මිල සූත්‍රයෙන් නිවැරදි ප්‍රයෝජන ගන්න නම් වැඩ විනිවිදව ඕනෑ

ප්‍රතිචාරයක් ලබාදෙන්න

milinda-prashna

2019/02/27 – ලංකාදීප

ඛනිජ තෙල් අලෙවිය සම්බන්ධයෙන් පනවන ලද මිල සූත‍්‍රය සෑහෙන ආන්දෝලනයකට ලක් විය. ලෝක වෙළඳ පොලේ බොරතෙල් මිල හා මෙරට පාරිභෝගිකයන් ඉන්ධන  වලට ගෙවන මිල අතර පැවැති පරතරය යම් ප‍්‍රමාණයකින් පාලනය කරන්නට මිල සූත‍්‍රය ප‍්‍රයෝජනවත් වූ බව සඳහන් කළ හැකිය. මෙරට පරිභෝජනය සඳහා බොරතෙල් හා ඛනිජ තෙල් නිෂ්පාදන විශාල වශයෙන් ආනයනය කෙරේ. දළ වශයෙන් සමස්ථ ආනයන වියදමෙන් හතරෙන් එකකි. බොරතෙල් මිල වැඩි අවස්ථාවක මිල නැංවීමෙන් තොරව පාරිභෝගිකයන්ට සපයන ආණ්ඩුව මිල අඩු අවස්ථාවේ දී එම පාඩුව පියවා ගනිමින් සිටියේය. එය අකාර්යක්ෂමය. වක‍්‍ර ක‍්‍රම හෙයින් අතිරේක පිරිවැයක් එකතු විය.

ජාත්‍යන්තර මූල්‍ය අරමුදල ඛනිජ තෙල් අලෙවිය සම්බන්ධයෙන් ජාත්‍යන්තර මිල සලකා සූත‍්‍රයක් හදන සේ රජයට උපදෙස් සපයන ලද අතර අද භාවිතයට ගැනෙයි. සූත‍්‍රයේ පදනම හෝ එයින් සිදුවන වාසි අවාසි කෙසේ වෙතත් ලෝක වෙළඳ පොලේ තෙල් මිල අඩුවැඩි වන ආකාරය ගැන පොදු ජනතාවට කිසියම් අවබෝධයක්  ලැබුණි. තෙල් ගෙන්වීමේ සිට පාරිභෝගිකයා අතට පත්වන තෙක් ක‍්‍රියදාමය තුළ ඇති අකාර්යක්ෂම අංශ වලට ජනතාව ගෙවන බරපතල වන්දියක් තිබේ. එය අවම කරගතහොත් වඩාත් සුදුසුය.

බස් ගාස්තු, සේවක වැටුප් වැඩි කිරීම් සහ ඇතැම් භාණ්ඩ වල මිල සංශෝධනය ඇතුළු ක්ෂේත‍්‍ර ගණනාවක ද එකඟතා තිබේ. ඒවා නිසි සේ ක‍්‍රියාත්මක කිරීමෙන් විනිවිද පෙනෙන ක‍්‍රමයක් ඇතිවෙයි. අතරමැදියන්ට වාසි ගැනීමට ඇති ඉඩකඩ ඇවිරේ.

විදුලිය බල සැපයුම ද මිල සූත‍්‍රයකට යටත් කිරීම සුදුසුය. විදුලිය නිෂ්පාදනය, බෙදාහැරීම හා බිල්පත් ක‍්‍රමය සංකීර්ණ ස්වභාවයක පවතී. රටට අවශ්‍ය විදුලිය අඩුම වියදමකින් නිෂ්පාදනය කළ යුතුය. ඒකාධිකාරය තුරන් කර නිෂ්පාදන ක‍්‍රම විවිධාංගීකරණයෙන් වඩා වාසි අත්පත් කරගත හැකිය. විදුලිය නිපදවීමට දැවි තෙල් භාවිතය අඩු කළ යුතුය. සූර්ය බලය, ගෑස් හෝ සුලං බලයෙන් අඩු මිලට විදුලිය නිපදවිය හැකි අතර එය පරිසර හානිය ද අවම කරයි. මුහුදු රළ මගින් ද විදුලිය නිපදවිය හැකිය. රටට ඇති ඉල්ලූම සලකා බලා රාජ්‍ය හා පුද්ගලික ආයෝජකයන් ජනන අවස්ථා ඇති කරන අතර ඒවායේ පිරිවැය අනුව පාරිභෝගිකයන්ගෙන් සාධාරණ මිලක් අය කිරීම සුදුසුය.

