වෙළඳුන් නියාමනය කරමු

ප්‍රතිචාරයක් ලබාදෙන්න

milinda-prashna

2017/02/22 – ලංකාදීප

හාල් මිල පොදු ජනතාව අපහසුතාවයට පත් කරන ප‍්‍රශ්නයන් බවට පත්ව තිබේ. සාමාන්‍ය මිලට වඩා වැඩි සහ එදිනෙදා වෙළඳ පොලෙන් මිල දී ගන්නා සහල් විශේෂයට බලපාන මිල සහ ඒවා හිඟ වෙන විට අතෘප්තියට පත්වීම වැලැක්විය නොහැකිය. බත මෙරට ජනතාවගේ ප‍්‍රධාන ආහාරයයි. අද වන විට මිලියන විසි එකක ජනගහනයක් හාල් මිල හමුවේ කිසියම් හෝ ගැටළුවකය. ආනයනය හා මිල පාලනය සඳහා ආණ්ඩුව පියවර ගනිමින් සිටී. තීරණය කුමක් නමුත් එය වෙළඳ පොලට නොගැලපෙන එකක් වුවහොත්  එය ප‍්‍රතික්ෂේප වන බව සඳහන් කිරීම අවශ්‍යය.

හාල් මිල ගැන හදිසි තත්ත්වයට හේතුව කාලගුණ වෙනස්කම් හේතුවෙන් වගාව පිරිහීමය. ගොවියන් ලක්ෂ සංඛ්‍යාත ප‍්‍රමාණයකගේ වගාව කරගෙන යා නොහැකි වන විට නිෂ්පාදනය වන සහල් ආහාර සඳහා ප‍්‍රමාණවත් නොවන තත්ත්වයට පත්වෙයි. වී වගාව ගොවි ජනතාවගේ සම්ප‍්‍රදායික කාර්යයකි. පුරවැසියන් සමග එහි විශාල සංස්කෘතික බැඳීමක් තිබේ. නමුත් සහල් වෙළඳ පොල මිල නියම කරන්නේ ව්‍යාපාරිකයන්ය. හාල් සැපයුම පහල වැටී හිඟ බව දැනෙන විට මිල වැඩිවන අතර එය ඉල්ලූම ඉහළ යන කාරණයකි. මෙය තාවකාලිකය. ඉදිරි කන්නයේ කෙත්වතු සාර වී නිසි අස්වනු ලැබුණහොත් අද පවතින ප‍්‍රශ්න නිරාකරණය වනු ඇත.

සහල් කූපන් පොත සහ පාන් කාඞ් වැඩිහිටි ජනතාවගේ මතකයේ ඇත. මිල පාලනය කර පවතින තොග සාධාරණව බෙදා දෙනු සඳහා 1970 ආණ්ඩුව හාල් කූපන් පොත නිකුත් කළේය. අතිරේක ආහාර වශයෙන් සෑම පවුලකටම පාන් මිල දී ගන්නට කාඞ් එකක් ආණ්ඩුව සැපයීය. පවතින තොග සාධාරණව සාමාන්‍ය මිලකට සියළු දෙනාට බෙදන්නට කාඞ් වලින් අරමුණු කරන ලද නමුත් එය නැති ප‍්‍රශ්න ඇති කරන ලද අතර එවකට පැවැති ආණ්ඩුව පරාජය කරන්නට ද වෙළඳ පොල පාලන ප‍්‍රතිපත්තිය එක හේතුවක් විය. අතීත අත්දැකීම් අනුව තීරණගන්නේ නම් සහල් වෙළඳ පොල තුළ මතුවී ඇති තත්ත්වය පාලනය කර ගැනීමට වෙළඳ පොලට ඉඩ දීම සුදුසුය.

