සමාව ඉල්ලපු මෙක්සිකෝ ජනපති

ප්‍රතිචාරයක් ලබාදෙන්න

milinda-prashna

2016/07/27 – ලංකාදීප

එන්රිකේ පෙඤා නියේටෝ  මෙක්සිකෝ ජනාධිපතිවරයාය. පසුගියදා තමන්ට සමාව දෙන්නැයි හෙතෙම එරට වැසියන්ගෙන් අවංකව සහ හෘදයාංගමව සමාවෙන්නැයි ඉල්ලා සිටියේය. මෙක්සිකෝව විශාලත්වය අතින් ලෝකයේ රටවල් අතර දහතුන් වැනි ස්ථානය උසුලයි. එහි ජනගහනය මිලියන 120 කට වැඩිය. ජනාධිපති එන්රිකේ සමාව ඉල්ලන්නේ ඔහුගේ බිරිදට එරෙහිව නැගුණ චෝදනාවක් සම්බන්ධයෙන් වීම විශේෂත්වයකි.

මෙක්සිකෝ ජනාධිපති ආර්යාව මෙයින් අවුරුදු එකහමාරකට පමණ කලින් නිවසක් මිල දී ගෙන තිබේ. එයට ගෙවන ලද මුදල ඇමරිකානු ඩොලර් මිලියන හතකි. මෙම මුදල වාරික වශයෙන් ගෙවන්නට ගනුදෙනුව සිදුවී ඇත. ඇය පසුව ප‍්‍රකාශ කර ඇත්තේ රගපැමෙන් උපයා ගත් ධනයෙන් මෙම වත්කම මිල දී ගන්නට හැකියාව ලැබුණ බවය. ජනාධිපති බිරිද ඇන්ජෙලිකා කාලයක් නාට්‍ය වල රගපා තිබේ. නමුත් චෝදනාව නම්, මෙම නිවස මිල දී ගන්නේ මෙක්සිකෝ ආණ්ඩුවේ කොන්ත‍්‍රාත් කරන එක්තරා සමාගමකින් වන අතර එය මිලදී ගැනීමේ දී වට්ටමක් ලබා ගෙන ඇති බවය.

ලෝකයේ දේශපලනඥයන් හැසිරෙන ආකාරය බෙහෙවින් වෙනස්ය. ජනතාව හමුවට ගොස් ඡන්දය ඉල්ලන කාල වකවානුවේ ඔවුහු ඉතා සරල ජීවිත ගතකරන්නෝ වෙති. ජීවනෝපාය අසාමාන්‍ය එකක් වෙන්නේ නැත. සාමාන්‍ය ජනතාව අතර ගැවසෙන, ඔවුන්ට දැනෙන ආකාරයේම ජීවිත ගත කරන දේශපාලනඥයෝ බලය ලැබුණ වහා හැසිරෙන අන්දම ගැන ජාත්‍යන්තරයෙන් ලැබෙන වාර්තා එමටය. මේවායේ කියැවෙන්නේ සිත සතුටු කරන දේ නොවේ. අති විශාල දුෂණ, වංචා සහ අපරාධ ගැනය. බලය උපයෝගී කරගෙන අති විශාල වශයෙන් ධනය උපයා ගන්නා දේශපාලනඥයන් එයින් අප‍්‍රමාණ සැපවත් ජීවිතයකට මග පාදා ගන්නේ පොදු ජනතාව ගැන එපමණ අවධානයට නොගනිමින් බව ප‍්‍රකටය.

