ගොවිතැන පැරණි ක්‍රමයට යනවද වගා සරු කරන තාක්ෂණයට යනවද

ප්‍රතිචාරයක් ලබාදෙන්න

2020/05/19 – බදාදා

කෘෂි අංශය ගැන අලුතින් අවධානයක් යොමු වී තිබේ. කොවිඩ් අවදානම හමුවේ නිෂ්පාදන අලෙවි කරගැනීමේ ප්‍රශ්න මතු වී තිබේ. අනෙක් පැත්තෙන් කාබනික පොහොර භාවිතය නතර කරන තීරණයකි. ආනයනික පොහොර හිඟය. වගාවට අවශ්‍ය පොහොර ප්‍රමාණවත්ව නොලැබුණහොත් අස්වැන්න අඩුවන අතර වගා කිරීම පලක් නැති බව ගොවියෝ ප්‍රකාශ කරති.


ශ්‍රී ලංකාව මැදි ආදායම් රටකි. කෘෂි අංශය ආර්ථිකයේ වැදගත් කොටසක් විය යුතුය. වී වගාව, වැවිලි භෝග සහ අනෙකුත් කෘෂිකාර්මික කටයුතු කාලානුරූපව පරිවර්තනයක් සිදු වී නැත. අනාගත පැවැත්ම පදනම් කරගෙන අවශ්‍ය වෙනස්කම් කළ යුතුය. වෘත්තියක් වශයෙන් කෘෂිකර්මයට නැඹුරුවන පිරිස අඩුවෙමින් තිබේ. තරුණ පිරිස මඩ තවරාගෙන වැඩ කරන්නට කැමැති නැත. සේවා අංශය අසාමාන්‍ය ලෙස පුලුල්වීම එහි ප්‍රතිඵලයකි. නිසි කළමණාකරණයක් තුළ කාර්මික, කෘෂිකාර්මික හා සේවා අංශ ගැන අලුත් අවධානයකින් තීරණ ගැනීම අවශ්‍ය කෙරේ.


අනාගත අවශ්‍යතා සලකා බලනවිට ආහාර බෝග නිෂ්පාදනයට ප්‍රමුඛතාව හිමිවිය යුතුය. ජනගහනය වැඩිවන අතර ඉඩම සීමිතය. ඉඩ ප්‍රමාණය තුළ රටට අවශ්‍ය ආහාර නිපදවා ගන්නට සිදුවෙයි. පරිභෝජනයට අවශ්‍ය ප්‍රමාණය සම්පූර්ණයෙන්ම නිපදවා ගත නොහැකිවුවහොත් හිඟය ආනයනය කිරීම හැර අනෙක් විකල්පයක් නැත. පවතින වෙළඳ පොල හැසිරීම සලකා බලනවිට ස්වයංපෝෂිත ආර්ථිකය අනිවාර්ය සාධකයක් විය හැකිය. කෘෂිකර්මය නැවතත් පැරණි ස්වභාවයට තල්ලු කිරීම හෝ නවීන තාක්ෂණික ගොවිතැන යන පැති දෙක අතරින් එකක් තෝරා ගත යුතුව තිබේ.


වස විස රහිත ගොවිතැන හොඳ ආදර්ශ පාඨයකි. පොහොර සහ රසායනික ද්‍රව්‍ය ආනයනය නතර කිරීම තුළ එය සාක්ෂාත් කරගත හැකිය. ජනතාවගේ ආහාර අවශ්‍යතා සම්පූර්ණ කිරීම සම්බන්ධයෙන් බරපතල ගැටළු මතු වනු ඇත. වී වගාව බුද්ධ බෝගයකි. ගොවියෝ පරිසරයට එකඟ ගොවිතැනක නියැලුණහ. දෙහීයට පසු කැකුලෙන් වී ඉස පැල කරගත්හ. නිසි අවස්ථාවේ දී වක්කඩ බැඳ වල් පැල පාලනය කරගත් අතර ගොයමට හානිකරන කෘමීහු පාලනය කරනු සඳහා විලෝපිකයන් සහ නොයෙක් කෙම් ක්‍රම අනුගමනය කරන ලද බව පෙන්වා දිය යුතුය.

ගොවිතැනින් කොටසක් කුරුළු පාලුව වශයෙන් වෙන් කර තැබූහ. ගැඩවිලුන් ඇතුළු හිතකර ජීවීහු පස සරවත් කරන ලද අතර එහි දී රසායනික දේ භාවිතා කරන හේතුවක් තිබුණේ නැත. ඉක්මන් වගා ක්‍රම, වැඩි අස්වැන්න සහ ලැබෙන අස්වැන්න ආරක්ෂා කර ගැනීමට ලෝක ව්‍යාප්ත සැලසුම් සකස්වීම තුළ එක සාධකයක් තිබුණි. අවශ්‍ය තරමට ආහාර නිපදවීමය. කුස ගිනි නිවන පිලිවෙලක් රහිත තැනක වස විස නැති ගොවිතැන තුළ ප්‍රශ්න මතුවිය හැකිය.
කෘෂිකර්මය ගැන කරන පර්යේෂණ නතර වී නැත. නවීන තාක්ෂණය එකතුවෙමින් තිබේ. නියැදි පරීක්ෂාකර අවශ්‍ය ප්‍රමාණයට පොහොර යොදවයි.

රසායනික ද්‍රව්‍ය අඩු කරනු සඳහා හරිතාගාර වල වගා කෙරේ. ක්ෂුද්‍ර ජීවීන් යොදවා අවශ්‍ය තරමට පෝෂණය සැපයෙන ක්‍රම සොයා ගෙන ඇත. දියර මාධ්‍යවල වගාව ද වානිජ මට්ටමින් කරගෙන යයි. මහල් නිවාසවල පමණක් නොව සාගරයේ ද වගා කරන තරමට අලුත් සොයාගැනීම් හඳුන්වා දී තිබේ. ගොවිපොල මෙහෙයුම් සම්පූර්ණයෙන්ම පරිගණකයකට භාර දිය හැකි තරමට දියුණුවක් ඇත. ජලය, පොහොර නිසි මොහොතේ අවශ්‍ය ප්‍රමාණයට පමණක් සැපයෙන මෘදුකාංග භාවිතා කළ හැකි අන්දමට ආහාර නිෂ්පාදනය විප්ලවීය පරිවර්තනයකය.


රසායනික පොහොර භාවිතය අවම කරන සැලැස්ම නරක නැත. එහෙත් එම තීරණය සමග කෘෂිකර්මය ආපසු පැරණි තැනට යා යුතු නැත. පැරණි යුගයට ආපසු හැරවීම ඇතැම් පිරිසක ගේ උත්සාහය බව පෙනේ. ප්‍රතිපත්ති සම්පාදකයන් අලුත් පැති ගැන අවධානය යොමු කළ යුතුය. පස්වන පරම්පරාවේ සන්නිවේදනය සමග නවීන කෘෂිකර්මයට අවස්ථාව තිබේ. නිෂ්පාදනය අඩු නොවන අතර රසායනික භාවිතාව අඩු තාක්ෂණික ගොවිතැන රටට හඳුන්වාදීම සුදුසුය. දැනට ආනයනය කරන බාල තත්ත්වයේ පොහොර වෙනුවට ගුණාත්මක බවින් වැඩි විශේෂ තිබේ. ඒවා මිල වැඩිය. ඵලදායීත්වයෙන් ඉහළය.

අනෙක රට තුළ විශාල ඉඩම් ප්‍රමාණයක් වගා නොකර අත්හැර දමා තිබේ. තරුණ පෙල ගොවිතැනින් ඈත්වීම එයට එක හේතුවකි. තාක්ෂණික ක්‍රම හඳුන්වා දෙන අතර වෙනස් මානයකින් කෘෂිකර්මික කටයුතුවලට නැවත අවතීර්ණ කරන පියවරක් වෙනුවෙන් ආයෝජනය ඉතාම වැදගත් බව අවධාරණය කළ යුතුය.

කැබිනට්ටුවේදී එකගතාව පළකර එළියේදී ගැලරියට වීරයන්වීම

ප්‍රතිචාරයක් ලබාදෙන්න

2021/05/12 – ලංකාදීප

සෑම පුද්ගලයෙකුටම මතයක් දරන්නට අයිතියක් තිබේ. වෙනස් මත දැරීම සහ මත අතර එකගතාවයකින් තීරණ ගැනීම ප‍්‍රජාතන්ත‍්‍රවාදී පාලනය ක‍්‍රමයක හොද ලක්ෂණයකි. පාර්ලිමේන්තු ක‍්‍රමය ප‍්‍රජාතන්ත‍්‍රවාදය ශක්තිමත් කරයි. මැතිවරණයක  දී ඡන්දය පාවිච්චි කරන ජනතාව සිය නියෝජිතයෝ පාර්ලිමේන්තුවට පත් කරති. මහජන නියෝජිතයා ගේ වගකීම ඡන්ද දායක, ජනතාවගේ අභිමතාර්ථ සාක්ෂාත් කිරීමය. බලයට පත්වන ආණ්ඩුව කැබිනට් ඇමැති මණ්ඩලයක් පත් කරගනී. රට පාලනය කිරීමේ භාරධුර වගකීම කැබිනට් මණ්ඩලයට පැවරේ. මහජන නියෝජතියන්ට හා කැබිනට් මණ්ඩලයට ඓතිහාසිකව පැවැරුණ කාර්ය භාරයක් ඇත.