එසේ සඳහන් කරන්නේ ඇයි? වෙළඳ පොල පවතින තරගකාරී කාර්යක්ෂම ස්වභාවයට ගැලපෙන පරිදි හැසිරෙන්නට ආණ්ඩුවේ ආයතන අසමත්ය. මෙරට වී නිෂ්පාදනයෙන් සියයකට දහයකට වඩා මිල දී ගන්නට රජයේ යාන්ත‍්‍රණයට හැකියාවක් නැත. මිලට ගන්නා වී ගබඩාකර කලට වේලාවට වෙළඳ පොලට නිකුත් කරන තීරණ ගන්නට තරම් විවෘත බවක් රජයේ නිලධාරීන්ට නැත. අති විශාල මුදලක් අවශ්‍ය වන අතර බැංකුවලින් මුදල් ගෙන ඒවාට පොලිය ගෙවමින් සහ තොග නිසි පරිදි නඩත්තු කරන කාර්යයෙහි නිරත වන කැපවීම රජයේ නිලධාරීන්ට කරන්නට හැකියාවක් නැත. විශේෂයෙන් රජයේ යාන්ත‍්‍රණයේ පවතින නීති රීති සහ චක‍්‍රලේඛන එයට බාධා කරයි. පුද්ගලික අංශයේ නිලධාරියෙකු ගොවිපොලේ දී ගොවියා හමුවී තීන්දුගෙන ක්ෂණිකව මිල දී ගන්නා අතර ඒවා ප‍්‍රවාහනය, ගබඩාකිරීම, සහල් කිරීමට තීරණය කිරීම හා වෙළªන්ට විකණන්නේ ඉහළ නිලධාරීයාගේ අනුමැතිය බලාගෙන නොව නිසි වේලාවටය. එවැනි නම්‍යශීලීබවක් නැති ආණ්ඩුවේ ආයතන වල වී තොග ගොඩගැසේ, සහල් කරන විට සතුන් හානි කර තිබේ. සහල් කරන අනුමැතිය ගැනීම පමාවුවහොත් පාඩු සිදුවෙයි. පසුගිය කාලයේ දී රාජ්‍ය ආයතන වී සහ සහල් ගනුදෙනු වලදී වාර්තා කරන  ලද අලාභ සලකා බැලූවහොත් මෙම තොරතුර ඇත්ත බව පැහැදිලි වනු ඇත.

සහල් මිල වැඩි වූ පමණනින් සීමාවකින් තොරව ආනයකයට ඉඩ දීම ද වරදකි. ආනයන ප‍්‍රශ්න ඇතිකරන්නේ ඉදිරි කන්නෙයේ අස්වැන්නටය. ලෝකයේ වෙනත් රටවල් ආහාර මිල ස්ථාවරව තබනු සඳහා ඉදිරි ගිවිසුම් අත්සන් කරයි. ප‍්‍රතිපත්ති හදන්නේ නිෂ්පාදකයා සහ පාරිභෝගිකයා ගැන පමණක් නොව ව්‍යාපාරිකයා ද අවධානයට ගෙන බව සඳහන් කළ යුතුය. සහල් වෙළඳාම මාෆියාවක් බව දක්වමින් මත ඇතිකරනු වෙනුවට තෝරා ගත් ව්‍යාපාරික කණ්ඩායමකට සාධාරණ අවස්ථා සම්පාදනය කළ යුතුය. වී මිල දී ගෙන සහල් තොග පවත්වාගෙන යාම වෙනුවෙන් මෙම වෙළදුන් නියාමනය කිරීමට සුදුසු කාලය පැමිණ තිබේ. රජයේ මැදිහත්වීම අවම කළ යුතු අතර වෙළඳ පොල තරගය ඇති කිරීම අවශ්‍යය.

 

 

 

 

