දූපත තුළ ප‍්‍රවාහනය ගොඩබිමින් පමණක්ම විය යුතු නැති බව

ප්‍රතිචාරයක් ලබාදෙන්න

Image2013.05.29- ලංකාදීප-මිලින්ද මොරගොඩ 

 

මාර්ග සංවර්ධනයෙහි කැපී පෙනෙන වෙනසක් පසුගිය කාලය තුළ රට තුළ සිදුව තිබේ. එහෙම නමුත් ගමනා ගමනය පහසු වී නැත. අගනුවර හා තදාසන්න ප‍්‍රදේශයක ප‍්‍රවාහනය යනු කාලය නාස්ති කරන සහ එයින් රටට අධික පිරිවැයක් දරන්නට සිදුව සිදුවන වෑයමකි. ඉතාම දියුණු තාක්ෂණය සහිත අති සුඛෝපභෝගී වාහන වලට පවා මහ පාරේ තදබදය මැද කළ හැකි යමක් නැත. මාර්ග පද්ධතිය ද, තවතවත් වාහන මහ මගට එකතුවීම ද වෙනුවට ශ‍්‍රී ලංකාවේ භාණ්ඩ හා මගී ප‍්‍රවාහනයේ පෙරැළිකාර වෙනසක් සිදුවිය යුතුය. එම වෙනස කරන්නට නම් දර්ශනයක් ඇතිව අලූත් ප‍්‍රතිපත්ති තින්දු වලට එළැඹිය යුතුය.

කුඩා ඳුපතක ජිවත්වන ලාංකිකයන් ප‍්‍රවාහනය වෙනුවෙන් ගොඩබිම විනා සාගරය සහ රට තුළ ඇති ගංගා පරිහරණය කරන්නේ නැත. එය ඓතිහාසික වරදකි. ලංකාව යටත් කර ගත් අධිරාජ්‍යවාදීහු ස්වදේශිකයන්ට මුහුදු තරනය කිරීමේ හැකියාවට ඉඩ නොදෙන්නට වග බලා ගත්හ. නාවික ශක්තිය තිබූ ඔවුහු කොළඹ, ගාල්ල සහ ත‍්‍රිකුණාමලය ඇතුළු වරාය තමන් සතු කර ගත්තේය. රට තුළින් පැන නැගෙන අරගලයකට විනා රට තුළ පාලනය ගෙන ගිය පාලකයන්ට මුහුදෙන් වටකර කරන ආක‍්‍රමණයක බියක් නොතිබිණ. භීතිය තුරන් කරන ලද්දේ ස්වදේශිකයන් ගේ නාවික ශක්තිය අහිමි කිරීමෙන්ය. ඳුපත වටා බලය තහවුරු කර ගත් යටත් විජිත පාලකයෝ රට තුළ තිබූ සම්ප‍්‍රදායික ඔරු පාරු සේවාව ද නව පණක් දී තමන් යටතට අත් පත් කර ගත්තේය. මහා මාර්ග තැනූ සහ දුම්රිය ද හඳුන්වා දුන් යටත් විජිත පාලකයෝ අලූතින් ඇල මාර්ග ඉදි කර තම වෙළඳ භාණ්ඩ පහසුවෙන් වරායට ප‍්‍රවාහනය කරන පසුබිම ද ඇති කළේය.

ගොඩ බිම ප‍්‍රවාහනය අර්බුදයක් ව ආර්ථිකයට බාධා පමුණුවන මෙකල රටට අහිමිව ගිය සාගරය හා ගංගා ආශ‍්‍රිත ප‍්‍රවාහනයට අලූතෙන් අවතීර්ණ විය හැකිය. එය කාර්යක්ෂම සහ ලාභදායී ප‍්‍රවාහන මාධ්‍යයක් වනු නිසැකය.

