමට ව්‍යවස්ථාව වැදගත්ය. ශ‍්‍රීමත් අයිවර් ජෙනින්ග්ස් නිදහස් ශ‍්‍රී ලංකාවේ පළමු ව්‍යවස්ථාව නිර්මාණය කළේය. ඞී. එස්. සේනානායක මහතා සමග සාකච්ඡා කරමින් එහි වගන්ති සකස් කරන ලද අතර පාර්ලිමේන්තුවේ සම්මත කරගෙන තිබේ. පසුව 1972 වසරේ දී ජනරජ ව්‍යවස්ථාවක් සම්මත කරගනී. විධායක බලතල සහිත ජනාධිපතිවරයෙකු සහිත පාලනයක් ලැබෙන සේ ව්‍යවස්ථාව වෙනස් කළේ 1978 වසරේ දී ය. එතැන් සිට බලයට පත්වන ආණ්ඩු අලූත් ව්‍යවස්ථා යෝජනා කිරීම සාමාන්‍ය සිද්ධියකි. ක‍්‍රමය වෙනස් අරගලය අරඹන නමුත් රාමුව තුළ සංශෝධන හැර අලූත් යමක් නිර්මාණය කරගන්නට අසමත් ව සිටී.

රටට අලූත් ආරම්භයක් අවශ්‍යය. එය ගැන විවාදයක් නැත. දකුණේ ජනතාව පෙරැලියක් කෙරෙහි බලාපොරොත්තු තබා තිබේ. උතුර නැගෙනහිර ජනතාව සිය අභිමතාර්ථ ගැන සිතති. මෑතක සිදුවූ ත‍්‍රස්තවාදයට හේතු වූ පසුබිම අධ්‍යනය කර පුරවැසියන්ට අවස්ථා සම්පාදනය කරන රටක් වෙනුවෙන් පියවරකට  යා යුතුය.

ව්‍යවස්ථා හදන්නේ නීතිවේදීහුය. හැදෙන්නේ පාලකයන්ට රිසි පරිදිය. බලයේ සිටින කණ්ඩායමක බලය ආරක්ෂා වන පරිදි නීතිහැදීම අසාර්ථක පිලිවෙලකි. ව්‍යවස්ථාව පාලකයන්ට බලය ලැබෙන ආයුධයක් නොවේ. ජන සම්මතවාදය ආරක්ෂා කරන  ජනතාව බලගන්වන එකකි. රටවැසියන්ගෙන් දුරස් වූ ව්‍යවස්ථාව ඔවුන් අතරට ගෙන යෑම වැදගත්ය. ඔවුන්ට දැනෙන,  ජනතාවට ස්පර්ශ කළ හැකි ව්‍යවස්ථාවක් අවශ්‍යය. සමාජ නායකයන්ට අලූත් ව්‍යවස්ථාව ගැන වගකීමක් ඇත. සමාජයට අවශ්‍ය කරුණු ගැන අධ්‍යයනය කර නවෝත්පාදන අදහස් එයට ඇතුලත් කළ යුතුය. දේශපාලනඥයා බලවත් කිරීම වෙනුවට ජනතාව අතට අවස්ථා සම්පාදනය වන වගන්ති අවශ්‍යය.

ගෝලීයසමාජය තුළ ශ‍්‍රී ලංකාව එක කොටසකි. ලෝකයේ අනෙක් රටවල සිදුවන, ලෝකයේ අනෙක් තැනකින් ලබාගත හැකි අවස්ථා ගැන හොද අවබෝධයක් ඇති මානව සම්පතක් අපට සිටී. පැරණි යල්පැන ගිය අදහස්වලින් අභිලාශ අවුරා දැමීම නොකළ යුතුය. සිතැගි පරිදි ජීවත්වන්නට ක‍්‍රමය සහ ගැති නොවී අවස්ථා හදාගන්නට පසුබිම රටට ගැලපෙන ව්‍යවස්ථාව තුළ තිබිය යුතුය. බලය එක පුද්ගලයෙකුට හෝ එක කණ්ඩායමකට ලැබෙන අලූත් රාමුවක් හැදීම පරණ වැඩමල්ලට අලූත් වචන එල්ලීමක් පමණකි. ලෝකයේ අනෙක් රටවල සිදුවී ඇත්තේ කුමක්ද? ජාති, ආගම්, ආගම් හෝ වෙනත් බේධ තුරන් කරන ව්‍යුහයක් හැදුනේ කෙසේදැයි අප අතර සාකච්ඡාවක් තිබිය යුතුය. එම සාකච්ඡාවට පදනම් කරගෙන පාලන රාමුවක් හැදීම අලූත් ව්‍යවස්ථාව විය යුතු බව අවධාරණය කළ යුතුව තිබේ.

අරගල කරන මිනිසුන් මර්දනය කළ යුතු නැත. රටට අවශ්‍ය සමාජ විප්ලවයකට පෙලගැසෙන ජනි ජනයා මට්ටු කරන නීති වගන්ති නොවේ. කැළඹීමක් ඇතිකළ පිරිස ලෝකයේ රටවල් ඉදිරියට ගෙන ගොස් තිබේ. වෙනස් ආකාරයකට කල්පනා කළ පුද්ගලයෝ රටවල් අනගිභවනීය තත්ත්වයට පත්ව කර ඇත. ශ‍්‍රී ලංකාවට අවශ්‍ය එවැනි යුගයකට ඉඩකඩ හදන පිලිවෙලකි. නීති හදා රට මට්ටු කිරීම වෙනුවට රාමුවක් තුළ හිත් මුදාහරින ක‍්‍රමයක් යෝජනා කළ යුතුය.

ඉතිහාසයෙන් පාඩම් ඉගෙනගැනීම අවශ්‍යය. පැවැත්ම වෙනුවෙන් පරම්පරා ගණනක් වන්දි ගෙවා තිබේ. ජීවගුණයෙකින් පිරි මිනිසුන් බිලි වූ රටකි. විජාතික පාලකයන්ට විරුද්ධ සටන තුළ පමණක් නොව නිදහසට පසු පාලකයන්ට ද විරුද්ධව හඩ නැගූ ජන කොටස තුළ මතයක් තිබේ. එකී මත වලට හිමි ස්ථානය කුමක්ද? ව්‍යවස්ථාව යනු එක කොටසකට, එක පැලැන්තියකට, එකට ගමන් කරන කණ්ඩායමකට පමණක් බලය දෙන සැකිල්ලක් නොවේ. මුළු මහත් සමාජයකට බලය ලැබෙන නෛතික ව්‍යුහයකි. සමාජයක් එකතු කරන සජීවී බලවේගයකි. එවැනි ව්‍යවස්ථාවක් හදාගැනීම සම්බන්ධයෙන් සිහින දකින සමාජය ගැන කල්පනා කිරීම ඉතාම වැදගත්ය.