Advertisements

ඩෙංගු උවදුරට වග කියන්නෝ

ප්‍රතිචාරයක් ලබාදෙන්න

milinda-prashna

2017/02/15 -ලංකාදීප

ඩෙංගු රෝගී ස්වභාවය රට පුරා තදින් පැතිරෙන බවට තොරතුරු මාධ්‍ය වලින් වාර්තා වෙයි. රෝගී තත්ත්වය උත්සන්න වී ඛේදජනක ලෙස ජීවිතයෙන් සමුගත් සිද්ධි ද ඒ අතර සැලකිය යුතු තරම් බව නිරීක්ෂණය කළ හැකිය. වෛද්‍ය විද්‍යාත්මක ස්ථිර පූර්ව ප‍්‍රතිකාරයක් තවමත් සොයාගෙන නැත. ඩෙංගු පතුරවන මදුරුවා ගේ දෂ්ට කිරීමට ලක් නොවීම විසදුමක් වන අතර ඒ සඳහා හැකිතාක් පියවර ගත යුතු බව උපදේශය වී තිබේ. ඩෙංගු රෝගය බරපතල ප‍්‍රශ්නයක් වන විට එය පාලනය කරනු සඳහා ජාතික මට්ටමින් අවධානය යොමු වෙයි. රෝගයෙන් වැලකෙන පමණක් නොව මදුරුවන් මර්දනය ද ජනතාව සතු වගකීමක් බවට පත්ව තිබේ.

ජනතාව තුළ ඩෙංගු උවදුර භයානක එකක් බවට භීතියක් ඇති කර තිබේ. මදුරුවා මර්දනය කිරීමෙන් රෝගය පාලනය කරගත හැකිවන අතර මදුරුවන් බෝ වන පරිශ‍්‍ර පවත්වාගෙන යන පොදු ජනතාව වරදකරුවන් කර අධිකරණයට කැදවන හේතුවෙන් ඩෙංගු වලට අමතර තවත් බියක් සමාජයේ පැතිර යමින් තිබේ. ඩෙංගු උවදුරට වගකිව යුතු කවුද යන ප‍්‍රශ්නය සාකච්ඡා කිරීම මේ අනුව ඉතාමත් වැදගත්ය.

ඩෙංගු මදුරුවන් පිරිසිදු ජලයේ බෝ වෙන බව දැක්වෙයි. දීර්ඝ පෑවිල්ලකට පසු වැටෙන වැස්සෙන් පවා මදුරු බිත්තර පුපුරා කීටයන් හටගන්නා බව පර්යේෂකයෝ පෙන්වා දී තිබේ. ගෙවත්ත පිරිසිදු නමුත් අසල්වැසි නිදහස් තැනක මදුරුවන් බෝ වෙන පරිසරයක් ඇත. ජන සමාජය පමණක් නොව ආණ්ඩුව හා පලාත් පාලන ආයතන ද පරිසරය පිරිසිදුව තබාගැනීම හා මදුරු මර්දනය ගැන අවධානය යොමු කළ යුතුය. දඩ නියම කිරීම සාධාරණ ඩෙංගු මර්දන පියවරක් නොවේ.

මෙරට භූමි ප‍්‍රමාණයෙන් සියයට අසූ දෙකක් ආණ්ඩුවට අයත්ය. වනාන්තර හා මිනිස් වාසයෙන් තොර ප‍්‍රදේශ අත්හැර දැමීමෙන් පසු පවා පරිශ‍්‍ර වලින් වැඩි කොටසක් ආණ්ඩුවේ පාලනය යටතේ පවතින බව පෙනේ. පොදු පහසුකම් නැංවීම සඳහා ජනතාවගෙන් බදු අය කරන පලාත් පාලන ආයතන වලට තමන්ගේ බල ප‍්‍රදේශය රැක බලා ගැනීමේ වගකීමක් තිබේ. පලාත් සභා සහ ආණ්ඩුව අතර ඩෙංගු මර්දනය ගැන පරිශ‍්‍රමයක් අවශ්‍යය. ජන සමාජය සහ ස්වේච්ඡා සංවිධාන ද එයට සම්බන්ධ විය යුතුය. මැලේරියාව සාර්ථකව මර්දනය කිරීමට සමත්වීම හෙයින් නොබෝදා රටට අන්තර් ජාතික කීර්තියක් අත්පත් විය. නමුත් නැවතත් අලූත් මදුරු විශේෂයක් මගින් මැලේරියාව හිස ඔසවන බව ද කියැවෙයි. මැලේරියාව මර්දනය වාමාංශික දේශපාලනය රටේ තහවුරු කරන්නට හේතු වූ අතර එය ජාතික නායකයන්ගේ ක‍්‍රියාකාරීත්වය පරම්පරාවක් මතකයේ තබන කාර්යයක් වූ බව සඳහන් කළ යුතුය.

