ණයත් පඩිත් ගෙව්වම තවත් ණය වෙන රටක්

ප්‍රතිචාරයක් ලබාදෙන්න

2022/01/12 – ලංකාදීප

ණයත් පඩිත් ගෙව්වම තවත් ණය වෙන රටක්

ප‍්‍රජාතන්ත‍්‍රවාදය පොදු ජනතාව සමග එළැඹෙන ගිවිසුමකි. හොදම ප‍්‍රතිලාභ ජනී ජනයාට ලැබෙන ක‍්‍රමයක් සකස් කළ යුතුය. මහජනතාව පත්කරන පාර්ලිමේන්තු නියෝජිතයන්ට පැවරෙන කාර්යයකි. ආණ්ඩුව සතු වගකීම පුලූල්ය. විපක්ෂ දේශපාලනඥයන් ද කාර්යභාරයක් තිබේ. පටු විවේචනය වෙනුවට විවිධ පැති අධ්‍යයනය කර ක‍්‍රමය නිවැරදි කිරීම සදහා පෙළැඹවීමක් අවශ්‍යය.

පාර්ලිමේන්තුවේ දී කරන සංවාදයකින්, ආර්ථික හා සමාජ පැවැත්මේ දී මෙතෙක් අනුගමනය කර ඇති ක‍්‍රමය තුළ ඇති වැරදි හදා ගත යුතුය. විශාල ප‍්‍රපාතයකට ගමන් කරන විට දෙපැත්තට වී එකිනෙකාට චෝදනා කරගැනීමෙන් ලැබෙන වාසියක් නැත. නිදහසට පසු ගෙවී ගිය දශක හතකට වැඩි කාලය තුළ වගකීම ඉටුකොට ඇතිබවක් නොපෙනේ. ආර්ථිකය මුහුණ පා ඇති අභාග්‍ය සම්පන්න ඉරණම එයට සාක්ෂියකි. එක කොටසක ගේ හෝ එක පුද්ගලයෙකු ගේ වරදක් නොවේ. අප  සියළු දෙනාම පවතින ඉරණමෙහි කොටස්කරුවෝ වෙති. ප‍්‍රතිපත්ති අනුගමනය නොකරන්නටත්, පටු වාසි තකා නිසි පිලිවෙලට ඉඩ නොදෙන්නටත් යුහුසුළු වූ අපට ආර්ථික මුලධර්ම මගින් අමතක නොවන පාඩමක් උගන්වා තිබේ.

අලූත් වාර්තා පෙන්වන පරිදි, ජාතික ආදායම ණය පොලිය හා රජයේ වැටුප් වියදමට ප‍්‍රමාණවත් නැත. ණය පොලිය සදහා ආදායමෙන් සියයට හැත්තෑවක් වියදම් කරන්නට සිදුවී ඇත. රජයේ සේවක වැටුප් හා විශ‍්‍රාම වැටුප් වෙනුවෙන් වෙන් කරන්නට සිදුවී ඇති කොටස සියයට අනූවකි. මෙම කොටස් දෙක පමණක් ජාතික ආදායමෙන් සියයට එකසිය හැටක් වන බරපතල ප‍්‍රතිශතයක් බව පෙනේ. රුපියල් සියයක් උපයන පුද්ගලයෙකු කලින් ගත් ණය හා වැටුප් වියදම් වශයෙන් රුපියල් එකසිය හැටක් ගෙවන්නේ කෙසේද?

මැලේසියාව දියුණු කළ මහතීර් මොහමඞ් මහතා සමකාලීන දේශපාලනඥයන්ට වටිනා උපදෙස් දී තිබේ. රටක් පාලනය කරන්නට බලය ඉල්ලන අය අඩුම තරමින් සුළු ව්‍යාපාරයක හෝ අත්දැකීමක් තිබිය යුතු බව ඔහු කියා සිටියේය. ඉතිහාසයේ සිට අපට වෘත්තීය දේශපාලනඥයෝ සිටියහ. මහතීර් කියන සුදුසුකම තිබුණේ නැත. බලය අල්ලා ගන්නට අති සමර්ථය. විපක්ෂය ද ආණ්ඩු අපහසුවට පත් කරන්නට දක්ෂ කණ්ඩායමකි. ආණ්ඩුවත් විපක්ෂයක් එකතු වී දැවැන්ත ආගාධයක් අභිමුවට රට කැදවා ඇත. දේශපාලන අනුග‍්‍රහය ඇති මිත්‍යා මතවලින් හිස් පුරවා ගත් වෘත්තීය සමිති ද මෙම විනාශයෙහි එක පාර්ශවයකි. නිසි අවස්ථාවේ දී රටට අවශ්‍ය මග පෙන්වීම මගහැර සිටි ප‍්‍රායෝගික අදහස් තිබිය යුතු බුද්ධිමත් කොටස් ද අද ප වතින කණගාටුදායක තැන දක්වා ගමන් කරන්නට අත්වැල අල්ලා ඇත.

මෙම අවස්ථාවේ දී තීරණ දෙකක් ගත හැකිය. ආදායම වැඩි කරගැනීම සදහා අලූත් වටයකින් බදු නංවන්නට සිදුවේ. එය දුගී දුප්පත් ජනතාව තවත් දුෂ්කර තැනකට පත් කිරීමකි. අනෙක රජයට බදු ආදායම උපයා ගත හැකි වන පරිදි ආර්ථිකය පුලූල් කිරීමය. අලූත් කර්මාන්ත හා ව්‍යාපාර ඇති කරන පසුබිමක් ගොඩනැගීමය. ව්‍යවසායකත්වය සදහා රට තුළ ඇති අපහසුතාව රජයේ නිලධාරීන් සහ දේශපාලනඥයෝ දන්නේ නැත. යමක් අලූතින් කරන්නට වෑයම් දරන පිරිස් අධෛර්ය කරන වටපිටාවක් රට තුළ තිබේ. තීරණ ගැනීමේ අලසභාවය හා යල්පැන ගිය නීති ව්‍යවසායකත්වයට කිසිම ආකාරයකින් සහායක් දෙන්නේ නැත. අතිශය පීඩාවක සිටින තරුණ පිරිස ක‍්‍රමය ගැන කලකිරීමට පත්ව සිටිති. දක්ෂ පිරිස කෙසේ හෝ වෙනත් රටකට පැනගොස් ජීවත්වීමේ අධිශ්ඨානයකය. ඉගෙනගත් තරුණ තරුණියන් අනාගතය උදෙසා නගන හඩ ඉදිරියේ මෙරට දේශපාලනඥයන්ට ඇති උත්තරය කුමක්ද? ඝෝෂාවෙන් හා විරෝධතාවලින් රටට සිදුවී ඇති යහපතක් නැත.

කොවිඞ් වසංගත තත්ත්වයෙන් පසු නැවතත් නැගී සිටින්නට අවශ්‍යය. විශාල ප‍්‍රතිසංස්කරණ කරන්නට සිදුවේ. ආර්ථික හා සමාජ වෙනස්කම් කළ යුතුය. ආකල්ප වෙනස් කිරීමට පියවර ගත යුතුව තිබේ. අධ්‍යාපන ක‍්‍රමය, සෞඛ්‍ය, ප‍්‍රවාහනය, මුල්‍ය පද්ධතිය ඇතුළු අංශවල පවතින ක‍්‍රම සමාජ ප‍්‍රගතිය ඇති කරන්නේ නැත. අවශ්‍ය වෙනස්කම් සදහා ආයෝජනයට ධනය නැති ආණ්ඩු හුදෙක් එදිනෙදා පැවැත්ම ගැන පමණක් අවධානය යොමු කරන තැනට පත්ව සිටී. ව්‍යුහය වෙනස් නොකළහොත් අනාගතයේ බලයට පත්වන ආණ්ඩුවකට පවා අලූත් යමක් කරන්නට නොහැක. ආණ්ඩුව පමණක් නොව විපක්ෂය ද එකතු වී ආර්ථිකය තුළ ඇති අර්බුදය නිරාකරණය කරන පරිවර්තනය කරන අලූත් සැලැස්මක් සදහා වහාම පියවරගත යුතුව තිබේ.

සහන හොදයි ! සල්ලි කොහෙන්ද? ප්‍රතිවිපාකත් බරපතළ වේවි ! 

ප්‍රතිචාරයක් ලබාදෙන්න

2022/01/05 – ලංකාදීප

ආර්ථික ප‍්‍රශ්න වලින් මිරිකී සිටින රටට සහන පැකේජයක් ආණ්ඩුව ප‍්‍රකාශයට පත් කර තිබේ. රජයේ සේවකයන්, විශ‍්‍රාමිකයන්, සමෘද්ධිලාභීන් සහ යුද්ධයේ දී ජීවිත පරිත්‍යාගයෙන් කැපකිරීම් කළ ආරක්ෂක අංශ එයින් ආවරණය කෙරේ. වතුකරයේ ජනතාවට ද තිරිගු පිටි සදහා වෙනම සහනයක් සපයා ඇත. අත්‍යවශ්‍ය භාණ්ඩ හා ඖෂධ සදහා අය කරන බදු සම්පූර්ණයෙන් ඉවත්කොට තිබේ. ජීවන වියදම ප‍්‍රශ්නයක් වී ඇති අවස්ථාවක සහ කොවිඞ් අවදානම මැද ආදායම පිරිහී ඇති ජනකොටසකට අවශ්‍යම කරන උපකාර සැලසීම අගය කළ යුතුය.

සහන ලැබුණ පිරිස මහත් උද්දාමයකට පත්ව ඇති බව සැකයක් නැත. බඩුමිල හා ඉන්ධන මිල ගණන් ඉහළ යෑම ගැන තිබුණ කනස්සල්ල තාවකාලිකව යටපත් විය හැකිය. සහනය සමග මතුවන අනෙක් පැත්තක් ද තිබේ. මෙම සහන දෙන්නේ කෙසේද? ජාතික ආදායම දුර්වල වී ඇති අවස්ථාවක ප‍්‍රකාශයට පත් කරන සහන සදහා වහාම මුදල් උපයා ගැනීමට භාණ්ඩාගාරයට සිදුවේ.

