පොදු ප‍්‍රවාහනය

ප්‍රතිචාරයක් ලබාදෙන්න

 

2016/08/31 – ලංකාදීප

milinda-prashna

එස්තෝනියාව උතුරු යුරෝපා රටකි. කලින් සෝවියට් සමූහාණ්ඩුවේ පාලනයේ තිබූ එස්තෝනියාව නොබෝදා අලූත් තීන්දුවක් ප‍්‍රකාශයට පත් කළේය. නගරය තුළ පොදු ප‍්‍රවාහනය ගාස්තු අය නොකර නොමිලේ පවත්වා ගෙන යන බවය. පොදු ප‍්‍රවාහනය නොමිලේ වන විට තම වාහන ගෙදර තියා බස් වලින් වැඩට යන්නට සූදානම් වන පිරිස සියයට විස්සකින් වැඩි විය හැකිය. එරට ආණ්ඩුව එම තත්ත්වය සලකා බලා තිබේ. එයට මුහුණ දෙන්නට සූදානම්ය. එයට සමාන්තරව නගරයේ වාහන භාවිතාව අවම වී වායු දුෂණය අඩු ප‍්‍රසන්න තැනක් බවට පත්වනු ඇති බව එස්තෝනියාවේ පාලකයෝ විශ්වාසය පළ කරති. බස් වලින් වැඩි පිරිසක් ගෙන්විය හැකි නම් එය නොමිලේ සම්පාදනය පාඩුවක් නොවන බව කල්පනා කරන්නේ දූරදර්ශී ලෙසය.

මෙම උදාහරණය පමණක් නොව ලෝකයේ තැනින් තැන ගමනා ගමනය සම්බන්ධ සංකල්ප වෙනස් වෙමින් තිබේ. එයට පදනම තාක්ෂණයයි. දැනටත් ප‍්‍රවාහනයේ තීරණාත්මක සාධකය බලශක්ති වියදමයි. ඉන්ධන පිරිවැය සලකා ගමන් බිමන් වියදම තීරණය කෙරේ. ප‍්‍රවාහනයේ දී පොසිල ඉන්ධන භාවිතය ක‍්‍රමයෙන් තුරන් වෙමින් තිබේ. නුදුරු කාලයේ දී වාහන ධාවනය කරන්නේ විදුලියෙන්ය. නැතිනම් සූර්ය බල ශක්තියෙන්ය. විදුලිය බලය නිපදවන්නේ ද සූර්ය තාපය උපයෝගී කරගෙන බව සඳහන් කළ යුතුය. හිරු පායන විට ශක්තිය ගබඩා කරගන්නා වාහන එහි බලයෙන් ධාවනය වන විට වියදම බිංදුවකි. වාහනය මිල දී ගැනීමට කරන ආයෝජනය හැර නඩත්තු පිරිවැය සීමාසහිත වන විට ප‍්‍රවාහන ක්ෂේත‍්‍රයේ විස්මිත පෙරැලියක් අපේක්ෂා කළ හැකි වෙයි. එය පොදු ජනතාවට ලැබෙන අවස්ථාවකි.

ප‍්‍රවාහනය සම්බන්ධ අලූත් රාමුව සඳහා ජාත්‍යන්තරය සූදානම් වෙන්නේ කෙසේද? නෙදර්ලන්තය වසර 2025 සිට ඉදිරියට විදුලි කාර් හැර ඞීසල් හෝ පෙට‍්‍රල් වාහන ලියා පදිංචි නොකරන තීරණයක් ගෙන තිබේ. කර්නාටක ප‍්‍රාන්තය විදුලි වාහන වලට මාර්ග ඉවත්  කරන අතර ඉන්දියාවේ තවත් ප‍්‍රාන්ත කිහිපයක් විදුලි බලයෙන් ධාවනය වන වාහන වල බදු, ලියා පදිංචි ගාස්තු ඉවත් කර ඇත. යුරෝපා රටවල් පමණක් නොව චීනය ද අලූත් සහන ප‍්‍රකාශයට පත් කරමින් ඉන්ධන පිරිවැය රහිත විදුලි වාහන වලට ජනතාව පොළඹවන බව පෙනෙන්නට තිබේ.