වස විස අඩු වගාවට නැනෝ පොහොර

ප්‍රතිචාරයක් ලබාදෙන්න

2021/10/20 – ලංකාදීප

නැනෝ තාක්ෂණය අනාගත පරම්පරාවේ භාවිතය වනු ඇත. අලූත් පැති සමාජ ආර්ථික පරිවර්තනයකට හේතු වී තිබේ. නැනෝ තාක්ෂණයෙන් නිපදවන ලද යුරියා පළමු වරට ඉන්දියාවේ ගුජරාට් ප‍්‍රාන්තයේ භාවිතාකර ඇත. භවනගර් ප‍්‍රදේශයේ ගොවිපොලකට නැනෝ නයිට‍්‍රජන් පොහොර ඩ්‍රෝන යාත‍්‍රා මගින් විසුරුවාහැරීම සිදුකෙරිණි. එරට ප‍්‍රාන්තවලින් තෝරාගත් ගොවීහු තිස් හතර දෙනෙකු මෙම අවස්ථාවට සහභාගී කර ගෙන ඇත. පද්ම ශ‍්‍රී ඉන්දීය ජාතික සම්මාන දිනාගත් ගොවියෝ ද ඒ අතර සිටියහ. නැනෝ තාක්ෂණික පොහොර භාවිතය ගැන මතය ඉන්දියාව පුරා පැතිරවීමට මෙම මොහොත උපයෝගී කරගත හැකිවනු ඇතැයි සැලකේ.

නැනෝ අංශූ ස්වභාවිකව හා කෘතිමව පවතී. එය අනාවරණය කරගන්නේ 1950 ගණන්වල දී ය. නැනෝ අංශුවක විශාලත්වය මීටරයකින් බිලියනයකින් එක් කොටසකි. එහෙත් එය ශක්තිමත් හා සැහැල්ලූය. ද්‍රව්‍ය පිලිස්සීමේ දී හා මුහුදු ඛාදනය වැනි අවස්ථාවල නැනෝ අංශු ස්වභාවිකව නිරීක්ෂණය කර ඇත. විද්‍යාගාරවල නිපදවන නැනෝ අංශු ඉංජිනේරු ශිල්පීය නැනෝ අංශු ලෙස හදුන්වනවන අතර ඒවා නොයෙක් රසායනික මෙවලම් සමග මිශ‍්‍ර කිරීමෙන් උසස් ප‍්‍රතිඵල අත්පත් කරගන්නට හැකියාව ලැබී ඇත. යුරියා සමග මිශ‍්‍රකරන නැනෝ අංශු නයිට‍්‍රජන් අවශ්‍යතාව සදහා ඉතාම ප‍්‍රයෝජනවත් බව සොයා ගෙන තිබේ. දැනට ඉන්දියාව කරන පර්යේෂණ අනුව නැනෝ යුරියා පමණක් නොව නැනෝ සින්ක් හා නැනෝ කොපර් යන අංශූ මාත‍්‍ර දියර පොහොර ද නිපදවා ඇති බව දැක්වෙයි. මෙම පොහොර ක්ෂේත‍්‍රයට යෙදු පසු ශාඛයට අවශ්‍ය පරිදි සෙමෙන්, ක‍්‍රමයෙන් නිදහස් කරන අතර එය පොහොර වැඩිවශයෙන් පසට එකතු වී අපතේ යෑම අවම කරන බව ක්ෂේත‍්‍ර පර්යේෂණ තහවුරු කර තිබේ.

ඉන්දියන් වාර්තා දක්වන පරිදි නැනෝ පොහොර යෙදීමෙන් පිරිවැය සියයට පනහකින් අඩුවන අතර අස්වැන්න සියයට 15-30 අතර ප‍්‍රමාණයකින් වර්ධනය වෙයි. යුරියා පමණක් නොව අනෙක් පොහොර ද අවශ්‍ය පමණට ගොවියන්ටට ලබාදීම කෙරෙහි අවධානය යොමු කිරීම කෘෂිකර්ම බලධාරීන් ගේ වගකීමකි. සාමාන්‍ය යුරියා පොහොර වලට සාපේක්ෂව නැනෝ පොහොර පරිසරයට හිතකර බව අවධානයට ගත යුතු කාරණයකි. සාමාන්‍යයෙන් මිලි ලීටර් 500 ක බෝතලයක් පොහොර කිලෝ ග‍්‍රෑම් පන්සියයක ප‍්‍රමාණයක් සදහා සෑහෙන අතර ධාරිතාව, මිල, හැසිරවීමේ පහසුව, පසට උරාගන්නා ක‍්‍රමවේදය සහ පරිසර ආරක්ෂාව සම්බන්ධයෙන් ඉහළම ප‍්‍රතිඵල දක්වන බව සදහන් කළ යුතු වැදගත් කාරණා වශයෙන් පර්යේෂකයෝ දක්වති.

නැනෝ තාක්ෂණ යුරියා පොහොර අත්හදා බැලීමේ ආදර්ශනයක් සදහා අවස්ථාව ශ‍්‍රී ලංකාව ද ලැබී තිබේ. ඉන්දියන් රජයේ ඉහළ නිලධාරීහු දක්වන පරිදි මෙම සාම්පල් පොහොර ශ‍්‍රී ලංකාවේ දී සාර්ථකව අත්හදා බලා ඇත. ලෝකයේ පළමුවරට කරන ලද සොයා ගැනීමක් බව ද පෙන්වා දිය යුතුය. ඉන්දියාව අත්පත් කරගෙන ඇති ප‍්‍රතිඵල සලකා ඉන්දීය ගොවි ජනතාව වෙත මෙම නැනෝ පොහොර සැපයීමේ යාන්ත‍්‍රණයක් දැන් අරඹා තිබේ. ශ‍්‍රී ලංකාව ට ද එහි වාසි අත්පත් කරගැනීමට අවස්ථාවක් ඇත.

රසායනික පොහොර සම්බන්ධ මතවාදයක් දීර්ඝ කාලයක් තිස්සේ රට තුළ පවතී. වස විස නැති ගොවිතැන ගැන ඉහළම අවධානයක් තිබේ. රසායනික පොහොර භාවිතය නතර කිරීම සම්බන්ධ ආන්දෝලනය ද එහි ප‍්‍රතිඵලයකි. අනාගත පරපුර නිදුක් නිරෝගී පිරිසක් බවට පත් කරන අධ්‍යාශයක් ජනාධිපතිවරයා ප‍්‍රමුඛ රජයට ඇත. එහි ලා ගන්නා කි‍්‍රයාමාර්ග කෙරෙහි සැකයක්, අවිස්වාසයක් පවතින බව පෙනෙන අතර සම්ප‍්‍රදායෙන් පිටට පැන අලූත් ව්‍යුහයකට ඇතුළුවීම පහසු නැති බව දැක්විය යුතුය. දැනට භාවිතා කරන රසායනික පොහොර හා ඒවායේ ක‍්‍රියාකාරීත්වය සම්බන්ධව පැන නැගී ඇති ගැටළු සලකා බලනවිට නැනෝ තාක්ෂණයෙන් නිපදවන පොහොර අගනා අවස්ථාවක් විය හැකිය. කෘෂිකර්මයෙහි ප‍්‍රබෝධයක් අරමුණු කරගෙන අලූත් අත්දැකීම් සොයා යා යුතුය. පද්ම ශ‍්‍රී සම්මානය ලැබූ ඉන්දීය ගොවියෝ නැනෝ පොහොර ගැන දක්වන අදහස් නවීන සන්නිවේදන ක‍්‍රම වලින් රටට ලබා ගැනීමට වැඩ පිලිවෙලක් සැකසිය යුතුය. අලූත් ක‍්‍රම ගැන ගොවියන් අතර තොරතුරු සන්නිවේදනයට අවස්ථාව ඇතිකිරීම ඉතාම වැදගත්ය.

