අවධානයෙන් සිටිය යුතු හෝරාවක්

ප්‍රතිචාරයක් ලබාදෙන්න

LOGO\

2019/04/24 – ලංකාදීප

ත‍්‍රස්තවාදයට තැනක් නොතැනක් නැත. රැයක් හෝ දවාලක් ගැන වෙනසක් නොමැත. අලූත් අවුරුදු නිවාඩුවට පසු එළැඹුන පළමු පාස්කු ඉරිදා රටට ඉතාම අවාසනාවන්ත දවසක් බවට පත් කළේය. මරාගෙන මැරෙන ප‍්‍රහාර ගණනාවක් බව මාධ්‍ය වාර්තා කර තිබේ. දේවස්ථානයට රැස්වී සාමය හා සමාදානය ප‍්‍රාර්ථනා කළ අහිංසක ජනතාව බිලිගෙන ඇති අතර ප‍්‍රධාන දේව මෙහෙයට පසු තරු හෝටල්වලට පැමිණි පිරිසක් ද ඉලක්ක වූ බව විශ්වාස කෙරේ.

ත‍්‍රස්තවාදය පරාජය කරන්නට රටට හැකි විය. අවසාන වෙඩි මුරය පවත්වා අවි නිහඞ කරන ලද ශ‍්‍රී ලාංකේය ආරක්ෂක හමුදා අංශ වලට නැවතත් ගිනි අවි අතට ගැනීමට සිදුවීම අවාසනාවන්ත තත්ත්වයකි. ඉකුත් දස වසර තුළ සාමකාමී සහජීවනය මෝදු වෙමින් පැවතිණි. ශ‍්‍රී ලංකාව අලූත් යුගයකට ඇතුළු වෙමින් සිටින බව ජාත්‍යන්තර ප‍්‍රජාව විශ්වාස කළේය. අතීතය අමතක කර නැවත නැගී සිටිනු අරමුණු කරගෙන හදවත් පිබිදෙමින් තිබුණ අවස්ථාවක මතු වූ මෙම හදිසි ප‍්‍රහාරය රට කම්පනයට පත් කර තිබේ.

මෙම ප‍්‍රහාර මාලාව හොඳින් සැලසුම් කළ පිරිස, සන්සුන් රටක් නොසන්සුන් කිරීමෙන් අරමුණු කළේ කුමක් ද යන්න පැහැදිලිය. ජාත්‍යන්තර ත‍්‍රස්තවාදී කල්ලි මෑත කාලය තුළ ලෝකයේ නොයෙක් රටවල අහිංසක ජනතාව වෙත ප‍්‍රහාර එල්ල කළේය. සිද්ධි වලට ගොදුරු වූ රටවල් ආරක්ෂාව තහවුරු කරනු සඳහා විවිධ පියවර ගත්හ. නොයෙක් තැන් වලට ප‍්‍රහාර එල්ල වන විට, ත‍්‍රස්තවාදය අවසන් කරන ලද හෙයින් අපට ප‍්‍රශ්නයක් නැති බව හිතන්නට අප නිරායාසයෙන්ම නැඹුරු විය. බුද්ධි අංශ පැත්තකට කරන ලද අතර ආරක්ෂක අංශ හොඳ මානසිකත්වයක තැබිය යුතු බව අමතක කළේය. අනවධානයෙන් සිටිය යුතු මොහොතක් නැති අතර සෑම අවස්ථාවකම සුපරීක්ෂාකාරී විය යුතු බව මෙම සිද්ධිය පෙන්වා දී තිබේ. ඉතිහාසය අපට පාඩම් කියා දී ඇත. ඉක්මනින් අමතක කිරීම අපගේ වරදකි. මත් ද්‍රව්‍ය ජාවාරම්කරුවන් සහ ජාත්‍යන්තර ත‍්‍රස්තවාදී කල්ලි සිය සූක්ෂම වැඩපිලිවෙල අත්හැර නැත. ලෝකයේ එක තැනක් පරීක්ෂාකාරී වන විට අපරීක්ෂාකාරීව සිටින අනෙක් තැනක් තෝරා ගැනීමට යුහුසුළුවී තිබේ. අඩුපාඩු, මගහැරීම් හෝ සුළු සිද්ධි නොසලකා හැරීම භයානකය.