බලශක්ති පිරිවැය කපා හරින අලූත් තාක්ෂණික සොයා ගැනීම් ජන ජීවිතය වෙනස්කරන්නට හේතු වී ඇත. ප‍්‍රවාහනය සම්බන්ධව කරන වෙනස්කම් ඒ අතරින් ප‍්‍රබලය. පොදු ප‍්‍රවාහනය සම්බන්ධව ගැටලූ ලෝකයේ  ඕනෑම රටක් සියුම් අභියෝගයකට මුහුණ දෙන එකකි. එයින් ගැලවී සාමාන්‍ය ජනතාවට වාසි අත්පත් කරදෙන්නට නම් පවතින තත්ත්වය වෙනස් කරන්නට අවශ්‍ය බව ප‍්‍රතිපත්ති සම්පාදකයෝ තේරුම්ගෙන ඇති බව අනාවරණය වෙයි.

ලෝකයේ වෙනත් රටවල් තාක්ෂණය වෙනස් කර ජීවිත වල පහසුව සහ පිරිවැය ගැන අවධානය යොමු කරන විට ශ‍්‍රී ලංකාව තීරණ ගන්නේ කෙසේද? එය ප‍්‍රශ්නයකි. ඞීසල් සහ පෙට‍්‍රල් වාහන ආනයනය කරන්නට ඉඩ දී ඒවාට වැඩි පුර බදු පනවන විට එහි හරය තේරුම් ගත හැකිය. ලෝකයේ එක පැත්තක රටවල් වෙනස් ආකාරයකට අවධානය යොමු කරන නමුත් අනෙක් පැත්තේ රටවල් තවමත් බලන්නේ ආණ්ඩු වල පැවැත්මේ කොටසක් වශයෙනි. වාහන වලට බදු නැත්නම් ආණ්ඩුවේ වියදම් පියවා ගන්නට මගක් නැත. එය එසේ විය යුතුද?

රටට හිතකර යෝජනා දෙස නැවුම් අදහස් ඇතිව සලකා බලන්නට කාලය එළැඹ තිබේ. මෙරට අගනුවර සහ තදාසන්න නගරවල වාහන තදබදය බරපතලය. පොදු මගී සේවා වලින් ජනතාව අපේක්ෂා කරන සේවය ලැබෙන්නේ නැත. පොදු හෝ පුද්ගලික වාහන භාවිතා කරන රට වැසියන් ඒ වෙනුවෙන් තම ආදායමෙන් සැහෙන ප‍්‍රමාණයක් වැය කරන තැනට පත්ව තිබේ. කාලය සහ ධනය වැය කර අවසානයේ දී ඉතිරි කරගන්නේ අතෘප්තියයි. මහ මග ගත කරන කාලය, ඒවෙනුවෙන් කරන වියදම නාස්තියක් බවට පත්ව ඇත. වෙනස් වෙමින් පවතින තත්ත්ව හඳුනාගෙන රාමුවෙන් එපිට තීරණ වලින් ජනතාව සතුටට පත් කළ හැකිය.

 

 

 

Advertisements

වැඩ කරන කාලය අඩු කරමු

ප්‍රතිචාරයක් ලබාදෙන්න

milinda-prashna

2016/08/24 – ලංකාදීප

කාර්ලෝස් ස්ලිම් ව්‍යවසායකයෙකු වශයෙන් ලෝකයේ ඉහළම තැනට පත් ධනවතෙකි. මැක්සිකෝ පුරවැසියෙකු වන හෙතෙම 2010-13 කාලයේ ලෝකයේ ධනවත්ම පුද්ගලයා විය. නොබෝදා මාධ්‍ය සම්මුඛ සාකච්ඡාවකට සහභාගී වන හෙතෙම ශිෂ්ඨාචාරය දියුණුව සමග වැඩකරන දින ගණන අඩු විය යුතු බවට අදහසක් පළ කරයි. තාක්ෂණය දියුණු වී තිබේ. අඩු වෙහෙසෙකින් වැඩි ප‍්‍රගතියක් අත්පත් කරගත හැකි අවස්ථාවක නොනැවතී වෙහෙසෙන්නට අවශ්‍ය නැති බව දක්වයි. සතියකට දින තුනක් වැඩ කිරීම ප‍්‍රමාණවත් වන අතර ඉතිරි කාලය වෙන් කළ යුතු හිතන්නට සහ දැනුම වැඩි කරගන්නට බව ඔහු  කියයි.

