සියලු ආගමික – ජාතික සිරිත් විරිත් වලට ගරුකරමු

ප්‍රතිචාරයක් ලබාදෙන්න

2020/12/16 – ලංකාදීප

අලූතින් උපදින දරුවෙකුට මහත් ආදරයක් දක්වන හා සමානව ජීවිතක්ෂයට පත්වන පුද්ගලයෙකුගේ දේහයට ලැබෙන්නේ ද බලවත් ගෞරවයකි. උස් පහත්, ජාති ආගම් බේද පැත්තකින් තබමු. අහිමිවෙන්නේ මනුෂ්‍ය ජීවිතයකි. ජීවත් වූ සමාජ පසුබිමට වඩා තරමක් උසස් ගෞරවයක් අවසන් ගමනේ දී පිරිනැමේ. යුද බිමේ දී ඝාතනය වන සතුරු පාර්ශවයේ දේහ පවා ගෞරවාන්විතව හුවමාරු කරගන්නට තරම් විනයක් සහිත යුගයක අප ජීවත්වෙමින් සිටී.

භයානක වසංගත තත්ත්ව හමුවේ මරණයට පත්වන මිනිසුන් ගේ අවසන් කටයුතු සිදුකරන ආකාරය ගැන අමිහිරි සිද්ධි ලෝක ඉතිහාසයේ සනිටුහන්ව ඇත. කොවිඞ් -19 වයිරසයේ තියුණු බලපෑම සියළු සාරධර්ම වලට අභියෝග කර තිබේ. විද්‍යාව හා තාක්ෂය දියුණු අද වැනි කාල පරිච්ඡේදයක ජන අනන්‍යතාවලට ගරු කරන වගකීමක් අප සියළු දෙනාටම තිබේ. ඉස්ලාම් පුද්ගලයන් කොවිඞ් ආසාදනය වී ජීවිතක්ෂයට පත් වුවහොත් ඔවුන්ගේ අවසන් කටයුතු සම්බන්ධයෙන් අනුගමය කරන විධිවිධාන ගැන බලවත් විවාදයක් ඇත. අනොන්‍ය අවබෝධයක් ඇති, සමාජ සංස්කෘතින් ට ගරු කරන උසස් සමාජයක් වශයෙන් මධ්‍යස්ථ විසදුමකට එළැඹීම සුදුසුය.

බෞද්ධ, හින්දු, කිතුනු හා ඉස්ලාම් පමණක් නොව අනෙක් ආගම් වල ද මරණයෙන් මතු ජීවිතය ගැන විශ්වාසයක් පවතී. අවසන් කටයුතු කෙරෙන ආකාරය ගැන එකගතතා තිබේ. ඒවායේ ඉතිහාසය සංකීර්ණය. සත්‍යය අසත්‍යතාව පැත්තකින් තැබිය යුතුය. ඒකමතික තීරණය නුසුදුසුය. අසල්වැසියාගේ මරණය සංහිදියාව ඇති කරන පියවරක් බවට හරවා ගැනීම සුදුසුය.

ඉස්ලාම් ආගමිකයන්ගේ දේහය එක දිනයකින් ඉතා සරල පියවරක් අනුගමය කර සුසාන භූමියෙහි තැන්පත් කරන්නට පදනම් වන හේතුවක් තිබේ. කොව්ඞ් වයිරසය ඇතිවී ඇති අනතුරු සලකා සිරුරු ආදාහනය කිරීමට තීරණය කිරීම එම හේතුවලට අභියෝග කිරීමකි. බලය අභිමුවෙහි අසරණ වන නමුත් ඉවසීම කෙළවර විය හැකි තැනක් තිබේ. වෛරය ඇති විය හැකිය. ලෝකයේ අනෙක් රටවල භූමදානයට ඉඩ දී ඇත. ශ‍්‍රී ලංකාවේ ඉස්ලාම් ආගමිකයන්ට කර තිබෙන අවහිරය ප‍්‍රශ්නයකට තුඩු දිය හැකිය. තම මතු ආත්මයට ලැබෙන සැනසීම ගැන අවිනිශ්චිතව ජීවත්වන මුස්ලිම් ජන ප‍්‍රජාව ගේ හැගීම් වටහා ගැනීම ඉතාම වැදගත්ය. 

සිරුරු මහපොලවේ තැන්පත් කිරීමෙන් ජල මුලාශ‍්‍ර වලට වයිරස එකතු විය හැකි බව ඇතැම් විශේෂඥ මතයකි. සිරුරු වලින් පමණක් නොව මල මුත‍්‍ර හෝ ඛේඨය මගින් ද වයිරසය ජල මුලාශ‍්‍ර වලට බැහැර වෙන්නට බැරි කමක් නැති බව මැදහත් විශේෂඥයන් දක්වන අදහසකි. එය බැහැර කළ නොහැකි සියුම් තර්කයකි. කොවිඞ් -19 වයිරසයට ආසාදනය වන අයවලූන්ගේ ශරිරයෙන් බැහැරවන දේ ජල මුලාශ‍්‍ර වලට එකතුවීමට ඉඩ ඇත. එය මළ සිරුරරක ක‍්‍රියාකාරීත්වයෙන් සිදුවිය හැකි හානියට වඩා බලවත්ය. ලෝක සෞඛ්‍ය සංවිධානය පවා ඉස්ලාම් ආගමිකයන්ගේ අවසන් කටයුතු වලට අවහිර නොකරන තීරණයක් ගෙන තිබෙන අතර අන්තවාදී මතයකින් බැහැර, බුද්මධිත්ව කටයුතු කරන වගකීමක් රටට තිබේ. අවස්ථාවාදී දේශපාලන විරෝධතා දුරු කළ යුතුය. යහපත් සමාජ ද්‍රෘෂ්ඨිවාදයක් පතුරවන ව්‍යායාමකට හරවා විය යුතුය.

කොවිඞ් වසංගත තත්ත්වය අභිමුවෙහි හැසිරෙන අන්දම පමණක් නොව එය තුරන් කිරීමෙන් පසු එකට ජීවත්වන දිනය ගැන ද අවධානය යොමු කිරීම සුදුසුය. කිසිම ආගමික ශාස්තෘවරයෙකු අනෙක් ආගමික පවතින විශ්වාස බැහැර කළේ නැත. බුදු රජාණන් වහන්සේ, දහම දේශණා කරන කාල වකවානුවේ පවා අන්‍ය ආගම් විශාල ප‍්‍රමාණයක් තිබුණි. සත්‍යය අවබෝධ කරදීම හැර අන්තවාදයකට ඉඩක් බුද්ධ දේශණාවේ තිබුණේ නැත. එකට ජීවත්වන සමාජ අතර ඇතිවන යම් යම් පළුදු දරුණු අන්තවාදයක් තෙක් ගමන් කළහොත් ඇතිවිය හැකි විනාශය ගැන පරෙස්සම් විය යුතුය. රටට උගත් පාඩම් තිබේ. සෑහෙන අත්දැකීම් සම්භාරයක් ඇත. කුඩා ගිණි පුළිගු වලින් හටගත් ත‍්‍රස්තවාදය පසුව මරාගෙන මැරෙන මහා ගින්නක් දක්වා පැතිරී ගිය බව රටට අමතක නැත. ජීවිතක්ෂයට පත්වන කොවිඞ් ආසාදිතයන්ගේ දේහයන් ගැන අවසන් කටයුතු කෙරෙන අනන්‍යතා ගැන අප සියළු දෙනා එකගතාවයකට පැමිණීම අවශ්‍යය.

කොරෝනා එන්නතෙන් සමාජ පරතරය නංවයිද?

ප්‍රතිචාරයක් ලබාදෙන්න

2020/12/09 – ලංකාදීප

කොවිඞ් -19 වයිරසයේ පැතිරීම එදිනෙදා පැවැත්ම වෙනස් කර තිබේ. සම්බන්ධතා කෙරෙහි තද බලපෑමක් කර ඇත. කණ්ඩායම් හැගීම හෝ එකමුතු භාවය වෙනුවට සමාජ දුරස්ථභාවය කෙරෙහි වැඩි අවධානයක් පවතී. මෙම වයිරසය, ඇති නැති පරතරය නොසලකා දියුණු නොදියුණු සෑම සමාජයක්ම ආක‍්‍රමණය කර ඇත. අලූත් වාර්තා අනුව කොවිඞ් සදහා එන්නතක් සොයා ගෙන තිබේ. කණ්ඩායම් සිය ගණනක් ඉතාම වේගයෙන් කරන ලද පරීක්ෂණ අවසානයේ සාර්ථක ප‍්‍රතිඵල ලැබී ඇත. එන්නත භාවිතාව සමග සමාජ පරතරය ඇති කරන අවදානමක් හටගෙන තිබේ. තරාතිරම නොසලකා පැතිර ගිය වයිරසය මැඩ පවත්වන පියවර ඉදිරියේ ධනය හෝ බලය මතුවිය හැකි ලකුණු පහල වි ඇත.