අද මෙරට මහජන නියෝජිතයන්ගේ ක‍්‍රියා කලාපය සම්බන්ධයෙන් ප‍්‍රශ්න තිබේ. මහජන නියෝජිතයා වශයෙන් ජනතා අදහස් අනුව කටයුතු කරන්නේ ද යන්න සලකා බැලියයුතු මුලික කරුණකි. බහුතරයක් මහජන නියෝජිතයෝ පාර්ලිමේන්තුවට පත් වූ පසු ජනතාව ගැන තකන්නේ නැත. පාර්ලිමේන්තු විවාදයක දී කතා කරන්නේ පුද්ගලික අදහස් අනුවය. පණතකට ඡන්දය දෙන්නේ ජනතා නියෝජිතයා බව සහමුලින්ම අමතක කරමින් බව පෙනේ. ඇමැති මණ්ඩලය සතු පිලිවෙල වෙනස්ය. සාමුහික වගකීමකින් බැදී සිටී. ප‍්‍රජාතන්ත‍්‍රවාදී උසස් සම්ප‍්‍රදායයන් ඇති අතර ඒවා මැනැවින්  ආරක්ෂා කළ යුතුය. කැබිනට් මණ්ඩල සාකච්ඡාවක දී විවිධ අදහස්, නොයෙක් තර්ක හා පුද්ගලික අභිප‍්‍රාය හෙළි කළ හැකිය. එහෙත් කැබිනට් තීරණයක් ගැනීමෙන් පසු එය කැබිනට්මණ්ඩලයේ තීරණයකි. රජය නියෝජනය කරන ඇමැති මණ්ඩලය තීරණය වෙනුවෙන් පෙනී සිටිය යුතුය. කැබිනට් මණ්ඩලයේ දී අනුමත වන තීරණයකට එතැනින් බැහැරට පැමිණ වේදිකාවේ දී හෝ මාධ්‍ය කැමරාව ඉදිරියේ අනෙක් වීරත්වයක් පළ කිරීම නුසුදුසුය.

ශ‍්‍රී ලංකාවේ පළමු කැබිනට් මණ්ඩලය සාමුහික වගකීම ගැන කදිම ආදර්ශයකි. එම කැබිනට් මණ්ඩලයේ ලේකම්වරයා වශයෙන් කටයුතු කළ බර්නාඞ් පී. පෙරේරා මහතා සිද්ධි මතක සටහන් ඇතුලත් කර කෘතියක් සම්පාදනය කර තිබේ. එක තැනෙක කැබිනට් මණ්ඩලය තුළ තිබිය යුතු විනය ගැන සිද්ධියක් සදහන්ය.

ඞී. එස්. සේනානායක අගමැතිවරයා ගේ වෙළද හා වානිජ ඇමැතිධුරය හෙබවූයේ සී. සුන්දරලිංගම් මහතා ය. කැබිනට් රැස්වීමට එන ඇමැතිවරයා බොහෝ අවස්ථාවල තීරණ වලට විරුද්ධත්වය පළ කරයි. එතැනින් නතර නොවන ඔහු විරුද්ධත්වය සටහන් කරන සේ තමන්ට දන්වන ලද බව මතක සටහන් ලියන බර්නාඞ් පී. පීරිස් මහතා ලියා තිබේ. එවැනි විරෝධතා සටහන් කැබිනට් සටහන්වලට ඇතුලත් නොකළ අතර එක අවස්ථාවක ඒ ගැන ලේකම්වරයාගෙන් ප‍්‍රශ්න කර ඇත. අයිවන් ජෙනිංග්ස් රචිත කෘතියකට අනුව කැබිනට් මණඩලය තීරණයක් ගත් පසු සියළු දෙනා එම තීරණය අනුව පාර්ලිමේන්තුවේ හා එයින් පිටත සාමුහික වගකීමකින් කටයුතු කළ යුතු බව උපුටා දක්වා තිබේ. සුන්දරලිංගම් මහතා එයට එකග වී නැත. ජෙනිංග්ස් ගේ අදහස් ‘‘යල් පැන ගිය ඒවා’’ බව කියා තිබේ. එය අනුමත නොකළ අගමැතිවරයා ජෙනිංග්ස් ගේ පූර්වාදර්ශය අනුව ක‍්‍රියාකරන සේ දැනුම් දී ඇත. පසුව පාර්ලිමේන්තුවේ දී සිද්ධියක් වී ඇති බව දක්වන ලේකම්වරයා දිනක් හැන්දෑවේ සිය දුරකථනයට කතා කළ අගමැතිවරයා සුන්දරලිංගම් මහතා කැබිනට් මණ්ඩලයෙන් ඉවත් කරන ලිපිය කෙටුම්පත් කරන සේ නියම කර ඇත. පසුව සොයා බැලීමේ දී පාර්ලිමේන්තු ඡන්ද විමසීමේ අවස්ථාවක අදාල ඇමැතිවරයා පාර්ලිමේන්තුවෙන් බැහැර සිට ඇති අතර ඡන්දය ප‍්‍රකාශ කිරීමෙන් වැලකී ඇත.

පුද්ගලික මතය එකකි. මහජනතාව නියෝජනය කරන මන්තී‍්‍රවරයෙකුට ජනතාවගේ හඩ ඉදිරිපත් කළ හැකිය. කැබිනට් සම්ප‍්‍රදාය අනෙකකි. එහි සාමූහික වගකීමක් තිබේ. එය කිසි දිනක කල් ඉකුත්වන සංකල්පයක් නොවේ. කැබිනට් මණ්ඩලයේ දී එකගවන කරුණකට එයින් බැහැර වෙනත් මතයක් කතා කිරීමට අයිතියක් නැත. එය රජයේ සිටිමින් රජය විවේචනය කිරීමකි. මෙවැනි සිද්ධි පාර්ලිමේන්තුවේ සහ කැබිනට් මණ්ඩලයේ කීර්තිමත් ඉතිහාසය තුළ සටහන්ව ඇත.

ඉතිහාසයෙන් උගන්වන පාඩම් තිබේ. ඇතුලේ දී එකක් කියන ඇමැතිවරු පිටතට පැමිණ අනෙක් කාරණයක් කියන අවස්ථා තිබේ. වීරයන් විය හැකිය. ඡන්ද පදනම ආරක්ෂා කරගන්නට ද බැරිකමක් නැත. සාමුහික වගකීමෙන් ගැලවෙන්නට තැත් කිරීම යුක්ති සහගත නැත. එවැනි පියවරක දී කැබිනට් තීරණයක වලංගු භාවය ගැන ප‍්‍රශ්න මතුවෙයි. ආණ්ඩුව අපහසුතාවයට පත්වෙයි. ඇමැති මණ්ඩලයේ සාමාජිකයන් සිය වගකීම ගැන හිතන්නට අවශ්‍යය. නිදහසින් පසු පළමු ආණ්ඩුවේ කැබිනට් මණ්ඩලය සම්බන්ධයෙන් ඞී. එස් සේනානායක මහතා ගත් තීරණ අදටත් පූර්වාදර්ශයකි.

රසායනික පොහොර : දෙවරක් හිතා බලමු

ප්‍රතිචාරයක් ලබාදෙන්න

2021/05/05 – ලංකාදීප

වෙසක් මාසය බොදුනුවන්ට වැදගත් කාල පරිච්ඡේදයකි. සංකීර්ණ සමාජ පැවැත්ම තුළ බුද්ධ දර්ශනය මග පෙන්වීමකි . දහම පෙන්වා දෙන ප‍්‍රායෝගික පැති අනුගමනය කළ යුතුය. අන්තවාදයෙන් පලක් නැත. මැද පිලිවෙත වැදගත්ය. සියළු සැප සම්පත් අත්හැර දැමූ සිදුහත් බෝසතාණෝ සත්‍ය අවබෝධ කර ගැනීමට දරන උත්සාහ යේ දී තමන් අසලට වැටෙන දෙයක් හැර යමක් ආහාරයට නොගන්නට තීරණය කළහ. එය අන්තවාදී පියවරකි. මහත් දුෂ්කර තත්ත්වයකට පත්විය. අධික සැප හෝ අධික දුක පලක් නැති බව පසුව වටහා ගත්හ.

එදිනෙදා ජීවිතයේ සියළු තීන්දු තීරණ වල දී මැද පිලිවෙත සුදුසුය. අන්තවාදී විය යුතු නැත. පුද්ගලයන්ට පමණක් නොව රටකට ද පිලිවෙලක් තිබේ. ආර්ථික, සමාජ හා විදේශ ප‍්‍රතිපත්ති වල දී ප‍්‍රායෝගික විය යුතුය. මධ්‍යස්ථව ක‍්‍රියා කිරීම අවශ්‍යය. මෑත කාල පරිච්ඡේදය තුළ අන්තවාදී තීරණ ගණනාවක් රජය ගෙන තිබේ. එම තීරණ ගැනීමට බලකරන පසුබිම තේරුම් ගැනීම අපහසු නැත. සමාජය තුළ නොයෙක් තර්ක විතර්ක තිබේ. අනන්‍ය මතවාද ඇත. තාර්කිකත්වය තීන්දු ගැනීමට එකම හේතුවක් නොවේ. දත්ත එකතුකර ඒවා විශ්ලේෂණය කළ යුතුය. පර්යේෂණාත්මකව නිගමනයකට එළැඹිය යුතුය. බුද්ධ චරිතය හොද ආදර්ශයකි. ලෝක ඉතිහාසය පාඩම් උගන්වා තිබේ. නිදහස ලැබීමෙන් පසු ගත වූ කාලය තුළ ශ‍්‍රී ලංකාව අනුගමනය කළ ප‍්‍රතිපත්ති වලින් අත්පත් කරගත් වාසි අවාසි අමතක කළ යුතු නැත.