ලෝකය වෙළඳ පොළ නිෂ්පාදනය පැත්තෙන් ඉහළටම පැමිණ තිබේ. තාක්ෂණික සහ සන්නිවේදනය ප‍්‍රබලය. ඵලදායීතාව සහ කාර්යක්ෂමතාව ගැන තොරතුරු වාර්තා කරන්නේ ඒවා ඉතාම දියුණු සංකල්ප බවට පත්ව ඇති බවය. නමුත් සියලූම ලෝක වාසීන්ට මෙම වාසි සමබරව බෙදී නැත. සමාජ තුළ දරිද්‍රතාවය හුදෙක් ආහාර පාන සපයා ගැනීමට සීමා වී නැත. එහෙයින් ආකල්ප, දැනුම, සන්නිවේදනය යනා දී වශයෙන් එකිනෙකට වෙනස් අලූත් පැති වලින් ජනතාව දුප්පත් වෙමින් පවතින බව නිරීක්ෂණය කළ හැකිය. අත මිට සරු සමාජ පවා වෙනස් පැති වල දී දුප්පත්කමට ගොදුරු වී තිබේ.

ලෝකයේ ධනවත්ම පුද්ගලයා වශයෙන් සියලූ සැප සම්පත් හිමි කාර්ලෝස් වැඩ කරන දින ගණන අඩු කර වැඩි පුර හිතන්නට කාලය වෙන් කිරීම ප‍්‍රශ්නයක් නැත. නමුත් එදිනෙදා මහන්සි වී උපයන දේ දෛනික පැවැත්මට ප‍්‍රමාණවත් නැති තත්ත්වයක සිටින ලෝක වාසී ලක්ෂ සංඛ්‍යාත පිරිසකට එය විවාදාත්මක අදහසකි.

විරැකියාව ප‍්‍රශ්නයක් වී ඇති රටක, වැඩ කරන ජනතාව කලින් විශ‍්‍රාම යවන විට එය අලූත් ප‍්‍රජාවට අවස්ථා සම්පාදනය කරයි. එක්තරා කාලසීමාවකට පසු වැඩ කරන කාලය  සතියකට දින තුනක් දක්වා සීමා කළහොත් එය තවත් පුද්ගලයෙකුට වැඩ කරන්නට අවකාශයක් නිර්මාණය කරයි. මහන්සි වී වැඩ කරන ලද පසුව සතියකට දින තුනක් වැඩ කරන රීතියට යොමු වන වෘත්තිකයන් ගේ ඉතිරි කාලය රටක ක‍්‍රීඩා, සංස්කෘතික, සංචාරක, අධ්‍යාපන හෝ වෙනත් අතිරේක විනෝදාත්මක දේ වෙනුවෙන් අවකාශයක් නිර්මාණය කරයි. කාර්ලෝස් ස්ලිම් එවැනි අදහස් දක්වා තිබේ. කාර්යාලයට එන කාලය අඩු කරන්නට හැකිවන පරිදි තොරතුරු තාක්ෂණය දියුණු වී ඇති අතර වැඩ කරන්නට කාර්යාලයටම පැමිණිය යුතු නැත. නූතන යුගය තුළ කාර්මික මෙවලම් හැසිරවීම විනා දහඩිය මහන්සියෙන් වැඩ කිරීම සීමා වෙන පසුබිම තුළ කලින් විශ‍්‍රාම ගත්ත ද වැඩි වයස් ගත වනතෙක් අත්දැකීම් වලින් ප‍්‍රයෝජනයට ගන්නට හැකි බව ද ඔහු පෙන්වා දෙයි.

වැඩ කරන කාලය අඩු කිරීමෙන් දුප්පත් ජන කොටසට අවාසියක් වන බවට නැගෙන අදහසට ද ඔහුට උත්තරයක් තිබේ. එක තැනක සතියකට දින තුනක් වැඩ කරන කෙනෙකුට තවත් උපයන්නට අවශ්‍ය නම් තවත් තැනක තවත් දින තුනක් වැඩ කරන්නට බාධාවක් නැති බව ඔහු පෙන්වා දෙයි.