මෙම සිද්ධියෙන් පසු ගත යුතු පැති දෙකක් තිබේ. එකක් ආරක්ෂාවයි. අනෙක ජාතික එකමුතු භාවයයි. රටක් වශයෙන් එකතුවන්නට තිබුණ වටිනා අවස්ථා ගණනාවක් අත්හැර දැමීය. සුනාමි ව්‍යසනය අවසන් වන විට යළි නැගී සිටීම සමග පටු බේධ අත්හැර එක ලාංකේය සමාජයක් ගොඩනැගිය හැකිව තිබුණි. ත‍්‍රස්තවාදය පරාජය කිරීමෙන් පසු යළි බිහිවන රට එකම පවුලක් සේ නගන්නට අවස්ථාවක් විය. නමුත් මෙරට නායකයෝ ක‍්‍රියා කළේ පුරුදු බේධ ඇති කිරීමය. දේශපාලන නායකයෝ පක්ෂ ගෝත‍්‍ර නඩත්තු කළ අතර ආගමික නායකයෝ නිකාය ආරක්ෂා කළහ. පක්ෂ ගෝත‍්‍රික බව හා ආගමික නිකාය වශයෙන් හිතන්නේ නැති පුලූල් සමාජයක් බිහි නොකළ රට තුළ නැවතත් බෙදීම් රේඛාවක් මතු වී ඇත. මෙම සිද්ධි පෙන්වන්නේ එයයි. මෙම අවස්ථාවේ දී පටු අරමුණු පසෙක පා ඉතාම බුද්ධිමත්ව ක‍්‍රියා නොකළහොත් රටට පාලනය කරගත නොහැකි තත්ත්වයක් මතු වෙන්නට බැරි නැත. හේතුව අපට මුහුණ දෙන්නට සිදුවී ඇති ත‍්‍රස්තවාදී කණ්ඩායම් ජාත්‍යන්තරව අක් මුල් විහිදී ගිය සූක්ෂම ජාලා බවට පත්ව ඇති හෙයින්ය. රටවල් සමග පවතින සම්බන්ධතා තරකරගත යුතු අතර බලවත් රටවල් සමග පවතින සම්බන්ධතා කෙරෙහි අලූත් ව්‍යුහයකින් සලකා බැලීම වැදගත්ය.

ත‍්‍රස්තවාදය ගැන අනෙක් සමහර රටවලට වඩා අත්දැකීම් ඇති සහ ප‍්‍රබල බුද්ධි අංශ සාමාජිකයන් සහිත අප නැවතත් සූදානම්වීම අවශ්‍යය. සුළු සිද්ධි නොසලකා හැරීමේ වරදට තිස් වසරක් වන්දි ගෙවා තිබේ. සිදුවීම් හමුවේ හැඟීම්බර වීම නරකය. එක ජාතියකට හෝ එක ආගමකට සිද්ධි ලඝු කළ යුතු නැත. ශ‍්‍රී ලාංකිකයන් වශයෙන් එකමුතුවීම අවශ්‍යය. ජාති, ආගම්, දේශපාලන පක්ෂ වශයෙන් බෙදීම අමතක කර රටකට එලල් වූ අභියෝගයක් සේ සැලකීම ඉතා වැදගත්ය. එකිනෙකා කෙරෙහි චෝදනා එල්ල කර ගැනීම මෙවැනි සිද්ධියකට පසු දැකගත හැකි තත්ත්වයකි. අහිංසක ජනතාවගේ ජීවිත එයින් ආරක්ෂා වෙන්නේ නැත. හැඟීම් වෙනුවට බුද්ධියට තැන දිය යුතු අතර පරීක්ෂාකාරීවීම පළමු පියවරයි. මෙම අවස්ථාවේ දී පක්ෂය බලා ගන්නා ගෝත‍්‍රික නායකයන් හා ආගම බලාගන්නා නිකාය ප‍්‍රධානීන් ඉක්මවා ගිය ජාතික නායකයෝ ඉදිරියට පැමිණ රට එකමුතුභාවයෙන් අවදි කළ යුතුය.