ශ‍්‍රී ලංකාව වටා පිහිටි වෙරළට සමීප ප‍්‍රධාන නගර වලට මගින් හා භාණ්ඩ ප‍්‍රවාහනයට මුහුද ප‍්‍රයෝජනයට ගත හැකිය. රට දෙකෙලවර යා කරන අධිවේගී මං ඇති කර එයට ගැලපෙන අලූත් වාහන ආනයනය කරන අතර දකුණේ සිට උතුරට මුහුදෙන් ගමන් කරන්නට ඉඩ පහසුව ඇති කිරීම අවශ්‍යතාවයකි. කොළඹ සිට ගාල්ලට මුහුදෙන් යාත‍්‍රා සේවාවක් ඇති කිරීම මගීන්ට පැරණි අත්දැකීම් අලූත් ආකාරයට විඳ ගැනීමක් වනු ඇත. යටත්ව සිටි යුගයේ ආකල්ප වලින් මිදී රට පුරා ගොඩබිමෙන් පමණක් නොව සාගරය හා ගංගා ඔස්සේ ද සැරිසරන්නට හැකි ආකාරයට අවකාශය පුළුල් කිරීමකි. තීරු බදු ගෙවා සුඛෝපභෝගී රියක් ආනයනය කර මහ මගට ඉන්ධන ද, කාලය ද නාස්ති කරනුවාට වඩා අඩු වියදමකින් සුඛෝපභෝගී බෝට්ටුවකින් ප‍්‍රධාන නගර කරා ගමන් කළ හැකි බව අලූත් ආකල්ප ඇති ආයෝජකයන්ට පෙනී යා යුතුය. තායිලන්තයේ බැංකොක් නුවර ප‍්‍රධාන ගංගා ආශ‍්‍රිතව පවත්වාගෙන යන මගී හා භාණ්ඩ ප‍්‍රවාහන බෝට්ටු සේවා ක‍්‍රම අධ්‍යයනය කරන විට එය වටා ඇති අලූත් ආර්ථිකයේ තරම අවබෝධ කර ගත හැකිය. ගංගා ආශි‍්‍රතව ජීවත්වන කර්මාන්තකරුවන් හා ගොවියන් තම නිපැයුම් බෝට්ටුවකින් ගෙනැවිත් එහිම කරන පාවෙන බෝට්ටු වෙළඳාම එරට සංචාරක ව්‍යාපාරයට ද වාසියක් වී තිබේ.

රට පුරා ඇති ප‍්‍රධාන ගංගා සහ ඇල මාර්ග වල තත්ත්වය සොයා බලා ඒවායෙහි මගීන් හා භාණ්ඩ ප‍්‍රවාහනයට තෝරා ගත් ආයෝජකයන්ට අවසරදීම  ආණ්ඩුවට හෝ පලාත් පාලන ආයතන වලට කළ හැකිය. දැනටත් සුළු වශයෙන් නොගැඹුරු මුහුදු ගමන් වශයෙන් සංචාරකයන්ට සීමා වී ඇති බෝට්ටු සේවා රට වටා මුහුදෙන් ගමන් බිමන් කළ හැකි සේවා ලෙස වැඩි දියුණු කරන්නට හැකියාව තිබේ. එයින් පරිසර හිතකාමී ආස්වාද ජනක අලූත් ආර්ථිකයක් රටට බිහිවනු නිසැකය. අධිවේගී මාර්ග සංස්කෘතිකයකට හුරුවෙමින් සිටින ලාංකේය ප‍්‍රජාවට එයට විකල්ප රටට අනන්‍ය අලූත් තලයකට කැඳවන තීන්දු ගැනීමේ වගකීමක් ප‍්‍රතිපත්ති සම්පාදකයන්ට සතුව ඇත.

Advertisements

කාර්යක්ෂමතාවය වෙනුවෙන් විදුලියට ගෙවන මිල අපරාධයක්ද ?

ප්‍රතිචාරයක් ලබාදෙන්න

Image2013.05.22-ලංකාදීප-මිලින්ද මොරගොඩ

විදුලිය ගාස්තු වෙනුවෙන් මහජනතාව ගෙවන මිල සම්බන්ධව පැන නැගුන විවාදය තවමත් අවසන්ව නැත. දේශපාලන පක්ෂ, වෘත්තීය සමිති විදුලිය ගාස්තු වැඩි කිරීමට එරෙහිව සටන් මගකය. විදුලිය බිල ගෙවා ගැනීමට නොහැකිව ජනතාව පාරට බැස සටන් කරන අවස්ථාවක වායු සමීකරණ යන්ත‍්‍ර භාවිතා කිරීමෙහි ප‍්‍රයෝජන ගැන කතා කිරීම අවශ්‍යම නැති මාතෘකාවකි.