එන්රිකේ ජනාධිපතිවරයා ජනතාවගෙන් සමාව ඉල්ලන්නේ මෙවැනි පසුබිමක් ලෝක දේශපාලනය තුළ ප‍්‍රකටව, ප‍්‍රබලව නැගෙන අවස්ථාවකය.  එපමණක් නොව දුෂණ වීරෝධී නව නීති රීති මෙක්සිකෝ රට තුළ බලපවත්වන වකවානුවකය.මෙම දේපොල මිල දී ගැනීම සම්බන්ධයෙන් පරීක්ෂණයක් පවත්වන ලද අතර එහි දී අනාවරණය වෙන්නේ වරදක් සිදුවී නැති බවය. නීතිය ඉදිරියේ දී ජනාධිපති එන්රිකේ සහ බිරිද  ඇන්ජෙලිකා නිර්දෝෂී නමුත් ජනාධිපතිවරයා ජනතාවගෙන් සමාව ඉල්ලන්නේ එය එපමණකටම බලවත් සිද්ධියක් වශයෙන් පැන නැගෙන හෙයින්ය.

2012 වසරේ දී පැවැති ජනාධිපතිවරණ්‍යට එන්රිකේ ඉදිරිපත් වෙන්නේ සමාජය තුළ මහත් බලාපොරොත්තු ඇති කරමින්ය. ආර්ථිකය වර්ධනය කර රැකී රක්ෂා බහුල කරන බවට පොරොන්දු දෙන අතර එය වෙනුවෙන් පුද්ගලික අංශයට අලූත් අවස්ථා ඇති කරන බව ද සදහන් කරයි. ජනාධිපති ධුරයට පත් වෙන්නට කලින් මෙක්සිකෝ නගරයේ නගරාධිපති වශයෙන් කටයුතු කරන ලද හෙතෙම සංවර්ධන ව්‍යාපෘති විශාල ප‍්‍රමාණයක් දියත් කරමින් වැඩිම ක‍්‍රියාශීලි සංවර්ධනයක් පෙන්වන ලද පුද්ගලයෙකු වශයෙන් සමාජය තුළ නමක් තහවුරු කරගනී. රටේ නායකත්වයට මග පාදාගන්නේ එහි සමත්කම් බව සදහන් කිරීම අවශ්‍යය.

ජනාධිපතිවරණ ප‍්‍රචාරක කටයුතු වල දී ද, දුෂණ වංචා වලින් තොර යහපත් රටක් ඇති කරන බලාපොරොත්තු මෙක්සිකෝ වැසියන් තුළ ඇති කරයි. නමුත් එන්රිකේ ඡන්දය ඉල්ලන්නේ ඔහු නියෝජනය කරන ලද දේශපාලන පක්ෂයේ නරක අතීතය ජනතාවට මතක ඇති පසුබිමකය.  පි.ආර්.අයි පක්ෂය දුෂණ වල සංකේතයවූ අතර ආර්ථික කළමණාකරණයේ දුර්වලතා, මැතිවරණ වංචා ගැන අපකීර්තියක් හිමි පක්ෂයකි. එකී සියලූ අතීත තත්ත්ව අමතක කරන තැනට ජනතාව අතර සිත්ගත් චරිතයක් බවට පත්වන්නේ එන්රිකේ ගේ අපේක්ෂකත්වය පෙන්වන අලූත් දැක්මයි. අද වන විට හෙතෙම අභියෝගයට ලක්ව සිටිනු පමණක් නොව ජනතාවගෙන් සමාව ගන්නට සිදුවී ඇත. දේශපාලන නායකයන්ගේ අරමුණු සහ ගමන්මග ගැන විවිධ පැතිවලින් හිතන්නට මෙම සිද්ධිය ඉවහල් කරගත හැකිය.

 

 