තාක්ෂණ යුගයේ අවස්ථා දිනාගැනීම

ප්‍රතිචාරයක් ලබාදෙන්න

2021.10.13 – ලංකාදීප

අලූත් පරම්පරාවේ ජවය තොරතුරු තාක්ෂණය බව පැහැදිලිය. අලූත් පැති සමාජ ආර්ථික පරිවර්තනයකට හේතු වී ඇති බව ඉතිහාසය ගවේශනය කරන විට පෙනේ. මානව වංශ කතාවේ කැපී පෙනෙන කාල පරිච්ඡේද ගණනාවකි. ගින්දර සොයා ගැනීම, රෝද භාවිතා කිරීම, බලශක්ති ප‍්‍රභවයන්හි විවිධ අංශ යනා දී වශයෙන් දිග ලේඛණයක් ඉදිරිපත් කළ හැක. එහෙත් තොරතුරු තාක්ෂණය අසම සම අවස්ථාවකි. ගෝලීයකරණය ගැන තිබුණ නොපැහැදිලි භාවය තුරන්කරන අතර ලෝකය එක යායක් බවට හරවන්නට තොරතුරු තාක්ෂණයට හැකියාව ලැබී ඇත.

මෑත අතීතය දක්වා තොරතුරු වරප‍්‍රසාද සහිත පැලැන්තියකට සීමා වී තිබුණි. සිද්ධි දැනගැනීමට අවස්ථා නොතිබුණ තරම්ය. දුරකතනයකින් හෝ ලිපියකින් කරුණු දැනගැනීමට ද කාලයක් ගත විය. දැන් ලෝකයේ එහා කෙළවරක සිදුවන දේ මෑත රටක සිටින  ඕනෑම කෙනෙකුගේ ජංගම දුරකතනයට ක්ෂණයකින් ලැබේ. ජන ජීවිතය පහසු කරනු සදහා තොරතුරු තාක්ෂණය ඉවහල් කරගත හැකිය.

කොවිඞ් වසංගත තත්ත්වය සමග ජන ජීවිතය තවත් පැත්තකට හැරිණ. තෙරතුරු තාක්ෂණයට වේගයෙන් නැඹුරුවිය. අත්‍යවශ්‍ය භාණ්ඩ මිල දී ගැනීම, අධ්‍යාපනය, ඇතැම් රැකියා කටයුතු, මුදල් හුවමාරුව ඇතුළු නොයෙක් ක්ෂේත‍්‍රවල පැතිරීමක් සිදුවිය. ඇතැම් වෛද්‍යවරු පවා රෝග වාර්තා යොමු කළ පසු අන්තර් ජාලයෙන් ප‍්‍රතිකාර කිරීම අරඹන ලද බව සදහන් කළ යුතුය. වසංගත තත්ත්වය පාලනය කිරීමෙන් පසු නැවතත් පුරුදු සම්ප‍්‍රදායට ඇතුළු විය යුතු නැත.

අවධානයට ගත යුතු තවත් පැත්තක් තිබේ. තවත් පියවරක් ඉදිරියට ගමන් කිරිමට අවශ්‍ය පසුතලය සැකසීම සම්බන්ධ පුලූල් වගකීමක් රජයට ඇත. රජයේ කටයුතු සදහා තොරතුරු සන්නිවේදන තාක්ෂණ භාවිතය වේගවත් කළ යුතුය. පැරණි චක‍්‍රලේඛන හා විධිවිධාන ඉවත් කළ යුතුව තිබේ. සම්ප‍්‍රදාය අතහැර අලූත් රාමුවට ඇතුළුවීම අවශ්‍යය. ආණ්ඩුවේ හා විපක්ෂයේ මහජන නියෝජිතයන් එහි ලා ආධුනිකයෝ නොවෙති. මැතිවරණ කාලයේ දී සියළු සමාජ මාධ්‍ය භාවිතා කරන අතර ඡන්ද දායකයන් සමග සන්නිවේදනයෙහි යෙදෙති. මැතිවරණය අවසන් වන පසු ඇතැම් මහජන නියෝජිතයෝ එහි ලා තිබුණ උනන්දුව අත් හරින බව පෙනේ.

ජනතාව සමග පමණක් නොව ජාත්‍යන්තරය සමග කටයුතු කිරීම සදහා තාක්ෂණික දොරටුව විවෘත කරගත යුතුව තිබේ. රජයේ නිලධාරීන් එහි ලා යුහුසුළු විය යුතුය. ජාත්‍යන්තර සම්බන්ධතා සහ රටවල් අතර කරන ගනුදෙනු සදහා ද මෙම නැඹුරුව ඉතා වැදගත්ය. රාජ්‍ය තාන්ත‍්‍රික සම්බන්ධතා අලූත් වී ඇති වකවානුවකි. රාජ්‍ය නායකයෝ කෙලින්ම සාකච්ඡා කරති. මැති ඇමැතිවරු ද්වී පාර්ශවික හා බහු පාර්ශවික සාකච්ඡා කරන බව අනාවරණය වෙයි.  ජාත්‍යන්තර සංවිධාන සැසිවාර තොරතුරු තාක්ෂණය උපයෝගී කරගෙන කරගෙන යයි. මේවායෙන් විශාල වරප‍්‍රසාද ලැබේ. කාලය ඉතිරිවෙයි. රටින් රටකට ගමන් කර පුද්ගලිකව කරන හමුවීම් වැදගත් නමුත් එයට ගෙවිය යුතු වන්දිය බරපතලය. ගුවන් ගමන් වෙනුවෙන් පිරිවැය අධිකය. විශාල වියදමක් දරන්නට සිදුවෙයි. ශ‍්‍රී ලංකාව විදේශ විනිමය හිගයක පසුවෙන අතර රට තුළ ආර්ථිකය ද යහපත් තැනක නැත. මෙවැනි කාල වකවානුවක රට තුළ කරන ගමන් බිමන් පමණක් නොව ජාත්‍යන්තර සංචාර ද සීමා කිරීමෙන් විශාල පිටිහවහලක් අත්පත් කරගත හැකිය.

තොරතුරු තාක්ෂණය සමග සම්මුඛ සාකච්ඡා සදහා නවතම අන්තර් ජාල ව්‍යුහ දියුණු කර තිබේ. ජාත්‍යන්තර විශ්ව විද්‍යාල වල ඉගෙනගන්නා දරුවෝ ඒවා බහුලව භාවිතා කරති. පුද්ගලික අංශයේ ජාලගත සම්මන්ත‍්‍රණ ඉතාම සාර්ථක ප‍්‍රතිඵල පෙන්වා තිබේ. රජයේ ආයතන අතර සාකච්ඡා සදහා තාක්ෂණය උපයෝගී කරගන්නට හැකිය. රටවල් අතර කරන රාජ්‍ය තාන්ත‍්‍රික කටයුතු තවත් පියවරක් ඉදිරියට ගමන් කිරීම සදහා පිටුවහලක් ලැබේ. කාලය කළමනාකරණය හා පිරිවැය සීමා කරගෙන සෞඛ්‍ය ආරක්ෂක ක‍්‍රම අනුගමනය කරමින් ලෝකය දෙස බලන්නට ඇති අවස්ථා මග හැරිය යුතු නැත. ජාලගත මුණගැසීම, සාකච්ඡා හා ගිවිසුම්වලට එළැඹීම සදහා අවශ්‍ය කරන නීති රීති සම්මත කර ඒවාට අනුගතවීම රජයේ වගකීමකි. තාක්ෂණික හැකියාව හා එයින් අවස්ථා ලබාගැනීම පදනම් කරගෙන පන්ති බෙදීමක් සමජය තුළ ඇති නොවිය යුතුය.

