පරිපාලනය නගරයෙන් ගමට

ප්‍රතිචාරයක් ලබාදෙන්න

2021/03/03 – ලංකාදීප

කොවිඞ් වසංගත තර්ජනය ලෝකයේ නොයෙක් වෙනස්කම් ඇති කළේය. ජන ජීවිතය දුෂ්කර තැනකට පත් කරන ලද අතර බොහෝ රටවල් හා නගර තාවකාලිකව වසා දැමීය. සමාජ පැවැත්ම පාලනය කරන තැනට පත් විය. එන්නතක් සොයා ගැනීම යම් අස්වැසිල්ලකි. එන්නත මගින් ප‍්‍රතිශක්තිකරණය ඇති කෙරේ. ප‍්‍රතිකාර සොයා ගැනීමට එහා ගිය විසදුමක් ගැන අවධානය යොමු කරන්නට ද ඇතැම් රටවල් උත්සාහ කරමින් සිටී. රාජකාරි සදහා නගරයට කැදවනු වෙනුවට, ජනතාව වෙත සේවා අංශ සහ පරිපාලනය යොමු කරන පියවර ආරම්භ කර තිබේ. රජයේ ප‍්‍රධාන කාර්යාල සහ සමහර ආයතන වල කොටස් ප‍්‍රධාන නගරවලින් එපිට ස්ථාපිත කිරීම එක අදහසකි.

ලන්ඩන් නගරය කේන්ද්‍ර කරගෙන තිබුණ ඇතැම් දෙපාර්තමේන්තු පිට පලාත්වල ස්ථාපිත කරන තීරණයක් ගෙන ඇති බව බි‍්‍රතාන්‍යයෙන් වාර්තා වෙයි. සමහර අමාත්‍යංශ හා විශේෂයෙන් මහා භාණ්ඩාගාරයේ කොටසක් උතුරු ප‍්‍රදේශයට ගෙන යන ලද බව දැක්වෙයි. ඉදිරි වසර දහය ඇතුළත රාජ්‍ය සේවයේ නිරත පිරිසගෙන් සියයට විසි පහක් පිට පලාත්වලට යොමු වන පරිදි තීන්දු ගැනෙනු ඇත. ඇමරිකාව ද මේ හා සමාන ප‍්‍රතිපත්තියක් අනුගමනය කරන්නට තීරණයකය. රජයට අයත් අමාත්‍යංශ අගනුවරින් පිටස්තරව ස්ථාපිත කරන්නට පේ‍්‍රමදාස ජනාධිපති තුමාගේ ධුර කාලයේ දී උත්සාහ කළේය. සාර්ථක වූයේ නැත. ජනයා ඒකරාශීවීම වලකන එවැනි තීරණ අද පවතින පසුබිම සලකා බලනවිට ඉතාමත් ප‍්‍රායෝගිකය.

ජනතාව කොළඹට පැමිණීම සීමා කර ජන ජීවිතය ආරක්ෂා කරන පියවරක් වශයෙන් රජයේ ප‍්‍රධාන අංශ බැහැර ප‍්‍රදේශවල ව්‍යාප්ත කළ හැකිය. ඡන්දයෙන් පත්වන මැති ඇමැතිවරු පදිංචියට තෝරාගන්නේ අගනුවරය. අමාත්‍යංශ හා දෙපාර්තමේන්තු තමන් ආසන්නයේ ස්ථාපිත කරගනී. දුර බැහැර ජනී ජනයා රාජකාරි අවශ්‍යතා වෙනුවෙන් එහි ළගාවිය යුතුය. රජයේ හා අර්ධ රාජ්‍ය සේවයේ නිතර ලක්ෂ පහලොවකට අධික කාර්ය මණ්ඩලයක් මෙකී ආයතන වල රාජකාරි සදහා දිනපතා පැමිණෙයි. නිසි අධ්‍යයනයක් කළහොත් ජනගහනයට සාපේක්ෂව රාජකාරි සදහා විශාල සේවක කණ්ඩායමක් දිනපතා එහා මෙහා යන වාර්තාගත රටක් වශයෙන් නම් කළ හැකිය. විශාල සම්පත් නාස්තියකි. නිලධාරීන් සහ ජනතාව නගරයට කැදවන විට තදබදය ගැන පුදුම විය යුතු නැත. සමාජ දුරස්ථභාවය අද අත්‍යවශ්‍ය කාරණයකි. බස්රියේ හෝ දුම්රියේ නිසි සෞඛ්‍ය පිලිවෙත් අනුගමනය කරන බවක් නොපෙනේ. විශාල වියදම පමණක් නොව ජීවිත අවදානම ද තිබිය දී නගරයට එන පිරිස පාලනය කිරීම අරමුණු කරගෙන නිශ්චිත වෙනස්කම් යෝජනා කළ යුතුය.

ශ‍්‍රී ලංකාවේ යටිතල පහසුකම් දියුණුය. විශේෂයෙන් මාර්ග පද්ධතියට අධිවේගී මාර්ග එකතු වී තිබේ. තාක්ෂණය ආයතන අතර සම්බන්ධීකරණය පහසු කර තිබේ. අනෙක කොළඹ හා තදාසන්න ප‍්‍රදේශවල ඉඩම්  මිල විශාල වශයෙන් ඉහළය. ඇතැම් අමාත්‍යංශ, රජයේ කාර්යාල සහ දෙපාර්තමේන්තු අධික කුලී ගෙවන ගොඩනැගිලි වල පවත්වාගෙන යයි. ඒවායෙන් ඉවත්වීම ද වාසියකි. ඇමැතිවරයා හෝ නිලධාරීයා පෙනෙන මානයෙක සිටිය යුතු අදහස යල් පැන ගිය එකකි. රජයට අයත් සමහර අංශ බස්නාහිර පලාතෙන් එපිට ස්ථාපිත කළ හැකිය. යාපනය, ත‍්‍රිකුණාමලය, ගාල්ල, මහනුවර වැනි නගර ගැන කල්පනා නොකරන්නේ ඇයි? ධීවර අමාත්‍යංශය කොළඹ පවත්වාගෙන යෑම අවශ්‍ය කාරණයක් නොවේ. ධීවරයන් ගේ ජීවිකාව හා ඇමැතිවරයා නියෝජනය කරන මැතිවරණ බල ප‍්‍රදේශය සලකනවිට කාර්යාලය පමණක් කොළඹ පිහිටුවන්නේ ඇයි? කෘෂිකර්ම, ජල සම්පත්, සුළු අපනයන බෝග හෝ ක‍්‍රීඩා ඇතුළු අමාත්‍යංශ අගනුවරින් බැහැර තැනක ස්ථාපිත කරන්නට නොහැකියාවක් නැත. බුද්ධ ශාසන අමාත්‍යංශය පවා මහනුවර හෝ අනුරාධපුරයේ ස්ථාපිත නොකරන්නේ මන්ද? එවැනි තීරණ බලය බෙදන සංකල්පයට ද පිටිවහලකි. මධ්‍යගත ආයතනික ව්‍යුහය අනුචිත හා අකාර්යක්ෂම එකක් බව ඔප්පු වෙමින් තිබේ.

පළමු පියවර වශයෙන් දස අවුරුදු සැලැස්මක් සකස් කිරීම උචිතය. බස්නාහිර පලාතෙන් ඉවත් කර වෙනත් තැනෙක ස්ථාපිත කළ හැකි රජයට අයත් ආයතන ලැයිස්තු ගත කළ යුතුය. කුලී පදනමකින් ලබාගෙන විශාල මුදල් ගෙවන ගොඩනැගිලි ආර්ථික කටයුතු වලට පවරා රජයේ වියදම පාලනය කරගත හැකිය. එය ජනතාවගෙන් අය කරන බදු අඩු කරන වක‍්‍ර පියවරකි. කොවිඞ් කාල පරිච්ජේදයේ දී ජනතාවගේ ආරක්ෂාව සහ ආර්ථික පුනර්ජීවණයක් සෙදහා ගත හැකි සෘජු තින්දුවකි.

අසල්වැසියාගේ විපත සංහිදියාවට මගක් කරමු

ප්‍රතිචාරයක් ලබාදෙන්න

2021/02/24 – ලංකාදීප

‘‘ කොටි පරද්දපු රටේ, සිංහයොත් එක්ක ජීවත්වෙද්දි, ඔටුවො දැන ගන්න  ඕනෙ පාඩුවේ ඉන්න’’ කොළඹ නගරයේ ධාවනය වන තී‍්‍ර විලර් රථයක පිටුපස ලියා තිබුනි. එම වැකිය විශාල පැතිකඩක් හුවා දක්වයි. සංකේතාත්මකය. ජන සමාජයේ කොටසක් මෙම අදහස වෙනුවෙන් පෙනී සිටින බව නිසැකය. එහෙත් බහුතරයක් දෙනා ගේ දර්ශනය මෙබදු ද යන්න විමර්ශණය කිරීම ඉතාම වැදගත්ය.

ලොකු කුඩා, උස් පහත් බේධ රහිත සමාජ නැත. ලෝකයේ සෑම තැනකම අධිපතිවාදීත්වය තිබේ තිබීම එකකි. පාලනය කරගැනීම අනෙකකි. අනෙක් පාර්ශවය වෙනුවෙන් යුක්තිගරුක හැසිරීම මනුෂ්‍යත්වයයි. සාධාරණව සලකන, සියළු දෙනාට එකට සිටින්නට හැකි පිලිවෙලක් තිබීම උසස් ගුණාංගයකි. එවැනි සමාජ, එවැනි රටවල් විශිෂ්ඨත්වයෙන් යුතු බව සදහන් කරන්නට අවශ්‍යය.