කාර්මික යුගයේ දී පැය අටක වැඩ මුරයක් දිනා ගත්තේ බලවත් පරිශ‍්‍රමයකින් පසුවය. උද්ඝෝෂකයන්ගේ රුධිරය වීදි පුරා ගලා ගියේය. සේවා යුගයේ දී හාම්පුතුන් පැය අටටත් අඩු කාලයක් වැඩ කරන්නට යෝජනා කරන බව පෙනෙන්නට තිබේ. නිෂ්පාදනය නොකර පැවැත්මක් නැති තැනක සිට නිෂ්පාදනය කරන්නේ කෙසේදැයි බුද්ධියෙන් සිතා බලන තැන දක්වා ශ‍්‍රමිකයාගේ භූමිකාව පරිවර්තනය වී තිබේ. කාර්ලෝස් ස්ලිම් අර්ථ දක්වන්නේ එහි එක් පැත්තකි. නොපෙනන පැත්ත ගැන අවධානය යොමු කළ යුතුව තිබේ.

නොබෝ කාලයකින් ජාත්‍යන්තරය තුළ වැඩ කිරීමේ කලාව වෙනස් වෙන බව තේරුම්ගත යුතුය. දැනටත් එයාර් බීඇන්ඞ්බී,  ඌබර් සහ ස්වයංකී‍්‍රය රොබෝ තාක්ෂණ පැමිණ තිබේ. ශ‍්‍රම වෙළඳ පොල පරිවර්තනය විය හැකි අතර නීති රීති වෙනුවට පුද්ගල හැකියාව මත නිදහසේ හුවමාරු වන වෘත්තීයවේදීන් බිහිවෙන්නට ඉඩ ඇත. අන්තර් ජාලය ඔස්සේ නොදන්නා සමාගම් වල පැවරුම් පැය ගණනට සම්පූර්ණ කර ආදායම් උපයා ගන්නට අවස්ථා දැනටමත් ලැබී ඇත. මෙවැනි සංකීර්ණ පසුබිමක් තුළ ශ‍්‍රී ලංකාවේ ශ‍්‍රමිකයා සහ ශ‍්‍රමය සම්බන්ධ පැවැත්ම සම්බන්ධයෙන් ගැඹුරු අවධානයක් යොමු කළ යුතුව තිබේ.

 

 

 

 

ලී ක්වාන් යූ

ප්‍රතිචාරයක් ලබාදෙන්න

milinda-prashna

2016/08/17 – ලංකාදීප

සිංගප්පූරු ගුවන් සේවාව මෙයින් හතලිස් තුන් අවුරුද්දකට කලින් ආරම්භ කර අද වන විට සාර්ථකත්වයේ ඉහළ තැනක සිටින ව්‍යාපාරයකි.  විසි හතර දහසකට වැඩි කාර්ය මණ්ඩලයක් සමග අවුරුද්දකට ඇමරිකානු ඩොලර් බිලියන පහලොව ඉක්මවන ආදායමක් උපයන සිංගප්පූරු ගුවන් සේවය අන්තර් ජාතික කීර්තියක් හිමි කරගෙන තිබේ. ගුවන් ගමන් ගැන නොව එහි සාර්ථකත්වය අවධානයට ගත යුතුය. සිංගප්පූරුවේ නිර්මාතෘ ලී ක්වාන් යූ, එය ව්‍යාපාරයක් වශයෙන් ආරම්භ කරන විට මුහුණ දුන් එක්තරා අභියෝගයක් එහි දී වැදගත්ය. මන්ද එය නායකත්වය සම්බන්ධ සියුම් විග‍්‍රහයක් වන බැවිනි. අර්බුධයක් හමුවේ මුහුණට මුහුණ දී සාර්ථකත්වය අත්පත් කරගන්නේ කෙසේද යන්න අවබෝධ කරගැනීමට හොඳ ප‍්‍රවේශයක් වන හෙයිනි.

සිංගප්පුරු ගුවන් සමාගමේ නියමුවන් වෘත්තීය අයිතිවාසිකම් පදනම් කරගෙන වැඩ වර්ජනයක් නිවේදනය කරයි. සංචාරක සහ ආර්ථික උවමනාවන් සඳහා ජාත්‍යන්තරය සමග බැඳී සිටි රටට එම වැඩ වර්ජනය බරපතල පීඩාවක් ඇති කරනු නිසැක බව පෙනී ගියේය. එක්තරා තීරණාත්මක මොහොතක වැඩ වර්ජනය කරන්නට සූදානම් ගුවන් නියමුවන් සහ අගමැති ලී ක්වාන් යූ මුහුණට මුහුණ සාකච්ඡාවක්  කළේය. එය කෙසේ කොයි ආකාරයට පැවැත්වූයේ ද යන්න ලී ක්වාන් යූ මහතා ගේ වචන වලින්ම පැහැදිලිව කියන යූ ටියුබ් ප‍්‍රකාශයක් අන්තර් ජාලයෙහි වෙයි. එය නරඹන  ඕනෑම කෙනෙකුට නායකත්වය යනු කුමක්දැයි අවබෝධ වෙයි. චරිතයක් තුළ තිබිය හැකි ප‍්‍රබල ශක්තිය කොපමණ ද යන්න මැන ගැනීමට හැකියාව ලැබෙයි.