ඛනිජ තෙල් ක්ෂේත‍්‍රය හැරුණ කොට මෙරට ජනතාවට වැඩිම බලපෑමක් කරන අංශයක් වශයෙන් විදුලිය බල ක්ෂේත‍්‍රය දැක්විය හැකිය. ජනන ක‍්‍රියාමාර්ග වල පවතින දුබලතා හෙයින් නියම කරන මිල ගෙවනු හැර අන් විකල්පයක් පාරිභෝගිකයන්ට නැත. විදුලිය නිපදවන ක‍්‍රම වල විශාල පරිවර්තනයක් සිදුවිය යුතුව තිබේ. එවැනි වෙනස්කම් කරන්නට රජයට ආයෝජන ශක්තිය නැත. දේශීය හෝ විදේශීය දක්ෂ ආයෝජකයන් ගේ හැකියාව උපයෝගී කරගත යුතු අතර එමගින් වෙනස්කම් ඇති වෙයි.

විදුලිය නිෂ්පාදකයන් ගෙන් කරන මිල දී ගැනීම්, බෙදාහැරීමේ පිරිවැය හා රජයේ මැදිහත්වීම නිසි සේ කලමණාකරනය කිරීම සඳහා හොඳ නියාමනයක් අවශ්‍යය. පාරිභෝගිකයා පැත්තෙන් බලා නියාමනයට පියවර ගත හැකි පනතක් සම්මත කර තිබේ. විදුලිය බල ක්ෂේත‍්‍රයේ පැවැත්ම විනිවිද පෙනෙන ආකාරයකට හරවා මිල සූත‍්‍රයක් ඇති කළහොත් බලශක්ති අංශයෙන් දැනට සිදුවන අනිසි තත්ත්ව පාලනය කළ හැකි වනු ඇත. මිල සූත‍්‍රය ඇති කරන අතර, දුෂණ හා වංචා නතර කර කාර්යක්ෂමතාව ඇති කිරීමට පියවර ගත යුතුය. විදුලිය ගාස්තුව ගැන පාරිභෝගිකයා ගේ පැත්තෙන් හිතන්නට අවශ්‍යය.

Advertisements

කරගන්නත් බැරි වෙන්නෙත් නැති අලුත් ව්‍යවස්ථාව

ප්‍රතිචාරයක් ලබාදෙන්න

LOGO

2019/02/13 – ලංකාදීප

අප ජීවත්වන වට පිටාවේ අපට කරගන්නට බැරි දේ තිබේ. සිද්ධ වෙන්නේත් නැති දේවල් ඇත. කරගන්නත් බැරි, සිද්ධවෙන්නේත් නැති යමක් ගැන වෙහෙස විය හැකි  ප‍්‍රමාණයක් තිබේ. කැපවී ක‍්‍රියා කළ හැකි සීමාවක් ඇත.

රටට ගැලපෙන ව්‍යවස්ථාවක් හදා ගැනීමේ කාර්යය ද කරගන්නත් බැරි – සිද්ධ වෙන්නේත් නැති යමක් බවට පත් ව තිබේ. බලයට පත්වන ආණ්ඩු තමන්ට ගැලපෙන ව්‍යවස්ථාව හදන්නට බලවත් වෑයමක් දරයි. බලය අල්ලා ගන්නට අරගල කරන අනෙක් සියළුම පක්ෂ දරන එකම ප‍්‍රයත්නය අලූත් ව්‍යවස්ථාවක් හදා ගන්නට දරන වෑයම පරාජය කිරීමය. වත්මන් දේශපාලන ව්‍යුහය තුළ මෙකී කලබැගෑනිය මැනැවින් ප‍්‍රදර්ශනය වෙයි. අලූත් ව්‍යවස්ථාවක් නිර්මාණය කර, එය සම්මත කරගැනීම අරභයා අවශ්‍ය කරන නෛතික තත්ත්ව ගැන අවබෝධය අප සියළුම දෙනාට තිබේ. අවශ්‍ය කරන බලය කොපමණ ද යන්න සම්බන්ධ වැටහීමක් ඇත. අලූත් ව්‍යවස්ථාවක් වෙනුවෙන් සම්පූර්ණ එකඟතාවයක් ඇති කරගැනීමට අපොහොසත්ය.

