සීබ‍්‍රා බළකාය

ප්‍රතිචාරයක් ලබාදෙන්න

milinda-prashna

2017/04/26 – ලංකාදීප

අලූත් පාසල් වාරය ආරම්භ වී තිබේ. අවුරුදු නිවාඩුවට පසු පාසලට එන දරු දැරියන් මහ මාර්ගයේ දී ආරක්ෂා කරගැනීම බලවත් වගකීමකි. පාසල් දරුවන් ප‍්‍රවාහනය කරන වාහන වල අනතුරු පමණක් නොව පාර මාරු වන සිසු සිසුවියන් වාහන අනතුරුවලට මුහුණ පෑ ආකාරය ගැන මෑත ඉතිහාසයේ  සටහන්ව තිබේ. තවත් දෙයක් මතකයේ ඇත. වයඹ පලාතේ එක්තරා පාසලක් ඉදිරිපිට කහ ඉරෙන් පාර මාරුවන පාසල් දරුවන්ට සහාය වන කාන්තාවක් ගැනය. එය පුවත් පතක පළ වු අතර සෑහෙන කාලයකට කලින්ය.

නොබෝදා නයිජිරියාවේ ‘ල පස්’ නගරයෙහි පැතිර යන මේ හා සමාන සංකල්පයක් ගැන ජාත්‍යන්තර මාධ්‍ය අවධානය යොමු කර තිබිණ. එයින් කියැවුණේ සීබ‍්‍රා සත්වයෙකු සේ ඇඳගත් පුද්ගලයන් පාර මාරුවන ඉරි අසල කරන මෙහෙවරක් ගැනය. වේගයෙන් ධාවනය වන වාහන පාරේ සටහන් කර ඇති සීබ‍්‍රා ඉරි ගැන සැලකිල්ලක් නොදක්වන බව අවධානය ගත් කාන්තාවක් වාහන වලට බාධා වන සේ සීබ‍්‍රා ඉරි මැද හිටගත්තාය. එතැනින් නතර නොවූ ඇය සියළුම දෙනා පාර මාරු වී අවසාන වන තෙක් වාහනයට ඉදිරියට යා නොදී එය බදා ගෙන සිටියාය. මෙම වාහන හැසිරවීම පළමුවෙන් වාර්තාවූයේ මෙයින් අවුරුදු හතරකට කලින්ය. ක‍්‍රමයෙන් වැඩි දියුණු වු එය එක්තරා අවස්ථාවක දී සීබ‍්‍රා ඉරි සහිත ඇදුම් ඇගලාගෙන කරන ජාතික මෙහෙවරක් බවට පත් වී ඇත. අද වන විට එය හැඳීන්වෙන්නේ සීබ‍්‍රා වාහන පාලනයක් හැටියටය. ඉතාමත් වේගයෙන් ජනපි‍්‍රය වූ මෙම සංකල්පය නයිජීරියාවේ වාහන තදබදය වැඩි සෑම නගරයකටම පැතිර ගිය අතර අද වන විට මෙම සීබ‍්‍රා ස්වේච්ඡා බලකාය දෙසීය දෙනෙකු ඉක්මවා ගොස් ඇති බව වාර්තා වෙයි. රථ වාහන තදබදය හොඳටම වැඩි උදෑසන සහ හැන්දෑවේ වැඩට බහින මෙම සීබ‍්‍රා බලකාය ජනතාවට පරෙස්සමට පාර මාරු වෙන්නට ඉඩ පහසුකම් සම්පාදනය කරදෙන අතර එය ජනතාවගේ ගෞරවයට හේතු වී ඇත.