ලී ක්වාන් යූ ට අනුව හෙතෙම වැඩ වර්ජනය කරන බවට තර්ජනය කරන ගුවන් නියමුවන් මුහුණට මුහුණ හමුවෙන්නේ ඔවුන්ට තීරණය ගැනීමට පහසුව ඇති කිරීමටය. යාප්පුවෙන් කතා කර ඔවුන් දිනාගෙන කොහොම හරි සේවය පවත්වාගෙන යන නායකයෙක් ද එහෙම නැත්නම් වැඩ වර්ජනයට මුහුණ දෙන්නට සමත් ශක්තියක් තිබේ ද යන්න එයින් අඟවන්නේය.

වර්ජකයන්  සහ අගමැති ලී ක්වාන් යූ අතර පරතරය අඩි පහකි. සාකච්ඡා මේසයේ දුර එයයි. ‘‘ මම දුර්වලයෙක් ද, යටත් කරගන්නට හැකිද? නැත්නම් මා දිනා ගැනීම වැදගත් ද යන්න තීරණය කරන්නට එම පරතරය හොඳටම සෑහුණ’’ බව හෙතෙම සඳහන් කර තිබේ.

ගුවන් සේවය ගොඩගැගූ තමන්ට එය විනාශ වෙන්නට ඉඩ දිය නොහැකි බව කියා ඇත්තේ තියුණු ස්වරයකින්ය. ‘‘ වර්ජනය කළොත් සිංගප්පූරු ගුවන් සේවය වහනවා. මම ආයෙත් මුල සිට පටන් ගන්නවා හැබැයි ඒ ඔබ සියලූ දෙනා රහිතව. ’’ ලී ක්වාන් යූ කියා ඇත්තේ තද භාෂාවකින්ය. ‘‘ වර්ජනය අත් හරින්න. ප‍්‍රශ්න ගැන මා එක්ක සාකච්ඡා කරන්න.’’ ලී ක්වාන් යූ කියා ඇත්තේ එපමණකි. හරියටම විනාඩි හැට පහකට පසු වර්ජනය කරන තීරණය අත් හරින ලද ගුවන් නියමුවන් සුපුරුදු පරිදි රට වෙනුවෙන් වැඩ කරන්නට තීරණය කර තිබේ.

සිංගප්පූරු නායකයාට පසුව සඳහන් කළ ආකාරය අනුව සටන් කිරීම පලක් නැති බව ගුවන් නියමුවන් වටහා ගෙන ඇත. ඔහු පරාජය කළ නොහැකිය. ගුවන් සේවය වසා දමා අලූතින් පටන් ගන්නට බැරි කමක් නැති බව තේරුම් කර දෙන්නට සමත් වූ ලී ක්වාන් යූ කවුරු රට පාලනය කළත් ඔහු අයෝමය පුද්ගලයෙකු විය යුතු බව කියා ඇත. ඔහුගේ වචන වලින්ම කියනවා නම් රටක් පාලනය කිරීම කාඞ් සෙල්ලම් කරනවා වාගේ ගේම් එකක් නොවේ. ඔහුගේ සහ ජනතාවගේ පැවැත්ම පිලිබඳ ප‍්‍රශ්නයකි.

පැවැත්ම සම්බන්ධව තීරණ ගන්නා විට එයට එඩිතරව මුහුණ දෙන ආකාරය සියුම්ය. නායකත්වය විදහා දැක්වෙන්නේ ඒ අනුවය. සිංගප්පූරු ගුවන් සේවාවේ නියමුවන් කරන ලද වර්ජන දැනුම් දීම ඉදිරියේ නිර්භීතව සටන් කරන ලද නායකයෙකු වශයෙන් ලී ක්වාන් යූ ගැන අදත් අන්තර් ජාලය තුළ ඔහුගේ අදහස් ලෙල දෙයි. ගුවන් නියමුවන් සමග සාකච්ඡා කර ඔවුන්ගේ ප‍්‍රශ්න විසඳා රට ගැන අවධානය යොමු කළා නම් හෙතෙම ඉතිහාස ගත වෙන්නේ දුර්වල නායකයෙකු වශයෙන්ද ?