ආදායම ඉක්මනින් නංවා ගැනීමේ දී බදු වැඩි කිරීම හැර අනෙක් ප‍්‍රතිකර්මයක් නැත. සෘජු හා වක‍්‍ර බදු සශෝධනය කරන්නට සිදුවෙයි. මෙම බදු ගෙවන්නට සිදුවෙන්නේ ද දුක්විදින පොදු ජනතාවය. බදු ප‍්‍රතිශත නැවත වටයකින් නංවන අවදානමක් ඇති පසුබිම තුළ එදිනෙදා ජීවිතයේ බර ඉසිලිය නොහැකි ආකාරයකට තවත් වැඩි කරන අවකාශයක් නිර්මාණය වනු ඇති බව සදහන් කළ යුතුව තිබේ. සහන වලට වැය කරන ධනයෙන් උද්ධමනයක් ඇතිවෙයි. එයට මුහුණ දෙන පරිදි හැදෙන ආර්ථිකය මැද පන්තිය හා දුගී දුප්පත් ජනකොටස තවත් අර්බුදයකට තල්ලූකරන අවදානමක් ඇත. ඉදිරි මාස කිහිපය තුළ එහි ප‍්‍රතිවිපාක දැනෙන්නට බැරි නැත. ප‍්‍රපාතයකින් තවත් පහලට වැටෙන්නට පෙර එයින් ගැලවෙන මගක් සොයාගැනීම අවශ්‍යය. ජනප‍්‍රිය තීන්දුවලින් ක්ෂණික වාසි ලැබිය හැකිය. ආර්ථික වර්ධනය අරමුණු කරගෙන තද තීරණ නොගතහොත් ඇතිවිය හැකි දරුණු ප‍්‍රතිවිපාක ද අපේක්ෂා කළ යුතුය.

රජයේ ආර්ථික වැඩපිලිවෙල අසීරු තැනක බව මෙහි දී අමතක කළ යුතු නැත. අභ්‍යන්තර හා බාහිර වශයෙන් බරපතල පීඩන දෙකකට මැදි වී සිටී. රජයේ ආදායම පිරිහී ඇත. 2022 වසර සදහා ඉදිරිපත් කළ අය වැය එයට සාක්ෂියකි. සංවර්ධන වැඩකටයුතු සීමා කරන ලද අතර රජයේ ගොඩනැගිලි ඉදිකිරීම් පවා අත්හිටුවීය. රජයේ රැකියා සැපයීම සීමා කර තිබේ. විදේශ විනිමය හිගය බාහිර වශයෙන් එල්ල වූ පීඩනයකි. විදේශ සංචිත ගැන අවධානය යොමු කරන්නට සිදුවී තිබේ. අත්‍යවශ්‍ය ද්‍රව්‍ය මිල දී ගැනීමේ දී පවා විනිමය හිග බව වාර්තා වෙයි. රාජ්‍ය ආදායම අඩු, විදේශ විනිමය සංචිත සීමා වී ඇති අවස්ථාවක ප‍්‍රකාශයට පත්කර ඇති සහන 2022 වසරේ සමස්ථ ආර්ථික ක‍්‍රියාකාරකම් කෙරෙහි තියුණු බලපෑමක් එල්ල කරනු ඇත.

පවතින විෂම රාමුවෙන් ගැලවෙන්නට අලූත් පියවර අවශ්‍යය. බදු වැඩි නොකර රාජ්‍ය ආදායම නංවාගත යුතුව තිබේ. රටට විශාල අවස්ථා නැත. විදේශ විනිමය සංචිත තරකර ගත යුතුය. මෙකී වෙනස්කම් සදහා අනුබලයක් ලෝකයේ වෙනත් රටකින් ලැබෙන්නේ නැත. සෑම රටක්ම කොවිඞ් වසංගතයේ ග‍්‍රහණයට හසු වී තිබේ. මහන්සියෙන් වැඩ කරන්නට සිදුවේ. නිෂ්පාදනය නැංවිය යුතුය. මානව සම්පත නිසි සේ උපයෝගී කරගැනීමට සිදුවේ. ඉඩම්, සාගර සම්පත්, බලශක්තිය වැනි පැති කෙරෙහි විශේෂ අවධානයක් යොමු කරන්නට අවශ්‍යය. නිෂ්පාදනය වැඩි කරන අතර ඒවා ලෝක වෙළෙද පොලට අපනයනය කළ හැකි ක‍්‍රම ගැන යුහුසුළුවීම වැදගත්ය.

සහන ලබාදෙන අතර සහන සදහා අවශ්‍ය ධනය උත්පාදනය කරගැනීම ආණ්ඩුවේ වගකීමකි. ආදායම උත්පාදනය නොකළහොත් ණය බර තවත් උත්සන්න විය හැකිය. ඉදිරියේ දී තවත් ප‍්‍රශ්න ඇති කරනු ඇත. ණය ගෙවා ගැනීම පවා පහසු නැති අවධියක සිටින අප එවැනි පැති ගැන වඩාත් සැලකිලිමත් විය යුතුය. ආර්ථියක එක පැත්තකට දෙන විදුම අනෙක් පැත්තකින් අනපේක්ෂිත ප‍්‍රතිඵල අත්පත්කරන අතර එහි ප‍්‍රතිවිපාක ඉතාම අහිතකර විය  හැකිය. අසීරු අවස්ථාවක ආර්ථිකයක් පාලනය කිරීම පහසු නැත. වියදම අඩු කරගත යුතු අතර වහාම කළ හැකි ප‍්‍රතිසංස්කරණ වලට යා යුතුය. එවැනි ක‍්‍රියාමාර්ගයකින් බැහැරව ගන්නා තීරණ වල අවදානමක් තිබේ.

අදුරේ දිගටම සිටිමුද? ආලෝකය සොයා වේගයෙන් යමුද?

ප්‍රතිචාරයක් ලබාදෙන්න

2021/12/29 – ලංකාදීප

ඉන්ධන මිල වැඩි කිරීම ගැන විශාල විවේචනයක් තිබේ. ලෝක වෙළද පොලේ බොරතෙල් මිල හා රට තුළ තෙල් අලෙවියේ දී ලබන අලාභ සලකා බලන විට ආණ්ඩුවට වෙනත් විකල්පයක් නැත. වාර්තා දක්වන පරිදි මෙරටට ගෙන්වන ඉන්ධන වලින් සියයට හැටක් විදුලිය බලය උත්පාදනයටය. දැවිතෙල් සහ ගල් අගුරු වලින් විදුලිය නිපදවීම අත්හරිමින් පවතින කාලයකි. පැරණි ගල් අගුරු යුගය ආරක්ෂා කරගැනීම සදහා අපි සියළුම දෙනා මහත් වෑයමකින් සටන් කරමින් සිටින බව පෙනේ.

මෑත කාලය තුළ තුන් වතාවක් මුළු රටේ ම විදුලිය විසන්ධි විය. කරුණු සොයාබලන්නට කමිටු පත් කළේය. ඒවායේ වාර්තා වගකිව යුතු අංශවලට බාර දී ඇත. විදුලිය නැති අවස්ථාවක පැය ගණන් අදුරේ සිටින්නට ඇතැම් පලාත්වල ජනී ජනයාට සිදුවී තිබේ. පැයක් දෙකක් අන්ධකාරයේ ගත කිරීම කොපමණ අපහසු ද යන්න පැහැදිලි කළ යුතු නැත. විදුලිය බලය නොලැබීම ඉගෙනුමට ද බාධාවකි. දැන් දරුවෝ ඉගෙන ගන්නේ තාක්ෂණයෙන්ය. විදුලිය නැති අවස්ථාවක අන්තර් ජාලය ද අවහිරවෙයි. මෙහි දී මතක් කර දිය යුතු එක කරුණක් තිබේ. දැනට පවතින විසන්ධිවීම සුළු ප‍්‍රශ්නයකි. රටට අවශ්‍ය විදුලිය ප‍්‍රමාණවත් පරිදි උත්පාදනයට නිසි කි‍්‍රයාමාර්ග අනුගමනය නොකළහොත් ඉදිරි වසර කිහිපය තුළ අන්ධකාරය සාමාන්‍ය දෙයක් විය හැකිය. ඇතිවන ගැටළු ඉතාම සංකීර්ණය.

ජල විදුලිය උත්පාදන හැකියාවේ උපරිම තලයට අප ළගා වී සිටී. රටට අවශ්‍ය විදුලියෙන් සියයට විස්සක් හෝ ජල විදුලි බලාගාරවලින් නිපදවන්නේ නැත. පරිසරය ආරක්ෂා කරන, අඩුම වියදමකින් නිපදවෙන ජල විදුලිය හැරුණු කොට අනෙක් ප‍්‍රභව ගැන සොයන්නට අපට වගකීමක් ඇත. සුළං විදුලිය උත්පාදනය කළ හැකිය. රජය හෝ පුද්ගලික අංශය කටයුතු කළහොත් මෙගාවොට් 5000 ක් පමණ උත්පාදන අවස්ථා ඇති තැන් සොයාගෙන තිබේ. ඒවා වාසිදායකය. දැවි තෙල් හෝ ගල් අගුරු වලින් නිපදවන විදුලිය ඒකකයක මිල ඉහළ යමින් තිබේ. තාක්ෂණය වේගයෙන් වෙනස් වන අතර එයට අනුගත නොවුනහොත් උත්පාදනයේ අකාර්යක්ෂමතාවක් ඇතිවෙයි. විදුලිය බල මණ්ඩලය කරුණු වාර්තා කර ඇති පරිදි වසර 2040 වන විට රටට අවශ්‍ය කර විදුලිය ප‍්‍රමාණයක් තිබේ. එම විදුලිය අවශ්‍යතාව අපට නොවේ. අපගේ දරුවන්ටය. මතු පරම්පරාවටය.