පාරේ ගමන් කරන ජනතාවගේ ආරක්ෂාව වෙනුවෙන් පෙනී සිටින මෙම සීබ‍්‍රා ස්වේච්ඡා සේවකයන්ගෙන් වැඩි කොටසක් තරුණන්ය. අද වන විට තරුණ පිරිස් වැඩිවශයෙන් එයට සම්බන්ධ වෙමින් තිබේ. ස්ථිරවම එහි නියැලෙන්නේ නැති අතර තාවකාලිකව තමන්ට පහසු අවස්ථාවල මෙම සුදු පසුබිමේ කලූ ඉරි ඇති ඇදුම ඇඳගෙන පාරට එන මෙම පිරිස ගීත ගයමින්, නටමින් විනෝදයෙන් රාජකාරිය කරති. පාසල් අසල දී දරුවන් හා රෝහල සමීපයේ දී වැඩිමහළු අය පාරෙන් එහා මෙහා කරන්නට ද ක‍්‍රියා කරන්නේ මෙම සීබ‍්‍රාවන්ය. විවේක අවස්ථාවක සමාජයට සිදු විය යුතු යුතුකමක් සේ සලකා වගකීමෙන් එහි නියැලෙති. මෙම සමාජ සත්කාරය නිසා නයිජිරියාවේ ‘ල පස්’ නගරයේ පමණක් නොව එයින් එපිට නගරවල ද වාහන අනතුරු යම් ප‍්‍රමාණයකින් පහත වැටී තිබේ. නිල බලයෙන් වාහන පරිපාලනයෙහි නිතර පොලිසිය කටයුතු කරන අතර වාරයේ දී මෙම ස්වේච්ඡා අදහස රටට අලූත් වටිනාකමක් ඇතිකර තිබේ.

මෙරට ප‍්‍රජාව ද තැනින් තැන අධික රථවාහන තදබදය ඇති විට ඒවාට මැදිහත්වන බව නිරීක්ෂණය කළ හැකිය. විශේෂයෙන් පාසල් දරුවන්ම පාසල අසල වාහන හැසිරවීමෙහි නිරත වෙන්නේ පොලිස් නිලධාරීන් ගේ අධීක්ෂණය ඇතිවය. වැඩිහිටියන් හා කලාතුරකින් තරුණ පිරිස පාසල හා රෝහල අසල වාහන හා ජනතාව අතර සම්බන්ධීකරණයක් කරයි. හදිසි අනතුරක් අවස්ථාවක වාහන තදබදයක් ඇති වුවහොත් ඒවා නිරාකරණයට ඉක්මනින් මැදිහත් වෙන පුද්ගලයන් ද සිටී. මේවා එම සුළු වේලාවකට සීමා වන අතර අඛණ්ඩව පවත්වාගෙන යන්නේ නැති සිද්ධි සේ සැලකිය හැකිය.

වාහන තදබදය හා වාහන පදවන රියැදුරන්ගේ අවධානය ගැන සලකන විට අනතුරු බහුල වෙන්නට හේතුව කුමක්දැයි පැහැදිලිය. නීති මගින් පාලනය වන අතර තුර ප‍්‍රජාව ද තමන්ට හැකි ආකාරයෙන් මහ පාරේ අනතුරු වලක්වා ගැනීමට මහන්සිවීම සුදුසුය. අලූත් පාසල් වාරය ආරම්භ කරන මෙම සතිය ඒ ගැන අවධානය යොමු කරන්නට හොඳ අවස්ථාවකි.

 

 

Advertisements

ප්‍රමාද නොකළ යුතු තීරණ

ප්‍රතිචාරයක් ලබාදෙන්න

milinda-prashna

2017/04/19 – ලංකාදීප

තීරණයක් ගැනීම ඉතාම වැදගත් කාරණයකි. පුද්ගලික ජීවිතයේ දී අප සියළු දෙනා තීරණගැනීම සම්බන්ධව පුද්ගල අනන්‍ය ස්වභාවයක පිහිටා කි‍්‍රයාකරයි. චරිතය මැන බලන්නට එයින් ලැබෙන පිටිවහල සුවිශේෂී එකකි.  ජනතා සංවිධාන, දේශපාලන පක්ෂ සහ අවසානයේ දී ආණ්ඩුවක් විසින් ගන්නා තීන්දු තීරණ ඉතා තීරණාත්මක කාර්යයක කොටසකි. තීන්දු නොගැනීම ද තීන්දුවකි. තීරණයක් නොගෙන කල්ගන්නා විට ඇති වන තත්ත්වයට වගකියන්නට සිදුවන අතර එයින් ඇතිවන යහපත හෝ අයහපත තීරණයක් නොගැනීමේ ස්වභාවයේ ප‍්‍රතිඵලයක් බව සඳහන් කළ යුතුය.

