එළිසබෙත් රැජිනගේ එදාටත් අදටත් ගැළපෙන ආදර්ශ පාධ්ය

ප්‍රතිචාරයක් ලබාදෙන්න

2021/07/14 – ලංකාදීප

ප‍්‍රජාතන්ත‍්‍රවාදය උසස් පාලන ක‍්‍රමයකි. බි‍්‍රතාන්‍ය එහි සංකේතයකි. යටත් කරගෙන සිටි රටවලට ප‍්‍රජාතන්ත‍්‍රවාදී ගුණාංග හදුන්වා දුන් බි‍්‍රතාන්‍ය පාලකයෝ එය ලෝකය පුරා ව්‍යාප්ත කළහ. කාලයත් සමග ප‍්‍රජාතන්ත‍්‍රවාදයෙහි නවීකරණයක් සිදුවී තිබේ. ජනතාවගේ අයිතිවාසිකම් ආරක්ෂා කරන සහ යුක්තිගරුක පාලන ක‍්‍රමයක් සදහා විවිධ අණ පණත් එකතු වී ඇත.

එළිසෙබත් රැජන අනුගමනය කරන නිල නොවන ආදර්ශ පාඨයක් තිබේ. කිසිම අවස්ථාවක පැමිණිලි කළ යුතු නැති අතර පැහැදිලි කිරීම ද කිසිසේත් අවශ්‍ය නැති බව ( Never complain Never Explain) එහි කියැවෙයි. ලෝක ඉතිහාසයේ ඉහළින්ම නම සටහන් වන ජගත් නායකයන් අතලොස්ස අතර එතුමිය විශිෂ්ඨ ගෞරවයක් හිමිකරගෙන ඇත. දැනට ලෝකය පාලනය කරන සියළුම නායකයෝ බි‍්‍රතාන්‍ය රැජන හමුවී ඇති අතර විවිධ ජාත්‍යන්තර ප‍්‍රශ්න සහ අර්බුද ගැන නොයෙක් පැති වලින් සාකච්ඡා කර තිබේ. රැජන කිසිම අවස්ථාවක ඇය අනුගමනය කරන පැමිණිලි නොකරන හා පැහැදිලි නොකරන ප‍්‍රතිපත්තිය වෙනස් කර නැත. එය විද්වතුන් ගේ නිරීක්ෂණයට ලක් වී ඇති වැදගත් කාරණයකි.

මෙම පිලිවෙත එක් දහස් අටසිය ගණන් වල බි‍්‍රතාන්‍ය අගමැතිවරයෙකු වූ බෙන්ජමින් බි‍්‍රශ‍්‍රායලේ ගෙන් ආරම්භ වූ එකක් බව ඉතිහාසය දක්වයි. හෙතෙම සාහිත්‍යධරයෙකු වූ අතර දේශපාලනඥයෙකු ද විය. ඔහු සිය කාර්යයන් හි දී කිසිම පැමිණිල්ලක් නොකරන සහ හේතු පැහැදිලි නොකරන ප‍්‍රඥප්තියක් අනුමනය කර ඇත. වත්මන් රැජින ගේ මෑණියන් ද එකල මෙම පිලිවෙත බි‍්‍රතාන්‍ය රාජකීය පවුලේ කටයුතු වල දී ක‍්‍රියාවට නංවන ලද බව දැක්වෙයි. සියවස් ගණනක් එහි සාර්ථිකත්වයෙන් අත්දැකීම් ලබා ගෙන තිබේ. ප‍්‍රජාතන්ත‍්‍රවාදය විශිෂ්ඨ පාලන ක‍්‍රමයකි. නායකත්ව සතුව ආවේනික පිලිවෙත් තිබේ. ඒවායේ සංකලනයක් තුළින් සර්ව සාධාරණත්වය ඇති කෙරේ.

ජන ජීවිතයේ දී එදිනෙදා අපට මුහුණ දෙන්නට සිදුවන දහසකුත් එකක් ප‍්‍රශ්න ඇත. ඒවා ගැන පැමිණිලි කරමින් මැසිවිලි නගමින් කල් හරින්නට අවස්ථාවක් නැත. ඉතාම වේගයෙන් අවස්ථා උදාවන අතර ඒවා මග හැරෙන තරම ද එපමණටම වේගවත්ය. ඉතාම සංකීර්ණ සමාජ ව්‍යුහයකි. එවැනි පරිසරයක් තුළ දෙමව්පියන් වශයෙන් තීරණ ගැනීමට සිදුවෙයි. ගන්නා තීරණ වල වාසි හා අවාසි තිබේ. තීරණ දහයක් තුළ දෙක තුනක් වැරදෙන්නට බැරි නැත. මැසිවිලි වලින් හෝ හේතු පැහැදිලි කිරීමෙන් පලක් තිබේද? අර්බුද එල්ලවන අවස්ථා තිබේ. තියුණු කර්කශ විවේචන මතුවනු ඇත. වෙරළ වෙත එන රැළි හා සමාන කළ හැකිය.  වෙරළ තීරය වෙත පැමිණ හැපී තුනී වී පෙණ විසිරී සන්සුන්ව ආපසු මහා සාගරය කරා ඇදි යයි. ප‍්‍රචණ්ඩ රළ පහරක වගක් හෝ වෙරළ තීරයෙහි ඉතිරි කරන්නේ නැත.

බෙන්ජමින් බි‍්‍රශ‍්‍රායලේ අගමැතිවරයාට වරක් ප‍්‍රකාශ කර ඇති පරිදි ඔබ ඉදිරියේ සිටින කෙනෙකුට ඔහු ගැන කතා කරන්න. ඔහු පැය ගණනක් අසා සිටින්නට කැමැතිය. නමුත් මිතුරෙකුට පවා මැසිවිලි කිරීමෙන් හෝ පැහැදිලි කිරීමෙන් කිසිම පලක් නැත. බෙන්ජමින් අගමැතිවරයා ස්ථිර වශයෙන්ම කියා සිටියේ එක්තරා සීමාවක දී එම මිත‍්‍රයා පවා අහගෙන ඉන්නේ නැති බවය.

ලෝක ඉතිහාසයෙන් පාඩම් ඉගෙනගත හැකිය. අත්දැකීම් සටහන් කර තිබේ. වර්තමානයේ අප ගේ පැවැත්ම තුළ අතීතයේ උගත් පාඩම් කිසිසේත් අමතක කළ යුතු නැත. ඉලක්කයකට ගමන් කිරීම නායකත්ව ගුණාංගයකි. අප සියළු දෙනා ජන සමාජය තුළ එක්තරා ආකාරයක නායකයෝය. අප සියළු දෙනාටම වගකීමක් තිබේ. මැසිවිලි නගන්නට අවශ්‍යතාවයක් නැත. පැමිණිලි කළ යුතු ඇයි? පැහැදිලි කිරීමෙන් පවා ඒත්තු ගැන්විය හැකි සීමාවක් තිබේ. අරමුණ සාක්ෂාත් කරගැනීම උදෙසා නිදහස්, නිවහල්ව ක‍්‍රියා කිරීම හැර අනෙක් පිලිවෙලක ප‍්‍රතිඵල සීමිතය.

රාජකාරියට කාර්යාලයට වාර්තාකිරීම අවශ්‍යම ද?

ප්‍රතිචාරයක් ලබාදෙන්න

2020/07/07 – ලංකාදීප

එදිනෙදා කටයුතු තාක්ෂණය විසින් පහසු කර තිබේ. ජන සමාජය අලූත් යුගයකට ඇතුළුවීම පරිවර්තනයට හේතුවකි. තරුණ ප‍්‍රජාව සෑහෙන ප‍්‍රමාණයකින් තොරතුරු තාක්ෂණයට සම්බන්ධ වී ඇති බව සදහන් කළ යුතුය. සෑම රටකම පාහේ තාක්ෂණ භාවිතාව දෙගුණ තෙගුණ වී තිබේ. සංවර්ධනය ඉක්මන්වීමට බලපාන සාධකයක් සේ සැලකේ. කොවිඞ් වසංගත තත්ත්වය තාක්ෂණ නැඹුරුවට ඉවහල් විය. සංචරණ සීමා පනවන විට, එදිනෙදා අවශ්‍යතා ඉටුකරගැනීමේ දී විකල්පයක් වූයේ තාක්ෂණයයි. කොවිඞ් පාලනය කිරීමෙන් පසු, අන්තර් ජාලයෙන් වැඩ කරන වෙනස්ම පැවැත්මකට ලෝක ප‍්‍රජාව යොමු වනු ඇතැයි සැලකේ.

ජාත්‍යන්තර පර්යේෂකයන් සදහන් කරන පරිදි රාජකාරි කටයුතු සදහා සේවයට වාර්තා කිරීම අලූත් පැත්තකට හැරීමට ඉඩ තිබේ. එය දෙමුහුන් ක‍්‍රමයක් විය හැකිය. අත්‍යවශ්‍යම කොටස කාර්යාලයට එන අතර නිවසේ සිට රාජකාරි කළ හැකි පිරිසට ඒ සදහා අවසර ලැබෙනු ඇත.

පසුගිය වසර හත අට තුළ පැවැත්මෙහි සමහර අංශ විශාල වෙනස්කම් වලට ලක්විය. වාහනයක් අයිතිකර ගැනීම වෙනුවට අවශ්‍ය වෙලාවට වාහනයක් ඇනවුම් කළ හැකිය. ආහාර නිවසටම ගෙන්වා ගැනීමට අවස්ථාව ලැබුණි. සමහර රටවල් ගනුදෙනුකරුවන්ට භාණ්ඩ බෙදාහැරීමට ඩ්‍රෝන තාක්ෂණය ද භාවිතා කරයි. නිවසක කොටසක් ආගන්තුකයෙකුට තාවකාලිකව පැවැරිය හැකි ක‍්‍රම අන්තර් ජාලය හදුන්වා දී තිබුණි. කාර්යාලයට පැමිණීම අනවශ්‍ය සහ කාර්යාල වේලාව කාර්ය මණ්ඩලයට තෝරාගත හැකි පරිදි නම්‍යශීලිවීම මෙම නවීකරණ  යුගයට ඇතුලත් වන තවත් පැත්තක් විය හැකිය.