එන්නත වහාම ලෝකයේ සියළුම දෙනාට එකවර ලබා දෙන්නට හැකියාවක් නැත. අවදානමක් ඇති ජන කොටස සහ අනාරක්ෂිත පිරිස තෝරා ගන්නට වෑයම් කරන බව පෙනේ. ලෝක සෞඛ්‍ය සංවිධානය හා අදාල බලධාරීහු යාන්ත‍්‍රණයක් සකස් කරමින් සිටිති. සෞඛ්‍ය කාර්ය මණ්ඩලය, සේවා සම්පාදකයන්, ආරක්ෂක අංශ ඇතුළු අයවලූන් අවදානමක් සහිත කොටස සේ සැලකේ. වයස්ගත ජනගහනය සහ බරපතල අනෙක් රෝගයකින් පීඩා විදින පිරිස අනාරක්ෂිතයන්ය. තෝරාගත් අය සදහා පළමුවෙන් එන්නත ලබා දිය යුතු බව ප‍්‍රකාශ වී ඇත. ඇමරිකාව, චීනය, බි‍්‍රතාන්‍ය, කියුබාව, සිංගප්පූරුව හා රුසියාව ඇතුළු රටවල එන්නත් සාර්ථක වි ඇත. විශ්වාසය සම්බන්ධ ගැටළු නිරාකරණයට ජන නායකයෝ ඉදිරිපත් වී සිටිති. රැසියාවේ ජනාධිපතිවරයා සහ පවුලේ අය එරට එන්නත ලබාගත් බව ප‍්‍රචාරය විය. ඇමරිකාවේ හිටපු ජනාධිපතිවරුන් තිදෙනෙකු එන්නත පළමුවෙන් ලබාගෙන විශ්වාසයක් ඇති කරන බව ප‍්‍රකාශ වී තිබේ. එවැනි පියවර අගය කළ යුතුය.

එන්නත පළමුවෙන් ඇනවුම් කරන තරගයක් ඇති බව පෙනේ. ධනවත් රටවල් බිලියන ගණනින් එන්නත් වාර මිල දී ගැනීමට සූදානම්ය. දිළිදු රටවල් අසරණව බලා සිටිති. දියුණු හා නොදියුණු රටවල්වල ධනය ඇති ජන කොටස පුද්ගලික රෝහල් වලට මුදල් ගෙවා එන්නත සහ විශේෂිත ප‍්‍රතිකාර පහසුව ලබා ඇත. වැඩිම අවදානමක් ඇති කිසිවක් කරකියාගත නොහැකි ජනී ජනයා භීතියෙන් සිටිය දී ‘‘ධනියගෝපාල සමාජයක් ’’ නිර්මාණවීම ෙවිදනාවකි. වසරප‍්‍රසාද සහිත සමාජයක නරක ලක්ෂණ වැඩිදියුණු වන බව දැක්විය හැකිය.

අවදානම උස් පහත්වන පමණක් නොව දෙවැනි රැල්ලක ව්‍යාප්තියක් දක්වන ශ‍්‍රී ලංකාව සිටින තැන ගැන අවධානය යොමු කළ යුතුය. වයිරසය ආසාදිත ප‍්‍රමාණය වේගයෙන් වර්ධනය වෙමින් තිබේ. සුවය ලබන පිරිස ද සැලකිය යුතුය. ජීවිතක්ෂයට පත්වන පිරිස, අනෙක් රටවල වාර්තා සසදනවිට අඩු බව නිරීක්ෂණය කළ හැකිය. එහෙත් ශ‍්‍රී ලංකාවේ ජනගහනය වයස්ගත වෙමින් තිබේ. රෝග වලක්වා ගැනීමේ ශඛ්‍යතාව දියුණු නමුත්, එකවර විශාල රෝගීන් ප‍්‍රමාණයකට ප‍්‍රතිකාර කිරීමේ ධාරිතාවයක් නැත. පරෙස්සමින් කටයුතු කිරීමේ අවශ්‍යතාව අවධාරණය කරන අතර නිනි උපදෙස් අනුගමනය කිරීම ඉතාම වැදගත් බව මෙහි දී පෙන්වා දිය යුතුය.

වයිරසය සදහා ප‍්‍රතිකාර ගැන විවිධ අදහස් තිබේ. පෙරුම්කායම්, කොත්තමල්ලි වල සිට දේශීය අත්හදා බැලීම් අයහපත් නැත. යම් ප‍්‍රතිශක්තිකරණයක් විය හැකි අතර චිත්ත ධෛර්යය ඇති කරන බව නිසැකය. වෛද්‍ය විද්‍යාව දියුණු සහ තාක්ෂණික භාවිතාවක් සහිත සමාජයක තිබිය යුතු සූදානම මෙහි දී වැදගත්ය. ගතානුගතික ආකල්පවලින් ගැලවී ප‍්‍රායෝගික විය යුතුය. දියුණු වෙමින් පවතින රටක් වශයෙන් ජන සමාජය සුරක්ෂිත කරනු සදහා ගත හැකි පියවර වෙනුවෙන් ප‍්‍රමාද විය යුතු නැත. කොවිඞ්-19 එන්නත ගැන අවධානය යොමු කිරීම සෞඛ්‍ය විශේෂඥයන්ගේ වගකීමකි. යුතු පියවර ගැන රජයට නිර්දේශ ඉදිරිපත් කළ යුතුය. මිල දී ගැනීම හෝ සමාජයේ තෝරාගත් කොටස් වලට ලබාදෙන ක‍්‍රමවේද සකස් කිරීමට යහුසුළු විය යුතුය. සමහර වර්ග අධිශීත තත්ත්ව යටතේ ගෙන්විය යුතු අතර තවත් වර්ග විශේෂ උපදෙස් සහිතය. මේවා සොයා බලා රටට ගැලපෙන එන්නත සූදානම්කිරීම සුදුසුය.

ඉන්දියාව සැලැස්මකට අනුව ගමන් කරමින් සිටී. බංගලා දේශය එන්නත් මිලියන ගණනක් දැනටමත් ඇනවුම්කර තිබේ. පී.සී.ආර්. පරීක්ෂණ හා ප‍්‍රතිදේහජනක පරීක්ෂණ ගැන පසුගිය කාලයේ මෙරට තිබුණ ආන්දෝලනය අමතක නැත. දේශපාලනඥයන් පමණක් නොව විශේෂ වෛද්‍ය කණ්ඩායම් පවා පිල් බෙදුණි. වාද කළේය. එවැනි අවාසනාවන්ත තත්ත්ව තුරන් කර ජිවිත බේරා ගැනීම සදහා අධිෂ්ඨානශීලීව පියවර ගත යුතු තීරණාත්මක මොහොත උදා වී තිබේ. 

දියර කිරි නිෂ්පාදනයට කටින් බතල සිටුවීම

ප්‍රතිචාරයක් ලබාදෙන්න

දියර කිරි නිෂ්පාදනය නංවන පියවර සම්බන්ධයෙන් බතල කොළ කටින් හිටවන හපන්කම අපට තිබේ. කිරි පිටි මිල වැඩිවන විට ජන ඝෝෂාව ඇවිලෙයි. පිටරටින් ගෙන්වන්නට යන වියදම පාලනය කරගත නොහැකි වූ විට පාලකයෝ නොයෙක් අර්ථකථන දක්වති. දුර දිග බලන සැලැස්මකට අනුව, වැඩ පිලිවෙලක් තිබුණි නම් අද වන විට කිරි ආහාර වලින් ශ්‍රී ලංකාව පොහොසත්ය. පාන්දර අවදි වී තේ හදන්නට ලිප ගිනි ඇවිලවීමෙන් පසු, වේලකට සෑහෙන කුඩා පිටි පැකැට් එකක් ගන්නට වෙළද සැලට යන තරමට ප්‍රශ්නය ව්‍යාකූල වී තිබේ. දශක හත අටකට කලින් ඇති තරම් කිරි ආහාර තිබුණ රටක් අවසානයේ දී පත් ව ඇති තැන ශෝක ජනකය.

ආණ්ඩු ගණනාවක් කිරි වලින් රට පොහොසත් කරන උත්සාහ ගෙන තිබේ. පුද්ගලික අංශයේ ව්‍යවසායකයෝ ද ප්‍රයත්නයක නොයෙදුනා නොවේ. දේශීය ආයෝජකයන් සමග එකතු වූ විදේශීය සමාගම් මගින් ද වෑයම් කර ඇත. කිරි පිටි ගෙන්වන්නට බිලියන ගණන් මුදල් වැය කෙරේ. ලබන වසර සදහා අය වැය ද දේශීය කිරි ගොවියා ශක්තිමත් කරන යෝජනාවක් ඉදිරිපත් කර තිබේ. ඉතාම වැදගත් පියවරකි. දෙනුන් සැපයීමෙන් හෝ අතට දෙන අඩු පොලී ණය මුදලකින් පමණක් කාරිය කෙරෙන්නේ නැත. ගව සම්පත දියුණු කරන ප්‍රායෝගික සැලැස්ම මෙරට ආර්ථික සහ සමාජ ප්‍රතිපත්ති වලට අනුව ගලපා ගැනීමට හැකියාවක් තිබිය යුතුය.