Advertisements

හදිස්සිය වෙනුවට සැනසිල්ල

ප්‍රතිචාරයක් ලබාදෙන්න

milinda-prashna

2016.07.20 – ලංකාදීප

අවධානයෙන් සමාජය දෙස බලන්න. වැඩි දෙනෙකුට ඇත්තේ  හදිස්සියකි. අනවශ්‍ය කලබලයකි. එය සමාජයේ විනය සහ හැදියාව සම්බන්ධව ප‍්‍රශ්න ඇති කර තිබේ. මෙයින් දශකයකට දෙකකට කලින් බැංකුව පෝලිම මතක ඇතිවාට සැක නැත. එය තමන්ගේ ගිණුමෙන් මුදල් ගන්නට හෝ තැන්පත් කරන්නට පැය ගණන් කාලය වැය කරන්නට සිදුවන කාර්යයකි. නමුත් අද එය ප‍්‍රසිද්ධ තැන් වල ස්ථාපනය කර ඇති ටෙලර් යන්ත‍්‍රයකින් සුළු මොහොතකින් කරගත හැකිය. කුඩා කුටියක කරන ගනුදෙනුව විනාඩියක් දෙකක් ඉක්මවා ගියහොත් එතැන පෝලිමේ ඉන්නා තවත් කෙනෙකුට දැනෙන නොරිස්සුම කොපමණ දරුණු එකක්ද? සමාජය එපමණකට හදිස්සිකාරයන් බිහි කර තිබේ.

පාරේ ගමන් කරන විට මාර්ග නීති ගැන හිතන්නේ නැත. වාහන අතරින් රිංගා එතැනින් මෙතැනින් පැන තමන්ගේ ගමන යන්නට හදිස්සියක් නැති කෙනෙකු සිටීද? වැඩි දෙනෙකු බලන්නේ කොතැනකින් හෝ රිංගා තමන්ගේ ගමන ඉක්මන් කරගන්නටය. විදුලි සංඥා එළිය වැටෙන්නටත් කලින් නලා ශබ්ධ වෙන, පොලිස් නිලධාරියෙකු වාහන හසුරවන විට එය දරා ගත නොහැකිව ඉක්මන් කරන්නට තැත් කරන සමාජයක් අද අප හමුවේ තිබේ.

බස් රථයකට ගොඩවන විට පෝලිමක් තිබේද? නැවතුමක සිටින මගීන් ගේ තක්සේරුව නැවතුමට පැමිණියේ අන්තිම බස් රථය බවය.  හයි හත්තය ඇති අය සෙස්සන් පෙරලාගෙන ඇතුලූ වෙන්නට තැත් කරයි. දරුවන් ද, වැඩිහිටියන් ද නොසලකා තම අරමුණ පමණක් දකින පිරිස පෙන්වන්නේ හදිස්සිය පමණක් නොව ආත්මාර්ථයේ තරමයි.

ඉතාම හදිස්සියෙන් බස් රථයට ගොඩවෙන මගීන්ට, එය ගමන් කරන්නේ බස් රියැදුරාට උවමනා වේගයෙන් බව දකින්නේ නැත. ඉතාම හදිස්සියෙන් කාර්යාලයට දුවගෙන පැමිණ අත්සන් කරන කාර්ය මණ්ඩලයට වැඩ කරන්නට ඉතාම හදිස්සියක් නැත. නීති නොතකා දරුවන් ද රැගෙන වේගයෙන් පාසලට ධාවනය වන පාසල් බස් රියක ඉන්නා දරුවන්ට ඉක්මනින් ඉගෙන ගෙන හොඳ පුරවැසියෙකු වෙන අදහසක් ඇත්තේ කලාතුරකින්ය. ඉතාම වේගයෙන් උගන්වා අවසන් කරන ගුරුවරයාට දරුවන් ලබන සාර්ථකත්වය ගැන තක්සේරුවක් නැති ආකාරයටම ඉතාම ඉක්මනින් ලෙඩ බලා බෙහෙත් තුණ්ඩුව ලියා රෝගියා ගැන අවධානය අත්හරින වෛද්‍යවරයාට ද රෝගීයාගේ ඉරණම ගැන සම්පූර්ණ අදහසක් නැත. මෙම සියලූ පැති වෙන්වෙන්ව  විමසා බලන විට පෙනෙන්නේ ඉතාම හදිසි සමාජ ව්‍යුහයකි.