බි‍්‍රතාන්‍යයේ ප‍්‍රකට සමාගමක් කාර්යාලට පැමිණීම අවශ්‍යම නැති කොටසක් තෝරා ගෙන ඔවුන්ට සිය නිවෙස්වල සිට රාජකාරි කිරීමට අවසර දී ඇත. පුහුණු වැඩසටහනකට හෝ වෙනත් අවශ්‍යම අවස්ථාවක හැර කාර්යාලයට පැමිණීම අනවශ්‍යය. සේවා ඉලක්ක සම්පූර්ණ කළ හැකි, විනයක් සහිත කාර්ය මණ්ඩලයකට හොදටම ගැලපෙන ක‍්‍රමයකි. මෙරට රාජ්‍ය හා පුද්ගලික අංශයේ සෑහෙන පිරිසක් පසුගිය කාලයේ දී, කාර්යාල කටයුතු නිවසේ සිට කරගෙන යන ලද බව ද සදහන් කළ යුතුය. වසංගතය පාලනය කිරීමෙන් පසු නැවතත් හුරු පුරුදු පැය අටක කාර්යාල ක‍්‍රමයට ආපසු හැරෙන්නට අවශ්‍ය ද යන්න අපට ද සලකා බැලිය හැකිය.

දිනපතා කාර්යාලවලට පැමිණිය යුතු කොටස අඩුවන විට පොදු ප‍්‍රවාහන අවශ්‍යතාව සීමා වෙයි. කාර්යාලවලින් කරන රාජකාරි අන්තර් ජාලයෙන් කරගත හැකි තැනට පත්වුවහොත් ජනතාව නගරයට එන වාර ගණන ද අඩු කළ හැකිය. දැනට භාණ්ඩ අලෙවිය පවා අන්තර් ජාලයෙන් කෙරෙන අතර එය තවත් පුලූල් කළහොත් නිතර වෙළද සැල්වලට එකතුවන පිරිස ද පහත වැටෙනු ඇත. ආර්ථික වේගයක් ළගා කරගැනීම සදහා දිවා කාලය පමණක් නොව රාත‍්‍රියට ද වැඩ කරන රටක් නිර්මාණය කළ යුතු බව කාලයකට කලින් සාකච්ඡා වූ කරුණකි. සිංගප්පූරුව, මැලේසියාව හා තායිලන්තය වැනි රටවල දිවා රාත‍්‍රී වැඩ කරන ක‍්‍රමය ප‍්‍රචලිතය. තාක්ෂණය භාවිතා කර පැය විසි හතරම සේවය කිරීමට හැකිය. සේවා කටයතු නොනවත්වා කරගෙන යන්නට පුලූවන්කම තිබේ. බැංකු වල ඇතැම් කටයුතු දවසේ  ඕනෑම වේලාවක අන්තර් ජාලයෙන් කරගැනීමේ හැකියාව තිබේ. රාජ්‍ය හා පුද්ගලික අංශය එවැනි සේවා ව්‍යාප්තියකට තීරණය කළහොත් දියුණුවට මගකි. මාර්ග තදබදය අඩු වන අතර එය බලශක්ති වියදම ද සීමා කරනු ඇත. කාර්යාල ගොඩනැගිලි සහ උපකරණ අවශ්‍යතා අඩු කරගත හැකිය. නඩත්තු වියදම සෑහෙන ප‍්‍රතිශතයකින් පහත වැටෙනු ඇත.

පුරුදු රාමුවට නැවතත් අවතීර්ණ වී එහි නීති හා පැරණි නිලධාරීවාදයට නැවත ගොදුරුවීම සුදුසු නැත. කාර්යක්ෂමතාව ගැන විශාල උත්සාහයක් ඇති අවස්ථාවකි. ඵලදායීතාව වර්ධනය කරගැනීම සදහා බලවත් පරිශ‍්‍රමයකය. අනාගතය හැදෙන්නේ තාක්ෂණික භාවිතය සමග බව පිලිගත යුතුය. තරගකාරී අනෙක් සමාජ වලට කලින් පියවරක් ඉදිරියට තැබීමට අපට හැකියාවක් තිබේ. වැඩි දියුණු කළ හැකි පැති ගැන විමර්ශණයක් අවශ්‍යය. ප‍්‍රතිපත්ති තීරණ ගත යුතුව තිබේ. වසංගතය තුරන් වන කාලය ගැන තවම නිශ්චිත අදහසක් නැත. කල්නොහැර කටයුතු කළහොත් ශ‍්‍රී ලංකාව තාක්ෂණික යුගයකට ඇතුළු කළ හැකිය.

හැම අංශයකම අර්බුද : සන්සුන් සිතින් මූණද‍ෙමු

ප්‍රතිචාරයක් ලබාදෙන්න

කොවිඞ් වසංගතයේ දෙවැනි හා තෙවැනි රැළි නැගෙමින් තිබේ. සියළුම රටවල ජන ජීවිත බලවත් කැළඹීමකට පත්ව ඇත. ලෝක ඉතිහාසයේ එතෙක් මෙතෙක් පැවැති දරුණුම ඛේදවාචක අතරින් එකක් වශයෙන් සනිටුහන් වනු නිසැකය. එන්නත්කරණය එක විසදුමකි. එහෙත් වෛරසය තවත් ප‍්‍රබේධවලට දියුණුවෙමින් පවතින බව වාර්තා වෙයි. සමාජ,ආර්ථික සහ සංස්කෘතික පැවැත්ම බලවත් අර්බුදයකය. පළමු වටයේ දී සාර්ථක පාලනයක් කරා ගමන් කරන්නට ශ‍්‍රී ලංකාවට හැකිවිය. දෙවැනි සහ තුන්වැනි වටවල දී නරක ප‍්‍රතිඵල අත්පත් කර දී තිබේ. එක දිගට නොනැවතී රාජකාරි කිරීමෙන් සෞඛ්‍ය අංශ පවා වෙහෙසකර තත්ත්වයකය. ජනතාවගේ හැසිරීම අනෙක් වැදගත් කාරණයකි. බොහෝ අවස්ථාවල අනුගමනය කළ යුතු මුලික සෞඛ්‍ය පුරුදු පවා අනුගමනය නොකරති. මුහුණු ආවරණ පැළැදීම, දෑත් සෝදා පිරිසිදුව තබා ගැනීම වැනි සරල පියවර පවා සමහර දෙනෙකුට වැදගත් නැත. සංචරණ සීමා පැනවීම පවා සැහැල්ලූවකට ගෙන ඇත.


කොවිඞ් වසංගතයේ භයානක තත්ත්වය, සමාජය එයට මුහුණ දෙන ආකාරය සහ අනෙකුත් පසුබිම සලකන අතරතුර අවධානය යොමු කළ යුතු තවත් පැත්තක් ද තිබේ. අප සියළු දෙනා සත්‍යය අවබෝධ කරගත යුතුය. එය ඉතා අමිහිරිය. එයින් කියැවෙන පණිවුඩය මහත් වේදනාවක් ඇති කරවයි. එක පැත්තකින් රටට බලවත් සෞඛ්‍ය අර්බුදයක් තිබේ. අනෙක් පැත්තෙන් ආර්ථික පීඩනයක් එල්ලවෙමින් පවතින වකවානුවකි. සංවිධිත ක‍්‍රියාමාර්ග අනුගමනය කළ යුතුව තිබේ. සමාජය බලගැන්විය යුතුව ඇත. සහන අවශ්‍ය නැතැයි තීරණය කළ හැකි එකම අංශයක් හෝ නැත. ආහාර සුරක්ෂිතතාව හා කෘෂිකර්මය නගාසිටුවීම ගැන සිතන්නට සිදුවී තිබේ. ක්ෂුද්‍ර ආර්ථික කළමණාකරණය, විදේශ වෙළදාම, ආයෝජනය,තාක්ෂණික අංශ,ශ‍්‍රම බලකාය, මුල්‍ය හා ප‍්‍රතිපත්ති යන අංශවල සම්පූර්ණ සමාලෝචනයක් කළ යුතුව තිබේ. අයවැය හිගය සහ ගෙවුම් ශේෂය දැනට පවතින ආර්ථික පසුබිම දෙපැත්තකින් වටලා තිබේ. මුල්‍ය විනය සහ විනිමය අනුපාතය කළමණාකරනය කෙරෙහි දීර්ඝ කාලයක් තිස්සේ අනුගමනය කළ සරල විලාසය එය තවත් තියුණු කර ඇත. නිෂ්පාදන, අලෙවි හා සේවා අංශවල පැවැත්ම හීනවීම තුළ වර්ධන අනුපාතික තවත් දුර්වල කර තිබේ.