 

 

සතුටු ඇමති

ප්‍රතිචාරයක් ලබාදෙන්න

milinda-prashna

2016/08/10 – ලංකාදීප

කැබිනට් මණ්ඩලය ආණ්ඩුවක පුලූල් වගකීමක් උසුලන බලවත් ව්‍යුහයකි. රටක් පාලනයට විෂයයන් අනුව කැබිනට් මණ්ඩල සාමාජිකයෝ තෝරා ගැනෙති. පාලකයන් ක‍්‍රියා කළ යුතු රටක අභිවාද්ධිය වෙනුවෙන්ය. ජනතාවගේ දියුණුව කැබිනට් මණ්ඩලයක සාමූහික වගකීමයි. පොදු ජනතාවගේ සතුට වෙනුවෙන් තීන්දු ගැනීම කැබිනට් මණ්ඩලයෙන් අපේක්ෂා කරන එක කාරණාවකි. එක්සත් අරාබි එමීර් රාජ්‍යය මෙයින් මාස හයකට පමණ කලින් ‘සතුටු ඇමැති’ ධුරයක් ලොව ප‍්‍රථම වරට පත් කළේය. එය විශේෂත්වයකි.

ලෝකයේ බොරතෙල් සහ ස්වභාවික ගෑස් සම්පත සතු ලෝකයේ රටවල් අතර එක්සත් අරාබි එමීර් රාජ්‍යය හත්වැනි තැන උසුලයි. මෑත කාලය තුළ එරට ආර්ථිකය විවිධාංගීකරණයට ලක්වූ අතර ගුවන් කේන්ද්‍රස්ථානයක් සහ මූල්‍ය කලාපයක් වශයෙන් ඩුබායි නගරයට ඇත්තේ ප‍්‍රබල අවධානයකි. අනන්‍ය පාලන ක‍්‍රමයකට හුරු එක්සත් අරාබි එමීර් රාජ්‍යයෙහි වැසියන් බහුතරයක් ඉස්ලාම් ආගමිකයන්ය. ආගමික බලපෑමක් සහිත තද නීති පවතින හෙයින් මානව හිමිකම් ක‍්‍රියාධරයන් රාජ්‍යයේ කටයුතු ගැන අවධානය යොමු කරන්නේ වෙනස් කෝණයකින්ය. එක්සත් අරාබි එමීර් රාජ්‍යයේ කැබිනට් මණ්ඩලයට සතුට යන විෂයය භාරව ඇමතිනියක පත්ව සිටින්නේ එවැනි පසුබිමක් තිබිය දීය.

ජනතාව සතුටින් තැබීම ආණ්ඩුවක බලවත් වගකීමක් බව මෙම ධුරයට පත් ඇමැතිනි අල් රුයුමි පසුගිය දිනයක මාධ්‍යයට ප‍්‍රකාශ කළාය. ඇය කියන ආකාරයට එක්සත් ජාතීන්ගේ සංවිධානය 2011 අවුරුද්දේ දී ලෝකයේ සිදුවන සංවර්ධනය ජනතාවගේ සතුට ඇති කරන්නට හේතු විය යුතු බව සඳහන් කර තිබේ. සියලූම රටවල් ප‍්‍රයත්න දරන්නේ සිය පුරවැසියන් සතුටින් තබන්නට වන අතර එක්සත් අරාබි එමීර් රාජ්‍යය එකී අරමුණ පෙරදැරිව ක‍්‍රියා කරන බව සඳහන් කර ඇත.

ඇමැතිනිය සිය සැලසුම අනුව ආණ්ඩුවේ ආයතන වලින් සතුටු නිලධාරීන් වශයෙන් ක‍්‍රියා කරන්නට කැමැති කණ්ඩායමක් තෝරා ගෙන තිබේ. මෙම පිරිස අතරින් හැට දෙනෙකුට ජනතාව තේරුම්ගෙන ඔවුන්ගේ සතුට දනවන අන්දමට වැඩ කරන්නට පුහුණුවක් දෙන්නට තීරණය කර ඇත. ලබන සැප්තැම්බර් මාසයේ දී මෙම කණ්ඩායම ඇමරිකාවේ සහ බි‍්‍රතාන්‍යයේ පුහුණුවකට යවන්නට නියමිතය. ලෝකයේ සතුටු සහගත රටක් වශයෙන් පවතින්නට එක්සත් අරාබි එමීර් රාජ්‍ය දරන ප‍්‍රයත්නය දෙස ජාත්‍යන්තර ප‍්‍රජාව  උනන්දුවෙන් බලා සිටී.