 

Advertisements

විකටයෝ පාලකයෝවීම

ප්‍රතිචාරයක් ලබාදෙන්න

 

LOGO

2019/04/17 – ලංකාදීප

වොලෝඩිමයර් සැලැන්ස්කි යුක්රේනයේ නම් දැරූ විකට නළුවෙකි. ප‍්‍රකට රූපවාහිනී ප‍්‍රහසන වැඩසටහනක ප‍්‍රධාන නළුවා වූ අතර ‘‘ජනතා සේවකයා’’ නමින් වූ එම වැඩසටහන රට තුළ පවතින ක‍්‍රමය හාස්‍යයට ලක් කළේය. ජනප‍්‍රියත්වයට පත් හෙතෙම ජනාධිපතිවරණයට තරග කරන තෙක් අලූත් ප‍්‍රවේශයකය. සැලැන්ස්කි තවත් දින හතරකින් එරට ජනාධිපතිවරයා බවට පත් වෙන්නට බැරි නැත. ජනාධිපතිවරණ පූර්ව ඡන්ද විමසීමේදී සෑහෙන ඡන්ද ප‍්‍රමාණයක් ලබා ගෙන ඇත. යුක්රේනයේ ජනාධිපති වශයෙන් විකටයෙකු රජ වෙන ලකුණු පහල වී ඇත්තේ ඇයි? ජනසම්මත දේශපාලන ක‍්‍රමය විකෘති වන විට මෙවැනි හිඩැස් ඇති වෙයි. රට ගොඩනගන බව කටපුරා කියන දේශපාලනඥයෝ, ජනතා ඡන්දයෙන් බලයට පත් වෙති. බලය ගැනීමෙන් පසු ජනතාවගේ හැබෑ ගැටළු වලට විසදුම් නැත. ඉක්මන් ධනය සොයන දූෂිතයන් බවට පත් වන අතර ජනතාවට දුන් පොරොන්දු අමතක කරති. යුක්රේනයේ පමණක් නොව ලෝකයේ නොයෙක් තැන් වල සිදුවෙන්නේ එයයි.

යුක්රේන ජනාධිපතිවරණය අන්තර් ජාතික අවධානයට ලක් ව ඇත. සම්ප‍්‍රදායික දේශපාලන පක්ෂ වල ප‍්‍රබල අපේක්ෂකයන් අභිබවා තනි පුද්ගලයෝ ජනතා අවධානය දිනාගෙන තිබේ. ඇමරිකානු ජනාධිපතිවරණයේ දී ඩොනල්ඞ් ට‍්‍රම්ප් එවැනි හුදෙකලා සටනක් ජයග‍්‍රාහීව අවසන් කළේය. ඉතාලියේ විකට පක්ෂය ද සෑහෙන ප‍්‍රගතියක් අත් පත් කරගත්තේය. යුක්රේනයේ ජනාධිපති අපේක්ෂක සැලැන්ස්කි හතලිස් එක් හැවිරිදි ගුරුවරයෙකු වන අතර ඔහු ගේ විකට වැඩසටහන පවතින දේශපාලන ක‍්‍රමය හා එහි දූෂිත පැති නිර්දය විවේචනයට ලක් කළේය. 2018 මාර්තු මාසයේ දී සිය රූපවාහිනි වැඩසටහනේ නමින් තම දේශපාලන පක්ෂය ලියාපදිංචි කළේය. අවුරුද්දකට පසු ජනාධිපතිවරණ ඡන්දයේ ප‍්‍රබල ස්ථානයකය.