සුළු පිරිස් සතුටු කිරීමට බහුතරයේ අපේක්ෂා බොදකිරීම

ප්‍රතිචාරයක් ලබාදෙන්න

2021.10.06 – ලංකාදීප

මානව වංශ කතාව ගැන ඩෙස්මන්ඞ් මොරිස් ලියන ලද සාරවත් කෘතියක් ‘නිරුවත් මානවයා’ නමින් එස්. එම්. බන්දුසීල සිංහල භාෂාවට පරිවර්තනය කර තිබේ. මුල් යුගයේ සිට රෙදි පිලි අදින, ගින්දර භාවිතා කරන තැන දක්වා මනුෂ්‍ය පරිනාමය ගැන මුලික රාමුවක් එහි සදහන්ය.

ආර්ථිකය හා සමාජය හසුරුවන ක‍්‍රම හදාරන ලද විද්වත්හු ලෝකය දැවැන්ත පරිවර්තනයකට යොමු කර තිබේ. වරින් වර එන අභියෝග තියුණුය. කාලගුණ විපත්, යුද ගැටුම් හා දැන් පවතින කොවිඞ් වැනි වසංගත පැන නැගී ඇති බව ඉතිහාසය දක්වයි. එහෙත් පසු බැස නැත. නැවතත් නැගී සිටියි. අලූත් ව්‍යුහයකින් අනාගතය දෙස අවධානය යොමු කර තිබේ.ජාත්‍යන්තරයේ පැවැත්ම වෙනම කාරණයකි. ශ‍්‍රී ලංකාවේ ජනී ජනයාගේ එදිනෙදා කටයුතු ගැන සලකා බැලිය යුතුය.

අප සියළු දෙනාටම බලාපොරොත්තු තිබේ. සැනසිල්ලේ එදිනෙදා ජීවත්වීමට අවශ්‍යය. ලොකු පොඩි, දුප්පත් පොහොසත් බේධයක් නැත. මුදල් උපයාගන්නටත්, එම මුදල් වැය කර සතුටින් සාමදානයෙන් කාලය ගත කිරීම අපේක්ෂාවය. මුදල් ප‍්‍රමාණවත්ව ඇත්නම් තමන් මිල දී ගන්නා දේ දේශීය ද විදේශිය එකක් ද යන්න වැදගත් නැත. හොදම තත්ත්වය සලකා අඩු මිලට ගත හැකි දෙයකට නැඹුරු වෙති. දරුවන්ගේ අනාගතය, ඔවුන්ගේ උවමනා එපාකම් සම්පූර්ණ කිරීමට ප‍්‍රමාණවත් ශක්තිය කෙරෙහි  හැම පුරවැසියෙකුටම උනන්දුවක් ඇත.

ජනතා අපේක්ෂා සාක්ෂාත් කිරීම පාලකයන්ගේ වගකීමකි. යුතුකමකි. මෙරට පාලකයෝ නිතර කරුණු සලකා බලන්නේ ජනතාව ගේ පැත්තෙන් නොවේ. ඉතිහාසයේ සිට එයට සාක්ෂි තිබේ. ජාතික බලවේග, විවිධ ආස්ථාන, නොයෙක් මතවාදවල බලපෑම අනුව තීරණ ගනී. විදුලිය නිපදවන්නේ කොහොමද, කොතැනින් ද යන්න ජනතාවට වැදගත් නැත. නොරැටියන් නිපදවන හෙයින් අන්ධකාරයේ සිටින්නට කැමැතිද? දුරකතනය එන්නේ කොහොමදැයි පාරිභෝගිකයෝ නොසලකති. විජාතික හෙයින් අන්තර් ජාලය පැත්තකට කරයිද? ආහාර, ඇදුම් පැළදුම් හෝ යාන වාහන ගැන ද වෙනම කල්පනා කරන බවක් කිසිසේත් නොපෙනේ.

බාහිර සුළු පිරිසකගේ මතවාදයක් අනුව නැගෙන ආන්දෝලන ගැන අවධානය යොමු කරන මෙරට පාලකයෝ තීන්දු ගැනීමේ දී ගන්නේ ඡනප‍්‍රියතාව ගිලිහෙතැයි බිය වෙති.  පාරිභෝගික ජනතාවට කළ හැකි යහපත ගැන එපමණ සලකන්නේ නැත. එය බලවත් වරදකි. දිගින් දිගටම තීරණ නොගෙන පැවැති එම ව්‍යුහය එක්තරා සන්ධිස්ථානයකට පැමිණ තිබේ. දැන් ආර්ථිකය දුර්වල තැනකය. අවශ්‍යතා දැඩි පාලනයකට යටත් කර ඇත. තියෙන තරමට ආර්ථිකය හදන්නට උත්සාහ කළ ආණ්ඩු අවසානයේ දී ජනතාව නිරුවත් කර තිබේ. මුලින් ආර්ථිකය විශාලය. ජනතා අවශ්‍යතා සම්පූර්ණ කළේය. ඇදුමක් සකස් කරගන්නට තරම් ප‍්‍රමාණවත් ‘‘ආර්ථික රෙදිකඩක්’’ තිබුණි. ක‍්‍රමයෙන් ආර්ථිකය කුඩා වූ අතර කුඩා ප‍්‍රමාණය අනුව ඇදුම සකස් කරගන්නට සිදුවී තිබේ. දැන් පොදු ජනතාව ගේ ආර්ථිකය යාන්තම් විලි වසා ගැනීමක් පමණකි. තිබෙන ආර්ථිකයෙන් වැඩි දෙයක් කරගන්නට පුලූවන්කමක් නැත.

පැහැදිලි කරගත යුතු එක වැදගත් කාරණයක් තිබේ. ආණ්ඩු පත්කරගන්නේ ජනතාවගේ බලාපොරොත්තු පාලනය කරන්නට ද? ගෙයක් දොරක්, වාහනයක්, හො`ද නිවාඩුවක්, රසවත් ආහාර පාන, වටිනා ගෘහ උපකරණ යනාදී වශයෙන් හැම දෙනාටම ඉලක්ක ඇත. ආර්ථිකය අනුව සියළුම දේ පාලනය කර ඇත. ජනතාවට උවමනා කර තිබේ. පාලනය කරන්නේ පාලකයෝය. පාලනය කරගන්නට ආණ්ඩු අවශ්‍ය ද?

ආගමකම පැවැත්ම ගැන කියා දී තිබේ. ආදායම හා වියදම අනුව ජීවත්වන ක‍්‍රම ගැන ජනතාවට අවබෝධයක් ඇත. රට හදන්නට බලය ගන්නා පාලකයෝ ජනතාවගේ සිහින සැබෑ කරගැනීමේ මග අවහිර කර බාධා පමුණුවති. එය සුදුසු නැත.

සමාජය විවෘත කළ යුතුය. ජනතාවගේ පැවැත්මට නිදහස අවශ්‍යය. තිබෙන ආර්ථිකයට ඇ`දුම සකස් කිරීම පාලකයන් කළ යුතු දෙය නොවේ. බහුතර ජනතා අවශ්‍යතා ගැන අධ්‍යයනය කර, ඒවා සපුරන ආර්ථිකය හැදීම අවශ්‍යය. අසාමාන්‍ය භීතියකින් වෙලී සිටින සුළු පිරිසකගේ අධ්‍යාශය අනුව ආර්ථිකය පාලනය කිරීම සුදුසු නැත. අතීතයේ සිට තිබුණ සෑම ආණ්ඩුවක්ම ජනතාව පාලනය කළ අතර අවසානයේ දී එහි අන්තයටම පැමිණ තිබේ. ආණ්ඩුවක් හෝ දේශපාලන නායකයෝ පමණක් නොවේ. සමාජයක් වශයෙන් අප සියළු දෙනාම මෙහි වග උත්තරකරුවෝය. ආර්ථිකය පුලූල් කරන, නිසි ප‍්‍රතිපත්ති ස`දහා බලකිරීමක් සමාජයෙන් අවශ්‍යය.