උද්ධමනය, ආහාර මිල වැඩිවීම, සහ විනිමය හිගය ඉන්ධන ඇතුළු ආනයනික අංශ කෙරෙහි බලපා ඇත. ආනයන සීමාව,රසායනික පොහොර සහ කෘෂි රසායන නතර කිරීම වැනි තීරණ දක්වා කාන්දු වී තිබේ. ශ‍්‍රී ලංකාවේ ආර්ථිකයෙහි පවතින ව්‍යුහය ලෝකයේ ඉතාම දක්ෂ ආර්ථික විශේෂඥයන්ට පවා එකවර විසදුමක් ලබා දිය නොහැක. ස්වභාවය එපමණ සංකීර්ණය. අපනයන ආදායම 2000 වසරේ දී, දළ දේශීය නිෂ්පාදිතයේ ප‍්‍රතිශතයක් වශයෙන් සියයට 39.2 කි. එය 2019 දී සියයට 23.12 දක්වා අඩු වී තිබේ. වියට්නාමයේ එම කාලසීමාව තුළ අපනයන ඉපැයීම්, එරට දළ දේශීය නිෂ්පාදිතයේ ප‍්‍රතිශතයක් වශයෙන් සියයට 51.92 ක සිට සියයට 106.80 දක්වා නැග ඇත. වෙනස ගැන කල්පනා කරන්න. ජාතික ආදායමෙන් පමණක් පවතින හැකියාවක් රටකට නැත. අපනයන ආදායම සලකාබලන ව්‍යුහාත්මක සංශෝධන වලට යා යුතුය. මෙතෙක් අනුගමනය කරන ලද ප‍්‍රතිපත්ති වෙනස් කළ යුතුය. පසුගිය වසරේ ජාතික ආදායමෙන් සියයට අසූ පහක් රජයේ සේවක වැටුප් හා විශ‍්‍රාම වැටුප් වෙනුවෙන් වියදම් කර ඇත. ණය පොලී ආපසු ගෙවීමට වැය කරන ලද ප‍්‍රමාණය සලකා බැලූවහොත් රජයේ ආදායමෙන් සියයට හැත්තෑ එකක් වෙන් කරන්නට එම වසරේ දී සිදුවී තිබේ. ජාතික ආදායමෙන් පමණක් කළ හැකි දේ ඉතාම සීමිතය.
මෙම රාමුව වෙනස් කරනු සදහා ධනය උපයන,කී රක්ෂා උත්පාදනය කරන ව්‍යාපෘති වෙනුවෙන් විශාල වෑයමක් දැරිය යුතුය. ප‍්‍රතිපත්ති සම්පාදකයන් සහ සමාජ නායකයන් එකතු වී තීරණ ගත යුතු අවස්ථාවකි. ආණ්ඩුව හෝ විපක්ෂය යන කණ්ඩායම් වශයෙන් බෙදීම පලක් නැත. අද සිදුවෙමින් පවතින සිද්ධිවල විපාක අනාගතයේ බලයට පත්වන ආණ්ඩුවකට ද මග හැරිය නොහැකි බව අවධාරණයෙන් සදහන් කළ යුතුව තිබේ. පක්ෂ, කල්ලි, කණ්ඩායම් වලින් එන නොයෙක් විවේචනවලින් කුසගින්න නිවිය හැකි යැයි කල්පනා කරන්නේ නම් වරදකි.


ජනතාවට ඇත්ත කියන, ජනතාව එකගකරගෙන අනාගතයට මුහුණ දෙන පිලිවෙලක් අවශ්‍යය. ක‍්‍රියාවෙන් විශ්වාසය ගොඩනැගිය හැකිය. සියළු පාර්ශව එකතු කරගෙන ශක්තිමත් බලයක් තුළින් හැර අර්බුදයෙන් ගොඩ එන අනෙක් ක‍්‍රමයක් නැත. සන්සුන් මනසකින් ගැටළු නිරීක්ෂණය කළ යුතු අතර ආවේගශීලී අදහස් පතුරවන සියළු පාර්ශව එයින් මෙතෙක් ලැබී ඇති වාසි අවාසි තක්සේරු කළ යුතු කීරණත්මක කාලපරිච්ෙඡ්දයක් පසුකරමින් සිටින බව සිහිපත් කළ යුතුය.


මිහිදු රහතන්වහන්සේ අද වැනි දිනයක වැඩියා නම්

ප්‍රතිචාරයක් ලබාදෙන්න

2021/06/23 – ලංකාදීප

පොසොන් පුර පසොලොස්වක දිනය හෙටට යෙදී තිබේ. බුදු දහම ලක් බිමට ලැබුණේ අදවැනි දිනකය. ඉන්දියාවේ විසූ අශෝක රජතුමා ගේ අනුදැනුම මත මිහිදු මහ රහතන් වහන්සේ මෙරටට වැඩම කර තිබේ. එවකට ලංකාව පාලනය කළේ දේවානම් පියතිස්ස රජතුමාය. දෙරට අතර සබදතාවයක් පැවැති බව පැහැදිලිය. රජතුමා ඇතුළු ලාංකිකයෝ බුදු දහම අවබෝධ කරගැනීමට සමත් ද යන්න පරීක්ෂා කරන ලද ආකාරය ප‍්‍රකටය. මහ රජතුමා ඇතළු පිරිවර  සහ පසුව ලංකාවාසීහු බුදු දහම වැළදගත්හ. ධර්මයෙන් උගන්වන දර්ශනය අනුව ජීවිත සකස් කරගත්හ.

ධර්මාශෝක, දේවානම් පියතිස්ස වැනි රජවරු පමණක් නොව ලෝකයේ ලොකු -කුඩා, රටවල දුප්පත් -පොහොසත් අති විශාල පිරිසක් බුදු දහම වැළද ගෙන තිබේ. ධර්මය අවබෝධ කරගෙන ජීවිතය අලූතින් සකස් කරගන්නට ඇත. නොයෙක් අවස්ථාවල බුදු දහමේ පැවැතිමට බලපෑම් එල්ල වී තිබේ. වෙනත් ජාතීන්ගේ ආක‍්‍රමණ, වෙනත් ආගම් වලට හැරෙන සේ එල්ල වූ පීඩනය සහ ශාසනයේ පවා සිදුවූ පරිහානිය සලකා බැලිය යුතු පැතිය. අද තත්ත්වය තවත් තීව්ර වී තිබේ. අපරාධ, සමාජ ප‍්‍රචණ්ඩත්වය, ගැටුම් සහ එකිනෙකා කෙරෙහි වෛරයෙන් හැසිරෙන ස්වභාවයක් පෙනේ. මිනිසුන් ගේ හදවත් තුළ දහම නැති බව ඉතාම හොඳින් තහවුරු කරයි. ජාති, ආගම්, පක්ෂ සහ පැලැන්ති බේධ අවුළුවා රට තුළ නොසන්සුන්තාව වර්ධනය වී තිබේ. දශක ගණනක් තිස්සේ පැවැති ත්‍රස්තවාදයේ ප‍්‍රතිඵලයක් විය හැකිය. අනෙක් අතට ධනය හා බලය සදහා වූ තෘෂ්ණාවෙන් පෙලෙන ජනී ජනයා ස්ව කැමැත්තෙන්ම මෙකී  පැවැත්ම කරා අවතීර්ණ වී සිටින බව ද සැලකිය යුතුය.

ආර්ථික සහ සමාජ වශයෙන් පමණක් නොව බලවත් සෞඛ්‍ය තර්ජනයක් ද එල්ල වී ඇති වකවානුවකි. පොසොන් උත්සවය පැවැත්වීමට පවා බාධාවක් මතු වී තිබේ. බුදු දහම මෙලොව යහපත් පැවැත්ම සහ අවසානයේ දී නැවත ඉපැදීමක් නැති නිවන සාක්ෂාත් කරගැනීමට මග දක්වයි. අද ජන සමාජයේ පැවැත්ම දෙස බලන විට ඉතාම සංකීර්ණ තත්ත්වයකි. නිර්වාණය වෙනුවට තෝරාගෙන ඇති දැක්ම කුමක්ද?

මිහිදු මහ රහතන් වහන්සේ අද වැනි දිනයක වැඩම කළහොත් රට තුළ ඇති විය හැකි වාතාවරණය කෙබදුද? මිහිදු හිමියන් ගේ සම්ප‍්‍රාප්තිය විජාතික කුමන්ත‍්‍රණයක් සේ අර්ථ දක්වනු නිසැකය. රට යටත් කරගෙන ජාතික සම්පත් සූරාකෑමට ඉන්දීය පාලකයන් ගෙන යන සූක්ෂම පිලිවෙලක් බවට ඝෝෂාවක් නැගෙන්නට හොදටම ඉඩ තිබේ. කොටසක් අධිකරණයට කරුණු දක්වා වාරණ නියෝගයක් ගැනීමට බැරි නැත.  පාලක පක්ෂය ගන්නා තීරණ සම්බන්ධයෙන් බලවත් විරෝධය දක්වා පුවත් පත් නිවේදන, මාධ්‍ය සාකච්ඡා සහ අවසානයේ දී අන්තවාදී පිරිස් පාරට බැස විරෝධතා දක්වන්නට ඉඩ තිබේ. සමාජ මාධ්‍ය මහත් අවුලක් ඇති කරනු ඇත. තවත් පැත්තකින් සලකනවිට දැවැන්ත ප‍්‍රචාරක ව්‍යාපාර පැන නැගෙන්නට ද ඉඩ තිබේ. මාධ්‍ය අනුග‍්‍රහය පමණක් නොව මිහින්තලාවේ විකාශන අයිතිය ද දේශපාලන සටනක් වනු ඇති බව නිසැකය. කොවිඞ් වසංගත තර්ජනය තිබිය දී පවා ජනතාව පෙලගස්සවන ජාතික ව්‍යාපාර පැන නැගෙන බව ද නිසැකය.  මෙවැනි අනුමාන අප පත්වසිටින ශෝචනීය තත්ත්වය පැහැදිලි කරයි. බුදු දහමට අනුව ජීවිත හසුරුවාගෙන නැති බව දක්වයි.

බුදු දහම මනුෂ්‍ය ප‍්‍රජාවට ජීවිතය උගන්වන දැවැන්ත දර්ශනයකි. අටලෝ දහම අනුව ජීවත්වන ආකාරය කියා දෙයි. පන් සිල් ආරක්ෂා කරගන්නට හෝ සමහරෙකුට උනන්දුවක් නැත. බෞද්ධ යන්න උප්පැන්න සහිකයට සීමා වි තිබේ. වර්තමානයේ පවතින සංකීර්ණ ව්‍යුහය වටහා ගන්නට උත්සාහ කළ යුතුය. භයානක අවසානයක් කරා ගමන්කරන බව පෙනෙන නමුත් එකතු වී විසදුමකට උත්සාහ දරන්නේ නැත. ජන සමාජය පමණක් නොව සංඝ සමාජය ද පිරිහී තිබේ. විනය පිරිහී ගිය විට ධර්මය නොපවතින බව බුදු රජාණන් වහන්සේ දේශනා කළහ. බුද්ධ කාලයටත් වඩා විද්‍යාවෙන් සහ තාක්ෂණයෙන් දියුණු බව දක්වන නමුත් අප කොපමණ නොදියුණු දැයි කල්පනා කරන්නට පොසොන් පසලොස්වක දිනය අවස්ථාවක් මතු කර තිබේ.