සමාජය තුළ සන්සුන් බවක් සැනසිල්ලක් ඇති කරන්නේ කෙසේද? හදිස්සිය අවසානයේ දී අපේක්ෂා කරන සාර්ථකත්වය සම්පූර්ණයෙන්ම අත්පත් කරගන්නට නොලැබෙන බව දක්වන්නේ කවර ආකාරයකටද?වේගයෙන් දුවන සමාජයකට සැනසිල්ලේ හෙමින් ගමන් කරන්නට යෝජනා කිරීම පහසු නැත. දුර්වල විනයක් සහිත සහ අනුන් ගැන හිතන්නට එතරම් වෙලාවක් නැති ආත්මාර්ථකාමීත්වයට පොදු යහපත ගැන හිතන්නට හුරු කිරීම ලෙහෙසි නැත. නමුත් වැදගත් කාරණය සැනසිල්ලයි. විවේකයෙන් සාර්ථකත්වය කරා ගමන් කිරීමයි.

පෝලිම කඩාගෙන බස් රියට නැගගෙන හදිස්සියෙන් බැංකුවට ගොස් වාරය එන තෙක් නොසිට එහි ඉදිරියට පැන එතැනින් මෙතැනින් රිංගා නිවසට අවශ්‍ය යමක් ද මිල දී ගෙන උයා පිහාගෙන කෑමෙන් ජීවිතයක් සම්පූර්ණ වෙන්නේ නැත. පිලිවෙලක් අවශ්‍යය. රිද්මයක් තිබිය යුතුය. ජීවිතය තුළ තිබිය යුතු කතාන්දරයකි. එය විඳින්නට විනා වේදනාවක් වෙන්නට ඉඩ දිය යුතු නැත. ලෝකයේ ඇතැම් සමාජ තුළ විනය හදන්නේ නීති වලින්ය. දඞුවම් වලින්ය. ශ‍්‍රී ලංකාවේ බුද්ධිමත් ජනතාව තමන්ගේ ප‍්‍රවේශය ගැන අලූතින් හිතනන්ට අවශ්‍යය. තමන් ගැනම තක්සේරුවකට ගමන්කිරීම වැදගත්ය. හදිස්සියෙන් දිනාගත් දේ පමණක් නොව සැනසිල්ලේ අත් විඳින්නට ද සුදානම් විය යුතුය. එයින් ඇති කරන විනය සහ ආකෘතිය සංවර්ධනය විදහා දක්වන කැඩපතකි.

 

 

නායකත්වය

ප්‍රතිචාරයක් ලබාදෙන්න

 

milinda-prashna

2016.07.13 – ලංකාදීප‍

බි‍්‍රතාන්‍ය ජාතික ඇන්ඩි මරේ මෙවර ව්ම්බල්ඩන් ටෙනිස් ලෝක ශූරතාව දිනා ගත්තේය.  ලන්ඩන් නගරයේ ජීවත්වන හෙතෙම දෙවැනි වතාවටත් ටෙනිස් ශූරතාවය දිනාගත් පසු මහා බි‍්‍රතාන්‍යයේ ඉතාමත් ජනප‍්‍රිය චරිතය බවට පත්ව සිටී. විම්බල්ඩන් ටෙනිස් තරඟාවලියට දීර්ඝ ඉතිහාසයක් තිබේ. සම්ප‍්‍රදාය ආරක්ෂා කරගැනීම ගැන ඇත්තේ එයට වඩා ප‍්‍රබල පසුබිමකි. 1877දී ආරම්භ වූ මෙම ටෙනිස් තරගාවලිය අද දක්වා පවත්වාගෙන යන්නේ එහි ක‍්‍රිඩක ක‍්‍රීඩිකාවන්ගේ ඇඳුම පැළඳුම, ආහාර පාන පමණක් නොව අනුග‍්‍රාහකත්වය සම්බන්ධව ද පවතින තද විනය සහිතවය.  තරග පවා කාන්තා සහ පිරිමි වශයෙන් නොව මහත්වරුන්ගේ සහ නෝනා මහත්වරුන්ගේ වශයෙන් නම්කරන අතර අවසාන මහා තරගය පැවැත්වෙන අවස්ථාව රජ පවුලේ නියෝජනය ද සහිතව සිදු කෙරේ.