වස විස නැති ආහාර නිෂ්පාදනය අරමුණු කර පොහොර හා රසායනික ද්‍රව්‍ය භාවිතා කිරීම සම්පූර්ණයෙන් නතර කරන තීරණයක් ගෙන ඇත. එයට පක්ෂ පිරිසක් සිටිති. ස්වභාවික ජීවන රටාවකට අනුගත වුවහොත් සියළු ප‍්‍රශ්න වලට විසදුමක් ලැබෙන බව විශ්වාස කරති. එය අසත්‍යයක් නොවේ. සියළු කෘතීම දේ අතහැර පැරණි සමාජ ව්‍යුහයට ඇතුළු විය හැකි නම් එයින් සැපතකි. එහෙත් අප ඇතුළු වී සිටින යුගය අසමාන අවකාශයකි. වැඩිපුර නිපදවන්නට සිදුවූ හේතුව අවබෝධ කරගත යුතුය. ජනගහනය වැඩි වී තිබේ. ඉඩම සීමිතය. කෘෂිකර්මයෙහි නිරතවන පිරිස සුළු කොටසකි. මහා පරිමානයෙන් නිපදවිය යුතු අතර තමන්ට පමණක් නොව වෙළද පොල සදහා ද නිපදවන්නට සිදුවී තිබේ. වැටකොටු බැද, කාබනික පොහොර භාවිතා කර සහ කෘමි හානි වලට කෙම් ක‍්‍රම අත්හදා බලා කරනන නිෂ්පාදනය ජනගහනයේ අවශ්‍යතාවට ප‍්‍රමාණවත් නැත. ලෝක ආහාර සංවිධානය පවා ඇතිවිය හැකි ආහාර හිගය ගැන කල්පනා කරන අතර දැනට ආහාරයට නොගන්නා කෘමීන් හා ශාඛ කොටස් පවා මිනිස් ආහාරය සදහා සුදුසු බව නිල වශයෙන් ප‍්‍රකාශයට පත් කළේය. ගොඩබිම නිපදවන ආහාර ප‍්‍රමාණවත් නොවන පසුබිම තුළ පස් රහිතව පමණක් නොව මහ මුහුදේ පවා වගා කරන තැනට යොමු වී සිටී. එවැනි පියවර වෙනුවෙන් රසායනික යෙදවුම් හා තාක්ෂණික ක‍්‍රම භාවිතා කරන බව නොරහසකි. වැඩි අස්වැන්නක් සහ අඩුම මිලට පාරිභෝගිකයා අතට ආහාර දෙන අරමුණ සියළුම පර්යේෂණවල ඉලක්කය වී තිබේ.

වස විස නැති ආහාර වලට රට තුළ වෙළද පොලක් තිබේ. එය මහා පරිමාන එකක් නොවේ. දැනට වෙළද පොලෙහි අලෙවි කරන කාබනික සහල්, එලවලූ හා පලතුරු වල මිල ගණන් සලකනවිට සාමාන්‍ය ජනතාවට ඒවාට අත පෙවිය නොහැකිය. බහුතරයක් ජනී ජනයා වස විස සහිතනමුත් අඩු මිලට ඇති සාමාන්‍ය නිෂ්පාදන පරිභෝජනය කරති. මෙම දෙපැත්තටම ඉඩ දීම රජයේ ප‍්‍රතිපත්තිය විය යුතුය.

කහ ආනයනය නතර කළේය. ෆාම් ඔයිල් ගෙන්වීම තහනම් කර ඇත. සාමාන්‍ය ජනතාව මෙම තීරණ වලට වන්දි ගෙවමින් සිටිති. කහ කිලෝවක හෝ පොල්තෙල් බෝතලයක මිල සලකන විට සාමාන්‍ය ජනතාව අසරණ වී ඇති තරම ගැන කල්පනා නොකරන්නේ ඇයි? රට තුළ පොහොර හෝ රසායනික ද්‍රව්‍ය තහනම් කරන අතර පිටරටවලින් ආනයනය කරන විට එම නිෂ්පාදන වස විස නැති බවට ලැබෙන සහතිකය කුමක්ද? පොහොර ආනයන වියදම ඉතිරි කරගෙන එය කොම්පෝස්ට් මිල දී ගැනීමට සහනයක් වශයෙන් ගොවියන්ගේ අතට ලබා දිය හැකිය. රට තුළ නිෂ්පාදනය අඩුවන විට හිගය පියැවීම සදහා ආනයනය සදහා විනිමය ලැබෙන්නේ කොතැනින්ද? පියවරෙන් පියවර ගත යුතු තීරණ වහාම ක‍්‍රියාවට නැගීමෙන් ප‍්‍රශ්න ඇතිවෙයි. ජාතික ප‍්‍රතිපත්ති සකස් කිරීම සුදුසුය. පොහොර හා රසායනික ද්‍රව්‍ය ගෙන්වන ඒවා අලෙවි කර යැපෙන විශාල පිරිසක ගේ පවා රැකියා අනතුරකය. මෙවැනි ප‍්‍රශ්න වලට විසදුම් සෙවීම පහසු නැත.

එක මිටට රටම එකතුවිය යුතු මොහොත

ප්‍රතිචාරයක් ලබාදෙන්න

2021/04/28 – ලංකාදීප

කොවිඞ් වයිරසය තවත් වටයකින් තර්ජනාතමක ප‍්‍රහාරයක් එල්ල කරමින් සිටී. ලෝකයේ සියළුම රටවල් තෙවැනි හෝ සිව්වැනි රැුල්ලක් ගැන භීතියකින්ය. විශාල වශයෙන් රෝගීන් වාර්තා වෙමින් තිබේ. ජීවිතක්ෂයට පත්වන ප‍්‍රමාණය වසංගතයෙහි බරපතලකම අගවයි. ඉතාම බලවත් රාජ්‍යයන් පවා අසරණ වී සිටී. ඉන්දියාව මුහුණ පා සිටින තත්ත්වය එයට එක උදාහරණයකි.

විද්‍යාව හා තාක්ෂණය දියුණු කාලවකවානුවකි. අලූත් පර්යේෂණ සිදුවෙයි. ජන ජීවිතය ඉතාම සංකීර්ණ යුගයකට අවතීර්ණවනු ඇති බවට මත පළ වී තිබුණි. එහෙත් ඇසට නොපෙනෙන කුඩා වෛරසයක් ස්වභාවය විකෘති කර තිබේ. රටවල් ගණනාවක්, පර්යේෂණ අංශ සෑහෙන සංඛ්‍යාවක් එකතු වී එන්නත් සොයාගෙන ඒවා තෝරා ගත් ජන කොටස් වලට ලබා දෙන අතරවාරයේ පවා ඉතාම නරක තොරතුරු අසන්නට ලැබීම ඛේදවාචකයකි. වෛරසය අලූත් මුහුණුවර ගෙන තිබේ. විවිධ ප‍්‍රභේද හදුනාගෙන ඇත. නොබෝදා වාර්තා වූ පරිදි රෝගියෙකුගෙන් පිටතට එන රෝගකාරක වෛරසය සාමාන්‍ය පරිසරයේ පැය ගණනක් සක‍්‍රීයව පවතින අතර නිරෝගී පුද්ගලයෙකු ආසාදනය විය හැකි අවදානම නොදන්නා තරමකින් ඉහළ ගොස් තිබේ. ජන සමාජයේ සියළුම දෙනා අනතුරක අබියස බව සදහන් කළ යුතුය.

ඉකුත් අවස්ථා දෙකක දී ශ‍්‍රී ලංකාව මනා පැවැත්මකින් පසු කොවිඞ්-19 වයිරසය පාලනය කරගන්නට සමත්විය. සෞඛ්‍ය පද්ධතියට දරාගත හැකි තරමට සිද්ධි වාර්තා වූ අතර සමාජ දුරස්ථකරණය පවත්වාගෙන නිසි පිලිවෙත් අනුගමනය කිරීම එයට හේතු වූ බව නොරහසකි. වර්තමානයේ පවතින ස්වභාවය ගැඹුරින් සලකා බැලිය යුතුය. අභියෝගයට මුහුණදීම සදහා එක මිටට එකතු විය යුතුව තිබේ. තත්ත්වය පාලනය කිරීම සෞඛ්‍ය කාර්ය මණ්ඩලයට පමණක් කළ හැකි දෙයක් නොවේ. කොවිඞ් වසංගතය පාලන විශේෂ කාර්ය බලකායක් පිහිටුවා ඇත. ති‍්‍රවිධ හමුදාව හා පොලිසිය එහි දී කැපවීමෙන් කටයුතු කරමින් සිටී. ජනතාවගේ අවශ්‍යතා වෙනුවෙන් රජය විශේෂ සැලකිල්ලකින් ක‍්‍රියාත්මක වෙයි. සමාජ සංවිධාන සහ දේශපාලන පක්ෂ නොයෙක් ආකාරයෙන් සහාය වන බව නිරීක්ෂණය කළ හැකිය. ජන මාධ්‍ය වටිනා සන්නිවේදන මෙහෙවරකය. විදේශ රටවලින් ලැබෙන සහාය ද අස්වැසිල්ලකි.