පරිසරය මෙන්ම එදිනෙදා ප්‍රශ්න අමතක කරනු එපා

ප්‍රතිචාරයක් ලබාදෙන්න

පරිසර ආරක්ෂාවට පමණක් නොව වසංගතයට මුහුණදීම ද වැදගත්ය
ස්විට්සරලන්තයේ නොබෝදා පැවැති ජනමත විචාරණයක ප්‍රතිඵල අනුව රජයේ යෝජනාව පරාජය වී තිබේ. ගෝලීය උණුසුම අඩු කරන්නට හේතුවන පියවර ගණනාවක් අලුතින් බලගැන්වීමට ස්විස් පාලක පක්ෂය තීන්දු කර තිබුණි. පැරිස් සම්මුතියට අනුව ක්‍රියාවට නැගෙන්නකි. ඉන්ධන බදු සහ ගුවන් ප්‍රවේශ පත්‍ර බදු වැඩි කිරීමට යෝජනා කළේය. කෘමි නාශක භාවිතය අඩු කරන අතර එවැනි පියවර වෙනුවෙන් පෙනී සිටින ගොවීන්ට පමණක් ජලය පිරිසිදු කරන ව්‍යාපෘතිවල දී සහනාධාර සැපයීම ද ප්‍රධාන යෝජනා අතර විය. ජනතාව එම යෝජනා ප්‍රතික්ෂේප කර තිබේ. පරිසර ආරක්ෂාව පමණක් නොව කොවිඩ් වසංගතයෙන් ජීවිත ගලවාගත යුතු බව එරට වැසියෝ ජනමත විචාරණයේ දී ප්‍රකාශ ඇති බව දැක්වෙයි.


ජන මත විචාරණයේ ප්‍රතිඵල විශ්ලේෂණය කරන විද්වත්හු යෝජනාව පරාජය කරන ලද ඡන්ද ප්‍රතිශතය අඩු එකක් බව පෙන්වා දෙති. එහෙත් පරිසරය ගැන වැඩි අවධානයකින් සිටින ස්විට්සරලන්තය වැනි රටක ජනතාව පාලකයන්ට වැදගත් අනතුරු ඇඟවීමක් කර තිබේ. කාලගුණ විපත් අවම කරන සැලසුම් අවශ්‍ය නමුත් එවැනි පියවරකට ඇති හදිසි උවමනාව කොවිඩ් වසංගත තත්ත්වය ඉදිරියේ තරමක් අවලංගු බව ජනතා මතය බව පෙනේ. ස්විස් වැසියන් කරුණු සලකා බලා ඇති ආකාරය වෙනස්ය. පළමුවෙන් ජීවිත ආරක්ෂා කරගත යුතුය. පරිසරය ආරක්ෂා කරන තීරණ ගැනිමට තවත් කල් තිබේ.
ගෝලීය උණුසුම වැඩි කරන්නට බලපාන හේතුවලට එරට වගකීම ඉතාම අඩු අගයක් බව ජනමත විචාරණයේ දී ප්‍රතිවාදීන්ගෙන් මතුවූ කරුණකි.

1990 සිට 2030 දක්වා කාලය තුළ එම බලපෑම තවත් හරි අඩකින් අඩු කරන තීරණ ගන්නට කලින් ජනතාව අද මුහුණ දී ඇති ව්‍යසනය ගැන අවධානය යොමු කළ යුතු බව ද ප්‍රකාශ වී ඇත. නොයෙක් රසායනික භාවිතය හේතු කරගෙන ජල දූෂණය, ශාඛ, සතුන් හා කෘමි වර්ග වලට සිදුවන විනාශය සහාය දක්වන පිරිස් අවධාරණය කර ඇත. එයට එකඟ නොවූ එරට ගොවීහු අලුත් ප්‍රතිපත්ති ක්‍රියාත්මක වුවහොත් සෑහෙන පිරිසකට සිය වෘත්තීන් ගෙන් ඉවත්වන්නට සිදුවනු ඇති බව පෙන්වා දී තිබේ. කොවිඩ් තර්ජනය තිබිය දී යැපෙන මාර්ග අහිමිවීම අවාසනාවන්ත තත්ත්වයක් ඇති කරන බව අවධාරණය වී ඇත. කාලගුණ විපත්වලින් ගැලවීමට කලින් කොවිඩ් වසංගතයෙන් ජීවිත ආරක්ෂා කරගත යුතු බව එරට වැසියෝ ප්‍රකාශ ඇති බව පැහැදිලිය.


හරිත ප්‍රතිපත්ති ක්‍රියාවට නැගීම ගැන ආඩම්බරයෙන් සිටි ස්විට්සරලන්තයේ මෙම පරිවර්තනය ජගත් ප්‍රජාවගේ බලවත් අවධානයට ලක් ව ඇත. මූලික වශයෙන් සලකා බැලිය යුතු කරුණු සම්බන්ධ ලැයිස්තුව වෙනස් කරන්නට පාලකයන්ට බල කර තිබේ. කෘමි නාශක වලින් පරිසරයට හෝ අහසට නැගෙන ගුවන් යානා වලින් වායුගෝලයට වන බලපෑම හා සමානව ජනතාව ඉදිරියේ නැගී ඇති ව්‍යසනයට විසඳුම් සොයාගැනීමට අනියම් ආකාරයකට බලකර ඇත.
තීරණ ගැනීමට කලින් ජනතාව ඉදිරියට ගොස් ජනමත විචාරණ පැවැත්වීම දියුණු ප්‍රජාතන්ත්‍රවාදයක් සහිත රටවල ලක්ෂණයකි. ආණ්ඩු ඉදිරිපත් කරන සියළුම යෝජනාවලට ජනතාව සම්පූර්ණයෙන්ම එකඟ වෙන්නේ නැත. බි්‍රක්සිට් ජනමත විචාරණයට බි්‍රතානයේ දී අත් වූ ඉරණම ද තවත් හොඳ උදාහරණයකි. ජනමත විචාරණයක් පැවැත්වීමට විශාල වියදමක් අවශ්‍යය. ශ්‍රී ලංකාව වැනි රටවලට ජනතා අදහස් විමසා බලන ඡන්ද වරින්වර පැවැත්වීම පහසු නැත. ව්‍යවස්ථානුකූලව පැවැත්විය යුතු ඡන්ද පවා පැවැත්විය නොහැකි පසුබිමක ලෝකයේ නොයෙක් තැන් වලින් ලැබෙන පණිවුඩ වල අර්ථ වටහා ගත යුතුය.


ජන ජීවිතය තීරණාත්මක තැනක තිබිය දී පසෙක තැබිය යුතු යෝජනා වලට ඉහළම ලන්සුවක් තැබීම නුසුදුසුය. ජන සමාජයක හැසිරීම ඉතාම සංකීර්ණය. ලෝකයේ හරිත සංකල්ප වලට වැඩි අවධානයක් තිබේ. විශේෂයෙන් තරුණ පෙළ සිය පැවැත්ම ගැන කල්පනා කරති. තීරණ ගැනීමේ දී පැති දෙකක් තිබේ. පරිසරය වැදගත්වන අතරවායේ හදිසියේ පැනනැගෙන තත්ත්ව ගැන ද සලකා බැලිය යුතුය. මෑත කාලය තුළ ආණ්ඩු පක්ෂයේ නියෝජිතයන්ට පවා ආණ්ඩුවේ ඇතැම් තීරණවල කාලීන බව ගැන ප්‍රශ්න තිබුණි. අනුචිත බව ගැන වෙනස් අදහස් තිබේ. පහල සිට නැගෙන අදහස් ඉහළ තලයේ සිටින ප්‍රතිපත්ති සම්පාදකයන්ට දැනෙන්නේ නැත. එය බලවත් දුර්වලතාවයකි. පීඩනය එකතු වන අතර අවසානයේ දී එය මැතිවරණයක දී පුපුරා මහත් කලබැගෑනියක් ඇති කරයි. ස්විස් ජනමත විචාරණය අප රටට ද පාඩමකි. පරිසරය ගැන අවධානය යොමු කරන අතරවරයේ දැන් පැන නැගී ඇති වාතාවරණය සියුම්ව සලකා බැලිය යුතුය.

ආහාර ද්‍රව්‍ය ඉහළයාමේ ලෝක ප්‍රවණතාවට සුදානම් ද?

ප්‍රතිචාරයක් ලබාදෙන්න

2021/06/09  – ලංකාදීප

ජාත්‍යන්තරයේ උද්ගත වී ඇති ස්වභාවය අනුව ඉදිරියේ දී අත්‍යවශ්‍ය ආහාර ද්‍රව්‍ය මිල ඉහළ යන්නට ඉඩ ඇති බව වෙළදපොළ විශ්ලේෂකයෝ පෙන්වා දෙති. කොවිඞ් -19 වසංගත තත්ත්වය පැතිරෙන්නට කලින් තිබුණ මිල ගණන් සමග සසදනවිට ආහාර මිල ඉහළය. ඉදිරියේ දී සාමාන්‍ය ජනතාවට අපහසුතා ඇති කරන අවදානමක් තිබේ. තිරිගු, සීනි, කිරි, කෝපි, සෝයා බෝංචි හා මස් වර්ග වල මිල සියයට දහසයක සිට තිස් දෙක දක්වා ප‍්‍රමාණයකින් තොග මිල ගණන් ඉහළ නැග ඇත. ධාන්‍ය හා පලතුරු අමුද්‍රව්‍ය ඇසුරෙන් නිපදවන අතුරු නිෂ්පාදන වල මිල එයටත් වඩා ඉහළය. කිරිපිටි, බටර්, සෝයා තෙල් සහ විවිධ කෝන්ෆ්ලෙක්ස් වර්ග එවැනි නිෂ්පාදන අතර තිබේ.

