සීසර් ගේ නීතිවලට ලක්වෙන අපේ දේශපාලකයෝ

ප්‍රතිචාරයක් ලබාදෙන්න

milinda-prashna

2018/06/20 – ලංකාදීප

සීසර් ගේ බිරිඳ සැකයට පාත‍්‍රවියයුතු නැත’’ යන්න ප‍්‍රකට ඉංගී‍්‍රසි කියමනකි. (Caesar’s wife must be above suspicion) යනුවෙන් භාවිතා කෙරේ. ජුලියස් සීසර් රෝමයේ අධිරාජ්‍යයෙහි අසහාය පාලකයෙකි. ක‍්‍රිස්තු පූර්ව යුගයේ රෝම අධිරාජ්‍යයා වූ හෙතෙම රෝම අධිරාජ්‍යය ස්වර්ණමය යුගයකට යොමු කරන්නට සමත්විය. සීසර් සිය පළමු බිරියගේ අභාවයෙන් පසු දෙවන වතාවට පොම්පියා කුමරිය ආවාහ කර ගනී. ඇය සම්බන්ධයෙන් සීසර් අනුගමනය කළ අනගිභවනීය ප‍්‍රතිපත්තිය පොම්පියාගේ නම ඉතිහාසයේ වැදගත් තැනක ස්ථාන ගත කරන්නට හේතු වී තිබේ.

තිස් හත් වැනි වියේ දී සීසර් රෝමයේ ආගමික අංශයෙහි ප‍්‍රධානියා බවට පත් වූ අතර එය වෙනුවෙන් ඒ වන විට බිරිඳව සිටි පොම්පියා දෙවියන් වෙනුවෙන් මහා උත්සවයක් පවත්වන ලද බව සඳහන් වෙයි. කාන්තාවන් පමණක් සහභාගී විය යුතු එම උත්සවයට වෙස් මාරු කරගෙන තරුණයෙකු පැමිණ සිටි අතර උත්සවය අතරවාරයේ දී ආරක්ෂකයන්ට කොටු වී තිබේ. සිද්ධිය ගැන පරීක්ෂණයකට පසු තරුණයා නිදහස් කර යැවුණ බව ඉතිහාස කතාන්දරයේ සඳහන් වෙයි. සුළු සිද්ධියක් නමුත් අධිරාජ්‍යයා අද ප‍්‍රකාශ වන වචන වලින් නම්, තම සහකාරිය දික්කසාද කළේය. පොම්පියාගේ අනුදැනුමක් මෙකී සිද්ධියට සම්බන්ධ යැයි කිසිසේත්  අනාවරණය නොවූ නමුත් තම බිරිඳ සැකයකට පාත‍්‍රවිය යුතු නැති බව සීසර් ගේ තීරණය වී තිබුණි.

අධිරාජ්‍යවාදී පාලකයෙකුට රිසි පරිදි තීරණ ගැනීමට බාධාවක් නැත. නමුත් මෙම සිද්ධියේ දී සීසර් ’’සැකයට’’ ඉඩ දුන්නේ නැත. සැකය මතු කරගෙන රෝමය තුළ මතුවිය හැකි වාතාවරණය පාලනය කරන්නට පියවර ගත්තේය. සැකය හා අවිශ්වාසය ඉතාම බරපතල කාරණා සේ සලකා ක‍්‍රියා කර ඇත. සීසර් ක‍්‍රියාකරන ලද ආකාරය සංකේතයක් වී තිබේ. ආර්ථික හා දේශපාලන කාරණා වල දී පාලකයා අල්පමාත‍්‍ර හෝ සැකයකට ලක් විය යුතු නැති බව අඟවන්නට මෙම සිද්ධිය උපයෝගී කරගනී. පාලකයන් අනුගමනය කරන ප‍්‍රතිපත්ති හා හැසිරෙන ආකාරය විනිශ්චය සඳහා සීසර් ගේ සිද්ධිය මිණුම් දණ්ඩක් කරගෙන තිබේ.