වායු සමීකරණය ගෙවී යන සියවසේ වැදගත් මෙවලම් අතර එකක් බව සිංගප්පූරුවේ හිටපු අගමැති ලී ක්වාන් යූ මහතා ප‍්‍රකාශ කරයි. එය වැඩ පහසු කරන අතර කාර්යක්ෂමතාව නංවන බව ඔහුගේ අදහසයි. සාමාන්‍ය පරිසර තත්ත්ව යටතේ වැඩකරන කාර්යාලයකට වඩා ඉක්මනින් හා ඵලදායීව වායු සමනය කරන ලද කාර්යාලයක හෝ කම්හලක වැඩ කළ හැකි අතර එය තරගකාරී ආර්ථික රටාව තුළ ඉදිරියට ගමන් කරන්නට විශාල ප‍්‍රයෝජනයකි. කෘෂිකර්මය පවා පරිසර තත්ත්ව පාලනය කර වැඩි අස්වැන්නක් ලබන වකවානුවකි. සිංගප්පූරුව දියුණු කරන වකවානුවේ දී එරට අගමැතිවරයාගේ අත් දැක ඇති කරුණ විමසිල්ලෙන් අධ්‍යයනය කළ යුතුය.

දැඩි හිරු රුස් මැද වැඩ කිරීම අපහසුය. එය ඇත්තකි. උණුසුම් සහිත දිනයක කරන රාජකාරි මානසික තෘප්තියක් රහිතව සිදුවෙයි. එහි ඇත්තේ විඩාවකි. විවේකය වෙනුවෙන් සංචාරක හෝටල වලට පමණක් වෙන්ව තිබුණ වායු සමීකරණය සහ හො`ද කාර්යාල සුවපහසුව කම්හලට හා වැඩබිමට ද පැමිණ ඇත. වෙහෙසකින් තොරව වැඩ කරන්නට ඉඩ ලැබුණේ ඒ අනුවය. මුල් කාලයේ දී  බලශක්තිය වෙනුවෙන් ගෙවූ මුදල බරපතල එකක් නොවේ. සාමාන්‍ය මිලක් ගෙවා ලබා ගන්නා විදුලිය සහිත වායු සමීකරණ පද්ධතියකින් යුත් කම්හලක සිදුවන නිෂ්පාදනය ආර්ථික වාසිදායක එකක් විය. නමුත් බලශක්තියට ගෙවන මිල ඉහළ යමින් තිබේ. ලෝකයේ සෑම රටක්ම අඩු වියදමකින් විදුලිය නිපදවිය හැකි ආකාරය ගැන වෙහෙසවෙයි. එසේ තිබිය දී වැඩි මිලක් ගෙවමින් වායු සමීකරණ යන්ත‍්‍ර භාවිතා කරන්නට ද එයින් නිපදවන දෙයට වායු සමීකරණ යන්ත‍්‍ර භාවිතයට ගෙවන විදුලියේ මිල ද එකතු වන්නට පටන්ගෙන තිබේ. කම්හලේ හා කාර්යාලයේ කාර්යක්ෂමතාව බරපතල ප‍්‍රශ්නයකට මුහුණ පා ඇත. එම ප‍්‍රශ්නය තවත් උග‍්‍ර එකක් බවට පත්වන්නේ වායුසමනය කර ඇති කාර්යාලයක හෝ කම්හලක කරන වැඩි ප‍්‍රමාණය සීමා සහිත වන අවස්ථාවකය.

රටක ජාතික නිෂ්පාදනයට ඵලදායීතාව වැදගත්ය. ආසියානු කලාපයේ රටවල පුරවැසියන් ගේ ක‍්‍රියාකාරීත්වය සලකන ආසියානු ඵලදායීතා දර්ශකය අනුව මැලේසියානු වැසියෙකුගේ දිනක ඵලදායීතාව ඇමරිකානු ඩොලර් 15 කි. සිංගප්පූරුවේ දෛනික ඵලදායීතාවය ඇමරිකානු ඩොලර් 14.2 කි. දකුණු කොරියාවේ එය ඇමරිකානු ඩොලර් 26.3 ක් වන අතර ශ‍්‍රී ලංකාවේ ඵලදායීතාවය ඉතාමත් අඩුය. එය ඇමරිකානු ඩොලර් 6-7 අතර අගයක් ගනී.