රටක් දියුණුවන විට විදුලිය පරිභෝජනය වැඩිවෙයි. අපගේ අනාගතය සදහා අවශ්‍ය තරමට විදුලිය නිපදවන්න තීරණ ගැනීමට අද අපොහොසත් වුවහොත් එහි විපාක දරුණු විය දැකිය. ශ‍්‍රී ලංකාවේ ආර්ථිකය නරක තැනකය. විනිමය සංචිත හිදී ඇත. ණය ලබා ගැනීමේ අවස්ථා ද, සීමාවෙමින් තිබේ. අලූත් විදුලිය බලාගාරයක් දෙකක් හදාගන්නට කිසිම හැකියාවක් නැත. මෙවැනි තීරණාත්මක අවස්ථාවක හොදම දේ වෙනුවට, ප‍්‍රායෝගිකව කළ හැකි දේ ක‍්‍රියාත්මක කිරීම අප සියළු දෙනාගේ වගකීමකි.

මෑත කාලය තුළ විදුලිය අංශයේ ආයෝජනය සදහා ඉදිරිපත් වූ ඇමරිකාව, චීනය හා ඉන්දියාව යන රටවල ව්‍යාපෘති ගැන මෙරට දේශාපලනඥයන්ට හා වෘත්තීය සමිතිවලට අප‍්‍රමාණ ප‍්‍රශ්න ඇත. ඒවා කලින් ද නොතිබුණා නොවේ. මහවැලිය කඩිනම් කරන විට නැගුණ විවේචන අමතක කළ යුතු නැත. නොරොච්චෝල බලාගාරය සම්බන්ධයෙන් විරෝධතා ඇතිවිය. එය රට පුරා තැනින් තැනට ගෙන ගියේය. ඉහළ කොත්මලේ බලාගාරය ගැන තිබුණ සටන මතකද? බොහෝ ප‍්‍රමාදව, විශාල අලාභ ද සහිතව මෙම යෝජනා අවසානයේ දී ක‍්‍රියාත්මක කර ඇත. ඒවායේ අවාසි අදටත් අපට දැකගත හැකිය.

ආණ්ඩුවෙන් හෝ පුද්ගලික අංශයෙන් හෝ වෙනත් රටකින් වේවා විදුලිය නිපදවන යෝජනා ක‍්‍රම වහාම ආරම්භ කළ යුතුය. රටට ගැලපෙන විද්‍යාත්මක නියාමන ක‍්‍රමයක් හැර අනෙක් කිසිම දේශපාලන ප‍්‍රලාපයක් වැදගත් නැත. විදුලිය හිග වුවහොත් අවුල් වන ජන ජීවිතය, කර්මාන්ත හා ව්‍යාපාර වලට සිදුවන අවහිරතා ගැන කල්පනා කරන්නට අද අත්විදින සුළු බිද වැටීමක් හොදටම ප‍්‍රමාණවත්ය. සුළු පිරිසක් මහත් ඝෝෂාවක් ඇති කරමින් සිටී. විදුලිය පරිභෝජනය කරන අප සියළු දෙනා මධ්‍යස්ථව ප‍්‍රශ්න දෙස බලන්නට අවශ්‍යය. ගින්දර නරක නමුත් එය අවශ්‍යය. පිහිය තියුණුය. ගින්දර ද මුවහත ද ප‍්‍රයෝජනවත්ව හසුරුවන තරම ගැන අපට අවබෝධයක් තිබේ. විදුලිය අංශයේ ආයෝජන ගැන ද නිසි පිලිවෙල, නියාමනය හැර එයට බියවීම සමාජයක් වශයෙන් සුදුසු නැති බව සදහන් කළ යුතුය.

රක්ෂණය හා දුරකතන සේවාව ගැන ද මෙවැනි විරෝධතා තිබුණි. දුරකථන සම්බන්ධතාවයක් ලබාගැනීමට දේශපාලන මැදිහත්වීමක් අවශ්‍යව තිබුණ කාලය ගැන අද අපට මතක නැත. දුරකථන සැපයුම, ප‍්‍රතිසංස්කරණයක් නොවී, රජයට පමණක් අයිති ව්‍යවසායක්ව තිබුණි නම් අද අප මුහුණ දෙන ඉරණම කුමක්ද? රක්ෂණයේ තරගකාරීත්වයක් නොතිබුණ කාලයේ වාහන අනතුරක දී පත් වූ අපහසුතා කිසිසේත් අමතක කළ යුතු නැත. විදුලිය බලය සම්බන්ධයෙන් ද රටට අවශ්‍ය එවැනි ලිහිල් ව්‍යුහයකි. එය කරගත හැකිවුවහොත්, එහි වාසිය පාරිභෝගික පොදු ජනතාවටය. දේශපාලනඥයන්ට නොවේ.

ගැලවුම්කාරයෝ අපිම වෙමු කිසිවෙක් එය බාර නොගනිති

ප්‍රතිචාරයක් ලබාදෙන්න

2021/12/22 – ලංකාදීප

උදුවප් මාසයේ සීතල දැනෙන-නොදැනෙන කාලවකවානුවකි. රට තුළ අසාමාන්‍ය උණුසුමක් පවතී. ස්වභාවික පරිසරයේ සීතල පරාජය කරන තරමට ජන සමාජය රත් වී ඇත. අවුරුද්දක් අවසානයේ සිතට ඇතිවන පහන් සිතිවිලි බොහෝ දෙනෙකුට නැත. ආපසු හැරී බලනවිට පසුකරන ලද දුෂ්කර, භයානක අවධිය මතකයට නැගේ.

අලූත් යුගයක් සමග අලූත් බලාපොරොත්තු ජන සමාජයට තිබුණි. සාක්ෂාත් කරගත හැකි වූ තරම ඉතාම සීමිතය. එක දෙයක් සදහන් කළ යුතුව තිබේ. ආර්ථික හා සමාජ වශයෙන් බලවත් අර්බුදකාරී වාතාවරණයක් මැද පවා කොවිඞ් එන්නත්කරණ වැඩ සටහන සාර්ථකව ක‍්‍රියාවට නංවා ඇත. සමහර රටවල් සමග සසදනවිට ශ‍්‍රී ලංකාව සාර්ථකය. ඉදිරියෙන් සිටී. තුන්වැනි මාත‍්‍රාවක් නිකුත් කරන තරමට සංවිධානාත්මකය. ජන ජීවිත ආරක්ෂා කරගන්නට උපරිම වශයෙන් කටයුතු කර ඇති බව පිලිගත යුතුය.

ජීවනෝපාය සම්බන්ධ ප‍්‍රශ්න පැන නැගී ඇත. ජීවන වියදම දරාගත නොහැකි මට්ටමකය. ආදායම සීමිතය. වැඩ කරන ජනතාවගේ අතට ලැබෙන ආදායම සීමා වී තිබේ. දරුවන්ගේ අධ්‍යාපන කටයුතු සම්බන්ධයෙන් මිශ‍්‍ර අදහසකි. අන්තර් ජාලයෙන් ඉගෙනුම ලබන තරමට දියුණු වූ නමුත් එය සම්පූර්ණ අවස්ථාවක් වූයේ නැත. පවතින ව්‍යුහය ගැන සාකච්ඡුා කර නැවතත් නැගී සිටින ප‍්‍රයත්නයක් අපට අවශ්‍යය.

නත්තල සමග ජෝෂප් හා මරියා යන දෙපොල සිහිපත් කෙරේ. ඔවුහු බෙත්ලෙහෙමට කැදවන්නේ සංගණනයක් සදහා බව ඉතිහාසය දක්වයි. නවාතැන් සම්පූර්ණයෙන් පිරී ඉතිරී යන අතර අවසානයේ දී මෙම දෙපොල නතරවෙන්නේ ගව මඩුවකය. ගැලවුම්කාරයාණෝ උපත ලබන්නේ නත්තල් දිනයේ දී දිළිදු ගවලෙනකය. ජේසුස් වහන්සේ ගේ උපත සදහා දෙවියන් වහන්සේ තොරාගත්තේ බෙත්ලෙහෙම බව කිතුනුවෝ විශ්වාස කරති. එහෙත් එකල පාලකයෝ සියළු වැසියන් කැදවන්නේ සංගණනයකටය. සංගණනයට හේතුව නිසි පරිදි බදු අය කරගැනීමය.

යේසුස් වහන්සේ දුප්පත් ජනී ජනයා වෙනුවෙන් පෙනී සිටියහ. සත්‍ය පෙන්වා දුන්හ.  එම දර්ශනය ප‍්‍රතික්ෂේප කරන ලද පිරිස් ඔහු කුරුසයේ තබා ඇන ගැසූහ. එහෙත් ශාස්තෘන්ගේ දර්ශනය විනාශ නොවේ. කිතුණු පමණක් නොව, සියළුම ආගම් වලින් මනුෂ්‍යයන්ට යතාර්ථය පෙන්වා දෙන්නට උත්සාහ කර ඇත. ආගම තුළින් සමාජ විනය, එකගතාවය හා යුක්තිය අපේක්ෂා කෙරේ.

අද වාතාවරණය අනුව ජනතාව ඉතා තීරණාත්මක කාල පරිච්ඡේදයක් පසු කරමින් සිටී. පැවැත්මට තර්ජන එල්ල වී ඇත. විද්‍යාව හා තාක්ෂණය දියුණුය. ජනතාව බුද්ධිමත්ය. මනස නිරවුල්ව තබාගත යුතුය. මෙබදු වකවානුවක අලූත් ගැලවුම්කාරයාණෝ පහලවෙන්නේ නැත. තාරකාවෙන් මග අසාගෙන තෑගි රැගෙන පැමිණි රජවරුන් තිදෙනෙකු ගැන කිතුණු කැරොල් කණ්ඩායම් කියයි. ගැලවුම්කාර භූමිකාව පමණක් නොව තෑගි රැගෙන මෙරටට එන කිසිවෙකු සිටින බවක් ද පෙනෙන්නට නැත.

අප සියළු දෙනා අප ගේ අනාගතයේ උත්සාහවන්තයෝය. අද කැපකිරීමක් කළහොත් අපගේ දරුවන් සැපයෙන් සිටිනු ඇත.