සමහර ආහාර නිෂ්පාදන වල මිල සියයට හැටකින් පමණ වැඩි වී ඇති අතර ඒවා සාමාන්‍යයෙන් ඉහළ ධනවත් පිරිස පරිභෝජනය කරන ඒවා හෙයින් තියුණු බලපෑමක් එල්ලකර නැත. එක පැත්තකින් ආහාර ද්‍රව්‍ය වගා කිරීමේ දී අපහසුතා ඇති වී තිබේ. අනෙක ප‍්‍රවාහනය ගැටළු සහගතය. ගොවිපොල හෝ කර්මාන්ත ශාලාවේ සිට වරාය වෙත ප‍්‍රවාහනය පමණක් නොව එතැන් සිට නැව් මගින් ලෝකය පුරා කරන ප‍්‍රවාහනයට ද වසංගතය අවහිර මතු කර තිබේ. වසර දහයක් තුළ පැවැති ඉහළම ගාස්තු අය කරන්නට සමහර නැව් සමාගම් පියවර ගෙන ඇත. එය භාණ්ඩ හිගය හා මිල තවත් නංවන හේතුවකි. වෙලෙන්දෝ මිල නංවන අතර ආදායම් මාර්ග අවහිරවී ඇති ජනී ජනයා අසරණ වී ඇති බව නොයෙක් රටවල වාර්තා පෙන්වයි.

නිෂ්පාදනය සීමා සහිත හා ඒවායේ මිල වැඩිවන අතර සමහර රටවල් ආහාර තොග රැස්කිරීම අරඹා තිබේ. චීනය ඉදිරියෙන් සිටින බව දැක්වෙයි. ධාන්‍ය වර්ග මහා පරිමානයෙන් මිල දී ගනිමින් සිටී. එය වෙළද පොල තුළ පවතින ව්‍යුහය තවත් සංකීර්ණ කර තිබේ. ආදායම් අඩු ජන කොටස ආහාර මිල ගණන් හුවා දක්වමින් විරෝධතා ක‍්‍රියාමාර්ග වලට අවතීර්ණ වී සිටී. එය අනෙක් පැත්තකින් දේශපාලන අර්බුද මතු කර ඇත. අප‍්‍රිකානු රටවල මෙම තත්ත්වය දේශපාලන අස්ථාවර භාවය තෙක් වර්ධනය වනු ඇතැයි සැලකේ. කොවිඞ් වසංගතයෙන් පීඩා විදින අතර ආහාර මිල අර්බුදයක් ද තුළ සමහර රටවල කැළැඹිලි හටගනු ඇති බව ද ප‍්‍රකාශ වෙයි.

ඇමරිකාව දැනටමත් සිය වැසියන්ට ආහාර මිල ගැන අනතුරු අගවා ඇත. එක්සත් ජාතීන්ගේ ආහාර හා කෘෂිකර්ම සංවිධානයේ ආහාර මිල දත්ත අනුව පසුගිය මැයි මාසයේ අත්‍යවශ්‍ය ආහාර මිල ඉකුත් වසර දහය තුළ වැඩිම තැනක බව පෙන්වයි. වසංගත තත්ත්වය, එහි ප‍්‍රතිඵලයක් වශයෙන් ලෝක ආර්ථිකයේ පවතින ගැටළු සහ අනතුරුව නැග එන ආහාර මිල පිලිබද තත්ත්වය සුළු කොට තැකිය නොහැකිය.

කොවිඞ් වසංගතයේ තුන්වැනි රැල්ලකින් පීඩා විදින ශ‍්‍රී ලංකාව අලූත් ස්වභාවය ගැන අවධානය යොමු කිරීම වැදගත්ය. වෙනත් රටවලින් කරන ආනයන සම්බන්ධ බලාපොරොත්තු සීමා කරන්නට සිදුවිය හැකිය. ගෙන්වන ආහාර වල මිල දරාගැනීමට අපොහොසත්වන්නට ඉඩ තිබේ. ආනයන කෙරෙහි නැඹුරුව සීමා කර රට තුළ කරන නිෂ්පාදනය දියුණු කරන පියවර ගත යුතුව ඇත. ඉතා ඉක්මනින් අස්වැන්න ලබාගත හැකි කෙටි කාලීන භෝග ගැන අවධානය සුදුසුය. සහල් සහ තිරිගු පිටි වලට අමතරව විකල්ප සොයා ගත යුතුය. කොස්, දෙල්, මයියොක්කා සහ බතල වැනි බෝග අමතර වශයෙන් ආහාරයට ගැනීම සුදුසුය. ගෙවතුවල තමන්ට අවශ්‍ය බෝග වගා කරන සූදානමක් මෑත කාලයේ දී තිබුණි.

එහෙත් උනන්දුව තරමක් අඩු වී තිබේ. නිපදවන මහන්සියට වඩා අඩුවෙන් වෙළද පොලෙන් මිල දී ගත හැකි වීම හා වන සතුන්ගෙන් සිදුවන හානි එයට බලපාන ලද බව පෙනේ. ජාත්‍යන්තරයේ ස්වභාවය සලකා විවිධ පැති වලින් කරුණු සලකා තීරණ ගැනීම කෙරෙහි ප‍්‍රතිපත්ති සම්පාදකයෝ වගබලා ගත යුතුය. දැනට මෙරට වෙළද පොල හැසිරීම සලකා බලනවිට ගොවියන්ගේ නිෂ්පාදන නිසි මිලකට අලෙවි කරගත නොහැකිවීම ප‍්‍රශ්නයකි. ලෝක වෙළද පොලේ ආහාර මිල වැඩිවන අතර තුර මෙරට කෘෂි නිෂ්පාදන විකුණාගත නොහැකිවීමෙන් සිදුවිය හැකි ඉරණම වෙනම සාකච්ඡා කළ යුතුය. ආහාර සදහා කරන වියදම ජනී ජනයාට ඉතාම තීරණාත්මක සාධකයකි. ඉතාමත් ප‍්‍රවේසමෙන් ස්වභාවය කළමණාකරනය කළ යුතුව තිබේ. 

සාගරය සුරකින ජාලයක අවශ්‍යතාවත් සිතන්න කාළය ඇවිත්

ප්‍රතිචාරයක් ලබාදෙන්න

2021.06.02 – ලංකාදීප

සාගරය සුරකින ප්‍රතිපත්ති ගැන අවධානයක්
කොළඹ වරාය දෙසට යාත්‍රා කරමින් තිබුණ භාණ්ඩ ප්‍රවාහන නැව ගිනිගැනීමේ සිද්ධිය මහත් ආන්දෝලනයක් මතු කර තිබේ. මෑත කාලය තුළ මෙරට මුහුදු සීමාවේ වාර්තා වූ දෙවැනි බරපතල සිදුවීමය. සාමාන්‍ය අනතුරුවලට ලක් වූ නැව් ගණනාවක් ගැන ද තොරතුරු වාර්තා විය. ආසියාවේ නාවික කේන්ද්‍රස්ථානයක් වශයෙන් දියුණුවිය හැකි පසුබිමක් ශ්‍රී ලංකාවට තිබේ. වරාය සංවර්ධනය කර නාවික ගමනාගමනයට ඉඩ දෙන අතරතුර එමගින් ඇති විය හැකි අවදානම අවම කරගැනීම ගැන ද වැදගත්ය.


පසුගියදා සිදුවූ අනතුර ගැන විශේෂ අවධානයක් යොමු කිරීම අවශ්‍යය. එහි ප්‍රවාහනය කරමින් තිබුණ රසායනික ද්‍රව්‍ය සාගරයට මිශ්‍ර වී තිබේ. මත්ස්‍යයන්, කැස්බෑවන් පමණක් නොව මුහුද පත්ලේ වෙසෙන ජීවීන් පවා විපතට පත්ව සිටී. විනාශ වූ කන්ටේනර් වල තිබුණ අපද්‍රව්‍ය බටහිර පමණක් නොව දකුණු වෙරළට ද ගොඩගසා ඇත. සිදුවූ හානිය නැවත ගොඩනැගෙන්නට අවම වශයෙන් වසර දහයක සිට විස්සක් දක්වා කාලයක් ගත විය හැකි බව විශේෂඥයෝ කියති. ධීවර කටයුතු වලට අවහිර වී ඇති අතර එයින් යැපෙන පිරිසට සහන සපයන්නට සිදුවී ඇත. ජන ජීවිතයට කර ඇති බලපෑම මහත්ය. සාගර කලාපයට සිදුවූ විනාශය තක්සේරු කළ නොහැකිය. නඩු පවරා වන්දි ලබාගැනීමෙන් පමණක් සෑහීමකට පත් විය යුතු නැත.


කොළඹ හා හම්බන්තොට වරාය කාර්ය බහුල වන පසුබිමක අනාගතයේ දී ඇතිවිය හැකි තත්ත්වය ගැන අවධානය යොමු කිරීම සුදුසුය. වරාය දියුණු කරන අතර නාවික ආපදාවක දී වහා ක්‍රියාත්මක විය හැකි මෙහෙයුම් මධ්‍යස්ථානයක් රටට අවශ්‍යය. ඉන්දියන් සාගරයේ ගමන් කරන නැව්වලට ක්ෂණික සේවා සම්පාදනය එයින් කළ හැකිය. එය විශේෂිත අංශයකට කරන ආයෝජනයකි. ව්‍යාපාරික අවස්ථාවකි. භාණ්ඩ ප්‍රවාහන නෞකා වල සේවක කණ්ඩායම සුළු පිරිසකි. අත්‍යවශ්‍ය පිරිස හැරණු කොට හදිසියක දී ක්‍රියාත්මක වන කණ්ඩායම් නැත. නැව් සමාගමට හෝ රක්ෂණ අංශ වලට දැනුම් දී පියවර ගැනීමට කාලයක් ගතවෙයි.