වායු සමීකරණය කරන ලද කාර්යාල හා කම්හල් පද්ධතිය සහිතව අත් පත් කරගෙන ඇති ශ‍්‍රී ලංකාවේ පවතින මෙම ඵලදායීතාවය ප‍්‍රශ්න කළ යුතුය. වැඩියෙන් වැඩ කරන දිරියෙන් ඉදිරියට යන්නට රටට ඇති හැකියාවට බාධා පැනවී ඇත්තේ කොතැනින්ද? වායුසමීකරණය වැඩ කරන්නට හො ඳ පසුබිම සකසන්නේ නම් එය පණ ගන්නවන්නට වැය වන විදුලිය රටට දැරිය හැකි බරක් ද? ඉහළම විදුලිය බිලක් ගෙවමින් සහ එය උපයෝගී කරගෙන වායු සමනය කර ඇති වැඩ බිමකින් රටට ලැබෙන ආර්ථික ඵල ප‍්‍රයෝජන ගැන නැවත නැවතත් සිතා බැලිය යුතු මොහොතක් උදා වී තිබේ.

 

ආණ්ඩු කරන මැති ඇමතිවරු ජාත්‍යන්තරයෙන් තෝරා ගන්නා දිනය

ප්‍රතිචාරයක් ලබාදෙන්න

2013.05.15- ලංකාදීප- මිලින්ද මොරගොඩ

 

Image

ප‍්‍රජාතන්ත‍්‍රවාදී පාලන ක‍්‍රමයේ දියුණු වන මුහුණුවරට අනුව එය දිනෙන් දින නොයෙක් හැඩතල ගනී. එහි අලූත්ම ප‍්‍රවනතාව ලෝකය පුරා  ඕනෑම තැනක ජීවත්වන ඡන්ද දායකයෙකුට ස්වකීය මවුබිමේ නියෝජන කර ඡන්දය ඉල්ලන්නට අවස්ථාව ලැබෙන අලූත් සංශෝධනයකි. අදහසක් වශයෙන් තිබුණ මෙම සංකල්පය ක‍්‍රියාවට නැගෙමින් තිබේ. එහි පළමු පියවර තබා ඇත්තේ ප‍්‍රංශයයි. ප‍්‍රංශයේ පුරවැසියෝ ලෝකයේ නොයෙක් රටවල ජීවත් වෙති. පුරවැසි භාවය අත් හැර නැති ප‍්‍රංශ වැසියන්ට තමන්ගේ මවුබිමේ අයිතිවාසිකම් වෙනුවෙන් හඬක් නගන්නට අයිතියක් ඇති බව දීර්ඝ කාලයක් විවිධ සංවාදයන්ට බඳුන්ව තිබුණ මාතෘකාවකි. අවසානයේ දී ලෝකයේ නොයෙක් ප‍්‍රදේශ ජාත්‍යන්තර මැතිවරණ කොට්ඨාශ බවට පත් කර තිබේ. ඒවායේ ජීවත්වන ප‍්‍රංශ පුරවැසියන්ගේ ඡන්දයෙන් එරට පාර්ලිමේන්තුවට රටින් බැහැර මහජන නියෝජිතයන් පත් කරගැනීමට හැකිවන ආකාරයට ක‍්‍රියාවට හරවා ඇත.

දත්ත වලට අනුව මිලියනයකට වැඩි ප‍්‍රංශ ජාතිකයන් පිරිසක් ලෝකයේ නොයෙක් රටවල ජීවත් වෙති. මෙම පිරිස වෙනුවෙන් ජාත්‍යන්තරව විහිදුන මන්ත‍්‍රී ආසන එකොලහක් නම් කිරීමට ප‍්‍රංශ ආණ්ඩුව තීරණය කර තිබේ. එයින් විශාලතම මැතිවරණ කොට්ඨාශය යුරෝපීය රටවල ජීවත්වන ප‍්‍රංශ පුරවැසියන් ආවරණය කරන බල ප‍්‍රදේශය බව සඳහන්ය. මැතිවරණයේ දී මෙම කොට්ඨාශ නියෝජනය කරන අපේක්ෂකයන් එම විදෙස්ගත පුරවැසියන්ගේ ඡන්දයෙන් තෝරා ගැනීමෙන් පසු පාර්ලිමේන්තු රුස්වීම් සඳහා ප‍්‍රංශයට පැමිණ නිසි ආකාරයට කි‍්‍රයාකරන පුළුල් වගකීමක් පැවරේ.

