2012.10.17 – ලංකාදීප – මිලින්ද මොරගොඩ

අසමාන පුද්ගලයෝ මහත් කීර්තියට පත් වෙති. ඔවුන්ගේ ශක්තිය හා ධෛර්යය රටකට බොහෝ වැඩදායකය. මෑත කාලය තුළ මෙරට ක‍්‍රීඩක ක‍්‍රිඩිකාවෝ ශ‍්‍රී ලංකාවේ අභිමානය ඉහළටම නැංවූහ. ක‍්‍රිකට් ක‍්‍රිඩාව ඒ අතරින් ප‍්‍රධානය. මූලික ගුරු හරුකම් ලැබීමෙන් පසු එහිම නිරතව, නිතර කරන අභ්‍යාසයෙන් දක්ෂතා මනාව වැඩෙයි. කැපවීම එහිලා ප‍්‍රධානය. තරග වැදී, ජය පරාජය අත් විඳ, එයින්ම අත්දැකීම ලැබ විශිෂ්ටයෝ බිහිවෙති. ශ‍්‍රී ලංකා කි‍්‍රකට් කණ්ඩායම පලපුරුද්ද අතින් ද, රට නියෝජනය කිරීමේ දී ද පෙන්වන අනන්‍යතාවය හමුවේ අත්පත් කර දෙන්නේ මහත් ගෞරවයකි.

පසුගියදා නිමාවට පත්  ඕවර විස්ස – විස්ස සීමිත පන්දුවාර ලෝක කුසලානයේ දී ශ‍්‍රී ලංකා කණ්ඩායම අනු ශූරයන් බවට පත්වූහ. මෙම ලෝක කුසලාන තරගාවලි ඉතිහාසයේ හතර වතාවක් අනු ශූරයන් වීම ඉතිහාසයේ  රන් අකුරින් ලියැවෙන සිදුවීමකි. තරගාවලිය මෙරට පැවැත්වීම හා ලාංකික ක‍්‍රීඩකයින් ගේ දක්ෂතා සලකා බැලූ ක‍්‍රීඩා ලෝලීහු ජයග‍්‍රහණයෙන් මෙපිට යමක් බලාපොරොත්තු වූයේ නැත. අවසානය කෙබඳු වුවත්, ධෛර්යයෙන් තරග කිරීම යුතුකමයි. එය මනාව ඉටු කරන ලද නමුත් සමාජයේ යම් කොටස් එහි අඩු ලූහු`ඩුකම් දකින්නට පටන්ගෙන තිබේ. ජයග‍්‍රහණයකදී අයිතිකරුවන් විශාල නමුත් පරාජයේ දී අයිතිකරුවෙකු නැත. කි‍්‍රකට් කණ්ඩායම විවේචනයකට ලක්ව ඇත. පැයකට කලින් රටක වීරයන් වූ එකොලොස් දෙනෙකු පැය හමාරවනවිට අවලංගු කාසි සේ නොතැකා හැරීම යුතු නැත.

ආසියාවේ රටවල ක‍්‍රීඩා ලෝලීන්ට සාමාන්‍යයෙන් දරා ගැනීමේ ශක්තිය අඩුය. ඉන්දියාවේ හෝ පකිස්තානයේ නම් ක‍්‍රීඩා ලෝලීන් හැසිරෙන ආකාරය ඉතා දරුණුය. පිටියට කඩාවැදීම හා ක‍්‍රීඩකයන් ට හිංසා කරමින් ඔවුන් ගේ දේපොල පවා විනාශ කළ අවස්ථා ඇත. ආවේග දරා ගැනීමට නොහැකි මානසිකත්වය එයට හේතුවයි. එවැනි අපකීර්තිමත් සිදුවීම් සමග සස ඳ න විට ලාංකික ක‍්‍රීඩා ලෝලිහු නරකම නැත. නමුත් ජය පරාජය සමව වි ඳි මින් තරග කරන ලද ක‍්‍රීඩකයන්ට නිසි ගරු සරු දැක්වීම අපගේ යුතුකමකි. පරාජයේ දී පසෙකට ලා, ජය ගන්නා විට ඉහළම තැනෙකට ඔසවා තැබීම අට ලෝ දහමට අනුකුළ එකක් නම් නොවේ.

සමාජයක් වශයෙන් අප නැඹුරු වෙමින් සිටින්නේ හො ඳ පැත්තකට නොවේ. කි‍්‍රකට් ක‍්‍රීඩාවේ පමණක් නොව සෙසු අංශ වල පවා ප‍්‍රයෝජනයට ගෙන ඉතා ඉක්මනින් අමතක කරන ස්වභාවයක් ඇත. තනතුරක සිටින තෙක් නිතර කතා කරයි. හමුවෙයි. බලය නැති දා තකන්නේ නැත. සමාජය ඉතා ඉක්මනින් වීරයන් බිහි කරන අතර සුළු ප‍්‍රමාදයකින් ඔවුන් අමතක කරයි. දියුණු වෙමින් පවතින සමාජ රටාව තුළ මෙවැනි පැති ගැන වඩා නියමාකාරයෙන් තක්සේරු කිරීමේ වගකීමක් සමාජයට තිබේ.

රටට විශාල මෙහෙවරක් කළ පරමාදර්ශී චරිත මතකයේ තබා ගන්නේ නැත. ඔවුන් කළ මෙහෙවර අධ්‍යයනය කිරීම අලූත් පරපුර අතින් ගිලිහී ඇති යුතු කමකි. සමාජයෙන් ගරු බුහුමන් ලබන තැනට පාත‍්‍රවිම පහසු නැත. සමාජයට පහසුවක් වී ඇත්තේ දිනාගත් ජයග‍්‍රහණ අමතක කිරීමයි. සමාජයේ ඇතැම් කොටස් ජනප‍්‍රිය චරිත වටා ගැවසෙන අතර ගරුත්වය ගැන සැලකිල්ලක් නැත. ජනප‍්‍රියත්වයට වඩා සමාජ ගරුත්වය වැදගත්ය. තාවකාලිකව ජනප‍්‍රිය චරිතවලට වඩා සමාජයට වැදගත්වන්නේ පරමාදර්ශයයි. වීරයන්ට ගරු කරන අතර පරමාදර්ශී චරිත අගය කරන්නට අමතක නොකිරීම මැනවි.

Advertisements