නායකයකු වෙන්න යෝගීවරයෙකුගෙන් උපදෙස්

ප්‍රතිචාරයක් ලබාදෙන්න

milinda-prashna

2018 /01/ 17 – ලංකාදීප

ජගී වාසුදේව ඉන්දියාවේ යෝගීවරයෙකි. සත්ගුරු නමින් ප‍්‍රකටය. යෝග උපදෙස් පමණක් නොව අධ්‍යාත්මික දර්ශනයක් ද පතුරවයි. සමාජ උද්දීපනයෙහි නිරත එම යෝගීවරයා කළමණාකරන උපදේශක සේවාවෙහි ද යෙදේ. නොබෝදා සත්ගුරු කරන ලද ප‍්‍රකාශයක් ජාත්‍යන්තරයේ අවධානයට ලක්වී තිබේ.
‘‘ජන නායකයෙකු සේ දේශපාලනයේ ඉදිරියට එන්නට කිසිවක් කළ යුතු නැති’’ බව කියන යෝගීවරයා විරෝධතා හෝ අරගල ඇවිලීම හොඳටම ප‍්‍රමාණවත් බව කියයි. උපහාසයෙන් කියන නමුත් එකී අදහස තුළ ප‍්‍රබල පරිකල්පනයක් තිබේ. ‘‘පාරක් හදන්න අවශ්‍ය නැත. එය හදනවාට විරුද්ධ වෙන්න. බලාගාරයක් ඉදි කළ යුතු නැත. එය ගොඩනැගීමට එරෙහිව ව්‍යාපාරයක් පටන් ගන්න.’’ එසේ දක්වන හෙතෙම ‘‘ජනතාව විරෝධතා කරුවන් නායකයෝ වශයෙන් තෝරා ගනු ඇති’’ බව කියයි. ‘‘නිවාස, පැය විසි හතරටම විදුලිය තව තවත් දේ ජනතාවට අවශ්‍යයි. නමුත් ඒවා ඇති කරන්න හදන විට නිර්මාණශීලී විසදුමක් යොජනා නොකරන අය කරන්නේ විරුද්ධවීම’’ බව පෙන්වාදෙන සත්ගුරු එයට හේතුව ද පැහැදිලි කරයි. ‘‘අධිරාජ්‍යවාදීන්ට එරෙහිව මහත්මා ගාන්ධි විරෝධතා සහ සත්‍යග‍්‍රහ කළ අතර ඒවා කරන ලද්දේ ඝාතනය, තුවක්කු හෝ බෝම්බ වලින් නොවේ. සාමකාමීවය. ඒවා ඒ දවස්වල ඉතාම විශිෂ්ඨ අදහස්ය. අධිරාජ්‍යවාදීන් පලවා හැර නිදහස දිනාගැනීමට ගාන්ධි කළ විරෝධතා අලූත් මුහුණුවරකින් අපි අපේම නායකයන්ට එරෙහිව පළ කරමින් සිටින අතර එය නිදහස ලැබීමෙන් පසු ඉන්දියාවේ හැඟීම් වෙනස් වී ඇති අන්දම’’ බව පෙන්වා දෙයි.
කෝච්චිය නවත්වන්න. එතැන වීරයෙක් බිහිවෙයි. විදුලිය බලාගාරයක් හෝ තාප බලාගාරයක් ගොඩනැගීමට විරුද්ධ වෙන පුද්ගලයා නායකයෙකි. වර්ජනයක් මෙහෙයවන්නා විශාල චරිතයකි. මොනවා හෝ කරන පුද්ගලයා විශාල වංචාකාරයෙකි. දේශය ඉදිරියට ගෙන යාම නරකය. රට නතර කිරීම හොඳය. මහත්මා ගාන්ධි කරන ලද අරගලය අපි වැරදි අන්දමට තේරුම්ගෙන ඇති බව සත්ගුරු ගේ අදහසයි.
‘‘මම රහසක් කියන්නම්’’හෙතෙම අවසාන වශයෙන් කියයි. ‘‘සිය දෙනෙක් එකතු කරගෙන පාරක් වහන්න. හෙට වීරයෙක් විය හැකිය. පුරවැසියන් කරුණු වැරදියට වටහා ගෙන තිබේ. මොනවා හෝ නවත්වන කෙනා නායකයෙකු නොවේ. මොනවා හෝ කරන කෙනා නායකයෙකි.’’ සත්ගුරු පෙන්වා දෙයි.
ජගී වාසුදේව යෝගීවරයා දක්වන මෙම අදහස ගැන අවධානය යොමු කිරීම සුදුසුය. රට තුළ යමක් කරන්නට උත්සාහ කිරීම එකකි. එය නතර කරන්නට විරෝධය පළ කිරීම අනෙකකි. මොනවා හෝ කරන්නට කැපවීමක් ඇති පුද්ගලයා නරක කෙනෙකු කර විරෝධතා අවුලවන අය වීරයන් බවට පත් කරන්නේ ඇයි? විකල්ප අදහසක් වශයෙන් මේ ගැන හොඳට හිතන්නට අවශ්‍යය.
නිදහස ලැබීමෙන් අනතුරුව ගත වූ වසර හැත්තෑවකට ආසන්න කාලය තුළ අප සියළු දෙනාම ඉදිරි ගමන නතර කරන අය වීරයන් සේ සලකා තිබේ. ඉදිරි ගමන වෙනුවෙන් මොනවා හෝ අලූත් දෙයක් කරන්නට තැත් කිරීම කිසිම විචාරයකින් තොරව නිග‍්‍රහයට ලක් කර ඇත. වර්ජන, විරෝධතා, කැරුළි සහ මාරාන්තික උපවාස කරන අය විශාල චරිත බවට පත්ව තිබේ. ඝෝෂාවෙන් හෝ වෙනත් ආකාරයකින් මතු වෙන්නට ප‍්‍රයත්න දැරීම ප‍්‍රවනතාවයක් වී තිබේ. අද සිදුවන්නේ එයයි. ආණ්ඩුවේ හෝ පුද්ගලික අංශයේ මොනවා හෝ අලූත් දෙයක් වෙනසක් ඇතිකරන්නට ප‍්‍රයත්න දැරීම පහසු නැත. සමාජ පැවැත්ම වෙනස් කරන්නට උත්සාහ කිරීම දුෂ්කරය. විරුද්ධවීම ක්ෂණිකව කළ හැකිය. ගැටුම ඇතිකරන්නට පුලූවන් කමක් තිබේ. විරුද්ධ වන අය නායකයෝ වන අතර යමක් කරන්නට හදන තැනැත්තා අපහසුතාවයට පත්වෙයි.