බහුතරයට රිසි පරිදි තීරණ ගත යුතු යන්න එක සංකල්පයකි. ප‍්‍රජාතන්ත‍්‍රවාදය එයයි. එහෙත් සුළුතරය නොසලකා නොතකා හැරීමක් ප‍්‍රජාතන්ත‍්‍රවාදය තුළ නැත. ජාති, ආගම්, භාෂා, පංති ආදී වශයෙන් කවර සුළු කොටසකට නමුත් ආත්ම ගෞරවය අයිතියකි. තමන් පමණක් අභිමානවත්ව විසීම වරප‍්‍රසාදයක් නොවේ. ජයග‍්‍රාහකයා ඉටු කරන යුක්තිය තවත් සංකල්පයකි. යුත්තිය හෝ සාධාරණත්වයේ දිග පලල තීරණය කරන්නේ ජයග‍්‍රාහකයාය. පරාජිතයා තමන්ට හිමිවිය හැකි ඉරණම වග විභාගයකින් තොරව භාර ගත යුතුය. සුළුතරය තුළ කෙනෙකු වෙන්නට හෝ පරාජිතයෙකු සේ ජීවත්වෙන්නට අභිලාශයක් කිසිවෙකුට නැත. තමන් කැමැති නැති තැනකට අනුන් තල්ලූ කිරිම කිසිම ආගමික දර්ශනයකින් අනුමත කර නැති බව සදහන් කළ යුතුය.

ත‍්‍රස්තවාදය පරාජය කරන්නට රටට හැකිවිය. මුළු රටම එකතු වූ අතර විශාල කැපවීමක් කළේය. කොටි පරාජය කළ සිංහයන් වූ පමණින් තවත් අන්තවාදයකට හෝ අවසානයේ දී ත‍්‍රස්තවාදයකට දොරටු හැරිම සුදුසු නැත. යුක්තිය හා සාධාරණ සමාජයක් වෙනුවෙන් පෙනී සිටීම බියගුළුකමක් යැයි කල්පනා කරන්නේ නම් එය බරපතල වරදකි.

ශ‍්‍රී ලංකාව තීරණාත්මක තැනකය. එදිනෙදා ක‍්‍රියාකරන, හැසිරෙන හා තීරණ ගන්නා අන්දම අනුව ඉරණම තීරණය වනු ඇත. ලෝකයෙන් උතුම් රට බවට පත්වූයේ නිරායාසයෙන් නොවේ. එම කීර්තිය අත්පත් කරගත්තේ විශාල කැපකිරීමකින් බව අමතක කළ යුතු නැත. ඉතාම පහසුවෙන් ලෝකයේ නරකම රටවල් අතරට පත්විය හැකිය. කොවිඞ් වසංගතය හෙයින් ජීවිතක්ෂයට පත්වන ඉස්ලාම් ආගමිකයන්ගේ මෘත දේහ වලට අනුගමනය කරන ක‍්‍රියාමාර්ගය ඉදිරියේ ශ‍්‍රී ලංකාව ස්වකීය ප‍්‍රතිරූපය පරදුවට තබා තිබේ.

මළ සිරුරු ආදාහනය හෝ භූමදානය කොවිඞ් වසංගතය පැතිරෙන හේතුවක් නොවන බව ලෝක සෞඛ්‍ය සංවිධානය පිලිගෙන තිබේ. ආශ‍්‍රිතයන් ක‍්‍රියා කළ යුතු අන්දම ගැන පැහැදිලි උපදෙස් නිකුත් කර ඇත. ඉස්ලාම් භක්තිකයන්ගේ විශ්වාසය අනුව මළ සිරුරු ආදාහනය ආත්මය සම්බන්ධ බරපතල ප‍්‍රශ්නයකි. ආගමික හෝ සංස්කෘතික මතිමතාන්තර වලට සෞඛ්‍ය විධි විධාන මිශ‍්‍ර කරගත යුතු නැත. නමුත් මෙම පැති ගැන නොසලකන ශ‍්‍රී ලංකාව ඉතාම තද අන්තවාදී ස්ථාවරයකය. ආණ්ඩුව තනිව ගත් තීරණයක් නොවේ. නොයෙක් පෙළඹවීම් හා බලකිරීම් වල ප‍්‍රතිඵලයකි. ලෝක නායකයෝ, මානව හිමිකම් සංවිධාන මානුෂික පියවර වෙනුවෙන් පෙනී සිටින සෑහෙන පිරිසක් විස්මිතව බලා සිටිති.

සාධාරණ රටක්, මානුෂිකව හිතන ජන කොටසක් බව සනාථ කරන්නට තවමත් ප‍්‍රමාද නැත. බුද්ධ දේශනාව අනුව ජීවත්වන බහුතරය අල්ලා ගැනීමට නොව අත් හැරීමට වෑයම් කළ යුතුය. වෛරයෙන් වෛරය නොසන්සිදෙන බව බුදු රජාණන් වහන්සේ කළ දේශනාව අමතක කළ යුතු නැත. බෞද්ධ, හින්දු, කිතුනු හා ඉස්ලාම් පමණක් නොව අනෙක් ආගම් වල ද මරණයෙන් මතු ජීවිතය ගැන විශ්වාසයක් පවතී. එයට ගරු කළ යුතුය. අවසන් කටයුතු කෙරෙන ආකාරය ගැන සංස්කෘතික එකගතා තිබේ. ඒවායේ ඉතිහාසය සංකීර්ණය. සත්‍යය අසත්‍යතාව පැත්තකින් තැබිය යුතුය. ඒකමතික තීරණය නුසුදුසුය. අසල්වැසියාගේ මරණය සංහිදියාව ඇති කරන පියවරක් බවට හරවා ගැනීමට පැකිලිය යුතු නැත.

තේ සහ කෝපි වෙනුවට අලිගැටපේර වවන කෙන්යානුවෝ

ප්‍රතිචාරයක් ලබාදෙන්න

2021/02/17 -ලංකාදීප

වානිජ කෘෂිකර්මය කාලානුරූපව වෙනස් කළ යුතුය. පර්යේෂණ අංශ සහ ප‍්‍රතිපත්ති සම්පාදකයෝ අලූත් පැති ගැන අවධානය යොමු කරන්නට අවශ්‍යය. ලංකාව යටත් කරගත්තේ ලෝකයේ හොදම කුරුදු පොල සතු කරගැනීමට බව අමතක කළ යුතු නැත. පසුව අධිරාජ්‍යවාදීහු පළමුවෙන් කෝපි වගා කළ අතර පසුව තේ හා රබර් වගා කළහ. බි‍්‍රතාන්‍ය වතු සමාගම් තවමත් නිරතව සිටියේ නම් තේ හෝ රබර් වගා කරන්නට ඉඩ තිබේ දැයි කල්පනා කිරීම උචිතය.

ලෝකයේ විශාලතම තේ නිෂ්පාදකයා වන කෙන්යාව අලිගැටපේර වගා කරන්නට නැඹුරුවෙමින් සිටී. තේ සහ කෝපි වගාවට වැඩි ඉඩක් වෙන් කරන ලද නමුත් කාලගුණ වෙනස්කම් හා වැඩි ආදායම සලකා කුඩා ඉඩම් හිමියන් අලිගැටපේර වගාවට යොමු කරන බව අනාවරණය වෙයි.

පළමු තේ වගාව ලංකාවේ අරඹන්නේ 1824 දී බව ඉතිහාසය දක්වයි. දශක අටකට පසු ලෝකයේ විශාලතම තේ අපනයනකරු බවට පත්ව තිබේ. එයින් වසර හැටකට පමණ පසු තේ වගා කරන්නට පටන් ගත් කෙන්යාව 2018 දී ලෝකයේ විශාලතම තේ නිෂ්පාදකයා බවට පත්ව සිටී. ශ‍්‍රී ලංකාව හතර වැනි තැනට පත්ව ඇති අතර වතු සමාගම් දක්වන අන්දමටට තේ වගාව ලාභදායක නැත. ශ‍්‍රමිකයෝ වැටුප ප‍්‍රමාණවත් නැති බව දක්වති. තේ නිෂ්පාදන පිරිවැය ඉහළ ගොස් තිබේ. රබර් හා තේ අලූතින් වගාකිරීම සීමාවෙමින් පවතින බව ද නිරීක්ෂණය කළ හැකිය. කුඩා තේ වතු හිමියෝ  යම් ප‍්‍රමාණයක සාර්ථකත්වයක වන අතර එයට හේතුව පවුලේ ශ‍්‍රමය වැඩිවශයෙන් භාවිතා කිරීමය. යෙදවුම් හා සාපේක්ෂව වැඩි ආදායම් ඉපැයිය හැකි ෆාම් ඔයිල් වගා කරන්නට ලෝකයේ සමහර රටවල් යොමු  වී සිටී. මැලේසියාව එයින් ප‍්‍රධානය. ශ‍්‍රී ලංකාවේ වතු  සමාගම් වැඩි ලාභ සදහා ෆාම් ඔයිල් වගා කළ නමුත් පරිසර ප‍්‍රශ්න ඇතිවීම සම්බන්ධ විරෝධය සලකා වගාව අතහිටුවන්නට දැනට තීරණය කර තිබේ.

කෙන්යාවේ සාමාන්‍ය ගොවියෝ අලිගැටපේර වගා කිරීම අරඹා ඇති බව ප‍්‍රකාශ වෙන්නේ මෙකී පසුබිම තුළය. වෙනස්වන දේශගුණ තත්ත්ව තේ හා කෝපි වගාවට බාධාවක්  බව කෙන්යානු අත්දැකීමකි. අධික ශීතල සහ දීර්ඝ නියග අස්වැන්න දුර්වල කරන්නට බලපා ඇත. අලිගැටපේර වගාව බාධා අඩු බව දැක්වෙයි. හොද ඉල්ලූමක් තිබේ. යටි වගාවක් සේ වෙනත් භෝගයකට ද අවස්ථාව ඇති බව කෙන්යානු වාර්තා දක්වන තවත් කරුණකි. පසුගිය අවුරුද්දේ දී අපනයන කරන අලිගැටපේර ප‍්‍රමාණයෙහි වර්ධනයක් දක්වන අතර නිෂ්පාදනයෙන් සියයට අසූ පමණ කුඩා ඉඩම් හිමි ගොවියන් ගේ අස්වැන්න බව ප‍්‍රකාශවෙයි.