ඩෙංගු මර්දනය කිරීම ජනතාවට, ජනතා සංවිධාන වලට හෝ ආණ්ඩුවට පමණක් කළ හැකි කාර්යයක් නොවේ. මැලේරියාව මර්දනය කරන්නට ලෝක සෞඛ්‍ය සංවිධානය සෘජුව මැදිහත්ව වැඩ පිලිවෙලක් ආරම්භ කරන ලද අතර බිල් ගේට් පදනම ඇතුළු සංවිධාන විශාල ධනයක් යෙදවීය. ඩෙංගු මදුරුවා බලවත් රටවලට තර්ජනයක් වී නැත. රෝග ගැන පර්යේෂණ කරන්නේ බලවත් රටවල්ය. නව ඖෂධ වෙනුවෙන් ධනය යොදවන වෛද්‍ය පර්යේෂකයන් සිටින දියුණු රටවල් සහ සංවිධාන තමන්ට තර්ජනයක් වන තෙක් ඩෙංගු මර්දනය ගැන අවධානය යොමු කරන්නේ නැත. ශී‍්‍ර ලංකාවට ඩෙංගු මදුරුවා පාලනය කරන හෝ රෝගීන් සඳහා ස්ථිර ප‍්‍රතිකාර වෙනුවෙන් පර්යේෂණ කරන්නට වත්කමක් නැත. රටට ප‍්‍රශ්නයක් වී ඇති ඩෙංගු ගැන ජාත්‍යන්තර පර්යේෂකයන්ගේ අවධානය යොමු කරන්නට අවශ්‍යය.

සාමාන්‍ය ජනතාවගේ ගෙවත්තේ මදුරු පරිශ‍්‍රයක් තිබූ පමණින් දඩ පමුණුවන, සහ මහජනතාවගේ නොසැලකිල්ල බව දක්වා අධිකරණයෙහි නඩු පැවරීමට කලින් මෙම අර්බුදයේ සියළු පැති සලකා විධිමත් පියවරකට යා යුතුව තිබේ. ජනතාව මදුරුවන් බෝවීම වැලැක්වීමට පියවර ගත යුතුය. පලාත් පාලන ආයතනසහ මහජන සෞඛ්‍ය පරීක්ෂකයන් තම බල ප‍්‍රදේශ ගැන අවධානය යොමු කර පැතිරීම වැලැක්වීම වැදගත්ය. රෝගය පැතිරීම හා ඖෂධ ගැන ජාත්‍යන්තර අවධානය ඇතිකිරීම ජාතික මට්ටමින් කළ යුතු දෙයකි.

 

තාක්ෂකණික දරු උපතක්

ප්‍රතිචාරයක් ලබාදෙන්න

milinda-prashna

2017/02/08 – ලංකාදීප

නිදුක් නිරෝගී දරු සම්පතක් ප‍්‍රාර්ථනා කළ යුගය අවසානයක් කරා ළඟා වන බව අනාවරණය වෙයි. තෝරාගත් ගති ලක්ෂණ සහිත ප‍්‍රවේනිගත රෝග නොවැළදෙන බවට සහතිකය සහිත දරු උපතකට පසුබිම සකස් වෙමින් තිබේ. නවීන සොයා ගැනීම් අනුව වෛද්‍යවරයා හමුවට යන දෙමව්පියන්ට තමන් කැමැති දරුවා ඉල්ලන්නට හැකියාව ලැබෙන්නට බැරි නැත. විද්‍යාව හා තාක්ෂණය දියණුව සමග සිදුවන මෙම වෙනස ගැන විශාල ආන්දෝලනයක් පවතී.

