2019/09/30 – ලංකාදීප
ජනාධිපතිවරණයට දින නියම කර තිබේ. මැතිවරණ කොමිසම පවත්වන පළමු ජනාධිපතිවරණය වශයෙන් සදහන් කළ හැකිය. දහ නම වැනි ව්‍යවස්ථා සංශෝධනයට පසු පවත්වන සහ විධායක බලතල යම් ප‍්‍රමාණයකට සීමා කරන ලද පසුබිමක හෙයින් ජනතාව තුළ ජනාධිපතිවරණය ගැන ජනතාව පුලූල් අවධානයක් දක්වන බව පෙනේ. විධායක ජනාධිපති ධුරය සම්පූර්ණයෙන්ම අහෝසි කළ යුතු බවට බලවත් කතිකාවතක් තිබිය දී පවා වාර්තාගත අපේක්ෂකයන් ප‍්‍රමාණයක් ඉදිරිපත් වන ලකුණු ද පහල වී ඇත.
ශී‍්‍ර ලාංකික ලියා පදිංචි ඡන්ද දායකයන් සියළුම දෙනාය විධායක ජනාධිපති පත් කරගැනීමේ මැතිවරණයේ දී ඡන්දය ප‍්‍රකාශ කිරීමට අවස්ථාව ලැබේ. එය රට තුළ විශාල උනන්දුවක් උණුසුමක් ඇති කරයි. ඡන්දය භාවිතා කිරීමේ අවස්ථාව අහිමි ජන කොටසක් ද සිටී. එම පිරිස ගැන ප‍්‍රමාණවත් අවධානයක් නැත. මෙරට තරුණ ඡන්දදායකයන් පෙන්වා දී ඇති පරිදි අලූතින්ම ඡන්ද බලය හිමි ලක්ෂ ගණනකට ඡන්දය භාවිතා කිරීමේ අවසරය නැත. ජනාධිපතිවරණය භාවිතා කරන ඡන්ද හිමි නාමලේඛනය එයට හරස් වී තිබේ. 2019 වසර සදහා ලේඛන සකස් වී නැති අතර මෙම වසරේ නිසි අයිතිය ලැබෙන තරුණ තරුණියන්ට ජනාධිපතිවරණයක ඡන්දය භාවිතා කරනු සදහා තවත් අවුරුදු පහක් බලා සිටින්නට සිදුවෙයි. එය යුක්ති සහගත ද යන්න සාකච්ඡා කළ යුතුව තිබේ.
මැතිවරණයක දී ඡන්දය භාවිතා කරන වරම් අහිමි තවත් කොටස් දෙකක් සිටී. රට විරුවන් යැයි ඇගයීමට ලක් වන විදේශ රැකියා වලට පිටත්ව ගිය දස ලක්ෂ සංඛ්‍යාත පිරිසක එක කොටසකි. ත‍්‍රස්තවාදී තර්ජන හමුවේ රට හැර ගිය පිරිස, ඩයස්පෝරාවට ද මෙරට මැතිවරණ වල දී ඡන්දය පාවිච්චි කිරීමේ අවකාශය අහිමිය. ආර්ථික හා සමාජ කාර්ය භාරයේ දී මෙම සියළු දෙනා දක්වන දායකත්වය සුළු සේ තැකිය නොහැකිය. කුළුදුල් ඡන්ද දායකයින්ට, විදේශගත පිරිසට ඡුන්දය භාවිතා කළ හැකි පරිදි ප‍්‍රජාතන්ත‍්‍රවාදී අවකාශය අලූත් කරන්නට යුහුසුළු නොවන්නේ ඇයි?
ඡන්ද හිමි නාම ලේඛනය යාවත්කාලීන කිරීම දැවැන්ත කාර්ය භාරයක් නොවේ. තාක්ෂණය සමග එය ඉතා පහසුය. දිනපතා නිසි වයසට එළැඹෙන තරුණන් ගේ නම එදිනෙදා ඇතුලත් කළ හැකිය. දැනට කරගෙන යන ක‍්‍රමවේදය අනුව වසරක්පාසා අලූතින්ම ලේඛන සකස් කරයි. ග‍්‍රාම නිලධාරීහු සෑම නිවසකින්ම දත්ත එකතු කරති. එය දැනට ඡන්ද වරම ඇති පුරවැසියන්ගේ තොරතුරු පවා වසරක්පාසා එකතු කරන යල් පැනගිය ක‍්‍රමවේදයකි. කඩදාසි නාස්තියකි. විශාල කාලයක් හා ධනයක් වැයවේ. මැතිවරණ කොමිසම සිය බලය භාවිතා කර වසර හැත්තෑවක් තිස්සේ පවත්වාගෙන යන සම්ප‍්‍රදායික ව්‍යුහය වෙනස් කරන්නේ කෙසේදැයි සොයා බැලිය යුතුය.
ඡන්ද හිමි නාමලේඛනයේ නිවැරදි තොරතුරු ජාතික පාසල් වලට දරුවෝ ඇතුලත්කර ගැනීමේ දී ප‍්‍රයෝජනයට ගැනෙති. ජාතික පාසලට ඇතුලත්කරන සාක්ෂිය හෙයින් පුරවැසියෝ ඡන්ද හිමි නාම ලේඛනය යේ නම තිබීම ඡන්ද අයිතියටත් වඩා වැදගත් සේ කල්පනා කරන බව පෙනේ.
ජනාධිපතිවරණයේ දී ඡන්දය භාවිතා කරන පුරවැසියන් පමණක් නොව ඡන්ද වරම අහිමි ජන කොටස ද ප‍්‍රජාතන්ත‍්‍රවාදී ප‍්‍රවාහයට එකතු කරගත යුතුය. තීරණාත්මක මැතිවරණයක දී දස ලක්ෂ සංඛ්‍යාත පිරිසක් පැත්තකින් තබා ජනමතය විමසීම සාධාරණ නැත. ලෝකයේ ඕනෑම තැනක සිට ඡන්දය පාවිච්චි කළ හැකි පරිදි ඡන්ද පෙට්ටියේ ආකෘතිය වෙනස් කිරීමට හැකියාව තිබේ. එවැනි තාක්ෂණික ක‍්‍රම ලෝකයේ අලූත් දේ නොවන බව සදහන් කළ යුතුය. කඩදාසියක ලකුණු කර, ඒවා පෙට්ටියක බහා සීල් කිරීම වෙනුවට විද්‍යුත් ක‍්‍රමය ඉතා වියදම් අඩු බව පෙන්වා දිය හැකිය. සිමිත මෙහෙයුමකින් තීරණයක් ගත හැකි ක‍්‍රමවේදයකි. ක‍්‍රමය වෙනස් කළහොත් ලෝකයේ අනෙක් රටවලට ආදර්ශයක් සැපයීමට ශ‍්‍රී ලංකාවට හැකිය. අලූතින් හිතන්නට අවශ්‍යය. පුලූල් සහභාගීත්වයක් හා තාක්ෂණයෙන් ඉහළ මැතිවරණ පැවැත්වීමේ ක‍්‍රමවේදයක් ගැන හිතන්නට කාලය එළැඹ තිබේ.
Milinda Prashna 
ප්රතිචාරයක් ලබාදෙන්න