ශ‍්‍රි ලංකාවේ ප‍්‍රජාතන්ත‍්‍රවාදයේ අනාගත පැවැත්ම ගැන ද වත්මනෙහි විවාදයකි. බලය විමධ්‍යගත කිරීම එහි එක් අවශ්‍යතාවක් බව ප‍්‍රකාශ වෙයි. පවතින ව්‍යවස්ථාව වෙනස් කිරිම ගැන ද නොයෙක් අදහස් පැන නැගී තිබේ. ප‍්‍රජාතන්ත‍්‍රවාදී ලක්ෂණ රාජ්‍ය පාලනයට නතු කරගත් ආසියාවේ රටවල් අතර ශ‍්‍රී ලංකාවට කීර්තිමත් ඉතිහාසයක් ඇත. මෙම ඉතිහාසය තහවුරු වන ආකාරය ගැන අවධානය යොමු කිරීම කාලීන අවශ්‍යතාවයකි. එතෙර ජීවත්වන ප‍්‍රංශ පුරවැසියන් මිලියනයක් වෙනුවෙන් පාර්ලිමේන්තුව නියෝජනය ගැන කතා කරන අතර ශ‍්‍රී ලංකාවේ මිලියන දෙකක පිරිසක් විදේශගතව සිටී. මිලියන විස්සකට මදක් වැඩි ජනගහනයෙන් සෑමෙන පිරිසක් බව බැලූ බැල්මට පෙනේ. මෙකී ලාංකිකයන් එක අවුරුද්දකට රටට එවන ධනය ඇමරිකානු ඩොලර් බිලියන හයහමාර ඉක්මවයි. ශ‍්‍රී ලංකාවේ විදේශ විනිමය උපයන මාර්ග අතර පළමු තැනට පැමිණ ඇත්තේ විදේශගත ශ‍්‍රී ලාංකිකයන් එවන විනිමය බව පැහැදිලිය. රටට වැඩදායක ආකාරයට වෙහෙස මහන්සියෙන් ශ‍්‍රමය කැපකරන ජනතාව ගැන සමාන අවධානයක් දැක්වීම අද තාක්ෂණික යුගයේ පහසුවෙන් කළ හැකිය. විදෙස්ගතව සිටින ලාංකික පුරවැසියන් වෙනුවෙන් ජාත්‍යන්තරව වෙන් කරන මැතිවරණ කොට්ඨාශ කෙසේ වෙතත් තාවකාලිකව රටින් බැහැරව සිටින මෙම පුරවැසියන්ට ඡන්දය ප‍්‍රකාශ කිරීමේ අයිතිය තහවුරු කිරීම ඉතාම වැදගත්ය. මැතිවරණයක් පවත්වන අවස්ථාවේ රටින් බැහැරව සිටින පුරවැසියන්ට ඡන්දය පළ කරන්නට ඇතැම් රටවල් තානාපති කාර්යාල හරහා දැනටත් ඉඩ දී තිබේ. ප‍්‍රංශය තරමට ම නැතත් පුරවැසියන්ගේ අයිතිය තහවුරු කරන ආකාරයට ඡන්දය පාවිච්චි කරන්නට විදේශගත ශ‍්‍රී ලාංකිකයන්ට හැකියාව ලැබේනම් වැදගත්ය. ප‍්‍රජාතන්ත‍්‍රවාදයේ අයිතිය ගැන පැන නැගෙන මෙම නව ප‍්‍රවනතා සමාජය තුළ සංවාදයට බඳුන් විය යුතුය.

 

 

 

 