ලොව පළමු නල දරු උපත සිදුවී වසර හතලිහක් සම්පූර්ණ වී තිබේ. විද්‍යාගාරයක කෘතීමව සංසේචනය කරන ලද කලලයක් ගැබක තැන්පත් කර නල දරුවෙකු බිහි කිරීම අද වන විට සාමාන්‍ය දෙයකි. එයින් නොනැවතී හොඳ දරු උපතක්  වෙනුවෙන් කර ඇති පර්යේෂණ වලින් හෙළිකරන කරුණු විස්මිතය. ජාන පරීක්ෂා කර තෝරාගත් ජාන වලින් පමණක් ජීවයක් බිහි කරන්නට විද්‍යාව සමත්ව තිබේ. අලූත්ම වෛද්‍ය විද්‍යා වාර්තා කියන අන්දමට ඉතාම සූක්ෂම පරීක්ෂණ වල ප‍්‍රතිඵල සාර්ථකය. ජාන වෙනස් කර තමන්ට උවමනා ලක්ෂණ පමණක් සහිත දරුවන් බිහි කරගත හැකිය. හොඳට ඉගෙන ගන්නා දරුවකු තෝරා ගැනීමට පුළුවන්කම ලැබී තිබේ. තැලමීසියාව, දියවැඩියාව සහ සමහර පිලිකා ආබාධ ඇතුළු රෝග දෙසිය පනහක් ගැන කලල අවධියේ දී ම පරීක්ෂා කර බලා පාලනය කරන්නට හැකි බව ප‍්‍රකාශ වෙයි. නමුත් මෙම තාක්ෂණයට ඉඩ දෙන්නට ජාත්‍යන්තරය තවමත් සූදානම් නැත. රටවල් කිහිපයක් පමණක් නූතන යුගයේ දරුවන් බිහි කරන්නට දැනට අවසර දී තිබේ. සංස්කෘතික අනන්‍යතාව සහ ලෝක උරුමය ගැන ගැඹුරින් අවධානය යොමු කරන ජගත් නායකයන් අතරින් යම් පිරිසක් තවමත් ජාන වෙන්කර තෝරාගත් ලක්ෂණ සහිත දරු උපත් වලට ඉඩ දෙන්නට සූදානම් නැත.

වෛද්‍ය විද්‍යාවේ නව සොයා ගැනීම් මානව පැවැත්ම කෙරෙහි තීරණාත්මකය. ඉතිහාසයේ සිට මේ දක්වා අනාවරණය කරගෙන ඇති අලූත් දේ හෙයින් දරු උපත නිරෝගී පමණක් නොව ලෙඩ රෝග පාලනය කරගෙන උපරිම ආයු කාලයක් ජීවත්වෙන්නට ද අවස්ථාව සම්පාදනය කර තිබේ. දරුණු රෝග කලින් හදුනාගෙන හොඳම දරුවන් බිහි කිරීම වරදක් වෙන්නේ කෙසේදැයි ප‍්‍රශ්න කරන පිරිසක් ද සිටී. සෞඛ්‍ය පිරිවැය සියයට විස්සකින් පමණ අඩු කරන්නට මෙකී නවීන තාක්ෂණයට හැකිවෙන අතර අනාගතයේ දී උපදින දරුවන් ගේ ලක්ෂණ කල් තියා වෙනස් කරගත හැකිවන විට දරුණු රෝග තුරන් කර හැකි වීම කොපමණ යහපත් දැයි ඔවුහු විමසති. මානව සංහතියේ පැවැත්මට හොඳම ජාන සංයුතියකින් යුතු තත්ත්වයකට පත් කරන්නට හැකියාව තිබේ නම් එය නතර කළ යුතු මන්ද යන කාරණය බරපතල විවාදයකට ලක් ව තිබේ.

බි‍්‍රතාන්‍ය, චීනය සහ දකුණු කොරියාව ඇතුළු රටවල් දැනට දරු උපත ස්වභාවික බව වෙනුවට තමන්ට කැමැති දරුවන් නිර්මාණය කරගැනීමේ තාක්ෂණයට හුරු වන බව පෙනේ. ඒවාද බහුලව නොවේ. නමුත් ඉදිරි අඩ සියවස තුළ ලෝකය පුරා තාක්ෂණික දරු උපත අනිවාර්ය දෙයක් විය හැකි බව පැහැදිලිය.