කොළොන්නාව කසල කන්ද ආශි‍්‍රතව ජීවත් වූ ජනතාවගේ ජීවිත ඛේදවාචකයක් බවට පත්ව තිබේ. එය තීරණයක් නොගැනීමේ ප‍්‍රතිඵලය මත උද්ගත වූ අවාසනාවන්ත තත්ත්වයකි. තීරණ නොගැනීම තීරණයක් බවට පත්ව ඇති බව මෙකී සිද්ධිය එක උදාහරණයකි.

දේශපාලනඥයන්, විද්වතුන් සහ ඒ අවට ජීවත් වූ ජනතාවට මෙම කසල බැහැර කිරීමේ ක‍්‍රමවේදය වෙනස් කළ යුතු බවට අදහස් තිබිණ. කසල දුම්රියෙන් ප‍්‍රවාහනය කර පුත්තලම ප‍්‍රදේශයේ ක්ලින්කර් වලවල් ගොඩකරන යෝජනාවක් විය. කසල යොදවා විදුලිය නිපදවන අදහසක් ද ඉදිරිපත්ව තිබිණ. ප‍්‍රතිචක‍්‍රීකරණය හා මෙම කසල වෙනත් ප‍්‍රදේශවලට ප‍්‍රවාහනය කර විද්‍යාත්මකව බැහැර කරන ක‍්‍රමවේදයක් ගැන ද සාකච්ඡා කරමින් සිටියේය. මෙකී අදහස් ඉක්මනින් ක‍්‍රියාත්මක කරන සේ බලකරන ජනතා විරෝධතා පැවැති බව රහසක් නොවේ. එක් එක් යෝජනා වලට පක්ෂව මෙන්ව විපක්ෂව ද මත පැවැති බව ද ප‍්‍රසිද්ධ කාරණයකි. තර්ක කරමින්, විරෝධතා පවත්වමින් සහ අලූත් යෝජනා ගැන අවධානය යොමු කරමින් ඉන්නා අතරතුර කිසිම තීරණයක් ගත්තේ නැත. හරි හෝ වැරදි මොනයම් ආකාරයේ හෝ තීරණයක් ගත්තා නම් අද මුහුණ පා ඇති තත්ත්වය නිර්මාණය නොවෙන්නට ඉඩ තිබිණ. තීරණ නොගැනීම ඔස්සේ නිරායාසයෙන් මතු වූ තීරණය ඒ අවට ජීවත් වූ සෑහෙන පිරිසකගේ ජීවිත හා දේපොල විනාශ වී තිබේ. එයින් මතු කර ඇති ගැටළු ජන සමාජය නැවත නොසන්සුන් කර ඇත.