සාගරයේ ගමන් කරන නැව් වෙනුවෙන් සහන සේවා සැපයීම රටට අලුත් අවස්ථාවකි. රජය ප්‍රතිපත්ති සකස් කළ යුතුය. ජාත්‍යන්තර තලයේ නියාමනයක් අවශ්‍යය. පුද්ගලික අංශයට එහි මෙහෙයැවිය හැකිය. අවශ්‍ය අවස්ථාවල දී දෙස් විදෙස් ආයෝජකයන්ට එකතුවීමට ද අවස්ථාවක් තිබේ. මෑත සිදුවීම් දෙක සලකනවිට එම නැව්වල තත්ත්වය පාලනය කිරීමට හා අවශ්‍ය පියවර ගැනීමට බැහැර විශේෂඥයෝ කැඳවන්නට සිදුවිය. එයට දින ගණනක් ගත වූ අතර විනාශය අවම කරගැනීමට අවස්ථාව අහිමි වූ බව සඳහන් කළ යුතුය.
ඉන්දියන් සාගරයේ සිදුවන ප්‍රවාහන කටයුතු ගැන ද අවධානය යොමු කිරීම සුදුසුය. ලෝකයේ සිදුකරන, ඛනිජ තෙල්, ගෑස් හා ගල් අඟුරු ප්‍රවාහනයෙන් සියයට හැත්තෑ දෙකක් සිදුකරන්නේ ඉන්දියන් සාගරය ඔස්සේය. ජාත්‍යන්තර මුහුදේ සිදුවන කන්ටේනර් ප්‍රවාහනයෙන් සියයට පනහක් ඉන්දියන් සාගරය හරහා සිදුවන බව දැක්වෙයි. ශ්‍රී ලංකාව අවට මුහුදේ ගමන් කරන නැව් ප්‍රමාණය දිනපතා වැඩිවෙමින් තිබේ. නැගෙනහිර කොළඹ පර්යන්තය දියුණු කිරීමට රජයේ සැලැස්මකි. ඉන්දියාව හා ශ්‍රී ලංකාවේ රාජ්‍ය පුද්ගලික ඒකාබද්ධ ආයෝජනයකින් බටහිර පර්යන්තය දියුණු කරන යෝජනාවකට ද අනුමැතිය ලැබී තිබේ. එක තීරයක්, එක මාවතක් යන චීන සංකල්පය අනුව සාගරය ඔස්සේ තැනෙන නව සේද මාවත තවත් සංකීර්ණ පැත්තකි. කොළඹ වරාය නගරය කාර්ය බහුලවන අනාගතයේ දී ඉතා ධනවත් සංචාරකයන් පුද්ගලික නැව් වලින් පවා කොළඹට පැමිණෙනු ඇතැයි සැලකේ. මෙවැනි පැති සලකා බලනවිට නාවික කේන්ද්‍රස්ථානයක් පමණක් නොව ආසියාවේ නාවික සහන මධ්‍යස්ථානයක් වශයෙන් ද නැගෙන්නට අවස්ථාවක් ඇත.


ශ්‍රී ලංකාව දක්ෂ මානව සම්පත් සහිත රටකි. පවතින තාක්ෂණික පසුබිම අනුව ලෝකයේ ප්‍රමුඛ විද්වතුන් සමග සෘජු සම්බන්ධතා ඇතිකරගන්නට බාධාවක් නැත. අවශ්‍ය ආයෝජනයට ඉඩ දිය යුතු අතර එයින් ඇතිකරන අවස්ථා ගැන යුහුසුළුවීම වැදගත්ය. හම්බන්තොට වරාය මෙවැනි හදිසි මෙහෙයුම් ඒකකයක් නඩත්තු කරන්නට හොඳ ස්ථානයකි. වරාය පමණක් නොව මත්තල ගුවන් තොටුපොල ද ඉක්මන් සේවා සම්පාදනයට ලබාගත හැකිය. මෙවැනි යෝජනා වල දී විදේශ ආධාර පවා ලැබේ. සමාගම් ගණනාවක් මුහුදු කොල්ලකරුවන්ගෙන් නාවුක ආරක්ෂාව වෙනුවෙන් සාර්ථක ව්‍යාපාර කරගෙන යයි. එහි අත්දැකීම් රටට තිබේ. මෙවැනි පැති ගැන අලුතින් හිතන්නට අවශ්‍යය. ගිණිගත් නැව සම්බන්ධයෙන් පරස්පර මත ඇති කර නගන ඝෝෂාව වෙනුවට රටට ගත හැකි නව ක්‍රියාමාර්ග ගැන සාකච්ඡා නොකරන්නේ ඇයි?

ගල් අඟුරු- බොර තෙල් වලින් ඉවත්ව සූර්ය තාපය ට පිවිසීමේ කාලය ඇවිත්

ප්‍රතිචාරයක් ලබාදෙන්න


ජාත්‍යන්තර බලශක්ති ඒජන්සිය නිකුත් කර ඇති වාර්තාවක් විශේෂ අවධානයට ලක් ව තිබේ. කොවිඩ් වසංගතය ඉතාම තීරණාත්මක තැනක පවතින අතරතුර පර්යේෂකයන් මිහිතලය ආරක්ෂා කරන පියවර වෙනුවෙන් යුහුසුළු වෙති. වායුගෝලයට ඉහළින් ඇති ඕසෝන් ස්ථරය ආරක්ෂා කරගැනීමෙන් ගෝලීය උණුසුම ඉහළ නැගීම නතර කරගත හැකිය. අහිතකර වායු ඕසෝන් ස්ථරය විනාශ කරන හේතුවකි. පොසිල ඉන්ධන දහනය කර බලශක්ති නිපදවීම නතර කිරීමෙන් කාබන්ඩයොක්සයිඩ් වැනි අහිතකර වායු බිංදුව දක්වා පහත දැමීම ඉලක්කය වී ඇත.


කාර්මීක විප්ලවය සමග බලශක්ති භාවිතය වේගයෙන් වර්ධනය වූ අතර ගල් අඟුරු, බොරතෙල් සහ ද්‍රව ගෑස් වලට ඉහළ ඉල්ලුමක් ඇති විය. එහි නරක ප්‍රතිඵලය අද අත්විඳින අතර අනාගත පරපුර වෙනුවෙන් තීරණගත යුතුව තිබේ. බලශක්තිය භාවිතය සම්බන්ධව දැනට පවතින රාමුව වහාම වෙනස් කළ යුතුව ඇත. සූර්ය තාප, සුලඟ, ජලය හෝ හයිඩ්‍රොකාබන් විදුලිය නිපැයුම සියයට අනූව දක්වා නැංවිය යුතුය. එම ප්‍රභව පිරිසිදු විදුලිය නිපදවනු ඇති අතර එය ස්වභාවික ව්‍යසන අවම කරන නිරෝගීමත් ජන කොටසක් ජීවත්වන යුගයක් නිර්මාණය කරනු ඇත.


වසර 2050 වන විට පොසිල ඉන්ධන දහනය අවම කරනු සඳහා වේගවත් ක්‍රියාමාර්ග අවශ්‍යය. අද සිට එක දවසකට මහා පරිමානයෙන් සූර්ය තාප බලාගාරය බැගින් ඉදිකළ යුතු බව බලශක්ති ඒජන්සි වාර්තාවක් පෙන්වා දෙයි. කරුණු හාර සියයකින් යුතු නිර්දේශ අතර එය ඉතාම වැදගත් එකකි. ඛනිජ තෙල් සැපයුම සම්බන්ධ ව්‍යාපෘති සහමුලින්ම නතර කළ යුතු අතර ගල් අඟුරු භාවිතා කරන ව්‍යාපෘති සඳහා ආයෝජන අහෝසි කළ යුතුය. දැනට පුනර්ජනනීය විදුලිය උත්පාදනය සමස්ථ නිපැයුමෙන් සියයට 29ක් වන අතර එය සියයට 90 ක් දක්වා නැංවිය යුතුවයි. 2035 වන විට එන්ජිමක් සහිත කාර් භාවිතය නතර කිරීම අවශ්‍යය. විුදුලිය බලයෙන් ධාවනය කරන වාහනවල බැටරිය ආරෝපනය කරන ස්ථාන මිලියන හතලිහක් අවශ්‍යවනු ඇත. ගුවන් යානා වල බලශක්තිය පවා පරිසර හිතකාමී බවට හැරවේ. අන්තර් නගර ගුවන් ගමන් සිමා කරන අතර අන්තර් නගර වේගවත් විදුලිය දුම්රිය හඳුන්වා දෙනු ඇත.

ලෝකයේ දුප්පත් රටවල වෙසෙන බිලියන 2.6 ක පමණ ජනගහනයකට විදුලිය පමණක් නොව මුළුතැන්ගෙයි අවශ්‍යතා වෙුනවෙන් ද කරන පරිසරයට අහිතකර බලශක්ති භාවිතා කරන ක්‍රම වෙනස් විය යුතු බව මෙම වාර්තාව දක්වයි.
දැනට පවතින රාමුවෙන් ගැලවෙන තීරණ ගැනීම පහසු නැත. ආණ්ඩු ඒවාට ඇබ්බැහි වී සිටී. ජාත්‍යන්තර බලශක්ති ඒජන්සිය පෙන්වා දෙන පරිදි පරිසර හිතකාමී, අලුත් බලශක්ති යෝජනා ක්‍රම වෙනුවෙන් ට්‍රිලියන හතරක මුදලක් ආයෝජනය කරන්නට සිදුවෙයි. ඛනිජ තෙල් සහ ගල් අඟුරු නිෂ්පාදනය නතර කරන අතර එයින් මැද පෙරදිග ඇතුළු රටවල අර්බුදයක් විය හැකි බවට භීතියක් පවතින නමුත් සත්‍යය එය නොවේ. පරිසර හිතකාමී බලශක්තිය සමග ලෝකයේ අලුත් ආර්ථිකයකට දොරටු විවෘත වෙයි. අවම වශයෙන් මිලියනයක් පමණ අලුතින්ම රැකියා අවස්ථා බිහිවෙයි. මහා පරිමානයෙන් විදුලිය නිපදවන හයිඩ්‍රජන් බලාගාර රටවල් අතර බලශක්තිය හුවමාරු කරන දැවැන්ත ව්‍යාපෘති වනු ඇත.