පොහොර හා කිරි අවශ්‍යතාවයට එල ගවයන් ඇති කළ එකල කුඹුරු අස්වද්දන්නට මහත් ප්‍රයෝජනයක් ගත්තේ මී ගවයන්ගෙන්ය. මී කිරි නිෂ්පාදන කළේ ද මී දෙනුන්ගේ කිරිවලින්ය. භාණ්ඩ ප්‍රවාහනයට ද, ගමන් බිමන් වලට ද කරත්තවල බදින ලද පුහුණුකරන ලද එල ගවයෝ යොදා ගත්හ. හණ තැබීම, ලාඩං ගැසීම, ගෙජ්ජි බැදීම පමණක් නොව ගැල් බැදගෙන කරන බඩු ප්‍රවාහනය ද මෙරට ජන සංස්කෘතියේ වැදගත් කොටසක් විය. කුඹුරට මැසිම යොදවා අස්වද්දන අතර භාණ්ඩ ප්‍රවාහනයට මෝටර් රථය එකතු  වී තිබේ. ගමන් බිමන් වෙනුවෙන් කරත්තයක් දකින්නට නැත. ගවයන් ඇති කිරීමෙන් ලබන අතුරු වාසි ගිලිහෙන සමාජයකින් කිරි දොවා ගැනීමට පමණක් ආදායමක් ඉපැයිය නොහැකිය. වානිජ වශයෙන් කිරි නිෂ්පාදනය කරන රටවල එයට සමාන්තරව මස් නිෂ්පාදනය ද කරගෙන යන බව සදහන් කළ යුතුය. පස් පවු වලින් වැලකී සිටින බෞද්ධ ජනතාව බහුලව ජීවත්වන රටක කිරි පමණක් ලබාගෙන මස් නිෂ්පාදනය අත්හැර ගවපාලනයෙහි යෙදීම පහසු නැත. ගව ඝාතනය නීතියෙන් තහනම් කරන නීති පනවන ලද කාලවකවානුවක් බව ද මතක් කර දිය යුතුය. කිරි නිපදවීමට ගවයන් ඇතිකරන ගොවියෙකු අවසානයේ දී මුහුණ දෙන ප්‍රශ්න අතර වියපත් ගවයන් නඩත්තුව ද අතිරේක බරක් විය හැකිය.  

ඉන්දියාවේ ශ්වේත විප්ලවය කලාපයේ කටයුතු සම්බන්ධව ආදර්ශයකි. එරට ජාතික කිරි දිනයක් තිබේ. ආචාර්ය වාර්ගේෂ් කුරීන් ඉන්දියාවේ ක්ෂීර විප්ලවයේ පියා සේ සලකන අතර ඔහු සිහිකරමින් කිරි දිනය වාර්ෂිකව පවත්වයි. ලෝකයේ විශාලතම කිරි ගොවි පොල සංවර්ධන ව්‍යාපෘතිය ඇරඹෙන්නේ කුඩා ගොවියන්ගෙන්ය. එපමණක් නොවේ අද ලෝකයේ විශාලතම කිරි නිෂ්පාදනය කරන තැනට ඉන්දියාව කැදවන පියවරක් විය. කිරි සමිති පිහිටුවන ලද අතර පසුව එය කිරි ගොවි සමූපකාරයක් බවට හැරවීය. දිනපතා එකතු කරන දියර කිරි කම්හල්වලට යැවෙන පියවර අවසානයේ රට පුරා බෙදා හැරෙති. කිරි පානය කිරීම සෑම ඉන්දියානුවෙකුගේ ම දෛනික ආහාරයේ වියදම අඩු සහ ඉතාම වැදගත් පෝෂණීය කොටසක් වී තිබේ. මිලියන සංඛ්‍යාත පිරිසක් කිරි නිෂ්පාදනය ආශ්‍රිත වෘත්තීන් හි නිරතය. අපනයනය හෙයින් එරට විදේශ ආදායමෙන් කොටසක් බව ද සදහන් කළ යුතුය.

සත්ව පාලනයෙහි නිරත පිරිස තෝරා ඔවුන් කිරි ගවයන් ඇති කිරීමට නැඹුරු කළ හැකිය. රටට අවශ්‍ය තරම සලකා බලා දියර කිරි නිපදවන්නට බැරිකමක් නැත. පර්යේෂකයන් ඉදිරිපත් කරන කරුණු වලට මතධාරීන් එකතු විය යුතුය. අවශ්‍ය පහසුකම් සලසන තීරණ ඉතා වැදගත්ය. ඉඩම් හා තෘණ භූමි සම්බන්ධ ගැටළු පවතී. මුලින් සදහන් කළ කරුණු අතරට ඒවා ද එකතු විය යුතුය. කිරි ගොවියන්ට ඉඩම් නැත. ආයෝජනයට ඉදිරිපත් වන පිරිසට ද එය ප්‍රශ්නයකි. අවශ්‍ය ඉඩම් පවරන  තීරණ ගැනීම අවශ්‍යය. කුඩා ව්‍යවසායකයන් පමණක් නොව ඔවුන් සම්බන්ධ කෙරෙන මහා පරිමාන ගොවිපොල ක්‍රමයක් ද අවශ්‍ය වනු ඇත

දොස්තර අන්තර්ජාලයෙන් නිවෙසට එන දිනය ළඟයි

ප්‍රතිචාරයක් ලබාදෙන්න

25/11/2020- ලංකාදීප

පාවහන් නැති වෛද්‍යවරයා එනම් “ඛෙයා ෆුට් ඩොක්ටර්” සංකල්පය අතීතයේ චීනයේ භාවිතා වූ සංකල්පයකි. පහසුකම් හිග එකල වෛද්‍යවරු චීනයේ දුෂ්කර ගම්මාන වල කදූ නගිමින්, බසිමින් සහ පාගමනින් ගොස් ජනී ජනයාට සේවා සපයා ඇත. චීනයේ පමණක් නොව ලෝකයේ කොතැනත් අද වනවිට වෛද්‍ය පහසුකම් දියුණුය. ජපානය තවත් පියවරක් ඉදිරියට තබා තිබේ. විශේෂඥ වෛද්‍ය සේවා අන්තර් ජාලයෙන් සැපයීමේ ව්‍යාපෘතියක් අරඹයි. එකී සංකල්පය අලූත් දෙයක් නොවේ.

 කොවිඩ් වසංගතයෙන් හුදෙකලා වූ ජනතාවට සත්කාරක සේවා සඳහා අන්තර් ජාල ප්‍රතිකාර අංශය පුලූල් කිරීමට ජපාන රජය තීරණය කර ඇත.
ලෝකයේ හොොඳ සෞඛ්‍ය පහසුකම් සහිත රටවල් අතර පළමු තැන අයිතිකරගෙන ඇත්තේ ජපානයයි. වැසියන්ගේ සාමාන්‍ය ආයුකාලය වසර අසූ පහකි. මෑත කාලය තුළ එහි වෙනස්කම් සිදුවිය හැකි බව සලකා බලා තිබේ. එයට හේතුව තුන් ලක්ෂ විසි හත් දහසකට වැඩි වෛද්‍ය විශේෂඥයන් අතුරින් සියයට පනහකට වඩා වයස්ගත පිරිසක් වීමය.

2015 වසරේ දී ජපාන රජය ටෙලි මෙඩිසින් සේවාව ප්‍රතිපත්තියක් වශයෙන් පිලිගෙන තිබේ. අලූත් අගමැති සුගා යොෂිහිදෙයි මහතා ප්‍රතිසංස්කරණ පියවරක් වශයෙන් සෑම ක්ෂේත්‍රයකම තාක්ෂණ භාවිතාව දියුණු තියුණු කරන සේ උපදෙස් නිකුත් කර ඇත. කෙසේ නමුත් එරට වෛද්‍ය පාලක මණ්ඩලය අන්තර් ජාලයෙන් ප්‍රතිකාර වෙනුවෙන් වැඩි කැමැත්තක් නැත. එයට හේතුව ජපානය පුරා සෑම වෛද්‍ය මධ්‍යස්ථානයකටම එක හා සමානව අන්තර් ජාල පහසුකම් නොතිබීම ව පැවසේ. අනෙක අන්තර් ජාල ප්‍රතිකාර කරන අවස්ථාවල දී ලියැකියැවිලි ගණනාවක් සම්පූර්ණ කිරීමට සිදුවීමයි.

රෝගියා මුහුණට මුහුණ හමුවී හඳුනාගැනීමට වඩා තමන්ම සටහන් තබන ක්‍රමයට අනුගතවීමට ජපාන වෛද්‍යවරු පවා එතරම් හුරු නැත. සියයට එකක පමණ සුළු අනුගතවීමක් දක්නට ලැබුණි. දැන් එය අනෙක් පැත්තට හැරී තිබේ. වෛද්‍ය ප්‍රතිකාර සඳහා පිරිවැය අවම කරන සහ අන්තර් ජාලයෙන් වෛද්‍යවරයා හමුවීම කොවිඩ් ආරක්ෂිත පියවරක් වශයෙන් සලකයි. අන්තර් ජාල ප්‍රතිකාර ක්‍රම සියයට පහලොවක් දක්වා වර්ධනය වී ඇත. ප්‍රතිකර මධ්‍යස්ථාන අතුරින් සියයට හතලිස් දෙකක සම්පූර්ණ නවීකරණයක් සිදුවි තිබේ. රෝගීන්ගේ දත්ත සියයට අසූපහක් පමණ ජාලගතවීම වැදගත්ම කාරණයක් බව දැක්වෙයි.