ඉතිහාසයේ සිට කරුණු අධ්‍යයනය කළහොත් එක විසදුමක් ඉදිරිපත් කරන විට එයට අනෙකා කැමැති නැත. අකමැති පාර්ශවය ගෙන එන සාධාරණ යෝජනාවකට පවා තවත් කොටසක් එකහෙලා විරුද්ධය. අප ජීවත්වන ජන සමාජයේ ප‍්‍රශ්නයක් හටගත් අවස්ථාවල විසඳාගන්නා ක‍්‍රමයක් තිබේ. කැපවීමය. එකඟතාවයක් පළ කිරීමය. තමන් ගේ ස්ථාවරයෙන් අඩියක් පිටුපසට ගැනීමය. තදින් වාද කරන පැති දෙකක් දෙදෙනාම එක අඩිය බැගින් පස්සට ගතහොත් බිහි වන අවකාශයෙන් අලූත් විසදුමක් නිර්මාණය කරගත හැකිය. ප‍්‍රායෝගික පැත්ත එයයි. නමුත් මෙරට දේශපාලන ක‍්‍රමය තුළ ස්වකීය පැවැත්ම හැර අනෙක් ප‍්‍රායෝගික යෝජනාවකට ඉඩ නැත.

මෙරට පොදු ජනතාව අඩියක් ආපසු ගැනීමට සූදානම්ය. ඉතිහාසය පෙන්වා දී තිබේ. නමුත් පාලකයෝ කැමැති නැත. තමන් කරන්නට සූදානම් වන දෙයට අනෙක් සියළුම දෙනා විරුද්ධ බව ඔවුහු පෙන්වයි. විරුද්ධ අය කියන්නේ තමන්ගේ සංශෝධන වලට අනෙක් අය කැමැති නැති බවය. පාර්ශව අතර බරපතල වාග් කෝලාහලයකි. එක වචනයක් වෙනුවෙන් මරාගෙන මැරෙන්නට සූදානම්ය.  එය විශාල සංදර්ශනයක් වී තිබේ. අති දක්ෂ රංගනයක් වී ඇත. පරාජය වන පාර්ශවය බිමටම වැටෙනවා දකින්නට අන්තවාදී පාක්ෂිකයෝ කැමැතිය. පරාජය වන චරිත ආයෙත් නැගිට මුල් ජයග‍්‍රාහකයාට වැරෙන් පහර දෙන අන්දම දකින්නට ප‍්‍රතිවිරුද්ධ පාක්ෂිකයෝ ඉතා කැමැති බව ද සඳහන් කළ යුතුය. මෙම ආරවුල ඉතා විචිත‍්‍රවත් අන්දමට මාධ්‍ය වලින් විකාශය කෙරේ. වේදිකාව දෙවනත් කරන වචන අහුලාගන්නා දේශපාලන විචාරකයෝ ඒවා යළි යළිත් අර්ථකථනය කරමින් සිටිති.  මේ පෙන්වන්නේ අප ගතකරන කාල වකවානුවේ එක හරස්කඩක් පමණකි.