Advertisements

රාමුවෙන් මිදෙමු

ප්‍රතිචාරයක් ලබාදෙන්න

milinda-prashna

2018/01/10 – ලංකාදීප

නව වසරේ පළමු මාසයෙන් තුනෙන් එකක් අවසන්ය. හිරු නැගී බැස ගිය පසු දවසක් නිමා වෙයි. දවස් ගණන් ගෙවී ගිය පසු වසරක කාලයක් හමාර වන බව අලූත් දෙයක් නොවේ. වසරක් උදා වන විට බලාපොරොත්තු වෙනස් එකක් බවට හැරේ. පවතින ජීවන රටාවට වඩා යහපත් වනු සඳහා කිසියම් පරිවර්තනයක් අපේක්ෂා කරයි. එය දියුණුව වශයෙන් සැලකේ.

දශක හතකට කලින් ලංකාව යටත් විජිතයකි. බි‍්‍රතාන්‍යයට යටත්ව සිටියේය. නිදහස ලබා දශක හතක සතුට සමරනු සඳහා තවත් සති හතරකට වඩා කාලයක් ඉතිරි වී නැත. අධිරාජ්‍යවාදීහු ලංකාවේ වැසියන් ගේ ස්වාධීන ජීවන අයිතිය පැහැර ගත්හ. බටහිර ග‍්‍රහනයෙන් මිදීම නිවහල් භාවය යැයි ලංකාවේ ජනතාව විශ්වාස කළෝය. අනුන්ගේ අණට යටත්නැති තමන්ගේ රටක තම ව්‍යුහයක් සකස් කරගත හැකි යැයි අපේක්ෂා කරන්නට ඇත. ස්වදේශික පාලන ක‍්‍රමයකින් ප‍්‍රසන්න, සැනසිලිදායක ජීවිතයක් බලාපොරොත්තු වූ බව නිසැකය. ඒවා සඵල කරගත හැකි වී තිබේද?

