2021/12/08 – ලංකාදීප

‘‘ගිණි පෙනෙල්ලෙන් බැට කෑ මිනිහා  කණාමැදිරියාටත් බය ය’’ . ජන ව්‍යවහාරයේ එන ප‍්‍රකට කියමනකි. ගෑස් සිලින්ඩරයක ප‍්‍රමිතිය ගැන වාද කරන නූතන සමාජය ගිණි පෙනෙල්ල ගැන දන්නේ නැත. කණාමැදිරියා ගැන පවා ගූගල් සෙවුම් යන්ත‍්‍රයෙන් සොයන යුගයකි. ඉතිහාසය අපට පාඩම් උගන්වා තිබේ. උගත් පාඩම් අමතක කළ යුතු නැත. වැරදුණ තැන් නිවැරදි කරගත යුතුය.

පළමු කොවිඞ් රෝගියා වාර්තා වූ ආකාරය මතක තිබිය යුතුය. දෙවැනි සහ තුන්වැනි රැළි වලින් ජන සමාජයට සිදුවූ විපත ගැන තක්සේරුවක් අවශ්‍යය. ආර්ථික පීඩනය ගැන අවධානය යොමු කිරිම වැදගත්ය. දරුවන්ගේ අධ්‍යාපනය කඩාකප්පල්වී ඇති තරම සාකච්ඡා කළ යුතුව තිබේ. දහස් ගණනින් රෝගීන් වාර්තාවන භයානක රැළි කිහිපයකට පසු නැවත, නැවතත් එතැනටම ගමන් කිරීම බලවත් ප‍්‍රශ්නයකි.

කොවිඞ් වයිරසයේ අලූත් ප‍්‍රබේධයක් වාර්තා වී තිබේ. ලෝකයේ එක කෙළවරකින් පළමු රෝගියා වාර්තාවන අතරතුර ශ‍්‍රී ලංකාවේ පවා රෝගියෙකු හදුනා ගෙන ඇත. ව්‍යාප්තිය කොපමණ වේගවත් ද යන්න අපට අනතුරු අගවයි. දැනට කරගෙන යන ක‍්‍රියාමාර්ග වලින් ලැබුණ සාර්ථකත්වය මොහොතකින් ගිලිහී යන අවදානමක් ඇත. ඉතාම සාර්ථකව කොවිඞ් එන්නත ලබාදෙන්නට ආණ්ඩුව සමත්ව තිබේ. වයස්ගත ජන කොටසට තුන් වැනි මාත‍්‍රාව ද, නිකුත් කෙරේ. ආර්ථික දුෂ්කරතා මැද පසුවන අතරවාරයේ පවා නොමිලේ සැපයීම අගය කළ යුතුය. ආරක්ෂා වූ ජීවිත ගණන වාසනාවකි. සෞඛ්‍ය කාර්ය මණ්ඩලය, ආරක්ෂක අංශ කරන ලද කැපවීම සහ බාධක මැද නොනැවතී ඉදිරියට ගිය ගමන දැවැන්ත රැකවරණයක් වූ බව සදහන් කළ යුතුය.

කොවිඞ් වසංගතයේ අවසානයක් දකින දවස විවාදාත්මකය. ලෝක සෞඛ්‍ය සංවිධානය එයට උත්තරයක්  දී තිබේ. කොවිඞ් තුරන් කරන දිනය තීරණය කළ යුතු ජනතාව බව පැහැදිලිව කියා ඇත. එන්නත එක පැත්තක ආවරණයකි. පරෙස්සම අපගේ වගකිමකි. අලූත් ප‍්‍රබේධ මතු වෙමින් තිබේ. සෑම වෛරස් ප‍්‍රබේධයකටම එන්නතක් නැත.

පසුගිය වසර දෙක තුළ අලූත් භාවිතා අපට ලැබී තිබේ. සමාජ දුරස්ථභාවය වැනි දරා ගත නොහැකි සංකල්ප කරා තල්ලූවෙන්නට සිදුවී ඇත. උපතක දී ලබන සතුට පමණක් නොව විපතක දී ලබන වේදනාව ද දුරස්ථව දරා ගන්නට සිදුවී ඇති වකවානුවකි. පැවැත්ම කාලානුරූප කරගැනීමට සිදුවී ඇත. නීති වලින් කළ නොහැක. ආරක්ෂා වුවහොත් ගැලවීමක් තිබේ. ගැලවුම්කාරයා අනෙකෙකු නොවේ.

කොවිඞ් වසංගතය සමග ආකෘති වෙනසක් සිදුවී ඇත. ගැලවීමට මාර්ගයක් තනා තිබේ. වෘත්තීය අවස්ථා, මුල්‍ය සේවා, අධ්‍යාපනය, සෞඛ්‍ය යනා දී සියළු අංශ වලට තාක්ෂණය ඇතුළු වී ඇත. ඉහළ අධ්‍යාපන පසුබිමක් සහ හොද සාක්ෂරතාවයක් ඇති රටක් වශයෙන් මෙම පැතිවලට කාර්යක්ෂමව ප‍්‍රවේශ විය යුතුය.

රැකියා ස්ථානයට පැමිණීම වෙනුවට කොතැනක හෝ සිට රාජකාරිය කරන තාක්ෂණයට හුරු විය යුතුව ඇත. දැනටමත් සමාජයේ සෑහෙන පිරිසකට බැංකු හා මුල්‍ය කටයුතු වල දී නිවසේ සිට කරගත හැකි වී තිබේ. එය තවත් දියුණු කරගත හැකිය. ඉගෙනගැනීම අන්තර් ජාලයෙන් සිදුවෙයි. රෝගීන් පරීක්ෂාව හා වාර්තා කියැවීම පවා අන්තර් ජාලයට පවරා ඇති කාලයකි. භාණ්ඩ මිල දී ගැනීමට වෙළද පොලට යා යුතුම නැත. කොවිඞ් වෛරසයේ ව්‍යාප්තිය පාලනය කිරීමට, මෙකී රාමුව බලපාන බව අවධාරණය කළ යුතුය. අනෙක් අතට එයින් ලැබෙන පිටිවහල ජීවිතය ක‍්‍රමානුකූල කරයි. කාර්යක්ෂමතාව ඇති කරන බව පැහැදිලිය.

මෙවැනි අංශ කෙරෙහි නැඹුරුවක් අවශ්‍යය. තාක්ෂණයට හුරුවීම වේගවත් කරන ක‍්‍රියාමාර්ග උවමනා කෙරේ. ජනතාව එය වැළද ගත යුතුය. රාජකාරි පහසු කරනු ඇත. වගකීම වැදගත් කරුණකි. අප සියළුම දෙනාට අලූත් ආකාරයකට තීරණ ගැනීමේ වගකීමක් තිබේ. බැට කෑ සමාජයක් නැවත නැවතත් භයානක ලෙස බැට කන තැනට පත්වීම නරකය. බුද්ධිමත් සමාජයක එක කොටසක් වන අපට, වෙනස් මානයකට ඇතුළුවීම අපහසු නැත. කැපවීම පමණක් අවශ්‍ය කෙරේ. අනාගතය හැදෙන්නේ වෙනස්වීමට දරන උත්සාහයෙන්ය.