බී.බී.සී. වාර්තාකරු ටෙනිස් ශූරතාවය 2013 දී සහ නැවතත් 2016 අවුරුද්දේ දී දිනා අතිශය ජනාදරයට පත් ඇන්ඩි මරේ ගෙන් බි‍්‍රතාන්‍ය අගමැති ධුරයට ඇති කැමැත්ත ප‍්‍රශ්න කළේය. අවසන් මහා තරගය නරඹන්නට පැමිණ සිටි ක‍්‍රීඩා ලෝලීන් ගේ ප‍්‍රතිචාර මැද වාර්තාකරු සමග කතා කරන හෙතෙම ‘‘ටෙනිස් තරගාවලිය ජය ගැනීම තද වෙහෙසකර එකක්’’ බව කියා සිටි අතර ‘‘තමන් අගමැති තනතුරට කොහෙත්ම කැමැත්තක් නැති බව’’ කියා සිටියේය. එපමණක් නොව මෙම ලෝක ශූරයා කියන්නේ එය ‘‘තමන්ට කළ නොහැකි රස්සාවක් ’’ බවය.

බි‍්‍රතාන්‍ය අගමැති ඬේවිඞ් කැමරන් එම ප‍්‍රකාශය කරන විට රාජකීය නැරඹුම් මැදිරියේ සිටි අතර මෙම විම්බල්ඩන් ටෙනිස් තරගාවලියේ අවසාන මහා තරගය නරඹන්නේ ඔහුගේ මැණියන් සමගය. එයින් ටික වේලාවකට කලින් අගමැතිවරයා ගැන කියන විට මෙම තරගය නරඹන්නට පැමිණ සිටි ජනී ජනයා විම්බල්ඩන් තරගාවලියේ අද්විතීය සම්ප‍්‍රදාය පැත්තකින් තබා හූ කියන්නට පටන් ගත් බව මෙහි දී සඳහන් කළ යුතුය.

අගමැති ධුරය භාරධුර එකකි. විශේෂයෙන් මහා බි‍්‍රතාන්‍යයේ අගමැති තනතුර අසමාන තනතුරකි. විම්බල්ඩන් ටෙනිස් ලෝක ශූර ඇන්ඩි මරේ එය තමන්ට කරන්නට බැරි එකක් බව පිළිගනී. නමුත් තරගය නරඹන්නට පැමිණි ජනකාය අතරින් කොටසකට අගමැතිවරයා සමච්චලයට ලක්වන බව ජාත්‍යන්තර මාධ්‍ය වාර්තා කර තිබේ.

මහා බි‍්‍රතාන්‍ය සලකන්නේ සම්ප‍්‍රදායට ගරු කරන රටක් වශයෙන්ය. ලන්ඩන් හි දී වඩා සම්ප‍්‍රදායී ටෙනිස් තරගාවලිය පැවැත්වෙන විට එරට වැසියන් සම්ප‍්‍රදාය පැත්තකින් තබා අගමැති කැමරන් වෙත අප‍්‍රසාදය පළ කරන්නේ ඒ තරමටම සංකීර්ණ ස්වභාවයක් මතු කරමින්ය.