ජාත්‍යන්තර ප‍්‍රජාව තුළ පවා ස්වභාවිකත්වය වෙනස් කර කෘතීම පැවැත්මකට අනුගතවීම ගැන විරෝධතා තිබේ.  මෙරට ජන ජීවිතය හා ඇවැතුම් පැවැතුම් වෙනස්වීම ගැන අසතුට මතුවන අවස්ථා එමටය. වෛද්‍ය විද්‍යාවේ නවීන තාක්ෂණික පැති රටට ඇතුළු කරගන්නේ කෙසේ ද යන්න ගැන සංවාදයක් අවශ්‍යය. සම්ප‍්‍රදායිකත්වය සහ සංස්කෘතික අනන්‍යතා ආරක්ෂා කර ගැනීම වැදගත්වන අතර අනෙක් පැත්තෙන් අලූත් දේ රටට අනන්‍ය කරගැනීමේ හැනියාව ගැන මෙම සංවාදයේ දී අවධානය යොමු කළ යුතුය.

 

රබර් කර්මාන්තයේ අනාගතය කුමක්ද?

ප්‍රතිචාරයක් ලබාදෙන්න

milinda-prashna

2016/02/01 – ලංකාදීප

වානිජ වැවිලි ආර්ථිකය රටට හඳුන්වා දෙන්නේ අධිරාජ්‍යවාදීන්ගේ කාලයේ දීය. අවුරුදු දෙසීයක පමණ ඉතිහාසයක් තිබේ. එයට කලින් පුරාණ රාජධානි පැවැති කාලයේ දී පෙරදිග කලාපයෙන් මෙරට පැමිණි වෙළඳුන් පුවක්, කුරුදු, ගම්මිරිස් හා සුළු අපනයන භෝග එකතු කරගෙන ඇත. වර්තමානයේ ද වැවිලි ක්ෂේත‍්‍රය ශ‍්‍රී ලංකාවේ ආර්ථික සමාජ ව්‍යුහයේ වැදගත් කොටසකි. රබර් වගාව මෙකී වැවිලි කර්මාන්තය තුළ පවතින නියෝජනය කැපී පෙනෙන එකකි. එහි පවතින තත්ත්වය සහ අනාගතය කෙබදුද?

කෝපි වගාවට හානි කරන ලද රෝගයක් පැතිරෙන අවස්ථාවේ දී විකල්ප වගාවක් ලෙස තේ වගා කරනලද අතර පසුව රබර් වගාව හඳුන්වා දී ඇති බව සඳහන්ය. දෙවන ලෝක යුද්ධය බලපවත්වන කාලයේ රබර් වලට ඉතාම හොඳ ඉල්ලූමක් තිබී ඇත. මිත‍්‍ර පාක්ෂික රටක් වූ ලංකාව, යුද බිමේ සැපයුම් වෙනුවෙන් උවමනා කළ අමුද්‍රව්‍යයක් සේ සලකා වැඩිපුර රබර් නිපදවා අපනයනය කර ඇත. හොඳ ආදායමක්ද ලැබුණ හෙයින් උඩු සහ යටි වශයෙන් රබර් ගස් වල කැපුම් දෙකක් යොදා රබර් කිරි යහමින් සකස් කරගෙන ඇති බව අනාවරණය වන අතර එහි ප‍්‍රතිඵලය වූයේ වගාවෙහි ආයු කාලය කෙටි එකක් වීමයි. යුද්ධය අවසන් වන විට රබර් නිෂ්පාදනය අඩු වූ අතර ඉල්ලූම ද පහල ගියේය. රටට විනිමය හිඟ විය. පශ්චාත් යුද ආර්ථික අර්බුදය වලකාගන්නට චීන ශ‍්‍රී ලංකා රබර් සහල් ගිවිසුම ප‍්‍රයෝජනවත් වූ බව ඉතිහාසය පෙන්වා දෙයි.