සිංගප්පූරුව අන්තර් ජාලයෙන් ප්‍රතිකාර ස`දහා ඇති දියුණුම තැනක් බව ද මෙහි දී ස`දහන් කිරීම අවශ්‍යය. නගරයේ තැනින් තැන ඇති මධ්‍යස්ථාන වලට එන වැසියන්ට රුධිර පීඩනය, රුධිරයේ සීනි මට්ටම යනා දී සමහර පරික්ෂා වහාම තමන්ටම කරගත හැකිය. ඒවා ස්වයංක්‍රීයව කලින් දත්ත සමග සස`දා වෛද්‍යවරයෙකු වෙත යොමු කර උපදෙස් ලබා ගැනීමේ පහසුව සම්පාදනය කර ඇත.
ජපානයේ හා සිංගප්පූරුවේ ස්වභාවය සමග සසඳන විට ශ්‍රී ලංකාව තවමත් ප්‍රාථමික මට්ටමකය. පැවැත්ම ඩිජිටල් කරන්නට ආණ්ඩුවට උවමනා කර තිබේ. සෑම අංශයකම වෙනස්කම් සඳහා බලවත් උත්සාහයක් පවතින බවට වාර්තා ලැබේ. හැඳුනුම්පත, රියැදුරු බලපත්‍රය, ගමන් බලපත්‍රය හා උප්පැන්න සහතිකය වැනි දේ වඩා ඉක්මනින් නිකුත් කරන්නට ගන්නා වෑයම සම්පූර්ණයෙන් සාර්ථක කරගන්නට හැකියාව ලැබී නැත. නිලධාරීන්ගේ දුර්වලකම් හා පවතින නීති වල හරස්කැපීම් විශාල අවහිරයකි. තාක්ෂණික අමාත්‍යංශයක් පිහිටුවා ජනාධිපතිවරයා අතට ගෙන තිබේ. යම් පරිවර්තනයක් අපේක්ෂා කළ හැකිය.

එවැනි පසුබිමක් මත අන්තර් ජාල වෛද්‍ය ප්‍රතිකාර ආරම්භ කිරීමට තීරණය කළහොත් විශාල විරෝධයක් පැන නැගෙනු නිසැකය. ජීවිත සමග සෙල්ලම් එපා යැයි ඇතැම් විපක්ෂ දේශපාලනඥයන් ඝෝෂාවක් නගන්නට බැරි නැත. ප්‍රතිකාර ක්‍රමයේ පරිවර්තනයක් යෝජනා වුවහොත් පළමුවෙන් විරුද්ධ වෙන්නේ සමහර වෛද්‍යවරු බව ද සඳහන්කළ යුතු කරුණකි.
පවතින රාමුව තුළ ස්වකීය යැපෙන ව්‍යුහය හදා ගෙන ඇති වෘත්තීයවේදීහු කිසිම ක්ෂේත්‍රයක් පවතින ස්වභාවයෙන් වෙනස් කර ජනතාවට කෙලින්ම සේවා සම්පාදනය කරන්නට ඉඩ දෙන්නේ නැත. නීතිය, වෛද්‍ය, අධ්‍යාපනය, රාජ්‍ය සේවය යනාදී වශයෙන් ලැයිස්තුවක් දක්වන්නට හැකිය. ආණ්ඩුව කියන තරමට නොකෙරෙන්නට ක්‍රමය සකස්වීමටට ද, එය එක හේතුවක් බව පෙනේ

ගොවියා ශක්තිමත් කිරීමට පැරණි ග්‍රහණ වලින් මුදාගනීමූ

ප්‍රතිචාරයක් ලබාදෙන්න

18/11/2020- ලංකාදීප

ඉන්දියානු රජය පසුගිය දා ගොවි ජනතාවට බලපාන අලූත් පණත් තුනක් සම්මත කළේය. කෘෂි නිෂ්පාදන මිල දී ගැනීමට රජයට පමණක් තිබුණ බැඳීම එමගින් ඉවත් කෙරේ. නව නීති අනුව ගොවියන්ට කෙලින්ම පුද්ගලික වෙළෙඳුන්ස මග ගනුදෙනු කළ හැකිය. අවශ්‍යනම් සමාගම් සමග ඉදිරි ගිවිසුම් වලට අත්සන් කිරීමට අවකාශය සැපයේ. මෙතෙක් ඉන්දියාවේ අනුගමනය කළ නීති අනුව  පුද්ගලික අංශය අත්‍යවශ්‍ය ආහාර ද්ව්‍ද්‍රව්‍ය වලතොග රැස් කිරීම නීති විරෝධීය. අනිසි ලාභ ලැබීම දඬුවම්ලැ බිය හැකි වරදකි. ගොවියා සිය නිෂ්පාදන ආණ්ඩුවටම අලෙවි කළ යුතු වූ අතර හැමදාම පවතින එකම මිල හෙයින් ගොවි ජනතාවගේ ආදායම නොවෙනස්ය. මෙමගින්  පාරිභෝගිකයන්ට වාසි අත්පත්වන නමුත් ගොවි ජනතාවගේ ජීවිත දුක්බරය. නරේන්ද්‍ර මෝදි අගමැතිවරයා සිය ප්‍රතිපත්ති ප්‍රකාශනයේ දී ගොවියන්ගේ ආදායම දෙගුණ කරන බවට පොරොන්දු වූ අතර මෙකී පණත් එහි එක ප්‍රතිඵලයකි.
කෙසේ වෙතත්, නිෂ්පාදන අලෙවියට විවෘත අවස්ථා ඇති කිරීම බරපතල තුරුම්පුවක් සේ ඉන්දීය දේශපාලන විරැද්ධවාදීහු හුවා දක්වති. කලූ කඩ වලට ඉඩදීමක් සහ ධනේෂ්වර ක්‍රමයේ වහලූන් බවට පත් කිරීමක් සේ ප්‍රධාන විපක්ෂය චෝදනා කර තිබේ.

ඉන්දියාවේ ධාන්‍යාගාරය සේ සලකන හර්යානා සහ පන්ජාබ් ප්‍රාන්තවල ගොවියෝ විශාල වශයෙන් විරෝධතා වලට එකතුවූහ. කෙසේ වෙතත් නරේන්ද්‍ර මෝදි අගමැතිවරයාට අනුව අලූත් නීති අනුව කෘෂි අංශයේ ආයෝජන වර්ධනය කෙරේ. මෙතෙක් නොයෙක් බැඳීම්ව ලින් කොටු කර සිටි පිරිසට විවෘත අවස්ථාවක් හිමිවෙයි. වාර්තා පෙන්වන පරිදි ඉන්දියාවේ ජනගහනයෙන්න හරි අඩක් කෘෂිකර්මයෙහි නිරත නමුත් එරට ජාතික ආර්ථීකයට දක්වන දායකත්වය සියයට 15 කට සීමා වී තිබේ. මෙම ව්‍යුහය වෙනස් කරන විප්ලවීය තීරණ අවශ්‍ය බව අගමැතිවරයාගේ අදහසය.
සහන දෙන බව හුවා දක්වා ශ්‍රී ලංකාවේ ගොවියා හා ගොවිතැන පත්කර ඇති ඉරණම ද මෙයට නොදෙවෙනිය. විශාල ජන කොටසක් ගොවිතැන් කරති. ජාතික ආර්ථීකයට දෙන දායකත්වය සියයට හතකට සීමා වී තිබේ. කිසිම ගොවියෙකු තමන්ගේ දරුවා ගොවිතැනට යොමු කරන්න අදහසක නැත. එය කිසිම ලාභයක් නැති, සූරාකෑමකට ලක් වූ ක්ෂේත්‍රයක් සේ නොයෙක් පර්යේෂණ වාර්තා පෙන්වා දී තිබේ.

නමුත් ගොවිතැන තුළ අනුගත වී සිටින අකාර්යක්ෂම ලක්ෂණ වෙන්කරන ප්‍රතිපත්ති වලට රට තුළ කිසිම ඉඩක් නැත. ඉඩම, සහනාධාර, පොහොර හා කෘෂි රසායන භාවිතය, මහා පරිමාන වගාව හෝ විද්‍යාත්මක ක්‍රම භාවිතා කරන්නට යෝජනා කළහොත් එය ඊළග ඡන්දයෙන් ආණ්ඩුව ගෙදර යවන තීරණයක් වනු ඇත. ගොවියන්ට ඇති බලවත්ම හිරිහැරය ඉඩම් අයිතිය බව පෙනේ. පරම්පරා ගණනක් තුළ නොඛෙදුනු ඉඩම් හා අද ගොවිතැන ඉතාම නිරස තත්ත්වයන්ය. ගොවියන් ගෙන් බහුතරයකට ඉඩමක අයිතිය නැත. අයිතිය තහවුරු කරගැනීමට අධිකරණ තීන්දුවකට යා යුතුය. ඉඩම් නඩු පරම්පරා ගණනක් විභාග වන අතර අවසානයේ දී තීන්දුව ලැඛෙනවිට පැමිණිලි පාර්ශවයේ කොටසක් ජීවතුන් අතර නැත. නීතියෙහි ඇති දුබලතා වලින් දුප්පත් ගොවියන්ට සහනයක් නැත. නීතිඥයෝ යහමින් උපයති. ඉඩම් ප්‍රශ්න නිරාකරණයට හෝ අලූත් ඉඩම් ඛෙදා දෙන කිසිම තීරණයකට රට තුළ පහසුවක් නැත. එය මහා අපරාධයක් සේ සලකා ජනතාව පාරට තල්ලූ කරන්නට විරුද්ධ දේශපාලන පක්ෂ සූදානම්ව සිටිති. අද බලයේ සිටින පක්ෂය පවා හෙට විපක්ෂයට ගියහොත් හැසිරෙන ආකාරය එකමය. ගොවි ජනතාව දුප්පත්ව, පීඩිතයන් සේ තමන්ගේ ග්‍රහනයේ තබාගතහොත් ඡන්ද කාලයට දේශපාලනඥයන්ට වාසියකි.