පරිවර්තනයක් සදහා සූදානම් විය යුතුය. කාර්මික, කෘෂිකාර්මික හා සේවා අංශවලින් නැවතත් නැගී සිටීම හැර අනෙක් විකල්පයක් නැත. ලෝකයේ නොයෙක් රටවල් දුෂ්කර කාල පරිච්ෙඡ්දවලට මුහුණ පා සිටි බව ඉතිහාසය කියයි. බලවත් රටවලින් ආධාර හා අනුබල ලැබුණි. ජාත්‍යන්තර සංවිධාන මගපෙන්වා ඇත. බොහෝ රටවල් අන්ධකාර යුගය පසුකර දීප්තිමත් අවස්ථාවකට පැමිණ ඇත. පවතින වසංගත තත්ත්වය අනෙක් රටක ප‍්‍රශ්නවලට උපකාර කළ නොහැකි තරමට අප සියළු දෙනා හුදෙකලා කර තිබේ. අප අපගේ ගමන තෝරා ගත යුතුය. වාද විවාද, තර්ක හෝ දෝෂාරෝපණ වලින් දුප්පත් ජනතාවගේ වේදනාවට උත්තරයක් නොවේ. සැපයක් ඇති කරන්නේ නැත. සියළු නායකයෝ එක්සත්ව එක පණිවුඩයක් නිකුත් කළ යුතු අවස්ථාවකි. ධෛර්යයයෙන් නැගී සිටියහොත් නිදහස් නිවහල් රටක් වශයෙන් ජාත්‍යන්තරය සමග එකතු විය හැකි බව සදහන් කළ යුතුව තිබේ.

නිසි වෙලාවට නිසි තීරණ නොගැනීමේ විපාකය

ප්‍රතිචාරයක් ලබාදෙන්න

2021.12.15 – ලංකාදීප

ආර්ථික ක‍්‍රමය තුළ වෙනස්කම් තිබිය හැකිය. ක‍්‍රමය භාවිතා කරන ආකාරය ගැන අත්හදාබැලීම් වලට ඉඩ තිබේ. මෙතෙක් සොයා ගෙන ඇති ආර්ථිකයේ මුලධර්ම වෙනස් වෙන්නේ නැත. ඉල්ලූම හා සැපයුම යන න්‍යාය වෙනුවට වෙනත් එකක් හදුන්වාදෙන්නට මෙතෙක් සමත්ව නැත. ආර්ථික විද්‍යාවේ මුලික සංකල්ප ලෝකයේ  ඕනෑම වෙළද පොලකට පොදුය. එය අප සියළු දෙනාට පිලිගන්නට සිදුවී ඇති  කරුණකි. අලූත් පිලිවෙලක් සොයාගතහොත් අනුගමනය කරන්නට ලෝක ප‍්‍රජාව සූදානම්ය.

ජීවත්වීම සදහා උවමනා කරන මුලික අවශ්‍යතා ආර්ථිකයෙහි කොටසකි. ඒවා සපයාගත යුතුය. නිෂ්පාදනය කරගත යුතුය. නිපදවන ආකාර ඇත. නිපදවන දේ සදහා ඉල්ලූමක් තිබේ. අවශ්‍ය ප‍්‍රමාණයට නිපදවන්නේ නැති අවස්ථාවක හිගයක් ඇති වෙයි. ඉල්ලූම ඉහළ යන අතර එය වෙළද පොල අසමතුලිතතාවයක් ඇතිකෙරේ. අධික සැපයුම ද වෙළද පොල අසමතුලිත කරයි. සැපයුම ඉහළ ගිය පමණින් අධි පරිභෝජනයක් සිදුනොවේ. දෙපැත්ත සමබර කිරීම පුලූල් වගකීමකි.

ශ‍්‍රී ලංකාව මුහුණ දී ඇති ආර්ථික ගැටළු ගැන මෙම මුලික ද්‍රෘෂ්ඨිවාදය තුළ තිබේ. ඉල්ලූම හෝ සැපයුම තද පාලනයකට යා හැකිය. එය සාමාන්‍යකරණය නොවේ. විකෘතියකි. වෙළද පොල විකෘති වන විට ගෙවන වන්දියක් ඇත. වන්දි ගෙවන්නේ පොදු ජනතාවය. ක‍්‍රමය වෙනස් කරන්නට වෑයම් කිරීම තුළ ඇති වන විකෘතියෙන් ජන සමාජය පීඩාවකට පත්වන බව ඇත්ත කාරණාවකි. දුගී දුප්පත් සමාජයට එයින් අත්වන හානිය ඉතාම බරපතලය. හිස ඔසවන්නට වෑයම් කරන ජනී ජනයා නැවත පහල තලයට තල්ලූකිරිම සුදුසු තත්ත්වයක් නොවේ. සිද්ධාන්තවලට එරෙහිව අනුගමනය කරන පියවර හේතුවෙන් අසරණ වන ජන සමාජය මුහුණ දෙන ගැටළු ගැන වගකිවයුතු අංශ ඉතා  ඕනෑකමකින් සොයා බැලීම යුතුය.

ශ‍්‍රී ලංකාවේ ආර්ථික ක‍්‍රමය ගැන, අද වන විට යම් අතෘප්තියක් පවතී. එයට බලපා ඇති කරුණු ගණනාවකි. අර්බුදකාරී අවස්ථා හටගන්නා අවස්ථා තිබේ. ඒවා පාලනයට ප‍්‍රතිපත්ති තීරණ ගැනීම වරදක් නැත. ඇතැම් තීරණ කැළඹිලි ඇතිකරනු ඇත. කැළඹීමකට පසු මතු කරගත යුතු යහපත් වාතාවරණයකි. කැළඹිලි අවසානයේ දී අලූත්, සාධාරණ ව්‍යුහයක් හැදෙන බව සමාජයට ඒත්තු ගන්වන්වන්නට අවශ්‍යය. ආර්ථික විද්‍යාවේ මුලික මුලධර්ම වෙනස් කරන සාමාන්‍යයෙන් සිදු නොවෙන වෙනස්කම්වලින් රටකට ලැබෙනන වාසියක් නැත.

කොවිඞ් වසංගත තත්ත්වය සමග රටට මුහුණ පාන්නට සිදුවූ ප‍්‍රශ්න ගැන අප සියළුම දෙනාට අවබෝධයක් තිබේ. අගහිගකම් මතුවෙන විට ගත හැකි තීරණ ගැන අප නොදන්නවා නොවේ. අතමාරුවක්, ණයක් එහෙමත් නැතිනම් දේපොලක් විකුණා තාවකාලික පිලියමක් සපයා ගැනේ. නැවත සුපුරුදු වාතාවරණය ඇති වූ පසු ණය ගෙවන, විකිණු දේපොල වෙනුවට අලූත් සම්පත් උපයා ගැනීම අපේක්ෂා කෙරේ. අවස්ථාවෝචිතව ගත හැකි නිසි ක‍්‍රියාමාර්ග නොගෙන නිරුත්සාහිකව සිටීම සාධාරණ තත්ත්වයක්ද?

ණය බරින් මිරිකී ඉතාම නරක තැනකට වැටුණ දරු පවුලකට පවා විසදුමක් තිබේ. ආහාර, සෞඛ්‍ය, අධ්‍යාපනය, ප‍්‍රවාහන සහ ඇදුම් පැළදුම් යනාදී අවශ්‍යතා වෙනුවෙන් පවුලේ අය නොනවත්වා මැසිවිලි නගන විට දෙමවුපියෝ නොකරන දෙයක් නැත. අප මුහුණ පා සිටින ඉරණම හැම අතින්ම, එයට සමානය. විසදුමක් අවශ්‍යය. ඉතාම දුෂ්කර පසුබිමක් තුළ ක‍්‍රමය වෙනස් කරන අත්හදාබැලීම් වරදක් නොවේ. ශ‍්‍රී ලංකාව පාලනය කරන ලද ආණ්ඩු ආර්ථිකය ගැන විවිධාකාරයේ අත්හදා  බැලීම් කර ඇත. ඒවායෙන් පාඩම් ඉගෙනගත යුතුය. නැවත නැවතත් කරන එකම අත්හදා බැලීම් අපට ලබා දෙන වාසිය කුමක්ද?

මුලික අවශ්‍යතා සම්පාදනය වෙනුවට තර්ක ගොඩනැගීමෙන් පලක් නැත. යතාර්ථය මුහුණ දිය යුතුය. ක‍්‍රමය වෙනස් කරන නමුත් වෙළද පොල මුලික මුලධර්ම වෙනස් කරන්නට පුලූවන්කමක් නැත. ඉල්ලූම පාලනය කළ හැකි සීමාවක් තිබේ. ජනතාව ඉල්ලන්නේ සෞභාග්‍යයයි. කාලානුරූපව තිරණගත යුතුය. ලෝකයේ අනෙක් සියළුම රටවලට වඩා වෙනස් ක‍්‍රමයක් අපට පමණක් නැත. නිසි අවස්ථාවේ දී හොදම තීරණය නොගැනීමෙන් අහිමි වන දේ ආපසු දිනාගන්නට නැවත වාරයක් ලැබෙන්නේ නැති බව ද මෙහි දී සදහන් කළ යුතුව තිබේ.

අවදානම අමතක කළොත් බරපතල අවදානමක්

ප්‍රතිචාරයක් ලබාදෙන්න

2021/12/08 – ලංකාදීප

‘‘ගිණි පෙනෙල්ලෙන් බැට කෑ මිනිහා  කණාමැදිරියාටත් බය ය’’ . ජන ව්‍යවහාරයේ එන ප‍්‍රකට කියමනකි. ගෑස් සිලින්ඩරයක ප‍්‍රමිතිය ගැන වාද කරන නූතන සමාජය ගිණි පෙනෙල්ල ගැන දන්නේ නැත. කණාමැදිරියා ගැන පවා ගූගල් සෙවුම් යන්ත‍්‍රයෙන් සොයන යුගයකි. ඉතිහාසය අපට පාඩම් උගන්වා තිබේ. උගත් පාඩම් අමතක කළ යුතු නැත. වැරදුණ තැන් නිවැරදි කරගත යුතුය.