පවතින තීරණාත්මක අවස්ථාවේ දී එක මිටට, එක බලවේගයකට එකතු විය යුතුය. රට තුළ පවතින විපත දේශපාලන වාසි ලබා ගැනීමට අවස්ථාවක් නොවේ. ආණ්ඩුව, විපක්ෂය හා සියළුම දේශපාලන පක්ෂ සිය නායකත්වය එක අරමුණකට ගොනු කළ යුතු අතර වසංගතයෙන් ගලවා ගැනීම එකම ඉලක්කය කරගත යුතුය. මුහුණු ආවරණ පැළැද සිටීම, නිතර අත සෝදා ගැනීම, පොදු ස්ථාන වල සමාජශීලී එකතුවීම් නතර කිරීම යනාදියෙන් සෑහෙන ප‍්‍රයෝජන අත්පත් කරගත හැකි බව සදහන් කළ යුතුය. වෛරසය මැඩ පැවැත්වීම සදහා අවශ්‍ය අවම කළමණාකරණය සදහා ජන ජීවිතය නැඹුරු කරන ස්ථිර එක පණිවුඩයක් සියළු පක්ෂ එකතුවකින් එක හඩකින් නිකුත් කිරීම කාලීන අවශ්‍යතාවයකි. සියළු බෙදීම් අමතක කළ යුතුය. අඩුපාඩු හා විවේචන වලට අවස්ථාවක් පසුව ලබාගත හැකිය.

ආගමික, දේශපාලන සහ සමාජ නායකයන් එකට එකතු වී අවබෝධයකින් කි‍්‍රයා කළ යුතු මොහොත අත් හැරිය යුතු නැත. ප‍්‍රතිවාදී කදවුරු වෙත එල්ල කරන ප‍්‍රහාර තාවකාලිකව නතර කරන අතර සියළු වෙඩි මුර ජනතාව දැනුම්වත් කරන තැනට එල්ල කළ යුතුය. සමාජ මාධ්‍ය සහ සම්ප‍්‍රදායික මාධ්‍ය සම්බන්ධ කරගැනීම අවශ්‍යය. වෛරී සහගත ආකල්ප අත්හැරීමටත්, නොසැලකිල්ලෙන් ක‍්‍රියා කරන ජන කොටස්වලට නිසි පිලිවෙල දැක්වීමත් බලවත් අවශ්‍යතාවයකි. සෞඛ්‍ය කාර්ය මණ්ඩලවලට සහායවන අතරවරයේ ජනතාව ගලවා ගන්නා එක බලවේගයක් රට තුළින් නිර්මාණය කරගතහොත් ශ‍්‍රී ලංකාවට තීරණාත්මක සහ වාසිදායක අවකාශයක් සකස්වනු ඇත. රට සහ ජනතාව ගලවා ගන්නා එවැනි විශිෂ්ඨ අරමුණක් සදහා අප සියළුම දෙනාට අවශ්‍යකරන්නේ බලවත් ආත්ම ශක්තියක් පමණකි.

සමාව ගන්න වගේම දෙන්නත් ධෛර්යයක් ඕනෑ

ප්‍රතිචාරයක් ලබාදෙන්න

2021/04/21 – ලංකාදීප

බි‍්‍රතාන්‍ය යේ පිලිප් කුමාරයා අවසන් ගමන පසුගිය සතියේ ජගත් ප‍්‍රජාවගේ අවධානයට ලක් විය. අයිරිශ් ත‍්‍රස්තවාදීන්  කළ බව කියන ඝාතනයක් සම්බන්ධයෙන් රජ පවුලෙන් සමාව ඉල්ලන ප‍්‍රකාශයක් ද ලොව පුරා විකාශය විය. පිලිප් කුමාරයා ගේ ඥාතියෙකු වන ලෝඞ් මවුන්ට්බැටන් මෙහි දී ඝාතනය විය. එය සිදුවූයේ 1979 වසරේ දීය. පිලිප් කුමාරයා ගේ ඥාති මාමා සහ තවත් දෙදෙනෙකු දුර සිට පුපුරුවා හරින ලද බෝම්බයකින් ජීවිතක්ෂයට පත් වූ අතර එය රාජකීය හමුදාව උතුරු අයර්ලන්තයේ කරන හිංසනකාරී සිද්ධිවලට උත්තරයක් බව අයිරිශ් ත‍්‍රස්තවාදීහු කියා සිටියහ. දෙවැනි ලෝක යුද්ධයේ දී මවුන්ට්බැටන් සාමිවරයාගේ කාර්ය භාරය කැපී පෙණින. ඉන්දියාවේ සිට මිත‍්‍ර පාක්ෂික පෙරමුණ මෙහෙයැවීය. ඔහු ගේ ජීවිතය ඉලක්ක කිරීම අයිරිශ් ත‍්‍රස්තවාදීන්ට වාසියකි.  

බි‍්‍රතාන්‍යයෙන් වෙන්වන උවමනාවක් සෑහෙන කාලයක සිට උතුරු අයර්ලන්තයට තිබුණි. එය පළමුවෙන් අරගලයක ස්වරූපය ගත්තේය. පසුව ත‍්‍රස්තවාදී ක‍්‍රියාවල නිරත වුහ. 1969 දී අයි. ආර්. ඒ. සංවිධානය බිහි වී තිබේ. වඩාත් සංවිධානාත්මකව බි‍්‍රතාන්‍ය සමග ගැටුම් ඇති කරගත් බව සදහන්ය. කෙසේ වෙතත් අයිරිශ් ත‍්‍රස්තවාදීන්ට ගමන් කළ හැකි සීමාවක් තිබුණි. 1980 දී පමණ කාල වකවානුවේ දී සටන් නතර කරන ලද අතර මැතිවරණ වලට තරගකරන ප‍්‍රජාතන්ත‍්‍රවාදී ප‍්‍රවාහයට එකතුවිය. අයිරිශ් ත‍්‍රස්තවාදීන් සම්බන්ධ දේශපාලන පක්ෂයක ප‍්‍රධානියෙකු වූ මේරි ලෝරිස් මහත්මිය ලන්ඩන් නගරයේ ගුවන් විදුලි සේවාවක වැඩසටහනකට සහභාගීවෙමින් පැරණි සිද්ධිය මතක් කළ අවස්ථාවේ දී එම සිදුවීම ගැන කණගාටුව පළ කර ඇති බව අනාවරණය වෙයි. එය සිත කම්පා කරවන සුළු සිද්ධියක් බව ප‍්‍රකාශ කර ඇති ඇය මෙවැනි දුක්මුසු සිදුවීම්වලට මුහුණ පා සිටින දරුවන්, දරුපවුල් සිටින අතර එය ගැටුම් සහිත පරිසරයක විය හැකි දේ බව දක්වන්නීය’. පැරණි දේ නැවත සිහිපත් කරමින් සිටින යුගය අවසන් වන අතර යුද්ධය අවසන්වීම ගැන සතුටු වන බව ද දක්වා ඇත.

ෂින් ෆෙයින් යන උතුරු අයර්ලන්ත දේශපාලන පක්ෂයේ නායිකාව වන මේරි ලෝරිස් අයිරිශ් රිපබ්ලික් හමුදාවට සම්බන්ධව සිටි බව පැහැදිලි නමුත් පසුව තරුණ ජන කොටස්වල කැමැත්ත සහිතව දේශපාලන ව්‍යාපාරයක් ගොඩනගා ගෙන ඇත. ඇය ගේ ප‍්‍රකාශය බි‍්‍රතාන්‍ය දේශපාලනය තුළ හොද හිත දියුණු කර ඇති අතර පැරණි වේදනාව සමනය කර අලූත් යුගයකට ඇතුළුවන ස්වර්ණමය අවකාශයක් නිර්මාණය කරන්නට සමත්ව තිබේ.

අප හැම දෙනාගේම සිත් තුළ පැල්ලම් තිබේ. ලෝකයේ හැම රටකම අවුස්සා බැලිය හැක අහු මුළු ඇත. ඒවා හෙළිදරව් කිරීමෙන් අනාගතය සාක්ෂාත් වෙන්නේ නැත. අතීතයේ සිදුවීම් පාඩමක් කරගත යුතු අතර දැවෙන සිත් සනහා සුවපත් කරන පියවර වෙනුවෙන් නිර්භීත තීන්දු ගත යුතුව ඇත. කණගාටුව පළ කර සමාව ඉල්ලා සිටීම පමණක් නොව සමාවදෙන්නට තීන්දු කිරීම ද එහි දී ඉතාමත් වැදගත්ය.

ශ‍්‍රී ලංකාවේ ජන සමාජය තුළ අමතක නොවන අවස්ථා ගණනාවක් තිබේ. මේවායේ වේදනාව තවමත් නොයෙක් අවස්ථාවල මතුවෙයි. කදුළුවලින් පමණක් සියල්ල අමතක කළ නොහැක. වරද හා වරදට හේතුව ඉතාම ඉවසිල්ලකින් ප‍්‍රකාශ කරන ශක්තිමත් හදවත් අපට අවශ්‍යය.

නිදහස ලැබීමෙන් පසු ගත වූ කාලය තුළ සිද්ධි දෙස ආපසු හැරී බැලිය හැකිය. දරුවන්ට දෙමාපියෝ අහිමි වී තිබේ. දරු පවුල්වල සිටි ධෛර්යය සම්පන්න සාමාජිකයා අතුරුදහන් වී ඇත. ආරක්ෂක අංශ වල සාමාජිකයෝ ජීවිත පරිත්‍යාගයෙන් රාජ්‍ය ආරක්ෂා කරගෙන තිබේ.  විප්ලවය හෝ ත‍්‍රස්තවාදය යන කවර හැදින්වීමක අවසානයේ දී පවා මනුෂ්‍ය ජීවිත සමග කරන ගැටුමකි. අහිමිවූයේ මිනිස් ජීවිතයකි. අරගලය මර්දනය කළ ආරක්ෂක අංශ පළමුවෙන් සමාවගත යුතු බව තර්ක කරති. රාජ්‍ය විරෝධීව හැසිරී ඇති පිරිස මුලින් සමාව ගත යුතු බව රජයේ බලධාරීන්ගේ මතය වී තිබේ. රටට අවශ්‍ය කැලැල් දක්වා උණ්ඩය හමා පැමිණි පැත්තට නැවත නැවතත් වෛර කරන ක‍්‍රමයක් නොවේ. පාපෝච්ඡාරණයකින් පසු අලූත් හුස්මකින් හදවත් පුරවාගෙන ගමන ආරම්භ කිරීමය. බි‍්‍රතාන්‍ය රජ පවුලේ සාමාජිකයෙකු ඝාතනය කිරීම ගැන කණගාටුව පළ කිරීම එක යහපත් ආරම්භයකි. සමාව ගැනීමට පමණක් නොව සමාව දෙන්නට ද සූදානම් ජන සමාජයකින් අනාගතය පැහැබර වනු නිසැකය. මමත්වය තුනීකරන පියවරකින් පුලූල් අධ්‍යාත්මයක් බිහිවෙයි.