ඛනිජ තෙල් පරිහරණයෙන් ඉවත්වීමට නෝර්වේ සම්මුතියක්

ප්‍රතිචාරයක් ලබාදෙන්න

2021/09/22 – ලංකාදීප

උතුරු යුරෝපා රටක් වන නෝර්වේ රාජ්‍යයෙහි මැතිවරණය පසුගිය දා පැවැතිණ. වාමාංශික,කම්කරු  පක්ෂය බහුතර ආසන ගණනක් දිනාගෙන අලූත් ආණ්ඩුව පිහිටුවා තිබේ.

ඡන්ද ප‍්‍රතිඵලය සාකච්ඡුා කිරීම වෙනුවට ඡන්ද වේදිකාවේ දිග හැරණු පැති ගැන අවධානය යොමු කිරීම සුදුසුය. කාලගුණ විපර්යාස ප‍්‍රධාන මාතෘකාව විය. යුරෝපා රටවල් අතර ප‍්‍රධානම තෙල් නිෂ්පාදකයා වන නෝර්වේ රජය තෙල් සහ ගෑස් නිෂ්පාදනය අවම කරන්නට සුදානමිය. පොසිල ඉන්ධන දහනයෙන් වායුගෝලයට සිදුවන හානිය ගැන මැතිවරණයේ දී විශාල අවධානයක් දක්වන ලද අතර බොරතෙල් හා ගෑස් කර්මාන්තය පාලනය කරන ආකාරය, මැතිවරණයට තරග කළ ප‍්‍රධාන පක්ෂ තුන ජනතාව හමුවේ තැබූ පොරොන්දු අතර ඉහළින්ම සටහන් වී  තිබුණි.

තෙල් හා ගෑස් අලෙවියෙන් අති විශාල ධනයක් උපයන නෝර්වේ රාජ්‍යය පොසිල ඉන්ධන නිෂ්පාදනයෙන් ඉවත්වීම ගැන ඡන්ද ප‍්‍රචාරක කටයුතු සම්පූර්ණයෙන්ම පාහේ වෙන්වී තිබුණි. කම්කරු පක්ෂය ක‍්‍රමානුකූලව ඉවත්වන බව දක්වන ලද අතර හරිත පක්ෂයේ අදහස වූයේ තෙල් ගවේශණ කටයුතු පවා වහාම නතර කිරීමය. කොන්සවටිව් පක්ෂය අතරමැදි තීරණයක පිහිටා ප‍්‍රතිපත්ති ප‍්‍රකාශ කර ඇති බව සදහන් කළ යුතුය.

ඛනිජ තෙල් ක්ෂේත‍්‍රය නෝර්වේ රාජ්‍යයෙහි දළ දේශීය නිෂ්පාදිතයෙන් සියයට දහ හතරක් වන අතර එරට අපනයන වලින් සියයට හතලිහක් බව දැක්වෙයි. දහසය ලක්ෂයකට වැඩි පිරිසක් කර්මාන්තයෙහි නිරතව සේවය කරති. ලෝකයේ විශාලතම ස්වෛරීත්ව අරමුදල නෝර්වේ රාජ්‍යය සතුවන අතර එහි වත්කම ඇමරිකානු ඩොලර් ටි‍්‍රලියන 1.4 කි. මෙවැනි පසුබිමක් සහිතව පවා පොසිල ඉන්ධනවලින් ඉවත්වීමට කරන යෝජනා එරට ජනතාව ගේ අමන්දානන්දයට හේතු වී තිබෙන බව මැතිවරණ ප‍්‍රතිඵලය පෙන්වයි. ජයග‍්‍රාහී කම්කරු පක්ෂය බදු සංශෝධන හා සංවර්ධනය ගැන  ද කරුණු දක්වන ලද නමුත් පරිසරය ගැන සලකා කළ යෝජනා වලට ජනතාවගේ වැඩිම අවධානය යොමු වී ඇති බව පෙනේ.

තවමත් අත නොතබන ලද තෙල් සහ ගෑස් නිධි නෝර්වේ රාජ්‍යයට තිබේ. කලින් බලයේ සිටි පක්ෂය පවා තෙල් නිෂ්පාදනය ක‍්‍රමයෙන් සීමා කරන තීරණයක සිටියේය. එරට ඇති තෙල් සම්පත ගැන සලකන විට තවත් පරම්පරා ගණනකට ආදායම් ඉපැයිය හැකි බව පැහැදිලිය. තෙල් සහ ගෑස් පරිභෝජනය පවා සීමා කරන නෝර්වේ රාජ්‍යයෙහි ජල විදුලිය උත්පාදනයක් ද තිබේ. මෑත කාලීන වාර්තා දක්වන පරිදි තෙල් පරිහරණය අවම කරන තීරණ ගෙන ඇති රටකි. විදුලියෙන් ධාවනය වන වාහන භාවිතයට වේගයෙන් නැඹුරු වී ඇති අතර විදුලිය වාහන මිල දී ගැනීමේ දී සහන සැපයේ. එය ඉන්ධන පරිහරණය අධෛර්යය කරන තීරණයකි. අතර දැනට විකිණෙන වාහන වලින් සියයට හැත්තෑවක් විදුලිය වාහන  බව දැක්වෙයි.

ඛනිජ සම්පත් වලින් පොහොසත්ය. ලබාගත හැකි වාසි පැත්තකින් තබා පරිසරය වෙනුවෙන් කැපවීම මිල කළ නොහැකි පරිත්‍යාගයකි. ලෝක ව්‍යාප්තව ටෙන්ඩර් කැදවා තෙල් හා ගෑස් නිධි ඉක්මනින් බදු දීමෙන් පමණක් නෝර්වේ රටට උපයාගත හැකි ධනය අති විශාලය. පරම්පරා ගණනක් පොහොසත් කළ හැකිය. එවැනි තීරණ කෙරෙහි නොඇලෙන එරට පාලකයෝ මැතිවරණ වේදිකාවේ දී පවා පරිසරය ආරක්ෂා කරන වගකීම ගැන අවධානය යොමු කර ඇත.

තෙල් හා ගෑස් ගවේශන කටයුතු කෙරෙහි නැවත වරක් අලූතින් කල්පනා කරන ශ‍්‍රී ලංකාව නෝර්වේ රාජ්‍යයෙහි තීරණ ගැන කල්පනා කිරීම සුදුසුය. ජාත්‍යන්තරයෙහි මතුවන ප‍්‍රවණතා ගැන සැලකිල්ල යොමු කළ යුතුය. නෝර්වේ රාජ්‍ය්‍ය පමණක් නොව යුරෝපා, ඇමරිකා හා මැදපෙරදිග රටවල් ගණනාවක් පොසිල ඉන්ධන අවම කරන ප‍්‍රතිපත්ති අනුව කටයුතු කරති. පරිසර ආරක්ෂාව ගැන සැලකිල්ල ඉදිරියෙන් තබා තිරණ ගනිමින් සිටිති. තවත් දශක දෙක තුනකින් ඛනිජ තෙල් හා ගෑස් වෙළද පොල වෙනස් විය හැකි අතර ඉල්ලූම පහත වැටෙන අවදානමක් ද ඇත. රටට වාසිදායක සේ මතු පිටින් පෙනෙන තීරණයක අභ්‍යන්තරය අවාසි සහගතය. සැලකිය යුතු අවදානමක් ද තිබේ.