කම්කරු පැලැන්තිය තුළ අද වෙනස්කම් සිදුවී තිබේ. වහලූන් සේ වැඩ කරන ශ්‍රමිකයන් නැත. ශ්‍රමයට වටිනාකමක් ලැඛෙන වෙළද පොලක් යම් පමණකට සකස් වී තිබේ. කෘෂි කර්මාන්තයට ද එම අවස්ථාව අයිති විය යුතුය. ගොවියා ශක්තිමත් කරන හා යැපෙන තත්ත්වයෙන් ගලවාගන්නා වානිජ කෘෂිකර්මයක් රටට අවශ්‍යය. ගොවි ජනතාවට ඉඩම් අයිතිය දෙන හා දැනට නීත්‍යානුකූල නොවන සියළු ඉඩකඩම් ගැන සොයා ඒවා නිරවුල් කිරීම විශාල අවශ්‍යතාවයකි. අනාගතයේ දී ඇතිවන ආහාර අවශ්‍යතා සහ කෘෂිකර්මයෙහි වෙනස්කම් තුළින් මෙරට ගොවියන්ට තැනක් ලැඛෙන්නට නම් මෙම අන්ධකාරයෙන් මුදවා ගැනීම අවශ්‍යය.

ජීවිතය සහ ජීවත්වීම

ප්‍රතිචාරයක් ලබාදෙන්න

 2020/11/11- ලංකාදීප
සාමාන්‍ය ජන ජීවිතය ගැටළු සහගත තැනකය. ජීවත්වීම පමණක් නොව ජීවිතය ගැන ද අවධානය යොමු කරන්නට සිදුවී තිබේ. දෙවැනි වතාවට කොවිඩ් රැල්ලක් නැගී ඇති අවස්ථාවක ජීවිත ආරක්ෂා කරගෙන ජීවන සටනට මුහුණ දිය යුතුව ඇත. විශේෂඥ වාර්තා අනුව වසර දෙකක් පමණ ෙඉදිරියට කොවිඩ් -19 වසංගතය සමග පවතින්නට සිදුවිය හැකිය. එවැනි අනාවැකි තිබිය දී දීර්ඝ කාලයක් රට ලොක් වඩුන් කිරීම ප්‍රායෝගික නැත. 

රටවල් හා සංවිධාන ගණනාවක් කොවිඩ් වයිරසය ස`දහා එන්නතක් සොයා ගැනීමට පර්යේෂණ කරමින් සිටී. ඉන්දියාව, චීනය, සිංගප්පූරුව, රුසියාව හා කියුබාව ඇතුළු රටවල් ගණනාවක් කොවිඩ් ස`දහා එන්නත් නිපදවීම ආරම්භ කර ඇති අතර සායනික මටට්මින් භාවිතා කෙරේ. එන්නත් අලෙවිය ආරම්භ වී ඇත. මිලියන ගණනින් ඇනැවුම් කරන බව අනාවරණය වෙයි. පළමු වටයේ දී එය මිල අධික විය හැකිය. එහෙත් තම පුරවැසියන්ගේ ජීවිත ආරක්ෂා කරගැනීමේ චේතනාව ඇති රටවල් යුහුසුළු වී තිබේ. අසල්වැසි ඉන්දියාව මහා පරිමානයෙන් ඖෂධ වානිජ වශයෙන් නිපදවන රටකි. ලෝකයේ එන්නත් වලින් සියයට හැටක් පමණ එහි නිපදවෙන බව දැක්වෙයි. ජාත්‍යන්තරව පිලිගත් කොවිඩ් එන්නත නිපදවීම අරඹා ඇති ඉන්දියාව එය සමීප රටවලට නිකුත් කරන්නට තීරණය කර තිබේ. 


කොවිඩ් මර්දනයෙහි නිරත ඉදිරිපෙල කාර්ය මණ්ඩලයට සහ රෝගයෙන් අවදානමක් ඇති පිරිසට වහාම එන්නත ලබා දීමට පියවර ගැනීම රජයේ වගකීම වනු ඇත. අධිශීතරක පරිසරයක ප්‍රවාහනය කර මාත්‍රා දෙකක් අවස්ථා දෙකක දී ලබා ගැනීමෙන් ප්‍රතිශක්තිකරණයක් ලැබෙනබව තහවුරු වී තිබේ. දැනට අවම වශයෙන් මෙරට ජනගහනයෙන් සියයට විස්සකට එනම් මිලියන පහක ජන කොටසකට එන්නත් ලබා දිය යුතු යැයි ලෝක සෞඛ්‍ය සංවිධානය නිර්දේශ කර ඇත. එය පහසු කාර්යයක් නොවන අතර විශාල පිරිවැයක් දැරිය යුතු හා ලෝක තරඟකාරීත්වය ඉදිරියේ ඉක්මනින් කරගත යුතු කාර්යයක් බව සඳහන්කළ යුතුය. බංගලාදේශය දැනටමත් ලෝක සෞඛ්‍ය සංවිධානයේය අනුමැතිය ලැබූ ඉන්දියාව නිපදවන එන්නත් මිලියන තිහක් ඇනවුම් කර තිබේ. 


සාමාන්‍යයෙන් සිදුවන පරිදි කොවිඩ් එන්තත් කිරීම හා ඒවා මිල දී ගැනීම ගැන ඉදිරියේ දී සෑහෙන වාද විවාද ඇති විය හැකිය. වෛද්‍ය විශේෂඥයන්, වෘත්තීය සමිති පමණක් නොව දේශපාලනඥයෝ ද එහි කොටස් කරුවෝ වෙන්නට ඉඩ තිබේ. මාධ්‍ය සහ සමාජ මාධ්‍ය අවුලවනු ඇත. මැතක සිද්ධි එයට හොද උදාහරණයකි. පටු ආකල්පයෙන් කරන අවලාද අවංක අභිලාශයන් ද අධෛර්යයට පත් කරන්නට ඉඩ තිබේ. එය භයානකය. තීරණාත්මක අවස්ථාවේ දී අනවශ්‍ය වාද අතහැර ජනතාවගේ ජීවිත ගැන තීරණ ගැනීමට දෙවතාවක් කල්පනා කළ යුතු නැත. රට වෙනුවෙන් සහ රටේ ජනතාව වෙනුවෙන් තීරණ ගැනීමේ දී ඉලක්කයකට අනුව කාර්යක්ෂමව ක්‍රියා කළ යුතුව ඇත. බලවත් රෝග වලින් ජනතාව ගලවා ගැනීමේ එන්නත් ක්‍රම සාර්ථකව භාවිතා කළ රටක් වශයෙන් ශ්‍රී ලංකාව ඉතිහාසයට එක්ව ඇත. පෝලියෝ සහ මැලේරියාව මර්දන වැඩ පිලිවෙල ජාත්‍යන්තරයේ පැසසුමට ලක්විය. කොවිඩ් එන්නත සම්බන්ධයෙන් ද ප්‍රමාදයකට හේතු අනවශ්‍යය. ඉක්මන් තීරණ ගෙන යුහුසුළුව වැඩ කරන්නට සෞඛ්‍ය අංශ වලට නිසි බලය පැවැරීම සුදුසුය. නියාමනය හා නිසි රෙගුලාසි යටතේ පුද්ගලික අංශයට ද විවෘත කළ යුතුය.


ජනතාවට ආරක්ෂක පියවර අනුගමනය කරන සේ තද අවවාද කරන රජය අවදානම අඩු ස්ථාන වල රට විවෘත කරන තීරණ ගෙන තිබේ. සෞඛ්‍ය කාර්ය මණ්ඩලය හා ආරක්ෂක අංශවල කැපවීම එකී තීරණ පිටුපස ඇත. සිය ජීවිත අවදානම පවා නොතකා ඉතා වගකීමෙන් ක්‍රියා කරන පාර්ශව වලට පැසසුම හිමිවිය යුතුය. ඔවුහු නිරත මෙහෙවර උදෙසා කොවිඩ් එන්නත්කරණය නිසි වටිනාකමකි. සෑහෙන පිටිවහලකි. අකාලයේ ජීවිතයක් අහිමිවීම අතිශය වේදනාබර මොහොතක් බව නොකිවමනාය. ජනතාව ව්‍යසනයෙන් ගලවා ගැනීම හැර අනෙක් පියවරක් ගැන මෙම මොහොතේ වාදයක් තිබිය යුතු නැත.