පොම්පියා මුහුණ දුන් අවස්ථාව විශාල අසාධාරණයක් බව පැහැදිලිය. පාලන ක‍්‍රමය තුළ පැහැදිලි, විනිවිද පෙනෙන භාවයක් ආරක්ෂා කර ගැනීමට එය හේතු විය. ජුලියස් සීසර් අසමාන චරිතයකි. එවැනි චරිත අද නැත. මෙකල ලෝකයේ ප‍්‍රබල නායක නායිකාවෝ සැකයට ලක් වන අවස්ථා තිබේ. දේශපාලනඥයන්ගේ අඹු දරුවෝ සැකයට පාත‍්‍රවෙති. ධනය හා බලය අයුතු ලෙස භාවිතා කරන බව එළිපිටම අනාවරණය වෙන අවස්ථා ඇත. ජන නායකයන්ගේ පවුල්වල සමීප පුද්ගලයෝ චෝදනා වලට ගොදුරු වෙති. එවැනි අවස්ථාවක මෙවැනි තීන්දු ගැනීමක් වාර්තා නොවේ. ගෝලීයකරණයට ලක් වූ තාක්ෂණික වශයෙන් දියුණුයැයි කියන ජගත් දේශපාලනයේ පවතින පුදුමාකාර ස්වභාවයක් වශයෙන් සැලකිය හැකිය.

මෙරට ජනතාව ඡන්දයෙන් නායකයන් තෝරා ගන්නේ නායකයන් කෙරෙහි මහත් විශ්වාසයක් ඇතිවය. දේශපාලනඥයන් ගේ ක‍්‍රියාකාරකම් සැකයට පාත‍්‍ර වී තිබේ. අඹු දරුවන්, ඥාතීන් සහ හිතවතුන් හැසිරෙන ආකාරය ලජ්ජා සහගතය. ඇතැම් දේශපාලනඥයන් ගේ පැවැත්ම ඉතාම අවලස්සනය. මාධ්‍ය වලින් අනාවරණය කරන සිද්ධි පිරිහීම මැනවින් පෙන්නුම් කරයි. උසස් ගුණාංග සහිත ජන සමාජයක් ගොඩනගන්නට පොරොන්දු දෙන නායකයෝ ජරාජීර්ණ, පිලිකුල් සහගත වටපිටාවක් සකස් කරගෙන ඇත. ජනතාවගේ සැකයට පාත‍්‍ර වී ඇති දේශපාලනඥයන් තම හෘද සාක්ෂියට අනුව තීරණ ගත යුතුය. ක‍්‍රමය ගැන අවිශ්වාසය ගොඩනැගෙන්නට කලින් ඉවත්වීම සුදුසුය. බරපතල සැකයට ලක්වී ඇති ඇතැම් දේශපාලකයෝ වරද පිලිගන්නට සූදානම් නැත. අධිතක්සේරුවක සිටින දේශපාලනඥයන් ‘සීසර් ගේ තීන්දුවට’ ලක් විය යුතුය. පක්ෂ නායකයෝ තද තීරණ ගත යුතුය. විශ්වාසය නැවත ගොඩනගා ගැනීමට හැකි තීරණ ගැනීම මෙරට දේශපාලන පක්ෂ නායකයන්ගේ වගකීමකි.

 

 

Advertisements

ජනප්‍රිය වන වේගයෙන්ම අප්‍රසාදයට ලක්වන දේශපාලනඥයෝ

ප්‍රතිචාරයක් ලබාදෙන්න

milinda-prashna

2018/06/13 – ලංකාදීප

අති විශාල ජනප‍්‍රසාදයක් සහිතව බලයට පත්වන දේශපාලන නායකයෝ ඉතාම ඉක්මනින් අප‍්‍රසාදයට පත්වෙති. එය නූතන තාක්ෂණික යුගයේ ස්වභාවයයි. ජන නායකයන් ගේ ගුණාංග, ප‍්‍රතිපත්ති හා ක‍්‍රියාකරන විලාශය ගැන ජනතා ප‍්‍රබෝධය වැඩි කල් පවතින්නේ නැත. නිල කාලය අවසන්වීමටත් කලින් පිරිහීමට ලක් වන අතර ජනතාව තුළ ගොඩනැගුණ විශ්වාසය ගිලිහීයෑම බරපතල ප‍්‍රශ්නයකි. ලෝකයේ සෑම රටකම දේශපාලන නායකයෝ මෙම ගැටළුවට මුහුණ පා සිටිති. ජනතාව වෙනුවෙන් කරන කැපවීම නිසි සේ ප‍්‍රකාශ කරගන්නටත් කලින් අසමත්වීම මෙහි දී මතුවන දුර්වලතාවයක් සේ සඳහන් කළ හැකිය.