බොරතෙල් නිපදවන රටවලට හිමි ධනය හා බලය මෙම දැවැන්ත හයිඩ්‍රජන් බලශක්ති බලාගාර සහිත රටවලට ලැබෙනු ඇත.
කොවිඩ් අර්බුදයෙන් නිසොල්මන් වී සිටින ආර්ථිකයක් ඇති රටවල් බලශක්තියෙන් හා තාක්ෂණයෙන් අලුත් දොරටු විවෘත කරගනිමින් සිටී. දැවැන්ත ආර්ථිකයක් සහ විශාල ආර්ථිකයක් ඇති රටවලට කලින් ශ්‍රී ලංකාව වැනි මැදි ආර්ථිකයක සිටින කුඩා රටවලට අලුත් අවස්ථා තිබේ. ඉක්මන් තීරණ ගෙන ප්‍රතිපත්ති වෙනස් කළහොත් පරිසර හිතකාමී බලශක්තිය භාවිතා කරන නවීන යුගයකට ඇතුළු විය හැකිය.
සූර්ය තාපය හෝ හයිඩ්‍රජන් බලාගාර වලට රාජ්‍ය පුද්ගලික ආයෝජන කළ හැකිය. මහා පරිමාන ව්‍යාපෘති වලින් නිපදවන විදුලිය ඉන්දියාවට පවා විකිණිය හැකිය. කලාපයේ බලශක්ති කේන්ද්‍රස්ථානයක් බවට ශ්‍රී ලංකාව පරිවර්තනය කළ හැකි බව පර්යේෂකයෝ පෙන්වා දෙති.

මුළු රටම වෙනස් කරන්නට කලින් තෝරා ගත් නගරයක් හරිත බලශක්ති කලාපයක් කරන්නට බැරිකමක් නැත. කොළඹ වරාය නගර කලාපය ජාත්‍යන්තර ආදර්ශයක් කරන තීරණය කිසිසේත් අපහසු එකක් නොවේ. එවැනි පියවරක් තුළින් පරිසරය ගැන උනන්දුවක් සහිත අලුත් ආයෝජකයෝ ආකර්ශනය වනු ඇත. ලෝකයෙන් කල් ඉකුත්වන කාර්මික යුගයට දොරටු විවෘත කිරීම වෙනුවට අලුත් පැති ගැන හිතන්නට රටට අවස්ථාවක් ලැබී තිබේ. ප්‍රතිපත්ති සම්පාදකයෝ ජාත්‍යන්තර බලශක්ති ඒජන්සියේ වාර්තාව ගැඹුරින් අධ්‍යයනය කිරීම

ගොවිතැන පැරණි ක්‍රමයට යනවද වගා සරු කරන තාක්ෂණයට යනවද

ප්‍රතිචාරයක් ලබාදෙන්න

2020/05/19 – බදාදා

කෘෂි අංශය ගැන අලුතින් අවධානයක් යොමු වී තිබේ. කොවිඩ් අවදානම හමුවේ නිෂ්පාදන අලෙවි කරගැනීමේ ප්‍රශ්න මතු වී තිබේ. අනෙක් පැත්තෙන් කාබනික පොහොර භාවිතය නතර කරන තීරණයකි. ආනයනික පොහොර හිඟය. වගාවට අවශ්‍ය පොහොර ප්‍රමාණවත්ව නොලැබුණහොත් අස්වැන්න අඩුවන අතර වගා කිරීම පලක් නැති බව ගොවියෝ ප්‍රකාශ කරති.


ශ්‍රී ලංකාව මැදි ආදායම් රටකි. කෘෂි අංශය ආර්ථිකයේ වැදගත් කොටසක් විය යුතුය. වී වගාව, වැවිලි භෝග සහ අනෙකුත් කෘෂිකාර්මික කටයුතු කාලානුරූපව පරිවර්තනයක් සිදු වී නැත. අනාගත පැවැත්ම පදනම් කරගෙන අවශ්‍ය වෙනස්කම් කළ යුතුය. වෘත්තියක් වශයෙන් කෘෂිකර්මයට නැඹුරුවන පිරිස අඩුවෙමින් තිබේ. තරුණ පිරිස මඩ තවරාගෙන වැඩ කරන්නට කැමැති නැත. සේවා අංශය අසාමාන්‍ය ලෙස පුලුල්වීම එහි ප්‍රතිඵලයකි. නිසි කළමණාකරණයක් තුළ කාර්මික, කෘෂිකාර්මික හා සේවා අංශ ගැන අලුත් අවධානයකින් තීරණ ගැනීම අවශ්‍ය කෙරේ.


අනාගත අවශ්‍යතා සලකා බලනවිට ආහාර බෝග නිෂ්පාදනයට ප්‍රමුඛතාව හිමිවිය යුතුය. ජනගහනය වැඩිවන අතර ඉඩම සීමිතය. ඉඩ ප්‍රමාණය තුළ රටට අවශ්‍ය ආහාර නිපදවා ගන්නට සිදුවෙයි. පරිභෝජනයට අවශ්‍ය ප්‍රමාණය සම්පූර්ණයෙන්ම නිපදවා ගත නොහැකිවුවහොත් හිඟය ආනයනය කිරීම හැර අනෙක් විකල්පයක් නැත. පවතින වෙළඳ පොල හැසිරීම සලකා බලනවිට ස්වයංපෝෂිත ආර්ථිකය අනිවාර්ය සාධකයක් විය හැකිය. කෘෂිකර්මය නැවතත් පැරණි ස්වභාවයට තල්ලු කිරීම හෝ නවීන තාක්ෂණික ගොවිතැන යන පැති දෙක අතරින් එකක් තෝරා ගත යුතුව තිබේ.


වස විස රහිත ගොවිතැන හොඳ ආදර්ශ පාඨයකි. පොහොර සහ රසායනික ද්‍රව්‍ය ආනයනය නතර කිරීම තුළ එය සාක්ෂාත් කරගත හැකිය. ජනතාවගේ ආහාර අවශ්‍යතා සම්පූර්ණ කිරීම සම්බන්ධයෙන් බරපතල ගැටළු මතු වනු ඇත. වී වගාව බුද්ධ බෝගයකි. ගොවියෝ පරිසරයට එකඟ ගොවිතැනක නියැලුණහ. දෙහීයට පසු කැකුලෙන් වී ඉස පැල කරගත්හ. නිසි අවස්ථාවේ දී වක්කඩ බැඳ වල් පැල පාලනය කරගත් අතර ගොයමට හානිකරන කෘමීහු පාලනය කරනු සඳහා විලෝපිකයන් සහ නොයෙක් කෙම් ක්‍රම අනුගමනය කරන ලද බව පෙන්වා දිය යුතුය.

ගොවිතැනින් කොටසක් කුරුළු පාලුව වශයෙන් වෙන් කර තැබූහ. ගැඩවිලුන් ඇතුළු හිතකර ජීවීහු පස සරවත් කරන ලද අතර එහි දී රසායනික දේ භාවිතා කරන හේතුවක් තිබුණේ නැත. ඉක්මන් වගා ක්‍රම, වැඩි අස්වැන්න සහ ලැබෙන අස්වැන්න ආරක්ෂා කර ගැනීමට ලෝක ව්‍යාප්ත සැලසුම් සකස්වීම තුළ එක සාධකයක් තිබුණි. අවශ්‍ය තරමට ආහාර නිපදවීමය. කුස ගිනි නිවන පිලිවෙලක් රහිත තැනක වස විස නැති ගොවිතැන තුළ ප්‍රශ්න මතුවිය හැකිය.
කෘෂිකර්මය ගැන කරන පර්යේෂණ නතර වී නැත. නවීන තාක්ෂණය එකතුවෙමින් තිබේ. නියැදි පරීක්ෂාකර අවශ්‍ය ප්‍රමාණයට පොහොර යොදවයි.

රසායනික ද්‍රව්‍ය අඩු කරනු සඳහා හරිතාගාර වල වගා කෙරේ. ක්ෂුද්‍ර ජීවීන් යොදවා අවශ්‍ය තරමට පෝෂණය සැපයෙන ක්‍රම සොයා ගෙන ඇත. දියර මාධ්‍යවල වගාව ද වානිජ මට්ටමින් කරගෙන යයි. මහල් නිවාසවල පමණක් නොව සාගරයේ ද වගා කරන තරමට අලුත් සොයාගැනීම් හඳුන්වා දී තිබේ. ගොවිපොල මෙහෙයුම් සම්පූර්ණයෙන්ම පරිගණකයකට භාර දිය හැකි තරමට දියුණුවක් ඇත. ජලය, පොහොර නිසි මොහොතේ අවශ්‍ය ප්‍රමාණයට පමණක් සැපයෙන මෘදුකාංග භාවිතා කළ හැකි අන්දමට ආහාර නිෂ්පාදනය විප්ලවීය පරිවර්තනයකය.