මෙකී රංගන විලාසය තුළ අප සියළුම දෙනාගේ එදිනෙදා දැවෙන ප‍්‍රශ්න අමතක වී තිබේ. ව්‍යවස්ථාව රටට ඇති එකම අපලය ද? ජනතාව ගේ දුක වේදනාව තුරන් කිරීමට අලූත් ව්‍යවස්ථාවකින් හැකිද? අධ්‍යාපනය, ගමනාගමනය, රැකී රක්ෂා, ආහාර හෝ සෞඛ්‍ය පහසුකම් වැනි කිසිම අංශයකින් ජනතාවට සහනයක් නැත. පසුගිය දශක ගණනාව තුළ ඉදිරියට යන බව පෙන්වූ සමාජය ගමන් කර ඇත්තේ අවරටය. පුලූවන්කමක් ඇති  ඕනෑම කෙනෙක් ශ‍්‍රී ලංකාව අත්හැර වෙනත් රටක පදිංචියට සූදානම් වකවානුවක අලූත් ව්‍යවස්ථාව ගැන ඇති කරන ප‍්‍රශ්නය පැවැත්ම උදෙසා වූ එක්තරා පැලැස්තරයක් පමණකි. දේශපාලනයේ පවතින මෙම පටු ක‍්‍රියා පටිපාටිය ජනතාව ප‍්‍රශ්න කළ යුතුව තිබේ.

 

 

සාම්ප්‍රදායික කොටුවෙන් ඈත්වූ විප්ලවීය රටක්

ප්‍රතිචාරයක් ලබාදෙන්න

milinda-prashna

2019/02/06 – ලංකාදීප

 

උණුසුම් කැළඹීම් ගැන රටට අවබෝධයක් තිබේ. ඇතැම් කැළඹිලි විශාල විනාශයකින් කෙළවර වෙයි. පැවැත්ම වෙනස් කරන්නට වරින් වර සිදුවන කැළඹීම් අවශ්‍යය. ඒවා ලේ හලන විප්ලව නොවේ. අලූත් අදහස් අලූත් ආකල්ප වලින් සිදුවන කැළඹීම්ය.

මෙරට සෑම ක්ෂේත‍්‍රයකම පවතින ස්වභාවය තද සම්ප‍්‍රදායික රාමුවක කොටුවී තිබේ. හැත්තෑ එක් වැනි නිදහස් දිනය එයට හොඳ උදාහරණයකි. පෙලපාලි, ආරාධිත අමුත්තෝ, විශේෂ දේශනය, ආචාර වෙඩිමුර සහ සජීවී විකාශ යනාදිය ලබන වසරේ දී ද නොවෙනස්ව  පවතිනු ඇත. ජාතික ද නොඑසේනම් නිදහස් දිනය ද යන්න වැදගත් නැත. අධිරාජ්‍යවාදීන්ගේ ග‍්‍රහණයේ තිබී එයින් ගැලවුණ රටට අලූත් යුගයක් අවශ්‍යය. ස්වෛරීත්වය වෙනුවෙන් දිවි හිමියෙන් කැපවූ මෙරට මුතුන් මිත්තන් ප‍්‍රාර්ථනා කළේ මොනවාද? විදේශික ආක‍්‍රමණ හමුවේ ජීවිතය නොතකා සටන් කිරීමෙන් අත්පත් කරගත් ජයග‍්‍රහණ ආරක්ෂා කරගන්නට අපට හැකි වී තිබේ ද?

ජාත්‍යන්තරයේ විශාල පරිවර්තන සිදුවෙයි. ඒවා කැළඹිලි වලින් මතුවෙන අලූත් තත්ත්වයන්ය. වෙනස් ආකාරයට හිතන මනුෂ්‍යයන්ගෙන් ලැබුණ දායාද ය. සමුප‍්‍රදායික රාමුවෙන් එපිට ඇති විකල්ප පැති අත්හදා බැලීමෙන් අත්පත් කරගත් වාසි සහගත තත්ත්වයන් ය. බදු අය කරන, බිලක් නිකුත් කරන තරු හෝටල් තිබිය දී, රටින් රට යන  සංචාරකයෝ සෘජු සම්බන්ධතා අනුව කොතැනක හෝ ඇති නවාතැන් පොලක නතර වෙති. මුළු ලෝකයටම එය ප‍්‍රශ්නයක් වී තිබේ. නමුත් එය අලූත් ව්‍යුහයකි. එයාර් බී ඇන්ඞ් බී යනුවෙන් අන්තර් ජාලයේ ඇති සේවා අනුව පිරිවැය පැත්තකින් තබා සංචාරයේ යෙදෙන අවස්ථාව ලැබී තිබේ.