ජීවිතය ගැන තෘප්තිමත් ද යන ප‍්‍රශ්නය සාමාන්‍ය පොදු ජනතාවගෙන් ඇසුවහොත් සෘජු උත්තරයක් ලැබෙන්නේ නැත. පහසු නැති අතර එහි ඇති ව්‍යාකූලභාවය ගැන දීර්ඝ විස්තරයක් කරනු නිසැකය. වැඩට යන, හවසට ගෙදර එන අගනුවර හා තදාසන්න ප‍්‍රදේශවල ජීවත්වන වැඩි දෙනෙකු කරන්නේ චීන බත් පාර්සලයක් හෝ පාන් වැනි දෙයක් සමග මදුරු කොයිල් එකක් සහ රුපියල් සියයක රී ලෝඞ් එකක් මිල දී ගැනීම බව ප‍්‍රකට කාරණයකි. ප‍්‍රධාන නගරවල හවසට වැඩිම තදබදයක් ඇති ස්ථාන දෙකක් තිබේ. එකක් මත්පැන් අළෙවි කරන ස්ථානයයි. අනෙක ඔසු හල බව සඳහන් කළ හැකිය. මත් ද්‍රව්‍ය කෙරෙහි රට තුළ බරපතල විරෝධයක් ඇති නමුත් ජනතාව එයට යොමුවෙන්නේ ඇයි? බාල, තරුණ වැඩිමහළු වැඩි දෙනෙකු බෝ නොවන රෝග වලට ගොදුරු වී ඇත්තේ මන්ද? ජනතාවගෙන් සෑහෙන කොටසක් විනෝදාංශයක් වශයෙන් කරන්නේ රූපවාහිනී නාලිකාවක ඉදිරියේ වාඩිවීමය. බහුතරයක් නොවෙතත් සමාජයේ එක්තරා ස්ථරයක පැවැත්ම මෙයට නොවෙනස් බව සදහන් කළ යුතුය.

සරල ජීවිතයක්, පහසුවෙන් ගත කරන අරමුණ ඇති මෙරට වැසියන්ගේ පැවැත්ම ඉතාම සංකීර්ණ එකක් වී තිබේ. අපිලිවෙල එහි බහුලය. ඇති නැති පරතරය ඉහළ නැග ඇති අතර ධනය පමණක් නොව බලය හා තරාතිරම ද පොදු ජනතාව තලා පෙලන අංශ බවට පත්ව ඇත. මෙකී කටුකභාවය හමුවේ ලෝකයේ වෙනත් රටකට කෙසේ හෝ පැන ගොස් ස්වකීය අනාගතය සාක්ෂාත් ගැනීම, විශේෂයෙන් තරුණ පරපුර ඉලක්ක කරන කාරණය වී තිබේ.

මෙවැනි පැවැත්මක් සුදුසු නැත. පවතින රාමුව වෙනස් කිරීම අවශ්‍ය බව නව වසර ආරම්භයේ දී අවධානයට ගත යුතු පැත්තකි. සමාජයේ සෑම ජන කොටසකට සාධාරණ අවස්ථා සම්පාදනය කළ යුතුය. දක්ෂතාවය අනුව ඉදිරියට එන පසුබිමක් සකස් කිරීම අවශ්‍යය. ජාතික සේවය හා රට වෙනුවෙන් කැපවීම යන ආකල්ප හදවත් තුළ තහවුරු කරන ප‍්‍රතිපත්ති අවශ්‍යය.