සැලැන්ස්කි ගේ මැතිවරණ ව්‍යාපාරය ගැන ද යමක් සඳහන් කළ යුතුය. ‘‘පොරොන්දු නැහැ. ප‍්‍රශ්නයක් ද නැහැ’’යන අර්ථය හැඟවෙන සටන් පාඨයක් භාවිතා කරයි. ඔහු කියන ආකාරයට ඔහුගේ එකම වේදිකාව අන්තර් ජාලයයි. විශාල ප‍්‍රචාරක ව්‍යාපාරයක් නැතත් ඔහු, එරට දොරින් දොර කියැවෙන නමකි. පළමු වටයේ දී ඔහු සියයට 60 ක ප‍්‍රගතියක් පෙන්වන අතර ප‍්‍රතිවාදී අනෙක් අපේක්ෂක පෙට්‍රෝ පොරෙෂෙන්කෝ සියයට 19 ක වාසියක් අත් පත් කරගෙන සිටී.

විකටයන් ජනතාව අතර නායකයන් බවට පත් වීම පමණක් නොව ජනතා නායකයන් වශයෙන් ගෞරවයට පාත‍්‍ර වූ චරිත විකටයන් සේ හැසිරීම ද විශේෂ අවධානයට පත් විය යුතුය. තම නායකයා වශයෙන් පොදු ජනතාව ඉල්ලන්නේ විකටයන්ද? එඩිතර, තීණගත හැකි ගරු කටයුතු චරිත තව දුරටත් අවශ්‍ය නැති යුගයක් ද යන ප‍්‍රශ්නය අප හමුවේ තිබේ. සමාජ මාධ්‍ය යුගයේ දී චරිත බිහිවෙන්නේ තාවකාලික ජනප‍්‍රියත්වය පදනම් කරගෙන ද යන කාරණාව ද සලකා බැලිය යුතුව ඇත. විකටයන් සේ හැසිරෙන වගකිව යුතු පුද්ගලයන් හාස්‍යයට ලක් කිරීම අරමුණු කරගෙන මාධ්‍ය එම පුද්ගලයෝ අනාවරණය කිරීම අරඹන්නට ඇත. දැන් හැම තැනම මාධ්‍ය අවධානය ගැනීමේ අදහසින් විහිළු කාරයන් වී ඇති නායකයෝය.

ශ‍්‍රී ලංකාවේ ප‍්‍රබල නායකයෝ තම පුරුදු ස්වභාවය අතහැර ජනතාව අතර ‘‘තාවකාලික වීරයෝ’’ වශයෙන් කැපී පෙනෙන්නට තැත් කරති. හැසිරීම, කතාව හා අනුගමනය කරන ශෛලිය සමාජ මාධ්‍ය හෝ රූපවාහිනී ප‍්‍රවෘත්ති ඉලක්ක කරගෙන කරන බව පෙනේ.  බුද්ධිමත් ජනතාව මෙවැනි හැසිරීම් අනුමත කරනවාද යන්න විමසා බැලිය යුතුය. මාධ්‍ය වගකීමක් ඇතිව කටයුතු කළ යුතු හෝරාව උදා වී තිබේ. ජනතාවට අවශ්‍ය තම ගරුත්වය දිනා ගත හැකි නායකයෙක් ද? නැත්නම් විකට චරිතයක් ද? විහිළුකාර චරිතයකට අනාගතය බාරදීමට අප සූදානම්ද? විකට නළුවන් නායකයන් වන ප‍්‍රවනතාවයක් පවතින පසුබිමක දේශපාලනඥයෝ විකටයන් බවට පත්වීම අවධානයට ගත යුතු කාරණයකි.

 

 

 

 