එක්සත් ජාතීන්ගේ සංවිධානය එකිනෙකට වෙනස් දත්ත පදනම් කරගෙන ලෝකයේ සතුටුදායක රටවල් සම්බන්ධ ලේඛනයක් ප‍්‍රකාශයට පත් කරයි. එක්සත් අරාබි එමීර් රාජ්‍යය එහි 28 වැනි තැන පසුවන අතර 2016 වාර්තාව අනුව ශ‍්‍රී ලංකාව පසුවන්නේ 117 වැනි ස්ථානයේය.

ශ‍්‍රී ලංකාවේ රට වැසියන් ආගන්තුක සත්කාරයෙන් ඉහළ බව ජාත්‍යන්තර පිලිගැනීමයි. නිතර සිනහ මුවින් සිටින ඔවුන් ආගම දහමට ලැදියාවක් දක්වති. ආයුබෝවන් කියා හදවතින්ම සුබ පතන්නට කැමැති බව රහසක් නොවේ. එවැනි රටක ජනතාව සතුටු සහගත ලේඛනයේ රටවල් 156 ක් අතරින් අග කෙළවරට පැමිණීම විමසා බලන්නට සුදුසුය.

ලෝකයේ ප‍්‍රථම සතුටු ඇමැතිනිය පත් කරන්නේ එරට තරුණ මහජන නියෝජිතයන්ට මෙතෙක් පැවැති රාමුවෙන් වෙනස් අන්දමකට ස්වකීය ජනතාව දෙස බලන්නට ඉඩකඩ සලසමින්ය. රට පාලනය කිරීම කෙළවරක් නැති ගැටලූ විසඳීමේ කාර්යයක් පමණක් නොව එහි අවසානයේ දී රටවැසියන් සතුටින් තෘප්තියෙන් ජීවත් කිරීමක් බව තේරුම් ගැනීම ඉතාම වැදගත් බව සඳහන් කිරීම සුදුසුය.

 

 

 

හූ කියන්නෝ

ප්‍රතිචාරයක් ලබාදෙන්න

milinda-prashna

2016/08/03 – ලංකාදීප

ප‍්‍රංශ අගමැතිවරයා සහභාගී වූ ප‍්‍රසිද්ධ ජනහමුවක දී වාර්තා වූ සිද්ධියක් ජාත්‍යන්තරය තුර තරමක කලබැගෑනියක් ඇති කර තිබේ. එයට සහභාගී වූවෝ එරට ජනාධිපතිවරයාට හූ කියන්නට පටන්ගෙන ඇත. මෑත මාස දහඅට තුළ බරපතල ත‍්‍රස්තවාදී ප‍්‍රහාර තුනකට ගොදුරු වූ පැරිස් නගරය එයින් හෙම්බත්ව සිටී. සාමාන්‍යයෙන් නිදහස් සහ විවෘත සමාජය වික්ෂිප්ත තැනක් බවට පත්ව ඇත. ජනතාව ත‍්‍රස්තවාදය මැඩ පවත්වන්නට අසමත්වීම ගැන පාලකයන්ට දොස් තබන අතර ඔවුන්ගේ ක‍්‍රියා කලාපයට විරෝධය වශයෙන් මෙම හූ විරෝධය පැන නැග ඇති බව අනාවරණය වෙයි.

මෑත කාලය තුළ ලෝකයේ තැනින් තැන ජනතාව සෘජුව තම විරෝධය පාලකයන් වෙත පළ කරන ලද අවස්ථා ගණනාවකි. පැරිස් සිද්ධිය එයින් එකක් පමණකි.

හූ හඞ විශ්ව ව්‍යාප්ත සංඥාවකි. එයට භාෂා බේධයක් නැත. වචන හැසිරවීම වැනි ගැටලූ ඇති නොකරයි. වැදගත්ම කාරණය එහි සංඥාව තේරුම් ගැනීමයි. දඩයම් යුගයේ දී හූ හඞ සන්නිවේදනයකි. විපතකට පත්වූ, දඩයමක් සොයා ගත් අවස්ථාවක තමන්ගේ සගයන් කැඳවන්නේ හූ කියා බව ජන පර්යේෂණ දක්වයි. පසුව සමාජය දියුණු වන විට හූ සන්නිවේදනය මග දුර කියන මිනුම් දණ්ඩක් බවට පත්වෙයි. ‘‘හූවක දුර ආයිබෝවන්ඩ’’ කියන ව්‍යවහාරය අදටත් මෙරට දුර බැහැර ගමක භාවිතා වෙයි.