ජාතික හා ආගමික නායකයන් අලූතින් හිතන්නට අවශ්‍යය. සමාජ නායකයන් පවතින විෂමතා ගැන බරපතල විවේචනයක් කිරීම සුදුසුය. නිදහසින් පසු ගත වූ වසර හැත්තෑව තුළ ගමන ගැන සාධාරණ සංවාදයක් ගොඩනැගීමට වග බලා ගත යුතුය. සොබා සම්පත් වලින් අනූන, දක්ෂ මානව සම්පතක් ඇති ශ‍්‍රී ලංකාව පත්ව ඇති ස්වභාවය කෙරෙහි අප සියළුදෙනාම තද අවධානයක් යොමු කළ යුතු කාලය උදා වී තිබේ. පරිවර්තනයක් සිදුවිය යුතු මොහොත කරා අප සමීප වී සිටිමු.

 

 

තාවකාලික පුරවැසිභාවය

ප්‍රතිචාරයක් ලබාදෙන්න

milinda-prashna

2018/01/03 – ලංකාදීප

ඉ-එස්තෝනියාව එළැඹන සියවසට මුහුණ දීමට සූදානම්ය. නවීන තොරතුරු තාක්ෂණය උපරිමව භාවිතා කරන අතර එමගින් ඉතාමත් දියුණු තාක්ෂණික සමාජයක් ගොඩනගන්නට සමත් ව ඇත.  2014 වසරේ දී එස්තෝනියානු රාජ්‍යය ඉ-පුරවැසිභාවය පිලිගත්තේය. එයට අනුව ලෝකයේ ඕනැම රටක පුරවැසියෙකුට තාක්ෂණික සම්බන්ධතා උපයෝගීකරගෙන එස්තෝනියාවේ තාවකාලික පුරවැසි භාවය අයැදුම් කළ හැකිය.  එස්තෝනියාවට පැමිණ අනන්‍යතාවය තහවුරු කරන්නට අවශ්‍ය නැති මෙම ක‍්‍රමය අනුව  ලියැකියැවිලි පුරවා ගුවන් ගමන් බලපත‍්‍රය සමග අයැදුම් කළ විට වසර තුනක් සඳහා වලංගු පුරවැසි භාවයක් ලැබේ. එස්තෝනියානු පුරවැසියෙකු වශයෙන් එරට වරප‍්‍රසාද ලැබෙන ජාත්‍යන්තර  ඕනෑම කටයුත්තකට සහභාගී වන්නට එයින් අවසර ලැබේ. ආයෝජන, බදු පහසුකම් හෝ අන්තර්ජාල බැංකුකරණයට ඉඩකඩ ඇත. එස්තොනියානු පුරවැසියෙකු වශයෙන් ව්‍යාපාරයක් එරට ආරම්භ කරන්නට ද අවකාශය තිබේ.

එස්තෝනියාව උතුරු යුරෝපීය රටකි. කාලයක් සෝවියට් දේශය යටත් කරගෙන සිටියේය. මිලියන 1.5 ක පමණ ජනගහනයක් ජීවත්වන අතර 1991 වසරේ දී ස්වාධීනන්යට ලැබීය. එස්තොනියාව ඉ- ආණ්ඩුකරනට ආරම්භ කළේ රට නිදහස ලබා අවුරුදු හයක් වන විට දීය. අද වන විට පුරවැසියන්ට සිය උවමනා එපාකම් වලින් සියයට අනූනමයක්ම අන්තර් ජාලය සම්බන්ධ කරගෙන කරගත හැකිය. රජයේ කාර්යාල වල ගැවසීමට කිසිම උවමනාවක් නැත. 2000 වසර අවසන් වන විට එරට සියළුම බදු ලිපි ගොනු පරිගණක ගත කළේය. පුරවැසියන්ගෙන් සියයට අනූපහක් බදු කටයුතු අන්තර්ජාලයෙන් කරන අතර ලිපිගොනු නිසි කලට යාවත්කාලීන වන හෙයින් බදු ගෙවීම සඳහා විනාඩි තුන හතරකට වඩා වැය නොවේ. එක්ස් රෝඞ් සංකල්පය යටතේ රාජ්‍ය හා පුද්ගලික අංශයේ ව්‍යවසාය අතර දත්ත සම්බන්ධතාවයක් තිබේ.  ඕනෑම විමසීමක් කළ හැකි අතර දවසේ පැය විසි හතරම දත්ත යාවත්කාලීනය. බදු, වෛද්‍ය ප‍්‍රතිකාර, සෞඛ්‍ය රක්ෂණ, ඉඩම් ලේඛන, නිවාස තොරතුරු යන අංශ පහ ගැන වැඩිම විමසීම් ලැබෙන බව වාර්තා වෙයි. විද්‍යුත් හැදුනුම්පතක් සෑම පුරවැසියෙකුටම ඇත. එය උපයෝගීකරගෙන රහස්‍ය භාවය ආරක්ෂා කරගනිමින් ආණ්ඩුකරණ ක‍්‍රියාවලියට එකතු විය හැකිය. බැංකු ව්‍යාපාර කටයුතු වලට පමණක් නොව  ඕනෑම නීත්‍යානුකූල ලියැවිල්ලකට විද්‍යුත් හැදුනුම්පත උපයෝගී කරගෙන අත්සන් කළ හැක.