බිංදුවෙන් පටන් ගැනෙන අලූත් ආරම්භයකට යමු

ප්‍රතිචාරයක් ලබාදෙන්න

LOGO
සිංහල හා දෙමල අලූත් අවුරුද්දට කලින් ගතකරන කාර්ය බහුල දින කිහිපයක් ගෙවී යමින් තිබේ. අලූත් අවුරුදු උදාව හා එහි උත්සව සිරිය ගැන අප‍්‍රමාණ සිහින ඇති නමුත් බහුතර ජන කොටසකට එම සිහින සාක්ෂාත් කරගැනීමට හැකියාවක් නැත. යතාර්ථය එයයි. අතට ලැබෙන ආදායම යුතුකම් ඉටු කරන්නට ප‍්‍රමාණවත් නොවේ. රට තුළ ඇති නැති පරතරය දරුණු ලෙස වර්ධනය වී ඇත. සමාජ පරිවර්තනයක් තුළින් අලූත් යුගයක් කෙරෙහි තිබුණ බලාපොරොත්තු බිඳ වැටී තිබේ. දේශපාලනය ඇතුළු සියළුම ක්ෂේත‍්‍රවල නායකයන් සහ අප හැමදෙනා එයට වගකිවයුත්තෝය.
නිදහස ලැබී වසර හැත්තෑවකට පසු අලූතින් හිතන්නට සිදුවී තිබේ. තැනින් තැන මතුව ඇති අර්බුද, කැඞී බිඳී කඩතොළු වූ ක‍්‍රමය, යාන්තම් පැලැස්තර අලවා ගත් විසදුම් සහ අපේක්ෂා භංග වූ ජනතාව වෙත අලූත් පණිවුඩයක් අවශ්‍ය වී ඇත. ක‍්‍රමය දූෂිත වූ විට ප‍්‍රතිසංස්කරණ පලක් නැත.
පවතින හැම දෙයක්ම අලූතින් හදන්නට අවශ්‍යය. බිංදුවෙන් පටන් ගත යුතුය. අද යුගය, අලූත් දේ සොයා කැලැත්තීම් සිදුවන වකවානුවකි. දේශපාලනය, බලශක්තිය, ප‍්‍රවාහනය, සෞඛ්‍ය හා අධ්‍යාපන ඇතුළු සෑම අංශයකම කැලැත්තීමක් ඇති අතර ඒවායෙන් නවතම දේ නිර්මාණය වෙමින් තිබේ.
ආපසු හැරී බලන විට, ප‍්‍රංශ විප්ලවය සමාජ පෙරැළියකට මුල පුරන ලද අතර පසුව චීනය, කාම්බෝජය ඇතුළු රටවල විප්ලව හා පසුව වාර්තා වූ ප‍්‍රතිවිප්ලව වලින් බිංදුවෙන් පටන් ගැනීමේ සංකල්ප ක‍්‍රියාත්මක විය. කාම්බෝජයේ පොල්පොට් පාලනය යුටෝපියාවක් ගොඩනගන සිහිනයක සිටියේය. එය සහමුලින්ම අසාර්ථක විය. යුටෝපියාව ග‍්‍රීක දාර්ශණිකයන්ගේ සිතුම් රාජ්‍යයයි. කිසිම ප‍්‍රශ්නයක් නැති, ජනී ජනයා ඉතා සතුටින් ජීවත්වන නගරයකි. ලෝකයේ කොතැනක හෝ යුටෝපියා නගරයක් බිහි වී නැත. පෙරදිග කලාපයේ අපට ඉසුරින් පිරි කේතුමතියක් ගැන අපේක්ෂාවක් තිබේ. රට ඉසුරුමත් කේතුමතියක් කරන බව ඉදුරා ප‍්‍රකාශ කර බලයට එන පාලකයෝ තිබුණු තැනටත් වඩා පහතට ඇද දමා බලයෙන් පහ වී යති.
පවතින දේශපාලන ක‍්‍රමය අනුව රට ආගාධයට ඇද දැමූ ප‍්‍රතික්ෂේපිත දේශපාලනය නැවත බලයට ගෙන එන්නට ජනතාවට සිදුවන කාලය එපමණ දුර එකක් නොවේ. සුරංගනා කතා කියා බලයට එන පාලකයෝ කලින් තිබුණ පාලනයටත් වඩා දුර්වල බව දකින විට පරාජිතයෝ නැවත කැඳවනවා හැරෙන්නට විකල්පයක් ජනතාවට නැත. මෙයට හේතුව කුමක් ද? අලූතින් හිතන්නට, අලූත් දෙයක් කරන්නට ඇති මැලිකමයි. අවදානමක් ගන්නට අසමත්වීමයි.
පොල්පොට් ක‍්‍රම රටට අවශ්‍ය නැත. තරයේ ප‍්‍රකාශ කළ යුතුය. ප‍්‍රජාතන්ත‍්‍රවාදය හොඳ පාලන ක‍්‍රමයකි. නමුත් එය අත්තනෝමතික විය යුතු නැත. ක‍්‍රමය තමන්ට පමණක් වාසිදායක සේ භාවිතා කිරීම ප‍්‍රතික්ෂේප කළ යුතුය. පාලකයන්ට උවමනා පරිදි පවතින ක‍්‍රමයක් හා පොදු ජනතාවට බදු, ණය හා දඩ පැනවීමත් යුක්ති සහගත නැත. මේවා පනවන ආණ්ඩුව වෙනස් කර අලූත් ආණ්ඩුවක් හැදීම උත්තරය නොවේ. අලූත් පාලකයන් වශයෙන් වාඩිවෙන්නේ කලින් දූෂිතයන් සේ පිටමං කළ පිරිසය. මහළු, තීරණයක් ගත නොහැකි, ආත්මාර්ථකාමී සහ අලූත් අදහස් නැති බංකොලොත් නායකයෝ ඉවත්කර බිංදුවෙන් පටන් ගන්නා ව්‍යායාමයක් ගැන අපි කල්පනා නොකරන්නේ ඇයි?
යුද්ධයක් හමුවේ විඳීන්නට පුලූවන් භීතිය අත් විඳ තිබේ. නැවත නැගී සිටීමක් හමුවේ අප‍්‍රමාණ දුක් කන්දරාවක් විඳීන්නට සිදුවී ඇත. දශක තුනක් මරණයට මුහුණ සිටි හා තවත් දශකයක් පුරා ජීවත්වීමේ පීඩනය අත්විඳීන සමාජයකට බිංදුවෙන් පටන් ගැනීම අලූත් අභියෝගයක් නොවේ. අලූත් අවුරුදු කාලයේ ‘‘නොනගතය’’ රට නවතින තැනකි. එතැනින් සුබ නැතකට වැඩ පටන් ගන්නා විට යුටෝපියාවක් කරා යන ගමන බිංදුවෙන් අරඹන සේ පාලකයන්ට බල කළ යුතුය.