මෙම සිදුවීම තුළින් පෙන්වන වැදගත්ම කාරණය ජනතාව පරිවර්තනය වී ඇති අන්දමයි. නූතන සමාජ භාවිතාව සහ මාධ්‍ය ව්‍යුහය අනුව පැලැන්ති අතර පරතරය නැතිවී තිබේ. සම්ප‍්‍රදායික බලවත්කම් යටපත් කරන්නට සමාජ මාධ්‍ය සමත්ව ඇත. නායකයන් ගේ හැසිරීම, ක‍්‍රියාකලාපය සම්බන්ධයෙන් සෘජුව අදහස් පළ කරන්නට සමත් පිරිසක් ඉදිරියට එමින් සිටී. ලෝක ප‍්‍රජාතන්ත‍්‍රවාදයේ පැවැත්ම සම්බන්ධව තියුණු තත්ත්වයක් උදාවී ඇත්තේ මේ සමගය. ප‍්‍රජාතන්ත‍්‍රවාදී පාලන ක‍්‍රමය ඇති රටක සියලූම මිනිසුන්ට ගැලපෙන තීරණ ගන්නේ කෙසේද? තීරණය තමන්ට ගැලපෙන පරිදි ගන්නා විට නායයකත්වය ප‍්‍රශංසාවට ලක්වන නමුත් තවත් පිරිසක් එහි අනෙක් පැත්ත දකින්නේ ඉතාම නරක පාලකයෙකු බව විවේචනය කරමින්ය.

දැවැන්ත ප‍්‍රතිරූප සහිතව මහා ජන ප‍්‍රසාදයකින් බලයට පත්වන නායකයන්ට ඉතාමත් කෙටි කාලයකින් ජනතා අපේක්ෂා සාක්ෂාත් කරනු නොහැකිව අප‍්‍රසාදයට පත්වෙන්නට සිදුවෙයි.  දේශපාලන නායකයන් පමණක් නොව පොදු ජනතාව ද අද සිදුවෙමින් පවතින සංකීර්ණ ව්‍යුහය දෙස අලූත් පැත්තකින් බලන්නට අවශ්‍යය. ඔසවා තැබීම පමණක් නොව එයටත් වඩා ඉක්මනින් පිරිහීම කැදවන විට රටක නායකත්වය භාරගන්නට ඇන්ඩි මරේ වැනි ලෝක ශූරයක් පමණක් නොව කිසිවෙකු ඉදිරිපත් නොවෙන්නට ඉඩ තිබේ.

 

 

 

ජන හිත සුව නගර

ප්‍රතිචාරයක් ලබාදෙන්න

 

milinda-prashna

2016/07/06 – ලංකාදීප

ජනතාව නගර කරා සංක‍්‍රමණයවීම ඉතිහාසයේ සිට සිදුවන එකකි. ජනතාව නගර කරා පැමිණෙන විට එය සංවිධානාත්මක තැනක් බවට පත් කිරීම අවශ්‍යය. පොදු පහසුකම් සංවිධානය කර නිසි කළමණාකරනයක් ඇති නොකළහොත් ජනාකීර්ණ නගරයක් අතිශය කර්කශ ස්ථානයක් බවට පත්වීම වැලැක්විය නොහැකිය.

නගර සහ රටවල් ගොඩනැගූ බවට ලියැවෙන්නේ දේශපාලනඥයන්ගේ නමටය. එය සාමාන්‍යයෙන් සිදුවන දෙයයි. නමුත් නිලධාරීන් ඉටු කරන කාර්ය භාරයක් ද තිබේ.  නගරයක අඩුපාඩු බලා පුලූල් දැක්මක් ඇතිව සැලසුම් කිරීම පහසු නැත. විශේෂයෙන් දේශපාලන නායකයන් ජනතා කැමැත්ත වෙනුවෙන් ක‍්‍රියා කරන පසුබිමක තමන්ට අනන්‍ය ලෙස නගරයක් හදන්නට මහන්සි වූ නිලධාරීහු චරිත බවට පත්ව තිබේ.