කසල බැහැර කිරීම පලාත් පාලන ආයතන වල වගකීමකි. ජාතික ප‍්‍රතිපත්ති අනුව එය කළ යුතු කෙසේදැයි පෙන්වා දීම ආණ්ඩුව සතු කාර්ය භාරයකි. ශ‍්‍ර‍්‍රී ලංකාවට පමණක් නොව ලෝකයේ සෑම රටකටම කසල කළමණාකරණය සම්බන්ධ ගැටළු වලට මුහුණ දෙන්නට සිදු වී තිබේ. එයින් ඇති කරන ප‍්‍රශ්න සංකීර්ණ හා බරපතල හෙයින් ලෝකයේ නොයෙක් රටවල් බොහෝ දුර දිග හිතා බලා කටයුතු කරමින් සිටී. ඇමරිකාව රාත‍්‍රී කාලයේ නැව් වලින් හා දුම්රියෙන් කසල ප‍්‍රවාහනය කර නගර පිරිසිදුව තබා ගනී. ඒවායේ ඇති ද්‍රව්‍ය වෙන්කර විද්‍යාත්මක ප‍්‍රතිචක‍්‍රීයකරණ වැඩ පිලිවෙල අනුගමනය කරයි. ජපානය එහිලා ඉදිරියෙන් සිටින රටකි. චීනය, ඉන්දියාව පවා තමන්ට අනන්‍ය ක‍්‍රම අනුගමනය කරයි. කෙටි කාලීන සහ දීර්ඝ කාලීන වශයෙන් පියවර ගන්නා බව නිරීක්ෂණය කළ හැකිය. මැදි ආදායම් රටක් සේ ඉදිරියට ගමන් කරන ශ‍්‍රී ලංකාවට එදිනෙදා බලපාන ප‍්‍රශ්න අතර කසල බැහැර කිරීම ද බරපතල එකක් බව නොඅනුමානය. ප‍්‍රශ්නය හදුනාගෙන එයට ස්ථිරසාර විසදුමක් සොයාගැනීම විනා තීරණ ගැනීම කල් හැරීමෙන් රටට හෝ සමාජයට කිසිම වාසියක් අත් පත් නොවේ. පිලිගත යුතු ඇත්ත ස්වභාවය එයයි.

නගරයේ එකතුවන කැළි කසල බැහැර කිරීම සම්බන්ධව නිසි තීරණ ගැනීම අවශ්‍යය. දේශපාලනඥයන්ට එයින් යැපෙන්නට සහ බලපුලූවන්කාරකම් පෙන්වන්නට ඉඩ දීමෙන් රටට  බරපතල අනර්ථයක් සිදුවන බව ඉගෙනගත් පාඩමයි. තීරණ නොගැනීමෙන් විශේෂිත අරමුණු සහිතව හැසිරෙන කොටසකට යැපෙන මාර්ග බිහිකර දෙයි. එය ඉතාමත් නරක තත්ත්වයකි. සිද්ධිය සමග මතුවූ ජනතා විරෝධය සහ එය කේන්ද්‍රගත වූ අන්දම රටට විශාල පණිවුඩයක් නිකුත් කර තිබේ. තීරණ ගැනීමේ ක‍්‍රියාවලිය ප‍්‍රමාද කළ යුතු නැති බව එහි දැක්වෙන ප‍්‍රධාන කාරණයයි. නමුත් තවත් සති දෙක තුනකින් මෙම සියළු තත්ත්වයන් අමතක කරන්නට ඉඩ තිබේ. ජනතාවගේ කෙදුළු සියළු දෙනාටම අමතක වනු ඇත. මොනවා හෝ සිදුවන අන්දමේ තීරණ ගැනීමේ ක‍්‍රියාපටිපාටියකින් විනා මෙවැනි සිද්ධි මගහරින්නට කිසිදු හැකියාවක් නැත.

 

 

අවුරුදු විනය

ප්‍රතිචාරයක් ලබාදෙන්න

milinda-prashna

2017/04/12 –  ලංකාදීප

විනය ඉතාම වැදගත්ය. පුද්ගලයෙකු හෝ රටක් නිසි විනයක් රහිතව ක‍්‍රියා කරන්නේ නම් පිරිහීම වැලැක්විය නොහැකිය. සහජීවනය ද ඉතාම වැදගත්ය. සාමූහිකව කණ්ඩායමක් වශයෙන් පැවැතිය හැකි නම් එය විශාල ශක්තියකි.  ඕනෑම අභියෝගයක් ජයගත හැකි පහසු මගකි.