ශ‍්‍රී ලංකාව කෘෂි අපනයන බෝග සම්බන්ධයෙන් අනන්‍යතාවයක් සොයා ගත යුතුය. අධිරාජ්‍යවාදීහු පවරන ලද වගාව අදට ගැලපෙන්නේ නැත. මෙරට මහ පොලව සාරවත්ය. කාලගුණය වගා කටයුතු වලට බරපතල බාධාවක් නොවේ. නවීන තාක්ෂණික වගා ක‍්‍රම සහ ජල බිංදු තාක්ෂණය වැනි ක‍්‍රම සමග දේශීය කෘෂිකර්මයෙහි පරිවර්තනයක් කළ හැකිය. මෙම කාලවකවානුව කෘෂිකර්මයෙහි අලූත් පරිච්ඡේදයකට ගලපා ගත හැකිය. ආනයන සීමා කර ඇති අතර ගොවියන්ට සහන දෙන්නට රජය අලූත් යෝජනා ක‍්‍රම අරඹා තිබේ. ධෛර්යයක් ඇති තරුණ පරපුරට අලූතින් හිතන්නට අවස්ථාවකි. එහෙත් ඉඩම් ගැටළුව තිබේ. වගා කළ හැකි බිම් වලින් සෑහෙන කොටසක් රජය සතු බව සදහන් කළ යුතුය. ඉඩම් අයිතිය සම්බන්ධ ගැටළු නිරාකරණය කළ යුතුය. රජයට අයත් බෙදා දී ඇති ඉඩම්වල පවා නොයෙක් සංකීර්ණ ගැටළු පවතින බව සදහන් කළ යුතුය. නිසි අයිතිය රහිත ඉඩම්වල වගා කටයුතු වලට බැංකු ණය ගැනීමේ දී පවා අපහසුතා ඇති වෙයි. එය ගොවිතැනෙහි නිරත සුළු ගොවියන් ජීවිත කාලයම පීඩා විදින ණය චක‍්‍රයක හිරකිරීමට හේතුවකි.

රට පුරා විවිධ ප‍්‍රදේශවල, එම පැති වලට ආවේනික එලවලූ හා පලතුරු බහුලව වගා කරන අතීතයක්  තිබුණි. අද බහුලව කරන්නේ ආනයනයයි. වගාවට අවශ්‍ය බීජ පවා වෙනත් රටවලින් ආනයනය කරන්නට සිදුවී ඇත. ශ‍්‍රී ලංකාවේ දේශගුණයට ගැලපෙන, පරිසරයය ආරක්ෂා කරන අතර ගොවියන්ට ඉහළ ආදායමක් ලබා දෙන වගා රටාවක් කෙරෙහි නැඹුරුවක් ඇති කිරීම අවශ්‍යය ජාත්‍යන්තරයේ සිදුවන පරිවර්තනය ගැන අවධානය යොමු කර රටට ගැලපෙන වගා තෝරා ගැනීම සුදුසුය. 

ගනුදෙනු වලදී විශ්වාස කඩක‌ලොත් වින්නැහියක්

ප්‍රතිචාරයක් ලබාදෙන්න

2021/02/10 – ලංකාදීප

විශ්වාසය ගැන සෑහෙන නිර්චචන හා උපදේශන තිබේ. එකිනෙක පුද්ගලයන් හා ආයතනික මට්ටමක් ඇති කරගන්නා විශ්වාසය ඉතා වැදගත්ය. රටවල් අතර පවා විශ්වාසයක් ගොඩනැගේ. දියුණුවන තාක්ෂණය හා සන්නිවේදන ප‍්‍රවණතා අනුව අනාගතයේ මෙම ව්‍යුහය තවත් ඔබ්බට ගමන් කරමින් රොබෝ තාක්ෂණය එනම් කෘතීම බුද්ධිය විශ්වාස කරන්නට සිදුවනු ඇත.

විශ්වාසය ගැන මෑත වකවානුවේ එක්තරා ආකාරයක ප‍්‍රායෝගික හැසිරවීමක නිරත වූ ජෝර්ජ් ෂුල්ට්ස් පසුගිය දා ජීවිතක්ෂයට පත්විය. ඔහු  ඇමරිකානු සමාජයට හා ජාත්‍යන්තරයට මහත් සේවයක් කළේය. ඇමරිකා සහ සේවියට් සීතල යුද්ධය අවසන් කර පාර්ශව අතර සබදතා ඇති කරන පියවර ගත් විද්වතෙකි. රාජ්‍ය, මුදල්, කම්කරු හා අයවැය යන ඇමරිකානු ආණ්ඩුවේ ලේකම් ධුර හෙබැවීය. එම තනතුරු ඇමරිකානු කැබිනට් මණ්ඩලයේ ඉහළම ස්ථරයෙහි ඒවාය. දේශපාලනයෙහි පමණක් නොව අධ්‍යාපන ක්ෂේත‍්‍රයේ ද ඉහළ තැනක් දැරීය. ඩුවයිඞ් ඞී. අයිසන්හාවර්, නික්සන් හා රේගන් යන හිටපු ඇමරිකානු ජනාධිපතිවරු තිදෙනෙකු යටතේ විවිධ වගකීම් උසුලා තිබේ. චිකාගෝ විශ්ව විද්‍යාලයේ ආර්ථික විද්‍යා පීඨාධිපති වූ හෙතෙම පුද්ගලික අංශයට එකතු වී ඉදිකිරීම් කර්මාන්තයේ පරිවර්තනයක නියැලි ප‍්‍රධානියෙකි. ඔහුගේ පසුබිම කෙසේ වෙතත් වසර සියයක් ජීවත් වූ විශ්වාසය ගැන ඔහු ලියා තැබූ සටහන කාලිනව වැදගත්ය.

පරිහරණය කරන කාසි වලට විශ්වාසය සමාන කළ හෙතෙම නිවෙස, පාසල, කම්හල, ආරක්ෂක අංශ තුළ සහ ආණ්ඩුවක විශ්වාසය අත්‍යවශ්‍ය බව පෙන්වා දුන්නේය. පලූදුවන විශ්වාසය අවලංගු කාසියක් සේ ජෝර්ජ් ෂුල්ට්ස් උපමා කරන ලද බව නිසැකය. මහත් විශ්වාසයකින් ගනුදෙනු කරනු ලබන  කාසි අවලංගු නොකර තබා ගැනීමට අප උත්සාහ කළ යුතුව තිබේ. වේගයෙන් වෙනස්වන ව්‍යුහය තුළ විශ්වාසය ඉතා වැදගත්ය. එහෙත් එකිනෙකා ගේ සිට රට රාජ්‍ය අතර පවා විශ්වාස පලූදු වෙන ස්වභාවයක් නිරීක්ෂණය කළ හැකිය. මෑත කාලය තුළ සමාජ මාධ්‍ය භාවිතාව හා එහි ඇතැම් විකෘති ස්වභාවයන් විශ්වාසය යන පදනම අනතුරකට පත් කර තිබේ.

අතීතයේ දී විශ්වාසය ගලේ කෙටූ අකුරකි. ඉරහද පවතින තෙක් වෙනස් කළ නොහැකි තීරණ ගෙන ඇත. එහෙත් වර්තමානයේ දී විශ්වාස කළ හැකි දෑ සීමා සහිත වෙමින් තිබේ. සත්‍ය තුළ පශ්චාත් සත්‍ය යන ආකෘතියක් පැන නැගී ඇති පරිදි පශ්චාත් විශ්වාසය යන භාවිතාවක් ද හදුනා ගැනීමට හැකිවනු ඇත. මෙහි අවසාන ඉරණම ගැන සංවේදී විය යුතුය.

ජාතීන් අතර විශ්වාසය බිද වැටෙන තැනට කරුණු සිදුවෙමින් තිබේ. ආගම් සම්බන්ධ විශ්වාසය පලූදු වී ඇත. ආගමික දර්ශනය ගැන නොව ආගම ඉදිරියෙන් තබා ක‍්‍රියා කරන ආකාරය හමුවේ මෙම ගැටළු ඇතිවන බව නිරීක්ෂණය කළ හැකිය. ජන සමාජය, ආයතනික රාමු, ජාතික හා දේශපාලනික නායකයන් විශ්වාස නොකරන තරමට පත්ව තිබීම ද අද මුහුණ පා ඇති ගැටළුවකි. අවසානයේ දී රටවල් අතර පැවැතිය යුතු එකිනෙකා විශ්වාස කරන හා එකිනෙක රටවල් වලට ගරු කරන පිලිවෙත් අක‍්‍රමවත් වී ඇත. මෙහි ප‍්‍රතිඵලයක් වශයෙන් භයානක ප‍්‍රතිඵල ඇති කරන්නට ඉඩ ඇති බව සැකයක් නැත. සම්ප‍්‍රදායික ව්‍යුහ කෙරෙහි විශ්වාසය පලූදුවන විට අලූතින් ඇති කරන මිත්‍යා සංකල්ප හා චර්යාධර්ම විශ්වාස කරන්නට ජනතාව පෙළැඹෙන්නට ඉඩ ඇත. අන්ධ විශ්වාස හේතුවෙන් විනාශකාරී සිද්ධි වලට පෙළැඹේ. ලෝක ඉතිහාසයේ එවැනි අවස්ථා ගණනාවකි.