පළමු කොවිඞ් රෝගියා වාර්තා වූ ආකාරය මතක තිබිය යුතුය. දෙවැනි සහ තුන්වැනි රැළි වලින් ජන සමාජයට සිදුවූ විපත ගැන තක්සේරුවක් අවශ්‍යය. ආර්ථික පීඩනය ගැන අවධානය යොමු කිරිම වැදගත්ය. දරුවන්ගේ අධ්‍යාපනය කඩාකප්පල්වී ඇති තරම සාකච්ඡා කළ යුතුව තිබේ. දහස් ගණනින් රෝගීන් වාර්තාවන භයානක රැළි කිහිපයකට පසු නැවත, නැවතත් එතැනටම ගමන් කිරීම බලවත් ප‍්‍රශ්නයකි.

කොවිඞ් වයිරසයේ අලූත් ප‍්‍රබේධයක් වාර්තා වී තිබේ. ලෝකයේ එක කෙළවරකින් පළමු රෝගියා වාර්තාවන අතරතුර ශ‍්‍රී ලංකාවේ පවා රෝගියෙකු හදුනා ගෙන ඇත. ව්‍යාප්තිය කොපමණ වේගවත් ද යන්න අපට අනතුරු අගවයි. දැනට කරගෙන යන ක‍්‍රියාමාර්ග වලින් ලැබුණ සාර්ථකත්වය මොහොතකින් ගිලිහී යන අවදානමක් ඇත. ඉතාම සාර්ථකව කොවිඞ් එන්නත ලබාදෙන්නට ආණ්ඩුව සමත්ව තිබේ. වයස්ගත ජන කොටසට තුන් වැනි මාත‍්‍රාව ද, නිකුත් කෙරේ. ආර්ථික දුෂ්කරතා මැද පසුවන අතරවාරයේ පවා නොමිලේ සැපයීම අගය කළ යුතුය. ආරක්ෂා වූ ජීවිත ගණන වාසනාවකි. සෞඛ්‍ය කාර්ය මණ්ඩලය, ආරක්ෂක අංශ කරන ලද කැපවීම සහ බාධක මැද නොනැවතී ඉදිරියට ගිය ගමන දැවැන්ත රැකවරණයක් වූ බව සදහන් කළ යුතුය.

කොවිඞ් වසංගතයේ අවසානයක් දකින දවස විවාදාත්මකය. ලෝක සෞඛ්‍ය සංවිධානය එයට උත්තරයක්  දී තිබේ. කොවිඞ් තුරන් කරන දිනය තීරණය කළ යුතු ජනතාව බව පැහැදිලිව කියා ඇත. එන්නත එක පැත්තක ආවරණයකි. පරෙස්සම අපගේ වගකිමකි. අලූත් ප‍්‍රබේධ මතු වෙමින් තිබේ. සෑම වෛරස් ප‍්‍රබේධයකටම එන්නතක් නැත.

පසුගිය වසර දෙක තුළ අලූත් භාවිතා අපට ලැබී තිබේ. සමාජ දුරස්ථභාවය වැනි දරා ගත නොහැකි සංකල්ප කරා තල්ලූවෙන්නට සිදුවී ඇත. උපතක දී ලබන සතුට පමණක් නොව විපතක දී ලබන වේදනාව ද දුරස්ථව දරා ගන්නට සිදුවී ඇති වකවානුවකි. පැවැත්ම කාලානුරූප කරගැනීමට සිදුවී ඇත. නීති වලින් කළ නොහැක. ආරක්ෂා වුවහොත් ගැලවීමක් තිබේ. ගැලවුම්කාරයා අනෙකෙකු නොවේ.

කොවිඞ් වසංගතය සමග ආකෘති වෙනසක් සිදුවී ඇත. ගැලවීමට මාර්ගයක් තනා තිබේ. වෘත්තීය අවස්ථා, මුල්‍ය සේවා, අධ්‍යාපනය, සෞඛ්‍ය යනා දී සියළු අංශ වලට තාක්ෂණය ඇතුළු වී ඇත. ඉහළ අධ්‍යාපන පසුබිමක් සහ හොද සාක්ෂරතාවයක් ඇති රටක් වශයෙන් මෙම පැතිවලට කාර්යක්ෂමව ප‍්‍රවේශ විය යුතුය.

රැකියා ස්ථානයට පැමිණීම වෙනුවට කොතැනක හෝ සිට රාජකාරිය කරන තාක්ෂණයට හුරු විය යුතුව ඇත. දැනටමත් සමාජයේ සෑහෙන පිරිසකට බැංකු හා මුල්‍ය කටයුතු වල දී නිවසේ සිට කරගත හැකි වී තිබේ. එය තවත් දියුණු කරගත හැකිය. ඉගෙනගැනීම අන්තර් ජාලයෙන් සිදුවෙයි. රෝගීන් පරීක්ෂාව හා වාර්තා කියැවීම පවා අන්තර් ජාලයට පවරා ඇති කාලයකි. භාණ්ඩ මිල දී ගැනීමට වෙළද පොලට යා යුතුම නැත. කොවිඞ් වෛරසයේ ව්‍යාප්තිය පාලනය කිරීමට, මෙකී රාමුව බලපාන බව අවධාරණය කළ යුතුය. අනෙක් අතට එයින් ලැබෙන පිටිවහල ජීවිතය ක‍්‍රමානුකූල කරයි. කාර්යක්ෂමතාව ඇති කරන බව පැහැදිලිය.

මෙවැනි අංශ කෙරෙහි නැඹුරුවක් අවශ්‍යය. තාක්ෂණයට හුරුවීම වේගවත් කරන ක‍්‍රියාමාර්ග උවමනා කෙරේ. ජනතාව එය වැළද ගත යුතුය. රාජකාරි පහසු කරනු ඇත. වගකීම වැදගත් කරුණකි. අප සියළුම දෙනාට අලූත් ආකාරයකට තීරණ ගැනීමේ වගකීමක් තිබේ. බැට කෑ සමාජයක් නැවත නැවතත් භයානක ලෙස බැට කන තැනට පත්වීම නරකය. බුද්ධිමත් සමාජයක එක කොටසක් වන අපට, වෙනස් මානයකට ඇතුළුවීම අපහසු නැත. කැපවීම පමණක් අවශ්‍ය කෙරේ. අනාගතය හැදෙන්නේ වෙනස්වීමට දරන උත්සාහයෙන්ය. 

හෙට සුබවෙන්න අද වගකීම

ප්‍රතිචාරයක් ලබාදෙන්න

2021/12/01 – ලංකාදීප

සැනසිලිදායක හෙටක් සදහා අද තීරණ ගැනීම

පිසූ ආහාර ඇත. දොවන ලද කිරි තිබේ. දල්වන ලද ගිණි ඇවිලෙයි. නිවසට වහලයක් තිබේ. මැසි මදුරු පීඩාවක් නැති අතර මෙම මොහොත සුරක්ෂිතය. දැන් ඉතින් මහා වැස්සක් ඇදහැලූනාට කිසිම ප‍්‍රශ්නයක් නැත. යනුවෙන් කල්පනා කළ ධනිය ගෝපාල ගැන සදහනක් බුද්ධ දේශනාවේ ඇත. ධනිය ගෝපාල සුත‍්‍රයෙහි දැක්වේ. වැසි ලකුණු දකින ධනිය ගෝපාල, සිය දෙනුන් පවා අවශ්‍ය තරම් ආහාර ගෙන ඇති අතර තමන්ට කිසිම කරදරයක් නැති බව සිතන බව එහි වැඩිදුරටත් කියැවේ.

ධනිය ගේ සිතිවිල්ල ගැන අවධානය යොමු කළ හැකි පැති දෙකක් තිබේ. එකක් ඔහු තමන්ගේ ජීවිතය හසුරුවාගෙන ඇත. අනෙක ඔහු ඉතා ආත්මාර්ථකාමීය. පැති දෙකම වැදගත්ය. මහ වැසි තර්ජනයක් ඇති නොකරන තරමට සුදුසු පරිසරය හදාගෙන තිබේ. එය ධනිය ගේ දක්ෂතාවයකි. අන්ධකාර ලකුණු ඔහුගේ පැවැත්මට ගැටළු ඇති කරන්නේ නැත. එහෙත් අධික වැසි ප‍්‍රශ්න ඇති නොකරන්නේ ද නොවේ. ධනිය සුරක්ෂිත නමුත් අනාරක්ෂිත විශාල පිරිසක් ජන සමාජයක ජීවත්වෙති. ඔවුහු මහ වැස්සකින් පසු දුෂ්කරතාවයකට පත්වනු ඇත. කුසගින්න සහ සීතල ජීවිතය අසරණ කරන සාධක බව පෙනේ. සෙසු පිරිස ගැන නොසිතන ධනිය, වැහි කෝඩයක් මෝදු වන ලකුණු තමන්ට ප‍්‍රශ්නයක් නොවන බව කල්පනා කරයි. ඔහුගේ ආකෘතිය වැදගත්ය. නමුත් සිතිවිලි පොදු සමාජ සාරධර්ම ඉදිරියේ නොගැලපෙන එකකි.

බෞද්ධ සාහිත්‍යයේ එන මෙවැනි ආදර්ශ අද පැවැත්මට ගලපා ගත යුතුය. බුදු බණ අහන සමාජයකි. බුදුන් අදහන බව අ`ගවයි. දර්ශනය වටහා ගෙන නැත.