බාමියන් බුදුපිළිම රැකීමට තලේබාන්ලා ගෙන් පොරොන්දුවක් අවශ්‍යයි

ප්‍රතිචාරයක් ලබාදෙන්න

2021/09/15 – ලංකාදීප

වසර විස්සකට කලින් ඇෆ්ගනිස්ථානය ගැන ලාංකේය බොදුනු ජන කොටස්වලට මහත් උනන්දුවක් තිබුණි. තලෙයිබාන්වරු බාමියන් බුදු පිලිම විනාශ කරන ප‍්‍රහාරයක් එල්ල කළ අතර ලෝකවාසී බෞද්ධ ජනතාව පමණක් නොව සමස්ථ මනුෂ්‍ය සංහතියම විස්මයට පත් වූහ. බාමියන් බුදුපිලිම වලට හයවැනි සියවස දක්වා ඉතිහාසයක් තිබේ. එකක් මීටර් 38 ක් සහ අනෙක මීටර් 55 උස මෙම ශෛලමය ප‍්‍රතිමා ගාන්ධාර ලක්ෂණ සහිතය. තලෙයිබාන්වරු එයට එල්ලකරන ලද බර අවි ප‍්‍රහාර වලින් ලෝක උරුමයක් සේ සලකන මෙම ප‍්‍රතිමා සහමුලින්ම විනාශයට පත් වූ බව මතක් කළ යුතුය..

ශ‍්‍රී ලංකාව ඇතුළු රටවල් ගණනාවක් මෙම පිලිම නැවත ප‍්‍රතිශ්ඨාපනය කරන සේ යෝජනා කළහ. නමුත් ප‍්‍රතිඵලයක් අත් වූයේ නැත. සහෝදර ජනතාව කුසගින්නේ සිටිය දී ලෝක ප‍්‍රජාව බාමියන් පිලිමවල ආරක්ෂාව සදහා මුදල් වැය කිරීම ගැන තලෙයිබාන්වරු අමනාපයෙන් පසුවූ අතර ලෝක අවධානය වෙනස් කිරීම මෙම විනාශයට තුඩු දුන් හේතුව බව, එකල ඇතැම් තලෙයිබාන් නායකයෝ ප‍්‍රකාශ කරන ලද බව ජාත්‍යන්තර වාර්තා දක්වයි.

හිටපු පාලකයන් පලවා හරින ලද තලෙයිබාන්වරු ඇෆ්ගනිස්ථානයේ තාවකාලික රජයක් ස්ථාපිත කර තිබේ. වසර විස්සකට කලින් බාමියන් ලෝක උරුමය විනාශ කළ පිරිස අද වගකිවයුතු තැන්වලය. ඇෆ්ගනිස්ථානය වෙනස් කරමින් සිටී. සංවර්ධනයෝජනා ක‍්‍රම ගැන කතා කරයි. ඉස්ලාම් නීති අනුගමනය කරන බව පෙනේ. කාන්තා නියෝජනයක් රහිත තලෙයිබාන් නායකයන්ගේ කැබිනට් මණ්ඩලයක් ඉක්මනින් පත් කරනු ඇතැයි කියැවේ. පළවෙමින් පවතින තොරතුරු අනුව නුදුරු කාලයේ දී තලෙයිබාන් පාලනය ජගත් ප‍්‍රජාවගේ පිලිගැනීමට ලක්වන බව පැහැදිලිය.

තලෙයිබාන්වරු බලය අත්පත් කරගැනීම සමග ජාත්‍යන්තර දේශපාලනය ද කැළඹී තිබේ. ඇමරිකානු හමුදා ඉවත් කරගැනීමෙන් පසු හිතවාදී රටවල් නිශ්ශබ්ධ වී සිටින බව පෙනේ. පකිස්තානය, ඉන්දියාව, චීනය හා රැසියාව වැනි රටවල් අලූත් පාලකයන් සමග නිල සම්බන්ධතාන අරඹන්නට ඉඩ ඇත. එවැනි පැති ගැන අවධානය යොමු කළ යුතුය. රාජ්‍ය තාන්ත‍්‍රික සම්බන්ධතා සමග ඉදිරියේ අලූත් ව්‍යුහයක් නිර්මාණය වෙමින් තිබෙන බව පැහැදිලිය.

ශ‍්‍රී ලංකාව අනුගමනය කරන ස්ථාවරය ගැන පැහැදිලි කරගැනීම වැදගත්ය. බොදු උරුමය වෙනුවෙන් පෙනී සිටින රටක් වශයෙන් බාමියන් ප‍්‍රතිමා ගැන සදහනකට යා යුතුය. ලෝක වාසී බෞද්ධ ජනතාව වෙනුවෙන් තීරණයක් ගැනීමට සිදුවෙයි. ඇෆ්ගනිස්ථානය හා ශ‍්‍රී ලංකාව අතර සබදතා ඇති කරගන්නට සිදුවුවහොත් එයට කලින් බාමියන් බුදු පිලිම ගැන ප‍්‍රකාශයක් නිකුත් කිරීම කාලෝචිතය. නැවත ස්ථාපනය කිරීම හෝ දැනට එරට ඇති අනෙක් ඓතිහාසික වැදගත්කමක් සහිත පුරාවස්තු ආරක්ෂා කරන බවට සහතිකයක් ඉල්ලා සිටිය හැකිය. මහා සංඝරත්නයට හා බෞද්ධ සංවිධාන වලට මෙකී කාරණය ගැන ගැඹුරෙන් සලකා බැලීම සුදුසුය. බෞද්ධ ජනතාව ශක්තිමත් යෝජනාවක් රජයට ඉදිරිපත් කළහොත් එය ජගත් ප‍්‍රජාව හමුවේ තබන අවස්ථාවක් රටට තිබේ.

බාමියන් බුදු පිලිම බුදු දහමේ සංකේතයකි. එක සමාජයකට හෝ ජන කොටසකට අයත් වස්තුවක් නොවේ. බුදු පිලිම විනාශ කිරීම හිත් සසල කළ සිදුවීමකි. එක්සත් ජාතීන්ට අනුබද්ධ යුනෙස්කෝ සංවිධානය ලෝක උරුමයක් බව ප‍්‍රකාශ කරන තීරණය තුළ එම සංකල්පය ගැබ්ව ඇත. මතු පරම්පරාව වෙනුවෙන් ආරක්ෂා කරගත යුතු සංකේත වෙනුවෙන් හඩක් නගන වගකීමක් අපට තිබේ.

අද පවතින වාතාවරණයෙන් පසු ඇෆ්ගනිස්ථානයේ සිවිල් යුද්ධය අවසන් වනු ඇතැයි සැලකේ.තලෙයිබාන් නායකයන්ට රට නගා සිටුවන පියවර අනුගමනය කරන්නට බාධාවක් නොවන්නට ඉඩ තිබේ. සංවර්ධනය උදෙසා ජගත් ප‍්‍රජාව ආධාර කරන්නට කලින් ඔවුහු සිය ප‍්‍රජාතන්ත‍්‍රවාදී පිලිවෙත් අනුගමනය කරන බව ලෝකය ඉදිරියේ දැක්විය යුතුය. ත‍්‍රස්තවාදය වෙනුවට සාමය තහවුරු කර සියළු ආගම් හා සියළු ජාතීන්ට එක හා සමානව සලකන බව ඔප්පු කිරීම සදහා බාමියන් ප‍්‍රතිමා නැවත ප‍්‍රතිශ්ඨාපනය ගැලපෙන සහතිකයක් වනු ඇත.