අප ජීවත්වන වටපිටාව තුළ එදිනෙදා ගන්නා තීන්දු තීරණ අතර විශ්වාසය තිබේ. තීරණ තුළ වාසි අවාසි කොටස් දෙකකි. විශ්වාසය සදහා වාසි පමණක් නොව අවාසිද සම සිතින් භාර ගැනීම අවශ්‍යය. විශ්වාසය තැබීමෙන් සිදුවිය හැකි අවදානමට සූදානම් විය යුතුය. ජෝර්ජ් ෂුල්ට්ස් වැනි විරල පුද්ගලයෝ ජීවත් වූ යුගය අවසාන වෙමින් තිබේ. අද අපට සිටින ඇතැම් නායකයන් හෝ විද්වතුන් විශ්වාසය ගැන තකන්නේ නැත. එදිනෙදා කටයුතු වල දී තාවකාලික ජනප‍්‍රියත්වයට තීරණ ගන්නා අතර දුර දිග බලා කටයුතු නොකරයි. එය අවාසනාවන්ත තත්ත්වයකි. රට තුළ ජන කොටස් අතර විශ්වාසය තහවුරු කරන නිසි පිලිවෙලක් අවශ්‍යය. සිංහල ජනතාව හා දෙමල ජනතාව පමණක් නොව සියළු ජනී ජනයා අතර රටවල් සමග එකට කටයුතු කරන්නට අවශ්‍යය. චීනය හා ඉන්දියාව සමග පමණක් නොව ඇමරිකාව හා යුරෝපා ඇතුළු ලොකු කුඩා රටවල් සමග අනන්‍යව ගනුදෙනු කරන පිලිවෙලක් සකස් කරගත යුතුය. විශ්වාසය එහි ලා වැදගත් පදනමකි.

නිදහස් රටකට හෝඩුවාවක් ති‌බේද?

ප්‍රතිචාරයක් ලබාදෙන්න

2021 /02/ 03 – ලංකාදීප

නිදහස් රටක්, නිවහල් අධ්‍යාත්මයක් ප‍්‍රාර්ථනය වී තිබේ. හැත්තෑ තුන් වැනි නිදහස් දිනයේ පවා අරමුණ නොවෙනස්ය. පළමු නිදහස් දිනයේ සිට හෙට උදාවන දිනය දක්වා පැවැත්ම තියුණු හා සංකීර්ණ මුහුණුවරක් ගෙන ඇත.

එක පැත්තකින් කොවිඞ් වයිරසය සහ එහි ප‍්‍රතිඵලයක් සේ තර්ජනාත්මකව නැගී එන ආර්ථික ප‍්‍රශ්න රටට බරපතල තත්ත්ව ඇතිකර තිබේ. අනෙක් පැත්තෙන් මානව හිමිකම් උල්ලංඝනය වී ඇති බවට නැගෙන චෝදනා ඉදිරියේ අසීරු තැනකය. ඇවිලවීමෙන් පසු ජයග‍්‍රාහී අවසානයක් ගැන කල්පනා කරන පටු කණ්ඩායම් වලට මෙම පසුබිම තුළ උදාහරණ තුනක් දක්වා අතීතය මතක් කර දිය යුතුය.

ඇමරිකානු ජනාධිපති රොනල්ඞ් රේගන් බලයට පත් වූයේ 1981 ජනවාරි 20 වැනි දාය. මාස හයක් යන්නට කලින් එරට ගුවන් ගමන් පාලකවරු වර්ජනයක් ඇරඹූහ. අභ්‍යන්තර හා ජාත්‍යන්තර ගුවන් ගමන් වල අවහිරතා පැන නැගිණ. රේගන් ජනාධිපතිවරයා වර්ජනය කළ 11,359 දෙනෙකු වහාම සේවයෙන් ඉවත් කළ අතර නැවත වතාවක් රැකියාවකට ඉඩ නැති වන පරිදි අසාදු ලේඛණ ගත කළහ. අලූත් පිරිසක් බදවා ගෙන අවහිරතා තුරන් කරගතතේය. එයින් පසු රේගන් පාලනයට වර්ජන හා විරෝධයක් නැවත ඇති වූයේ නැත. 1984 දී බි‍්‍රතාන්‍යයේ ද මෙවැනි සිදුවීමක් වාර්තා විය. ආර්ථික ප‍්‍රතිසංස්කරණ යොජනා වලට එරෙහිව ගල් අගුරු පතල් සේවකයන් ඇතුළු පිරිස් විශාල වැඩ වර්ජනයක් ආරම්භ කළේය. අගමැතිනි මාග‍්‍රට් තැචර් තත්ත්වය පාලනය කරන්නට උත්සාහ කළේය. ශීත කාලයේ ගල් අගුරු හිගය ජනී ජනයා සහ කර්මාන් බලවත් පීඩාවකය.  වර්ජකයන් ඉදිරියේ දණ නොනැමූ ඇය පසුව යකඩ ගැහැනිය ලෙස නම් ලැබූහ. අගමැතිනිය කියා සිටියේ ‘‘රට තුළ සිටින සතුරන් සමග සටන් කරන්නට සිදුවී ඇත. අප අතරම සිටින සතුරන් සමග සටන දුෂ්කර පමණක් නොව නිදහසට තර්ජනයක් ’’ බව ය.

අසූවේ ජූලි වර්ජකයන් ගේ සිද්ධිය ඇමරිකාවේ හා බ්‍රිතාන්‍යයේ සිදුවීම් වලට කලින්  බව මතක් කර දිය යුතුය. ජේ. ආර්. ජයවර්ධන ආණ්ඩුව බලයට පත් වූයේ හයෙන් පහක බලයක් සහිතවය. වැඩ කරන ජනතාව දවසකට රු. දහයක වැටුප් වැඩිවීමක් ඉල්ලා වෘත්තීය සටනක් ඇරඹීය. වෘත්තීය සමිති දහසක් සහ ලක්ෂ හතරකට වැඩි රාජ්‍ය හා පුද්ගලික සේවක පිරිසක් වර්ජනයට එකතු වී සිටියේය. එය ඉතාම තීරණාත්මක මොහොතකි. ‘‘ විධායක ජනාධිපති බලය අනුව තමන්ට බැරි ගැහැනියක මිනිහෙක් කරන්නට හා මිනිහෙක් ගැහැනියක කරන්නට පමණක් බව’’ මරදානේ පැවැති ජන හමුවක දී ජනාධිපති ජේ. ආර්. ප‍්‍රකාශ කළේය. සේවයට වාර්තා කළ යුතු අන්තිම දිනයක් නිවේදනය කළේය. එදින නොපැමිණි හතලිස් දහසකට වැඩි පිරිසක් සේවය අතහැර ගියා සේ සැලකීය. ආණ්ඩුව එතැනින් නතර වූයේ නැත. ආණ්ඩු පක්ෂයේ මන්ත‍්‍රීවරුන් ගෙන් සිය දෙනෙකු බැගින් ලැයිස්තු අනුව වහාම අලූතින් සේවයට බදවා ගත්තේය. ජූලි වර්ජනයේ දුක්බර කතාන්දරයක කොටස් අදටත් පවතී.

ජනාධිපති ජේ. ආර්. ගේ තීන්දුව ඇමරිකාව හා බි‍්‍රතාන්‍ය නායකයෝ පසුව අනුගමනය කළේ ද යන්න වෙනම විශ්ලේෂණය කළ යුතුය. එහෙත් ජනතා ඡන්දයෙන් බලයට පත්වන ආණ්ඩු තීන්දු ගන්නේ ජනතා අභිමතාර්ථ සාක්ෂාත් කිරීම අරමුණු කරගෙනය. පැන නැගෙන විරෝධතා කෙළවර විය හැකි තරම ගැන වෙනත් උදාහරණ අවශ්‍ය නැත. රට තුළ වර්ජන හා විරෝධතා ඇවිලෙමින් තිබේ. ආණ්ඩුවේ තීරණ හෙලා දකිති. ආර්ථික සහ මානව හිමිකම් ප‍්‍රශ්න අනෙක් පැත්තෙන්ය. ඇතුලත හා පිටත උණුසුමක සිටින ආණ්ඩුවක් ගන්නට ඉඩ ඇති තීරණ වල භයානකත්වය ගැන විරෝධතා මෙහෙයවන්න අන්තවාදීන් කල්පනා කළ යුතුය.

ශ‍්‍රී ලංකාව විශාල ණය අර්බුදයකය. ජනතාව සහන ඉල්ලමින් සිටී. වයිරසයේ බලපෑම තිබිය දී පවා රට ලොක්ඩවුන් නොකර, නිෂ්පාදනය හා සේවා කරගෙන යෑම සදහා බලවත් වෑයමකය. ඉන්දියන් සාගරයේ මතු වී තිබෙන ජාත්‍යන්තර දේශපාලන උණුසුම ද සැලකිය යුතු කාරණයකි. ඇමරිකාව, ඉන්දියාව හා චීනය යන බලවත් රටවල් තුනක සියුම් බලපෑම් මැද උපායශීලීව තීරණ ගන්නට සිදුවී තිබේ. ජාත්‍යන්තර සබදතාවල දී නායකයන් ගත් වැරදි තීරණ වලට ගෙවන ලද වන්දිය ත‍්‍රස්ත‍්‍රවාදයෙන් කෙළවර වී තිබේ. දේශපාලනයේ දී රට තුළ අනුගමනය කරන කරන, ඡන්ද පදනමට කතා කරන ජනප‍්‍රිය ක‍්‍රම ජාත්‍යන්තරයට ගැලපෙන්නේ නැත. අනෙක් අතට තාක්ෂණය වේගයෙන් වෙනස් වන අතර අලූත්වන ස්වභාවය අනුව ආයෝජනය නොකළහොත් රටට පැවැත්මක් නැත. අනාගත පරපුර නැවතත් අන්ධකාර යුගයකට තල්ලූ කිරීමකි. පවතින රාමුව වෙනස් කර අලූත් රටක් නිර්මාණය කරන්නට ගත යුතු තීරණ සම්බන්ධයෙන් මැදහත්ව පියවර ගැනිම අවශ්‍යය. ආණ්ඩුව සහ වෘත්තීය සමිති විරෝධතා අතර එකගතාවයක් ඇති කර නොගතහොත් පිපීරීම කොයි මොහොතක ද යන්න නිශ්චිත නැත. 