රටත්, සමාජයත් ඔසවා තබන සැලැස්ම තුළ ධනිය ගෝපාල සංකල්පය තිබිය යුතුය. අද පවතින ප‍්‍රශ්න දෙස බලන විට පැහැදිලිය. සමාජ, ආර්ථික හා සෞඛ්‍ය අංශවලින් ඉතාම දුප්පත් තැනකය. සැකය හා අවිශ්වාසය ඉහවහා යමින් තිබේ. සුළු සිද්ධියකින් පවා කම්පිතව වැලපෙන ක‍්‍රමයක් බිහි වී තිබේ. වේදනා සහ දෝමනස්ස වැපිරවීමෙන් ලැබෙන ප‍්‍රතිඵලය කුමක්ද? උද්ගත වී ඇති ප‍්‍රශ්නවලට විසදුම් සොයාගත යුතුය. අප සියළු දෙනාගේ වගකීීමකි. ආණ්ඩුව නායකත්වය දිය යුතුය. නිසි ප‍්‍රතිපත්ති සකස් කරන අතර මුලික පහසුකම් සංවිධානය කළ යුතුය. ගොඩනැගීම සහ තමන්ගේ අනාගතය සාක්ෂාත් කරගැනීම අප සියළු දෙනාගේ වගකීමකි. බුද්ධිමත්, දැක්මක් සහිත සමාජ වටපිටාවක් පවතී. දැනුම ඉහළම තැනට පැමිණ ඇත. අවබෝධය රහිත පිරිසකට පවා දැනුම සහ අවබෝධය ලබාගැනීමට පහසුකම් තිබේ. තාක්ෂණික වටපිටාව විශාල ආවරණයක් සපයයි. ගමන් කළ යුතු ආකාරය ගැන ආදර්ශ ලබාගත හැකිය. පටු අදහස් තුරන් කර පුලූල් දැක්මක් සහිතව තීරණ ගත හැකි වාතාවරණයක් පවතී. එහෙත් එම මාර්ගය ඔස්සේ ගමන් කරන්නට අප සූදානම්ද?

කොවිඞ් වසංගතය සමග උද්ගත වූ තර්ජන සම්පූර්ණයෙන්ම කළමණාකරනය කරගන්නට අපොහොසත්ව සිටී. ඉතාම සුළු පිරිසක් ධනිය ගෝපාලවරු බවට පත්ව ඇත. බහුතරයක් දෙනා සැකයෙන් හා අවිශ්වාසයෙන් ජීවත්වෙති. හෙට දවසට මුහුණ දෙන්නේ කෙසේද යන ප‍්‍රශ්නය තිබේ. කොවිඞ් අන්ධකාරය තුළ තව දුරටත් ජීවත්විය යුතු නැත. ආලෝකය සොයා යා යුතුය.

බරපතල ආර්ථික ප‍්‍රශ්න රටට ඇත. කර්මාන්ත හා ව්‍යාපාර ගැටළු සහගත තැනකය. රැකී රක්ෂා අවස්ථා අඩුය. ආදායම සීමිතය. ජන ජීවිතය සහන ඉල්ලා සිටින වකවානුවකි. ජාතික ආර්ථිකය දරුණු පිරිහීමක පවතින අවස්ථාවක තව තවත් සහන බෙදන්නේ කෙසේද? අලූත් තීරණ වලින් නවෝත්පාදනයක් කරා ගමන් කළ යුතුව තිබේ. ව්‍යසන ඉදිරියේ ශෝක නොවන සමාජයක් ගොඩනැගිය යුතුය. ශ‍්‍රී ලංකාව පාඩම් ඉගෙනගත් රටකි. දකුණේ සහ උතුරේ ඇති වූ බිහිසුණු ත‍්‍රස්තවාදය, දස දහස් ගණනින් ජීවිත අහිමි වූ ‘සුනාමි’අමතක නොවන සිද්ධි අතර තිබේ. ඒවාගෙන් ගැලවී. යළිත් මතු වී ඉදිරියට පැමිණීමට සමත් වූ රටකි. කොවිඞ් වසංගත තත්ත්වයට ද අවසානයක් ඇත. සමාජය ශක්තිමත් කර  නැවත ඔසවා තබන පියවර අවශ්‍යය. සමාජය එකමුතු කරන දැවැන්ත සංවිධාන ශක්තියක් සූදානම් කරගත යුතුය.

කලබල වූ සමාජයක හැසිරීම ගැන අප නොදන්නවා නොවේ. විවිධ මත, නොයෙක් අදහස්, එකකට එකක් නොගැලපෙන තර්ක ඇවිලෙයි. ඒවායෙන් ඉතාම සංකීර්ණ ස්වභාවයක් හටගනී. මෙම කුණාටු සහගත අවස්ථාවේ දී තව තවත් අවුලවන උපායවලින් පලක් නැත. ජන ජීවිතය ගොඩනගන, පුනර්ජීවනය ඇති කරන පියවර සදහා යා යුතුය. අද පවතින සමාජ හා ආර්ථික පසුබිම තවත් අමතක නොවන පාඩමකි. මෙවැනි ඉරණමක් පරාජයකර සැනසිල්ලෙන් ජීවත්විය හැකි රටක් දරුවන් වෙනුවෙන් ගොඩනගන්නට නම් අද තීරණ ගත යුතුය.

කෘෂි අංශයෙන් ආර්ථිකයට දායකත්වය විමසුම් ඇසින්

ප්‍රතිචාරයක් ලබාදෙන්න

2021/11/17 – ලංකාදීප

මිල පාලන රෙගුලාසි ඉවත් කිරීමට රජය තීරණය කර තිබේ. වෙළෙඳ පොළට ගැලපෙන තීරණයකි.මෙතෙක් භාණ්ඩ වර්ග දහ හතකට උපරිම සිල්ලර මිල නියම කර තිබුණි. අලුත් නියෝගය අනුව පාලන මිල තවදුරටත් වලංගු නැත. ආහාර ද්‍රව්‍ය විකිණිය හැකි මිලක් ගැසට් කරන ලද නමුත් පාරිභෝගිකයන්ට එම මිලට ලැබුණෙ නැති බවද පෙන්වා දිය යුතුය. පාරිභෝගිකයෝ ආණ්ඩුවටත් වෙළඳුන්ට දොස් තැබූහ. එය සාධාරණ නැත. ඉල්ලුම පාලනය කිරීම සඳහා මිල නියම කරන්නට ආණ්ඩුවට සිදු වූ නමුත් වෙළෙන්දන් මිල තීරණය කළේ ලැබෙන සැපයුම අනුවය. භාණ්ඩ හිඟ වන විට මිල ඉහළ නැගීම සාමාන්‍යයෙන් සිදු වෙයි.

 සඳහන් කළ යුතු වැදගත් කරුණක් ඇත. පාරිභෝගිකයන්ට වාසි සැලසෙන ක්‍රමයක් උදෙසා තරගකාරීත්වය අවශ්‍යය. රාජ්‍ය හා පෞද්ගලික අංශය අතර පමණක් නොව පෞද්ගලික අංශයේ සේවා හා ව්‍යාපාර අතර ද දියුණු තරගයක් තිබිය යුතුය. එක හා සමාන භාණ්ඩ හෝ සේවා සැපයුම්කරුවන් ගණනාවක් සිටින අවස්ථාවක තමන්ට කැමති දේ තෝරා ගැනීමට නිදහසක් ලැබේ. වෙළෙඳ පොළට යන පාරිභෝගිකයෝ මිල තත්ත්වය ඇතුළු ගුණාංග කෙරෙහි සැලකිලිමත් වෙති. විශ්වාසදායක තැන කෙරෙහි අවධානය යොමු වෙයි මිල පාලනයේදී මෙම ඇතුළාන්තය මග හැරේ. වෙළෙන්ඳා දෙන දෙයක් ආණ්ඩුවේ මිලට ගැනීම හැර අනෙක් විසඳුමක් නැත. හොඳම දේ පාරිභෝගිකයාට රිසි පරිදි මිලදී ගැනීමට අවශ්‍ය පහසුව සකස් කිරීම යහපත් කළමනාකරණයක් සහිත ආණ්ඩුවක ක්‍රමයයි.

කොවිඩ් සමග ගැටළු ගණනාවක් හට ගැනිණ. වශ්‍ය භාණ්ඩ හා සේවා සැපයීමක් නොතිබීම එහි එක පැත්තකි. සාමාන්‍ය ජනතාවගේ ආදායම සීමාසහිත විය. වෙළඳපොලට සපයන දේශීය වන අතර එහි මිල වැඩිවීම අතමිට හිඟ ජනතාවට තදින් දැනෙන කාරණයකි. එම ආවරණය දිගටම පවත්වාගෙන යා යුතු නැත. වෙළෙඳපොළ සක්‍රීය කර ආර්ථික දියුණුව සල සඳහා බලගැන්විය යුතුය. මිල පාලනය ඉවත් කර තරඟ ඇති කිරීම එහි ප්‍රාථමික පියවරක් වනු ඇත . 

ලබන වසර සදහා ඉදිරිපත් කරන ලද අය වැය යෝජනා අවධානයට ලක් වන කාල වකවානුවකි. කෘෂි අංශය ගැන කරුණු ඇතුලත්ය. ශ‍්‍රම බලකායෙන් සියයට අසූවක් කෘෂි අංශයෙහි බව දක්වයි. කෘෂි අංශය, දළ දේශීය නිෂ්පාදිතයට දක්වන දායකත්වය සියයට දහයකටත් අඩු බව මතක් කළ යුතුය. විශාල ශ‍්‍රම බලකායක් යෙදවෙන නමුත් එයින් අත්පත්කරගත හැකි ආර්ථික වාසිය ගැන සොයා බැලීම සුදුසුය.

පාරිභෝගිකයන් ගේ පැත්තෙන් අවධානය යොමු කළ යුතු කාලයකි. නිෂ්පාදන, සේවා හෝ කාර්මික අංශවල නිරත වන බවට වෙන්කළ හැකි නමුත් සියළුම දෙනා පාරිභෝගිකයෝය. එලවලූ වගා කරන ගොවියා නිෂ්පාදකයෙකු වශයෙන් ආරක්ෂා කරගත යුතු නමුත් වෙළ`ද පොලට පැමිණි පසු ඔහු ද අනෙක් පිරිස සමග පවතින මිල විපර්යාසයෙහි ගොදුරකි.