ලෝක වෙළඳ පොලේ කලින් කල ඇතිවන ඉල්ලූම අනුව ස්වභාවික රබර් වලට ලැබෙන මිල වෙනස් වෙයි. රබර් ශීට් වල මිල පහත වැටෙන විට රබර් ගලවා තේ හෝ පොල් වගා කරන මෙරට වගාකරුවෝ මෑතක සිට කටුපොල් වගා කරන්නට ද පෙළැඹී සිටිති. රාජ්‍ය හා පුද්ගලික වතු සමාගම් ද හැසිරෙන්නේ එයට අනුරූපවය. අද වන විට රබර් වලට හොඳ ඉල්ලූමක් තිබේ. තවමත් යම් කොටසක් අමුද්‍රව්‍යයක් වශයෙන් අපනයනය කරයි. දෙස් විදෙස් කර්මාන්තකරුවෝ මෙරට රබර් කිරි උපයෝගී කරගෙන නොයෙකුත් නිෂ්පාදන කරති. රබර් අත්වැසුම්, රථ වාහනවල කොටස් වල සිට උසස්ම ප‍්‍රමිතියේ ටයර් නිපදවන බව නිරීක්ෂණය කළ හැකිය. ස්වභාවික රබර් අමුද්‍රව්‍යයක් සේ අපනයනය කරනවාට වඩා වටිනාකම එකතු කර නව නිෂ්පාදනයක් සේ විකිණීමෙන් රටට වැඩිම විනිමය ප‍්‍රමාණයක් ලැබෙන අතර රැකියා අවස්ථා, රටට බදු ආදායම සහ විශේෂයෙන් නවෝත්පාදනයක් සිදුවෙයි. මෙරට ක‍්‍රියාත්මක කර්මාන්ත ශාලා පෙන්වා දෙන අන්දමට නවීන තාක්ෂණය උපයෝගී කරගෙන ලෝකයේ හොඳම රළු ටයර් සහ අත්වැසුම් යනාදිය නිපදවමින් සිටී. අවශ්‍ය තරමට රබර් කිරි නොසැපයෙන හෙයින් නිෂ්පාදන අවශ්‍යතාව අඛණ්ඩව පවත්වාගනු සඳහා පිටරටින් රබර් ආනයනය කරන බව මෙම කම්හල් වලින් ලැබෙන තොරතුරු අනාවරණය කරයි.

කම්හල් හිමියන් ගේ අදහස කමක්ද? වෙනත් රටවල රබර් වගාව ආශි‍්‍රත ශ‍්‍රමිකයෝ පාන්දර කපන්නට පටන් ගන්නා අතර එහි වැය කරන කාලය අඩු හෙයින් අමතර අතුරු රැකියාවකට ද කාලය ඉතිරි කරගනී. වැහි කබා ඇඳගෙන කාලගුණය ප‍්‍රශ්නයක් කරගන්නේ නැතිව වෙහෙසෙයි. රබර් ගස් වලට ද වැහි ගාඞ් පාවිච්චි කරයි. මෙරට රබර් කිරි කපන්නට ශ‍්‍රමිකයන් නැත. පාන්දරින් වැඩ කරන්නට කැමැති නැත. සුළු වැස්සක් වැටුණොත් කිරි කැපීම අත්හරියි. එහෙයින් වගාකරුවන් රබර් වගාව අත්හරින තැනට පත්ව ඇති අතර ආදායමක් නැති රබර් ඉඩම් වෙනත් වගා වලට හෝ කැබලිකර විකුණන්නට සූදානම්ය. හෙයින් සිදුවන හානිය තක්සේරු කරන්නට අවශ්‍යය.

රබර් කිරි උපයෝගී කරගෙන නිෂ්පාදනයෙහි නිරත කර්මාන්තකරුවන්ට අනුව මෙම ස්වභාවය ඉදිරියේ ද පැවැතුනහොත් අනාගතයේ දී කර්මාන්ත පවත්වාගෙන යා නොහැකිය. ආනයනික රබර් වලින් නිපදවා මිල තරගකාරී අපනයනයක් කළ නොහැකිය. එය විශාල ගැටළු ඇති කරන අතර පවතින ස්වභාවය සමාලෝචනය කර විසදුම් යෝජනා කිරීම වැදගත්ය.