රසායනික පොහොර භාවිතය අවම කරන සැලැස්ම නරක නැත. එහෙත් එම තීරණය සමග කෘෂිකර්මය ආපසු පැරණි තැනට යා යුතු නැත. පැරණි යුගයට ආපසු හැරවීම ඇතැම් පිරිසක ගේ උත්සාහය බව පෙනේ. ප්‍රතිපත්ති සම්පාදකයන් අලුත් පැති ගැන අවධානය යොමු කළ යුතුය. පස්වන පරම්පරාවේ සන්නිවේදනය සමග නවීන කෘෂිකර්මයට අවස්ථාව තිබේ. නිෂ්පාදනය අඩු නොවන අතර රසායනික භාවිතාව අඩු තාක්ෂණික ගොවිතැන රටට හඳුන්වාදීම සුදුසුය. දැනට ආනයනය කරන බාල තත්ත්වයේ පොහොර වෙනුවට ගුණාත්මක බවින් වැඩි විශේෂ තිබේ. ඒවා මිල වැඩිය. ඵලදායීත්වයෙන් ඉහළය.

අනෙක රට තුළ විශාල ඉඩම් ප්‍රමාණයක් වගා නොකර අත්හැර දමා තිබේ. තරුණ පෙල ගොවිතැනින් ඈත්වීම එයට එක හේතුවකි. තාක්ෂණික ක්‍රම හඳුන්වා දෙන අතර වෙනස් මානයකින් කෘෂිකර්මික කටයුතුවලට නැවත අවතීර්ණ කරන පියවරක් වෙනුවෙන් ආයෝජනය ඉතාම වැදගත් බව අවධාරණය කළ යුතුය.

කැබිනට්ටුවේදී එකගතාව පළකර එළියේදී ගැලරියට වීරයන්වීම

ප්‍රතිචාරයක් ලබාදෙන්න

2021/05/12 – ලංකාදීප

සෑම පුද්ගලයෙකුටම මතයක් දරන්නට අයිතියක් තිබේ. වෙනස් මත දැරීම සහ මත අතර එකගතාවයකින් තීරණ ගැනීම ප‍්‍රජාතන්ත‍්‍රවාදී පාලනය ක‍්‍රමයක හොද ලක්ෂණයකි. පාර්ලිමේන්තු ක‍්‍රමය ප‍්‍රජාතන්ත‍්‍රවාදය ශක්තිමත් කරයි. මැතිවරණයක  දී ඡන්දය පාවිච්චි කරන ජනතාව සිය නියෝජිතයෝ පාර්ලිමේන්තුවට පත් කරති. මහජන නියෝජිතයා ගේ වගකීම ඡන්ද දායක, ජනතාවගේ අභිමතාර්ථ සාක්ෂාත් කිරීමය. බලයට පත්වන ආණ්ඩුව කැබිනට් ඇමැති මණ්ඩලයක් පත් කරගනී. රට පාලනය කිරීමේ භාරධුර වගකීම කැබිනට් මණ්ඩලයට පැවරේ. මහජන නියෝජතියන්ට හා කැබිනට් මණ්ඩලයට ඓතිහාසිකව පැවැරුණ කාර්ය භාරයක් ඇත.

අද මෙරට මහජන නියෝජිතයන්ගේ ක‍්‍රියා කලාපය සම්බන්ධයෙන් ප‍්‍රශ්න තිබේ. මහජන නියෝජිතයා වශයෙන් ජනතා අදහස් අනුව කටයුතු කරන්නේ ද යන්න සලකා බැලියයුතු මුලික කරුණකි. බහුතරයක් මහජන නියෝජිතයෝ පාර්ලිමේන්තුවට පත් වූ පසු ජනතාව ගැන තකන්නේ නැත. පාර්ලිමේන්තු විවාදයක දී කතා කරන්නේ පුද්ගලික අදහස් අනුවය. පණතකට ඡන්දය දෙන්නේ ජනතා නියෝජිතයා බව සහමුලින්ම අමතක කරමින් බව පෙනේ. ඇමැති මණ්ඩලය සතු පිලිවෙල වෙනස්ය. සාමුහික වගකීමකින් බැදී සිටී. ප‍්‍රජාතන්ත‍්‍රවාදී උසස් සම්ප‍්‍රදායයන් ඇති අතර ඒවා මැනැවින්  ආරක්ෂා කළ යුතුය. කැබිනට් මණ්ඩල සාකච්ඡාවක දී විවිධ අදහස්, නොයෙක් තර්ක හා පුද්ගලික අභිප‍්‍රාය හෙළි කළ හැකිය. එහෙත් කැබිනට් තීරණයක් ගැනීමෙන් පසු එය කැබිනට්මණ්ඩලයේ තීරණයකි. රජය නියෝජනය කරන ඇමැති මණ්ඩලය තීරණය වෙනුවෙන් පෙනී සිටිය යුතුය. කැබිනට් මණ්ඩලයේ දී අනුමත වන තීරණයකට එතැනින් බැහැරට පැමිණ වේදිකාවේ දී හෝ මාධ්‍ය කැමරාව ඉදිරියේ අනෙක් වීරත්වයක් පළ කිරීම නුසුදුසුය.

ශ‍්‍රී ලංකාවේ පළමු කැබිනට් මණ්ඩලය සාමුහික වගකීම ගැන කදිම ආදර්ශයකි. එම කැබිනට් මණ්ඩලයේ ලේකම්වරයා වශයෙන් කටයුතු කළ බර්නාඞ් පී. පෙරේරා මහතා සිද්ධි මතක සටහන් ඇතුලත් කර කෘතියක් සම්පාදනය කර තිබේ. එක තැනෙක කැබිනට් මණ්ඩලය තුළ තිබිය යුතු විනය ගැන සිද්ධියක් සදහන්ය.

ඞී. එස්. සේනානායක අගමැතිවරයා ගේ වෙළද හා වානිජ ඇමැතිධුරය හෙබවූයේ සී. සුන්දරලිංගම් මහතා ය. කැබිනට් රැස්වීමට එන ඇමැතිවරයා බොහෝ අවස්ථාවල තීරණ වලට විරුද්ධත්වය පළ කරයි. එතැනින් නතර නොවන ඔහු විරුද්ධත්වය සටහන් කරන සේ තමන්ට දන්වන ලද බව මතක සටහන් ලියන බර්නාඞ් පී. පීරිස් මහතා ලියා තිබේ. එවැනි විරෝධතා සටහන් කැබිනට් සටහන්වලට ඇතුලත් නොකළ අතර එක අවස්ථාවක ඒ ගැන ලේකම්වරයාගෙන් ප‍්‍රශ්න කර ඇත. අයිවන් ජෙනිංග්ස් රචිත කෘතියකට අනුව කැබිනට් මණඩලය තීරණයක් ගත් පසු සියළු දෙනා එම තීරණය අනුව පාර්ලිමේන්තුවේ හා එයින් පිටත සාමුහික වගකීමකින් කටයුතු කළ යුතු බව උපුටා දක්වා තිබේ. සුන්දරලිංගම් මහතා එයට එකග වී නැත. ජෙනිංග්ස් ගේ අදහස් ‘‘යල් පැන ගිය ඒවා’’ බව කියා තිබේ. එය අනුමත නොකළ අගමැතිවරයා ජෙනිංග්ස් ගේ පූර්වාදර්ශය අනුව ක‍්‍රියාකරන සේ දැනුම් දී ඇත. පසුව පාර්ලිමේන්තුවේ දී සිද්ධියක් වී ඇති බව දක්වන ලේකම්වරයා දිනක් හැන්දෑවේ සිය දුරකථනයට කතා කළ අගමැතිවරයා සුන්දරලිංගම් මහතා කැබිනට් මණ්ඩලයෙන් ඉවත් කරන ලිපිය කෙටුම්පත් කරන සේ නියම කර ඇත. පසුව සොයා බැලීමේ දී පාර්ලිමේන්තු ඡන්ද විමසීමේ අවස්ථාවක අදාල ඇමැතිවරයා පාර්ලිමේන්තුවෙන් බැහැර සිට ඇති අතර ඡන්දය ප‍්‍රකාශ කිරීමෙන් වැලකී ඇත.

පුද්ගලික මතය එකකි. මහජනතාව නියෝජනය කරන මන්තී‍්‍රවරයෙකුට ජනතාවගේ හඩ ඉදිරිපත් කළ හැකිය. කැබිනට් සම්ප‍්‍රදාය අනෙකකි. එහි සාමූහික වගකීමක් තිබේ. එය කිසි දිනක කල් ඉකුත්වන සංකල්පයක් නොවේ. කැබිනට් මණ්ඩලයේ දී එකගවන කරුණකට එයින් බැහැර වෙනත් මතයක් කතා කිරීමට අයිතියක් නැත. එය රජයේ සිටිමින් රජය විවේචනය කිරීමකි. මෙවැනි සිද්ධි පාර්ලිමේන්තුවේ සහ කැබිනට් මණ්ඩලයේ කීර්තිමත් ඉතිහාසය තුළ සටහන්ව ඇත.

ඉතිහාසයෙන් උගන්වන පාඩම් තිබේ. ඇතුලේ දී එකක් කියන ඇමැතිවරු පිටතට පැමිණ අනෙක් කාරණයක් කියන අවස්ථා තිබේ. වීරයන් විය හැකිය. ඡන්ද පදනම ආරක්ෂා කරගන්නට ද බැරිකමක් නැත. සාමුහික වගකීමෙන් ගැලවෙන්නට තැත් කිරීම යුක්ති සහගත නැත. එවැනි පියවරක දී කැබිනට් තීරණයක වලංගු භාවය ගැන ප‍්‍රශ්න මතුවෙයි. ආණ්ඩුව අපහසුතාවයට පත්වෙයි. ඇමැති මණ්ඩලයේ සාමාජිකයන් සිය වගකීම ගැන හිතන්නට අවශ්‍යය. නිදහසින් පසු පළමු ආණ්ඩුවේ කැබිනට් මණ්ඩලය සම්බන්ධයෙන් ඞී. එස් සේනානායක මහතා ගත් තීරණ අදටත් පූර්වාදර්ශයකි.

Older Entries Newer Entries