රටක ඉදිරි ගමනට එකගතාව අවශ්‍ය ඇයි ?

ප්‍රතිචාරයක් ලබාදෙන්න

2021/01/27 -දේශය

ඇමරිකානු ජනාධිපතිවරණය සහ අලූත් ජනාධිපති තෝරා පත්කරගැනීම ගැන තිබුණ කලබැගෑනිය එක්තරා අවසානයක් කරා පැමිණ තිබේ. පැන නැගී තිබුණ තියුණු විවාද අවසන් කළේ ජනී ජනයාගේ සොම්නස සමගය. සංකීර්ණ සහ දැඩි ආරක්ෂාවක් මැද පැවැති ජනාධිපති ජෝ බයිඩන්ගේ පදවි ප‍්‍රාප්තිය සංකේතාත්මක සිද්ධි වලින් බහුලය. තරුණ කිවිදියක ගේ කාව්‍යමය ඉදිරිපත් කිරීම ඇවිලෙමින් තිබුණ හදවත් තෙත් කළේය. ලේඩි ගාගා ජාතික ගීය ගායනා කළේ ඇයට ආවේනික ශෛලියකිනි.

ජනාධිපතිවරයා නිල උත්සව අවස්ථාවේ අංග අතර ශ්‍රේෂ්ඨ කවියෙකු වේදිකාවට පැමිණ නිර්මාණයක් ඉදිරිපත් කිරීම සම්ප‍්‍රදායකි. මෙවර එම අවස්ථාව ලබාගත්තේ විසි දෙහැවිරිදි දක්ෂ කිවිදියක හා සමාජ කි‍්‍රියාකාරිණියක වන ඇමෙන්ඩා ගෝමන් ය. එක්සත්භාවය හා එකමුතුවීමේ පණිවුඩය ඇගේ පරිනත නිර්මාණය තුළ තිබුණි. ‘‘කිසියම් දවසක කෙළවරක් නැති අදුරු සෙවනැලි අවසානයේ දී අප ආලෝකය සොයනු ඇති’’ බව ඇය මුල් වචන වලින් දැක්වූවාය. නොයෙක් බෙදීම් වලින් හෙම්බත්ව තිබුණ ඇමරිකානු සමාජයට එම වදන් මහත් අස්වැසිලිලක් විය. ජෝ බයිඩන් ජනාධිපතිවරයා ඇමන්ඩා තෝරා ගත් පසුබිම ද විචිත‍්‍රය. ඇය ශ‍්‍රවණ හා කථන ආබාධ සහිතය. පසුව මහත් වෑයමෙන් ආබාධ මැඩගෙන තිබේ. බයිඩන් ජනාධිපතිවරයා ද කුඩා කාලයේ දී කථන දුර්වලතා සහිතය. ඔහු අත්විදි ගැහැට සහ වේදනා මැඩ පැමිණි ජයග‍්‍රාහී මාවත ඔස්සේ එන්නට ඇමන්ඩාට ද අවස්ථාවක් නිර්මාණය කළේය. ලාබාල ඇය ඉතා දක්ෂ ලෙස එයින් ප‍්‍රයෝජන ගත් බව ජාත්‍යන්තර මාධ්‍ය වර්ණනා මැනැවින් සනාථ කරයි.

දුබලතා පිලිගැනීම සහ ඒවා උසුලූ විසුලූ වලට හේතුවක් කර නොගැනීම කොපමණ අගය කළ යුතුද? ශාරීරික ආබාධ හෝ පසුබිම අවස්ථා අහිමි කරන්නට හේතුවක් නොවන බව නැවත වතාවක් ඇමරිකානු ජන සමාජය ලෝකයට පෙන්වා දී ඇත. ජනාධිපතිවරයෙකු දිවුරුම් දෙන අවස්ථාව ඉතා ගාම්භීර හා මැනැවින් ප‍්‍රදර්ශනය විය යුතු නමුත් ගතානුගතිකත්වයෙන් ගැලවී අලූත් අර්ථකථන හා සමාජ සංකේත වෙනුවෙන් යෙදවීම අභිමානයට කැළලක් වූයේ නැත. තවත් සමාජානුබද්ධ කරන්නට සමත්විය. ඇමන්ඩා ගේ කවිය හා ලේඩි ගාගා ශිල්පිනිය වෙනස් ශෛලියකට ඇමරිකානු ජාතික ගීතය ගායනා කිරීම අමිහිරි සිද්ධි අමතක කර නැවුම් වාතාශ‍්‍රයක් සපයන කවුළු විවර කරන්නක් බවට පත් වූ බව සදහන් කළ යුතුය. මාස කිහිපයක් තිබුණ කැළඹිලි, කැපිටල් මන්දිරය ආක‍්‍රමණය කර සිදුවූ ගැටුම්, ජනාධිපතිවරණ ප‍්‍රතිඵලය ප‍්‍රතික්ෂේප කරන විරෝධතා යනාදිය තුනී කර අලූත් පරිසරයක් මොහොතකින් ඇතිකරන්නට හේතුවිය.

රටක් ඉදිරියට ගමන් කරන්නට එකගතාවයක් අවශ්‍යය. ශ‍්‍රී ලංකාවට ඉගෙනගත යුතු පාඩමක් තිබේ. හැම තැනෙකම, හැම දෙයකටම බේධ ඇති කරගනිමින් සිටිමු. එකිනෙකා බෙදී මහා ඝෝෂාවකි. මාධ්‍ය භාවිතාව තුළ පවා විවාදය හැර අනෙකක් නැත. සමාජ මාධ්‍ය එම වාද විවාද තවත් විකෘති කරමින් සිටී. සියළුම අවස්ථාවලදී විරුද්ධ වන නමුත් සමහර අවස්ථාවල දී සමාජයක් වශයෙන් එකට එකතුවිය යුතුය යන සංකල්පය අපට නැත. එය අභාග්‍යයකි. පෞඩ ඉතිහාසය ගැන අභිමානයෙන් සිටින ශ‍්‍රී ලංකාවේ වර්තමානය ගැන ඉතිහාසයේ ලියැවෙන්නේ කෙසේද? කෙබදු පැවැත්මක පසුවූ ජන කොට්ඨාශයක් වශයෙන්ද?

රටට නිදහස ලැබුණු දිනය සමරන දවස එළැඹෙමින් තිබේ. සුපුරුදු සම්ප‍්‍රදායික පෙළ ගැසීම හැර අනෙක් අංගයක් ඇතුලත් කළ නොහැකි ඇයි? හේතුවක් තිබේ. දේශපාලනඥයන්ගේ කතා සහ හමුදා උත්තමාචාර හැර වෙනස් දෙයක් කරන්නට උත්සාහ කළහොත් අවඥාවට ලක් වනු ඇත. මරාගෙන මැරෙන විරෝධතා ඇති කරනු නිසැකය. එක රටක්, එක ජාතිකයක් වශයෙන් නැගී සිටින්නට කලින් එක දෙයක් වෙනුවෙන් හිස ඔසවන්නට සූදානම් විය යුතුය. සම්ප‍්‍රදාය පමණක් නොව සමාජය ඔසවා තබන සංකේත ගැන ද අත්සවයක දී යුහුසුළුවීම ඉතා වැදගත්ය. නිදහස් උළෙල පමණක් නොව රටේ හැම තැනකම පවත්වන එකිනෙකට වෙනස් උත්සව වල දී ජනතාවාදී අවස්ථා ඇති කරන්න. පවතින කොවිඞ් වයිරස තත්ත්වය ඇතැම් පාලනයකට හේතුවක් විය හැකිය. එහෙත් අලූත් ආරම්භයකට ද අවස්ථාවකි. ජාති, ආගම්, කුල, පන්ති හා පැලැන්ති පැත්තකට කර රටක් ගොඩනගන්නට තරම් ශක්තිමත් අලූත් අදහස් රටට අවශ්‍යය.

රටත් සමාජයත් අවුල් කරන අන්තවාදීන් ගැන දෙවරක් සිතමු

ප්‍රතිචාරයක් ලබාදෙන්න

2012/01/20- ලංකාදීප

ජන සමාජය නිතිපතා මුහුණ දෙන ප‍්‍රශ්න සංකීර්ණ මුහුණුවරක් ගනිමින් තිබේ. නොසිතන පැති වලින් අරගල පැන නැගෙන අතර ඉතා තාක්ෂණිකය. තොරතුරු සන්නිවේදනය හා සමාජ මාධ්‍ය භාවිතය ඔස්සේ ජන සමූහ දේශ සීමා රහිතව ජාල ගතවන බව නිරීක්ෂණය කළ හැකිය. ජාල ගත අරමුණු සදහා පොළඹවන අදිසි බලවේග බලවත් කැළඹිලි ඇති කරන්නට සමත්ව තිබේ. සංවර්ධන අභිලාශය හා සැනසිලිදායක ජන ජීවිතය ගැන තිබුණ අපේක්ෂා වෙනස් පැතිවලට යොමු වී ඇත.