පේරාදෙණිය විශ්ව විද්‍යාලය මෙරට හූ හඞ සංස්කෘතියක් බවට හරවන්නේය. එහි විශ්ව විද්‍යාලයේ සිසුන් තමන්ගේ මුද්‍රාව තබන්නේ හූවෙන්ය. පේරාදෙණිය වල ප‍්‍රසිද්ධ තැනක් වන අතර එහි පවතිවන නාට්‍ය යනාදී සංස්කෘතික අංශ වලට හූ තැබීම නුහුරු නුපුරුදු එකක් නොවේ. නමුත් පසුගිය දා එහි රඟ දක්වන ලද නාට්‍යයක තිබුණ සිපගන්නා දර්ශනයකට විරෝධය පළ කරන ලද සිසුන් එම නාට්‍ය අතරමග නතර කරන තෙක් සිය විරෝධය දක්වා ඇති බව ජනමාධ්‍ය වාර්තා කරයි. දේශපාලනඥයෙකුට හූ කියන අතර එයට ප‍්‍රතිඋත්තර වශයෙන් හිටින කවියක් කියන ලද බව ද නොදන්නා අය අඩුය. හූ හඞ නැගෙන විට එහි අර්ථයක් තිබේ. පුද්ගලයෙකුට හෝ සංවිධානයකට විරුද්ධව හූ හඞ නැගෙනවිට එය කැමැත්තෙන් ද නොඑසේනම් අකමැත්ත දැයි දැන හැඳිනගෙන එයට අනුව හැසිරීම සාමාන්‍යයෙන් සිදුවන බව තේරුම් ගත හැකිය.

ආපසු හැරී බලන විට මානව විකාශය තුළ නායකයාගේ හූ හඞකට අවනත වූ සමාජ ව්‍යුහයක ලක්ෂණ පිළිබිඹු වෙයි. නායකත්ව ලක්ෂණ පෙන්නුම් කරන විට එයට අවනත වූ සමාජය ජනතාව අපේක්ෂා කරන නායකත්වය සපයන්නට අසමත්වන විට නිර්දය විවේචනයට ගොදුරු වෙයි. නූතන ජන සමාජයේ ඇතැම් අවස්ථාවල නායකයන්ට හූ කියන්නට නැඹුරුවෙන්නේ එහි ප‍්‍රතිපලයක් වශයෙනි. හූ හඞ සන්නිවේදන ලක්ෂණයක් වූ යුගයක සිට සන්නිවේදනය ඉතාම දියුණු වකවානුවක තමන්ට නොගැලපෙන තැන් වල දී විරොධය වශයෙන් හූ කියන්නට පටන් ගැනීම ද ශාස්තී‍්‍රය විද්වතුන්ට පර්යේෂණයක යෙදෙන්නට හොඳ මාතෘකාවකි.

අතීතයේ දී නායකයන් සමීප නැති අතර ඔවුන්ගේ හැසිරීම සාමාන්‍ය ජනතාවට දැක ගත හැකි වූයේ නැත. නමුත් අද වන විට සමාජ සන්නිවේදන ජාලා සහ සියලූම දෙන අත ඇති සන්නිවේදන මෙවලම් හෙයින් නායකයන් ගේ හැසිරීම ඉතාමත් විවෘත තත්ත්වයකට පත්ව තිබේ. ප‍්‍රජාතන්ත‍්‍රවාදී රටක ජනතාව නායකයන්ගේ හැසිරීම ඔවුන් ගන්නා තීරණ පමණක් නොව සමාජයේ තමන්ට නොරිසි දේ වෙනුවෙන් විරෝධය පළ කිරීම පහසුවන ස්වභාවය තුළ හූ හඞ නොයෙක් තැනින් ඇසෙන්නට ඉඩ තිබේ. හූ හඞ නගන පුද්ගලයන් නොව එයට පසුබිම හඳුනාගැනීම වැදගත් බව සඳහන් කිරීම අවශ්‍යය.