ඉන්දියාවේ සිල්ලර මිල අනුව ලොකු ලූනු කිලෝ එකක් රුපියල් දහයකි. ශ‍්‍රී ලංකාවේ මුදලින්  සලකනවිට රුපියල් විසි හයකට ආසන්නය. තොග මිල තවත් අඩු බව සැකයක් නැත. ඉන්දියාව හා ශ‍්‍රී ලංකාව අතර වෙළද ගිවිසුමක් තිබේ. දෙරට අතර භාණ්ඩ ප‍්‍රවාහනයට විශාල පිරිවැයක් නැත. අස්වනු හිග කාලයේ ලංකාවේ ලොකු ලූනු කිලෝවක මිල රුපියල් තුන්සියය ඉක්මවයි. මාතලේ, දඹුල්ල, ගලේවෙල, ලග්ගල ඇතුළු ප‍්‍රදේශවල මහා පරිමානයෙන් ලොකු ලූනු වගා කෙරේ. උතුරු නැගෙනහිර පලාත්වල ද සුළු ගොවියෝ සිටිති. ලොකු ලූනු අස්වැන්න ලැබෙන කාලයේ දී පවා ඉන්දියාවේ මිලට අපට ලැබෙන්නේ නැත. පාරිභෝගිකයන් විදින අවාසිය බරපතලය. පවතින සම්ප‍්‍රදායික රාමුව වෙනස් කළහොත් ජීවන වියදම සම්බන්ධ අලූත් අත්දැකීමකට යා හැකිය. මෙහි සදහන් කළේ එක පාරිභෝජන ද්‍රව්‍යයක් ගැන පමණකි. අනෙක් කෘෂි නිෂ්පාදන වල ද අභ්‍යන්තරයෙහි වෙනස මේ හා සමානය.

ලොකු ලූනු වගාවට අවශ්‍ය බීජ වලින් වැඩි කොටසක් ආනයනය කෙරේ. පොහොර පිටතින් ගෙන්වයි. ගොවියන්ට සහනාධාර ක‍්‍රම වෙනුවෙන් රජය වැයකරන ධනය ද සුළු පටු නැත. ඉඩම හා ශ‍්‍රමය පමණක් මෙරටින්ය. වගා බිම් සෑහෙන කොටසකට ඔප්පු නැත. වගා කරන්නේ අද ගොවීහුය. අස්වැන්න විකිණීමෙන් පසු ණය ගෙවීම හැර ආදායමක් ගොවියන්ට නැති බව ඉතාම පැහැදිලි කරුණකි. ව්‍යුහාත්මක වෙනස්කම් ඇති කිරීම කෙරෙහි ප‍්‍රතිපත්ති සම්පාදකයෝ අවධානය යොමු කළ යුතුය.

ලොකු ලූනු වෙනුවට වෙනත් දෙයක් වගා කළ හැකිය. අපනයනයෙන් වැඩි ආදායමක් ලබා ගත හැකි බෝග ප‍්‍රබේධ තිබේ. කෘෂි ව්‍යාප්ති අංශ මේවා ගැන අධ්‍යයනය කර රජයට නිර්දේශ ඉදිරිපත් කරන්නට අවශ්‍යය. ලොකු ලූනු වගා කරන ගොවියන් ගේ ඉරණම වෙනස් කරන තීරණ අවශ්‍යය. එය පාරිභෝගිකයන් ගේ ද ඉරණම වෙනස් කිරීමකි. මුලින් ගැටළු ඇතිවෙයි. විරෝධතා එල්ල වෙනු ඇත. ඒවා සනුමනය කළ හැක. ලූනු ගොවියන් තෝරාගෙන ඔවුන්ට කෙලින්ම ආධාර සැපයිය යුතුය. ආනයනික ලොකු ලූනු වලට විශේෂ බද්දක් පනවා එයින් ලැබෙන ආදායම අනෙක් වගාවකින් ස්ථාවර වන තෙක් ගොවි ජනතාවට ගෙවිය හැකිය. අවුරුදු දෙක තුනකින් අලූත් යමක් සිදුවෙයි. පාරිභෝගිකයන්ට අඩු මිලට ලොකු ලූනු මිල දී ගත හැකිවනු ඇත. වෙළද පොල මිල ස්ථාවරව තබාගැනීම සදහා, විදේශීය සැපයුම්කරුවන් සමග ඉදිරි මිල දී ගැනීමේ ගිවිසුම් අත්සන් කරන්නට හැකියාව ඇත.

ගොවි ජනතාව ඉකුත් පරම්පරා ගණනක, මහ පොලව සමග හැපී, ගැටී එයින්ම පෝෂණය වී ඇත. අලූත් පරපුර මෙහි විෂම පැත්ත ගැන අවබෝධයක් සහිතය. දරුවෝ ගොවිපොලට එහා ඇති අවස්ථා දකිති. නගරයට හො නගරයෙන් පැන වෙනත් රටකට යන්නට සූදානම්ය. වෙළද පොල සදහා ගොවිතැනෙහි නිරත වන පිරිස ක‍්‍රමයෙන් අඩුවෙමින් පවතී. ඵලදායීත්වයක් නැති අකාර්යක්ෂම ක‍්‍රමවලින් ගැලවෙන සූදානම වැදගත්ය. වෙනස් ක්ෂේත‍්‍ර තෝරා විධිමත් අධ්‍යයනයක් කළ හැකිය. අර්බුදකාරී පැතිවලින් ගැලවීමට පර්යේෂණ කළ යුතුය. මෙරට කෘෂිකර්මය හා ගොවිතැන ගැන විශ්ව විද්‍යාල මට්ටමින් වැදගත් සොයාගැනීම් කර තිබේ. ඒවා ප‍්‍රායෝගිකව භාවිතයට නොගැනීම අඩුවකි. මෙහි ලා සදහන් කළේ එක වගාවක් ගැන පමණකි. ආසන්න රටක අත්දැකීමක් වන අතර අනෙක් අංශ ගැන ද පරීක්ෂාකාරීව සොයා බැලීමෙන් පාරිභෝගික උන්නතිය ඇති කළ හැකිවනු ඇත.

පළමුවත් දෙවැනුවත් තාක්ෂණය පාසලට

ප්‍රතිචාරයක් ලබාදෙන්න

2021.11.03 – ලංකාදීප


දීර්ඝ නිවාඩුවකට පසු දරුවන් පාසලට කැඳවන තීරණයක් ඇත. කොවිඩ් වසංගතයේ බලපෑම මත අවස්ථා ගණනක්, සංචරණ සීමා යටතේ පැවැතිණි. අධ්‍යාපන කටයුතුවලට තියුණු බලපෑමක් එල්ලවිය. අන්තර් ජාල පහසුකම් යටතේ ක්‍රමානුකූලව කරගෙන යන බලවත් වෑයමක් තිබුණ නමුත් එහිදී ද මතු වූ සංකීර්ණ ගැටළු ගණනාවකි. වෘත්තීය ප්‍රශ්න, ආකල්ප ගැටළු වෙනම සාකච්ඡා කළ යුතුය. පාසල නැවත විවෘත කිරීමෙන් පසු, කලුලෑල්ලේ ආකෘතියෙන් ඔබ්බට ගමන් කිරීම ගැන ප්‍රතිපත්ති විවාදයක් අවශ්‍යය.


ජංගම දුරකථන හා අන්තර් ජාල භාවිතා කිරීම දරුවන්ට තහනම් වී තිබුණි. කොවිඩ් වංසගතය සමග ගුරුන් හා දෙගුරුන්ට ක්‍රමානුකූලව එයින් බැහැරවෙන්නට සිදුවිය. වාර්තාවෙන කරුණු අනුව පෙර පාසල පවා ‘ඔන්ලයින්’ ක්‍රමයටය. යුගයට අනුව පරිවර්තනයවීම අගය කළ යුතුය. විදේශ රටවල පවා අධ්‍යාපන කටයුතු තාක්ෂණයට නැඹුරු වී ඇත වකවානුවකි. දුරස්ථව ඉගෙනීම සාමාන්‍ය දෙයක් බවට පත්ව තිබේ. උතුර දකුණ බේද රහිතව අධ්‍යාපනය ලබාදිය හැකි ක්‍රමයකි.
පාසල් නැවත ආරම්භ කළ පසු පවා දෙමුහුන් ක්‍රමයකට අධ්‍යාපන පහසුකම් සකස් කිරීම උචිතය. පොත් මුද්‍රණය, බර පාසල් බෑග්, සහ වාහන තදබදය හේතුවෙන් කාලය නාස්ති කරන පාසල් වෑන් සංස්කෘතිය වෙනස් කරන්නේ කෙසේ ද යන්න මධ්‍යස්ථව අධ්‍යයනය කළ හැකිය. පෙල පොත් අන්තර් ජාලයට එකතු කිරීම හා සාමාන්‍ය පරීක්ෂණ අන්තර් ජාලයෙන් කළ හැකිය. සටහන් පොත් පමණක් දරුවන්ට සෑහේ. අවශ්‍ය විෂය කරුණු ලියා ගත හැකිය.

පාසලට එන දින ගණන වෙනස් කිරීමෙන් අධ්‍යයනයේ කොටසක් නිවසේ සිට කරගෙන යන හැකියාව තිබේ. ප්‍රායෝගික හැදෑරීම් සඳහා පාසලට පැමිණිය හැක. එවැනි පියවර තුළින් සෞඛ්‍ය ආරක්ෂාව පමණක් නොව දරුවන්ගේ මානසික තත්ත්වය ද උසස් කෙරේ. සෘජු අධීක්ෂණය හා නිසි මගපෙන්වීම සම්බන්ධයෙන් ගුරුවර්න්ටත්, දෙමාපියන්ටත් විශාල වගකීමක් පැවරෙන බව ද මෙහි ලා සඳහන් කරන්නට අවශ්‍යය. ගුරු පුහුණු ක්‍රම වහාම වෙනස් කළ යුතු අතර දුරස්ථ අධ්‍යයනය ගැන සැසි පවත්වා අලුත් පසුබිමක් සකස් කළ යුතුව තිබේ.


තාක්ෂණය හේතු කොටගෙන සමාජ බෙදුම් රේඛාවක් නිර්මාණය නොකිරීමට වගබලාගැනීම ඉතාම වැදගත් කාරණයකි. ඇති නැති පරතරය හැදෙන්නේ අන්තර් ජාලය භාවිතා කරන්නට ඇති පහසුව සමග බව ජාත්‍යන්තරයේ අද පවතින පිලිගැනීමයි. ‘කොළඹට කිරි – ගමට කැකිරි’ යන ප්‍රකට ව්‍යවහාරය එන්නේ පාසලේ ගොඩනැගිලි, විද්‍යාගාර හා පිහිණුම් තටාක වැනි පොදු පහසුකම් පරතරය සමගය. එවැනි දේ වෙනුවෙන් අසීමිත ධනයක් වැය කරන්නට සිදුවූ අතර දෙමාපියන් සහ පුද්ගලික අංශය එහි දී එකතු වී ක්‍රියා කළ ආකාරයක ද සිහිපත් කරන්නට අවශ්‍යය.