ජනතා ආහාර ප්‍රශ්නයට මුලින් විසදුම් අවශ්‍යයයි

ප්‍රතිචාරයක් ලබාදෙන්න

2021/09/08- ලංකාදීප 

බඩ වියත රැකගැනීම ගැන ජන ව්‍යවහාරයක් තිබේ. සියළු පරිශ‍්‍රම කුස ගිනි නිවා ගන්නට බව සදහන් කළ යුතුය. බුදු රජාණන් වහන්සේ ගොවියෙකුට ධර්මය දේශනා කරන ලද අවස්ථාවක් බෞද්ධ සාහිත්‍යයෙහි දැක්වෙයි. කුස ගින්නේ සිටි ගොවියාට ආහාර ලැබෙන්නට සලස්සවා ඇත. කුස පිරුණ පසු සිත සන්සුන් වූ අතර ධර්මය අවබෝධ කරගත් බව දැක්වෙයි. අධිකව ආහාර ගෙන මහත් අපහසුවෙන් බුදුන් හමුවීමට පැමිණි සිටුවරයෙකු ගැන ද සදහන් වන අතර ක‍්‍රමයෙන් ආහාර අඩුකරන ආකාරය බුදු රජාණන් වහන්සේ එහි දී දේශනා කර තිබේ. 

කොවිඞ් තර්ජනයෙන් ජීවිත අනතුරටක පත්ව ඇති කාලයකි. සමාජයේ පහල පන්තියේ ජනතාවට ආහාර හිගය. හිගය වෙනුවට ඔවුන්ට එහි මිල දැනේ. තවත් කොටසක් අතිශය සුඛිත මුදිතව වෙසෙති. ජන සමාජය තුළ ඇති නැති පරතරය වඩාත් දරුණු ලෙස පැතිරී ඇති බව වටහා ගත යුතුය. 

කොවිඞ් පාලනය කර ගැනීමට ගෙන යන කර්තව්‍ය පැසසුම් කටයුතුය. නොයෙක් අභියෝග මැද සෞඛ්‍ය අංශ සමග එකතු වී ඇති ආරක්ෂක අංශ කැපීපෙනෙන මෙහෙවරකය. වෙළද පොල හැසිරිම තුළ සාමාන්‍ය ජනතාවට අපහසුතා මතු වී තිබේ. සියළු ආහාර ද්‍රව්‍ය මිළ ගණන් ඉහළ නැග ඇත. එදිනෙදා අවශ්‍ය වන ආහාර වල මිල විශේෂිතය. මෙම ස්වභාවය ගැන තියුණු අවධානයක් අවශ්‍යය. සහල්, පරිප්පු, සීනි, පිටි, එලවලූ හා මස් මාලූ මිල දරාගැනීම අපහසුය. වියලි කහ මිළ ගණන් වැඩිවන විට ජනතාවව එය මැදහත්ව ඉවසූහ. පිටරටින් ගෙන්වන දේ නතර කරන තීරණයට විරෝධය පළ කළේ නැත. එහෙත් රට තුළ නිපදවන, එලවලූ හා පලතුරු වල පවා මිල අසාමාන්‍ය ලෙස ඉහළ නැග ඇති බව වෙළද පොල වාර්තා දක්වයි. එය සතුටුදායක තත්ත්වයක් නොවේ. ආනයනකරුවන්ට, තොග හා සිල්ලර වෙළෙදුන්ට දෝෂාරෝපණය කර තත්ත්වය පාලනය කරගත නොහැකි බව අවධාරණය කළ යුතුය. 

ආර්ථික ප‍්‍රශ්න පැන නැගෙන හදිසි අවස්ථා තේරුම්ගත හැකිය. සුදුසු පරිදි විසදුම් නිර්මාණය කිරීම අවශ්‍යය.  එයින් වර්ධනයක් සිදුවෙයි. එකී පරිවර්තනය ගැන හුවා දක්වන්නට ආර්ථික විශේෂඥයන්ට හැක. එහෙත් පළමුවෙන් ජනතාවගේ කුසගින්න ගැන අවධානය අවශ්‍යය. ප‍්‍රතිසංස්කරණ හා ආයෝජන ගැන තීරණ ගන්නා අතරවාරයේ අත්‍යවශ්‍ය ආහාර ද්‍රව්‍ය මිල ගැන ද කල්පනා කිරීම සුදුසුය.  

මුලික ආහාර සපයා ගැනීමට ඇති පහසුව රටක සංවර්ධනයේ එක ලක්ෂණයකි. ඇමරිකාව, චීනය, බි‍්‍රතාන්‍ය, ඉන්දියාව හෝ තායිලන්තය වැනි රටවල පවා ආහාර වෙනුවෙන් ජනතාව ගෙවන මිල සාධාරණ එකකි. ඉතාම දුප්පත් දරු පවුලකට පවා එදා වේල ජීවත් විය හැකි පසුබිමක් තිබේ. බොහෝ රටවල වියලි ආහාරවල මිල ඉතාම අඩුය. සහල්, පරිප්පු, අර්තාපල් හෝ ලූනු වලට වැඩි වියදමක් නැත. නමුත් ඒවා රසවත්ව පිස අලෙවිකරන අවන්හල්වල දී ආහාර වේලකට අධික මුදලක් ගෙවන්නට සිදුවෙයි. සිංගප්පුරුව වැනි රටවල අඩු මිලට පිසූ ආහාර විකුණන තැන් තිබේ. ඒවා සාමාන්‍ය ජනතාවට පහසුවකි. ඉන්දියාවේ තමිල්නාඩු ප‍්‍රාන්තයේ මහ ඇමැතිනියව සිටි ජයලලිතා මහත්මිය අම්මා නමින් බොජුන් හලක් චෙන්නයි හි 2013 දී ආරම්භ කළේය. එහි බත් වේලක් රුපියල් පහකි. පසුව ඔඩිස්සා, කර්නාටක හා අන්ද්‍රා ප‍්‍රදේශ වෙත ව්‍යාප්ත වූ අතර දැන් නව දිල්ලියේ පවා සමහර ව්‍යවසායකයෝ එම නමින් අඩු මිලට ආහාර සපයති. 

ඇමරිකාවේ ද සමහර ප‍්‍රාන්තවල සුපිරි හෝටල්වල පරිභෝජනය නොවූ ආහාර එකතුකර දුප්පත් ජනතාවට බෙදා හරින සංවිධාන තිබේ. ජනහිතකාමී පුද්ගලයෝ ඒවා පරෙස්සමෙන් එකතුකර ආකර්ශනීය ලෙස පැකැට් කර, ගෞරවාන්විතව දුප්පත් ජනතාව ගේ අතට ලැබෙන්නට සලස්වති. ස්කැන්ඩිනේවියානු රටවල ටින් හා පැකැට් කල ආහාර පවා කල් ඉකුත්වෙන දින ආසන්නයේ දී ඉතාම අඩු මිලට වෙනම විකුණන ස්ථාන ඇත.  

සියළුම දෙනා එකම වෙළද පොලක යැපෙන්නට සලස්වා අධික ජීවන බරකින් පීඩාවට පත් කිරීම වෙනුවට අලූත් පැති වලට යොමුවීම කාලෝචිතය. එදිනෙදා ආහාර වෙනුවෙන්  දුක් විදින, එක්තරා ජන කොටසක් අද දවසේ ඉසිලිය නොහැකි පීඩාවකින් පසුවන බව සිහි තබා ගැනීම වගකිවයුතු අංශවල යුතුකමකි. 