වැලිපිල්ලේ ලියූ හුරුවෙන් අන්තර් ජාල අධ්‍යාපනයට පදනමක් – මිලින්ද මොරගොඩ

ප්‍රතිචාරයක් ලබාදෙන්න

08/05/2013 – ලංකාදීප
milinda-prashna2
වැලිපිල්ලේ ලියා අකුරු ඉගෙනගත් මතකය ඇති පැරණි පරම්පරාවේ ඇතැමෙකු අදටත් අප අතර සිටිනවා විය හැකිය. පුස් කොළයෙන්, පත පොතින් පසු පරිගණක ලේඛනය දක්වා දැනුම ලබන ආකාරය මේ වන විට විකාශය වී තිබේ. බටහිරට යටත් වන්නට කලින් අධ්‍යාපනයේ කේන්ද්‍රස්ථානය වූයේ පන්සලයි. අනතුරුව මිශනාරී අධාපන ක‍්‍රමය ව්‍යාප්ත විය. පාසල මූලික කරගත් අධ්‍යාපන ක‍්‍රමය මෙරට ඇති කළේය. යටත් විජිත භාවයෙන් මිදෙන විට යම් සම්මත අධ්‍යාපන රටාවක් රටට උරුම වී තිබිණ. නිදහස් අධ්‍යාපනය හා අධ්‍යාපනය ලැබීමට ශ‍්‍රී ලංකාවේ ව්‍යවස්ථාවෙන් ඇති කර තිබෙන ප‍්‍රතිපාදන අවධානයට ලක්විය යුතුය. නමුත් වර්තමානයේ ශ‍්‍රී ලංකාවේ අධ්‍යාපන ක්ෂේත‍්‍රය නොයෙකුත් පරිවර්තන වලට ලක්වෙමින් තිබේ. අධ්‍යාපන ක‍්‍රමය නිදහස් බව ප‍්‍රකාශ වන නමදු එහි ඇත්තේ අප‍්‍රමාණ තරගයකි.
ශී‍්‍ර ලංකාවේ ඉගෙනුම ලබන ආකාරය සාකච්ඡුා කළ යුතු නමුත් අධ්‍යාපනයේ නැවුම් පැති ජාත්‍යන්තරය තුළ දිගහැරෙමින් තිබේ. ඉගෙනුම ලබන්නට තව දුරටත් පාසලට හෝ විශ්ව විද්‍යාලයට යා යුතු නැත. ලෝකයේ ප‍්‍රධාන පෙලේ විශ්ව විද්‍යාල සිය පාඨමාලා අන්තර් ජාලයට මුදාහැර තිබේ. එම විශ්ව විද්‍යාලයේ දේශන ශාලවේ දී සිසුන්ට කරන ඉගැන්වීම අන්තර් ජාලයෙන් ඕනෑම කොනෙකුට නැරඹිය හැකිය. තෝරාගත් පාඨමාලා වලට නොමිලේ ලියාපදිංචි විය හැකි අතර දේශන වලට අන්තර් ජාලයෙන් සම්බන්ධවී එහි විහාගයට ඉදිරිපත් වන්නට හැකියාව ඇත. එය විශාල විප්ලවයක ඇරඹුමයි. මෙම නූතන අධ්‍යාපන රටාවට අනුව විශ්ව විද්‍යාලයේ ඉඩ ප‍්‍රමාණය අනුව බදවා ගන්නා සිසු සිසුවියන් ප‍්‍රමාණය සීමා නොවේ. විශ්ව විද්‍යාලයක තිබුණ භෞතික සිමාව ඉක්මවා ලොව පුරා වෙසෙන සුදුසුකම් ඇති දරුවන්ට ඉඩ විවර කරන ලෙස එහි පද්ධතිය පුළුල් කරන්නට තොරතුරු තාක්ෂණය ඉවහල් වී ඇත.
අන්තර් ජාලයෙන් අධ්‍යාපනය ලැබීමට ඇති අවස්ථාව ප‍්‍රයෝජනයට ගැනීමට සුදුසු පරිසරයක් රට තුළ ඇතිවිම අවශ්‍යතාවයකි. එවැනි විවෘතවීමක් සමග මතුවිය හැකි අභියෝග ගැන ද වර්තමානයේ සංවාදයක් ඇතිවී තිබේ. ලෝකයේ ප‍්‍රධාන විහ්ව විද්‍යාල වල උපාධිය අන්තර් ජාලයෙන් නොමිලේ හෝ සුළු ගාස්තුවක් ගෙවා ලබාගත හැකි තැනකට අවතීර්ණවන විට උපාධිය හෝ එයටත් ඉහළට ඉගෙනගෙන සහතික ඇති පිරිස අති විශාල අන්දමින් වර්ධනය වන්නට ඉඩ තිබේ. අධ්‍යාපනයේ සුදුසුකම් ඇති පිරිස වැඩිවන විට එයට ඇති ඉහළ පිළිගැනීම ප‍්‍රශ්නයක් විය හැකිය. අනෙක් අතට අවස්ථාව බහුල වන විට ඉගෙන ගැනීමට ඇති තරගය අඩුවී උනන්දුව ද අවම විය හැකිය. ඕනෑම අවස්ථාවක පහසුවෙන් ලියා පදිංචි වී උසස් අධ්‍යාපනය ලැබිය හැකි නම් එයට අවශ්‍ය වන්නේ උවමනාව වනා අනෙකක් නොවේ. නීති පනවා ඉගෙන ගන්නට ඇති පෙළඹවීම අනවශ්‍යවන නුදුරු දිනයක ඉහළට ඉගෙන ගන්නට ඇති කැමැත්ත ද අඩු විය හැකිය. එය තවත් අ`දුරු පැත්තකි. අන්තර් ජාලයෙන් නොමිලේ අධ්‍යාපනය සැපයෙන විට එයට කැමැත්තෙන් එකතුවන පිරිස හා සමානව අධ්‍යාපනය ඉහළටම ඉගෙනීමට ස්ව උනන්දුවක් ඇති නොවන සමාජ ද බිහිවනු නියතය.
විනයානුකූල රාමුවක් අනුව ඉගෙනගැනිම හා එයට ස්වයං කැපවීම යන්න අනාගත අධ්‍යාපනයේ අවශ්‍යතාවයකි. තවත් සලකා බැලිය යුතු පැත්තක් තිබේ. අන්තර් ජාලය ඔස්සේ දැනුම ප‍්‍රවාහයක් සේ ගලා යන විට අවුරුදු කීයක් ඉගෙන ගෙන කොතරම් විභාග සමත්වී ඇත් ද යන තක්සේරුව පරයා කොතරම් දැනුමකින් සන්නද්ධ ද යන ගිනිය හැකි මිනුම් ඒකකයක් නුදුරු වකවානුවක දී සමාජයට ඉදිරිපත්වනු ඇතැයි සිතිය හැකිය. දැනුම පදනම කරගත් අධ්‍යාපන ක‍්‍රමයට ජාත්‍යන්තරය ඇතුළු වන වකවානුවක එයට එකගව මුහුණ දෙන්නට අවශ්‍ය ධෛර්යය හා අවශ්‍ය සම්පත් සම්බන්ධව තක්සේරුවකට ගමන් කිරීම අද අපට ඇති පුළුල් වගකීමකි. ඉදිරි කාලයේ දී කුුඩා දරුවාගේ සිට දෙමව්පියන් දක්වා ආකල්ප වෙනසක් ඇති කරගත යුතු වනු ඇත.