අඩසියවසක් ගියත් එකතැන පල්වෙන ප්‍රශ්න

ප්‍රතිචාරයක් ලබාදෙන්න

2021/ 04 /07 – ලංකාදීප

 

අරගල, කැරැළි සහ සටන් රටට නුහුරු සිද්ධි නොවේ. අධිරාජ්‍යවාදීන් රට යටත් කරගැනීමට උත්සාහ දරන කාල වකවානුවේ එයට විරුද්ධව අභීත සිංහලයෝ සටන් කළහ. අධිරාජ්‍යවාදීන් පැමිණීමට කලින් ආක‍්‍රමණ පැවැති බව ඉතිහාසය දක්වයි. විජාතික පිරිස් මෙරටට පැමිණ ගැටුම් ඇති කරගෙන තිබේ. කාලිංඝ මාඝ, චෝල ආක‍්‍රමණ, ලන්දේසි, පෟතුගීසි සහ ඉංග‍්‍රීසි අධිරාජ්‍යවාදීන්ට එරෙහිව ලාංකිකයෝ සටන් කර ඇත. 1971 කැරැල්ල නිදහසට පසු ශ‍්‍රී ලංකා වංශ කතාවේ සනිටුහන් වන එක සන්ධිස්ථානයකි. වසර පනහකට පසු ජනතා විමුක්ති පෙරමුණේ පළමු කැරැල්ල සම්බන්ධයෙන් පවතින ආකල්ප කෙසේ වෙතත් රට ගමන් කළ යුතු දිසාව ගැන හිතන්නට අවස්ථාවකි.

1971 කැරැල්ලෙන් රටට අහිමිවූ ධෛර්යවන්ත  වටිනා ජීවිත ගැන මෙනෙහි කළ යුතුය. එවකට පැවැති ආණ්ඩුව කැරැල්ල මැඩ පවත්වන ලද අතර අපරාධ යුක්ති විනිශ්චය කොමිසම පිහිටුවා රජයට විරුද්ධව කුමන්ත‍්‍රණ කිරීමේ චෝදනාව යටතේ නඩු පැවැරීය. දඩුවම් නියම කරන ලද නමුත් පසුව බලයට පැමිණි ජේ. ආර්. ජයවර්ධන ආණ්ඩුව වරදකරුවන් නිදොස් කොට නිදහස් කළේය. නැවත දේශපාලනයට පැමිණෙන අයිතිය ලබා දුන්නේය. 1987 දී ජනතා විමුක්ති පෙරමුණ දෙවන වතාවටත් අවි ආයුධ අතට ගත්තේය. දකුණේ අරගලය තිබිය දී උතුරේ ද සන්නද්ධ අරගලයක් හට ගත්තේය. දකුණ මර්දනය කළ ආණ්ඩුව තරුණ අසහනයට හේතු සොයන කොමිසමක් ද පත් කළ අතර තරුණන්ට අවස්ථා ලැබිය යුතු බව කොමිසම නිර්දේශ කළ එක වැදගත් කරුණකි. උතුරේ සටන් ත‍්‍රස්තවාදයක් දක්වා පැතිරිණ.  අහිංසක ජීවිත විශාල ප‍්‍රමාණයක් බිලිගත් සහ ආර්ථිකය අඩාල කරන ලද උතුරේ ත‍්‍රස්තවාදය සහමුලින්ම තුරන් කරන්නට සමත් වූ නමුත් එය ඇති කරන්නට හේතු වූ මුලික කරුණු වලට විසදුමක් දෙන්නට සමත් වී නැත.

තරුණ අසහන කොමිසමේ නිර්දේශ අමතක කර ඇති අප සියළු දෙනා උතුරේ ත‍්‍රස්තවාදයට ගත යුතු පියවර ද පමාකරමින් සිටී. එවැනි පසුබිමක් තිබිය දී  ජාතීන්, ආගම් හා වෙනත් පදනම් මුල් කරගනිමින් ආවේගශීලී අවස්ථා තව දුරටත් පැන නැගෙන ප‍්‍රවණතාවක් පවතින බව පෙනේ. පාස්කු ඉරිදා ප‍්‍රහාර මාලාව එහි තවත් පැත්තකි. මෙවැනි සිද්ධි වලින් තහවුරු කරන එක වැදගත් කාරණයක් තිබේ. ජීවත්වන අප සියළු දෙනා රටට අහිමි වූ ජීවිත වලින් අනාගතය සුරක්ෂිත කරගෙන සිටී. ක‍්‍රමය වෙනස් කර සාධාරණය ඉශ්ඨ කරන ලෙස කෑගසා කියන සෑම අවස්ථාවකදීම මර්දනය දියත් කර ඇත. සෑම වසර දහයකට පහලොවකටම වතාවක්, අලූත් පරම්පරාව මට්ටම් කිරීමෙකින් පැවත්ම ආරක්ෂා කරගැනීමේ නරක ව්‍යුහය සහමුලින්ම අවසන් කරන්නට අවශ්‍යය. තරුණ අදහස්, සිතුම් පැතුම් තේරුම් ගෙන සමාජ ක‍්‍රමය වෙනස් කළ යුතුය. තාක්ෂණික යුගයට රට ඇතුළු වී තිබේ. සිදුවන දේ රහසක් නොවේ. අභ්‍යන්තරය දැනගෙන එයට වෛර කරන සමාජයකින් රටක් ඉදිරියට ගෙන යා නොහැක.

දරුණු පංති ප‍්‍රශ්නයක් රට තුළ තිබේ. ජාතිය, ආගම, කුලය, ඉගෙන ගන්නා පාසල ආදි වශයෙන් බෙදී ඇත. දුප්පත් පොහොසත් බේධයක් තිබේ. ඇති නැති පරතරය මතු පිටින් පෙනෙන ස්වභාවයට වඩා දරුණුය. සමාන අවස්ථා නැත. දේශපාලන බලය සමාජයේ සෑම ස්ථරයකටම පැතිරී තිබේ. දේශපාලන බලපෑමකින් තොරව යමක් කරගත නොහැකි බව හිතන සමාජය තුළ අස්වැසිල්ලක් තිබිය නොහැකිය. සංහි`දියාව ඇති කළ යුතු එක ජන කොටසකට පමණක් නොවේ. අප සියළු දෙනා තුළ සංහිදියාවක් ඇතිකරන තිරසාර වැඩ පිලිවෙලක් අවශ්‍යය. ක‍්‍රමය සාධාරණ බව පැහැදිලිව පෙනෙන තරමට  ජාතීන් අතර සංහිදියාවකට අවස්ථාව ලැබේ.

1971 තරුණ අරගලය සිහිපත් කරන මෙම අවස්ථාවේ දී අරගල කරන තරුණ පිරිස ගැන පමණක් නොව අරගලය වෙනුවට රට අතහැර යන තීරණය ගෙන ඇති පිරිස ගැන ද අවධානය යොමු කළ යුතුය. එය තවත් ප‍්‍රතිවිප්ලවයකි. විප්ලවයෙකින් අහිමි වන පමණක් නොව නිහඩවම රට හැර යන කොටස පවා අභාග්‍යයකි. ආණ්ඩුව, විපක්ෂය අනෙක් පිරිසක් නොව අප සියළු දෙනා මෙම පසුබිම ගැන වගකිව යුතුය. ආගමික නායකයන්, සමාජ නායකයන් ගැඹුරින් කල්පනා කර හැබෑ හේතුවිමසා එකගතාවයකට පැමිණීම අවශ්‍යය.

විදේශ ප‍්‍රතිපත්තියට දේශපාලනය ගෑවීම

ප්‍රතිචාරයක් ලබාදෙන්න

2021/03/31 – ලංකාදීප

  

රටවල් සමග සබදතා ශ‍්‍රී ලංකාවට වැදගත්ය. ලෝකයේ සියළුම රටවල් සමග විවෘතව කටයුතු කිරීමේ අවශ්‍යතාවයක් තිබේ. රටවල් අතර සම්බන්ධතා වල දී සංස්කෘතික, ආර්ථික සහ සමාජ ආදී වශයෙන් විවිධ පැති වලට ව්‍යාප්ත වෙයි. රටවල් අතර උවමනා එපාකම් අනුව සංකීර්ණ මුහුණුවරක් ගනී.

