LOGO

2019/11/19 – ලංකාදීප

බ්‍රිතාන්‍ය යෝක්ෂයර් ප්‍රාන්තයේ ප්‍රදේශයක් පසුගිය සතියේ ගංවතුර තර්ජනයට ලක් විය. දෙදහසක පමණ පිරිසක් විපතට පත් වූ බව වාර්තා වෙයි. දින පහකට පසු එරට අගමැති බොරිස් ජොන්සන් විපතට පත් පිරිස ගේ සුව දුක් විමසීමට පැමිණියේය. ඒ වන විට සහන සේවකයන් පැමිණ විනාශ වූ තැන් පිලිසකර කිරීමේ කටයුතු සෑහෙන දුරට අවසන් කර තිබුණ අතර ජනතාවට සෑහෙන සහන ඛෙදා දී තිබුණි. ජනතාව ඔහුගේ පැමිණීම ඉවසා සිිටයේ නැත. අපි ගැන හොයන්නට එන්නේ දැන්ද? අයෙකු අගමැතිවරයාගෙන් කෙලින්ම ප්‍රශ්න කළ අතර එම සිද්ධිය ලෝකය පුරා විකාශය වී තිබේ. හදිසි, වැදගත් රාජකාරි තිබුණ බව කියා සිටි අතර පැමිණීමට දින පහක් ගතවීම ගැන කණගාටුව පළ කරන ලද නමුත් විපතට පත් වූවෝ එයින් සෑහීමකට පත් වූයේ නැත.

ලන්ඩන් නගරාධිපති වශයෙන් ඉතා ඉහළ ජනපි්‍රයත්වයක සිටි බොරිස් ජොන්සන් පසුව පාර්ලිමේන්තුවට තේරී පත් වූ අතර තෙරේස් මේ අගමැතිනියගේ ඉල්ලා අස්වීමෙන් පසු ධුරයට පත් ව වැඩි කාලයක් ගතවී නැත. හොද පිලිගැනීමක් තිබුණ ඔහු වෙත ජනතා අප්‍රසාදය තියුණු වී තිබේ.

මෙම සිද්ධිය ප්‍රජාතන්ත්‍රවාදයේ තරම දැනගන්නට සාක්ෂියකි. ජනතා  කැමැත්ත වැඩි කල් පවතින්නේ නැත. ඉතා ඉහළට ඔසවා තබන ජනතාව වැඩි කාලයක් යන්නට මත්තෙන් පහලටම තල්ලූ කරයි. පිරිහීම ඇරඹෙන්නේ ජයග්‍රහණයත් සමගය. ජය ඛෙදාගන්නට සෑහෙන පිරිසක් සිටින අතර එම සියළුම දෙනා කොටස්කාරයෝ වෙති. තමන්ට රිසි පරිදි, තමන්ට අවශ්‍ය තැනක තීරණ නොගන්නා පාලකයා කියනකොට එහෙමයි කරන කොට මෙහෙමයි යන විවේචනයට ගොදුරුවීම වැලැක්විය නොහැකිය.

බ්‍රිතාන්‍ය අගමැතිවරයා බරපතල අර්බුදයකය. බ්‍රික්සිට් නොඑසේනම් යුරෝපා හවුලෙන් ඉවත්වන තීරණය ක්‍රියාවට නැංවිය යුතු තැනක සිටී. විරුද්ධ දේශපාලන පක්ෂවල පීඩනය තදබල එකක් වී ඇති අතර පාර්ලිමේන්තුවේ බහුතර බලය ආරක්ෂා කරගැනීම පවා ගැටළුවකය. ලන්ඩනයෙන් බැහැර ප්‍රදේශයක ගංවතුර තත්ත්වයක දී වහා එතැනට නොපැමිණීමට දක්වන හේතු යුක්ති සහගතය. නමුත් ජනතාව ඉවසන්නේ නැත. සිය නායකයා වහා තමන් අසලට එනු ඇතැයි අපේක්ෂා කරති.

ශ්‍රී ලංකාවේ දේශපාලනය එයට වඩා උණුසුම්ය. පුද්ගලික සම්බන්ධතා සියුම්ය. මංගල්ලයක දී සාක්ෂිකරු විය යුතු අතර අභාවයක දී පැමිණ සෝක විය යුතුය. අහම්ඛෙන් හෝ නොසලකා හැරීමක් සිදුවීම විනාශයක ඇරඹුමක් විය හැකිය. බලයට පත් අලූත් ජනාධිපතිවරයා පමණක් නොව ජනාධිපතිධුරයට පත් කළ තම නායකයාගෙන් අසීමිත දේ අපේක්ෂා කරන පුරවැසියන් ද  මෙම තත්ත්වය මැනැවින් තේරුම් ගැනීම අවශ්‍යය. කළ හැකි දේ බොහෝ වන අතර කළ නොහැකි වූ යමක් ගැන පෙන්වා දෝෂ දර්ශනය පහසුය.

දශක කිහිපයකට කලින් නායකයන් හා වැසියන් අතර පරතරයක් තිබුණි. නූතන සන්නිවේදනය ඉතා ප්‍රබලය. එහි බලවත්කම කොපමණ ද යත් නායකයන් කරන, කියන හා හැසිරෙන ආකාරය කිසිසේත් සැගවිය නොහැකිය. ජනතාව සියල්ල නිරීක්ෂණය කරන අතර වැරැද්දක් අල්ලා ගැනීමට හොදටම අවස්ථාව තිබේ. අලූත් ජනාධිපතිවරයා බලයට පත් වූයේ විශාල බලාපොරොත්තු ප්‍රමාණයක් සමාජය තුළ විසුරුවමින් වන අතර ඒවා වහා ක්‍රියාවට නැගෙනු ඇතැයි ජනතාව බලා සිටිති. ගංවතුර ගලා දවස් පහක් යන තෙක් අගමැතිවරයා නොපැමිණීම බ්‍රිතාන්‍ය වැසියන්ට තරමක දිග කාලයක් විය හැකි නමුත් ශ්‍රී ලංකාවේ දී ස්වභාවය එයටත් ඉක්මන්ය. මහා ජනවරමකින් ඔසවා තබන නමුත් මාසයක් දෙකක් යන විට නරක දකින්නට පෙළැඹේ. අභිනව ජනාධිපතිවරයා, ආණ්ඩුව සහ දේශපාලනඥයෝ මෙම ස්වභාවය අවබෝධ කරගෙන ඉක්මන් සහ ප්‍රයෝගික සැලසුම් ඉදිරිපත් කිරීම සුදුසුය.