ශී‍්‍ර ලංකාවට අනන්‍යතාවයෙන් ම විනය හා සහජීවනය යන සංකල්ප උරුම වී තිබේ. සිංහල හා දෙමල අලූත් අවුරුද්ද එයට එක උදාහරණයකි. අවුරුදු නැකත රටට විනයක් ගෙන එයි. සූර්යය මීන රාශියේ සිට මේෂ රාශියට ගමන් කරන අලූත් කාලය තුළ නැකතක් නැති වේලාව නොනගතයයි. නොනගතය වේලාවේ දී මුළු රටම ආගමික වතාවත් වල නිරත වෙති. සෑම දරු පවුලක් ම සිය සංස්කෘතික උත්සවයේ දී යෙදෙන නැකැත් චාරිත‍්‍ර කරන්නේ ඒ අන්දමටය. එයින් පසු ව එළැඹෙන සුබ මොහොත අනුව  මුළු රටම එකම වෙලාවක ලිප ගිනි දල්වා අහර පිස අනුභව කර සුබ මොහොතකින් ගනු දෙනු කර අලූත් අවුරුද්ද ආරම්භ කරයි. මෙකී කටයුතු සියල්ල එක වෙලාවක කරන විනය රටට තිබේ. එය ඉතාමත් අගය කළ යුතු වතාවතකි. අනෙක් ප‍්‍රධාන කාරණය මෙකී විනය ඔස්සේ රටට ලැබුණ සහජීවනයයි.

අවුරුදු කාලයේ දී පැරණි අමනාපකම් දුරු වෙයි. අලූත් බැඳීම් ඇති වෙයි. රටම එක වෙලාවකට වැඩ කරන හෙයින් සහජීවනය ඔප් නැංවෙයි. වසරේ අනෙක් කාලයේ දී ජාති, ආගම් සහ දේශපාලන වශයෙන් නොයෙක් බෙදීම් මත ගැටුම් ඇතිකර ගනී. වාද විවාද වල පැටලෙයි. ශ‍්‍රී ලංකාවේ ජන සමාජය තරම් විවාද වල පැටලී කාලය නාස්ති කරන්නට සමත් රටක් ලොව වෙනත් තැනෙක නැති තරමට එය බරපතලය. මේවායෙන් පෙන්වා දෙන්නේ සහජීවනයක් නැති බවය. නමුත් අනවුරුද්දේ හුඟ කාලයක් ගැටුම්, මතබේධ හා ආරවුල් මැද ගත කරන රට අවුරුදු කාලයේ දී අපූරු සහජීවනයක් පෙන්වයි. අවුරුදු  නෑගමන් එහි සංකේතයකි. අවුරුදු උත්සය තවත් එකකි. වෙන  ඕනෑම කාලයක පවත්වන උත්සවයක දේශපාලන මුහුණුවරක් හෝ ගම බෙදී දෙපිලක් වන නමුත් අවුරුදු උත්සවයේ දී එවැනි අසමගියක් වාර්තා වෙන්නේ ඉතාම කලාතුරකින් බව නිසැකය. එපමණකටම මෙරට ජන සමාජයට ඓතිහාසිකව පැවැරුණ සහජීවන ලක්ෂණය කාවැදී තිබේ.

මෙකී ස්වභාවය අවබෝධ කරගත් අප සියළු දෙනා බක් මාසයෙන් ඔබ්බට විනය හා සහජීවනය  පවත්වාගෙන යා යුතුය. එය එසේ කරගෙන යා නොහැකි තත්ත්වයක් ඇති කරන බලවේගයක් තිබේ නම් එය කුමක්දැයි හදුනාගන්නට උත්සුක විය යුතුය. රටක පැවැත්ම වෙනුවෙන් විනය වැදගත් වෙන්නා සේ ම සහජීවනය ද ඉතාම වැදගත් බව සඳහන් කරන්නට අවශ්‍යය. නොයෙක් ජාතීන්, නොයෙක් භාෂාවන් කතා කරන ජන කොටස් ජීවත් වන රටවල් ලෝකයේ වඩාත්ම වේගයෙන් ඉදිරියට ගමන් කර තිබේ. වෙලාවට වැඩ කරන, හොඳ විනයක් සහිතව හැසිරෙන එකී සියළු රටවල් ජයග‍්‍රාහී තත්ත්වයට පත්ව ඇති අතර එහි ප‍්‍රතිඵල නොසලකා අවිද්‍යාත්මකව හැසිරෙන  ඕනෑම රටක් ගමන් කර ඇත්තේ අභාග්‍යය කරා බව තේරුම් ගත යුතුය.