අතීතයේ දී ආහාර සොයා ගැනීම සදහා දඩයම් කළ මනුෂයෝ සුනඛයෝ ඇති කළහ. වැදි ජනතාව මෑත කාලය දක්වා දඩයමට සුනඛයෝ ඇති කළ අතර ආර්. එල්. ස්පිට්ල් ශූරීන් ගේ කෘති වල වැද්දන් හා දඩයමට දක්ෂ බල්ලන් සමග තිබුණ තද සම්බන්ධතා මැනැවින් විග‍්‍රහ කර තිබේ. විධානයට කඩා පැනීමේ සමත් සුනඛයෝ ගොදුර අත නොහරිති. උසිගැන්වීමේ දී හාම්පුතා ගේ විසිල් හඩට අවනත වෙති. නූතන සමාජ මාධ්‍ය හැසිරවීමේ දී ‘‘ඩෝග් විසිල්’’ සංකල්පයක් ගැන කියැවෙයි. කොතැනකින් හො මතුකරන ශබ්ධයකට බුරා පැන නැගෙන ව්‍යාපාර මතු වී තිබේ. මෙම ශබ්ධ ඇති කරන්නෝ විශේෂිතය. සමාජය අනතුරකට පත් වන බව නොසලකන අතර නොයෙක් අන්තවාදී අදහස් වපුරවමින් සිටිති.

ෆේස්බුක්, ඉන්ටග‍්‍රෑම්, ටිවිටර් හා වට්ස් ඇප් වැනි සමාජ මාධ්‍ය ජාලා ආරම්භ කරන්නේ විනාශය අරමුණු කරගෙන නොවේ. හිතමිතුරු සමාජ හා අදහස් හුවමාරුව අරමුණු කරගෙනය. සමාජ සම්බන්තා අලූත් වටයකින් දියුණු කිරීමටය. පොදු අරමුණු පරාජය කර බියකරු අභිමතාර්ථ ඉදිරියට පැමිණ ඇති අතර බටහිර සිදුවන මෙකී විපර්යාස දියුණු වෙමින් පවතින රටවල් ආක‍්‍රමණය කරමින් සිටී.

ප‍්‍රජාතන්ත‍්‍රවාදය ශක්තිමත් කරන්නට සමාජ මාධ්‍ය සහ තොරතුරු සන්නිවේදන ජාලා මහත් පිටිවහලක් වනු ඇති බවට කරන පුරෝකථන විනාශවීම මෙහි භයානක පැත්තකි. බටහිර රටවල සිදුවන දේ ගැන විමර්ශණශීලීව සිටින චීනය වැනි රටවල් පවා ස්වකීය සමාජ වලට නුදුරු කාලයේ දී එල්විය හැකි අනතුර ගැන තද අවධානයක් යොමු කර ඇති බව වාර්තා දක්වයි.

සමාජ මාධ්‍යවලින් නිකුත් කරන අදහස් කෙටිය. ඉතා අන්තවාදීය. මේවායේ ඇත්ත නැත්ත සොයන්නට කිසිම අවකාශයක් නැත. වේගයෙන් හඹා එන රැළි සම්ප‍්‍රදායික සමාජ ව්‍යුහ අර්බුදයකට තල්ලූ කරමින් සිටී. ජනිත කරන සමහර අදහස් වලින් අලූත් දෙයක් නිර්මාණය කරන්නේ නැත. ඇතැම් අදහස් කිසියම් කොට්ඨාශයක උද්දාමය වෙනුවෙන් පමණකි. සත්‍ය කුමක් ද යන්න වටහා ගැනීමට ඉඩක් දෙන්නේ නැත. ව්‍යාකූලත්වය ඇතිකරයි. බලය වෙනුවෙන් පවා සමාජ මාධ්‍ය වල ස්ථිර හැසිරීමක් නැත. එහි අන්තවාදී ප‍්‍රවේශය පාලනය කරගැනීමට මෙම මාධ්‍ය නියාමන ආයතන පවා අසමත්ය. ඩොනල්ඞ් ට‍්‍රම්ප් ජනාධිපතිවරයාගේ ඡුන්ද ව්‍යාපාරය එයට හොද උදාහරණයකි. අසත්‍ය පණිවුඩ හා අන්තවාදී අදහස් ක්ෂණයකින් අවුලවන ලද අතර ඒවායෙන් ඇති කරන අවසානය සාමාන්‍ය ජනතාව උන්මත්තකයන් කරන තරමට පත්වූ බව මධ්‍යස්ථ විචාරක මතය වී තිබේ.

උසිගැන්වීමෙන් ඇති කරන කැළඹීම එහි, අවසානයේ දී ඇති කරන සමාජ පැවැත්ම ගැන පූර්ව නිගමනයකට එළැඹිය නොහැකිය. තරුණ පරපුර මෙම බිහිසුණු ඉරණම අභිමුවෙහි සිටී. පුරූෂාර්ථ හා සමාජ සාරධර්ම ගැන තක්සේරුව අවම වී ඇත. භීතිය හා කුමන්ත‍්‍රණ ඇති කිරීමෙන් නඩත්තු වන කල්ලි ජනතාව ඇදගෙන යන අවසානය ගැන කල්පනා කරන්නේ නැත. මාධ්‍ය නිදහස එක කෙළවරකි. අනෙක් කෙළවර නිදහස අයුතු සේ කරන භාවිතාවය. සමාජ මාධ්‍ය භාවිතාව එල්ල කරන පීඩනය ආණ්ඩු වලට පමණක් නොව නිර්මාණශීලීව මෙම ව්‍යාපාර ඇතිකරන සමාගම් ද අනතුරකට තල්ලූ කර තිබේ. ලෝකයේ බලවත්ම ප‍්‍රජාතන්ත‍්‍රවාදී රාජ්‍ය සේ සැලකෙන ඇමරිකාවේ වත්මන් ජනාධිපතිවරයාගේ සමාජ මාධ්‍ය ගිණුම පවා අවහිර කරන තැනට ඇවිලීම මෙහි තරම විදහා දක්වයි. දියුණුවන රටක, ගුණ දහමින් පෝෂණය වී සිටින සමාජයකට අත්විය හැකි ඉරණම ගැන විද්‍යාර්ථීහු සිය අවධානය වහා අවධානය යොමු කළ යුතුය.

ජාතිකවාදයට එරෙහි ප්‍රබල බලවේගයක්

ප්‍රතිචාරයක් ලබාදෙන්න

2021/01/06 – ලංකාදීප

ජන සමාජ එකමුතුකර, එක අරමුණක තබන වෑයම ඉතා දුෂ්කරය. විවිධ සංස්කෘතී, එකිනෙකට වෙනස් භාෂා, අදහන ආගම් සහ අසමාන සමාජ පසුබිම් ගැටළු ඇතිකරයි. එය සාමාන්‍යයෙන් සිදුවන දෙයකි. සමාජ සංකල්ප එකී අරමුණ සංකීර්ණ කරන තැනකය. ප‍්‍රකට ගවේශනශීලී කතුවරයෙකු වූ ජෝන් ලැකාරේ ප‍්‍රකාශ කරන ද අදහසක් මෙහි දී උපුටා දැක්විය හැකිය. ‘‘දේශපේ‍්‍රමය හා ජාතිකවාදය අතර ප‍්‍රධාන වෙනස්කමක් ඇත’’. ඔහුට අනුව ජාතිකවාදයට සතුරෙකු අවශ්‍යය. අසල්වාසීන් සතුරන් කරන තරම ජාතිකවාදයට බිහිසුණුය. ජෝන් කෝන්වෙල් වන හෙතෙම ආරක්ෂක හා ආරක්ෂක බුද්ධි අංශවල සේවය කළ බි‍්‍රතාන්‍ය ජාතිකයෙකි. හෙතෙම සේවයේ නිරතව සිටිය දී නවකතා රචනා කළේය. විශිෂ්ඨ ප‍්‍රතිචාරයක් හිමිවිය. සාහිත්‍යකරණයට එන්නේ ජෝන් ලැකාරේ යන අන්වර්ථ නාමයෙන්ය.

වෙනත් නමකින් ලියන ලැකාරේ සමාජ සංසිද්ධි වෙනස් මානයකින් විනිවිද දකින්නට උත්සාහ කළේය. පසුගිය වසරේ දෙසැම්බර් මාසයේ දී ජීවිතක්ෂයට පත් වූ හෙතෙම  දැනට මහත් ආන්දෝලනයට පත්ව ඇති ජාතිවාදය හා දේශපේ‍්‍රමය ගැන කරන ලද මෙම නිර්චචනය බලවත් අවධානයකට ලක්ව ඇත.

දේශපේ‍්‍රමය අප සියළු දෙනා රට වෙනුවෙන් දක්වන අප‍්‍රමාණ හැගීමකි. දේශපේ‍්‍රමියෙක් බව අගවන්නට කිසිවෙකු නිල පදක්කමක් පළදින්නේ නැත. එය  රට  වෙනුවෙන් හදවතින්ම කරන පරිත්‍යාගයකි. ජාතිකවාදය එසේ නොවේ. රට අවුල් කරන්නට ජාතිකවාදය සමත්ය. දේශපාලනයේ දී එය ආයුධයකි. සමහර දේශපාලනඥයෝ ජාතිකවාදය පටු පරමාර්ථයෙන් ප‍්‍රයෝජනයට ගනිති. සාමකාමීව, සහජීවනයෙකින් වෙසෙන ජනී ජනයාගේ සිත්සතන් අවුල්කරන අතර විනාශය කැදවන්නට ජාතිකවාදයට හැකියාව ඇත. දේශපේ‍්‍රමයට සතුරන් අවශ්‍ය නැත. ජාතිකවාදයේ දී සතුරෙකු සිටී. සතුරාට අභියෝගකර කෑගසා පෙන්වන ඇතැම් දේශපාලනඥයෝ ජාතිය ගලවාගැනීම සදහා වහා පියවර ගත යුතු බව දක්වති. එම ඝෝෂාව රටට සුගතියක් නොවේ. සතුරෙකු රහිතව ජාතිකවාදයක් පවතින්නේ නැත. දේශපාලනයේ දී ජාතිකවාදය පැතිරවීම බහුලව සිදුවෙයි. සතුරන් මවන දේශපාලනඥයෝ ඒවායෙන් ඇති කරන මහා විනාශයෙන් යැපෙන තැනට පත්ව සිටී. එය ඉතාම ඛේදණීය තත්ත්වයකි.