දේශපාලනඥයන්ගේ ඉක්මන් පිරිහීමට හේතුව කුමක්ද? ජනතා ප‍්‍රසාදය ආරක්ෂා කරගන්නට අසමත්වන්නේ ඇයි? බලය ලැබෙන විට පැවැත්ම වෙනස් වීමටත් වඩා බලපාන දෙයක් තිබේ. නූතන සන්නිවේදන ව්‍යුහයේ බලපෑම බව තේරුම් ගත යුතුය. බි‍්‍රතාන්‍ය හිටපු අගමැතිවරයෙකු වූ ගෝඩන් බ‍්‍රවුන් දක්වන අන්දමට විසි හතර පැයේ විකාශය වන ප‍්‍රවෘත්ති වලින් දේශපාලන නායකයන්ගේ දීර්ඝ ජන නායකත්ව භූමිකාව වසර හයකට සීමාකර තිබේ. නූතන ජන මාධ්‍ය භාවිතාව දේශපාලකයන් අනාවරණය කරයි. ඉතා ඉක්මනින් පිරිහීම එහි ප‍්‍රතිඵලයකි. දහ නම වැනි සියවසේ දී දේශපාලන නායකයන්ට දීර්ඝ කාලීන පාලන කාලයක් ආරක්ෂා කර ගැනීමට හැකි විය. පාලකයන් ගේ හැසිරීම ජනතාවගෙන් දුරස්ථය. නමුත් විසි එක්වන සියවස වන විට පාලකයන් හා මාධ්‍ය සම්බන්ධතාව ප‍්‍රබලය. ගෝඩන් බ‍්‍රවුන්ට අනුව වසර දහයක් බොහෝ විට වසර හයකට සීමාවීම එහි ප‍්‍රතිඵලයකි. දේශපාලකයන් ගේ හැසිරීම, කරන කියන දේ මාධ්‍ය එලෙසින්ම වාර්තා කරන අතර නායකයන් සම්බන්ධයෙන් ජනතාව තුළ පවතින ප‍්‍රතිරූප පලූදු කරන්නට එය හේතුවකි. සම්ප‍්‍රදායික මාධ්‍ය අතරට එකතු වී ඇති සමාජ මාධ්‍ය එම කාර්ය ප‍්‍රබලව ඉශ්ඨ කරමින් සිටින අතර තමන් දකින දේ එලෙසින්ම වාර්තා කිරීම දේශපාලන චරිත වල පැවැත්ම අභියෝගයට ලක් කර ඇත.

මෙරට දේශපාලනඥයන්ට මෙම වෙනස්වීම අවබෝධ කරගත නොහැකි වී තිබේ. ජනමාධ්‍ය මගින් ප‍්‍රතිරූප මතු කරන අතර එයට වඩා වේගයෙන් විනාශ කරන බව වටහා ගන්නේ නැත. දවස පුරා ප‍්‍රචාරය වන මාධ්‍ය වලින් තමන් කරන කියන දේ ප‍්‍රචාරය කිරීමෙන් ජනතාව දැනුම්වත් වනු ඇති අතර එය තම ජනප‍්‍රියත්වය වර්ධනය කරන්නට හේතුවක් යැයි ඔවුහු කල්පනා කරති. එය බරපතල වැරදීමකි. මාධ්‍ය මගින් පෙන්වන විස්තර මගින් ජනතාව අවබෝධ කරගන්නා දෙය වෙනස්ය. තීරණ ගැනීම, හැසිරීම හා ක‍්‍රියාත්මකවීම සම්බන්ධයෙන් සෑහෙන තොරතුරු ප‍්‍රමාණයක් ජනතාව අතරට යන අතර නායකයන් හා ජනතාව අතර තිබුණ දුරස්ථභාවය අඩු කරන්නට එය හේතු වී තිබේ. තමන්ගේ දේශපාලන නායකයා ගේ තරම නිසි සේ වටහා ගන්නා ඡන්ද දායකයෝ ඔවුන් කෙරෙහි තැබූ බලාපොරොත්තු ආපසු හරවා ගනිති. පොදු ජනතාව අපේක්ෂා භංගත්වයට පත් කරන එවැනි සිද්ධි අද සිදුවෙමින් තිබේ. ගෝඩන් බ‍්‍රවුන් පෙන්වා දෙන්නේ එයයි.

විසි වැනි සියවසේ විශිෂ්ඨතම දේශපාලකයෙකු සේ සැලකෙන වින්සන්ට් චර්චිල් අද යුගයේ ජීවත්ව සිටියේ නම් මෙපමණ පිලිගැනීමක් ලැබෙන්නේ නැත. හේතුව ඔහුගේ නායකත්ව ගුණාංග තරමටම අභ්‍යන්තරය ද අනාවරණය වන හෙයින් බව සැලකිය යුතුය. ඞී.එස්. සේනානායක, ඩඞ්ලි සේනානානායක සහ බණ්ඩාරනායක වැනි චරිත අද වැනි මාධ්‍ය යුගයක විශාල චරිත වශයෙන් ගොඩනැගෙන්නේ නැත. දක්ෂතා අභිබවා දුබලතා පෙන්වා ඔවුන්ගේ පරාක‍්‍රමය අභියෝගයට පත් කරනවා නිසැකය.