සිංගප්පූරුවේ ජ්‍යෙශ්ඨ රාජ්‍ය තාන්ත‍්‍රිකයෙකු වියට්නාමයේ විදේශ කටයුතු භාර ප‍්‍රධාන පෙලේ නිලධාරියෙකු ගෙන්, එක්තරා අවස්ථාවක දී බලවත් රටවල් සම්බන්ධයෙන් ඔවුන් අනුගමනය කරන විදේශ ප‍්‍රතිපත්තිය ගැන විමසා තිබේ. ආදර්ශයට ගත හැකි පිලිතුරක් ලැබී ඇත. ‘‘බලවත් රටවල් සමග ඉතාම සුහදව කටයුතු කළ යුතුය. රට වෙනුවෙන් පෙනී සිටිම අත්‍යවශ්‍යය. මෙම කරුණු දෙකම එකවර සාක්ෂාත් කළ යතුය. එකවර අනුගමනය කළ නොහැකි කිසිවෙකු නායකත්වයට නුසුදුසුය.’’  බලවත් රටවල් සමග සම්බන්ධකම් වල දී විවෘතව ක‍්‍රියා කළ යුතු අතර අවසාන අරමුණ රට වෙනුවෙන් බව මෙයින් අගවන වැදගත්ම පණිවුඩයයි.

මෑත කාලයේ ශ‍්‍රී ලංකාවේ විදේශ සම්බන්ධතා පසුබිම සංකීර්ණය. ශ‍්‍රී ලංකාවේ ආණ්ඩු ගන්නා සෑම පියවරක් පාසා පසුගිය කාලයේ ප‍්‍රශ්න ඇති වී තිබේ. නායකයන් තීරණ ගන්නේ රට වෙනුවෙන්ය. ඇතමෙකුට නොයෙක් කුමන්ත‍්‍රණ හෝ පාවාදීම් ඇත. ආණ්ඩුව ගන්නා තීරණය විපක්ෂයට නොගැලපේ. විපක්ෂය නගන අදහස් ජන සමාජය තුළ විරෝධාකල්ප ඇතිකරයි. විපක්ෂයේ සිට බලයට එන විට අනුගමනය කරන ප‍්‍රතිපත්ති වෙනස්ය. රටවල් අතර නොහොද නෝක්කාඩු ඇති කරන මෙවැනි සිද්ධි අනුචිතය. නායකයෝ රටවල් සමග සුහදව ක‍්‍රියා කළ යුතුය. එසේම එම සම්බන්ධතා රට වෙනුවෙන්ය. පටු පරමාර්ථ අනුව නොවේ.

රටවල් අතර හිත මිතුරුකම් ගැන ඉන්දියාවේ ප‍්‍රකට සදහනක් ද මෙහි ලා සදහන් කිරීම උචිතය. ඉන්දියානුවන් දක්වන පරිදි ‘‘අභ්‍යන්තර දේශපාලනය මුහුදු වෙරළින් අවසන්ය’’. රටින් බැහැර නිල අවස්ථාවක එරට නායකයන් ඉන්දියාවේ අභ්‍යන්තර දේශපාලන තීන්දු අනුව ස්වභාවය වෙනස් කරන්නේ නැත. එය වැදගත් පිලිවෙලකි. සංකීර්ණ සමාජ ආර්ථික වටපිටාවක් ඇති ඉන්දියාවට ලෝකයේ සෑම රටක් සමගම ගනුදෙනු කරන විලාසයක් තිබේ. අභ්‍යන්තරයෙහි ඇති මත වාද එහි ලා ගැඹුරින් අවධානයට ලක් නොකරන බව මෙයින් ඇගවෙයි.

වියට්නාමයෙන් හා ඉන්දියාවෙන් එන අදහස් ශ‍්‍රී ලංකාවට අනුගමනය කළ හැකි මාවත දක්වයි. බලවත් රටවල් සමග රාජ්‍ය තාන්ත‍්‍රික සම්බන්ධතා තහවුරු කරගන්නා පිලිවෙලක් තිබේ. ඒවා සියුම්ය. අන්‍ය න්‍යාය පත‍්‍රවලට ගොදුරු විය යුතු නැත.

විදේශ ප‍්‍රතිපත්ති සම්බන්ධයෙන් කුඩා රටවලට සෑහෙන ගැටළු තිබේ. බලවත් රටවල් අතර ඇති පරස්පරතා වලින් ගැලවි ස්වාධීනව ක‍්‍රියා කිරීම පැන නැගෙන බලවත් අභියෝගයකි. ඇමරිකාව සමග පවතින සබදතා තවත් බලවත් රටකට නොගැලපෙන්නට ඉඩ ඇති අතර චීනය හෝ ඉන්දියාව සමග ක‍්‍රියා කිරීමේ දී ද නොයෙක් පැති මතුවීම ස්වභාවිකය. බි‍්‍රතාන්‍ය, රුසියාව හෝ යුරෝපා ප‍්‍රජාව සමග පවත්වන සම්බන්ධතා අනෙක් රටකට නොගැලපෙන්නට බැරි නැත. මැද පෙරදිග හෝ අප‍්‍රිකානු කලාපය ගැන දක්වන ආකල්ප අනෙක් එකක් වෙන්නට ඉඩ තිබේ. එහෙත් මෙම සියළුම රටවල් සමග අඩු වැඩි වශයෙන් නමුත් එක හා සමාන ස්ථාවරයක පිහිටීම අවශ්‍යය. පටු අරමුණු පසෙත තැබීම සුදුසුය.

විදේශ ප‍්‍රතිපත්තියට ද දේශීය දේශපාලනය මුහු කිරීම අපගේ සිරිතය. අවශ්‍ය වූ අවස්ථාවක හොද හිත පෙන්වන අතර අනවශ්‍ය අවස්ථාවල නොයෙක් ආකාරයෙන් විවිධ රටවලට ප‍්‍රහාර එල්ල කරන බව පෙනේ. ඒවායේ ඉලක්කය ඡන්ද පදනම බව ද අමතක කළ යුතු නැති තවත් පැත්තකි. රටවල් සම්බන්ධයෙන් අනුගමනය කළ යුතු ප‍්‍රතිපත්ති සහ නායකයෝ පෙනී සිටිය යුතු ස්ථාවරය ගැන මෙම කරුණු ඔස්සේ අවධානය යොමු කළ යුතුය.

උගත් පාඩම් අමතක කරන රටක්

ප්‍රතිචාරයක් ලබාදෙන්න

 2021/03/24 ලංකාදීප

හොදත්, නරකත් යන දෙකම දවසක්, දෙකක් ඇතුලත අමතක කිරීම සිරිතක් වී තිබේ. එය ලාංකේය සංස්කෘතියෙහි එක පැතිකඩක් දැයි කල්පනා කිරීම සුදුසුය. පසුගිය සතිය අවසන් වූයේ ශෝකාන්තයකින්ය. අවිනීත රියැදුරෝ සිදු කළ පස්සර බස් රථ අනතුර දහ හතරදෙනෙකු ගේ ජීවිත රටට අහිමි කළහ. තවත් තිස් ගණනක් තුවාල ලබා ඇත. ජීවිත අහිමි වූ අයවලූන්ගේ සමීපතමයන්ට සහ තුවාලකරුවන් ජීවිත කාලය තුළ සිද්ධිය අමතක නොකරනු ඇත. එහෙත් සමාජයක් වශයෙන් අප සියළු දෙනා ඉක්මනින් මතක නැති කරන බවට සැකයක් නැත. මෙම භයානක සිද්ධියෙන් පාඩමක් ඉගෙන ගෙන මාර්ග අනතුරු වලක්වා ගන්නා විධිමත් වැඩ පිලිවෙලක් ගැන අවධානය යොමු කිරීම සුදුසුය.

සමාජය දියුණුවන විට විනය ගරුක බවක් ඇතිවෙයි. ශ‍්‍රී ලංකාව දියුණුවෙමින් පවතින බව ඉලක්කම් වලින් පෙන්වන නමුත් අපට එදිනෙදා පැවැත්මේ දී දැනෙන්නේ නැත. අනෙක් වාහනය ඉස්සර කරගෙන යන්නට සමහර කෙනෙකුට ඇත්තේ පුදුම හදිස්සියකි. ඉතාම අපරීක්ෂාව, බරපතල උවමනාවකින් අනෙකා පරයා ගොස් නතර වූ පසු කරන වැඩදායක කාර්යය කුමක්දැයි කිසිසේත් පැහැදිලි නැත. දිනපතා කොතැනක හෝ අනතුරකි. බොහෝ විට එයට හේතුව අපරීක්ෂාකාරීවීමය. නොසැලකිල්ලය. නීතිය, අධිකරණ ක‍්‍රියාමාර්ග හෝ දඩුවම් වලින් වාහන හසුරුවන්නන්ගේ චර්යාවෙහි කැපී පෙනෙන වෙනසක් ඇති කරන්නට අසමත් බව පැහැදිලිව පෙනෙන කාරණයකි.

මෙම අනතුර සිදු වූ මාර්ගයෙහි අවහිරයක් තිබුණ බව පැවසේ. එය ඉවත් කරන්නට කලබලයක් තිබී නැත. අවහිරය තිබිය දී පමණක් නොව අවදානමක් ඇති බව දැනගෙන දෙනෝ දාහක් දෙනා එහා මෙහා යන්නට ඇත. සිද්ධිය වූ ස්ථානයේ කළ යුතුව තිබුණ නඩත්තු කටයුතු අතපසු කර තිබේ. අඩුම තරමින් මාර්ග බාධකයක් හෝ යොදන්නට තිබුණි. ඇතැම් අවිනීත රියැදුරන් එවැනි බාධක පවා පෙරළාගෙන වාහන පදවන බව නොරහසකි.