ආගමික, වෘත්තීයවේදීන්, බුද්ධිමතුන් හා මාධ්‍යයේ ඇතැම් පිරිස් ජාතිකවාදය අතට ගෙන තිබේ. වගකීමක් රහිත ස්වභාවය තුළ එය ඉහවහා ගොස් ඇත. බුද්ධ දර්ශනය තුළ අන්තවාදයට ඉඩක් නැත. බහුතර බෞද්ධයන් ජීවත්වන සහ ඉතා බාරධුර ශාසනික මෙහෙවරක නිරත මහා ස්වාමීන්වහන්සේලා සිටින පසුබිමක් තුළ පවා අන්තවාදී වෛරී අදහස් පතුරවන තත්ත්වයක් මතු වී තිබේ. වෛරී අදහස් කිසිම ආගමක දර්ශනය නොවේ. ජාතික හෝ ආගමික මතිමතාන්තර විසුරුවීමක් නොකළ යුතුය. එහෙත් එය සිදුවෙමින් තිබේ. ජාතිය, ආගම, පංතිය පමණක් නොව ජාත්‍යන්තරය ද ජාතිකවාදීව පතුරවන පසුබිම රට ආරක්ෂාකරන මහා කඩතුරාවක් සේ දක්වති. ජාතික හා ආගමික නායකයෝ මෙවැනි අභාග්‍ය සම්පන්න පැති හදුනා ගත යුතුය.

ජාතිකවාදීබව සතුරන් ඇති කරන විට එය ප‍්‍රබලව පතුරවන සන්නිවේදන ව්‍යාපාර බහුලය. සම්ප‍්‍රදායික මාධ්‍ය ඉක්මවා කි‍්‍රියාත්මක සමාජ මාධ්‍ය ධාරා අන්තවාදීන්ගේ ඇවිලවීම් වලට තෙල් ඉසින බව පෙන්වා දිය යුතුය. මෑත කාලය තුළ ලෝකයේ සිදුවූ බරපතල සිද්ධි වලට ජාතිකවාදය හා එය පතුරවන ලද සමාජ මාධ්‍ය බලපෑම හෙළිදරව් කර තිබේ. විනාශය හැර අනෙකක් ජාතිකත්වයෙන් ලැබී නැත. ශ‍්‍රී ලංකාවට අතීතයෙන් අත්දැකීම් තිබේ. පැතිරුණ දරුණු ඇවිලවීම් මතකයේ ඇත. ඒවායෙන් දැවී ගියේ ජන හදවත් පමණක් නොවේ. සබදතා පළුදු විය. ආත්මයක් නැති ගර්භිත සමාජ ඉතිරිවී තිබේ. අප සියළුම දෙනා නැවත නැවතත් පණ පොවන ජාතිකවාදයට ගොදුරුවෙමින් සිටින්නෙමු. අලූතින් ගොඩනැගිය නොහැකි මහා පරිහානියක් අභිමුවෙහි පවා ජාතිකවාදී සතුරන් සොයන තැනට පත්ව ඇති රටකි.

දේශපේ‍්‍රමීත්වය රටට අවශ්‍ය කර තිබේ. ජාතිකවාදය සදහා සතුරන් සොයන ව්‍යුහය පරාජය කර ජනතා සිත් සතන් තුළ ඇති දේශපේ‍්‍රමීත්වය මතු කරගත යුතුව ඇත. තමන්ගේ රටට දක්වන ආදරය වෙනස් කළ නොහැකි එකකි. එය අභිබවා රට කෙරෙහි දරුණු වෛරයක් ඇතැම් ජන කොටස් තුළ කොටස් තුළ ඇතිකරන්නට ජාතිකවාදය සමත්ව තිබේ. එහි විපාක වලින් පාඩම් ඉගෙන ගත යුතුය. දේශපේ‍්‍රමීන් වශයෙන් මහත් ආඩම්බරයෙන් එක රටක  ජීවත්වන පදනමක් සූදානම් කිරීම අවශ්‍යතාවයකි. නව වසරේ අධිශ්ඨානය විය යුතුය.

අලූත් සිතිවිල්ලකින් නව වසරේ අලුත් ගමනක්

ප්‍රතිචාරයක් ලබාදෙන්න

2020.12.30 – ලංකාදීප

නව වසරක් උදා වෙමින් තිබේ. තවත් පැය හතලින් අටකින් අලූත් කාල පරිච්‌ඡේදයක් ඇරඹෙනු ඇත. සුබ පැතුම් හුවමාරු වෙයි. සුපුරුදු පරිදි තැපෑලෙන් කාඞ්පත් ලැබුණ යුගය අවසන්ය. දුරකථනයෙන් නැගෙන මිහිරි නාදය, සමාජ මාධ්‍යයෙන් හෝ විද්‍යුත් තැපෑලෙන් එන පණිවුඩ සතුට ඇති කරයි. දහසකුත් එකක් ප‍්‍රශ්න හා කරදර මැද ගෙවුණ දින සිහිපත් කරන අප සියළු දෙනා අවසාන වශයෙන් මතු ආත්මයක හෝ සැනසිල්ල පිරි ජීවිතයක් ප‍්‍රාර්ථනා කරන බව නිසැකය. මතු ආත්මය කෙසේ වෙතත් ජීවත්වන ජන සමාජය දිව්‍ය ලෝකයකි. අපාය හෝ දෙව්ලොව අප අසල අප අතරම පවතින බව දාර්ශනිකයන්ගේ සිතිවිල්ලකි.

සියවස් ගණනාවකට කලින් යුරෝපයේ අන්ධකාර යුගයක් තිබුණි. ආගමික අන්තවාදයක් විය. දේශපාලනික, ආගමික හා සංස්කෘතික වටපිටාවක් සහිත කැළඹිල්ලක් පැන නැගිණ. සත්‍ය වෙනුවට අසත්‍ය රජ කරවන ලද අතර මිත්‍යාව වැඩි පරාසයක් ආවරණය කරගෙන සිටියේය. වරප‍්‍රසාද ලත් සුළු කණ්ඩායමක් ජනී ජනයාගේ පැවැත්ම පාලනය කර තිබුණ බව සදහන් කළ යුතුය. මෙම අවකාශය තුළ තිබුණ පීඩනය කොපමණ ද යත් ලබන ආත්මයක හැර සැනසුමක් නැති බවට විශ්වාසයක එල්බ සිටියහ. සමාජ පරිවර්තනයක් කළ දාර්ශණික කණ්ඩායමක් ජනතාවට ඇත්ත පෙන්වා දුන්හ. අන්තවාදී මතවාද බැහැර කරන අලූත් අදහස් පතුරවන ලදහ. පෑගී, මිරිකී සිටි ජනතාව මෙම මතවාද වෙත ආකර්ශණීය වූ අතර පාලකයන් සකස් කර තිබුණ සම්ප‍්‍රදායික ගැති රාමුවෙන් වෙන්ව සිතන්නට යොමු වූහ.

බි‍්‍රතාන්‍ය ජාතිකයෙකු වූ තෝමස් මෝ මෙම දර්ශනය ගොඩනගන්නට මුලික වූයේය. එය සිදුවූයේ 1516 දී පමණ ඉතිහාසයේ දී ය. පරිසමාප්ත රාජ්‍යයක් ගැන සිතිවිල්ලක් වූ මෙය යුටෝපියාව සේ හදුන්වන්නේය. විද්‍යාව හා තාක්ෂණයට තිබුණ බාධා ඉවත් කරන්නට තෝමස් මෝ ගෙන ගිය යුටෝපියානු මතවාදයට හැකිවිය. ලෝකය ගෝලාකාර බව හිතන්නට පමණක් නොව ආකාශයේ සැරි සරන්නට ද මුල පිරිණ. නොයෙක් ලෙඩ රෝග වලට හේතු සොයා ගත්හ. ආර්ථිකය හා සමාජය ආවරණය කර තිබුණ කඩතුරා ක‍්‍රමයෙන් ලිහිල් විය. පසුව දක්වන පරිදි යුරෝපයෙන් පැන අලූත් යුගයක් ඇති කරන අරමුණ ඇතිව පෙන්සිල්වේනියාවේ පදිංචියට පැමිණි කණ්ඩායමක් ඇමරිකාව යනුවෙන් රටක් හදන්නේ ද යුටෝපියානු සිහිනය සහිතවය. සියළු පුරවැසියන්ට රාජ්‍ය තුළ සමාජ හා නීතිය සම්බන්ධ සමානාත්මතාවක් ඇති කරන ඇමරිකාව බිහිකිරීම ලෝකයේ දෙවැනි අවදිවීමක් සේ සලකන්නට තරම් ඉක්මන් වූ බව මතක් කර දිය යුතුය.

යුටෝපියානු අදහස පෙරදිග බෞද්ධ අදහස් අනුව නිර්මාණය වී තිබෙන අදහසක් වූ කේතුමතී රාජධානියට යම් පමණකට සමාන කළ හැකිය. සියළු යස ඉසුරින් පිරි කේතුමතිය සර්ව සාධාරණ තැනක් වනු ඇතැයි විශ්වාස කෙරේ. දියසෙන් කුමාරයා පහල වී අනේක විධ අර්බුද මැඩ සන්තුශ්ඨී රාජ්‍යයක් බිහිකරන බවට ද විශ්වාසයක් තිබේ. යුටෝපියාව, කේතුමතිය හෝ දියසෙන් කුමාරයාට පරිබාහිරව තවත් අදහස් ලෝකයේ විවිධ ජන සමාජ තුළ පවතින බව සැකයක් නැත. අවසානයේ දී සියළු තැවුල් නිවා සනසන සුපැහැදිලි වෙරළ තීරයකට අවතීර්ණවීමක් අපේක්ෂා කෙරේ.