අන්තර් ජාලයෙන් අධ්‍යාපනය ලබන්නට නිසි යටිතල පහසුකම් සම්පාදනය කිරීම රජයේ වගකීමකි. දැනට ජාලගත පහසුකම් රට පුරා එක හා සමානව නැත. දුෂ්කර ප්‍රදේශවල අන්තර් ජාල පහසුකම් වෙනුවෙන් විඳින හිරිහැරය වගකිවයුතු අංශ නොදන්නවා නොවේ. නගරයෙන් එපිට දරුවන්ගේ අවශ්‍යතා කෙරෙහි වැඩි අවධානයක් අවශ්‍යය.අන්තර් ජාල ඉගෙනගැනීමක දී හොඳම පාසලේ දේශනවලට ශ්‍රී ලංකාවේ එහා කෙළවරක සිටින දරුවෙකුට පවා ප්‍රවේශ විය හැකිවනු ඇත. එය ඉතාම වටිනා අවස්ථාවකි. පාසල් පන්ති කාමර රටට විවෘත වුවහොත් දැනට විසඳාගත නොහැකිව ඇති ටියුෂන් තරඟයට ද උත්තරයක් වෙන්නට බැරි නැත. අවශ්‍ය තිරණ ගැනීම වැදගත්ය. සන්නිවේදන පහසුකම් සපයන ආයතන දිරිමත් කර දුෂ්කර ප්‍රදේශවලට ජාලගත පහසුකම් සැපයීමේ දී රජයෙන් මුදල් ගෙවන ක්‍රමයක් ඇති කළ හැක. පුරුදු රාමුවෙන් එපිට දෙමුහුන් එනම් පාසල හා අන්තර් ජාලය එකට එකතු කරන අධ්‍යාපනයක් සඳහා සැලසුම් සකස් කළ යුතු අතර එයට අධ්‍යාපන බලධාරීහු පමණක් නොව දෙමාපියන් ද ක්‍රියාකාරීව සම්බන්ධ විය යුතුය.

ජනතාව බලවත් කෙරෙන ව්‍යවස්ථාවක අවශ්‍යතාව

ප්‍රතිචාරයක් ලබාදෙන්න

2021/10/27 – ලංකාදීප

ව්‍යවස්ථාව ගැන කතා නැවත වාරයක් ආරම්භ කර තිබේ. නිදහසට පසු ගත වූ ඉතිහාසය ව්‍යවස්ථා ගැන ආන්දෝලන වලින් බහුලය. බලයට පත්වන ආණ්ඩු ව්‍යවස්ථා නිර්මාණය කරති. ඒවායේ සාර්ථක හෝ අසාර්ථක භාවය වෙනම සාකච්ඡා කළ යුතුය. පොදු ජනතාවට ලැබි ඇති අවස්ථාව කුමක්ද?

යුක්තිගරුක පාලන ක‍්‍රමයක් සහතික කිරීමට ව්‍යවස්ථාව වැදගත්ය. ශ‍්‍රීමත් අයිවර් ජෙනින්ග්ස් නිදහස් ශ‍්‍රී ලංකාවේ පළමු ව්‍යවස්ථාව නිර්මාණය කළේය. ඞී. එස්. සේනානායක මහතා සමග සාකච්ඡා කරමින් එහි වගන්ති සකස් කරන ලද අතර පාර්ලිමේන්තුවේ සම්මත කරගෙන තිබේ. පසුව 1972 වසරේ දී ජනරජ ව්‍යවස්ථාවක් සම්මත කරගනී. විධායක බලතල සහිත ජනාධිපතිවරයෙකු සහිත පාලනයක් ලැබෙන සේ ව්‍යවස්ථාව වෙනස් කළේ 1978 වසරේ දී ය. එතැන් සිට බලයට පත්වන ආණ්ඩු අලූත් ව්‍යවස්ථා යෝජනා කිරීම සාමාන්‍ය සිද්ධියකි. ක‍්‍රමය වෙනස් අරගලය අරඹන නමුත් රාමුව තුළ සංශෝධන හැර අලූත් යමක් නිර්මාණය කරගන්නට අසමත් ව සිටී.

රටට අලූත් ආරම්භයක් අවශ්‍යය. එය ගැන විවාදයක් නැත. දකුණේ ජනතාව පෙරැලියක් කෙරෙහි බලාපොරොත්තු තබා තිබේ. උතුර නැගෙනහිර ජනතාව සිය අභිමතාර්ථ ගැන සිතති. මෑතක සිදුවූ ත‍්‍රස්තවාදයට හේතු වූ පසුබිම අධ්‍යනය කර පුරවැසියන්ට අවස්ථා සම්පාදනය කරන රටක් වෙනුවෙන් පියවරකට  යා යුතුය.

ව්‍යවස්ථා හදන්නේ නීතිවේදීහුය. හැදෙන්නේ පාලකයන්ට රිසි පරිදිය. බලයේ සිටින කණ්ඩායමක බලය ආරක්ෂා වන පරිදි නීතිහැදීම අසාර්ථක පිලිවෙලකි. ව්‍යවස්ථාව පාලකයන්ට බලය ලැබෙන ආයුධයක් නොවේ. ජන සම්මතවාදය ආරක්ෂා කරන  ජනතාව බලගන්වන එකකි. රටවැසියන්ගෙන් දුරස් වූ ව්‍යවස්ථාව ඔවුන් අතරට ගෙන යෑම වැදගත්ය. ඔවුන්ට දැනෙන,  ජනතාවට ස්පර්ශ කළ හැකි ව්‍යවස්ථාවක් අවශ්‍යය. සමාජ නායකයන්ට අලූත් ව්‍යවස්ථාව ගැන වගකීමක් ඇත. සමාජයට අවශ්‍ය කරුණු ගැන අධ්‍යයනය කර නවෝත්පාදන අදහස් එයට ඇතුලත් කළ යුතුය. දේශපාලනඥයා බලවත් කිරීම වෙනුවට ජනතාව අතට අවස්ථා සම්පාදනය වන වගන්ති අවශ්‍යය.

ගෝලීයසමාජය තුළ ශ‍්‍රී ලංකාව එක කොටසකි. ලෝකයේ අනෙක් රටවල සිදුවන, ලෝකයේ අනෙක් තැනකින් ලබාගත හැකි අවස්ථා ගැන හොද අවබෝධයක් ඇති මානව සම්පතක් අපට සිටී. පැරණි යල්පැන ගිය අදහස්වලින් අභිලාශ අවුරා දැමීම නොකළ යුතුය. සිතැගි පරිදි ජීවත්වන්නට ක‍්‍රමය සහ ගැති නොවී අවස්ථා හදාගන්නට පසුබිම රටට ගැලපෙන ව්‍යවස්ථාව තුළ තිබිය යුතුය. බලය එක පුද්ගලයෙකුට හෝ එක කණ්ඩායමකට ලැබෙන අලූත් රාමුවක් හැදීම පරණ වැඩමල්ලට අලූත් වචන එල්ලීමක් පමණකි. ලෝකයේ අනෙක් රටවල සිදුවී ඇත්තේ කුමක්ද? ජාති, ආගම්, ආගම් හෝ වෙනත් බේධ තුරන් කරන ව්‍යුහයක් හැදුනේ කෙසේදැයි අප අතර සාකච්ඡාවක් තිබිය යුතුය. එම සාකච්ඡාවට පදනම් කරගෙන පාලන රාමුවක් හැදීම අලූත් ව්‍යවස්ථාව විය යුතු බව අවධාරණය කළ යුතුව තිබේ.

අරගල කරන මිනිසුන් මර්දනය කළ යුතු නැත. රටට අවශ්‍ය සමාජ විප්ලවයකට පෙලගැසෙන ජනි ජනයා මට්ටු කරන නීති වගන්ති නොවේ. කැළඹීමක් ඇතිකළ පිරිස ලෝකයේ රටවල් ඉදිරියට ගෙන ගොස් තිබේ. වෙනස් ආකාරයකට කල්පනා කළ පුද්ගලයෝ රටවල් අනගිභවනීය තත්ත්වයට පත්ව කර ඇත. ශ‍්‍රී ලංකාවට අවශ්‍ය එවැනි යුගයකට ඉඩකඩ හදන පිලිවෙලකි. නීති හදා රට මට්ටු කිරීම වෙනුවට රාමුවක් තුළ හිත් මුදාහරින ක‍්‍රමයක් යෝජනා කළ යුතුය.

ඉතිහාසයෙන් පාඩම් ඉගෙනගැනීම අවශ්‍යය. පැවැත්ම වෙනුවෙන් පරම්පරා ගණනක් වන්දි ගෙවා තිබේ. ජීවගුණයෙකින් පිරි මිනිසුන් බිලි වූ රටකි. විජාතික පාලකයන්ට විරුද්ධ සටන තුළ පමණක් නොව නිදහසට පසු පාලකයන්ට ද විරුද්ධව හඩ නැගූ ජන කොටස තුළ මතයක් තිබේ. එකී මත වලට හිමි ස්ථානය කුමක්ද? ව්‍යවස්ථාව යනු එක කොටසකට, එක පැලැන්තියකට, එකට ගමන් කරන කණ්ඩායමකට පමණක් බලය දෙන සැකිල්ලක් නොවේ. මුළු මහත් සමාජයකට බලය ලැබෙන නෛතික ව්‍යුහයකි. සමාජයක් එකතු කරන සජීවී බලවේගයකි. එවැනි ව්‍යවස්ථාවක් හදාගැනීම සම්බන්ධයෙන් සිහින දකින සමාජය ගැන කල්පනා කිරීම ඉතාම වැදගත්ය.

Older Entries