කල් දැමීම අතහරිමු පුහුණු කරවීම අරඹමූ

ප්‍රතිචාරයක් ලබාදෙන්න

04/11/2020- ලංකාදීප


සාමාන්‍ය ජන ජීවිතය වෙනදා මෙන් ගත වෙන්නේ නැත. කොවිඞ් -19 වයිරසයේ ව්‍යාප්තිය රට මුහුණ දෙන අර්බුදයකි. රැකී රක්ෂාවල නිරතවීම අවහිර වී තිබේ. වැඩට යන්නේ කවදාදැයි ඇගිලි ගණින පිරිසක් පමණක් නොව සේවයට නොයන නමුත් වැටුප නිසි පරිදි ලැබෙන තෙක් බලා සිටින පිරිසක් ද අප අතර සිටිති. පවතින ස්වභාවය ඉක්මනින් වෙනස්වනු ඇතැයි පර්යේෂණ වාර්තා අනාවරණය කරයි. නිවසට වී සිටින අතරවාරයේ සේවා ඉක්මන් කිරීම ලෝකයේ සාමාන්‍යකරණය වී ඇත. කලින් තක්ස්රු කරන ලද වකවානුවට වඩා ඉක්මනින් රොබෝ යුගය ඇරඹෙනු ඇතැයි අපේක්ෂා කෙරේ. රට නිසොල්මන් නමුත් ලෝකයේ, දියුණු ඇතැම් රටවල ව්‍යුහය වෙනස්ය. ඉදිරි වසර පහක කාලය තුළ දැන් සේවය කරන ශ‍්‍රම බලකායෙන් හරි අඩක් නැවත පුහුණු කළ යුතු යැයි ගණන් බලා තිබේ. මෙම කාලය දුරස්ථ පුහුණුව සදහා ගැලපෙන කාල පරිච්ෙඡ්දයකි.

වැඩ කරන ජනතාවට නැවත වෘත්තීය පුහුණුව අවශ්‍ය බව කල්පනා කරන්නේ ඇයි? ලෝක ආර්ථික සංසදයේ වාර්තාවක් අනුව රොබෝ තාක්ෂණය රටවල් විසි හයක අලූත් යුගයේ රැකී රක්ෂා මිලියන අසූ පහක් බිහිවනු ඇත. එයට පසුබිම හදමින් රොබෝවරු මිලියන අනූ හතක් ද සේවයට එකතු වනු ඇතැයි සැලකේ. රොබෝ ආගමනයය හෙයින් මිනිස් ශ‍්‍රමය අවලංගු වනු ඇති අතර රැකියා අහිමි වියහැකි බවට පැවැති භීතිය අනෙක් පැත්තකට හැරී තිබේ. අලූතින් කරන ලද සමීක්ෂණයකට අනුව සියයට හතලිස් තුනක පිරිසක් තම රැකියා අවදානම ගැන හිතන අතර සියයට තිස් හතරක් දෙනා අලූතින් වෘත්තීය අවස්ථා වලට නැඹුරු විය හැකි වෙතැයි විශ්වාස කරති. ඩිජිටල්කරණයකට සූදානම්ව සිටින පිරිස සියයට අසූහතර ඉක්මවන බව මෙම වාර්තාව පෙන්වා දෙයි.


ඩිජිටල්කරණයකට සූදානමක් නැති සහ එම පරිවර්තනය හමුවේ තමන්ට අවස්ථා අහිමිවන බවට සැක කරන සමාජ ලෝකයේ තැනින් තැන ඇත. ශ‍්‍රී ලංකාව අයිතිවිය යුතු තැන ගැන දැන් තීන්දු කළ යුතුය. අනාගතයේ ඇතිවන අවස්ථාවලින් උපරිම ප‍්‍රයෝජන ගැනීමට කල්තබා පියවරක් නොගතහොත් නැවත වටයකින් ආපස්සට යන රටවල් අතර එකක් වෙන්නට ඉඩ තිබේ. එය ඉතා අවදානම් සහගතය.
ඉදිරි වසර පහ තුළ සිය ශ‍්‍රම බලකාය නැවත පුහුණු කරන සැලසුම කි‍්‍රයාවට නැගිය යුතු බව සිතන රාජ්‍ය හා පුද්ගලික අංශයේ ව්‍යවසාය විශාල ප‍්‍රමාණයක් ගැන අනාවරණය වී තිබේ. පුද්ගලික අංශයේ ව්‍යවසාය වලින් තුනෙන් දෙකක් තම ආයෝජන නැවත බලගන්වන්නට සිදුවනු ඇති බව ගණන් බලා ඇත. එය පහසු කාර්යයක් නොවේ. කාර්ය මණ්ඩලය පුහුණු කරන්නට හා අලූත් ආයෝජනය සදහා ආණ්ඩු වලට ශක්තිය ඇත. එහෙත් පුද්ගලික අංශයේ මග හැරෙන ව්‍යාපාර හා සේවා අංශ අසීමිත බව දැක්වෙයි. මෙම අංශ නැවත බලගන්වනු සදහා පසු විපරමක් අවශ්‍යය. උවමනා කරන ප‍්‍රාග්ධන අවශ්‍යතා සම්පාදනය කර ඉදිරි තාක්ෂණික යුගයට සූදානම් කළ යුතුය. පස්වන පරම්පරාවේ රුහැන් රහිත සන්නිවේදනයට ආයෝජනය කළ යුතු අතර රූපවාහිනි සේවා ඩිජිටල්කරණය කළ යුතුවේ. මෙම තීරණ ඉතා සංකීර්ණ බව නිසැකය. කළ යුතු වෙනස්කම් තෝරා බේරා ගැනීම අපහසුය. එහෙත් ලෝක ආර්ථික සංසදය පෙන්වා දෙන කරුණු කෙරෙහි අවධානය යොමු කළ යුතුව තිබේ. ශ‍්‍රම බලකායෙන් කොටසක් මෙවැනි පැති කෙරෙහි නැවත පුහුණු කිරීම බලවත් අවශ්‍යතාවයකි.


එක පැත්තකින් රාජ්‍ය ආර්ථිකය දුබල තැනක සහ පුද්ගලික අංශය ආයෝජන ශක්තියෙන් හීන අවස්ථාවක අනාගතයේ එළැඹෙන ව්‍යුහය ගැටළුකාරී එකක් වනු නොඅනුමානය. කොවිඞ් වසංගතයේ පැතිරීම හා එයින් ඇති කරන පීඩනය ඉදිරියේ පවා ඉදිරි පරම්පරාව ගැන කල්පනා කිරීමට වගකීමක් අප සියළු දෙනාටම තිබේ. අත්හැර දැමිය යුතු මොහොතක් නැත. පුනරුදයක් උදෙසා නැවත හැරවිය යුතු තැන් කරා අවතීර්ණ වන්නේ කෙසේ ද යන්න සාකච්ඡා කිරීම අවශ්‍යය. රජය හා පුද්ගලික අංශය එකතු වී සමබර වැඩසටහනක් සම්පාදනය කාලෝචිතය.

දේශපාලනයේ කුණාටු මවන කොවිඩ් වසංගතය

ප්‍රතිචාරයක් ලබාදෙන්න

2020.10.28 – ලංකාදීප

Covid -19 වයිරසයේ ව්‍යාප්තිය හුදෙක් භයානක වසංගතයක් පමණක් නොවේ. ලෝකය පුරා දේශපාලන කුණාටු නිර්මාණය කරමින් සිටී. චීනයේ හුඛෙයි ප්‍රාන්තයෙන් මතු වූ, තවමත් ප්‍රතිකාරයක් සොයා ගෙන නැති වයිරසය ලෝකයේ සියළුම රටවලට පැතිරී හමාරය. පළමු වටය අවසානයේ, දෙවැනි රැල්ලක් ද නැගෙමින් තිබේ. ප්‍රතිවාදීහු බලයේ සිටින පාලකයන් වෙත ඇ`ගිල්ල දිගු කරන අතර සෞඛ්‍ය ගැටළු නිරාකරණය පසෙක තිබිය දී, පැන නැගෙන ඇතැම් දේශපාලන අර්බුද පාලනය කරගැනීමට සමහර රටවලට සිදුවී ඇත.
චෙක් ජනරජයේ තත්ත්වය එයට එක සාක්ෂියකි. යුරෝපා හවුලේ සාමාජිකයෙකු වන එම ජනරජය තුළ, පැතිර යන කොවිඩ් දෙවැනි රැල්ල නොසිතන කලබලයක් ඇති කර තිබේ. සෞඛ්‍ය ඇමැතිවරයා අසාර්ථක බව දක්වා ඔහු ඉවත් කර නියෝජ්‍ය ඇමැතිවරයා පත් කරන ලද නමුත් ඉතා කෙටි කාලයක් තුළ ඔහු ද අස් කර ඇති බව ජාත්‍යන්තර මාධ්‍ය විශේෂයෙන් අනාවරණය කරයි.