සිත් සතන් වල ජනිත වන අදහස් සංකල්ප බවට හැරවිය හැකිය. මතවාද කඩදාසි වල සටහන් කර න්‍යාය වශයෙන් ගොඩනගන්නට හැකියාව තිබේ. දත්ත එකතු කර පර්යේෂණ කළ හැකි අතර ඒවායෙන් සත්‍ය සොයා ගන්නටත් ක‍්‍රම ඇත. සත්‍යය පමණක් නොව එයට බැහැරව ගිය පශ්චාත් සත්‍ය වශයෙන් වූ ව්‍යවහාරයකක් ද වර්තමානයේ භාවිතා වෙයි. හැගීම් හා විශ්වාස එකතුකර, ප‍්‍රකාශවන දේ කිසිම වග විභාගයකික් තොරව සත්‍ය වශයෙන් පිලිගැනීම මෙම පශ්චාත් සත්‍ය යන තලයෙහි හැසිරීම බව දක්වයි. යුටෝපියාවක් හෝ කේතුමතියක් ගැන සිහින මවන ජන සමාජ පශ්චාත් සත්‍ය තුළ පැවැතීම ගැඹුරින් සාකච්ඡා කළ යුතු කාරණයක් බව මෙහි දී සදහන් කළ යුතුය.

නව වසර උදාව සත්‍ය සොයා යා යුතු තීරණාත්මක අවස්ථාව සනිටුහන් කිරීමකි. අනන්තවාරයක් මිත්‍යා මතිමතාන්තරවලට ගොදුරු වූවෝ යතාර්ථය දකින්නටත්, දකින, අත්විදින දේ විශ්වාස කරන්නටත් නැඹුරුවිය යුතුය. අප සියළු දෙනා එකට එකතු වී ක‍්‍රමය වෙනස් කරනු හැර අනෙක් විසදුමක් නැත. එක පුද්ගලියෙකුට එක රාත‍්‍රියකින් සියල්ල වෙනස් කරන හැකියාවක් නැති අතර කැපවීම, ආත්ම ශක්තිය හා ධෛර්යය ජීවිතයට ඉතාම වැදගත්ය. යස ඉසුරු පිරි යුගයක් වෙනුවෙන් නොනවත්වා ඇවිද යා යුතු ගමනක් තිබේ.  නව වසර අලූත් ද්‍රෘෂ්ටියකින් අවදිවන්නට එන අලූත් අවස්ථාවකි.

මිනිසාට සම්පත් ගෙනෙන ගහ කොළ වැවෙන පාරාදීසය

ප්‍රතිචාරයක් ලබාදෙන්න

2020/12/23 – ලංකාදීප

ලෝකය එක යායක එකට, එකමුතුව වෙසෙන සමාජයක් ගැන සිහින දකිමින් සිටියේය. සියල්ල වෙනස් වී තිබේ. කොවිඞ් වයිරසය අණසක පතුරුවා ඇත. එදිනෙදා පැවැත්මට එල්ලකර ඇත්තේ බලවත් තර්ජනයකි. සාමුහිකත්වය වෙනුවට සමාජ දුරස්ථභාවය වැදගත්ම සාධකය බවට පත්ව ඇත. ජන ජීවිතය විස්මිත යුගයකට හරවන ගෝලීයකරණ සංකල්පය අනෙක් පැත්තකට හැරී තිබේ. ගෝලීය වසංගත තත්ත්වය ඉදිරියේ ජනී ජනයා ඉතා අවිනිශ්චිත ස්වභාවයකය.

පරිසරය ගැන නොතකා සම්පත් අසීමිතව පරිභෝජනය කිරීමේ විපාක බව සමහර මතධාරීහු නගන චෝදනාවකි. එල්ලවී ඇති අභියෝගය තියුණු නමුත් මනුෂ්‍යයාගේ ශක්තිය පරාජය කළ නොහැකි බව තවත් පාර්ශවයකගේ අදහස වී තිබේ. මෙම පැති දෙක ගැනම වෙනම අදහස් ඇති බව නිසැකය. එහෙත් සොබා දහම සමග එකගව ගත කරන අලූත් ජීවිතයක් ගැන මධ්‍යස්ථ මතධාරීහු අදහස් දක්වන බව පෙනේ. සංවර්ධනය හා සමානව මහපොලව ආරක්ෂාකර ගැනීමේ වැදගත්කම ගැන ඉතිහාසයේ නොතිබුණ සාකච්ඡාවක් ආරම්භ වී ඇත. කොවිඞ් වයිරසය තුරන් කිරීමේ පියවරකට පසු එළැඹෙන කාල වකවානුවේ දී පරිසරය ආරක්ෂා කරගෙන හැසිරිය යුතු බව එයින් අවධාරණය වෙමින් තිබේ. බලශක්ති නිෂ්පාදනයේ දී ඉන්ධන භාවිතාව අඩු කරන අතර ආහාර නිපදවන ක‍්‍රියාවලියේ දී අහිතකර වායු විමෝචනය නරක බව වටහා ගෙන ඇත. දිරා පත් නොවන දේ භාවිතා කිරීම අත්හරිමින් තිබේ. මහපොලව පමණක් නොව ආකාශය හා සාගරය ද අපිරිසිදු නොකරන තැනට ප‍්‍රතිපත්ති සකස් කෙරෙමින් පවතින බව ලෝකයේ රටවල් හා සංවිධාන අනුගමනය කරන පියවර මැනැවින් දක්වයි.එළැඹ ඇති අවකාශය අලූතින් හිතන්නට අවස්ථාවකි. මෙතෙක් අනුගමනය කරන ලද පිලිවෙල වෙනුවට සතුට සහ සැනසිල්ල වෙනුවෙන් පෙනී සිටින වගකීමක් තිබේ.

ජර්මනියේ විද්‍යාඥයන් කණ්ඩායමක් යුරෝපයේ ජීවත්වන විවිධ ජන කොටස් හා වෙනත් දත්ත ගණනාවක් ආශ‍්‍රයෙන් කර ඇති පර්යේෂණයක් අනුව කුරුල්ලන් වැඩි ප‍්‍රමාණයක් ගැවසෙන තැනක ජීවත්වීම හොද වැටුප් වර්ධකයකට වඩා තෘප්තියක් ඇති කරන බව ඔප්පු කර තිබේ. කාර්ය බහුලත්වය හා ජීවත්වන පරිසරයේ තිබුණ සංකීර්ණ ස්වභාවය නිසා පලාගිය සියොතුන් නැවත කැදවන අවශ්‍යතාවයක් ඇති බව මෙම පර්යේෂකයන් පෙන්වා දෙයි. පරිසරය ආරක්ෂා කරන, කුරුල්ලන් බහුලව ජීවත්වන වටපිටාවක වාසය තෝරා ගැනීම ඉතා ඥාණාන්විත බව දක්වයි. මෙහි දත්ත උපුටා දැක්වීම සුදුසුය. කුරුළු විශේෂ දහ හතරක් වෙසෙන පරිසරයක වාසස්ථානය තිබේනම් එය වාර්ෂිකය ඇමරිකානු ඩොලර් 1,806.27 ක වැටුප් වර්ධනයක් හා සමාන බව ගණන් බලා ඇත. වැඩිහිටියන් විසි හයදහසක් මෙම පර්යේෂණයට සම්බන්ධ කරගෙන ඇති බව දැක්වෙයි. හරිත පරිසරය  හා ජලාශ සහිත ප‍්‍රදේශවල කුරුලූ වර්ග වැඩි ප‍්‍රමාණයක් හදුනාගෙන ඇත. නාගරික ප‍්‍රදේශයක නමුත් කුරුල්ලන් ගැවසෙන ස්ථානවල ජීවත්වන අයවලූන් සන්තෝෂයෙන් කල්ගතකරන බව හදුනාගෙන තිබේ. එම සතුට ලබා ගන්නට වැය කළ හැකි මිල ගැන තක්සේරුවක් කළ නොහැකි නමුත් සාමාන්‍යයෙන් වැටුප් වර්ධකයක් සේ සැලකිය හැකි බව පර්යේෂණ වාර්තාව දක්වන වැදගත් කරුණකි.

නගර සැලසුම් වල දී ස්වභාවික පරිසරය වෙනස් කෙරේ. ගහ කොල හා ස්වභාවික ජලාශ අඩුවන විට කුරුල්ලෝ එම පෙදෙස් හැරයති. එහිම රැදෙන කුරුල්ලන් පවා කැදැලි තනන නමුත් බෝවීම අඩු බව දැක්වෙයි. මිනිසුන් ගැන පමණක් නොව ගහ කොළ, කුරුල්ලන් හා සියළු සතුන් සමග එකට වාසස්ථානය ඉතාම සන්සුන්, සතුටුදායක පැවැත්මක් සහතික කරයි.

අලූත් ආරම්භයක් ගැන කල්පනා කරන අප සියළු දෙනාටම වැදගත් පණිඩුවයක් මෙහි තිබේ. ඉඩම් වෙන්දේසියකින්, ඉතාම කුඩා බිම් කැබැල්ලක් මිල දී ගෙන නිවහනක් තනා ගෙන එහි තාප්ප බැද ආරක්ෂා කරගත් පමණකින් සැනසුමක් ලැබෙන්නේ නැත. විවේකයකට පිට පලාතක සංචාරයකට අවස්ථා අඩුවන විට හොදම නිවෙසක පවා දැනෙන ඒකාකාරීත්වය දරුණු බව වටහා ගත යුතුය. අත්දැකීම් වලින් පාඩමක් ඉගෙනගත යුතුය. සොබාදහම විනාශ කරන ආරත්මාර්ථකාමී පැවැත්මකින් ජීවිතයට ලැබෙන සැනසිල්ලක් නැත. තවත් දින දහයකට අඩු කාලයකින් උදාවන නව වසරේ අනාගතය වෙනුවෙන් කුරුල්ලන්ට එන්නට දොරටු විවර කළ යුතුය.

Older Entries Newer Entries