යුද සමයේ තිබූ අහේනිය යුද්ධයෙන් පසු සමනය වුණාද?

ප්‍රතිචාරයක් ලබාදෙන්න

LOGO

2019/04/03 – ලංකාදීප

සියළු විපාක වලට හේතුව යුද්ධය යැයි සාප කරන ලද යුගයක් තිබුණි. යුද්ධය අවසන් කරන තෙක් ඉවසන්න. ජනතා ප‍්‍රශ්න වලට එකල ලැබුණ ජනප‍්‍රිය පොදු උත්තරයක් විය. වෙඩි හඞ නතර වී වසර දහයක් ගත වී තිබේ. දශක තුනක කාලයක් පැවැති යුද්ධයෙන් රටට සිදුවූ හානිය අති විශාලය. ආපසු හැරී බලන විට, යුද්ධයක් තිබුණ කාල වකවානුව මෙන් තුනෙන් එකක කාලයක් සාමය උදා වීමෙන් පසු ගත කර තිබේ. ගත වූ සාමකාමී වාතාවරණය තුළ අත්පත් කරගෙන ඇති ජයග‍්‍රහණ ගැන රටට සතුටු විය හැකිද?

යුද කාල පරිච්ඡේදය තුළ අහිමි වූ දේ අපමණය. මනුස්සකමට සිදුවූ හානිය එයින් බරපතලම දෙයකි. මිනිස් ජීවිතයක වටිනාකම අවම තත්ත්වයට පත් වූ අතර ජීවිත වලට වටිනාකමක් නැවත ඇති කරගැනීමේ මෙහෙවර අවසන් වී නැත. එය විශාල පරිශ‍්‍රමයක් දැරිය යුතු කර්තව්‍යයකි. සෑම පාර්ශවයකම කැපවීම අවශ්‍යය. භෞතික දියුණුව ද ළඟා කරගත යුතුව ඇත.