රට තුළ තද රෙගුලාසි පනවා තිබිය දී අලූත් ඇමැතිවරයා අවන්හලකට ප්‍රවේශ වී ඇති අතර මුඛ ආවරණයක් පැළ`ද නැත. නිල වාහනයෙන් ඔහුගේ රාජකාරි රියැදුරා සමග පිටත්වන පින්තූරයක් ප්‍රචාරයවීමෙන් පසු ඉල්ලා අස්වන ලෙස අගමැතිවරයා නියම කර ඇත. තමන් වරදක් නොකළ බව ස`දහන් කරන නමුත් සෞඛ්‍ය ඇමැතිවරයා ගේ ප්‍රකාශය පිලිගැනීමට ආණ්ඩුව සූදානම් වූයේ නැත. වසංගතය හිස ඔසවන, දරුණු අවස්ථාව සමග දේශ සීමා වසා දමන ලද අතර යුරෝපයේ එවැනි පියවරක් ගත් පළමු රට චෙක් ජනරජයයි. දිනපතා රෝගීහු පහලොස් දහසක් පමණ වාර්තා වෙන එරට ජනගහනය මිලියන 10.7 කි. මෙතෙක් අනාවරණය වූ ආසාදිතයන් ප්‍රමාණය දෙලක්ෂ විසි දහස ඉක්මවා තිබේ.

පැතිරීම වලක්වනු ස`දහා පාසල්, අවන්හල්, ක්‍රීඩාංගන ඇතුළු සියළු පොදු තැන් වසා දැමූ  අතර වැඩ මීටර් දෙකක සමාජ දුරස්ථභාවයක් නියම කළේය. බැහැර යන අවස්ථාවල පමණක් නොව නිවසේ දී ද මුඛ ආවරණ අනිවාර්ය කර ඇත. එබ`දු පසුබිමක් තුළ සෞඛ්‍ය ඇමැතිවරයා ගේ හැසිරීම නරක පුර්වාදර්ශයක් බව චෙක් ආණ්ඩුව තීරණය කර ඇති බව දැක්වෙයි.
ජනතාවට අවවාද දෙන පාලකයෝ අතුරින් ඇතැමෙකු ආදර්ශවත් නොවන තැන් ලෝකයේ නොයෙක් රටවල සුලබ සිදුවීමකි. ශ්‍රී ලංකාවේ ස්වභාවය ද එයට සමානය. ජනතාවට තද නීති පනවන අතර මැති ඇමැතිවරු අතරින් ඇතැමෙකු ඒවා උල්ලංඝනය කරති. නිලධාරීහු ද ඒ අතර සිටිති. මහජන මුදලින් නඩත්තුවන ඔවුහු සෞඛ්‍ය ආරක්ෂක පියවර වලට අනුගත විය යුතුය. අත්‍යවශ්‍ය කාරණයකට පවා වැසියන්ට සංචරණය තහනම් කරන නමුත් දේශපාලනඥයන්ගේ ගමන් බිමන් නතර නොවීම විවේචනයට හේතු වී තිබේ. වසංගත තත්ත්වය පාලනය කරගත නොහැකි අතරවාරයේ එයින් දේශපාලන වාසි ලබාගැනීමට දරන ප්‍රයත්න සම්බන්ධයෙන් විපක්ෂ කණ්ඩායම්වල විරෝධයක් ද ඇත.
චෙක් ජනරජය පනවන ලද නීතිවලට පසු මතු වූ අර්බුද කෙසේ වෙතත්, අවශ්‍යම කාරණයක දී ගමන් බිමන් යන ජනතාව හ`දුනා ගැනීමට වර්ණ භාවිතා කිරීම ආදර්ශයක් කරගත හැකිය. අවදානම් කලාපයක වැසියන්ට රතු පැහැ ස්ටීකර්යක් පළ`දවන අතර අවදානම අඩු තැන්වල පිරිසට කහ සහ අවදානමක් රහිත තැන් වල සිට යන එන ජනතාවට කොළ පැහැති ස්ටීකරයක් පළ`දින්නට සිදුවෙයි. එමගින් දුර සිට නිරීක්ෂණයට අවස්ථාවක් ද හිමි වී ඇත.
කොවිඩ් වයිරසයට ප්‍රතිකාර සම්බන්ධ පර්යේෂණ නොයෙක් තැන් වල සිදුවෙයි. ඒවායේ සාර්ථක භාවය ගැන තවමත් නිශ්චිත තොරතුරු නැත. ඉදිරි වසර දෙක තුන දක්වා ආක්‍රමණය පවතිනු ඇති බව සෞඛ්‍ය අංශ අනතුරු අ`ගවති. එවැනි වාතාවරණයක් තුළ ආණ්ඩුවල අසාර්ථක බව පෙන්වා බලය අල්ලා ගැනීම සමහර රටවල ක්‍රමය වී ඇත. සෞඛ්‍ය අර්බුදය පදනමක් කරගෙන සමාජ හා දේශපාලන ව්‍යාකූලතා ඇති වෙන්නට ඉඩ තිබේ. මෙම තීරණාත්මක මොහොතේ දී, සියළු පාර්ශව තම වගකීම නිසි සේ අවබෝධ කරගත යුතුය. ජනතාවට අලූත් අණ පණත් පනවන අතරවාරයේ දේශපාලනඥයන් ආදාර්ශවත් විය යුතුය. නිසි කැපවීම නිලධාරීන්ගේ යුතුකමකි. සියළු පාර්ශව එකතු වී අවදානම් කාර්ය බලකායක් ස්ථාපිත කර සැලකිල්ලකින් කටයුතු කිරීම වැදගත්ය. 

මැති ඇමැති සංඛ්‍යාව බස්සන ඉතාලි පාඩම

ප්‍රතිචාරයක් ලබාදෙන්න

2020/10 /21 – ලංකාදීප

මුළු ලෝකයම එකිනෙකට වෙනස් ගැටළු ගණනාවක සිටින අතරවාරයේ ඉතාලි වැසියෝ පාර්ලිමේන්තුවේ නියෝජනය කප්පාදු කරන තීරණයක් ගෙන ඇත. එරට පාලක පක්ෂ සන්ධානයේ යෝජනාවක් අනුව, මන්තී‍්‍ර කණ්ඩායම හා සෙනෙට් මණ්ඩලය නියෝජනය අඩු වනු ඇති අතර එය සියයට හැත්තෑවක බහුතර ඡන්දයකින් අනුමත වී තිබේ. එරට ව්‍යවස්ථාව අනුව අලූත් සංශෝධනය වෙනුවෙන් ජනතා මතය විමසිය යුතුය. ජනමත විචාරණයෙන් ජය ලැබූ සංශෝධනය 2023 මහ මැතිවරණයේ සිට ක‍්‍රියාත්මක වන බව දැක්වෙයි.

වසර තිහක ඉතිහාසය තුළ බලයට පත් වූ දේශපාලන පක්ෂයක් ඡන්ද පොරොන්දුවක් ඉටු කළ පළමු අවස්ථාව බව මෙම තීරණය ගැන සදහන් කරන විචාරකයෝ කරුණු දක්වති. බලයේ සිටින සන්ධානයේ බලවත් පාර්ශවය ෆයිව් ස්ටාර් පක්ෂයයි. මෑත කාලයේ දී දේශපාලනයේ මතුවූ බලවත් පිරිහීම පදනම් කරගෙන ජනතා අවධානය දිනාගත්තේය. මන්තී‍්‍ර නියෝජනය අඩු කිරීම එම පක්ෂයේ යෝජනාවකි. එමතීරණය අනුව 690 ක් ව තිබුණ මන්ත‍්‍රී සංඛ්‍යාව 400 දක්වා අඩු කෙරේ. සෙනෙට් මණ්ඩලය 315 කක සිට 200 දක්වා අඩු වනු ඇත. නියෝජනය අඩු කිරීමෙන් පමණක් යුරෝ බිලියනයක මුදලක් ඉදිරි වසර දහයක් තුළ ඉතිරි කරගත හැකි වනු ඇතැයි ගණන් බලා තිබේ.

කෙසේ වෙතත් මෙම යෝජනාව ගැන විවේචනය කරන ඇතැම් පිරිසක් දරන මතය වෙනස්ය. නියෝජනය අඩු කිරීමෙන් ප‍්‍රජාතන්ත‍්‍රවාදය පිරිහෙන බව දක්වා තිබේ. වියදම් ඉතිරි කරගැනීම පමණක් නොව ජනතා නියෝජනයට ඉඩ අහිමිවීම ගැන ද කල්පනා කළ යුතු බව දක්වා ඇත.

බලවත් දේශපාලන අර්බුද ගණනාවකට පසු එරට දක්ෂිණාංශික හා වාමාංශික පක්ෂ එකතු වී ආණ්ඩුවක් පිහිටුවන්නේ කලකට පසුවය. එයට මුල් වූයේ ඉතාලියේ විහිළුකාර චරිතයක් වශයෙන් නැගී ආ බීපෙයි ග‍්‍රිල්ලෝ ගේ ව්‍යායාමයයි. හෙතෙම සංවිධානයක්, අරමුදලක්, ද්‍රෘෂ්ඨිවාදයක් හෝ මුලස්ථානයක් නැති ෆයිව් ස්ටාර්ස් ව්‍යුහය නිර්මාණය කළ අතර එය අන්තර් ජාලයෙන් ජනතාව අතරට ගියේය. මැතිවරණයෙන් ජය ගත් නමුත් ආණ්ඩු බලය සදහා ප‍්‍රමාණවත් ආසන සංඛ්‍යාවක් රහිත අවස්ථාවක විශ්ව විද්‍යාල මහාචාර්යවරයෙකු වූ ජුසෙෆේ කොන්ටී අගමැතිවරයා වශයෙන් නම් කර සන්ධාන ආණ්ඩුව ස්ථාපිත කළේය. ඔහුගේ ආණ්ඩුව මන්ත‍්‍රීවරු අඩු කරන යෝජනාව සදහා ජනමත විචාරණය පැවැත්වීය.