ආර්ථික ස්ථාවරත්වයට ඉන්දීය  මුදල් ඇමති යන මග

ප්‍රතිචාරයක් ලබාදෙන්න

2021/09/01 – ලංකාදීප

කොවිඞ් වසංගතයේ මතුපිට භයානකකම ජනතාවට වැටහී තිබේ. අභ්‍යන්තරය ගැන ගැඹුරු අවබෝධයක් තිබිය යුතුය. මුහුදේ පාවෙන අයිස් ශිඛරයක පතුල අපට පෙනෙන්නේ නැත. ටයිටැනික් ගැටෙන්නේ එවැනි අයිස් කන්දකය. කිසිදා විනාශ කළ නොහැකි බව සනාථ කර තිබුණ එම නැවේ ගමන් ගත් මගීහු බලවත් විශ්වාසයකින් සිටියේය. අවසානයේ දී කිසිදා අමතක කළ නොහැකි ඛේදවාචකයක වේදනාව ජගත් ප‍්‍රජාවට ඉතිරි කළේය.

කොවිඞ් වැළෙදන රෝගීන්, එයින් අසරණ වන අහිංසක පවුල් ගැන කම්පාවන ජනී ජනයා ආර්ථිකය පවතින බිහිසුණු තැන ගැන වටහා ගැනීම වැදගත්ය. බලවත් කම්පනයක් ඇතිකරමින් නොපෙනෙන, ආර්ථික අයිස් ශිඛරයක ශී‍්‍ර ලංකාව නමැති නැව ගැටී තිබේ. ලෝකයේ නොයෙක් රටවල් එකී ඉරණමට මුහුණ පා ඇත. ආර්ථිකයකට දැනට ඇති කර තිබෙන විනාශය ගැන කලබලයට පත් ව සිටී. ගැලවීමක් තකා නොයෙක් පියවර ගනිමින් පසුවන අවස්ථාවකි. බර අඩු කර, ආර්ථිකය සැහැල්ලූ කරන තීරණ මගින් සැනසිලිදායක තීර්ථයක් කරා ගමන් කළ හැක. තීරණාත්මක මොහොතක විවිධ මතවාද, පරස්පර විරෝධී අදහස් තවත් කුණාටු ඇති කරන බව සදහන් කළ යුතුය.

කිසිම දෙයක් කරගත නොහැකි තැනකට පත් වූ ටයිටැනික් නැව පරිදි සංගීත කණ්ඩායමේ මිහිරි වාදන මැද ගිලී වැනසෙන හෝ නිර්භීත පියවරකින් පසු දුෂ්කර ගමන් මාර්ගය වෙනස් කරන හැකියාවක් තිබේ. ඉන්දිය රජය යෝජනා කර ඇති සැලසුම හොද උදාහරණයකි.

ඇමරිකානු ඩොලර් බිලියන අසූ එකක් නොඑසේනම් එරට දළ දේශීය නිෂ්පාදිතයෙන් සියයට තුනක් පමණ උපයා ගන්නා වසර හතරක සැලැස්මක් ඉන්දීයාව ප‍්‍රකාශයට පත් කර ඇත. මුදල් අමාත්‍ය නිර්මලා සීතාරාමන් මහත්මිය දක්වන පරිදි මහා මාර්ග, දුම්රිය සේවාවේ වත්කම්, ගුවන් තොටුපොල, විදුලිය බෙදාහැරීමේ අංශ සහ ගැස් නල පද්ධති ඇතුළු රජය සතු දේපොල වලින් සෑහෙන කොටසක් පුද්ගලික අංශයේ ආයෝජනය සදහා වෙන් කරනු ඇත. කිසිසේත් ඉන්දියාවේ ජාතික සම්පත් හෝ වත්කම් විකිණීමක් වශයෙන් හදුන්වන්නට එතුමිය කැමැති නැත. ඉදිරියේ දී  ඉන්දියානු රජයට අයත් වත්කම් පුද්ගලික අංශයට පවරන සැලැස්ම සවිස්තරාත්මකව ප‍්‍රකාශයට පත් කරන්නට යෝජිතය.  භාරත් පෙට්‍රෝල්, එයාර් ඉන්දියා සහ ලයිෆ් ඉන්ෂුවරන්ස් වැනි ඉන්දීය රජයේ සමාගම් වල කොටස් ද පැවැරීමට යෝජනා වී තිබේ. අවදානම් සහගත ආර්ථික පරිසරය තුළ ගත යුතු ක‍්‍රියාමාර්ග ගැන දීර්ඝ සංවාදයක් මධ්‍යම රජයේ ඇමැතිවරු එකොලොස් දෙනෙකු සමග වෙනම ම පවත්වා ඇති මුදල් අමාත්‍යවරිය රට තුළ පැන නැගිය හැකි බාධක ගැන ද අවධානය යොමු කර ඇත. සවිස්තරාත්මක සැලසුම සමග කරුණු ඉදිරිපත් කරන අතර මෙම යෝජනාව මගින් පවතින අඩු වර්ධනය වේගවත් කිරීමට පුද්ගලික අංශයේ සහාය ලබා ගැනීම ඉතා වැදගත් බව පෙන්වා දී තිබේ.

වසර විසිපහක් සදහා කාලයකට ආයෝජන අවස්ථා පැවැරෙන බව සදහන්ය. අගමැති නරේන්ද්‍ර මෝදි මහතාගේ උපායශීලි ආයෝජන අවස්ථා පුලූල් කිරීමේ ප‍්‍රතිපත්තියෙහි එක කොටසක් වනු ඇති අතර ජාතික වැදගත්කමක් සහිත තෝරාගත් ව්‍යවසාය සීමිත කොටසක් පමණක් රජය භාරයේ ඉතිරි කරගනු ඇතැයි දැක්වෙයි. ඉන්දීය ආණ්ඩුවේ බදු ආදායම විශාල වශයෙන් පහත වැටී තිබේ. කොවිඞ් වසංගතය සියළු අංශ අඩපණ කර තිබේ. සහන සදහා සෑහෙන ධනයක් වැය කරන්නට සිදුවී ඇත. අය වැය පරතරය ඉහළ ගොස් ඇති අතර හිගය පියැවීමට අනුගමනය කරන  ක‍්‍රියාමාර්ග ජනතාව පීඩාවට පත්වීම වැලැක්වීම ඉන්දීය රජයේ අරමුණකි.

පොදු ජනතාව ගේ ජීවිත ආරක්ෂා කරගත යුතුය. වසංගතයට මුහුණ දෙන අතරවාරයේ ආර්ථිකය ද අලූතින් ගොඩනගන ක‍්‍රම ගැන සාකච්ඡා කිරීම අවශ්‍යය. තව තවත් ණය බර ඉසිලිය නොහැකිය. දුෂ්කරතා මැද පවත්වාගෙන යන කාලවකවානුවක ලිහිල් බව ඇති කරගන්නා ආකාරය පැවැත්ම තහවුරු කරනු ඇත. ජනතා අපේක්ෂා සාක්ෂාත් කරන අතර දැනට වේගයෙන් වැඩිවෙන ආර්ථික පීඩනය අවම කරන කාලෝචිත ක‍්‍රියාමාර්ග ශ‍්‍රී ලංකාවට ද අනුගමනය කරන්නට සිදුවනු ඇත.  

Older Entries