ශී‍්‍ර ලංකාව ජාතිය ආගම හා දේශපාලනය වශයෙන් බෙදී ගත කරන ලද දශක තුනක පමණ කාලය  තුළ අත්පත් කරගත් අවාසිදායක තත්ත්ව සමාලෝච

නය කිරීමට සිංහල හා දෙමල අවුරුද්ද හොඳ අවස්ථාවකි. ජාත්‍යන්තර වශයෙන් ද රටට යෝජනා කරන්නේ විනය හා සංහිඳීයාවය. අප තුළ පවතින උසස් අනන්‍යතා බැහැර ප‍්‍රජාවගේ බලකිරීම් බවට පත්වනු දැකීම නුසුදුසුය. පවතින තත්ත්වය අවබෝධ කරගෙන අපට ඇති උසස් ගුණාංග භාග්‍යවන්ත මාසයෙන් ඉදිරියට ගෙනයාම කෙරෙහි බලවත් අවධානය යොමු කිරීම අප සියළු දෙනාගේම යුතුකමකි. වගකීමකි.

අවුරුද්ද කොහොමද?

ප්‍රතිචාරයක් ලබාදෙන්න

milinda-prashna

2017/04/05 – ලංකාදිප

සිංහල හා දෙමල අලූත් අවුරුද්ද උදා වෙමින් තිබේ. බක් මාසය උත්සව සමයයි. අස්වනු නෙලා ගෙට ගෙන සතුටින් පිරි කාලය භාග්‍යවත් මාසය සේ සැලකේ. එයට අනුරූප ආර්ථික සහ සංස්කෘතික අනන්‍යතා වලින් අපි‍්‍රයෙල් මාසය පොහොසත්ය.  ‘‘කොහොමද’’ යනුවෙන් ප‍්‍රශ්නයක් විමසුවහොත් ජනතාව අවුරුද්ද ගැන යමක් කියන්නට ඉඩ තිබේ. එය මෑත වකවානුව තුළ ජනතාවගේ සහ පාලකයන්ගේ අවුරුද්ද අතර පරතරය මැනැවින් පෙන්වන එකක් වනු ඇති බව නිසැකය.

ජනතාව තම නියෝජිතයන් පත් කරගන්නේ යහපත් පාලනයක් අරමුණු කරගෙනය. නමුත් ජනතාව වෙනුවෙන් රට පාලනය කරනවා වෙනුවට ආණ්ඩුවේ බලය වෙනුවෙන් දේශපාලනය කිරීමට මහජන නියෝජිතයන් නැඹුරු වී ඇත. එහි ප‍්‍රතිඵලය ජන ජීවිතය අපහසුතාවලින් බහුලවීමය. අවුරුද්ද ළඟ එන නමුත් ජනතාව අතරින් කොටසක් අපට මොන අවුරුදු දැයි කියන්නේ එහෙයින්ය.

පවතින ආර්ථික රාමුව හෙයින් අලූතින් පනවන ලද බදු වල බර ජනතාවට දැනෙන්නට පටන්ගෙන තිබේ. සියළු අත්‍යවශ්‍ය දේ සුළු වශයෙන් හෝ මිල ඉහළ ගොස් ඇත. ලැබෙන ආදායම සීමාසහිත අවස්ථාවක එයින් අවුරුදු උත්සවයට සූදානම් වන ජනතාවට මෙම වියදම තදින් දැනේ. වෙනදා තරම් මිල දී ගන්නේ නැති හෙයින් තමන්ගේ වෙළඳාම සරු නැති බව ව්‍යාපාරිකයෝ කියති. ආර්ථිකය ප‍්‍රසාරණ නොවෙන අවස්ථාවක එහි ස්වභාවය ජනතාවට වැටහෙන අතර ආණ්ඩුවේ ආදායම් වියදම් පරතරය වැඩිවෙන තරම අනුව කිසියම් අපහසුතාවයක් ඇති බව දැනේ. මේවා වෙනස් කර අලූත් ව්‍යුහයක් ගොඩනගන්නට නම් ප‍්‍රතිසංස්කරණයක් අවශ්‍යය. එය ජනතාවට දැනෙන එකක් පමණක් නොව පාලකයන්ගේ සහභාගීත්වයෙන් සිදුවිය යුතුය. පළමුවෙන් තිබිය යුතු කැපවීමයි.