පැය විසි හතර පුරා සිද්ධි වාර්තාකරන මාධ්‍ය හැසිරීම ඉදිරියේ පරෙස්සම් නොවන දේශපාලනඥයන් අදක්ෂ, විකට සහ අකාර්යක්ෂම පුද්ගලයන් වශයෙන් ඉතිහාසයට එකතුවීම වැලැක්විය නොහැකිය. මාධ්‍ය වලින් තමන්ගේ තරම යෝධයන් සේ පෙන්වන බව හිතන දේශපාලනඥයන්, ජනමාධ්‍ය ප‍්‍රචාරය තුළින් ඔවුන්ගේ තරම අඟුටුමිට්ටන් කර ඇති බව තේරුම් ගැනීම ඉතාම වැදගත්ය.

 

දූෂණ චෝදනා ලැබූ පක්ෂයේ මන්ත්‍රීන් 34ටම නාම යෝජනා නෑ

ප්‍රතිචාරයක් ලබාදෙන්න

milinda-prashna

 

2018/ 06 /06 – ලංකාදිප

ඉරාක ජනරජයේ මහ මැතිවරණය පසුගියදා පැවැත්විණි. ප‍්‍රතිසංස්කරණ සඳහා වූ ව්‍යාපාරය කැපී පෙනෙන ජයග‍්‍රහණයක් අත්පත් කරගත්තේය. සාද්රිස්ට් ව්‍යාපාරය එහි දී වැදගත් පාර්ශවයක් විය. මුක්ටාදා අල් සාදර් එම පක්ෂයේ නායකයා වශයෙන් ක‍්‍රියා කරයි. හෙතෙම ඉරාකයේ බෙහෙවින් ජනප‍්‍රිය චරිතයකි. හෙතෙම තනතුරු වලට ප‍්‍රිය නැත. සමාජ ප‍්‍රතිසංස්කරණය වෙනුවෙන් පෙනී සිටියි. දූෂණයට විරුද්ධත්වය පළ කරන අතර ඉරාකයේ අනන්‍යතාවය ආරක්ෂා කරගැනීම සඳහා තද තීරණ ගන්නා දරදඬු නායකයෙකු සේ සැලකේ.

ඉරාකයේ මැතිවරණය ප‍්‍රකාශයට පත් කරන විට අල්සාදර් ගේ පක්ෂයට නියෝජිතයන් තිස් හතර දෙනෙකුගේ නියෝජනයක් තිබුණි. ඇමරිකාව ඉරාකය ආක‍්‍රමණය කිරීමෙන් පහලොස් වසරකට පසු පවත්වන ඡන්දයෙන් පැහැදිලි ජයක් ලැබීම මුක්ටාදා ගේ අධිෂ්ඨානය විය. පාර්ලිමේන්තුවේ සිටි මුක්ටාදා ගේ මන්ත‍්‍රී කණ්ඩායම නොයෙක් අපවාද වලට ලක්ව සිටි අතර දූෂණ හා අල්ලස් චෝදනා ඒ අතර බහුලය. ඒවායේ ඇත්ත නැත්ත කෙසේ වෙතත් චෝදනා එල්ලවී තිබුණ මහජන නියෝජිතයන්ට අමතක නොවෙන පාඩමක් ඉගැන්වීමට මුක්ටාදා තීරණය කළේය. මෙම තිස් හතර දෙනාවම පක්ෂයේ ඡන්ද අපේක්ෂක ලැයිස්තුවෙන් ඉවත් කළේය. එය ඉතාම තද තීරණයකි. නාම යෝජනා ලැයිස්තු හදනවිට දක්ෂ වෘත්තීයගරුක පුද්ගලයන්ට අලූතින් අවස්ථාවක් දුන්නේය. දූෂණය ත‍්‍රස්තවාදයට සමාන කරන ලද අතර එය මැතිවරණයේ තේමාව කර ගත්තේය. බලයට පත්වීමෙන් පසු දූෂණය නතර කිරීම වෙනුවට දූෂිතයන් පැත්තකට කර අලූත් කණ්ඩායමක් සමග පාර්ලිමේන්තු මහ මැතිවරණයට ඉදිරිපත් විය. එය සාර්ථක වී ඇත. පසුගියදා අවසන් වූ ඡන්දයේ දී සාද්රිස්ට් ව්‍යාපාරයට මන්ත‍්‍රී ආසන පනස් හතරක් ලැබී ඇත.