අන්තිම සටන හමුවේ බාහු බලය පරදවා නැගෙන බුද්ධියේ බලය

එක් ප්‍රතිචාරයක්

milinda-prashna2

 

01/05/2013 – ලංකාදීපමිලින්ද මොරගොඩ

මැයි දිනය රක්ත වර්ණයෙන් සංකේතවත්ය. රුධිරය හෙලා දිනා ගත් අයිතිය සදා සිහිපත් කරයි. වහලූන් සේ ශ‍්‍රමය කැපකරමින් නිෂ්පාදනය කරන්නට වැඩකරන ජනතාවට සිදුවී තිබිණ. නිෂ්පාදනයට හෙළන දහඩිය වෙනුවෙන් හිමිවූයේ දිවි පන නල සරි කරගන්නට තරම් සුළු වේතනයකි. පාලකයන්ගේ අනේක විධ නීති සහ දැඩි පාලනය ඉවසාගත නොහැකිවූ කම්කරුවෝ වීදි බැස සිය අයිතිය වෙනුවෙන් සටන් කළහ. වැඩකරන පැය ගණන පමණක් නොව ශ‍්‍රමයට හිමි ගරුත්වය ගැන ද පළමුවරට සාකච්ඡාවූ ආකාරය මැයි දිනය සමරමින් අදටත් සිහිපත් කරයි.

යුගයෙන් යුගය වෙනස් වී තිබේ. අයිතීන් දිනා ගැනීම සම්බන්ධව මැයි දිනය දක්වන පණිවුඩය අදට වලංගු කර ගැනීම වැඩකරන ජනතාවගේ අයිතියකි. පාලකයන් පරදවන ‘‘අන්තිම සටනට සැරසියව්’’ යන්න තව දුරටත් සාධාරණ සටන් පාඨයක් නොවේ. මැයි දින පෙළපාලියට එකතු විය යුතු නමුත් සටන ඇත්තේ කොතැනදැයි විමසා බැලීම නූතන තාක්ෂණ යුගයේ වැඩකරන ජනතාව අවබෝධකර ගත යුතු ඉතාම වැදගත් පණිවුඩයයි.