වාහන අනතරු සිද්ධි වලින් ජීවිතක්ෂයට පත්වන ප‍්‍රමාණය නිතිපතා ඉහළ ගොස් තිබේ. පර්යේෂකයන්ට අනුව කොවිඞ් වසංගතයට වඩා මිනිස් ජීවිත ප‍්‍රමාණයක් වාහන අනතුරු නිසා අහිමි වෙයි. ඉකුත් දශක දෙක තුළ අනතුරුවලින් සිදුවන බලපෑම හා ඒවා වලක්වා ගැනීමට ගත යුතු ක‍්‍රියාමාර්ග ගැන සෑහෙන සාකච්ඡා සිදුවී ඇත. පාර්ලිමේන්තු තේරීම් කාරක සභාවක් පත් කර ගැඹුරින් සොයා බලා තිබේ. රියැදුරන්ගේ නොසැලකිල්ල නිසා පදිකයන් හා පාපැදිකරුවන්ට සිදුවන අනතුරු එහි වඩා අවධාරණය කර ඇත. මෙම වාර්තා මගින් හෙළිවන කරුණු පදනම් කරගෙන අලූත් තීන්දු නොගැනීම වරදකි.

මහ පාරේ ඇති ඉඩ කඩ ඉක්මවන තරමට අධික වාහන ප‍්‍රමාණයක් දිනපතා ධාවනය වෙයි. එයින් ඇති කරන තදබදය රියැදුරන්ට අධික පීඩනයක් බව නොරහසකි. පොදු ප‍්‍රවාහන සේවා දියුණු කළහොත් වාහන තදබදය අවම කළ හැකිය. යතුරු පැදි, ත‍්‍රීවිලර් හා සැහැල්ලූ කාර් වලින් ගමන් බිමන් යන පිරිස් පොදු ප‍්‍රවාහනයට යොමු කර ගත හැකි දීර්ඝ කාලීන සැලැස්මක් සම්පාදනය කළ යුතුය. මහ පාරේ වාහන අඩු කරන සැලැස්මක දී දුමිරිය සේවා විධිමත් කිරීම අවශ්‍යතාවයකි. නිශ්චිත වෙලාවට මගී පහසුව ඇති කරන දුම්රිය සේවා ජනතාවට පහසුවක් වනු ඇති අතර එය ආර්ථිකයට ද විශාල සහනයකි. පුද්ගලික වාහන භාවිතය හේතුවෙන් අධික තදබදය පමණක් නොව ඛනිජ තෙල් භාවිතය ද රටට ඔරොත්තු නොදෙන තරමට පත්ව තිබේ. මගී ප‍්‍රවාහනයේ යෝග්‍යතා සලකා බලා නැවුම් වෙනස්කම් කිරීම වැදගත්ය. අනතුරු වලින් සිදුවන විනාශය ඉදිරියේ ඉගෙන ගත යුතු පාඩමකි. තවත් දෙතුන් දවසකින් සිද්ධිය අමතක කරනු ඇති අතර පුරුදු පරිදි රියැදුරෝ හැසිරෙනු ඇත. වාහන ධාවන බලපත‍්‍ර නිකුත් කිරීම වෙනස් කිරීම හෝ දඩ නියම කිරීම තාවකාලික අස්වැසිල්ලකි. රටට අහිමි වූ අහිංසක ජීවිත ගැන සලකා බැලිය යුතුය. වන්දි පමණක් ප‍්‍රමාණවත් නොවේ. මෙැවැනි ඛේදවාචක නැවත ඇති නොවන සැලස්මක් සදහා අලූතින් හිතන්නට අවශ්‍යය.

රට හදන්න කලින් මනස සන්සුන් කරවමු

ප්‍රතිචාරයක් ලබාදෙන්න

2021/03/17 – ලංකාදීප

‘‘බඩ වියත’’ වෙනුවෙන් යැයි ගැමි ව්‍යවහාරයක් තිබේ. හැම දෙයක්ම කරන්නේ කුස පුරවා ගන්නටය. මිනිසුන් පමණක් නොව සියළු සතුන්ට ද පොදු ධර්මතාවයකි. වේලක් දෙකක් කුසගිනි දරාගත හැකිය. අනතුරුව කොතැනකින් හෝ මොනවා හෝ සොයාගන්නට පෙළැඹෙති. එය ස්වභාවිකය. සමාජ විනය බිදවැටීම, ප‍්‍රචණ්ඩත්වය සහ සන්නද්ධ අරගල තුළ දරිද්‍රතාවය යනු ප‍්‍රබල සාධකයකි. අද මෙරට පවතින සමාජ ව්‍යුහය අනුව ආදායමට අනුව ප‍්‍රමාණවත්ව ආහාර සපයාගැනීමට නොහැකිවීම දරිද්‍රතාවයෙන් පෙළෙන ජන කොටස් මුහුණ දී ඇති එක ප‍්‍රශ්නයකි. 

කුසගින්න ගැන ආගමික නායකයෝ විවිධ අවස්ථාවල දේශණා කර ඇත. සීවලී මහ රහතන්වහන්සේ කරන ලද කුසලයක් හේතුකරගෙන සෑම අවස්ථාවකම ආහාර ලැබුණ බව ධර්මයෙහි කියැවේ. දහම් දෙසන්නට කලින් ශාවකයාගේ ආහාර ගැන බුදු රජාණන් වහන්සේ අවධානය යොමු කර ඇත. අධික ආහාර ගෙන නොසන්සුන්ව සිටි කොසොල් රජු දැක ආහාර පිඩ බැගින් අඩු කර පහසුව ඇති කරගැනීමට උපදෙස් දී තිබේ. තමන්ගේ ගවයෙකු සොයා නොයෙක් තැන ඇවිදිමින් අවසානයේ දී අහම්බෙන් බුදුන් වැඩ සිටි ස්ථානයට පැමිණි ගොවියෙකුට පළමුවෙන් ආහාර සපයන ලද බව බෞද්ධ සාහිත්‍ය දක්වන තවත් කාරණයකි.

අරමුණ කරා යන ගමන තුළ ජනතාවගේ කුස ගින්න ගැන අවධානය යොමු කිරීම සුදුසුය. ශ‍්‍රී ලංකාව තීරණාත්මක මංසන්ධියකය. මැදි ආදායම් රටක මට්ටමක පසුවන නමුත් සෑහෙන පිරිසක් දුෂ්කරතාවයක බව නොරහසකි. පුරුදු ආදායම් මාර්ග ඇවිරී තිබේ. සමහර පිරිසක ගේ රැකී රක්ෂා අහිමි වී ඇත. එදිනෙදා වියදම දෙගුණ තෙගුණ වී ඇති අතර අත්‍යවශ්‍ය භාණ්ඩ මිල ගණන් ඉහළ ගොස් ඇත. ආහාර ද්‍රව්‍ය ගණනාවක් ආනයනය පාලනය කර තිබේ. හිගය හා සාමාන්‍ය පාරිභෝගිකයන්ට දරාගත නොහැකි පරිදි මිල වැඩිවීම එහි ප‍්‍රතිඵලයකි. වගකිව  යුතු රජයක් වශයෙන් මෙම අවස්ථාවේ දී, දුෂ්කරතා ගැන සැලකිල්ල යොමු කළ යුතුය. සහල් මිල වැඩිවන විට, පොල් මිල දරාගත නොහැකි පසුබිම තුළ සහ පරිප්පු මිල ගණන් ඉහළ ගොස් ඇති අවස්ථාවක එදිනෙදා ජීවන වියදම සැලකිය යුතු ප‍්‍රශ්නයකි.  කිරි පිටි හා ගෑස් මිල ගණන් වැඩිවන බව කියැවෙන අවස්ථාවක අස්වැසිල්ල තුරන් වෙයි. ජලය හෝ විදුලිය වෙනුවෙන් බිල්පත් පවා ගෙවා ගත නොහැකි තැනට සමහර දෙනෙකු පත්ව සිටී. ප‍්‍රශ්න ඉදිරියේ ජනී ජනයා නොසන්සුන්වීම වැලැක්විය නොහැකිය. ආර්ථික දුෂ්කරතා සහිත තෝරා ගත් පිරිසකට සහන සැපයීමට රජය වගබලාගෙන ඇති බව පිලිගත යුතුය. එහෙත් සහන ලැබිය යුතු පිරිස කොපමණ ද සහ කවර ජන කොටසක් ද යන්න නැවතත් සොයා බැලීම මෙම අවස්ථාවේ දී ඉතා වැදගත්ය.

නොසන්සුන් සිත් ඇවිලවීම පහසුය. විරුද්ධ පක්ෂ දේශපාලනඥයන් සහ නොයෙක් මතධාරීහු විවිධ අදහස් විසුරවමින් සිටී. සමාජ මාධ්‍ය ඒවා තවදුරටත් අවුලවන තැන්ය. අනෙක් පාර්ශවයන් ගෙන් එල්ලවන ප‍්‍රහාර දෙස බලන්නට කලින් තමන් නිසි අවස්ථාවේ දී ගත යුතු පියවර ගැන අවධානය යොමු කිරීම සුදුසුය. ආහාර වෙනුවෙන් අරගලයක සිටින ජන කොටසකට වසංගතය දුරු කර පසුව ආයෝජන කැදවා ආර්ථිකය වේගයෙන් සංවර්ධනය කරන බව දැක්වීම නිරර්ථකය. ත‍්‍රස්තවාදී ගැටුම් තිබුණ කාලයේ දී ද, ජනතාව ට මෙම පණිවුඩය හැර අනෙකක් ලැබුණේ නැත. යුද්ධය අවසන් කර ආදායම වැඩි කරන බව එවකට තිබුණ ආණ්ඩු  ප‍්‍රකාශ කළ නමුත් එය සාර්ථක උත්තරයක් නොවිණි. ‘‘ආණ්ඩුව බණ කියනවා. අපිට ජීවත්වෙන්න විදියක්  නැහැ. ’’ යනුවෙන් සමහර පිරිසක් මැසිවිලි නගන ලද බව අමතක කළ යුතු නැත.