දේශපාලන ක‍්‍රම සහ දේශපාලනඥයන් ගැන ලෝකයේ කොතැනත් විවේචන තිබේ. පුද්ගල චරිත ගැන අප‍්‍රසාදයක් ඇත. ජනතාව ඉදිරියට පැමිණ බලය ඉල්ලන දේශපාලනඥයෝ බලය ලැබුණ පසු හැසිරෙන අන්දම කෙරෙහි අප‍්‍රසාදය පළකරති. වැටුප් හා වරප‍්‍රසාද කෙරෙහි නැඹුරුවන අතර බලය පාවිච්චි කරන අන්දම ගැන ද ජනතාව තුළ අසතුටක් තිබේ. එය ලෝකයේ අද දැකිය හැකි ප‍්‍රවණතාවයකි. බලවත් ප‍්‍රසාදයකින් බලයට පත් කරන ආණ්ඩු ඉතා ඉක්මනින් පිරිහෙන අතර ඇමරිකානු ජනාධිපති ඩොනල්ඞ් ට‍්‍රම්ප් හොදම උදාහරණය බව දැක්විය හැකිය.

තාක්ෂණ යුගයේ දී ප‍්‍රජාතන්ත‍්‍රවාදයට විශාල අවස්ථා ඇත. මහජනතාව නියෝජනය කරන තැන සම්බන්ධයෙන් බලවත් පරිවර්තනයකට යා හැකිය. ඉතාම ඉක්මනින් ජනතා මතය දැනගැනීමට තොරතුරු තාක්ෂණයෙන් ලබා ගත හැකි පිටිවහල ඉමහත්ය. නිවැරදිව මතය මැන ගත හැකි ක‍්‍රමයක් සකස් කරගතහොත් සුළු පිරිසක්  නගන විශාල ඝෝෂාවකින්, සත්‍ය විකෘති කිරීම ද වලක්වනු හැකිය. ව්‍යවස්ථා සංශෝධනයක් ගැන සාකච්ඡා  කරන මෙම කාලවකවානුවේදී මහජන නියෝජිතයන් ගණන අඩු කරන හා දුෂණයට හේතුවක් වන, අධික වියදම් සහිත මනාප ක‍්‍රමය ඉවත් කිරීම ගැන ද අවධානය යොමු කිරීම සුදුසුය. ඉතාලියෙන් එන පණිවුඩය විමර්ෂණය කිරීම එහිලා වැදගත් වනු ඇත.

ජාතික වස්තු කොල්ලකරුවන්ගෙන් ආපසු ලැබෙන සලකුණු

ප්‍රතිචාරයක් ලබාදෙන්න

2020/ 10/ 14 – ලංකාදීප

කොවිඞ් 19 වයිරසයේ බලපෑම ඉදිරියේ මුළු ලෝකයම ගැටළු සහගත තැනකය. එක්තරා ආකාරයකට නිසොල්මන්ය. එහෙත් නිහඩ වී නැත. අතීත උරුමය ඉල්ලා කරගෙන ගිය සටනක් තීරණාත්මක තැනකට පැමිණ තිබේ. නෙදර්ලන්ත කෞතුකාගාර දෙකක් තමන් සතු එහෙත් වෙනත් රටවලට අයත් පෞරාණික දේ ආපසු භාර දෙන්නට තීරණය කර ඇත. එය සෑහෙන කාලයක්  කරගෙන ගිය අරගලයක ප‍්‍රතිඵලයකි. නිසි නීත්‍යානුකූල ක‍්‍රමවේදයක් සකස් කළහොත් ලක්ෂයක පමණ භාණ්ඩ ප‍්‍රමාණයක් ආපසු  දෙන බව එරට කෞතුකාගාර ප‍්‍රධානීහු දෙපොලක් ජාත්‍යන්තර මාධ්‍යයට කියා තිබේ.

නොයෙක් හේතු මත රටවල් යටත් කරගෙන සිටි අධිරා්‍යවාදීහු එම රටවල නටඹුන්, චිත‍්‍ර, ස්මාරක හා පැරණි කෘති රැගෙන ගියේය. සමහර ඒවා  පොදු ස්ථාන වල ප‍්‍රදර්ශනය කෙරේ. තවත් කොටසක් පුද්ගලික අයිතියක් හෝ ආයතන වල වත්කම් වශයෙන් පවතී. වෙනත් රටවල් අයිතිකරගෙන සිටින තම ඓතිහාසික හා සංස්කෘතික මෙවලම් ගැන ශෝක වන අලූත් පරපුර ඒවා ආපසු ඉල්ලා සිටිති. නෙදර්ලන්තය නොඑසේනම් ලන්දේසී ජාතිකයෝ රටවල් යටත් කරගත් බලවත් ජාතීන් අතර එක කොටසක් පමණකි. පෟතුගීසි සහ ඉංග‍්‍රීසි ජාතිකයෝ පමණක් නොව පෙරදිග හා අපරදිග බලවත් රටවල් ද වෙති.

ලංකාවට අයත් ඉතා වටිනා පුරාවස්තු හා ලේඛන සැහෙන ප‍්‍රමාණයක් පවා අධිරාජ්‍යවාදීහු අයිතිකරගෙන ඇති බව නොරහසකි. බ්‍රිතාන්‍ය කෞතුකාගාරයේ ප‍්‍රදර්ශනයකට තබා ඇති ලංකාවට අයිති කෞතුක භාණ්ඩ එයට එක උදාහරණයකි. නැවත රටට අවශ්‍ය බව නොයෙක්වර ප‍්‍රකාශ කර ඇති නමුත් නොයෙක් හේතු අනුව ඇතැම් දේ ලැබී නැත. සංකේතාත්මකව සමහර දේ නිල වශයෙන් භාර දී තිබේ. අතීත උරුමයේ කොටස් ආපසු ලැබිය යුතු බව අවිවාදිතය. එහෙත් ඒවා ආපසු ලබාගැනීමට සකස්විය යුතු ක‍්‍රමවේදය ඉතා සංකීර්ණය.

අයිතිකරගැනීම පමණක් නොව ඒවා මතු පරපුර වෙනුවෙන් ආරක්ෂා කර ගැනීම ද වැදගත්ය. පැරණි දේ ආරක්ෂා කරගැනීම සම්බන්ධයෙන් අද රට තුළ විශාල සාකච්ඡාවක් තිබේ. පුරා විද්‍යාත්මක වටිනාකමක් සහිත ස්ථාන ගැන අවධානය යොමු වී ඇත. සමස්ථයක් වශයෙන් සලකනවිට රට තුළ ඇති ආරක්ෂා කරගත යුතු දේ රකින පිලිවෙල සම්පූර්ණයෙන්ම සාර්ථකයැයි සදහන් කරන්නට නොහැකිය. වටිනා ලිපි ලේඛන, පුස්කොල පොත් චිත‍්‍ර සහ ශිලා ලේඛන ඇතුළු දහසකුත් දේ නිසි සේ සංරක්ෂණය නොවෙන බව පෙනේ. වෙනත් රටක බලවත් පරිශ‍්‍රමයකින් ආරක්ෂා කරන දෙයක් නැවත ලබා ගැනීමෙන් පසු එවැනිම අවධානයකින් රැකබලා ගන්නට ඒවා ඉල්ලන රටවලට හැකියාවක් තිබේද යන්න ප‍්‍රශ්නයකි. දැනට අයිති කරගෙන ඇති රටවල් එසේ නොකළේ නම් මෙම සදහන් කරන වටිනාකමක් ඇති දේ වලට අත්විය හැකිව තිබුණ ඉරණම ද වෙනස් එකක් වෙන්නට ඉඩ තිබේ. එහෙයින් මෙම කාරණයේ දී සලකා බැලිය යුතු පැති ගණනාවකි.

ඉතිහාසය ආරක්ෂා කිරීම විශේෂ විෂයයකි. වැදගත් දේ රැකබලාගැනීමට නොයෙක් රටවල් විශාල ප‍්‍රයත්නයක නිරතය. බ්‍රිතාන්‍යයේ කෞතුකාගාර නඩත්තුව එක උදාහරණයකි. රජයේ වියදම පමණක් ප‍්‍රමාණවත් නැත. පුද්ගලික පරිත්‍යාග වලට අමතරව ලොතරයි අරමුදලක් පවත්වාගෙන යයි. ලොතරැයි වලින් ලැබෙන ආදායමෙන් කෞතුකාගාර, පුස්තකාල හා ලේඛනාගාර වල ඇති ඉතා වටිනා දේපොල ආරක්ෂා කෙරේ. ලොතරුයි දිනුමකින් වාසි ලබන තරමටම එයින් සැලසෙන සමාජයීය යුතුකම ගැන විශාල උනන්දුවක් තිබේ. උරුමය නැවත ලබා ගැනීමේ ප‍්‍රයත්නය වැදගත්ය. පවතින දේ ආරක්ෂා කරගැනීමට අනුගමනය කරන පියවර එයටත් වඩා වැදගත්ය.

Older Entries Newer Entries