වැඩ බිම වෙනස් වී තිබේ. වැඩකරන ආකාරය ද වෙනස්ය. නූතන වැඩ බිම ජාත්‍යන්තර සහතික වලට අනුකූලය. එහි පරිසරය ආරක්ෂා කිරීමට අදාල ජාත්‍යන්තර විධිවිධාන අනුගමනය කරයි. සේවක සුබසාධනය ගැන විවෘතව දැක බලාගන්නට ඉඩ දෙයි. පරිසරට හා සේවක අයිතිය ගැන නොතකා ක‍්‍රියාකරන නිෂ්පාදන මිලදී ගැනීමට පාරිභෝගිකයන් පවා සූදානම් නැත. පාරිභෝගිකයන් දැනුවත් කරන්නට තොරතුරු තාක්ෂණය ඉදිරියට පැමිණ තිබේ. කාය ශක්තිය තව දුරටත් ඉතාම ප‍්‍රයෝජනවත් නැත. කම්හලේ බර වැඩට යන්ත‍්‍ර සූත‍්‍ර එකතු වී තිබේ. මිනිසුන් දහසක් කරන දෙය සංකීර්ණ මෙවලම් සහිත යන්ත‍්‍රයකින් මෙහෙයවන්නට එක පුද්ගලයෙකුට හැකියාව ඇත. ඵලදායීතාව හා කාර්යක්ෂමතාව සම්බන්ධව නොයෙක් ප‍්‍රතිපත්ති ඉදිරියට පැමිණ ඇත. බොහොමයක් කම්හල් යාන්ත‍්‍රීකරණයවී ඇති අතර ක‍්‍රමයෙන් රොබෝ තාක්ෂණය ද යහමින් ප‍්‍රයෝජනයට ගැනෙයි. කය වෙහෙසා වැඩකරන ශ‍්‍රම බලකාය වෙනුවට බුද්ධියෙන් වැඩ කරන්නට හැකියාව ඇති දැනුම ඇති ශ‍්‍රමයට කම්හලේ දොරටු විවර වෙමින් තිබේ. වැඩිම ශ‍්‍රමිකයන් පිරිසක් යොදවා වැඩි වියදමකින් නිපදවීම වෙනුවට අඩුම ශ‍්‍රම පිරිවැයකින් ඉහළම නිපැයුමක් කරගන්නට හැකිවන ආකාරයට සැපයුම් චක‍්‍රය කළමණාකරනය වී තිබේ.

තාක්ෂණය අද වැඩකරන ජනතාවට ඇති අභියෝගයයි. තාක්ෂණයට මුහු විය නොහැකි ශ‍්‍රමය අනාගතයේ දී ප‍්‍රයෝජනවත් නැති තැනට පත්වන බව පෙනේ. ලෝකයේ වැඩකරන ජනතාවගේ ගමන බාහු බලය ඉක්මවා දැනුම ඇති ශ‍්‍රම බලකායක අවශ්‍යතාව දක්වා පරිවර්තනය වනු ඇත. එය දැන් ක‍්‍රමයෙන් සිදුවෙමින් පවතින බව පැහැදිලිය. ගොවිබිම, කම්හල නවීකරණය වී තිබේ. එතැන ප‍්‍රයෝජනයට ගත යුතු යන්ත‍්‍ර සූත‍්‍ර උපයෝගී කර ගත්තේ නැති නම් නිපදවන දෙයට වැය වන වියදම අධිකය. නිපැයුමට වඩා දියුණුවී ඇත්තේ සේවා ආර්ථිකයයි. අවුරුදු සිය ගණනක් ශ‍්‍රී ලංකාවේ අක්කර දස දහස් ගණනක තේ වගා කරයි. එහි නියැලෙන ශ‍්‍රම බලකාය ලක්ෂ දහයක් පමණ වෙයි. රටට එයින් ලැබෙන්නේ ඇමරිකාුන ඩොලර් බිලියන 1.4 ක් පමණ විනිමය ප‍්‍රමාණයකි. මෙවැනි ඉඩම් සහ ශ‍්‍රම ආයෝජනයකින් ඉපැයිය හැකි ධනයට වඩා ධනයක් උපයන නවීන ව්‍යවසාය ලෝකය පුරා පැතිරෙමින් තිබේ. දැනුම පදනම් කරගත් එම යුගයට ඇතුළුවීම ශ‍්‍රී ලාංකිකයන්ගේ මැයි දිනයේ තේමාව විය යුතුය. අන්තිම සටන ධනපතියන් පැරදවීම නොවේ. පාලකයන් අතුගා දැමීම ද නොවේ. නිසි ආයෝජනයක් මගින් රටට අවශ්‍ය අලූත් සේවා ආර්ථිකය අනාවරණය කර ගැනීමය. දැනුමින් පිරි ශ‍්‍රම බලකායක් ගොඩනගන විප්ලවය වෙනුවෙන් කම්කරු දිනයේ කතිකාව ඇවිලවීම අද අප සියලූ දෙනාගේ වගකීමයි.