අවුරුද්ද උදාවෙන්නේ පුරුදු රටාව තහවුරු කරමින්ය. සුපුරුදු පරිදි දේශපාලනඥයන් සාද පවත්වනු ඇත. අවුරුදු කාලයේ දී විදේශ ගත වන අදහස ඇතිව ගුවන් ටිකට් පත් වෙන් කර ගනිමින් සිටී. මැති ඇමැති දීමනා වැඩි කරගත් අතර දුරකථන දීමනා සහ ‘පොකට් මනී’ ද නංවා ගත්තේය. තව තවත් බලතල අපේක්ෂාවෙන් ඇතැම් අමැතිවරු කැබිනට් සංශෝධනයක් කෙරෙහි අවධානයෙන්ය. රට ආර්ථික අතින් දුෂ්කර තැනක බව දක්වන අතරතුර කෝටි ගණන් ධනය වෙන්කර වාහන වෙන්කර ගත්තේය. අමාත්‍යංශ වලට ගෙවන කුලිය ගැන කියැවෙන ප‍්‍රවෘත්ති වාර්තා අනුව ආණ්ඩුවක වියදම කොපමණදැයි තක්සේරු කිරීම අපහසු නැත. ජනතාව අවුරුදු කාලයේ වියදම් ගැන ලතැවුලෙන් ඉන්නා අතර මහජන නියෝජිතයන් මෙම කාලයේ ඉන්නේ ඉතාම සන්තෝෂයෙන්ය. ජනතාවගේ ආර්ථිකය හා පාලකයන්ගේ ආර්ථිකය අතර පරතරය මෙයයි.

පොදු ජනතාව ආණ්ඩුවක් පත්කරගන්නේ තමන්ගේ මූලික අවශ්‍යතා වඩා හොඳීන් සම්පාදනය කරන රටක් අපේක්ෂාවෙන් බව සඳහන් කළ යුතුය. හොඳ අධ්‍යාපන පහසුකම්, හොඳ පොදු ප‍්‍රවාහන සේවා, යහපත් සෞඛ්‍ය සහ අලූත් රුකී රක්ෂා යනා දී වශයෙන් ඒවා නම් කළ හැකිය. මැදි ආදායම් රටක පුරවැසියන් වශයෙන් සහනාධාර වලට වඩා අපේක්ෂා කරන්නේ සමාජ සාධාරණත්වය හා සමාන අවස්ථා යන සංකල්ප බව සඳහන් කළ යුතුය. නමුත් මේවා ගැන අවධානය යොමු කරන්නේ නැති මහජන නියෝජිතයෝ පුරුදු පරිදි තමන්ගේ අලූත් අවුරුද්ද ගැන අවධානය පමණක් අවධානය යොමු කරන අතර සාමාන්‍ය ජනතාව ගේ ජීවිත අලූත් කරන්නේ කෙසේදැයි හිතා බලන්නේ නැත.

පාලකයන්ට වඩා සතුටින් පුරවැසියන් අවුරුද්දට නෑගම් යන භාග්‍යවන්ත මාසයක් උදා කළ හැකි නම් වැදගත් වෙන්නේ එයයි. එකල්හි රටට නිසි කල සරු අස්වනු ලැබී සිත් සැනසීමෙන් අලූත් අවුරුදු මංගල්‍යයක් උදා වී ඇතැයි කියන්නට හැකිවන්නේය.