පාර්ශව අතර බිහිසුණු ගැටුම් තිබිය දී සංවර්ධනය ගැන පැවැති අවධානය බෙහෙවින් සීමා වූ බව ප‍්‍රකට කාරණයකි. සංවර්ධන වැඩසටහන් ප‍්‍රමාද විය. යටිතල පහසුකම් ඇති කිරීම ඇතුළු ජන ජීවිතයට අදාල වැඩ පිලිවෙල සෑහෙන ප‍්‍රතිශතයකින් අඩාල වූ බව පිලිගත යුතුය. ගැටුම් පවතින හෙයින් ප‍්‍රමාදව මග හැරී ගිය කාල වකවානුව තුළ ජාත්‍යන්තර සමාජය විශාල පරිවර්තනයකට ලක් විය. යටිතල පහසුකම්, බලශක්තිය, සන්නිවේදනය, අධ්‍යාපනය හා සෞඛ්‍ය අංශ වල අත්පත් කරගෙන ඇති ප‍්‍රගතිය සෑහෙන එකකි.

අහිමි වූ අවස්ථා දිනා ගැනීම අරමුණු කරගෙන වේගවත් සංවර්ධනයක් කරා ගමන් කිරීම අවශ්‍යය. නමුත් වාද විවාද වලට පමණක් සීමා වූ පටු දේශපාලනය ශ‍්‍රී ලංකාවේ තත්ත්වය තවත් නරක තැනකට පත් කර තිබේ. යුද්ධයක් තිබිය දී පොදු ජනතාව භුක්ති විඳින ලද පහසුකම් සාමය උදාවීමෙන් වසර දහයකට පසු රටට නැත. එය සලකා බැලිය යුතු බරපතල ස්වභාවයකි.

බලශක්ති අංශය තුළ ගැටළු තිබේ. ඛනිජ තෙල් මිල හා විදුලිය බලය ජනතාව පීඩාවට පත් කර ඇත. පොසිල ඉන්ධන භාවිතා කිරීම සීමා කරන අලූත් බලශක්ති සංකල්ප ජාත්‍යන්තරය තුළ භාවිතාවට ගැනෙන පසුබිමක දවසකට පැය හතරක් විදුලිය කපා හරින්නට සිදුවී තිබේ. නියඟය බලපවත්වන අතර සෑම ප‍්‍රදේශයකටම ජලය හිඟයක් ඇත. මහා මාර්ග වල තදබදය ජනතාව පෙලන තවත් ගැටළුවකි. පොදු ප‍්‍රවාහනය පිරිහී තිබේ. ආර්ථික තත්ත්වය යහපත් නැත. රජයේ ආර්ථිකය පමණක් නොව ජනතාවගේ ආදායම ද දුර්වල වී ඇති අතර ක්ෂුද්‍ර මූල්‍ය ණය ගැතිභාවය ඇතුළු ප‍්‍රශ්න ජනතාව පීඩාවට පත් කර ඇත. ජීවන වියදම හා අධ්‍යාපනය සහ සෞඛ්‍ය වැනි අංශ වලට දරන්නට සිදුවී ඇති පිරිවැය සාමාන්‍ය ජනතාවට ඉසිලිය නොහැකි බව සඳහන් කළ යුතුය. ආයෝජකයන්, ව්‍යවසායකයන් පවතින බදු හා නිලධාරීවාදය ගැන මැසිවිලි නගන්නට පටන්ගෙන තිබේ.

අහන්නට ලැබෙන, දකින්නට ඇති පවතින පරිසරය වෙනස් කිරීමෙන් තොරව ඉදිරියට ගමන් කිරීමක් ගැන හිතන්නට පුළුවන්කමක් නැත. ජනතාව තුළ අලූත් අපේක්ෂා ඇත. ක‍්‍රමය වෙනස් කළ යුතු බවට අදහස් පැන නැගෙමින් තිබේ. නමුත් දේශපාලනඥයන් හා දේශපාලන පක්ෂ වෙනස් වෙන්නට සූදානම් නැත. අලූත් භාවිතාවක්, අලූත් සැලැස්මක් රහිතව එළැඹෙන අභියෝග ජයගත නොහැකි බව ඉතාමත් පැහැදිලිය. පවතින තත්ත්වය වෙනස් කරන්නට අවශ්‍ය බව පාලකයන්ට නොදැනෙන්නේ ඇයි?