ඉ-ඡන්දය ප‍්‍රකාශ කිරීම ඇරඹෙන්නේ 2005 වසරේ දීය. එස්තෝනියාව ලෝකයේ පළමු වරට  ඡන්ද ක‍්‍රමය පවත්වන ලද රට බවට පත්ව තිබේ. ඡන්දය ප‍්‍රකාශ කිරීඹට ඡන්ද මධ්‍යස්ථානය වෙත පැමිණ පෝලිමේ සිටින්නට අවශ්‍ය නැත. ඡන්දය දිනයේ දී අන්තර්ජාලය මගින් ලෝකයේ  ඕනෑම තැනක සිට තම ඡන්දය ප‍්‍රකාශ කළ හැකි අතර එය ක්ෂණික ගණන් කිරීමට ලක්වෙයි.  පුරවැසි ආරක්ෂාව තවත් වැදගත් සංකල්පයකි. ජනතාවගේ ආරක්ෂාව 2007 වසරේ සිට නූතන තොරතුරු තාක්ෂණයට සම්බන්ධය. පොලිසිය, ගලවාගැනීමේ සේවා හා හදිසි ප‍්‍රතිකාර ක්ෂණිකව මෙහෙයැවෙයි. ඉකුත් වසර විස්ස තුළ දී වසරින් වසරම හදිසි අනතුරු වලින් සිදුවන මරණ පහත වැටී තිබේ.

සෞඛ්‍ය, අධ්‍යාපන හා ප‍්‍රවාහන ඇතුළු සියළු අංශ තොරතුරු තාක්ෂණයට සම්බන්ධකර තිබේ. ලෝකයේ වෙනත් රටවල් වලට කලින් එස්තොනියාවේ මාර්ග වල රියැදුරු රහිත වාහන ගමනාගමනය අරඹන්නට සූදානම්ය. සියළු නාගරික හා ගම්බද මාර්ග වල රියැදුරු රහිතව ස්වයංකී‍්‍රයව ධාවනය වන වාහන හදුන්වාදීම ඉදිරියේදී සිදුවනු ඇත. එය බුද්ධිමය ගමනාගමනයක් වන අතර සියළු තොරතුරු නිරවද්‍යව වාර්තාවන හෙයින් නියම ආර්ථිකය විදහා දක්වන රටක් වශයෙන් එස්තෝනියාව ජාත්‍යන්තර පිලිගැනීමට ලක්ව ඇත. තොරතුරු තාක්ෂණයේ වාසි අතරතුර අන්තර් ජාල සැහැසිකම් හා වංචා වලකන සූක්ෂම පියවර ද අනුගමනය කරයි. සයිබර් ආරක්ෂාව වෙනුවෙන් ඉහළම තාක්ෂණය හා අවසර පද උපයෝගී කරගැනේ. ඉ – ශ‍්‍රී ලංකා යනුවෙන් සැලැස්මක් සකස් කර තිබුණ අතර එය වේගයෙන් සමාජගත කරන හැකියාවක් අපට නොතිබුණ බව සඳහන් කළ යුතුය.