milinda-prashna

2015/06/24 – ලංකාදීප

එකිනෙකට වෙනස් ක්ෂේත‍්‍රවල අනගිභවනීය විශිෂ්ටයෝ එදිනෙදා ජීවිතයේ දී අපට හමුවෙති. නළු නිලියන්ය. රංගධරයන්ය. නොඓස්නම් අති විශිෂ්ට දක්ෂතා පෙන්වන ක‍්‍රීඩක කි‍්‍රඩිකාවන්ය. අති දක්ෂ වෛද්‍යවරු නොඑසේනම් ලේඛකයන් හෝ නිවේදක නිවේදිකාවන්ය. නොඑසේනම් කර්මාන්ත හෝ ව්‍යාපාරික අංශවල දැවැන්තයන්ය. මෙම සියලූ අංශ වල පරිපූර්ණත්වයට පත්වූවෝ රට තුළ බලවත් පිළිගැනීමට ලක්ව සිටිති. රට තුළ පමණක් නොවේ ජාත්‍යන්තරව ද, ඇගයීමට ලක්වෙති.

සමාජයේ ඉහළ තැන් වලට ප‍්‍රවේශ වූ මෙම ජනකාන්ත අසිරිමත් මිනිසුන්ට සෙසු පොදු ජනතාව ගරු කරන්නේ ඇයි? එය අවධානයට ගත යුතු එකකි. එක් එක් ක්ෂේත‍්‍රවල මුදුනටම පැමිණි ඔවුන් තමන්ට කළ නොහැකි දෙයක් කරන්නට සමත් වූ දැවැන්තයන් ලෙස සලකන හෙයින් බව පිළිගත යුතුය. එලෙස ඉහළම තැනකට පැමිණ සමාජයේ තරු ලෙස බැබලෙන්නේ විශාල කැපවීමක ප‍්‍රතිඵලයක් වශයෙන්ය. එලෙස තාරකා බවට පත්වීම ජනප‍්‍රියත්වයයි. අත්පත් කරගත් ජනප‍්‍රියතාව තාවකාලික එකකි. සමාජ ගෞරවය දිනාගන්නට ජනපි‍්‍රයත්වය ඉක්මවා ගිය භාවිතාවකට ගමන් කළ යුතුව ඇත.

ශ‍්‍රී ලංකාවේ අතිශය ජනප‍්‍රිය චරිත එක්තරා අවස්ථාවක ක්ෂේත‍්‍රය වෙනස් කරයි. තම ජනප‍්‍රියතාව උපයෝගී කරගෙන දේශපාලනයට පැමිණෙයි. දේශපාලන පක්ෂවල ස්වභාවය සමාජ නායකයන් එකතු කරගෙන ඡුන්දය දිනා ගැනීමය. පවතින ක‍්‍රමය තුළ දේශපාලනය සහ දේශපාලනඥයා ගැන සමාජ ගරුත්වය හො`ද එකක් නොවේ. හො`ද නරක සියලූම දේශපාලනඥයන් ගැන සමාජය තුළ ඇත්තේ පොදු මිනුම් දණ්ඩකි. එවැනි පසුබිමක් තුළ පවා ජනප‍්‍රිය චරිත දේශපාලන වේදිකාවට එකතු වෙමින් සිටී. දේශපාලනය තුළින් රටට මෙහෙවරක් කළ හැකි යැයි මෙම චරිතවල පොදු අපේක්ෂාව බව පෙනේ. දේශපාලන ක්ෂේත‍්‍රය තුළ අවස්ථා පවතින අතර එම අවස්ථා යුක්ති සහගත ආකාරයට මෙහෙයවන්නට තමන් දායකවීම වගකීමක් යැයි විශ්වාස කරන බව නිරීක්ෂණය කළ හැකිය.