කාගේවත් අනුදැනුමක් නැතිව කෙලින්ම වාහනයක් කුලියට ගන්නට අවස්ථාව හැදී තිබේ. ඌබර් ටැක්සි ආණ්ඩුවල අණ පනත් හා නීති වලට එපිටින් මගී ප‍්‍රවාහනයෙහි යෙදෙයි. සමාජ මාධ්‍යයෙහි ඇප් වර්ග ගණනාවක් තිබේ. රටින් රට කතා කරන්නට බදු අය කරන, සංඥා කුළුණු හරහා පරීක්ෂා කරන තත්ත්ව මග හැර සෘජු කථෝපකතනයට ඉඩ දී ඇත. වෙළඳාම අතරමැදියන්ගෙන් ගිලිහී යමින් තිබේ. ලෝකයේ වෙනත් කෙළවරක සිටින ගැනුම්කරුවා කෙලින්ම නිෂ්පාදකයා හා කතාකර තමන්ට ගැලපෙන දේ ඇනවුම් කරන්නට නැඹුරු වී ඇත. එයට මුදල් ගෙවන්නේ සුපුරුදු වානිජ බැංකු වලින් පිටස්තර මුදල් හුවමාරු ක‍්‍රම වලින්ය. මෙවැනි සිදුවීම් ලෝකයේ මෑත කාලය තුළ ක‍්‍රමය වෙනස් කරනු සඳහා ඇති වූ කැළඹීම්ය.

ඉදිරි දශකය හෝ දෙක ඇතුලත පැවැත්ම තවත් වෙනස් විය හැකිය. රෝහල වෙනුවට කෙලින්ම රෝගියා හා වෛද්‍යවරයා හමුවී ප‍්‍රතිකාර ගැනීම සිදුවිය හැකිය. රියැදුරෙකු නැති එපමණක් නොව එන්ජිමක් ද නැති වාහනයක් මගී ප‍්‍රවාහනයේ යෙදෙනු ඇත. එයට බලය ලැබෙන්නේ කෙලින්ම හිරැ එලියෙන්ය. පස් වන පරම්පරාවේ රැහැන් රහිත සන්නිවේදන තාක්ෂණය උපයෝගී කරගෙන සියළුම දෙනා එකිනෙක මෙවලම් හා සම්බන්ධ වන අතර අත රැ‍ගෙන යන ස්මාට් දුරකථනය ඉතාම බලවත් මෙහෙයුම් යන්ත‍්‍රය බවට පත් වෙයි. මෙම පැවැත්ම වෙනස්වන පැති සමග එන කැළඹීම වැදගත්ය.

පවතින ව්‍යුහය කළඹා අලූත් දේ මතුකර ගන්නට අවශ්‍ය ලිහිල් පරිසරය සකස් කිරීම පාලකයන්ගේ වගකීමකි. නිදහස උත්සවාකාරයෙන් සමරන ශ‍්‍රී ලාංකිකත්වයේ සම්ප‍්‍රදාය පැත්තකට කළ යුතු නැත. තද නීති, විධි විධාන, පැලැන්ති ප‍්‍රශ්න සහ නිලධාරීවාදය ජනතාවගේ සීතල කැළඹීම් වලට අවහිර කර තිබේ. අන්තිමේ දී ඒවා උණුසුම් කැළඹිලි වශයෙන් පුපුරයි. නිදහසින් පසු රට තුළ පැන නැගුණ විප්ලව හා ඒවායෙන් ගලාගිය රුධිරය අවස්ථා අහිමි සමාජයක ස්වභාවය පෙන්වයි. හැත්තෑ දෙවැනි නිදහස් දිනය වන විට අලූත් වෙනස්කම් සහිත සමාජයක් ගොඩනැගීම අප සියළුම දෙනාගේ අධිශ්ඨානය විය යුතුය.