ආදායම දුර්වල අතර වියදම අධික පසුබිමක ශ‍්‍රී ලංකාව පවතින බව ප‍්‍රකාශ වෙමින් තිබේ. මෙහි දී කොවිඞ් වසංගත තත්ත්වය දරුණු අවහිරයකි. දියුණු රටවල් සැහෙන ධනයක් ජනතාව වෙනුවෙන් වියදම් කර ඇත. ශ‍්‍රී ලංකාව එපමණ ආර්ථිකයක නැත. එන්නත්කරණය හා අලූත් ආයෝජන තත්ත්වය වෙනස් කරමින් සිටී. වෙනස්වන ලෝකය තුළ අපනයන අවස්ථා සහ ලෝක තරගකාරීත්ව අවස්ථා අතර තැනක් සොයා ගැනීම රටට වැදගත්ය. නිසි ප‍්‍රතිපත්ති අනුව අවස්ථාවෝචිතව තීරණ ගෙන, ප‍්‍රතිසංස්කරණ කිරීම ආණ්ඩුවේ වගකීමකි. රට බෙදන, රට බේරා ගන්නා ඝෝෂා නිරර්ථකය. ජන සමාජය වෙනුවෙන් පෙනී සිටින, නියම නායකත්වයක් ජනතාවගේ අපේක්ෂාවය. නිසි මග පැහැදිලිව පෙනෙන නමුත් සුළු සිද්ධි පදනම් කරගෙන ජන මතය වෙනස් වූ අතීතයෙන් පාඩම් ඉගෙනගත යුතුය. සුළු පිරිසක ගේ කලකිරීම, තීරණාත්ම අවස්ථාවක දී පීඩනයකි. එය අවධානයට ගැනීම සුදුසුය. 

ඕනෑ එකටත් එපා එකටත් කට දාන්නන් කරන වින්නැහිය

ප්‍රතිචාරයක් ලබාදෙන්න

2021/03/10 – ලංකාදීප

සන්සුන්ව තිබිය යුතු රටක් එකම කෝලාහලයකි. ජනතාව අපේක්ෂා කරන්නේ සැනසිල්ලේ ජීවත්විය හැකි පසුබිමකි. නමුත් හැම තැනෙකම නොසන්සුන්ය. නිතර ඇවිලෙයි. අවශ්‍ය දෙයකට පමණක් නොව අනවශ්‍ය දෙයකට පවා විශාල වාද විවාද පැන නැගේ. ඒවායෙන් ඇති කරන ඝෝෂාව ජන ජීවිතයට බලවත් පීඩනයක් එල්ලකර තිබේ. අනෙක් තර්කයක් පරදවා තමන් ගේ මතය පමණක් තහවුරු කරන්නට දරන සමහර ප‍්‍රයත්නක් අතිශය විකාර සහගතය. 

මෑත කාලය තුළ සිද්ධි හත අටක් පමණක් මතකයට ගන්න. කොවිඞ් වයිරසය පාලනය කළත් වැරදිය. නොකළත් ප‍්‍රශ්නයකි. දේශීය වශයෙන් නිපදවන ලද බෙහෙතක් ගැන දැවැන්ත ආන්දෝලනයක් හටගත්තේය. කොළඹ වරායේ නැගෙනහිර ජැටිය සම්බන්ධ සිද්ධිය තවත් උදාහරණයකි. එහි ගිණි නිවෙනවිට අධිවේගී මාර්ගයෙහි ඇති දුර්ලභ ශාඛයක් ගැන ඇවිලිණි. කොවිඞ් වැළ`දී ජීවිතක්ෂයට පත්වන ඉස්ලාම් ජාතිකයන්ගේ සිරුරු සම්බන්ධ ප‍්‍රශ්නයක් ගැන මාස ගණනක වාදයක් තිබේ. පාස්කු ඉරිදා කොමිෂන් වාර්තාව තවත් එකකි. ජිනීවා හි මානව හිමිකම් සභාව අනෙක් වාදයකට හේතු වී තිබේ. ජනාධිපතිවරයා ගමකට ගොස් ජනතාව හමුවීම ද අපහාසයකට, උපහාසයට පමණක් නොව විවේචනයකට ද ලක් කර ඇත. දේශපාලනඥයන්, විද්ව වෘත්තීයෙවිදීන්, වෘත්තීය සමිති නියෝජිතයන්, සංඝයා වහන්සේලා ඇතුළු පුජ්‍ය පුජක උතුමන්, සමාජ මාධ්‍ය පරිශීලකයන් පමණක් නොව අදහසක් පළ නොකළහොත් රට බේරාගැනීමට නොලැබෙන බව සිතන සමහර පිරිස් ද අප ස`දහන් කරන වාද විවාද වල බරපතල කොටස්කරුවෝය. 

සිද්ධියකට පැටලෙන ඇතැමෙකුට එහි හරය හෝ අභ්‍යන්තරය ගැන කිසිම වැටහීමක් නැත. කැමරාවක් එල්ල කළහොත් වචන විසිකරන්නට සූදානම් විශාල පිරිසක් සිටී.  අනවශ්‍ය සහ කිසිම සම්බන්ධයක් නැති දෙයකට පැටැලී ඇති බව නොදන්නා අතරවාරයේ පවා නොනැවතී සටන් කරමින් සිටිති. මෙම සියළු දුක්ඛ දෝමනස්ස ආලින්දයට ගෙනැවිත් අතහරින ජන මාධ්‍ය භාවිතාව මෙම ප‍්‍රශ්නය උත්සන්න කර තිබේ.  සමාජ වගකීම් හා යුතුකම් අමතක කර ඇති අතර සමාජ මාධ්‍ය එහි ලා වැඩිම හානියක් සිදුකරනන බව පෙනේ.

සට්ඨිකූඨ පේත වස්තුව සම්බන්ධ කරුණක් එක්තරා අවස්ථාවක බුදු රජාණන් වහන්සේගේ දේශනා කර ඇති බව බෞද්ධ සාහිත්‍යයෙහි දැක්වෙයි. බරුණැස් නුවර සිදුවූ බව දක්වන සිද්ධියකි. රජ වාසල පුරෝහිතයෙකු දන්නා නොදන්නා හැම දෙයකටම කට දමන අතර දීර්ඝ කතා පවත්වයි. රජුටත් අනෙක් ඇමැතිවරුන්ටත් හිරිහැරයකි. කරගත හැකි දෙයක් නැත. එක්තරා අවස්ථාවක පිලා නමැති ආබාධිත තරුණයෙකු රජුට හමු වී තිබේ. ඔහු ඉලක්කයට ගල් කැට විදීමෙහි දක්ෂයෙකි. රජු හෙතෙම රජවාසලට කැ`දවා එළු බෙටි නැලියක් දී ඉහළ මාලයක ර`දවා ඇත. මුලින් කී පුරෝහිතයා දිග කතාවකට කට හරිනවිට එක බැගින් එළු බෙටි විදින්නැයි රජතුමා උපදෙස් දී ඇත. කට අරින විට, කටට වැටුණ දේ ගිල දැමූ පරෝහිතයා නැවත කතාව අරඹයි. ආබාධිත පිලා, එළු බෙටි නැලිය විද අවසන් කළ පසු රජු සිය පුරෝහිතයා අමතා සිද්ධිය හෙළි කරන ලද බව දැක්වෙයි.  ඕනෑම අවස්ථාවක කට අරින සෑහෙන පිරිසක් අප අතර සිටී. සිද්ධිවලට මැදිහත්වන පිරිස අනව සැලකීමේ දී විදින්නට තරම් එළු බෙටි ප‍්‍රමාණවත් නොවන තරමට කණ්ඩායම විශාලය. ආබාධිත නමුත් පිලා වැනි තරුණයෝ දස දහස් ගණනින් උවමනා කර තිබේ.

රටක් යනු විවිධ ක්ෂේත‍්‍ර ගණනාවක එකතුවකි. ඒවායේ එකිනෙකට වෙනස් ක‍්‍රියාකාරකම් සිදුවෙයි. අපට නොගැලපෙන කරුණක් අනෙක් පාර්ශවයක ගේ ජීවිතයේ වැදගත්ම දෙයක් විය හැකිය. ප‍්‍රජාතන්ත‍්‍රවාදයේ උසස් ගුණාංග වලට ගරු කරන්නට අවශ්‍යය. මගේ කැමැත්තට අන් සියළු දෙනා යටත්විය යුතු නැත. තමන් විශ්වාස කරන තරම පමණක් යුක්තිය හෝ සාධාරණත්වය නොවේ. අනෙක් මතයකටත් අවස්ථාවක් තිබිය යුතුය. බලවත් ඝෝෂාවක් ඇති කර බලහත්කාරයෙන් අනෙක් පාර්ශවයේ අදහස් යටපත් කිරීම කිසිසේත් සුදුසු නැත.

දියුණු රටක්, දියුණු සමාජයක් මනින මිණුම් ද`ඩු තිබේ. දේශපාලනඥයෙතු, විද්වතෙකු, වෘත්තීයවේදියෙකු, වෘත්තීය සමිති නායකයෙකු වෙතින් බලාපොරොත්තුවන සංයමයක් ඇත. නායකත්ව ගුණාංග තිබේ. සංඝරත්නය ඇතුළු සියළු ආගමික පුජ්‍ය පූජක පිරිස් වෙතින් සමාජය අපේක්ෂා කරන ආදර්ශය ඉතා ගැඹුරුය. අදහස් කොලාහලයකින් සත්‍ය අනාවරණය වෙන්නේ නැත. අප සියළු දෙනා පවතින ඝෝෂාකාරී පරිසරය තුළ ඉවසිලිවන්තව අලූතින් හිතන්නට අවශ්‍යය.

Older Entries Newer Entries