දේශපාලනඥයන් පොදුවේ නිග‍්‍රහයට ලක්වන නමුත් පවතින ක‍්‍රමය යහපත් තැනක් බවට පත්කරන්නට නම් ජනප‍්‍රිය එක් එක් ක්ෂේත‍්‍රවල නායකයන්ට වගකීමක් ඇති බව ඇත්තකි. නමුත් තමන් නියෝජනය කරමින් සිටි ක්ෂේත‍්‍රය වෙනුවට දේශපාලනය තෝරා ගත් අභිමානවත් පුරවැසියන්ට අත්පත්ව ඇති ඉරණම ගැන සාකච්ඡුා කිරීම අවශ්‍ය කාරණයකි. ක්ෂේත‍්‍රයේ විශිෂ්ටයෙකු ලෙස සමාජයට ලබාදුන් පූර්වාදර්ශ සහ ඒ සම්බන්ධයෙන් තිබූ පිළිගැනීම ක‍්‍රමයෙන් දුර්වල තැනකට පත්වීම ගැන විමසා බලන්නට ද අවශ්‍යය.

දේශපාලනඥයෙකු නොවී රට යහපත් තැනක් බවට පත්කරන බලවත් බලවේගයක් බවට පත් විය නොහැකිද? අප විමසා බැලිය යුතු පැත්ත එයයි. පවතින අසුබ දේ වෙනස් කරන්නට එක් එක් ක්ෂේත‍්‍රවල බැබලෙන තාරකා වලට අවස්ථා අප‍්‍රමාණව තිබේ. තමන් පැමිණි ගමන ගැන සහ එහිදී ලැබූ අත් දැකීම් සමාජයට බෙදා දෙන්නට දේශපාලන පක්ෂයකට සම්බන්ධවිය යුතුම නැති අතර පාර්ලිමේන්තුව ඒ වෙනුවෙන් ඇති එකම ස්ථානය ද නොවේ. සමාජයේ ඉහළම තැනට පැමිණි ක‍්‍රීඩකයෙකුට නවක ක‍්‍රීඩක ක‍්‍රීඩිකාවන් වෙනුවෙන් පුහුණු ක`දවුරක්, වෛද්‍ය විද්‍යාවෙන් ඉහළටම පැමිණි විද්වතෙකු තම දැනුම හා අත්දැකීම් උපයෝගී කරගෙන වෛද්‍ය සායනයක් පැවැත්විය හැකි නම් කොපමණ වැදගත්ද? නළු නිලියන්ට හෝ රංගධරයන්ට සමාජය දැනුවත් කරන අතර නිසි අභ්‍යාස ගැන දරුවන්ට කියා දිය හැකිය.

මෙවැනි දේ සිදු නොවන බවක් මෙයින් ප‍්‍රකාශ කරන්නේ නැත. යහපත් මිනිසුන් තමන්ගේ ක්ෂේත‍්‍රවල සිටිමින් දැනුම සහ අවබෝධය බෙදාදෙමින් ජනතා සිත් සතන් ධෛර්යවත් කරමින් සිටිති. මෙම සිදුවීම තවත් ඉදිරියට යා යුතුය. දේශපාලනයට පැමිණ එහි වේදිකාවක තර්ක කිරීමට වඩා රට වෙනුවෙන් කරන්නට කාර්ය භාරයක් ඇති බව දිදුලන තාරකා අතර පැතිර යා යුතු අදහසකි.දේශපාලනයට පැමිණ දේශපාලන වේදිකාව තුළ බලවත් විවේචනයට ලක්වීමට වඩා අලූත් මගක් සොයා යන සමාජයේ ඉහලින් බැබලෙන තාරකා වලට මාධ්‍ය ඇගයීම ද ප‍්‍රමාණවත් ආකාරයට තිබිය යුතුය. දේශපාලනඥයන්ගේ සරු නැති අදහස් වලට වැඩි ඉඩක් දී දේශපාලනඥයන් නඩත්තු කිරීමට වඩා එපිට ලෝකයක් ඇති බව දකින්නට කැමැති විශාල ජන කොටසකට සිදුවන අගතිය ගැන සාකච්ඡා කළ යුතුය.

Advertisements