දූෂිත, නම කැත කරගත් කණ්ඩායමක් නැවත පත් කරගැනීම නුසුදුසු බව තීරණය කරන ලද පක්ෂ නායකයා ඒ වෙනුවෙන් අලූතින්ම යෝජනා කරන ලද අයට ජනතා කැමැත්ත ලැබීම විශාල ජයග‍්‍රහණයකි. ඉරාක පාර්ලිමේන්තුවේ සම්පූර්ණ මන්ත‍්‍රී කණ්ඩායම 329 ක් වන අතර ආණ්ඩු බලය සඳහා ප‍්‍රමාණවත් නැති නමුත් අලූත් ආණ්ඩුව පිහිටුවන සන්ධානයේ නැවුම් බලවේගය බවට පත්වීමට මුක්ටාදා ගේ පක්ෂයට හැකි වී තිබේ. ඡන්ද ප‍්‍රතිඵලයට පසු ප‍්‍රකාශයක් කරන පක්ෂ නායක මුක්ටාදා අල් සාදර් ‘‘ඔබ ගේ ඡන්ද වලින් ප‍්‍රතිසංස්කරණ ව්‍යාපාරය ජය අත් කරගෙන ඇතැයි’’ කියා සිටියේය. ඔබ ලබා දුන් ඡන්දය අපට ගෞරවයක් යැයි හෙතෙම වැඩි දුරටත් ප‍්‍රකාශ කර තිබේ.

ප‍්‍රජාතන්ත‍්‍රවාදී පාලන ක‍්‍රමය ගැන විශිෂ්ඨ අත්දැකීම් ඇති ශ‍්‍රී ලංකාව ඉරාකයේ සාද්රිස්ට් ව්‍යාපාරයෙන් පාඩමක් ඉගෙනගත යුතුය. දේශපාලන පක්ෂ සහ දේශපාලනඥයන් ගේ දූෂිත තත්ත්වයන් ගැන අති විශාල අනාවරණ සිදුවෙමින් තිබේ. මහජන මුදල් වංචා කිරීම, අල්ලස් ගැනීම හා ජනතා මුදල් අවභාවිතාව ගැන චෝදනා වාර්තා කරන්නේ විශාල ආන්දෝලනයක් ඇති කරමින්ය. නඩු විභාග කර අධිකරණ තීන්දුවකින් චෝදනා ඔප්පු වෙන තුරු චූදිතයෝ ගරු මැති ඇමැතිවරු සේ හැසිරෙති. ආත්ම ගෞරවය, හෘද සාක්ෂිය වැනි වැදගත් සංකේත අසරණ වී සිටී. මහජන නියෝජිතයන් ගැන ඇති චෝදනා ගැන පක්ෂ නායකයෝ භයානක නිහඬතාවයකය. චූදිතයන් ඉවත් කර පක්ෂ පිරිසිදු කරන්නට ජන නායකයන්ට ආත්ම ශක්තියක් නැත. මැතිවරණයක දී ජනතාව ප‍්‍රතික්ෂේප කරන ඇතැම් දේශපාලකයන් ජාතික ලැයිස්තුවෙන් නැවත පාර්ලිමේන්තුවට පත් කිරීමට හෝ වගකිවයුතු රජයේ තනතුරු වලට පත් කරන්නට මෙරට පක්ෂ නායකයෝ පියවර ගනිමින් සිටිති. එය ඉතාම අවාසනාවන්ත තත්ත්වයකි.

අලූත් යුගයක් ඇති කරන බවට ජනතාව හමුවේ පොරොන්දු දෙන දේශපාලන නායකයෝ පරණ දූෂිත පිරිස තම අනුගාමිකයන් සේ නඩත්තු කරමින් සිටිති. ක‍්‍රමය තුළ පවතින අතිශය නරක ස්වභාවය හෙයින් ධෛර්යයක් ඇති අලූත් අය දේශපාලන පක්ෂ වලට සම්බන්ධ වෙන්නේ නැත. බුද්ධිමත් ජනතාව මෙකී ප‍්‍රතිපත්ති ප‍්‍රතික්ෂේප කරන බව නොරහසකි. ජරාජීර්ණව, කඩතොලූ වී පවතින මෙරට දේශපාලනයෙන් හෙම්බත් වී සිටින පොදු ජනතාවට අලූත් බලාපොරොත්තු ඇති කරනු සඳහා සාද්රිස්ට් ව්‍යාපාරයක් ගොඩනැගෙන්නේ කවදාද?