රොබට් මොසස් එවැනි චරිතයකි. ඇමරිකාවේ නිව්යෝක් නගරය අදට ගැලපෙන සේ සැලසුම් කිරීම ලියැවී ඇත්තේ ඔහුගේ නමටය. නිව්යෝක් නගරය විසි වැනි සියවසේ මැද සැලසුම් කරන විශිෂ්ඨ  බව අද ඇගයුමට ලක්ව ඇත. සෑම පුරවැසියෙකුටම වාහනයක් පාවිච්චි කරන්නට ඇති අයිතිය තහවුරු කරන පමණක් නොව එම වාහන නගරය පුරා බාධාවකින් තොරව ගමන් කරන්නට හැකි වන සේ නගරය සැලසුම් කළේය. විශාල උද්‍යාන ඉදිකරන ලද අතර පුලූල් මාර්ග පද්ධතිය තදබදය අවම කරන ලද්දේය. දේශපාලනඥයන්ට සාමාන්‍යයෙන් තිබුණේ ඊළඟ මැතිවරණය තෙක් ජනප‍්‍රියත්වය රැක ගන්නා තීරණ ගැනීමේ ප‍්‍රතිපත්තියකි. නමුත් මොසස් දිග බලා තීරණ ගත්තේය. නිව්යෝක් නගරය විසි එක්වැනි සියවසට ගැලපෙන පරිදි නිර්මාණය කිරීමේ දී ඔහු දක්වන ලද දක්ෂතාවය පමණක් නොව එම කාලය තුළ එකිනෙකට වෙනස් තනතුරු දරමින් තිරණ ගැනීම ද ඔහු ගෞරවයට පාත‍්‍ර කරන්නට හේතු වී  තිබේ. නිව්යෝක් නගරය පාලනය කරග ලද ඡන්දයෙන් පත්වූ දේශපාලනඥයන්ට උවමනා දේ සම්පාදනය කරන අතර අලූත් සැලසුම් ඔහුගේ අනන්‍යතාවයට අනුව සකස් කිරීම අදටත් කතාබහට ලක්වන කාරණයක් වී ඇති බව බව සඳහන් කිරීම අවශ්‍යය.

පසුගිය දා බංගලාදේශයේ රජ්සාහි නගරය  ජන හිත සුව තැනක් බවට පත් කරන ලද ඉංජිනේරුවරයෙකු ගැන ජාත්‍යන්තර මාධ්‍ය වාර්තා කළේය. අශ්රෆුල් හක් නමැති හෙතෙම අවුරුදු දෙකක් තුළ නගරය තිබුණ අපිරිසිදු සහ අක‍්‍රමවත් බව තුරන් කර පිරිසිදු හුස්ම ගන්නට හැකි තැනක් බවට පත් කරන ලද බව අනාවරණය වෙයි. අධික දුම් පිටකරන වාහන තහනම් කර චීනයෙන් ආනයනය කරන ලද බැටරි වලින් ධාවනය වන කුලී රිය භාවිතා කරන්නට පොළඹවා ඇති අතර එය ආකර්ශණීය තීරණයකි.

රොබට් මොසස් එදා කරන ලද දේ පමණක් නොව අශ්රෆුල් හක් වර්තමානයේ මෙහෙයවන ලද ආකාරය ද පැසසුමට ලක්වන අතර දේශපාලනඥයන්ගේ තීරණ අභිබවා නිලධාරීන්ගේ ගමන නගර වල ජීවත්වන වැසියන්ගේ ජීවිත යහපත් කරන්නට හේතු වූ බව දක්වයි.

ශ‍්‍රී ලංකාවේ නගර, සුළු නගර පමණක් නොව ප‍්‍රාදේශීය සභා පරිපාලනය විශේෂ කොමසාරිස්වරුන් අතට පත්ව තිබේ. මැතිවරණ ක‍්‍රම සංශෝධනය වෙනුවෙන් ඉඩ සකස් කරගන්නා තෙක් දේශපාලනයේ නිරත මහජන නියෝජිතයන්ට පලාත් පාලන ආයතන වල බලපෑම අඩු මෙම වකවනුව අලූත් දේ ගැන හිතන්නට සුදුසු අවකාශයකි. නිලධාරීන්ට ද පොදු ජනතාව ගැන වගකීමක් තිබේ. ජන ජීවිතය යහපත් කරන්නට පෙළැඹවීමක් කළ හැකිය. නිව්යෝක් නගරයෙන් පමණක් නොව බංගලා දේශයේ රජ්සාහි නගරය ද සාක්ෂාත් කරන්නේ එයයි.